Тропари, кондаки и величания - 06 июля 2025
Тропарь благоверных князей Бориса и Глеба
Днесь церковная разширяются недра,/ приемлющи богатство Божия благодати,/ веселятся русстии собори,/ видяще преславная чудеса,/ яже творите приходящим к вам верою,/ святии чудотворцы Борисе и Глебе,// молите Христа Бога, да спасет души наша.
Тропарь благоверных князей Бориса и Глеба
Правдивая страстотерпца/ и истинная Евангелия Христова послушателя,/ целомудренный Романе с незлобивым Давидом,/ не сопротив стаста врагу сущу брату,/ убивающему телеса ваша,/ душам же коснутися не могущу./ Да плачется убо злый властолюбец,/ вы же, радующеся с лики Ангельскими,/ предстояще Святей Троице,/ молитеся о державе сродников ваших богоугодней быти// и сыновом Российским спастися.
Тропарь благоверного князя Глеба
Мученик Твой, Господи,/ спасшеся веры ради,/ княже Глебе,/ труждающимся быстрый помощник/ и ненадежным надежа./ Ты бо болезни врачуеши притекающим к тебе с верою./ Темже и мы верою молимся/ от бед избави нас,/ чтущим любовию память твою.
Кондак благоверных князей Бориса и Глеба
Явися днесь в стране Русстей/ благодать исцеления/ всем, к вам, блаженнии,/ приходящим и вопиющим:// радуйтеся, заступницы теплии.
Ин тропарь благоверных князей страстотерпцев Бориса и Глеба
Пречестнии, и целомудреннии, и незлобивии страстотерпцы,/ Романе славный и Давиде чудный,/ иго бо Господне евангельски на рамо вземше,/ последовасте Христу/ и, крест Его, яко скипетр, в руку имуще,/ врага брата и злаго властолюбца соодолесте,/ и той ныне в геенне мучится,/ вы же радуетеся, с лики ангельскими предстояще Святей Троице,/ молитеся о державе сродник ваших, благоугодней быти,/ и сыновом русским спастися.
Ин тропарь благоверных князей страстотерпцев Бориса и Глеба
Мученицы Господни спасшиися,/ преславнии блаженнии князи Борисе и Глебе,/ труждающимся быстрии помощницы,/ недужным целители,/ вы бо болезни врачуете/ притекающих в церковь с верою./ Темже и мы молимся:/ от бед избавите нас,/ чтущих с любовию пренесение мощей ваших.
Ин тропарь благоверных князей страстотерпцев Бориса и Глеба
Днесь всякая душа верных веселится,/ в пренесение честных мощей ваших, Борисе и Глебе,/ слепыя просвещаете, немым уста отверзаете и печальных утешаете,/ прияли бо есте от Христа Бога благодать исцелений,/ молитеся о душах наших.
Ин кондак благоверных князей страстотерпцев Бориса и Глеба
Приидите, вси русстии собори,/ чудотворцев и мучеников Бориса и Глеба восхвалим,/ законно бо пострадавше,/ победисте сопротивнаго врага,/ тем святым заступлением князи русстии враги побеждают,/ тем память ею весело и любовию похвалим, вопиюще:/ за ны молите Святую Троицу,/ умирити мир и спасти души наша.
Ин кондак благоверных князей страстотерпцев Бориса и Глеба
От гроба знамения показасте во стране Русстей,/ явися днесь благодать исцеления/ всем, к вам, страстотерпцы, притекающим с верою,/ Борисе славный со Глебом чудным./ Крепцы верою, добропобеднии мученицы, за Христа подъемше различныя муки,/ и на многа лета сокровени быша ваши святии мощи,/ ныне же являетеся от земли,/ возсиявше лучами, яко богатство многоценно,/ и в церковь Божию честно носими, архиерей Божиих дланьми./ Темже вопием вам:/ радуйтеся, князи, русстии заступницы.
