Акафисты - 25 июня 2025

Кондак 1

Избранней и предивней угоднице Христове, скорой помощнице и молитвеннице нашей, похвальная воспеваем ти, о нас пред Христом Богом предстательнице. Ты же, яко имущая велие дерзновение ко Господу, молися, да избавит от бед и скорбей ны, зовущия:

Радуйся, святая благоверная княгине, преподобная мати Анно.

Икос 1

Ангелов Творец честную отрасль благочестиваго корене благоверных Российских князей избра тя во образ всем, сияющую верою, любовию, чистотою, да вси, зряще твое богоугодное житие, со благоговением и радостию глаголем ти сице:

Радуйся, яко от младенства благодати Божия исполнилася еси; радуйся, яко в житии твоем добродетельми многими просветилася еси.

Радуйся, правило веры и благочестия; радуйся, образе кротости и смирения.

Радуйся, светило любве и воздержания; радуйся, даров Святаго Духа честное вместилище.

Радуйся, скорбных утешение; радуйся, княгинь и инокинь Российских похваление.

Радуйся, живущих в мире тихое пристанище; радуйся, благочестивых родителей утешение.

Радуйся, градов Твери и Кашина и всея земли нашея украшение; радуйся, ныне с лики ангельскими на небесех Владыце всех предстоящая.

Радуйся, святая благоверная княгине, преподобная мати Анно.

Кондак 2

Провидев Господь ангелоподобное житие твое, яко святое имя Его прославиши и, якоже заповеда святый апостол, бдительна, святолепна, целомудрена, здрава верою, любовию и терпением пребудеши, от юности твоея призва тя пети Ему: Аллилуиа.

Икос 2

Разум небесный тебе даровася, богоизбранная отроковице, непрестанно помышляти о небесных в боголюбивем крове благоверных родителей твоих. Сего ради приими от нас похвалы сия:

Радуйся, родителей благочестивых плод благословенный бывшая; радуйся, добродетели и благочестие их унаследовавшая.

Радуйся, благочестию и молитве от них наученная; радуйся, чтению Божественных Писаний навыкшая.

Радуйся, жития святых и поучения их возлюбившая; радуйся, от святителей ростовских научение приимшая.

Радуйся, с родители твоими благословению и наставлению иереев Господних присно внимавшая; радуйся, аки крин благовонный во Отечествии твоем процветшая.

Радуйся, от младых ногтей твоих страх Божий имевшая; радуйся, от юности твоея горняя мудрствовавшая.

Радуйся, сим путь спасения нам показавшая; радуйся, непоколебимое на Господа Иисуса упование неизменно сохраньшая.

Радуйся, святая благоверная княгине, преподобная мати Анно.

Кондак 3

Сила Вышняго от юности Твоея воистину осеняше тя, и храняше, и возбуждаше на молитвы, пощение и милосердие, во еже благочестивым предком твоим подражати и Господеви воспевати: Аллилуиа.

Икос 3

Имущи благочестивыя родители, прилежала еси богоугодному житию, благодатию Божиею во всяцем деле блазе всегда подкрепляема сущи. Темже дивящеся таковому от юности твоея рачению, со умилением зовем ти:

Радуйся, яко Господь Бог благоизволи от юности освятити тя; радуйся, яко Богатый милостию обогати тя благодатию Своею.

Радуйся, яко Господь исполни тя страха Божия, премудрости и разума; радуйся, яко от младенчества Господеви прилепилася еси.

Радуйся, яко со страхом Божиим и усердием храму Божию и службам церковным присно прилежала еси; радуйся, яко и в доме неусыпно правило молитвенное исправляла еси.

Радуйся, яко всякое дело твое с молитвою сопрягашеся; радуйся, яко труд твой благодарением Богу скончавашеся.

Радуйся, чистоты душевныя и телесныя хранительнице; радуйся, неустанным благотворением и милостынями верным скорая помощнице.

Радуйся, девам чистым премудрая устроительнице; радуйся, чадом нашим добрая учительнице.

Радуйся, благоверная княгине, преподобная мати Анно.

Кондак 4

Буря бед и напастей утесняше тогда Отечество наше и веру православную, и вси бедствоваху от нашествия иноплеменник и междоусобныя брани. Ты же, юнице, сердцем чистая, во уединении суще, изливала еси в молитве пред Господем душу твою, ангельскую песнь вопиюще: Аллилуиа.

Икос 4

Слышавши боголюбивая княгиня Ксения, мати святаго князя Тверскаго Михаила, о благочестии твоем, княгине Анно, рече послом своим: слышах, яко есть у Ростовскаго князя дщи зело добродетельна, премудра же и прекрасна; сию убо, Божиим изволением, видети желаю в супружестве за сыном моим. И абие по благодати Божией исполнися желание сердца ея, да тобою Бог прославится и да вси воспевают тебе:

Радуйся, невесто, промыслом Божиим предуказанная; радуйся, голубице чистая и непорочная сердцем.

Радуйся, мудрая евангельская дево, во свете веры и дел благих ходившая; радуйся, яко невозвратным путем по заповедем Владыки твоего шествовала еси.

Радуйся, яко за преславныя добродетели твоя внити в чертог Царя Небеснаго сподобилася еси; радуйся, всем женам российским похвало и утверждение.

Радуйся, чистотою твоею всем родом твердое научение; радуйся, яко согласие супругом, по молитвам к тебе, подавала еси.

Радуйся, неисповедимыми судьбами Божиими от Него прославленная; радуйся, новая чудеса и знамения многа чтущим тя явившая.

Радуйся, яко царя боговенчаннаго и отрасли дома его на поклонение мощем твоим подвигла еси; радуйся, яко и сердца верных к почитанию и воспрославлению твоему привлекла еси.

Радуйся, святая благоверная княгине, преподобная мати Анно.

Кондак 5

Яко светлая звезда, богомудрая невесто, присными твоими сопровождаема, с великою славою во град Тверь во храм Спаса нашего, прибыла еси, князи же и народи, велелепно сретающе тя, радовахуся о тебе, вопиюще Богу: Аллилуиа.

Икос 5

Видевше тя вельможи, клирики и мирстии людие богоспасаемаго града Твери, на брак честный с возлюбленным князем их Михаилом притекшую, изыдоша в сретение твое и вопияху ти, глаголюще:

Радуйся, от Ливана невесто, во образ единения Христа и Церкве, сочетатися браком со князем нашим грядущая; радуйся, чистая голубице, пришествием твоим мир с Богом и в человецех благоволение знаменующая.

Радуйся, от Бога князю нашему в делех управления помощнице уготованная; радуйся, за невинныя и люте страждущия ходатаице, промыслом Божиим предуказанная.

Радуйся, о нуждах и потребах наших пещися от Бога поставленная; радуйся, сокровище матерняго попечения, от Господа нам данное.

Радуйся, светило милосердия, над градом нашим восходящее; радуйся, звездо утренняя, присно радость нам возвещающая.

Радуйся, облаче всесветлый, дождь любве и помощи всем достойным твоего заступления искапати обещаяй; радуйся, во образ женам христианским свыше пронареченная.

Радуйся, вдовицам и сирым покрове, провидением посланный; радуйся, юным девам и женам прибежище и укрепление.

Радуйся, святая благоверная княгине, преподобная мати Анно.

