Акафисты - 09 июля 2025

Кондак 1

Избранному от пелен в воинство Христово и вписанному от юности в книгу живота вечнаго, дивному в чудесех, преподобному отцу нашему Нилу, вси, насыщающиися чрез него подаваемых неоскудно Божиих дарований, сошедшеся воспоем ему, яко ходатаю и молитвеннику о душах наших, в веселии глаголюще: Радуйся, преподобне отче Ниле, Столобенский чудотворче.

Икос 1

Ангела Господь Своего посла к тебе, преподобне отче, возвестити, егда узре твое мудрование о небесных, дабы прешел еси из прежния пустыни во оную, в нейже подвизался еси; ты же ни места, ни страны оныя ведая, но паче на Пославшаго тя Господа уповая и веруя, яко пернатый потекл еси в ню. Мы же, чада твоя, аки на пути тя сретающе, приветствуем, сице возглашающе: Радуйся, послушания нам образ оставивый; Радуйся, любве ради Христовы вся красная мира сего за уметы вменивый. Радуйся, Мелхиседеку подобен явивыйся; Радуйся, яко ты родителей земных утаил еси от нас, да Небесному Отцу в сыновство причтешися. Радуйся, яко за лишение сродства и дружества стяжал еси с небесными содружество; Радуйся, преподобне, возненавидевый мира сего всякое наслаждение. Радуйся, яко за сие восприял еси небесныя жизни учреждение; Радуйся, преподобне, послуживый Господу преподобием и правдою. Радуйся, за сие от Него почтенный честию и славою вечною; Радуйся, в подвизех дневных и ночных течение жизни временныя совершивый. Радуйся, в невечернем дни Царствия Божия присно пребываяй; Радуйся, тех благих, ихже око не виде и ухо не слыша, вечный наследниче. Радуйся, преподобне отче Ниле, Столобенский чудотворче.

Кондак 2

Видев показанное ти Богом место, преподобне отче Ниле, возрадовался еси о красоте его; от радости же, яко не презре Господь Бог трудов твоих, сия благодарным гласом восклицал еси: О Троице Пресвятая, едина в Божестве в триех Лицах нераздельная, Боже Отче Всемогущий, Боже Сыне Единородный, Боже Душе Утешителю, светозарный миру свете, наставниче и промыслителю всех спасения, даруй мне до конца жизни моея на сем месте выну воспевати Тебе песнь: Аллилуиа.

Икос 2

Разум весь углублен имея, преподобне отче, в поучении о блаженней вечности и в ню водворитися желая, непрестанно со Давидом вопил еси: увы мне, яко пришельствие мое продолжися, быша бо слезы моя мне, яко хлеб, день и ночь. Мы же таковому мудрованию твоему дивящеся, вопием: Радуйся, преподобне, земное мудрование Божественней воли повинувый; Радуйся, желание твое ко Владыце, Христу Господу, всячески утверждение имевый. Радуйся, крилами Богомыслия сети вражия сокрушивый; Радуйся, вся его злобная на тя умышления до конца посрамивый. Радуйся, оставивый привременныя имения и возлюбивый нищету Христову; Радуйся, яко ныне за сие достигл еси к вечному и неистощимому Его богатству. Радуйся, во умерщвлении страстей даже до конца жизни твоея неусыпно бодрствовавый; Радуйся, смертию временною к вечному безсмертию прешедый. Радуйся, за глубокое смирение в вечныя кроны вознесенный; Радуйся, в неприступней славе получивый причастие. Радуйся, всякия добродетели себе самаго образ нам явивый; Радуйся, яко за сие ныне во Царствии Небеснем велий наречен еси. Радуйся, преподобне отче Ниле, Столобенский чудотворче.

Кондак 3

Сильна и непреоборима тебе показал еси, преподобне отче, древнему врагу и завистнику блаженства нашего: егда бо зря тебе он, яко день от дне лествицу добродетелей к небеси незыблему утверждаеши, и человек плотян, но яко ангел безплотный житие проходиши, умысли от благословеннаго ти Богом места отдалити, различными привидении устрашаше тя; ты же вся его коварства, аки паучинныя сети, бодренною молитвою разгнал еси, яко не смети ему и издалеча на тя взирати, егда слыша тя поюща: Аллилуиа.