Кондак благоверных князей Бориса и Глеба
Возсия днесь преславная память ваша,/ благороднии страстотерпцы Христовы, Романе и Давиде,/ созывающи нас к похвалению Христа Бога нашего./ Тем, притекающе к раце мощей ваших,/ исцеления дар приемлем молитвами вашими, святии:// вы бо божественнии врачеве есте.
Ин тропарь благоверных князей страстотерпцев Бориса и Глеба
Яко плодовита винограда, отрасли добродетелей суще,/ Небесный дождь Христов прилете,/ источающе отечеству своему струю Православия,/ Борисе пречудне с доблим Глебом,/ вкупе молитеся Господеви сохранити град и люди,/ и на враги пособствовати,/ и душам нашим даровати велию милость.
Ин тропарь благоверных князей страстотерпцев Бориса и Глеба
Мученическою кровию порфиру окропивше светло,/ украшени предстоите, страдальцы славнии, Царю Безсмертному,/ и, венцы славы от Него приимше,/ молитеся стране нашей подати на враги одоление/ и душам нашим велию милость.
Ин кондак благоверных князей страстотерпцев Бориса и Глеба
Аще и убиени бысте и во гробех положени,/ но на Вышнее Царство преидосте,/ оваго бо копии насунута,/ другаго же, яко агнца незлобива, ножем зарезаша,/ тем и кровь ваша бысть исцеление миру,/ верою призывающим вас, святии, на помощь.
Кондак благоверного князя Глеба
Днесь земля ублажается, напившися крови твоея,/ и храм освящается, приимши тело твое,/ великомучениче княже Глебе./ Желанием болезни твоея за грези предлагаема/ и удесы благоухания освящающи,/ подающи всему миру велию милость.
Тропарь святителя Германа, архиепископа Казанского
От юности иго Христово усердно восприим,/ бденными подвиги поста и молитвы прославился еси./ Отонудуже призывающу тя Богу на служение Церкви/ в новопросвещеннем царстве Казанстем,/ вкупе со святителем Гурием воззван был еси,/ идеже яко первоначальник/ созданной тобою в граде Свияжске обители/ и достойный первосвятителю преемник явился еси./ Духом предстоя Престолу Владычню,/ молися, святителю Германе, со святителем Гурием/ православной пастве во благочестии преспевати/ и тьме иноверия светом веры разгнатися.
Тропарь святителя Германа, архиепископа Казанского
От юности иго Христово усердно восприим,/ бденными подвиги поста и молитвы прославился еси./ Отонудуже призывающу тя Богу на служение Церкви/ в новопросвещеннем царстве Казанстем,/ вкупе со святителем Гурием воззван был еси,/ идеже яко первоначальник/ созданной тобою в граде Свияжске обители/ и достойный первосвятителю преемник явился еси./ Духом предстоя Престолу Владычню,/ молися, святителю Германе, со святителем Гурием/ православной пастве во благочестии преспевати/ и тьме иноверия светом веры разгнатися.
Кондак святителя Германа, архиепископа Казанского
Доблестями преподобия и правды/ врученное тебе словесное стадо озаряя/ и на злачных Слова Христова пажитях питая,/ на правый путь заповедей Господних/ силою духа твоего наставлял еси е./ Темже и ныне, осеняемое цельбоносными чудотворении твоими,/ в святую память твою, зовем тебе:/ не престай, святителю, предстательствовати/ пред Пастыреначальником о стаде твоем,/ яко паствы твоей утверждение/ и сущим по тебе святителем удобрение.
Ин тропарь святителя Германа, архиепископа Казанского
Яко великим пастырем единонравна и учителем вселенныя единомысленна,/ Церкве Божия служителя усердна, и строителя тайн Христовых благоговейна,/ стекшеся благовернни людие Свияжския обители Богомудраго основателя/ и Казанский новопросвещенныя паствы святителя Германа/ песньми и пении восхвалим, глаголюще:/ не престаи присещати молитвами твоими на всю паству твою, в вере и благочестии блюди невредимо.