Кондак 6

Проповедуют о богоугодном житии твоем, блаженная мати, в супружестве и княжении, добродетели твоея: велие благочестие, смиренномудрие, милосердие, истинныя матерняя любы ко всем, поющим о тебе Богу: Аллилуиа.

Икос 6

Возсия богоугодное житие твое, яко красная заря, призывающая всех на богоугождение и на делание свое со усердием, да вси последующе ти зовут:

Радуйся, со князем, супругом твоим, во всяком благочестии и чистоте пожившая; радуйся, и чада твоя во страсе Божии воспитавшая.

Радуйся, Церкве Божией благодеявшая и благолепие храмов Божиих любившая; радуйся, и по кончине твоей любовь многу в душах граждан боголюбивых возжигавшая.

Радуйся, яко от всякаго недуга прибегающия с верою к тебе исцеляеши; радуйся, яко от лютаго насилия диавольскаго молящияся к тебе изымаеши.

Радуйся, яко присно всякое попечение о блазе владомых имевшая; радуйся, в скорбех и страданиих несчастным, сирым и бедным, помощнице теплая.

Радуйся, больных целительнице скорая и чудная; радуйся, ищущим пути ко спасению наставнице благодатная.

Радуйся, яко по преставлении твоем сподобилася еси от Бога дара чудотворений; радуйся, полки иноплеменных молением твоим от града Кашина отгнавшая.

Радуйся, святая благоверная княгине, преподобная мати Анно.

Кондак 7

Хотя Господь истинное благочестие твое явити и в терпении тя укрепити, скорби многи попусти на тя, да просветишася, яко же злато в горниле, и да поеши Богу: Аллилуиа.

Икос 7

Новаго страстотерпца яви Господь, супруга твоего благовернаго князя Михаила, емуже сострадающи венцем от Бога венчалася еси, благоверная княгине, да прославляюще прославльшаго тя Господа, поем сице:

Радуйся, праведная Анно, носящая дух сокрушен к сильному Богу разумов; радуйся, многия скорби и беды претерпевшая.

Радуйся, молитвою вся побеждавшая; радуйся, терпением и упованием супруга твоего утешавшая.

Радуйся, от единаго Господа помощи ожидавшая; радуйся, к Нему милостивому с горькими слезами припадавшая.

Радуйся, от Господа якоже злато в горниле скорбей очищенная; радуйся, якоже камень драгий чистотою сияющая.

Радуйся, винограде, из точила приносяй вино благовонное; радуйся, манно, питающая и услаждающая всех требующих.

Радуйся, источниче разума, от Бога разумов вся напояй; радуйся, росо, орошающая и оживляющая страну твою, от нашествия иноплеменных пострадавшую.

Радуйся, святая благоверная княгине, преподобная мати Анно.

Кондак 8

Странник в неверней стране явися, благоверный супруг твой, всеблаженная Анно, егда завистию и клеветою сродник своих к безбожному царю ордынскому приведен бысть. Ты же скорбь сердца твоего покрывающи, излиха вопияла еси Богу: Аллилуиа.

Икос 8

Весь еси желание мое, весь сладость Сладчайший Иисусе! Сице моляшеся Михаил, князь христолюбивый, и тако глаголаше: аще Бог соизволит, хочу ити сам во Орду ко беззаконному царю, хочу сам дати ответ и душу мою положити за овцы стада Христова по слову Его. Ты же, супружнице князя благочестиваго, вдохновленная благодатию свыше, рекла еси ему: поистине блажен будеши во вся роды. Сего ради вси приглашаху ти сице:

Радуйся, блаженная мати в женстем естестве мужескую крепость имевшая; радуйся, долготерпеливно упованием на Господа укреплявшаяся.

Радуйся, глаголавшая князю: Господь будет твой помощник; радуйся, рекшая ему: за Господа пострадав, воистину блажен будеши.

Радуйся, яко и сама уготовлялася еси пострадати за Спаса Христа; радуйся, спострадавшая супругу твоему в скорби мнозе.

Радуйся, аще и не плотию, обаче сердцем за Христа страдавшая; радуйся, токмо постом, молитвою и благодатию Божиею подкреплявшаяся.

Радуйся, воплем крепким ко Господу взывавшая; радуйся, глаголавшая: изми нас, Господи, от человек лукавых и от мужей неправедных, ополчавших брани, избави нас.

Радуйся, супруга твоего презрети славу и всю сладость мира сего тленнаго увещававшая; радуйся, и нам крепкое упование подающая.

Радуйся, святая благоверная княгине, преподобная мати Анно.

Кондак 9

Все сердце Твое содрогнуся, богомудрая, егда вестник печальную весть принесе, яко благоверный супруг твой Михаил во многих страданиих смерть мученическую претерпе, и абие в скорби велией, преклоньше колена, ко Отцу Небесному, возстенала еси: буди воля Твоя. Ангели же, возносяще душу блаженнаго на Небо, пояху: Аллилуиа.

Икос 9

Витии многовещаннии не возмогут изрещи скорби твоя и крепость любве твоея, егда со чады твоими текла еси во сретение мощей блаженнаго князя, супруга твоего. Темже и мы, ублажающе болезни сердца твоего, глаголем сице:

Радуйся, огненное искушение Господа ради претерпевшая; радуйся, приобщитися страстем Христовым удостоившаяся.

Радуйся, с верою и любовию понесшая крест твой и Христу последовавшая; радуйся, прелести мира сего спасения ради презревшая.

Радуйся, яко и во явлении Славы Его возрадуешися и восторжествуеши; радуйся, в бедах и скорбных обстояниих помощнице нам скорая.

Радуйся, яко и сама в житии твоем Христа ради многоскорбная была еси; радуйся, душ смятенных умиротворительнице тихая.

Радуйся, унывающим утешительнице дивная; радуйся, недоумевающим советнице мудрая.

Радуйся, призывающим тя молитвеннице теплая; радуйся, с верою и упованием умирающим споручнице крепкая.

Радуйся, святая благоверная княгине, преподобная мати Анно.

Кондак 10

Спасительнаго подвига ищущи, блаженная многоскорбная княгине Анно, теплыми молитвами непрестанно Бога моляше, да не лишит ю достояния святых и наследия Небеснаго Своего Царствия, поющую Богу: Аллилуиа.

Икос 10

Стена нерушимая, пристанище и предстательство к тебе притекающих была еси, блаженная, утешение и веселие. Сего ради зовем ти:

Радуйся, и во вдовстве бывшая правительнице мудрая, Ольге святей подобная и милосердная; радуйся, чада твоя во страсе Божием содержавшая.

Радуйся, ходити в заповедех Господних и являти ко всем милость поучавшая; радуйся, блаженная, нищия питавшая и убогия призиравшая.

Радуйся, странныя в дом твой вводити повелевшая, пищу и одежду им подававшая; радуйся, сирыя и вдовицы заступавшая и всем просящим помощи помогавшая.

Радуйся, много душею за чада твоя поболевшая; радуйся, супружнице добляя.

Радуйся, иноческое строгое житие во вдовстве проводившая; радуйся, печальми земными угнетенным мир вечный раскрывающая.

Радуйся, у Распятаго на Кресте за ны, грешныя, мира и тишины непрестанно просившая; радуйся, в нынешнем житии всем помощнице теплая.

Радуйся, святая благоверная княгине, преподобная мати Анно.