Икос 3

Имея несумненную надежду о спасении твоем, преподобне отче Ниле, ко исходу от жизни сея всегда готов был еси, и выну имея в памяти смерть, прежде оныя многотрудному своему телу место своима рукама изготовил еси. Мы же, чада твоя, аки надгробную песнь поем ти, сице глаголюще: Радуйся, труды твоя и подвиги иноческия изменивый вечным упокоением; Радуйся, страстей мглу истребивый. Радуйся, облеченный ныне в ризу безстрастия; Радуйся, ангельски на земли житие поживый. Радуйся, ко граду нетленнаго Едема прешедый; Радуйся, предстояния у страшнаго Престола Владычня сподобивыйся во славе вечней. Радуйся, усердно возлюбивый заповеди Христа Господа; Радуйся, яко друг честен и сам от Него возлюблен еси. Радуйся, многи скорби с великим благодарением претерпевый; Радуйся, в неизглаголанную радость Господа своего восприятый. Радуйся, яко даровася тебе от Бога во благословениих прославляему быти; Радуйся, яко слава твоя от человек всегда ублажается. Радуйся, преподобне отче Ниле, Столобенский чудотворче.

Кондак 4

Бурею помышлений неверных о тебе, преподобне отче, неистовии человецы смятошася, мняще, аки бы не ради любве Христовы толь жестокий пустынный путь проходил еси, но вину уединеннаго жития твоего непщеваху быти стяжание имения, чесо ради и окрасти тя умыслиша; но вместо чаемаго сокровища обретоша един образ Пречистыя Богоматере с Предвечным Младенцем, на руку Ея держимым, Господом Иисусом, к Немуже ты денно и нощно воспевал еси: Аллилуиа.

Икос 4

Слышим и веруем, преподобне отче Ниле, яко Бог тебе, любящему Его, дарствует толикая воздаяния, ихже око не виде и ухо не слыша, и яже на сердце человеку не взыдоша. Желающе же и мы твоими богоприятными молитвами таяжде получити, вопием ти: Радуйся, желания твоего совершенное получивый исполнение; Радуйся, на еже верою взирал еси, ныне лицом к лицу неприступнаго Божества славу созерцаеши. Радуйся, яко оттуду неизреченныя радости и веселия почерпаеши исполнение; Радуйся, яко ктому не приключится что тебе желати и хотети во веки. Радуйся, яко ктому не приразится к душе твоей прилог вражиих наветов и искушений; Радуйся, яко корабль твой управил еси на место воистинну доброе. Радуйся, яко стал еси им, аки на горах Араратских, на самых горах небесных; Радуйся, яко ктому уже он не боится потопления. Радуйся, яко ум твой укреплен есть во веки благодатным укреплением; радуйся, яко обогатился еси преизобильно дарами Божественными. Радуйся, яко до возглашения архангельских труб имаши душевное Боговидение; Радуйся, яко егда по возглашению их мертвии от гробов воскреснут, и ты востанеши с телом сим к лицезрению Божию. Радуйся, преподобне отче Ниле, Столобенский чудотворче.

Кондак 5

Боготечная яко звезда явился еси, преподобне, во острове Селигера езера; ибо вся окрестная страны данною ти от Солнца правды, Христа Бога, благодатию озаряеши, и на мори страстнаго сего жития обуреваемых наставляеши пособием молитв твоих на путь спасения, к небесному отечеству ведущ, и научаеши единеми усты и единем сердцем с тобою воспевати в Троице славимому Богу: Аллилуиа.