Ин тропарь святителя Германа, архиепископа Казанского
Яко великим пастырем единонравна и учителем вселенныя единомысленна,/ Церкве Божия служителя усердна, и строителя тайн Христовых благоговейна,/ стекшеся благовернни людие Свияжския обители Богомудраго основателя/ и Казанский новопросвещенныя паствы святителя Германа/ песньми и пении восхвалим, глаголюще:/ не престаи присещати молитвами твоими на всю паству твою, в вере и благочестии блюди невредимо.
Ин кондак святителя Германа, архиепископа Казанского
Бодрствуя в молитвах,/ послушания добрый рачитель быв,/ в терпении стяжал еси душу твою,/ делы смиренномудрия и кротости изрядствуя,/ престол святотельства благоверием и благочестием украсил еси,/ отче священноначальниче Германе,/ моли Христа Бога о всем стаде твоем,/ яко паствы твоей утверждение/ и сущим по тебе святителем светлое украшение.
Величание святителя Германа, архиепископа Казанского
Величаем тя, святителю отче Германе, и чтим святую память твою, ты бо молиши за нас Христа Бога нашего.
Тропарь святителя Московского Алексия
Яко апостолом сопрестольна,/ и врача предобра, и служителя благоприятна,/ к раце твоей честней притекающе, святителю Алексие, богомудре чудотворче,/ сошедшеся, любовию в память твою светло празднуем,/ в песнех и пениих радующеся и Христа славяще,/ таковую благодать тебе даровавшаго исцелений// и граду твоему великое утверждение.
Тропарь святителя Алексия
Яко сокровище пребогатое, многолетно в земли сокровенное,/ честныя мощи твоя обретошася чудоточащия,/ всеблаженне отче святителю Алексие,/ от нихже врачевство приемлюще, обогащаемся/ и Христа славословим, глаголюще:// слава прославляющему святыя Своя.
Тропарь святителям Московским
Первопрестольницы Российстии,/ истиннии хранителие апостольских преданий,/ столпи непоколебимии, православия наставницы,/ Петре, Алексие, Ионо, Филиппе и Ермогене,/ Владыку всех молите/ мир вселенней даровати// и душам нашим велию милость.
Кондак святителя Московского Алексия
Божественнаго и пречестнаго святителя Христова,/ новаго чудотворца Алексия,/ верно вси поюще, людие, любовию да ублажим, яко пастыря великаго,/ служителя же и учителя премудра земли Российстей./ Днесь, в память его притекше, радостно возопием песнь богоносному:/ яко имея дерзновение к Богу, многообразных нас избави обстояний, да зовем ти:// радуйся, утверждение граду нашему.
Ин тропарь Алексия, митрополита Московского и всея России
Яко светоносная возсия днесь память твоя, славне,/ верных озаряющи души и телеса,/ и исцеления струй Богоприятными ти молитвами источаеши,/ отче святителю Алексие,/ темже тя молим, яко архиереом сопрестольна и чудодейственника изрядна,/ иже Христову Престолу предстояй,/ о нас не оскудевай моляся спастися душам нашим.
Кондак святителя Алексия
Яко солнце незаходимое, от гроба возсия нам/ от мног лет сокровены честныя твоя мощи нетленны,/ святителю Алексие,/ тобою благодать приемлем,/ всю бо страну сию и вся ны чудесы и добротою обогащаеши,/ действом благодати, да поем ти:// радуйся, отче, светило России.
Ин тропарь святителя Алексия, митр. Московского и всея России, чудотворца
Апостольских преемников архиереев сопрестольниче,/ России всея пастырю и учителю,/ всеблаженне отче Алексие,/ Владыце всех молися/ мир пастве твоей даровати,/ и спасение душам,/ и велию милость.
Ин тропарь святителя Алексия, митр. Московского и всея России, чудотворца
Свыше от Бога глас глаголющ услышав,/ от юности подвизався, мудре,/ в молитвах, и во умилении, и слезах,/ во бдениих же и пощениих образ быв добродетели,/ отонюдуже и дом Духу Пречистому явися./ Сего ради Русския митрополии архиерейским саном почтен быв,/ Христово стадо упасл еси добре,/ еретическая нападения, не усумнеся, отрази/ и церкви воздвиже Христови, святителю Алексие,/ иночествующих лики собра/ и сих Христови привел еси./ Умре же, явися, яко спящ,/ цел соблюден бысть пред многими леты,/ подавая цельбы болящим./ Тем молим тя:/ моли Христа Бога спасти град твой Москву неврежден/ и страну и православный люди по велицей Его милости.