Кондак 11

Пение и молитвы непрестанныя возносити Богу хотящи, блаженная, пришла еси во обитель девичу и тамо, с великим смирением молящися, повелела еси себе пострищи во Ангельский чин, и тако, помощию Всевышняго Бога, в малом времени превзошла еси добродетельми вся бывшая тамо постницы, поющи Господеви: Аллилуиа.

Икос 11

Светоподательный светильник была еси, богоблаженная: князи бо, княгини, чада твоя и вся благочестно живущая во градах Твери и Кашине, обитель твою посещавшия, непрестанно поучала еси Бога боятися, Тому всегда угодная творити и жити в любви друг ко другу. Сего ради вси прославляху тя сице:

Радуйся, мирския суеты отрешившаяся; радуйся, Небеснаго Отечества возжелавшая.

Радуйся, Христа всем сердцем возлюбившая; радуйся, к подножию ног Его присно припадавшая.

Радуйся, великим ангельским образом украсившаяся; радуйся, на иноческия подвиги и борения устремившаяся.

Радуйся, иноческому послушанию всецело предавшаяся; радуйся, всю себе в жертву непорочную принесшая.

Радуйся, ум и сердце твое молитве посвятившая; радуйся, яко Христос во успении твоем в чертог Свой тя всели.

Радуйся, яко и мощи твоя нетленны сохрани, многими чудесы и исцеленьми к тебе приходящих обогати; радуйся, наставнице инокиням и собеседнице Ангелом.

Радуйся, святая благоверная княгине, преподобная мати Анно.

Кондак 12

Благодать и велие дерзновение твое пред Богом ведуще, тебе, преподобная мати, молимся: молися о нас ко Господу, да избавит ны от всех бед и напастей и сохранит и утвердит ны во святей вере, во святом благочестии и чистоте, да тихое и безмолвное житие поживем и поем благодеющему тобою Богу: Аллилуиа.

Икос 12

Поюще твое прославление, ублажаем тя, преподобная, яко многомощную о нас молитвенницу пред Господем, утешительницу и покровительницу, и возглашаем ти сице:

Радуйся, подвигом добрым подвизавшаяся; радуйся, течение скорбное постом, бдением и молитвою непрестанно совершавшая.

Радуйся, носившая на земли венец терновый; радуйся, унаследовавшая на Небеси венец нетленный.

Радуйся, супружнице страстотерпца Христова; радуйся, с ним спострадавшая и венчавшаяся.

Радуйся, молитвами твоими град Кашин от смертоносныя язвы избавившая; радуйся, яко веру к тебе несумненную и надежду известную в любящих тя возгрела еси.

Радуйся, от Господа всех благих нам подательнице; радуйся, во всех скорбех и обстояниих утешительнице.

Радуйся, от враг видимых и невидимых защитнице; радуйся, о нас пред Господем в день праведнаго воздания предстательнице.

Радуйся, святая благоверная княгине, преподобная мати Анно.

Кондак 13

О преподобная и преблаженная мати Анно! Молися присно Христу Богу нашему даровати людем православным на враги победы и одоление, и миру умирение, и всей Российстей земли великое утверждение, нам же грехов оставление и жития исправление, да тако Небеснаго Царствия наследницы будем, в радости поюще со Ангелы Богу: Аллилуиа.

Этот кондак читается трижды, затем 1-й икос «Ангелов Творец…» и 1-й кондак «Избранней и предивней…».

Молитва

О преподобная и преблаженная мати Анно! Смиренно припадающе к честным мощем твоим, молимся со слезами прилежно: не забуди убогих твоих до конца, но поминай нас всегда во святых твоих и благоприятных молитвах к Богу. О преблаженная великая княгине Анно! Не забуди присещати чад твоих, аще бо телом и преставилася еси от нас, но и по смерти жива пребываеши и не отступаеши от нас духом, сохраняющи нас от стрел вражиих, всякия прелести бесовския и козней диавольских. Молитвеннице наша усердная! Не престай молящися за ны ко Христу, Богу нашему, аще бо мощей твоих рака пред очима нашима выну видима есть, но святая душа твоя, со Ангельскими воинствы у Престола Вседержителя предстоящи, достойно веселится. К тебе убо припадаем, тебе молимся, тебе мили ся деем: молися, преблаженная Анно, Всемилостивому Богу нашему о спасении душ наших, еже испросити нам время на покаяние и невозбранно прейти от земли на Небо, мытарств горьких и вечныя муки избавится и Небесному Царствию наследником быти со всеми преподобными, от века угодившими Господу нашему Иисусу Христу, Емуже слава, со Безначальным Его Отцем, и с Пресвятым, и Благим, и Животворящим Его Духом, ныне, и присно, и во веки веков. Аминь.

Кондак 1

Избранный и дивный отче Онуфрие, сияющий трисияннаго живота зарею, ты мя, омраченнаго греховными страстьми, просвети, от смертоносныя раны исхити и твоими молитвами от всех бед избави, да зову тебе: Радуйся, отче Онуфрие, пресветлый светильниче всея вселенныя.

Икос 1

Ангельстии чини твоим, отче, удивишася подвигом, имиже в пустыни непрестанно упражнялся еси; три бо и шестьдесят лет постился еси, Божественныя же Христовы Тайны от рук ангельских приимати сподобился еси, и ныне убо почитая тя единосельника и собеседника Ангелов, сицевая вопию тебе, святе Онуфрие: Радуйся, Ангелов предивное чудо; Радуйся, душетленных страстей разрушителю. Радуйся, непроходимыя пустыни просветителю; Радуйся, воздержания наказателю и учителю. Радуйся, пустынножителей удобрение; Радуйся, монахов богодухновенное светило. Радуйся, угодниче Христов преизящный; Радуйся, безмолвия рачителю теплейший. Радуйся, бесовския силы крепкое попрание; Радуйся, спасения истинный наставниче. Радуйся, подателю радости верным; Радуйся, скорый помощниче к тебе притекающим. Радуйся, отче Онуфрие, пресветлый светильниче всея вселенныя.

Кондак 2

Видяще странный и чудный жития твоего образ преподобный Пафнутий вельми удивися; тем же и аз, размышляя твоя паче меры трудолюбныя пустынныя подвиги, пою Богу, на сия те бе укрепившему: Аллилуиа.

Икос 2

Разуму датися мне божественному, помолися преподобне Онуфрие, ты бо, божественным сияющи светом и с Ангелы водворяющися пособствуеши память твою совершающим и радостно похвальная тебе сице приносящим: Радуйся, странно добродетельми просиявый; Радуйся, солнечнаго света светлейший. Радуйся, Ангелом в пустыню проводимый; Радуйся, горлице пустыннолюбная. Радуйся, рожо багрянноцветущая; Радуйся, храме всечестный и Богу освященный. Радуйся, Божиих дарований исполнение; Радуйся, пречудное в человецех удивление. Радуйся, бесов страшное и грозное устрашение; Радуйся, предрагий адаманте. Радуйся, Троичнаго света зрителю; Радуйся, теплый в молитвах предстателю. Радуйся, отче Онуфрие, пресветлый светильниче всея вселенныя.

Кондак 3

Сила Вышняго от ложесн матерних осени тя, преподобне Онуфрие, и показа селение и жилище Святаго Духа, Егоже и аз недостойный усердно прияти желающе, пою песнь Богу: Аллилуиа.