Икос 5

Видел еси, преподобне, яко в мире сем всяческая суть суета и вся тлению причастна: преходит бо мир и похоть его; уразумел же еси, яко творя и волю Божию, тою един пребывает во веки; сего ради, бегая мира и сродник твоих, вседушно потщался еси благоугодити превечному Богу. Темже за толикое твое усердие услыши нас, присно глаголющих тебе сицевая: Радуйся, орле небопарный, крилами Богомыслия возлетевый зрети немерцающую светлость Солнца правды, Иисуса Христа; Радуйся, уме чистейший, не осквернивыйся прелестьми мирскими. Радуйся, крине чистаго обоняния; Радуйся, постников воздержание. Радуйся, благочестия столпе непоборимый; Радуйся, честное духовное сокровище. Радуйся, светлое добродетелей приятелище; Радуйся, дражайший сосуде благодатнаго сокровения. Радуйся, скорбящих радосте и утешение; Радуйся, путешествующих путеводителю. Радуйся, безмездный врачу болезней всяких; Радуйся, скорый заступниче обидимых. Радуйся, преподобне отче Ниле, Столобенский чудотворче.

Кондак 6

Проповедует самое место пустынное, преподобне отче Ниле, на немже до конца жизни твоея подвизался еси, какови бяху твои труди, подвизи и терпение, яко во всю жизнь твою не имел еси ни когоже соскорбящаго и утешающаго тя в терпении, но паче отвсюду належаху ти озлобления, воздвизаемая от врага невидимаго; не терпя бо завистник богоугоднаго жития твоего зрети, некогда наусти подобных себе келию твою сожещи и с тобою, но ты, якоже на него самаго, тако и на вся его злокозненныя сети, имел еси поражающь камык, яко Давид на Голиафа, непрестанную ко Господу Богу песнь: Аллилуиа.

Икос 6

Возсия всему миру добродетелей твоих просвещение, преподобне отче, о нихже благодаряще, прославляем Отца Небеснаго, давшаго ти толикую благодать величия Своего, и тебе, яко теплому о нас молитвеннику, радостная воспеваем сице: Радуйся, усердный исполнителю Божиих велений; Радуйся, терпением твоим удививый ангелов и человеков. Радуйся, притекающим под кров твой сладкое упокоение; Радуйся, изнемогающим от трудов возстановление. Радуйся, источниче чудес обильный; Радуйся, во всяких нуждах призывающим тя скорый помощниче. Радуйся, надеющимся на тя защищение непостыдное; Радуйся, всем притекающим к тебе пристанище небурное. Радуйся, хотящим твоему непорочному житию последовати укрепителю; Радуйся, свещниче, горяй светом благочестия. Радуйся, путевождю во тьме неверия блудящим; Радуйся, подателю разума буиим. Радуйся, преподобне отче Ниле, Столобенский чудотворче.

Кондак 7

Хотя, преподобне, от здешняго века преставитися прелестнаго, на всяк день исходя слезил и рыдал еси над гробом твоим, не аки бояся смерти, яже таковым угодником Божиим, яко ты еси, единым есть прохождением от трудов на упокоение, от скорбей и болезней на вечную радость и веселие; но паче желая разрешитися от юз плотских и предстати Престолу Бога Вседержителя со Архангелы и Ангелы, и вкупе с ними торжественно воспевати песнь: Аллилуиа.

Икос 7

Нова вся явишася тебе, преподобне, егда разлучился еси повелением Господним от привременных: небо ново, земля нова и град Иерусалим нов предуготован от Бога, яко невеста украшенная мужу своему, в негоже с неизреченным веселием восприялся еси в сожитие вечное Ангелом и всем святым. Мы же, о таковем твоем преселении веселящеся, умильно глаголем сице: Радуйся, единаго Бога в триех Лицах сподобивыйся лицезрения; Радуйся, в число приятый истинных Его поклонников. Радуйся, яко не ктому с земными, но и с небесными силами на Престоле неприступныя славы Седящему поеши: Свят, Свят, Свят Господь Саваоф; Радуйся, яко от Него почерпаеши преизобильная благодати исполнение. Радуйся, и на земли Богом собраннаго твоего стада бодрый хранителю; Радуйся, всем подражающим житию твоему святому наставниче. Радуйся, яко укрепляеши последующих ти к мужественному со врагом борению; Радуйся, яко ходатайствуеши им венцы, достойныя трудов и подвигов, от Христа Бога. Радуйся, надеждо им известная, яко не всуе тещи и ни вотще трудитися им подобает; Радуйся, яко и в течении служиши им прохладою и утешением. Радуйся, яко сам правы стези Господни соделал еси; Радуйся, яко и всех темиже стезями шествовати научаеши. Радуйся, преподобне отче Ниле, Столобенский чудотворче.

