Акафисты - 24 июня 2025
Кондак 1
Избранному от людей израилевых во Христова Апостола на уловление человеков, чудному Варфоломею, пения похвальная принесем, вернии, яко оставльшему дом свой, нищету Христову возлюбившему и Христово учение паче учения еврейских книжников избравшему. Ты же, святый Апостоле, всех нас, память твою честную празднующих, не остави своим предстательством и заступлением, да благодарными устнами вопием ти: Радуйся, святый славный и всехвальный Апостоле Варфоломее.
Икос 1
Ангелов Господь и Спаситель всего рода человеча, провидев чистоту души твоея, святый Варфоломее, благоволи избрати тя во единаго от обоюнадесяте и нарещи Апостолом Своим. Мы же, дивящеся духовным дарованиям твоим, прославляем тя сице:
Радуйся, Варфоломее, великий Христов Апостоле.
Радуйся, учениче Христов усерднейший.
Радуйся, яко сердце свое непорочно имел еси.
Радуйся, яко лукавыя наставления старцев еврейских отвергл еси.
Радуйся, яко всем сердцем своим Христу прилепился еси.
Радуйся, яко вся мирския блага ни во чтоже вменил еси.
Радуйся, яко отца и матерь, братию и сестры своя ради Господа оставил еси.
Радуйся, яко во следовании за Христом истинное блаженство восприял еси.
Радуйся, учением Христовым пленивыйся.
Радуйся, в пути Христовом благо Царствия Небеснаго предвкусивый.
Радуйся, благогласнейший проповедниче Христова учения.
Радуйся, верный слуго Господь.
Радуйся, святый славный и всехвальный Апостоле Варфоломее.
Кондак 2
Видя чудная дела Господа своего и Учителя и слыша из уст Его исходящее небесное учение, ясно уразумел еси, святый Варфоломее, со Апостолом Петром и прочими Апостолы вкупе, яко глаголы живота вечнаго Учитель ваш имать, и яко Он есть воистину Сын Бога Живаго, Емуже вся земля едиными усты взывати научается: Аллилуиа.
Икос 2
Разумному Солнцу Правды вседушевно восхотел еси, святый Апостоле Варфоломее, поработати и радостно приял еси заповедь Господа о проповеди овцам погибшим дому Израилева; сего ради потщался еси со всеми Апостолы по весям и градом Израилевым ходяще, болящия исцеляти, прокаженныя очищати, мертвыя воскрешати, бесы изгоняти и всем проповедати и вещати, яко приблизися Царствие Небесное. Воспоминающе апостольския труды твоя, сия похвальная восписуем ти:
Радуйся, усердный заповедей Христовых исполнителю.
Радуйся, всего себе Господеви послушно поработивый.
Радуйся, яко не стяжал еси ни злата, ни сребра, ни меди при поясе своем.
Радуйся, яко ни пиры в путь, ни двою ризу, ни жезла с собою, по заповеди Христа, не брал еси.
Радуйся, яко мир Христов в домы вносил еси.
Радуйся, яко с добрыми добре пребывал еси.
Радуйся, яко от неприявших мира Христова паки себе мир приимал еси.
Радуйся, яко учение Господа своего усердно проповедал еси.
Радуйся, ты бо, по слову Христову, яко овча посреде волков с Евангелием шествовал еси.
Радуйся, яко болезни неисцельныя целил еси.
Радуйся, яко духов лукавых изгонял еси.
Радуйся, яко прокаженныя очищал еси и мертвыя воскрешал еси.
Радуйся, святый славный и всехвальный Апостоле Варфоломее.
Кондак 3
Сила духовная Божественнаго учения всесовершенно плени тя, славный Варфоломее, сего ради никояже сладости мира сего восхотел еси вкушати, токмо единаго истиннаго блага желал еси присно наслаждатися, во еже слушати словеса Учителя своего, созерцати сладкий лик Господа своего, зрети дивное служение Его скорбящим и обремененным и во веки со всеми избранными Его взывати Ему ангельскую песнь: Аллилуиа.
Икос 3
Имея богатство неизреченныя благости, Спас мира и Господь, ведый, яко прииде Ему час, да прейдет от мира сего ко Отцу, тайноводствова Своя, сущия в мире, ученики, показуя им прежде Креста Своего путь добрейший смирения, начат умывати нозе другом Своим и отирати лентием; таже хлеб и вино благослови Господь и Таинство Причащения в Церкви Своей на веки утверди. Сия видев святый Варфоломей с прочими Апостолы, всем сердцем своим вожделе Учителю своему подражати и, в Его воспоминание, Святое Таинство Причащения присно совершати. За таковое твоего сердца благое изволение ублажаем тя, святый Апостоле, восхвалениями сими:
Радуйся, добрый и послушный Христов учениче.
Радуйся, благоговейный исполнителю Христовых заповедей.
Радуйся, яко сподобился еси прияти омовение ног своих от Господа твоего и Учителя.
Радуйся, яко на Тайной Вечери Тела и Крови Христовых приобщился еси.
Радуйся, Христову тайноводству научивыйся.
Радуйся, заповедь новую от Господа приявый, во еже душу свою положити за други своя.
Радуйся, смирения Христова истинный служителю.
Радуйся, словом Христовым очищенный.
Радуйся, за Господа и Христа жизнь свою положити обещавый.