Икос 3

Имуще тя велика, отче, заступника и скораго в напастех помощника, различными одержимии напастьми тя на помощь призываем, и весело в твоей светлой памяти торжествующе, сия тебе вопием: Радуйся, скорый послушателю молящихся тебе с верою; Радуйся, праведнаго Судии известное умоление. Радуйся, честное Пресвятаго Духа селение; Радуйся, непорочный Пресвятыя Троицы служителю. Радуйся, предрагий Христа Бога бисере; Радуйся, неизреченная великому Пафнутию радосте. Радуйся, тогожде Пафнутия наставниче и учителю; Радуйся, скорбящих скорое утешение. Радуйся, унывающих всежелательный посетителю; Радуйся, слепых врачу и хромых целителю. Радуйся, болящих здравие и недугующих врачевание; Радуйся, верных спасенное прибежище. Радуйся, отче Онуфрие, пресветлый светильниче всея вселенныя.

Кондак 4

Бурю страстей многомятежнаго мира возненавидевши, отче, всех его устранился еси красот, вселився же в пустыню, преподобне, Крестителю в житии последовал еси и пророка Илию подражал еси, ныне же вечнующую в небесных дворех славу получивши, с небесными Богу предстоиши жители и поеши купно с ними: Аллилуиа.

Икос 4

Светоносное солнце и златозарное светило имуще тя вернии, святе Онуфрие, умильно тя молим, просвети, вразуми, научи вопити тебе сице: Радуйся, пустыни светлое озарение; Радуйся, златозарный мира светильниче. Радуйся, Фивеов пречудная красото; Радуйся, Ливии прекрасная доброто. Радуйся, Египта пресветлое украшение; Радуйся, Месопотамии превеликий наставниче. Радуйся, Иоанна Крестителя истинный и присный подражателю; Радуйся, благовонный пустыни кедре. Радуйся, яко равноангельно служиши Богу; Радуйся, яко заступавши всех, тепле тя на помощь призывающих. Радуйся, отче Онуфрие, пресветлый светильниче всея вселенныя.

Кондак 5

Боготечную зарю увидевши тя, отче, в пустыни, великий Пафнутий тщательно последова тебе, и яко учительна светильника придержася тебе, и о пустынном любопытно испытав житии, егоже от тебе добре навык, умильно воспева Богу песнь: Аллилуиа.

Икос 5

Видя твое странное житие, Собор церковный, Онуфрие преподобне, с благоговением твою блаженную память велит почитати. Сего ради и аз, спасение хотя получити, с веселием почитаю и сице тебе вопию: Радуйся, пресветлая красото Церкве Христовы; Радуйся, неусыпный предстателю ищущим ходатайства твоего. Радуйся, яко к Господу всегда вопиеши за ны; Радуйся, яко тобою просветишася внутренняя пустыни. Радуйся, яко просияша добрая дела твоя, аки солнце на земли и на небеси; Радуйся, яко вперил еси ум твой к Богу. Радуйся, яко обогатился еси нищетою духа; Радуйся, орле гнезда небеснаго. Радуйся, прелести бесовския, яко трость, попаляющий; Радуйся, послушателю Евангелия Христова. Радуйся, мудрование плоти крепостию Божественнаго Духа смиривый; Радуйся, земный ангеле, небесный человече. Радуйся, отче Онуфрие, пресветлый светильниче всея вселенныя.

Кондак 6

Проповеди Евангельския творца, еже не пещися о ризе или что ясти, истинна тя, Онуфрие, узре Владыка Господь и абие власы белыми, яко одеждою, одея тя чудно, и славою свыше обогатил тя есть в преставлении твоем; юже и нам от Христа получити моли, вопиющим Ему: Аллилуиа.

Икос 6

Возсиял еси от Египта, столпом Божественнаго света наставляем, преподобне Онуфрие, не терпяще же тя бесовстии полцы в пустыни, бежаша; от ихже наветов и нас избави молитвами твоими, вопиющих ти сице: Радуйся, прелести бесовския потребителю; Радуйся, бесов страшный прогонителю. Радуйся, главу змиеву уязвивый молитвами твоими; Радуйся, дарований Святаго Духа преисполненный. Радуйся, духи лукавствия смиренномудрием покоривый; Радуйся, яко крест твой на раме понесл еси. Радуйся, яко тем амалика мысленнаго силу низложил еси; Радуйся, яко бремя легкое Христово восприял еси на рамо. Радуйся, яко от юности возлюбил еси иго Христово; Радуйся, яко спасен от вражиих сетей, благодарственно Богу вопиеши. Радуйся, яко и верным на враги тощно пособствуеши; Радуйся, яко тепле к тебе притекающих треволнения страстей изменяеши. Радуйся, отче Онуфрие, пресветлый светильниче всея вселенныя.

Кондак 7

Изшедшу Пафнутию от обители во внутренняя пустыни, еже видети Господеви работающия, Божиим смотрением узре тя странным образом и ужасеся; по глаголании же твоем к нему, познав тя быти человека, верне и дивно Богу работающа, возгласи: Аллилуиа.

Икос 7

Новый воистинну победоносец на плотския страсти явился еси, преподобне, и кто доволен воспети борения твоя? Кто изочтет труды, болезни и подвиги, в нихже течение постничества совершил еси? К сих же похвалению недовольни суще, любовию паче почитаем тя и верно тебе сицевая вопием: Радуйся, гладом и жаждею плоть твою удручивый; Радуйся, тмы предстателя всеконечно победивый. Радуйся, яко всяко сладострастие всенощными бдении увядил еси; Радуйся, яко законно в молитвах и пощениих претерпевая, в безстрастие облеклся еси. Радуйся, предивное воздержания зерцало; Радуйся, преподобных лику великая славо. Радуйся, яко мразом померзаемей плоти твоей, теплотою любве Христовы согревашеся дух твой; Радуйся, яко зноем опаляема тя роса Божественныя благодати прохлаждаше, преподобне. Радуйся, пустыни лепое украшение; Радуйся, подвигов и совершенства образе. Радуйся, яко всяку добродетель в тебе изобразил еси; Радуйся, яко вселюбимый подвигоположнику Христу угодник показался еси. Радуйся, отче Онуфрие, пресветлый светильниче всея вселенныя.

Кондак 8

Странное твое житие бысть, Онуфрие: взирая бо на возрастшаго при пещери твоей финика, воздержанием паче питался еси. Сего ради, улучив вышнюю трапезу, поеши Богу: Аллилуиа.

Икос 8

Весь был еси в вышних и горе оком твоея души взирал еси непрестанно во всем странном постничестве твоем, ныне же дерзновение стяжав к Богу, преподобне, заступаеши всех, на помощь тя призывающих и вопиющих ти сице: Радуйся, пустынножителю великий; Радуйся, аки звезда, в пустынях просиявый. Радуйся, подражавый стопам Христовым от младенства твоего; Радуйся, ангельскаго жития ревнителю. Радуйся, наветов невидимых враг прогонителю; Радуйся, воздержания чуднаго показателю. Радуйся, совершенства преизящный учителю; Радуйся, странный и дивный к небеси путь показавый. Радуйся, яко равноангельно на земли пожил еси; Радуйся, яко равноангельную славу и честь достойно получил еси. Радуйся, яко в небесных дворех ныне о всех мольбы Творцу приносиши; Радуйся, яко тебе ходатая стяжавшим великия благодати Божия испрошаеши. Радуйся, отче Онуфрие, пресветлый светильниче всея вселенныя.