Кондак 8

Странное слышание во ушию нашею обносится о тебе, преподобне отче Ниле: се бо толик дар имел еси во плоти от Бога, яко еже и втайне содеянное от человек разумел еси, и окалянна греховною нечистотою абие обличил еси, поучая не творити того более. Мы же, сицевому твоему прозрению дивящеся, прославляем Бога, прославляющего таковыя верныя Своя рабы, и вопием Ему: Аллилуиа.

Икос 8

Всего себе, елико мощно, повинул еси воли Божией, преподобне отче; темже и от Бога вся елика желал, восприял еси, от нас же, яко отец и наставник наш, услыши и приими похвальное сие пение: Радуйся, преподобне, яко душа твоя святая по желанию твоему ныне в небесных скиниях обретается; Радуйся, яко во мзду приемлет упокоение и отраду. Радуйся, яко во стране онаго веселия неизреченную сладость вкушаеши; Радуйся, яко той сладости человеку смертному не леть есть и глаголати. Радуйся, яко тоя доброты и благости око человечо не виде и ухо не слыша; Радуйся, яко с преизобилием паче желания и хотения получил еси утешения. Радуйся, техже благих и нам ходатаю присный; Радуйся, от твоих благодатных даров и нам подателю независтный. Радуйся, яко промышляеши о нашем спасении; Радуйся, яко ты печешися о добродетельнем нашем совершении. Радуйся, яко тобою ум наш в Богомыслии научается; Радуйся, яко тобою мрак неведения прогоняется. Радуйся, преподобне отче Ниле, Столобенский чудотворче.

Кондак 9

Всяко слово к похвалению ангелоподобнаго жития твоего недовольно зрим быти, преподобне отче: како бо можем того по достоянию ублажити, егоже Сам Бог дивно прославляет? Тело бо его, на земли тлению непричастное, чудес реки источает, всякия целит болезни и бесы прогоняет, душа же его святая с двадесять четырьми старцы поет вечно в небеси Седящему на Престоле: Аллилуиа.

Икос 9

Витий краснословесных не может быти тако действительно, еже бы возбудити каковаго грешника к покаянию, якоже твое сильно и действенно бысть, преподобне, едино мание: егда бо узрел еси грядуща к тебе человека, углебнувша в плотских нечистотах, абие затворил еси от него оконце келии твоея, не аки гнушаяся грешника, но являя, коль мерзит Духу Святому душа, повинная греху; тойже умилився покаяся и обещася ктому душу и тело чисто соблюдати. Мы же, радующеся, яко имеем тя о покаянии нашем усерднаго промыслителя, взываем ти таковая: Радуйся, наш истинный наставниче; Радуйся, яко чесому учил еси, та и сам неленостно творил еси. Радуйся, яко за сие велий во Царствии Небесном наречен еси; Радуйся, яко удостоен еси внити в число девствующих и последующих Агнцу на горе Сионстей. Радуйся, столпе благочестия и утверждение; Радуйся, твердое православия правило. Радуйся, вся заповеди Господни совершенно сохранивый; Радуйся, Христа ради вся оставивый и вся в Нем обретый. Радуйся, яко пользою твоих дел, аки пресладкими плоды, верных души питаеши; Радуйся, яко в меру добродетелей твоих текущих наставлявши. Радуйся, житию нестяжательному Христа ради научивыйся; Радуйся, заповедь Христову: “Не можете работати Богу и мамонне”, добре исполнивый. Радуйся, преподобне отче Ниле, Столобенский чудотворче.