Радуйся, любве Христовы проповедниче.
Радуйся, о всем мире теплый к Богу молитвенниче.
Радуйся, всех скорбящих и обремененных заступниче.
Радуйся, святый славный и всехвальный Апостоле Варфоломее.
Кондак 4
Буря велиих смущений найде на тя, святый Апостоле, егда видел еси Господа своего и Учителя от предателя лестию лобзаннаго, в руце лютых и беззаконных судей преданнаго и на смерть позорную осужденнаго; егда же услышал еси святых жен мироносиц, радостную весть о Воскресении принесших, и егда своима очима сподобился еси зрети воскресшаго Господа, язвы Своя на пречистем теле Своем показующаго, тогда со всеми Апостолы, печаль свою на радость преложив, воззвал еси велегласно Господу Христу, из мертвых воскресшему: Аллилуиа.
Икос 4
Слышал еси, славный Варфоломее, Божественныя глаголы Господа, по воскресении Своем отверзшаго Апостолом ум разумети Писания, яко тако подобаше пострадати Христу и воскреснути из мертвых в третий день; видел еси Господа своего с горы Елеонския во славе вознесшагося и с радостию велиею возвратился еси во Иерусалим, хваля и благословя Бога. За таковое твое радостное прославление Господа, паки во славе грядущаго судити живым и мертвым, воспеваем ти, святый Апостоле, похвалы сицевыя:
Радуйся, воскресшаго Господа видети сподобивыйся.
Радуйся, гвоздиным язвам на пречистем теле Его усердно поклонивыйся.
Радуйся, яко во Христовом воскресении уверился еси.
Радуйся, яко явлением Его всесладким мудрости и разума исполнился еси.
Радуйся, со Христом, по воскресении Его, общия трапезы насладивыйся.
Радуйся, от Него Писания пророческая разумети научивыйся.
Радуйся, на горе Елеонстей, яко в преддверии небеснем, со Учителем своим обретыйся.
Радуйся, благословение Господне получити сподобивыйся.
Радуйся, Божественнаго вознесения свидетелю.
Радуйся, светлых небожителей собеседниче.
Радуйся, великия благодатныя радости в день вознесения причастниче.
Радуйся, хвалы и прославления Господа светлый источниче.
Радуйся, святый славный и всехвальный Апостоле Варфоломее.
Кондак 5
Богоглаголивый Лука явственно всей вселенней повествует, яко собранным во Иерусалиме всем учеником Христовым, внезапу бысть шум с небесе, яко носиму дыханию бурну, и исполни весь дом, идеже ученицы Его бяху седяще, и явишася им разделени языцы, яко огненнии, седе же на едином коемждо их, и исполнишася вси Духа Свята, и начаша глаголати иными языки, якоже Дух даяше им провещавати. С прочими святыми Апостолы Христовыми в Сионстей горнице и ты был еси, блаженне Варфоломее, и дара языка сподобился еси получити, и с велиею радостию и крепким дерзновением, Духом Святым водимый, научился еси иными языки в Троице славимому Богу непрестанно взывати: Аллилуиа.
Икос 5
Увидел еси, святый Апостоле Варфоломее, в павшем ти жребии проповедати Христово Евангелие в Сирии, Асии и прочих соседних странах со Апостолом Филиппом вкупе, повеление Самаго Господа. Сего ради тягостных путей апостольских не убоялся еси, страданий за Господа Христа не устрашился еси и, купно с Филиппом, единаго Господа в сих странах проповедал еси; тогда и Лидийския и Мизийския грады и веси оглашени быша проповедию апостольскою. Дивящися сим благовестническим трудом твоим, сице радостно тебе глаголем:
Радуйся, неленостный исполнителю заветов Христовых.
Радуйся, безбоязненный проповедниче Христова Евангелия.
Радуйся, яко со Апостолом Филиппом и сестрою его Мариамною по градам и весям Асийским и Лидийским с благовестием шествовал еси.
Радуйся, яко со Апостолом Иоанном Богословом благодатными утешении наслаждался еси.
Радуйся, неустанный к Богу молитвенниче.
Радуйся, дара любве к Богу и людем усердный приумножителю.
Радуйся, покаяния учителю.
Радуйся, смирения наставниче.
Радуйся, идолов сокрушителю.
Радуйся, великих Таин Божиих провозвестниче.
Радуйся, огненными словесы своими слух языческих людей огласивый.
Радуйся, ко Христу детоводителю их прилежный.
Радуйся, святый славный и всехвальный Апостоле Варфоломее.
Кондак 6
Проповедницы учения Христова усерднейшии явишася святии Варфоломей, Филипп и блаженная Мариамна, егда со Христовым Евангелием внидоша во град фригийский Иераполь, иже бе исполнен мерзких идолов, ослепленнии же людие его боготвориша змии и ехидны. Первее святии Апостоли, со Иоанном Богословом вкупе, велию ехидну молитвою своею победиша и копием умертвиша; послежде же день и нощь ко славе Божией труждающеся, научиша многия воспевати купно с ними песнь хвалебную Господеви: Аллилуиа.