Ин кондак святителя Алексия, митр. Московского и всея России, чудотворца
Яко светоносная память святителя/ всем разруши уныние/ и свет облиста Небесных даров,/ всех созывающи на веселие:/ от Бога бо, святителю Алексие, благодать обрете прогонити недуги/ и вся человеки исцеляти,/ и мнихом же степень показася.
Кондак святителям Московским
Во святителех благочестно пожисте/ и люди к богоразумию настависте,/ и добре Богу угодисте,/ сего ради от Него нетлением/ и чудесы прославистеся,// яко ученицы Божия благодати.
Величание
Величаем вас,/ святителие Христовы,/ Петре, Алексие, Ионо, Филиппе и Ермогене,/ и чтим святую память вашу,/ вы бо молите за нас// Христа Бога нашего.
Тропарь святителю Афанасию, епископу Ковровскому (Сахарову)
Славы Божия ревнителя и благолепия церковнаго блюстителя, тесным житием и многими подвиги великому иерарху Александрийскому подобника, святителя Афанасия, исповедника Российскаго, усердно восхвалим, вернии. Сей бо присно молится о спасении земнаго Отечества своего и о всех живущих в нем, велегласно с любовию взывая: Русь святая, храни веру православную, в нейже тебе утверждение.
Тропарь святителю Афанасию, епископу Ковровскому
Святителю отче Афанасие, / никтоже тя разлучи от любве Божия, / но яко луча Солнца правды / во мраце гонений богоборческих / над землею Русскою возсиял еси, / поношения и раны, заточения и дальняя изгнания / и горькия работы / Христа ради тридесять лет претерпевая, / святых сродников наших воспевая и в помощь призывая, / иже пред кончиною твоею купно с Господом явишася тебе, / с нимиже и ныне водворяяся взываеши: / Русь Святая, / храни веру православную, / в нейже тебе утверждение.
Кондак святителю Афанасию, епископу Ковровскому (Сахарову)
Днесь Афанасий святитель, Христов исповедник и праведник, в невечернем Царстве Славы светло ликует и в сонме всех Русских святых, всесоставным гласом победную песнь воспевая, прилежно молит о нас Превечнаго Триединаго Бога.
Тропарь праведного отрока Артемия Веркольского
Вышняго повелением,/ тученосным облаком, небо помрачившим/ и молниям блистающим,/ грому же возшумевшу с прещением,/ испустил еси душу твою в руце Господеви,/ премудре Артемие,/ и ныне предстоиши Престолу Владыки всех,/ иже верою и любовию приходящим к тебе,/ подай исцеление всем неотложно/ и моляся Христу Богу,/ спастися душам нашим.
Кондак праведного отрока Артемия Веркольского
Возсия днесь пресветлая память премудраго Артемия;/ Богоданная благодать, яко реки, изливает от целебных мощей его дивная исцеления,/ имиже от многоразличных недуг избавляемся,/ с верою приемлюще я и взывающе:/ радуйся, Артемие Богомудре.
Тропарь преподобного Никона
Послушания добрый рачитель быв,/ преподобне Никоне приснопамятне,/ Церковь бо прекрасну Святыя Троицы в похвалу отцу твоему воздвигл еси./ Темже и мы, чада твоя, любовию вопием ти:/ слава Давшему ти крепость,/ слава Венчавшему тя,// слава Действующему тобою всем исцеления.