Кондак 10

Спасти хотя душу твою, преподобне, всячески о телеси небрегл еси: не имеяше бо оно у тебе во всю жизнь твою упокоения ни седением, ни на земли лежанием; но вместо упокоения бяху телесную слабость поддерживающе жезли, и тако путь многоскорбнаго жития сего совершил еси; чесо ради тело твое оставил еси нам нетленно и многочудесно в подражание твоих подвигов, душею же предстал еси Престолу Владычню, с лики Святых воспевати: Аллилуиа.

Икос 10

Стена явился еси, преподобне отче Ниле, во искушениих вражиих нас утверждающая; якоже бо древле израильтяном повеле Бог вознести змию в пустыни на древо, да уязвеннии от змиев, на ню взирающе, исцеляются; тако и ты предложил еси себе нам, да егда который брат по навету вражию каковою-либо страстию побежден будет, абие взирал бы на твое чудесы обогащенное тело и исцелевался: ибо и ты таковую же плоть и темже страстем подлежащую имел еси, якоже и мы, но благодатию Божиею победитель всех страстей явился еси. Сего ради торжествующе память твою, воспеваем сице: Радуйся, преподобне, древняго врага человекоубийцу диавола со всеми его хитростьми посрамивый; Радуйся, во всю жизнь твою малейшаго угождения плоти не явивый. Радуйся, ни каковыяже дружбы с миром не имевый; Радуйся, преславную над оным победу одержавый. Радуйся, воздушная мытарства князя тьмы безбедно прошедый; Радуйся, лаяния мысленных псов не слышавый. Радуйся, яко супостат наш диавол не обрете, что на тя клеветати; Радуйся, яко вся его сила на воздусех пришествием твоим посрамися и уничижися. Радуйся, яко восходяща тя в небесное отечество сретоша небеснии Ангели и Архангели; Радуйся, яко узревше тя вси Святии возрадовашася. Радуйся, яко сподобился еси услышати прелюбезный сей глагол: “Прииди, сыне благословенный, наследуй уготованное ти Царство”; Радуйся, сего вожделеннаго жребия и нам присный ходатаю. Радуйся, преподобне отче Ниле, Столобенский чудотворче.

Кондак 11

Пение всеприятное приносил еси Богу, преподобне отче Ниле, паче жертв и всесожжений, от сердца сокрушенна и смиренна, пламенем любве воспаряющее в молитве, яже выну восхождаше во уши Господа Саваофа, яко и тебе самаго сильна явися вознести на небо и поставити пред Престолом Славы Его, идеже вечно воспеваеши Ему: Аллилуиа.

Икос 11

Света безвиновнаго причастием насладивыйся, преподобне отче Ниле, светильник мысленный явился еси нам, блудящим во греховней тме, наставляяй правыми стезями шествовати ко свету самобытному, Христу Богу нашему. Мы же, елико мощно, шествующе по тебе, яко предводители и руководце нашем, благодарственная восклицаем сице: Радуйся, церковный неугасимый светильниче; Радуйся, ко свету Богу Отцу в сыновство причтенный. Радуйся, ко свету Богу Сыну братство благодатию Его стяжавый; Радуйся, от света Бога Духа Святаго восприявый обручение живота вечнаго. Радуйся, яко вся, елика хощеши, от онаго триипостаснаго света заимствуеши; Радуйся, яко и нас благодатным светом просвещаеши. Радуйся, яко ради твоих за нас пред Престолом Божиим молитв, и мы при исходе от жизни сея надеемся избежати зрения мрачнаго лица демонскаго; Радуйся, яко при твоем светении и мы безбедно приити уповаем до горы небесныя. Радуйся, яко тебе, нас руководствующа, устрашится князь тмы, не терпя зрети светлости лица твоего; Радуйся, яко от света твоего вся простертыя на нас сети его, аки паучина, исчезнут. Радуйся, яко мы, тобою руководими, надеемся приити ко оному незаходимому свету, Христу Господу; Радуйся, яко тобою наставляеми, и мы веруем быти причастницы славы Его. Радуйся, преподобне отче Ниле, Столобенский чудотворче.