Икос 6
Возсия обильно свет учения Христова во граде Иераполе, егда святый Варфололей, с Филиппом и Мариамною вкупе, отверзоша очи некоему Стахию, четыредесят лет слепотствующему, жену Анфипата Иерапольскаго, змием угрызенную, от одра смертнаго воздвигоша, еще же и многи недужныя исцелиша и бесныя уврачеваша. Анфипат же злый, ярости исполнися, егда услыша, яко жена его веру Христову прият, повеле святых Апостолов лютым мукам предати. Мы же, воспоминая сия славныя страдания и подвиги во славу Христа, восхваляем святаго Апостола Варфоломея всеусердно:
Радуйся, Духа Святаго сосуде вседрагий.
Радуйся, велиих чудес совершителю.
Радуйся, слепым зрение даровавый.
Радуйся, хромым благошествие устроивый.
Радуйся, от укушения ядовитых змий целителю.
Радуйся, бесов прогонителю.
Радуйся, неустрашимый исповедниче всесладкаго имене Христова.
Радуйся, купно с Филиппом на смерть осужденный.
Радуйся, на стене идольскаго капища распятый.
Радуйся, силою Божиею невредим сохранивыйся.
Радуйся, чудесы своими многи ко Христу обративый.
Радуйся, Стахия во епископа Иерапольскаго поставивый.
Радуйся, святый славный и всехвальный Апостоле Варфоломее.
Кондак 7
Хотя вси концы вселенныя учением Христовым огласити, святый Варфоломей, от лютых гонений Анфипата Иерапольскаго избавленный, с проповедию Христовою, Духа Святаго повелением, прииде во Индийския страны, идеже во славу Христову нимало времени потрудися, шествуя из града во град, из веси в весь, благосвествуя мир Христов, исцеляя болезни неисцельныя и научая люди стран Индийских оставити идолы безстудныя, единому же Богу, благодеющему всем, взывати: Аллилуиа.
Икос 7
Дивное благопопечение о людех стран Индийских явил еси, святый Апостоле, егда насельники стран сих просветив и Церковь тамо устроив, Евангелие от святаго Матфея, с собою носимое, на язык их преложи, и самое то Евангелие, от Матфея написанное, у нихже остави. Сего ради просвещеннии тобою людие стран Индийских благодарно воспеваху ти, святый Варфоломее, тако:
Радуйся, великий наш Апостоле.
Радуйся, во Христе отец наш чадолюбивый.
Радуйся, муками рождения о нас болезновавый.
Радуйся, Христа Господа в нас вообразивый.
Радуйся, идольскую лесть обличивый.
Радуйся, ко истинному свету вся ны наставивый.
Радуйся, словеса Евангелия Христова нам оставивый.
Радуйся, Церкве Божия устроителю.
Радуйся, неустанный о нас пред Престолом Божиим предстоятелю.
Радуйся, о всем мире теплый пред Богом ходатаю.
Радуйся, крепкое наше упование.
Радуйся, о нашем спасении изрядный попечителю.
Радуйся, святый славный и всехвальный Апостоле Варфоломее.
Кондак 8
Странно есть неверующим слышати, како святый Апостол Варфоломей, светом истины Христовы осиявый страны Индийския, паки новую ниву, Христовым учением невозделанную, обрете, и на конец жития своего в Великую Армению устремися, да просветит и зде люди, во тьме и сени смертней седящия, и да научит их единому Творцу и Господу благодарными усты воспевати: Аллилуиа.
Икос 8
Весь духом горя о славе Господней, прииде святый Апостол Варфоломей в Великую Армению и усердно воззва в молитве своей ко Господу, да посрамлени будут беси, во идолех страны тоя обитавшия, и да будут ниспровергнуты бездушнии идоли; и не тща бе молитва святаго Апостола: беси умолкоша, идоли падоша, людие же сего бесовскаго мучительства и безумия избавльшеся, восхваляху святаго просветителя своего сицевыми радостными воззвании:
Радуйся, Апостоле, красными ногами своими землю нашу освятивый.
Радуйся, святую истинную веру всем нам возвестивый.
Радуйся, бесов изгонителю.
Радуйся, идолов сокрушителю.
Радуйся, в молитве и дерзновении пламенеющий.
Радуйся, во святем служении Господу добрый пример нам показующий.
Радуйся, дивный Христов благовестниче.
Радуйся, преславный чудотворче.
Радуйся, болезни наша врачующий.
Радуйся, скорби наша разгоняющий.
Радуйся, всех нас истинно возлюбивый.
Радуйся, всем нам путь ко спасению показавый.
Радуйся, святый славный и всехвальный Апостоле Варфоломее.
Кондак 9
Вси людие Великия Армении зело удивляхуся, зряще чудеса и знамения тобою, святый Апостоле, совершаемая; егда же видеша идолы падшия, духи нечистыя изгонимыя, славляху Бога, дивнаго во святых Своих, и воспеваху Ему благодарными усты: Аллилуиа.
Икос 9
Витийствующий язык человеческий не возможет достойно восхвалити болезни и труды твоя, знамения и чудеса, святый Апостоле, в Велицей Армении бывшая; сила же знамений сих даже до царева дому достиже, егда из дщере царевой молитвою твоею бес изгнася. Егда же царь и вси людие твою во Христе нелицемерную нищету узревше, обратишася ко Христу, тогда вся Великая Армения от царева дому и до обиталища бедных огласися сицевыми радостными и хвалебными пении тебе, великому Апостолу и чудотворцу:
Радуйся, чудотворче предивный.