Тропарь общий преподобным Сергию и Никону Радонежским
Яко трисветлаго солнца светозарный звезды,/ Троическим светом озаряете сердца верных,/ сосуда Света Пресвятыя Троицы явльшеся,/ и предивным вашим житием иноком бысте твердии законоположителие/ и церквам благолепие, и благоверным, и святителем, и всем людем,/ вся бо демонския скверны отгнавше отсюду/ вашими чистыми учении и делы,/ добре упасосте стадо, собранное вами,/ но и ныне молим вас:/ посещайте чад своих, яко имущий дерзновение ко Святей Троице,/ Богомудре Сергие с чудным учеником своим Никоном,/ и молите Христа Бога, да спасет души наша.
Кондак преподобного Никона
Духовному твоему настоятелю, отче Никоне, всячески прилепився/ и от него наставляем,/ во всем Христови поработився,/ монахов был еси чиноначальник и преподобных сожитель,// с нимиже Христа Бога моли непрестанно о всех нас.
Кондак преподобнаго Никона
В постницех приобщившеся Великому Антонию/ и Евфимию Иерусалимскому поревновавше в подвизех,/ яко ангели, на земли явистеся,/ просвещающе, преподобнии, верных сердца/ Божественными знамении и чудесы повсегда,/ сего ради радостно вас почитаем и любовию вопием вам:/ радуйтеся, преподобнии отцы Сергие и Никоне,/ постником удобрение и всея Российския земли великое утверждение.
Тропарь благоверного великого князя Александра Невского
Яко благочестиваго корене/ пречестная отрасль был еси, блаженне Александре,/ яви бо тя Христос, яко некое Божественное сокровище Российстей земли,/ новаго чудотворца, преславна и богоприятна./ И днесь сошедшеся в память твою верою и любовию,/ во псалмех и пениих радующеся славим Господа,/ давшаго тебе благодать исцелений,/ Егоже моли спасти град сей,/ и державе Российстей/ богоугодней быти,// и сыновом Российским спастися.
Кондак благоверного князя Александра Невского
Якоже сродницы твои Борис и Глеб/ явишася тебе с Небесе в помощь,/ подвизающемуся на Велгера Свейскаго и воев его,/ тако и ты ныне,/ блаженне Александре,/ прииди в помощь твоим сродником// и побори борющия ны.
Кондак благоверного великого князя Александра Невского
Яко звезду тя пресветлу, почитаем, от востока возсиявшую и на запад пришедшую,/ всю бо страну сию чудесы и добротою обогащаеши/ и просвещаеши верою чтущия память твою, Александре блаженне./ Сего ради днесь празднуем твое успение, людие твои сущии:/ моли спасти Отечество твое/ и вся притекающия к раце мощей твоих и верно вопиющия ти:// радуйся, граду нашему утверждение.
Величание
Величаем тя,/ благоверный княже Александре,/ и чтим святое успение твое,/ и ныне молиши за нас// Христа, Бога нашего.
Тропарь преподобного Космы, игумена Яхромского
Горняго желая премирнаго жития,/ дольняя возненавидел еси,/ и, взем крест свой, последовал еси Христу,/ и в пустыню вселился еси, досточудне,/ в ней подвизася в пениих, в бдениих и пощениих./ Темже в тя вселися Пресвятый Дух,/ но яко имея дерзновение ко Христу Богу,/ испроси людем православным здравие и спасение/ и не забуди посещая чад своих,/ совершающих священную память твою,/ Космо, преподобне отче наш.
Кондак преподобного Космы, игумена Яхромского
Душевныя страсти из корене исторгая,/ в пустыню вселился еси, преподобне,/ и неболезненную жизнь в болезнех восприял еси,/ болезнем же лютым уставлявши озлобления просящим у тебе с верою./ Темже разреши болезни наша душевныя и телесныя, да зовем ти:/ радуйся, Космо Богомудре.
Тропарь преподобного Евфимия, архимандрита Суздальского, чудотворца
Яко светозарная звезда,/ пришел еси от востока на запад,/ оставив отечество твое, Нижний Новград,/ и, дошед богоспасаемаго града Суждаля,/ в нем обитель сотворил еси,/ и собрал еси монахов множества,/ и, прием дар чудес от Бога, отче Евфимие,/ был еси о Христе собеседник/ и спостник преподобному Сергию./ С нимже у Христа Бога испроси нам здравие, и спасение,/ и душам нашим велию милость.