Кондак 12

Благодать не престай изливати, преподобне отче Ниле, на место, идеже постническаго жития твоего течение совершил еси, и идеже прежде кончины твоея возвестил еси духом пророческим быти иночествующим вселению: се бо, по предречению твоему, мы зде вселихомся, зде и покой наш. Ты же, яко отец и наставник, укрепляй ны и помогай нам до конца жизни нашея душеспасительную песнь воспевати Господу Богу: Аллилуиа.

Икос 12

Поюще твоя иноческия подвиги, ублажаем бдения, непрестанныя молитвы, пост, смирение и терпение, преподобне отче Ниле; но обаче вемы, яко, аще бы и тмочисленными устнами могли тя ублажити, ни коеже слово довольно будет на похвалу твоих преславных добродетелей. Тойже бо Един силен тя по достоянию прославити и ублажити, Иже глаголет: “Прославляющия Мя прославлю”. И ныне убо, яко торжественный победитель врагов спасения, прославляйся и седи на Престоле с двоюнадесятьми старцы, от нас же чад твоих, аще и малое, обаче приими приношение сие: Радуйся, готовнейший защитниче во обидах сущим; Радуйся, крепкий щите от льстиваго и клеветливаго языка. Радуйся, отвратителю от грешников праведнаго гнева Божия; Радуйся, кающихся грешников скорый пред Богом заступниче. Радуйся, в последней беде смертной паче надежды помощниче; Радуйся, добрый пастырю овец Христовых. Радуйся, яко молитвами твоими воспящаеши древнему человекоубийце диаволу в кознех его противу рабов Божиих; Радуйся, яко, ихже он мнится имети во своей власти, и тех исторгаеши. Радуйся, яко пособием твоих молитв безнадежнии и отчаяннии надежни бывают; Радуйся, яко тебе, их руководствующу, и они Царствие Небесное улучити чают. Радуйся, яко тебе, их защищающу, вражия стрелы тех не уязвляют; Радуйся, яко при твоей помощи они сами врага устрашают. Радуйся, преподобне отче Ниле, Столобенский чудотворче.

Кондак 13

О великий угодниче Христов, преподобне отче Ниле! Во многих потребных нам недостаточни есмы, обаче многая и нуждная оставивше, о единем тебе ныне молим и просим: ходатайствуй и моли о нас Господа нашего Бога, да в день всемирнаго суда сподобит ны деснаго стояния и сопричтет лику торжествующих воспевати вечно Ему песнь: Аллилуиа.

(Этот кондак читается трижды, затем икос 1 и кондак 1)

Молитва преподобному Нилу Селигерскому, Столбенскому чудотворцу

О великий угодниче, преславный чудотворче, собранного зде о тебе стада Христова бодрый пастырю и обители сея Богом данный начальниче, Ниле всеблаженне! Душею на небеси Престолу Божию предстояй и Троичныя славы наслаждаяйся, телом же на земли в Божественном храме сем почиваяй и от него данною ти свыше благодатию различная источаяй чудеса, призри милостивым оком на предстоящия честней твоей раце люди и просящия сильныя твоея помощи. Се бо мы в безмерных согрешениях осквернившиися и в тине страстей присно валяющиися, праведный гнев Божий на себе наведохом и всякия милости недостойны сотворихомся; темже и не смеюще возвести очес наших к высоте небесней, ниже вознести молебный глас, сердцем сокрушенным и духом смиренным тебе в ходатайство и пособие призываем. Ты убо, яко стяжавый дерзновение, воздвигни горе преподобныя твоя руце, якоже иногда чудный оный Моисей Боговидец Амалика побеждаяй, и простер к Господу Творцу всех и Богу теплую свою молитву, испроси Церкви благостояние, воздуха благорастворение, земли плодоносие. Избави же всех, верою несумненною к Богу приходящих и многоцелебныя мощи твоя благоговейно почитающих, от всяких бед душевных и телесных, от всех томлений и прилогов диавольских. Буди печальным утешитель, недугующим врач, напаствуемым помощник, нагим покровитель, вдовицам заступник, сирым защитник, младенцем питатель, старым укрепитель, странствующим путевождь, плавающим кормчий и исходатайствуй всем, крепкия помощи твоея усердне требующим, вся яже ко спасению полезная. Яко да твоими молитвами наставляеми, путь на земли маловременнаго жития нашего безбедне совершим, улучим же на небеси нескончаемый покой и прославим купно с тобою всех благих Дателя, единаго в Троице славимаго Бога Отца и Сына и Святаго Духа, ныне и присно, и во веки веков. Аминь.