Радуйся, всех болящих врачу безмездный.
Радуйся, славу Христову паче земных сокровищ возлюбивый.
Радуйся, о спасении душ человеческих прилежавый.
Радуйся, царя Полимия, царицу и дщерь их ко Христу обративый.
Радуйся, и царедворцы знатныя, и от простых людей нимало святым Крещением просветивый.
Радуйся, нищету духовную и телесную возлюбивый.
Радуйся, славный безсребрениче.
Радуйся, Великия Армении просветителю.
Радуйся, отче наш чадолюбивый.
Радуйся, райския двери нам отверзающий.
Радуйся, от пути погибельнаго нас исхищающий.
Радуйся, святый славный и всехвальный Апостоле Варфоломее.
Кондак 10
Спасению новых и новых людей работая, достигл еси, святый Апостоле Варфоломее, блаженнаго конца жития своего: жрецы бо идольстии в Велицей Армении видяще, яко препитания своего лишахуся, научиша царева брата, лютаго Астиага, да погубит тя, святый Апостоле. Сей же, неистовый, предав тебе во граде Альбане многим мукам, повеле на кресте стремглав распяти тя, да престанут уста твоя вещати учение Христа распятаго; ты же, Апостоле, и на кресте радостно взывал еси Господеви: Аллилуиа.
Икос 10
Царя и Господа не престал еси проповедати, святый Апостоле, усты своими и вися стремглав на кресте: учил бо еси собранныя на позор сей люди твердо за веру Христову стояти, согласно заповедем Евангельским жити и неверныя ко Христу привлекати. Мы же, дивящеся укрепляющей тя силе Божией и твоему, святый Апостоле, мужеству, в похвалу тебе сице глаголем:
Радуйся, славный Христов мучениче.
Радуйся, Христова учения исповедниче дерзновенный.
Радуйся, устами своими даже до смерти истину Божию проповедавый.
Радуйся, терпением своим всю вселенную удививый.
Радуйся, в смертный час твой тысящи людей ко Христу привлекий.
Радуйся, явный благодатныя силы Христовы свидетелю.
Радуйся, позор крестныя смерти, яко победный венец, радостно понесший.
Радуйся, в час смертных мучений своих с Господем в единении пребывый.
Радуйся, в смертном часе райския сладости на земли предвкусивый.
Радуйся, в сей райстей сладости Божественнаго естества истинный причастниче.
Радуйся, терпения усердный учителю.
Радуйся, всяких добродетелей вместилище.
Радуйся, святый славный и всехвальный Апостоле Варфоломее.
Кондак 11
Пение всеумиленное приносим тебе, славный Апостоле Христов Варфоломее, смертный твой час на древе крестнем воспоминающе, дивимся твоему священному за Христа заколению, со слезами ублажаем твою кончину, егда мучитель лютый повеле и кожу с твоего честнаго тела содрати; ты же, святый Апостоле, не престал еси Господа восхваляти до того блаженнаго часа, егда с кожею твоею глава твоя, велением мучителя, усечена бысть, чистая же душа твоя, святый Апостоле, восхищена бысть на небеса воздавати славу Господеви и со светлыми небожители во веки взывати Ему: Аллилуиа.
Икос 11
Свет велий во исцеление немощей человеческих возсия от честных мощей твоих, славный Апостоле, во граде Альбане, егда вернии, вземше по кончине твоей со креста честное тело твое, во оловянней раце благоговейно, вкупе с главою и кожею, положиша. Егда же невернии бесов служителие узреша, яко мнози в той стране от неверных ко Христовой Церкви прилагахуся, ввергоша в море честныя мощи твоя: тии же во оловянней раце, аки в легцей ладии, по водам понесошася, дондеже пристаху ко острову Липару, идеже епископ Агафон, по Божию откровению, с народом и клиром с радостию сия прият и во храме благоговейно постави, воспевая тебе сице:
Радуйся, славный Апостоле Христов.
Радуйся, верный самовидче Бога Слова и слуго Его.
Радуйся, мудрый Евангелия Христова проповедниче.
Радуйся, чудес неистощимый источниче.
Радуйся, яко мощи твоя от востока и до запада имя Господне восхвалиша.
Радуйся, яко шествием мощей твоих море освятися.
Радуйся, Сирии и Асии просветителю.
Радуйся, Иераполя фригийскаго Апостоле.
Радуйся, яко с проповедию Христовою даже до Индии дошел еси.
Радуйся, яко насельников брегов моря Хвалынскаго светом Христова учения просветил еси.
Радуйся, яко Великую Армению ко Христу привел еси.
Радуйся, яко и нас пришествием мощей твоих сладостно утешил еси.
Радуйся, святый славный и всехвальный Апостоле Варфоломее.
Кондак 12
Благодать от Господа достойно подражати житию твоему и прославляти болезни и труды твоя, подаждь нам, святый Апостоле, якоже иногда Иосифу Песнописцу, егда в навечерие праздника твоего явился еси ему во олтари и святым Евангелием благословил еси его, да и мы молитвами твоими, благодатию Божиею озареннии, купно со всею вселенною Господеви со умилением взываем: Аллилуиа.
Икос 12
Поюще твое за Христом последование, восхваляем дивная апостольския труды твоя, благоговейно чтим двукратное твое за Христа распятие, ублажаем честныя твоея главы отсечение, славим неисчетная чудеса от честных мощей твоих и в похвалу велегласно тебе глаголем:
Радуйся, проповедию твоею многи концы вселенныя огласивый.