Кондак 9

Всякое естество удивися тебе, Онуфрие святе: мира бо красная от сердца возненавидев и единаго Бога от души возлюбив, пустыню постил еси. Идеже в единех токмо видениих упражняяся, явился еси яко Ангел, с плотию живый, поя Богу: Аллилуиа.

Икос 9

Витийстии языцы восхвалити тя по достоянию не могут, отче богомудре Онуфрие: ты бо от утробы матерны Богу приближив твой смысл, весма прилежал еси Царю Вседержителю, плоды достойны принося Ему от твоих подвиг во всем житии, преподобне. Аз убо от Церкве Божия славима тя о тех уведев, верно тебе сицевая вопию: Радуйся, от младенства монашескому обучению вданный; Радуйся, в юности Божиим наставлением в пустынное безхрамие введенный. Радуйся, яко Христовым словесем последуя, мира, отечества же и рода отреклся еси; Радуйся, яко крест твой евангельски на раме твоем понесл еси. Радуйся, небрегий о ризе, да нетления ризу себе самому соделаеши; Радуйся, сеявый слезами, да с радостию рукояти твоя пожнеши. Радуйся, яко неядением, нуждною нищетою и всегдашним на молитве стоянием плоть изнурил еси; Радуйся, яко пути жестоки за словеса устен Господа твоего сохранил еси. Радуйся, подвиги твоими страсти телесныя до конца умертвивый; Радуйся, равноангельную чистоту сохранивый. Радуйся, яко многолетне аки безплотен пожил еси; Радуйся, яко от Венцеподателя безплотным ликом ныне счислился еси. Радуйся, отче Онуфрие, пресветлый светильниче всея вселенныя.

Кондак 10

Спастися хотяще вернии от напастей различных, отче, предстателя тя себе и поборника поставляют и не лишаются надежд своих: ты бо молитвами к Богу твоими от бед лютых и скорбей, одержащих ны, и многоразличных злых изымаеши, наставляеши же на спасения стези усердно к тебе притекающия и Богу верно вопиющия: Аллилуиа.

Икос 10

Стену тя, заступника и молитвенника тепла обрет, преподобне, из глубины сердца, яко благоуханное кадило, с воздыханием Богу возсылаю хвалу; тебе же, присному сущу молитвеннику, сицевая приношу пения: Радуйся, плодов добродетельных благопроцветшая ниво; Радуйся, благочестия преизрядное удобрение. Радуйся, земным заступниче крепкий; Радуйся, послушателю притекающим к тебе теплый. Радуйся, светильниче, демонский мрак отреваяй; Радуйся, душетленных недугов тму отгоняяй. Радуйся, яко заблуждающих преподобными нравы на путь правый руководствуеши; Радуйся, яко к исполнению Божиих хотений управляеши. Радуйся, яко многоразличная благодеяния тобою свыше подаема бывают; Радуйся, яко духов злобных наветы от призывающих тя бегают. Радуйся, яко всех моления дерзновенно Вышнему приносиши; Радуйся, яко всех в нуждах и печалех защищаеши. Радуйся, отче Онуфрие, пресветлый светильниче всея вселенныя.

Кондак 11

Дение ангельское слышашеся в божественном преставлении твоем, отче, святей бо и богоугоднейшей души твоей, в небесная селения преславно восходящей, силы небесныя дивляхуся, поюще: Аллилуиа.

Икос 11

Светло по преставлении лице твое виде, отче, Пафнутий святый удивися. Разделив же на две части рясу свою, покры мощи твоя и погребе тя со львы честно. Сия и аз духом благоговейно почитая, сице ти вопию: Радуйся, яко всего тебе Богу освятил еси; Радуйся, яко добре Божественныя законы соблюл еси. Радуйся, изшествие твое от жития пророчески предведевый; Радуйся, в теплей к Богу любви и благоговении многотрудныя твоя подвиги окончивый. Радуйся, в преставлении благоуханием чудным, аки райским, почтенный; Радуйся, молнии тогда и блистании дивно прославленный. Радуйся, егоже мощи ангельстии лицы с пением, кадилы и свещами окружиша; Радуйся, емуже горняя силы врата райския отверзоша. Радуйся, яко в томже часе сияние велие, облиставшее тя, зряшеся; Радуйся, яко сладкий глас, к восприятию вечных благ призывающ тя, слышашеся. Радуйся, яко святую твою душу венцедавец Христос славно прият в горняя селения; Радуйся, яко ныне вечнаго изобильно наслаждаешися веселия. Радуйся, отче Онуфрие, пресветлый светильниче всея вселенныя.

Кондак 12

Благодать, данную ти, и подвиги твоя никтоже от земных изрещи может, отче Онуфрие: в пустыни бо нестяжателно живый, пищу имел еси хлеб ангельский, от человек бегая, с Богом и Ангелы беседовал еси. Сего ради в небесных чертозех радуешися и поеши песнь: Аллилуиа.

Икос 12

Поем доблественныя подвиги твоя, ублажаем достохвальную кончину, почитаем и священную память твою, преподобне, в нейже и яко единому тебе от двадесяти четырех старец, окружающих Престол Вышняго, председящему похвальная сице вопием: Радуйся, странно на земли поживый; Радуйся, странную и кончину наследивый. Радуйся, яко светлыми подвиги твоими к свету невечернему вшел еси; Радуйся, яко премирное наследие богатно стяжал еси. Радуйся, неизреченных благ наследниче; Радуйся, преподобных и праведных собеседниче. Радуйся, яко ныне разрешшимся зерцалом Троицу Святую зриши непосредственно; Радуйся, яко в памяти твоей Церковь Христову веселиши неизреченно. Радуйся, яко тобою постницы и пустынножители в подвиг укрепляются; Радуйся, яко вернии ходатайством твоим всех благ свыше сподобляются. Радуйся, отче Онуфрие, пресветлый светильниче всея вселенныя.

Кондак 13

О всехвальный и предивный угодниче Христов отче Онуфрие, молютися и вопию всеусердно: приими сие малое, от мене приносимое моление и потщися скоро умолити милостиваго Бога и Владыку, да избавит мя от всяких бед и будущия измет муки, вопиющаго: Аллилуиа.

(Этот кондак читается трижды, затем икос 1 и кондак 1)