Молитва иная (пред гробницею преподобного)

О преподобне и богоблаженне, пастырю и начальниче, отче Ниле! Ты убо, яко имея ко Владыце Христу дерзновение и ко Пречистей Его Матери, Пресвятой Богородице, буди молитвенник и помощник и ходатай о нас, недостойных рабех твоих, живущих во святей обители сей, ейже ты начальник богоизбранной дружине братству сему, и о приходящих с верою к цельбоносным мощем твоим. Буди помогая и заступая от злаго нашего сопротивника, яко, да твоими молитвами пребывающии на месте сем и приходящии с верою к раце мощей твоих и на всяком месте призывающии тя на помощь невредими будем от бесов и злых человек, славу и благодарение возсылающе Отцу, Сыну и Святому Духу, ныне и присно и во веки веков. Аминь.

Кондак 1

Избранный и дивный угодниче Христов, преподобне отче Тихоне! По достоянию ублажити тя недоумеем мы, любовию чтущии тя; обаче тоюжде любовию побуждаеми, похвальная восписовати тебе дерзаем. Ты же, просвещаяся ныне обильно от Божественнаго света во Царствии Христа Бога, и нас омраченных греховными страстьми просвети, и твоими ко Господу молитвами от всяких бед избави, да радующеся вопием ти: Радуйся, Тихоне преподобне, преславный чудотворче.

Икос 1

Ангельстии чини возрадовашася твоим подвигом, имиже в пустыни сей подвизался еси, в посте и бдении просияв и в молитвах непрестанных, серафимскою горя любовию к Богу. Темже мы ныне почитающе тя, яко приснаго собеседника ангелов, со усердием похвальная пения восписуем ти сице: Радуйся, во плоти небесный жителю; Радуйся, страстей телесных победителю. Радуйся, воздержания образ явивый; Радуйся, пустыню Луховскую просветивый. Радуйся, иноком на спасение учителю; Радуйся, безмолвия добрый рачителю. Радуйся, истинный в добродетелех наставниче; Радуйся, скорый в скорбех помощниче. Радуйся, на путь правый заблуждающих наставляяй; Радуйся, неослабнаго терпения образ нам являяй. Радуйся, унывающих утешение; Радуйся, согрешающих исправление. Радуйся, Тихоне преподобне, преславный чудотворче.

Кондак 2

Видяще окрестнии жители безмолвное житие твое, преподобне отче наш Тихоне, дивляхуся твоему терпению; темже и мы, духовная чада твоя, любезно ныне воспоминающе подвиги и труды твоя, прославляем тебе прославившаго Бога, дивнаго во святых Своих, и поем Ему: Аллилуиа.

Икос 2

Разуму податися нам Божественному, помолися к Сильному и Богу разумов, преподобне отче Тихоне, во еже разумно ублажати тя; ты бо Божественным сияя светом, со ангелы водворяешися ныне, и приими посильное ублажение сие от нас, радостно похвалы сицевая тебе приносящих: Радуйся, постническими добродетельми просиявый; Радуйся, Божественную благодать стяжавый. Радуйся, чистоты усердный хранителю; Радуйся, безмолвия истинный любителю. Радуйся, ангелов собеседниче; Радуйся, ко Христу Богу о нас грешных молитвенниче. Радуйся, Троичнаго света присный зрителю; Радуйся, темныя области слуг прогонителю. Радуйся, подвигов иноческих наставниче; Радуйся, небесныя славы наследниче. Радуйся, яко печали от человек отгоняеши; Радуйся, яко скорую помощь всем подаваеши. Радуйся, Тихоне преподобне, преславный чудотворче.