Радуйся, многия люди ко Христу приведый.
Радуйся, мудрый Евангелия Христова проповедниче.
Радуйся, Христовых заповедей твердый исполнителю.
Радуйся, яко жителие острова Липара и града Беневента, идеже мощи твоя почивают, яко своего Апостола тя почитают.
Радуйся, яко подвигам твоим вся вселенная дивится.
Радуйся, во Христе отец наш многопопечительный.
Радуйся, Апостоле, о нашем спасении зело рачительный.
Радуйся, яко в день Страшнаго Суда Христова возсядиши на единем от обоюнадесяте престолов, да судиши со Христом всю вселенную.
Радуйся, яко за праведников ходатаем пред единым Судиею и Господем в той час явишися.
Радуйся, славных дел Божиих возвестителю.
Радуйся, злых козней сатанинских сокрушителю.
Радуйся, святый славный и всехвальный Апостоле Варфоломее.
Кондак 13
О святый славный и всехвальный Апостоле Варфоломее! Приими сие от нас, недостойных, приносимое тебе хвалебное пение, и якоже ты сам всем сердцем, душею и телом предал еси себе на служение Господеви своему и Учителю, тако и нас, молитвами твоими, сподоби жизнь свою во славу Господню устрояти, вся от Него посылаемая со благодарением приимати, и тако тебе подражающе, вечное Царствие наследовати и Господеви, Творцу нашему и Промыслителю, с тобою и всеми святыми во веки воспевати: Аллилуиа.
(Этот кондак читается трижды, затем икос 1 и кондак 1).
Молитва
О преславный Апостоле Христов Варфоломее, душу за Христа предавший и кровию твоею пажить Его удобривший! Услыши чад твоих молитвы и воздыхания, сердцем сокрушенным ныне приносимыя. Се бо беззаконьми омрачихомся, и того ради бедами, якоже тучами, обложихомся, елея же добраго жития обнищахом зело, и не возможем противитися волком хищным, иже расхищати наследие Божие дерзостно тщатся. О, сильный! Понеси немощи наша, не отлучайся духом от нас, да не разлучимся в конец от любве Божия, но крепким заступлением твоим нас защити, да помилует Господь всех нас молитв твоих ради, да истребит же рукописание безмерных грехов наших, и да сподобит со всеми сСвятыми блаженнаго Царствия и брака Агнца Своего, Емуже честь и слава, и благодарение и поклонение во веки веков. Аминь.
Кондак 1
Избранный чудотворче, преславный угодниче Христов, скорый помощниче и теплый молитвенниче о всех, с верою и любовию просящих твоего заступления, восхваляем тя любовию, Ефреме преподобне. Ты же яко имеяй дерзновение ко Господу, со Аркадием блаженным, моли о спасении нас поющих ти: Радуйся, Ефреме чудотворче, преподобне отче наш.
Икос 1
Ангелов подражатель явился еси, преподобне и богоносне отче наш Ефреме, ангельски поживый на земли, и нам оставивый образ совершенства духовнаго. Сего ради прослави тя нетлением и чудесы Христос Бог, Емуже предстоиши ныне во славе невечерней Царствия Небеснаго, от нас же, чтущих тя, слышиши пение таковое: Радуйся, яко любве ради Господа твоего, всякое наслаждение земное оставил еси. Радуйся, яко вся блага мира сего Христа ради презрел еси. Радуйся, яко богатство нетленное обрел еси. Радуйся, яко иго Христово благое и легкое возлюбил еси. Радуйся, яко во плоти аки безплотен пожил еси. Радуйся, яко честную и боголюбезную чистоту непорочно сохранил еси. Радуйся, яко узкими враты в пространство Царствия Небеснаго возшел еси. Радуйся, яко равноангельскую честь достойно приял еси. Радуйся, яко венец неувядаемый от Господа восприял еси. Радуйся, яко на небеси и на земли прославлен еси. Радуйся, Ефреме чудотворче, преподобне отче наш.
Кондак 2
Видя брата своего Георгиа, со благоверным князем Борисом убиенна, главу братню, яко сокровище многоценно восприяв, хранил еси, и взирая на ню, суету благ мира сего, и час свой смерный выну помышлял еси. Темже мир и вся благая его оставив, инок был еси, да единому Богу живеши, поя Ему: Аллилуиа.
Икос 2
Разумом свыше просвещенным наставлял еси духовная чада твоя к богоугождению истинному, и любезно принимал еси желавшыя подвизатися вкупе с тобою во спасение, преподобне отче Ефреме, спасительнаго пути наставниче предобрый. Приими убо и нас под твой отчий покров, и молитвами твоими помози нам спасение вечное унаследовати, да тебе восхваляем сице: Радуйся, алчущым и жаждущым правды, глаголов живота вечнаго возвестителю. Радуйся, ищущым пути спасительнаго указателю. Радуйся, мудрый к горнему царствию предоводителю. Радуйся, обуреваемых страстьми добрый кормчию. Радуйся, во благочестии труждающихся великий помощниче. Радуйся, немудрых благоискусный учителю. Радуйся, теплый о всем мире предстоятелю. Радуйся, усердный и богоприятный о душах наших молитвенниче. Радуйся, Ефреме чудотворче, преподобне отче наш.