Молитва преподобному Онуфрию, Великому пустынножителю, царевичу Перскому

О преизящный и превеликий пустынножителю, преподобне отче Онуфрие! Похваляю твоя неизреченная чудотворения и житие пресветло, еже еси препроводил от юности твоея, даже и до старости: никтоже бо изчести возможе терпений и подвигов твоих, пречестне. Удивися преподобный Пафнутий твоему жестокому еже в пустыни житию, вкупе же и зело возрадовася, обрет тя единаго толиких подвигов и совершенства суща образ. Сего ради и подлинно испыта о трудех твоих святых и о еже колико имел еси временнаго жития. Темже и написа, яко шестьдесят лет и три в трудолюбии пребывая, в наготе претерпевая мраз и зной, в глубокой пустыне со зверьми и птицы обитая, молитвы непрестанно творя, пожил еси. Сего ради ныне радость тебе приношу от недостойных устен моих, преподобне отче, преподобному Пафнутию радосте великая (сподобися бо при кончине с львы послужити тебе, погребсти тело твое и с тобою на небеси жити), Илии Фесвитянину ревнителю, Иоанну Крестителю наследниче, друже Христов и снаследниче истинный, Египту умная красото, Фивеом великое светило, Ливии красная доброто, финикс краснопроцветающий, орле высокопарный, летающий в поднебесная, на небесех гражданство обретый, идеже и водворися у Престола Владыки Славы, с двадесять четырми старцы жилище обретый, с ними же и пребываеши. И ныне молю тя, пречудный гражданине небесный, святых ликов Ангельских совсельниче, услыши мя, грешнаго и недостойнаго раба твоего, в час сей и приими сие малое моление мое Акафистово, великий заступниче, скорый помощниче притекающим к тебе усердно. Заглади рукописание дел моих скверных и нечистых, яже держат демонския полки. Покрый мя твоим заступлением, причти мя ко уготованному пресветлому месту молитвами твоими и сподоби мя вышняго Иерусалима, ибо по Преблагословенной Владычице нашей Богородице и Приснодеве Марии, тебе между теплейшими помощниками, молебниками и заступниками моими почитаю. Присещаеши бо и даеши руку помощи припадающим к тебе в храме твоем и повсюду. Темже и аз недостойный ныне тебе молюся и призываю: умоли милостиваго Бога, да отпустит ми вся прегрешения моя, вольная и невольная, сотворенная вся злая дела моя, и да избавит мя твоим предстательством от вечных мук, научит мя творити добрая дела, наставит мя на путь к спасению истинному и сподобит мя купно радости вечныя насладитися со всеми святыми, ныне и присно, и во веки веков, аминь.

Молитва вторая

О пречудне и преблаженне угодниче Христов и авво наш, Онуфрие Великий! Ты дивную любовь ко Господу твоему показал еси, и на дивныя подвиги благодатию Его укрепился еси, и сего ради велия дерзновения к Нему сподобился еси: многа бо чудеса и знамения силы Божия людем о тебе явишася. Воззри убо и ныне, отче предивный, благосердым оком любве твоея на ны недостойныя рабы, и даруй всем по коегождо потребе, по вере же и упованию: скорбящыя обрадуй, плачущыя утеши, недугующыя исцели, труждающымся помози, борющыяся со страстьми и прилоги вражиими укрепи и благослови, изнемогающыя поддержи, обитель твою и всех нас от враг видимых и от всякого зла сохрани. Возвеличи веру святую православную во отечествии нашем, обрати заблуждшыя, вразуми отпадшыя, утверди колеблющыяся, умягчи упорствующыя, просвети неверныя, и вся приведи в тихое пристанище Отечествия Небеснаго. О предивное слово монашествующих и всех верных утешение! славными подвиги твоими и сладким лицезрением чудотворнаго образа твоего и нас озари и на всяк подвиг, труд и терпение укрепи во славу Имени Божия, да спасеннии сподобимся с тобою и всеми святыми Вечнаго и Преблагослоненнаго Царствия славы Отца, и Сына, и Святаго Духа во веки веков. Аминь.

Молитва третья

О преподобне отче Онуфрие! Молим тя: услыши нас, грешных и недостойных раб Божиих (имена), в час сей. И приими сие малое моление наше: рукописание дел наших скверных и нечистых молитвою твоею изглади, твоим заступлением присно нас покрывай и ко уготованному верным пресветлому чертогу молитвами твоими приведи- умоли убо Милостиваго Бога, да отпустит нам вся прегрешения наша вольная и невольная и вся злая дела, нами сотворенныя, и да избавит нас твоим предстательством от вечных мук и сподобит нас радости вечныя насладитися, купно со всеми святыми, во веки веков.

Тропарь, глас 1

Желанием духовным пустыни достигл еси, богомудре Онуфрие, и яко безплотен в ней многолетне подвизался еси трудолюбне, соревнуя пророкам Илии и Крестителю: и от руку ангельску таин божественных насладився, ныне во свете Святыя Троицы купно с ними веселишеся. Моли спастися нам, твою память почитающим.

Кондак 1

Избранный чудотворче и предивный угодниче Христов, преподобне отче наш Арсение, благий и верный рабе Господень, труды и подвиги твоими восток и север озарил еси. Прославляя прославльшаго тя Господа, похвальная восписуем ти, яко усердному служителю Богоматере; ты же, яко имеяй благодать молитися за ны, поминай нас, любовию тебе поющих: Радуйся, преподобне Арсение, Коневский чудотворче.

Икос 1

Ангельски жити желая, во ангельский образ облеклся еси и на земли небесный человек явился еси, темже ангельскими гласы подобаше и восхвалити тя, преподобне отче Арсение; но аще и грехи обременени есмы, обаче с любовию дерзаем человеческая славословия воспети ти сице: Радуйся, Новаграда Великаго древо Богонасажденное; Радуйся, плоды добродетелей миру принесшее. Радуйся, любве сокровище неиждиваемое; Радуйся, мира Божественнаго вместилище благоуханное. Радуйся, терпения источниче неизсякаемый; Радуйся, благости кладязю благодати неизчерпаемый. Радуйся, милосердия пучино безмерная; Радуйся, веры правило известнейшее. Радуйся, кротости образе изряднейший; Радуйся, воздержания учителю предивный. Радуйся, тяготы греховныя притекающих к Тебе носителю; Радуйся, Закона Христова усердный исполнителю. Радуйся, преподобне Арсение, Коневский чудотворче.

Кондак 2

Видя жития сего непостоянное и в мире всяческую суету, преподобне отче Арсение, от юности своея потщался еси украшатися добродетелей виды и приуготовлятися в Вышний Сион, во град Бога Живаго, идеже ныне со тмами Ангел и всеми святыми поеши: Аллилуиа.

Икос 2

Разум неудоборазумеваемый, сокровенный святым в Небеснем Иерусалиме, постигнути желая, земная отринув, во обитель в пределех Новаграда на горе вселился еси, преподобне отче Арсение, и тамо ангельски пожив, путь был еси ко спасению всех, вопиющих ти сицевая: Радуйся, нищих духом в Царствие Небесное водителю; Радуйся, плачущих по Бозе утешителю. Радуйся, кротких к дивному наследию приуготовителю; Радуйся, алчущих правды истинный насытителю. Радуйся, жаждущих вечныя жизни сладкое питие; Радуйся, милостивых невидимый соучастниче. Радуйся, чистых сердцем смиренный учителю; Радуйся, миротворцев любвеобильный наставниче. Радуйся, изгнанных правды ради верный спутниче; Радуйся, терпящих поношения за Христа сострадателю. Радуйся, со всеми святыми вселивыйся; Радуйся, во Царствии Отца Небеснаго, яко солнце, просветивыйся. Радуйся, преподобне Арсение, Коневский чудотворче.

Кондак 3

Сила Вышняго подвизаше тя, преподобне отче Арсение, на большия подвиги, и душа твоя желаше к Богу Крепкому — Живому, яко жаждущий елень на источники водныя; сего ради изшел еси из земли отечества твоего в гору Афонскую, в удел Богоматере достигл еси, поя Богу: Аллилуиа.