Кондак преподобного Евфимия, архимандрита Суздальского, чудотворца
Волнений множество невлажно преходя,/ безплотныя враги струями слез твоих погрузил еси,/ Богомудре Евфимие преподобне,/ тем и чудес дар приял еси,/ моли непрестанно о всех нас.
Тропарь мученика Авраамия Болгарского
Днесь, благовернии людие, сошедшеся,/ восхвалим добляго сего мученика и страдальца Авраамия,/ сей бо, укрепляемь силою Божиею,/ душу свою положи за Христа,/ много пострадав от зловерных болгар./ Сего ради от Господа венец прият/ и ныне предстоит Ему/ и молится о граде сем/ и о всех нас, чтущих память его.
Ин кондак мученика Авраамия Болгарского
Укрепився, славне, любовию Господнею/ и Того честный Крест на рамо взем, иго Господне,/ посрамил еси диаволя коварствия/ и пострадал еси даже до смерти,/ и сего ради, досточудне, явися страдалец велик, Авраамие,/ и оружником храбротаинник/ и участник Божия благодати.
Кондак мученика Авраамия Болгарского
Яко многоценное сокровище,/ принесено бысть от Болгарский страны во град Владимир/ пречестное тело твое, мучениче Авраамие,/ имже подавши всем чтущим преславную память твою обилие исцелений,/ предстоя на Небеси Христу Богу/ и моля Его о спасении душ наших.
Тропарь святителю Симону Печерскому, епископу Владимирскому и Суздальскому
Житий преподобных отец Печерских списателю известный,/ святителю Христов Симоне всеблаженне,/ молися прилежно с ними Христу Богу,/ да управит в мире живот наш/и в книги животныя да напишет ны,/ спасая души наша.
Кондак святителю Симону Печерскому, епископу Владимирскому и Суздальскому
Святительства одеждою,/ аще и достойне одеялся еси,/ обаче тем не возносяся,/ желал еси паче сметием пред враты Лавры Печерския поврещися,/ смиренномудре Симоне./ Темже, не аки сметие, врат вне,/ но, яко сокровище, внутрь святыя пещеры положен быти сподобился еси,/ и ныне на Небеси Господеви предстоя,/ молися о нас, чтущих тя.
Тропарь Константину (Ярославу) и чадом его Михаилу и Феодору, Муромским
Константин днесь весело ликовствует, / предстоя Престолу Пресвятыя Троицы, / видя отечествие свое, мастию духовною сияющее: / емуже последоваша Михаил и Феодор, сынове его, / и молятся вси трие вкупе о душах наших.
Кондак Константину (Ярославу) и чадом его Михаилу и Феодору, Муромским
Изрядному воеводе и правоверному князю Константину, с сынома его вкупе, отечество его хвалящися вопиет, имеющее его начальника и заступника, яко избавльшееся им от прелести и скверны идольския: сего ради вопием ему сице: радуйся, княже Константине, преблаженне.
Тропарь преподобного Никиты
Православным смыслом юношеская возжеления возненавидев/ и доблественныя нравы восприим, врага победил еси,/ и во благоразумии Богу угодил еси,/ и свыше от Него прием дар чудес,/ бесы прогоняти, недуги исцеляти,/ Никито преславне,// моли Христа Бога, да спасет души наша.
Кондак преподобного Никиты
Христа ради от твоих рабов нуждную смерть претерпел еси/ и венец нетления от Него восприял еси,/ приходящим же с верою от честнаго твоего гроба подаеши цельбы,/ о Никито преподобне,// молитвинниче о душах наших.
Тропарь святителя Василия, епископа Рязанского
Первее в Муроме святительством почтен был еси,/ из негоже неправедно изгоняемь,/ на мантию, яко на легкий корабль, возшел еси,/ на немже паче естества, яко безплотен,/ по водам шествие творя,/ промышлением Вышняго и заступлением Богоматере управляемъ/ богоспасаемого града Рязани достигл еси /и в нем, архиерейства престол восприим,/ богоданную паству рязанскую добре упасл еси,/ святителю отче наш Василие,/ моли Христа Бога спастися душам нашим.