Кондак 3
Силою Господа, умудряющаго во спасение, просвещенный, гору высоку, яко место богоизбранна селения иноческаго обрел еси: на нейже обитель во славу богопрославленных страстотерпцев Бориса и Глеба создав, ревнующыя о восхождении от веры в веру, и от добродетели к добродетели собрал еси, купно с тобою пети в Троице славимому Богу: Аллилуиа.
Икос 3
Имуще тя, отче Ефреме, скораго в бедах помощника благовернии людие, в напастех и скорбех тя на помощь молитвенно призывают, и дары благости Божией молитвами твоими от Щедродавца Бога обильно приемлюще, тебе от любве теплыя хвалебно вопиют: Радуйся, верно тебе молящихся скорый послушателю. Радуйся, многажды прошения наша исполнением их предваряяй. Радуйся, болящих врачу благоискусный и безмездный. Радуйся, скорбящих благоприятное утешение. Радуйся, унывающих благодатное ободрение. Радуйся, душетленных страстей прогонителю. Радуйся, бесноватых от насилия демонскаго свободителю. Радуйся, безпомощных скоропредстательный помощниче. Радуйся, иноков богомудрый руководителю. Радуйся, полка духовных воинов воеводо изрядный. Радуйся, Ефреме чудотворче, преподобне отче наш.
Кондак 4
Бурею страстей и треволнений многомятежнаго мира непоколебимь, в тихое пристанище спасения душу твою управил еси, преподобне отче: вся бо благая и красная мира презрев, и странника в мире себе помышляя, имение твое нищым раздал еси, и странноприимство возлюбил еси. Темже Аврааму подобник быв, на лоне его во Царствии Небеснем ныне пребываеши, поя Богу: Аллилуиа.
Икос 4
Слышавше пастырие Христовы Церкве, яко обитель изрядну воздвигл еси, и иноков лик тамо собрал еси, освятиша тя быти архимандритом, достойную почесть трудом твоим воздающе, и тем подвизающе нас благохвалити тя звании сими: Радуйся, Агнца и Пастыря верный служителю. Радуйся, олтаря Господня непорочный предстоятелю. Радуйся, богомудрый иноков начальниче. Радуйся, истиннаго смирения наставниче. Радуйся, совершеннаго терпения подвижниче. Радуйся, слезнаго умиления преисполненный. Радуйся, даров Святаго Духа честное вместилище. Радуйся, Пресвятыя Троицы избранное жилище. Радуйся, благочестия утверждение. Радуйся, Православия похвало. Радуйся, Ефреме чудотворче, преподобне отче наш.
Кондак 5
Боготечную звезду узрев тя, преподобне отче Ефреме, ученик твой Аркадий, учением и житием светло сияюща, последова зари светлаго жития твоего, и яко светильника держася тебе, приведеся к неприступному свету, достиже непостижимаго Бога, и возрадовася, вопия Ему купно с тобою: Аллилуиа.
Икос 5
Видев тя, преподобне отче Ефреме, святый ученик твой Аркадий, яко ангела Божия облеченнаго в преподобие и святыню, в юностных летех поревнова многотрудному твоему житию, и добродетельми достиже в мужа совершенна в подвизех духовных. Темже ныне вкупе с тобою предстоит Престолу Вседержителя во славе вечней, с нимже помолися ко Творцу о спасении нас грешных, поющих тебе: Радуйся, правило веры и благочестия. Радуйся, образе целомудрия и воздержания. Радуйся, постническаго лика украшение. Радуйся, сияющая зевездо в сонме преподобных. Радуйся, иноков пастырю и учителю. Радуйся, и в мире живущих заступниче и покровителю. Радуйся, яко тесный и прискорбный путь паче пространнаго возлюбил еси. Радуйся, яко и возлюбленнаго ученика твоего Аркадиа, тем путем ко Христу привел еси. Радуйся, яко жертву непорочну юношу святаго, Cладчайшему Иисусу посвятил еси. Радуйся, яко с ним славу небесную унаследовал еси. Радуйся, Ефреме чудотворче, преподобне отче наш.
Кондак 6
Проповедуя слово Божие братии твоей, отче Ефреме, всех поучал еси словом и житием твоим, безмолвию, братолюбию, странноприимству, смирению, посту, молитве, и страху Божию, иже есть начало премудрости небесныя, еюже осененный, до старости маститыя не изменил еси правила своего иноческаго, неленостно подвизаяся в молитвах деннонощных и воспевая укрепляющему тя Богу: Аллилуиа.
Икос 6
Возсия нам, яко звезда путеводная, воздержное постническое житие твое, преподобне отче: не тужил бо еси о брашне, еже не поставит нас пред Богом, нерадел еси о доброте ризной, предпочитая благоукрашати душу твою добродетельми. Сего ради нетлением и чудесы прославлен еси от Подвигоположника Христа, от нас же приемлеши сия песненныя хвалы: Радуйся, истинный Евангелиа Христова последователю. Радуйся, не брашно делаяй гиблющее, но приводящее в живот вечный. Радуйся, благодатию Божиею паче, нежели хлебом насыщенный. Радуйся, от источника жизненнаго слова Божия напоенный. Радуйся, потоком слез спасительных орошенный. Радуйся, в ризу спасения облеченный. Радуйся, одеждею нетления одеянный. Радуйся, прежде кончины твоея вся страсти воздержанием умертвивый. Радуйся, прежде умертвия твоего мертв бывый греху. Радуйся, прежде общаго всех Воскресения, от Господа нетлением прославленный. Радуйся, Ефреме чудотворче, преподобне отче наш.