Икос 3

Имея ум богозрительный и восхотев добродетели своя утаити, да Отец Небесный, видяй втайне, воздаст тебе явно, сего ради во обитель Святогорскую достигл еси, преподобне отче Арсение, и тамо от игумена Иоанна к общему деланию с братиею сопричаститися благословение приял еси, мы же, видя произволение твое благое, взываем ти сице: Радуйся, добродетельми своими небесныя дары стяжавый; Радуйся, благим житием праотцем святым подражавый. Радуйся, яко Авраамову веру в Бога приобрел еси; Радуйся, яко Исааково послушание имел еси. Радуйся, яко Иаковля Боговидения сподобился еси; Радуйся, яко Иосифово целомудрие облобызал еси. Радуйся, яко Иовле терпение снискал еси; Радуйся, яко Моисеево сострадание стяжал еси. Радуйся, яко Самуилово Богопризвание услышал еси; Радуйся, яко Давидову кротость восприял еси. Радуйся, яко Илиину ревность по Бозе в сердце твоем носил еси; Радуйся, яко Даниилово обителище Духа Святаго был еси. Радуйся, преподобне Арсение, Коневский чудотворче.

Кондак 4

Бурею печали исполнися блаженный Иоанн, егда ты, преподобне отче Арсение, по триех летех в северную страну возвратитися восхотел еси; провидев же о тебе Божественное Промышление, благослови тя в путь, моляся глаголаше: “Господи Боже отец наших, от Престола славы Твоея призри на раба твоего Арсения, да почиет на нем всегда благодать Духа Твоего Пресвятаго, да поет Ти: Аллилуиа”.

Икос 4

Слышаша иноцы Афонстии, яко блаженный Арсений оставляет гору Афонскую, бяху скорбни зело; прозорливыма же очима усмотрив будущая, игумен Иоанн вручаше ти образ Богоматере со Предвечным Младенцем и глаголаше сицевая: Радуйся, яко тобою Бог воздвигнет в стране северней обитель; Радуйся, яко тамо посрамлен будет искуситель. Радуйся, яко за усердие к Богоматери мзду восприимеши; Радуйся, яко от Сына Ея на небесех прославишися. Радуйся, яко Ангелом собеседник будеши; Радуйся, яко человеком наставник добр явишися. Радуйся, новое светило хладного севера; Радуйся, любовию Христовою мрак суеты разгнавшее. Радуйся, яко тобою мнози сладость жизни духовныя уразумеют; Радуйся, яко земнии ликом Ангельским сопричастницы будут. Радуйся, звездо, путь ко Христу указующая; Радуйся, солнца мысленного — святыя иконы Богоматере колеснице. Радуйся, преподобне Арсение, Коневский чудотворче.

Кондак 5

Боготечней звезде уподобився, от востока на север в Великий Новград притекл еси, преподобне отче Арсение, и в нем благословение на устроение обители во имя Пречистыя Девы приял еси от святителя, иже лобызаше принесенную тобою икону Богоматере и со слезами вопияше: Аллилуиа.

Икос 5

Видев тя добродетели многими преисполнена, святитель Новаграда с благословением дарует тебе некая потребная ко устроению обители новыя, и прием сие благоговейно, преподобне отче Арсение, на ладии по реце Волхову и великому Ладожскому езеру в Валаамскую обитель достигл еси; мы же мысленными очесы зряще тя путь творяща, взываем в похвалу твою таковая: Радуйся, отче, отцев мужества соименный; Радуйся, всего себе в волю Божию предавый. Радуйся, иго благое на себе совершенне восприемый; Радуйся, бремя Христово легце понесый. Радуйся, труждающихся о Господе незримый помощниче; Радуйся, грехми обремененных к покаянию наставниче. Радуйся, окамененнаго нечувствия отгнателю; Радуйся, во отчаянии сущим благия надежды подателю. Радуйся, кротость Христову восприемый; Радуйся, смирению Его притекающих к тебе научивый. Радуйся, монашествующих покрове и утверждение; Радуйся, всех верных человек упование. Радуйся, преподобне Арсение, Коневский чудотворче.

Кондак 6

Проповедник твоего добродетельнаго жития и чудес от иконы Богоматере, по пришествии твоем на остров Коневский, явися рыбарь Филипп, иже любезне прият тя, преподобне отче Арсение, и с тобою пояше Богу: Аллилуиа.

Икос 6

Возсиял еси светом добродетелей твоих во острове Коневстем, идеже, яко пустыннолюбная горлица, вселився и уединенное житие пожив, на месте обитания твоего первее честный Крест водрузил еси; уведев же, авва Сила посла инока Лаврентия, да призовет тя паки во обитель Валаамскую, он же пришед и видев богоугодное житие твое, преподобне отче Арсение, глаголаше тебе сицевая: Радуйся, Богом управляемый подвижниче; Радуйся, Девы Марии истинный служителю. Радуйся, Божия правды дивный проповедниче; Радуйся, лжи нелицемерный обличителю. Радуйся, веры правыя насадителю; Радуйся, суеверия искоренителю. Радуйся, целомудрия наставниче; Радуйся, послушания учителю. Радуйся, ненавидения разрушителю; Радуйся, мира Божественнаго всеятелю. Радуйся, подвизающихся о Господе укрепителю; Радуйся, в грехи впадших исправителю. Радуйся, преподобне Арсение, Коневский чудотворче.

Кондак 7

Хотящу ти, преподобне отче Арсение, обитель во острове Коневстем создати, первее малый храм в честь Богоматере воздвигл еси, в оньже притекаху хотящии шествовати путем добродетельнаго жития и пояху Богу: Аллилуиа.

Икос 7

Новое чудо сотворил еси, егда со всеми собравшимися к тебе, икону Богоматере взем и к нарицаемому Коню-Камени пришед, прилежным молением злых духов, тамо живущих, отгнал еси; мы же, ведяще сие, в похвалу тебе, преподобне отче Арсение, взываем таковая: Радуйся, постом и молитвою диавола посрамивый; Радуйся, крестом от козней вражиих себе оградивый. Радуйся, от Коня-Камене злых духов прогнавый; Радуйся, от прелести лукаваго окрестных людей избавителю. Радуйся, соль земли, от воды крещения раждаемая; Радуйся, силою Божественною притекающих осоляющая. Радуйся, граде Христов, на верху горы стоящий; Радуйся, светом небесным украшенный. Радуйся, светильниче, в мире сем добродетельми светящий; Радуйся, к Богу и ближним любовию горящий. Радуйся, обуреваемых ересьми тихое пристанище; Радуйся, православия столпе непоколебимый. Радуйся, преподобне Арсение, Коневский чудотворче.

Кондак 8

Страннолюбив зело, яко древний Авраам, был еси, преподобне отче Арсение; ненавидяй же добрая диавол восхоте добродетели сей препятие сотворити; егда убо ты уразумел лукавство его, тогда общее учреждение приходящим ставити повелел еси, воспевая питателю всех Богу: Аллилуиа.

Икос 8

Весь воистину сам себе и всю собранную во обители нове братию попечению Богоматере вручил еси, преподобне отче Арсение, егда по летех некиих паки на гору Афонскую к стопам подвига, отцем святым отыти восхотел еси; богособранная же чада твоя, провождающе, зваху ти сицевая: Радуйся, наставниче благий, попечению Богоматере нас вручивый; Радуйся, никогдаже в отчаяние впадати научивый. Радуйся, паче всего искати Царствия Небеснаго завещавый; Радуйся, яко ищущим сего приложатся и земная, глаголавый. Радуйся, плоть свою духу покоривый; Радуйся, плоды духа миру явивый. Радуйся, служителю Божий, Христови сраспявыйся; Радуйся, сосуде Божественныя благодати. Радуйся, яко тобою Бог прославляется; Радуйся, яко тобою демоны посрамляются. Радуйся, печальных велие утешение; Радуйся, скорбящих нечаянное радование. Радуйся, преподобне Арсение, Коневский чудотворче.