Кондак святителя Василия, епископа Рязанского
Яко многосветлая звезда, от града Мурома возсиял еси,/ святителю Василие,/ по водам же дошед до града нашего Рязани,/ Церковь Божию добре упасл еси,/ просвещая люди учением и житием твоим./ Поминай и ныне чада твоя, молим тя,/ наставниче наш добрый,/ и за ны Христу Богу и Пречистей Его Матери молися,/ да благодарною душею зовем ти:/ радуйся, угодниче Христов и теплый к Богу о нас молитвенниче.
Тропарь святому благоверному князю Глебу Владимирскому
Днесь светло красуется славнейший град Владимир,/ имея в себе пребогатое сокровище —/ чудоточащия честныя мощи благовернаго князя Глеба,/ имиже украшался и хваляся,/ вселенную всю созывает к веселию/ и велегласно вопиет:/ о Владыко Христе,/ даровавый таковую благодать угоднику Твоему,/ его молитвами помилуй нас.
Кондак святому благоверному князю Глебу Владимирскому
Взбранному и крепкому в праведницах,/ православною мудростию сияющему великому чудотворцу,/ благодарственная восписуем ти, благоверный княже Глебе:/ яко имея дерзновение у Престола Христова,/ верою чтущих тя, град и люди сохраняй молитвами твоими:/ ты бо еси земли Российския похвала и утверждение.
Ин тропарь благоверного великого князя Андрея Боголюбского
Еже во плоти житию твоему удивишася ангельстии чини:/ како с телом к невидимым сплетением изшел еси, преславне,/ и уязвил еси демонския полки./ Отонудуже, Андрее, Христос тебе воздаде богатыми дарованьми:/ сего ради, отче, моли спастися душам нашим.
Кондак благоверного великого князя Андрея Боголюбского
В мире сем благочестно и праведно пожив, молитвою, милостынею и благостраданием Богу угодил еси, сего ради и Бог по убиении твоем прослави тя нетлением и чудесы, Егоже, святе Андрее, моли сохранити отечество твое и всех людей, благочестно тебе почитающих.
Тропарь благоверного великого князя Андрея Боголюбского
Яко благоверен и праведен,/ за любовь Христа Бога от своих смерть приял еси,/ кровь свою пролияв,/ якоже прежде сродницы твои и страстотерпцы Борис и Глеб,/ ихже кровем совопиет и твоя кровь, святе, к Богу,/ якоже Авеля и Захарии праведных,/ благоверный страстотерпче, великий княже Андрее,/ с нимиже Христа Бога моли о стране нашей, еже Богоугодней быти/ и сыновом российским спастися.
Тропарь преподобного Стефана Махрищского
Православия ревнителю,/ благочестия наставниче и чистоты,/ ищущим спасения путеводительный светильниче,/ монашествующих Богодухновенное удобрение,/ преподобнаго Сергия духовный собеседниче,/ Стефане премудре,/ ученьми и добродеяньми твоими души просветил еси/ и пустыни населил еси,/ моли Христа Бога спастися душам нашим.
Кондак преподобного Стефана Махрищского
Чистотою душевною божественно вооружився,/ блаженную жизнь совершил еси,/ в пустыню, яко во град, вселився,/ благодать приял еси от Бога/ исцеляти недуги приходящим к честней твоей раце/ и всех возвышати к Божественней высоте,/ темже, имея дерзновение ко Святей Троице,/ поминай нас, чтущих память твою, да зовем ти:/ радуйся, преподобне Стефане, постником удобрение.
Тропарь преподобному Корнилию Александровскому
Кондак преподобному Корнилию Александровскому
Тропарь преподобному Роману Киржачскому
Кондак преподобному Роману Киржачскому
Тропарь благоверному князю Феодору Ярославичу Владимирскому
Кондак благоверному князю Феодору Ярославичу Владимирскому
Кондак преподобному Герману Зосимовскому