Кондак 7
Хотя верен быти подражатель Агнца Божия, вземшаго грехи мира, кротость и смирение Его себе усвоил еси, отче наш Ефреме, всякия скорби и обиды безропотно терпел еси, ведый, яко скорбьми временными искупуется вечное спасение, и совершеннаго безстрастия достигл еси, во еже пети тебе еще на земли достойно и праведно ангельскую песнь Вседержителю: Аллилуиа.
Икос 7
Дивный воистинну победоносец показался еси на страсти плотския, преподобне отче Ефреме, вся разжженныя стрелы врага спасения человеческаго постом и слезными молитвами угасил еси, и во плоти ангельское житие без преткновения проходил еси, Божиею благодатию укрепляемый. Темже вопием тебе: Радуйся, всякое сладострастие в себе искоренивый. Радуйся, плоть твою духу любомудренно покоривый. Радуйся, бдении всенощными ополчивыйся противу искушений вражиих. Радуйся, пощении неослабными всякое нечистое желание обуздавый. Радуйся, молитвами непрестанными от всякия скверны очистивыйся. Радуйся, всего себе Богу посвятивый. Радуйся, за словеса Господня пути жестоки сохранивый. Радуйся, сеявый слезами, да радость пожнеши присносущную. Радуйся, трезвением неусыпным совершенство духовное стяжавый. Радуйся, Ефреме чудотворче, преподобне отче наш.
Кондак 8
Странника и пришельца помышлял еси себе быти в мире сем не постояннем, преподобне отче, и грядущаго града Иерусалима Небеснаго взыскуя, вся помышления твоя к нему выну возносил еси, ум твой на божественная возложив, и распинал еси плоть твою со страстьми и похотьми, сладце воспевая, яко в тимпане, во умерщвленнем телеси, победную песнь Христу Богу: Аллилуиа.
Икос 8
Весь облеклся еси во вся оружия Божия, яко воин Христов, препоясав чресла твоя истиною, оболкся в броня правды, и обув нозе твои во уготование благовествования мира, восприял еси щит веры и шлем спасения и мечь духовный, иже есть глагол Божий, имже и возмогл еси вся наветы лукаваго победити. Помози убо и нам, отче преподобне, твоими молитвами, противитися искушением вражиим, и подражати тебе в побеждении страстей наших, да тебе зовем: Радуйся, смирением святым гордыню душепагубную поправый. Радуйся, кротостию совершенною ярости пламень погасивый. Радуйся, нищым богатство твое расточивый, и сребролюбие возненавидевый. Радуйся, всякия досаждения и обиды без гнева претерпевый. Радуйся, яко молитвами непрестанными уныние прогнал еси от себе, и достигл еси о Господе радования. Радуйся, яко воздержанием и бдением целомудренно душу и тело твое соблюл еси. Радуйся, яко не леностно всяку добродетель исправил еси. Радуйся, яко победныя почести от Христа Бога свыше приял еси. Радуйся, при жизни и по смерти от Господа чудес даром обогащенный. Радуйся, во благоухании святыни нетленно почиваяй. Радуйся, Ефреме чудотворче, преподобне отче наш.
Кондак 9
Всякое наслаждение плотское возненавидел еси, Ефреме преблаженне, и единаго Бога всем сердцем возлюбил еси: темже и Господь тя возлюби, и чудесы прослави, даровав нам тебе молитвенника благоприятнаго пред благостию Его. Смиренно молим тя, егда имамы предстати пред Судиею Праведным, умоли Его за нас, да не помянет беззаконий наших, и сподобит нас блаженной участи одесную стоящих и вопиющих Ему: Аллилуиа.
Икос 9
Ветии многовещаннии не довлеют изглаголати вся подвиги твоя и чудеса, богомудре отче Ефреме: ибо доброта жития твоего воистину превосходит похвалу человеческую. Обаче мы, любовию к тебе побеждаеми, дерзаем смиренномудренно благохвалити тя пением таковым: Радуйся, святыя Православныя Церкве светильниче немерцаяй. Радуйся, Российсия страны ограждение несокрушимое. Радуйся, Тферския области удобрение благодатное. Радуйся, граду Торжку покрове Богом данный. Радуйся, обители твоея утверждение и похвало. Радуйся, иночествующих ликов пречудная красото. Радуйся, христианскому роду присное утешение. Радуйся, любящым и чтущым тя ходатаю спасения. Радуйся, приводяй грешных ко исправлению. Радуйся, известный умилостивителю Царя Небеснаго. Радуйся, Ефреме чудотворче, преподобне отче наш.
Кондак 10
Спастися нам от погибели вечныя, умоли Всевышняго Творца, угодниче Божий Ефреме, и не лиши нас помощи твоея святыя в час кончины нашея, егда скорби лютыя объимут грешную нашу душу, и дуси нечистии смутят нас привидении своими: тогда явися нам заступник усерден, молитвами твоими избавляя нас от их наветов, и сподобляя лицезрения ангел, и пения с ними Богу: Аллилуиа.