Кондак 9

Вси иноцы во обители твоей, преподобне отче Арсение, скорби велией предашася, умедлившу ти на Афоне: глад бо тяжек и скудость многа постиже их и хотяху разытися кийждо во свояси; сия же им помыслившим, явися во сне Матерь Божия возлюбленному ученику твоему старцу Иоакиму, скорбящу о сем зело, и рече ему: “Не скорби, старче, но шед рцы братии, да пребывают во обители, ибо слуга Мой Арсений со множеством потребных вскоре грядет к вам, поя Богу: Аллилуиа”.

Икос 9

Витии сладкоглаголивии не могут изъяснити добродетели и чудеса твоя, преподобне отче Арсение; слышав бо таковая, восхоте приити к тебе из Новаграда, пользы ради духовныя, святитель Христов Евфимий, иже пришед и тако возлюби тя, яко первосвятительский ветхий клобук свой дарствова тебе, глаголя сицевая: Радуйся, земный Ангеле и небесный человече; Радуйся, согражданине святым и присный Богу. Радуйся, ветхаго человека со страстьми отложивый; Радуйся, во Христа облекийся. Радуйся, дивный ратоборче, вся оружия Божия восприемый; Радуйся, обитель во имя Богоматере создавый. Радуйся, кознем врага противоставый; Радуйся, Святаго Духа чистое жилище. Радуйся, добродетелей вместилище; Радуйся, заповедей Божиих светлосте. Радуйся, оправданий Господних сияние; Радуйся, уединенное житие возлюбивый. Радуйся, преподобне Арсение, Коневский чудотворче.

Кондак 10

Спасти хотя от опасности водныя обитель твою на возвышенное место преселил еси, преподобне отче Арсение, и устав, святыми отцы преданный, оставив, вместо себе игуменом старца Иоанна избрал еси, поя Богу: Аллилуиа.

Икос 10

Стену и прибежище, икону Владычицы Святогорскую, живущим во обители твоей оставив и Святых Тайн причастився, предсмертный завет завещавал еси, глаголя: “Аще пребудете в законе Господни, то не оскудеет обитель сия и Матерь Божия покровительницею ея будет”, таже по словесех сих дух твой Господеви предал еси, преподобне отче Арсение, окружающии же одр твой взываху сицевая: Радуйся, яко пред исходом в вечную жизнь Хлебом Небесным себе подкрепивый; Радуйся, яко пред смертию твоею чашу Господню испивый. Радуйся, светило православия, на севере неба возшедшее; Радуйся, к Небесному Свету, Христу Богу достигшее. Радуйся, яко от веры жив пребываеши; Радуйся, яко по исходе твоем духом нас не оставляеши. Радуйся, новый наш пред Богом предстателю; Радуйся, молитвенниче о душах наших теплейший. Радуйся, святе, к ликом святых сопричтенный; Радуйся, праведниче, в покой небесный достигнувый. Радуйся, трудов твоих достойную мзду восприемый; Радуйся, рабе благий, в радость Господа своего вшедый. Радуйся, преподобне Арсение, Коневский чудотворче.

Кондак 11

Пение всякое не довлеет к прославлению чудес твоих, преподобне отче Арсение, по преставлении бо множицею повсюду являлся, от потопления спасаеши и от болезней исцелявши притекающих к тебе и вопиющих Богу: Аллилуиа.

Икос 11

Светозарен весь явився, старца Моисея с рыбари от потопления спасл еси, слепцу в Новеграде представ, на исцеление во обитель твою послал еси, разслабленнаго инока Лаврентия укрепил еси, Иоанна от изступления ума исправил еси, преподобне отче Арсение, они же от бед и болезней избавльшеся, благодарственно взывают ти сицевая: Радуйся, до смерти в мире сем скорбное житие по Бозе препроводивый; Радуйся, мирскую суету о Христе препобедивый. Радуйся, по смерти делами веру твою извествуеши; Радуйся, яко являяся людем, велия чудеса совершаеши. Радуйся, обетований Христовых наследниче; Радуйся, славы Его сопричастниче. Радуйся, от потопления спасение; Радуйся, слепцев прозрение. Радуйся, разслабленных исцеление; Радуйся, изступивших из ума исправление. Радуйся, заблуждших наставниче; Радуйся, обуреваемых помоще. Радуйся, преподобне Арсение, Коневский чудотворче.

Кондак 12

Благодать творити чудеса дивная дана ти есть от Бога, преподобне отче Арсение; Афанасия бо со другом его из плена Свейскаго избавил еси, зело скорбящему иноку в Валаамстей обители во сне представ, в свою обитель послал еси его, и просящу молитв о нем, рекл еси ему: “Аще воздержишися от вина и многоглаголания, то моление сотворю о тебе”, взывая к Богу: Аллилуиа.

Икос 12

Поюще твоя чудеса, восхваляем тя, преподобне отче Арсение, и чтим святую память твою, вопиюще в похвалу сицевая: Радуйся, Царя царей — Христа Господа служителю; Радуйся, небесных сил сожителю. Радуйся, православия утверждение; Радуйся, ересей посрамление. Радуйся, болящих исцелителю; Радуйся, из плена избавителю. Радуйся, во истине призывающих послушателю; Радуйся, скорбных сердцем утешителю. Радуйся, верных прославление; Радуйся, неверных обличение. Радуйся, плачущих о гресех пред Богом ходатаю предивный; Радуйся, кающихся отец чадолюбивый. Радуйся, преподобне Арсение, Коневский чудотворче.

Кондак 13

О преподобне и достославне отче наш Арсение, утешение скорбящих и исцеление немощствующих, приими ныне малое сие приношение и от будущия муки избавится всем нам Господа умоли, да с тобою вопием Ему: Аллилуиа.

(Этот кондак читается трижды, затем икос 1 и кондак 1)

 

Молитва преподобному Арсению, Коневскому чудотворцу

О преподобне отче наш Арсение, зрителю неизреченныя славы в Небеснем Царствии. Не остави обитель твою, в нейже труды и подвиги о Христе подъял еси, но сохрани ю в мире и тишине, да пребудет незыблема от ухищрений врагов видимых и невидимых. Укрепи в доброделании чад твоих, их же собрал еси, мудре, во обитель твою, да познают звание свое, да будут достойни попечения о них Богоматере. Посети с высоты небесныя всех, верно притекающих к тебе животворною твоею молитвою. Плавающих на мори управи. Волнения моря жития сего утиши. Церковные раздоры укроти. Мир мирови у Господа всем нам испроси. Болящих уврачуй спасительным твоим заступлением. В скорбех буди утешитель и наставник благий. Всем буди вся, яко же был еси и в земнем житии твоем. Сотвори к Богу молитву, ибо дана ти есть благодать молитися за ны. Вемы бо, вемы воистину, яко много может молитва праведника, поспешествуемая ходатайством Богородицы. Аще и недостойны есмы, обаче и нас вручи Ея всесильному покрову и заступлению, да сподобимся улучити блаженство в Царствии Сына Ея, Христа Бога нашего, купно с тобою и всеми святыми во веки веков. Аминь.