Икос 10
Стену заступления, и молитвенника благоприятна к Богу обретше тя отче Ефреме, благодарение Отцу Небесному усердно возсылаем за вся благодеяния Его, тобою нам обильно являемыя, тебе же предстателю нашему сицевое приносим пение: Радуйся, угодниче Господень, предивный в чудесех. Радуйся, избранниче Христов неутомимый в подвизех. Радуйся, слуго добропослушливый Всевышняго Домовладыки. Радуйся, благий и верный рабе Царя царей. Радуйся, сильный обидимых заступниче. Радуйся, сирых и убогих благонадежное пристанище. Радуйся, душевных и телесных недугов благий целителю. Радуйся, радости нам вечныя известный ходатаю. Радуйся, грешников кающихся с Богом примирителю. Радуйся, небесный наш покровителю. Радуйся, Ефреме чудотворче, преподобне отче наш.
Кондак 11
Пение хвалебное воспеваем тебе, преподобне отче Ефреме, и с любовию припадаем к раце святых и многоцелебных мощей твоих, прославляюще терпеливое житие твое, безмолвие твое высокое, смирение нелицемерное, молитву непрестанную, воздержание совершенное, и чистоту боголюбезную души и тела: ты же, всеблаженне, помози и нам подражати твоим добродетелем, да возможем богоугодно пети Создателю нашему: Аллилуиа.
Икос 11
Светильник добрых дел был еси при жизни, отче преподобне, светильник лучезарный Божия благодати явился еси и по смерти, чудесы сияя и исцеления источая от нетленных мощей твоих, яже по пяти сот девятинадесятих летех, яко сокровище драгоценное, из недр земных целы и благоуханны обретены быша. Тебе убо, сице прославленному от Господа, дары песней духовных приносяще, умиленно зовем: Радуйся, нетления цвете благоуханный и прекрасный. Радуйся, святопроцветший крине рая Иисусова. Радуйся, светлостию чудес твоих мрак душ наших озаряяй. Радуйся, от болезней многоразличных благодатно телеса наша исцеляяй. Радуйся, ран греховных врачу благоискусный. Радуйся, скорбящих сердец утешителю радостотворный. Радуйся, грозный карателю обидящих. Радуйся, обители твоея страже неусыпный. Радуйся, жезл настоятельства в ней до ныне невидимо содержащий. Радуйся, Ефреме чудотворче, преподобне отче наш.
Кондак 12
Благодать великих чудес от Господа приял еси, преподобне отче Ефреме, и по достоянию чудотворец наречен был еси: ибо не токмо при жизни, но и по смерти, величием твоих чудес всех удивляеши, и к славословию всемогущества Христова подвизаеши, во еже пети за тя Верховному чудес Творцу, и святых Святейшему Слову: Аллилуиа.
Икос 12
Поем доблественныя подвиги твоя, добропобедный воине Христов, отче наш Ефреме, ублажаем блаженную кончину твою, и молитвенно торжествуем святую память твою, тебе усердно воспевающе: Радуйся, яко свято и праведно на земли пожил еси. Радуйся, яко воистину ангел земный и человек небесный был еси. Радуйся, яко память твоя с похвалами, и успение со святыми. Радуйся, яко отверзошася тебе врата райская, и вшел еси в радость Господа твоего. Радуйся, яко душу твою Жизнодавец Христос прият в небесная селения. Радуйся, яко и тело твое на земли прославися нетлением и чудесы. Радуйся, яко со безплотными силами горе трисвятую песнь Богу немолчно поеши. Радуйся, яко со пророки и ангелы светло торжествуеши. Радуйся, со святители и мученики прославленный. Радуйся, со преподобными и праведными безсмертия венцем увенчанный. Радуйся, Ефреме чудотворче, преподобне отче наш.
Кондак 13
О преподобне и богоносне отче Ефреме! Тебе молимся, и тебе просим: вонми похвальному пению нашему, тебе от усердия приносимому, и со учеником твоим Аркадием, моли Господа Бога, всея твари создателя, да простит нам согрешения наша вольная и невольная, и сподобит нас Царствия Своего Небеснаго, вопиющих Ему: Аллилуиа.
Этот кондак читается трижды, затем икос 1-й, и кондак 1-й
Молитва святому преподобному Ефрему, Новоторжскому чудотворцу
О священная главо, великий и предивный чудотворче, отче наш Ефреме! К тебе скорому помощнику и усердному о нас молитвеннику смиренно прибегаем, и молитвенно просим тя: нас скорбных и обремененных грехи многими, не остави помощию твоею и заступлением благодатным. Не забуди нас чад твоих, отче священнейший, но поминай нас присно в небесных богоприятных молитвах твоих у Престола Пресвятыя Троицы, идеже со ангелы и всеми святыми предстоиши, и зриши вся наша нужды и беды, яко обуреваемся страстьми и не имамы дерзновения ко Творцу, просити Его о помиловании и спасении. Темже тебе предлагаем яко умилостивителя пред Господом, и тобою уповаем милость Божию и прощение грехов наших от Вседержителя получити, и спасение вечное унаследовати, да славим и поем величие, и благодать и человеколюбие Отца и Сына и Святаго Духа, и твое отеческое заступление, ныне и присно, и во веки веков. Аминь.