Кондак 3

Сила Вышняго благодатне осени тя, преподобне отче Тихоне, и показа тя всем яве селение и жилище быти Святаго Духа. Темже и мы, любовию почитающе память твою, верно вопием Богу, дивному во святых Своих: Аллилуиа.

Икос 3

Имуще тя велика, отче, заступника и скораго в бедах и напастех помощника, мы, духовная чада твоя, святую память твою совершающе, сия тебе любовию восписуем: Радуйся, скорбящим Божественное утешение; Радуйся, светлое Божия благодати селение. Радуйся, ревностный Троицы Святыя служителю; Радуйся, скорый всех унывающих посетителю. Радуйся, противныя силы прогнание; Радуйся, недугующих врачевание. Радуйся, столпе веры, Богом Самим утвержденный; Радуйся, учителю благочестия совершенный. Радуйся, ко спасению всем нам благонадежный водителю; Радуйся, бедствующих защитителю. Радуйся, Бога паче всего возлюбивый; Радуйся, богатство и славу мира сего ни во чтоже вменивый. Радуйся, Тихоне преподобне, преславный чудотворче.

Кондак 4

Бурю страстей многомятежнаго мира сего возненавидев, преподобне отче Тихоне, устранился еси сует его и водворился еси в пустыни, чая Бога, спасающаго тя от малодушия и от бури. Ныне же в вышних обителех водворяяся, Владыце всех с небесными силами предстоиши, поя купно с ними спасшему тя Богу: Аллилуиа.

Икос 4

Светозарную лучу имуще тя вернии, молим тя, преподобне отче наш Тихоне, просвети и вразуми сердца наша во спасение, да радующеся вопием тебе сице: Радуйся, пределов Костромских украшение; Радуйся, Луховския пустыни озарение. Радуйся, постников красото; Радуйся, подвижников доброто. Радуйся, благодатию Духа Святаго осиянный; Радуйся, источниче чудес богодарованный. Радуйся, исцелений независтный подателю; Радуйся, немудрых богомудрый наказателю. Радуйся, в болезнех сущих добрый врачу и целителю; Радуйся, всех призывающих тя с верою скорый посетителю. Радуйся, чудесы твоими Луховскую страну просвещающий; Радуйся, исправлении твоими славу Божию возвещающий. Радуйся, Тихоне преподобне, преславный чудотворче.

Кондак 5

Светильника тя показа светла, иже чудес Бог и Отец светов, горяща и светяща в сей уединенной пустыни, преподобне отче наш Тихоне. Темже окрестнии людие, дивящеся твоему благочестию и святыне, воспеваху дивному во святых Своих Богу песнь: Аллилуиа.

Икос 5

Видяще святое твое житие людие Луховстии, Тихоне преподобне, начаша благоговейно тебе почитати: ты же, бегая славы человеческия, тай работал еси Богу, прославльшему тя яве славою нетления и благоуханием святыни. Темже и мы, духовная чада твоя, сицевая любовию вопием ти: Радуйся, яко светило в пустыни сей сияющий; Радуйся, чудесы твоими всех просвещающий. Радуйся, наставниче великий на путь спасения; Радуйся, истинный последователю Евангельскаго Христова учения. Радуйся, иго Христово благое на себе восприявый; Радуйся, всего себе и весь живот твой Христу Богу предавый. Радуйся, нестяжания образ нам явивый; Радуйся, вольную нищету возлюбивый. Радуйся, забывшаго обет свой человека отечески наказавый; Радуйся, томужде вскоре исцеление и здравие телесное чудесно даровавый. Радуйся, терпением скорбей всяческих в пустыни сей просиявый; Радуйся, вольною нищетою вечное богатство стяжавый. Радуйся, Тихоне преподобне, преславный чудотворче.

Кондак 6

Гласа, вопиющаго в пустыни: “Уготовайте путь Господень”, и проповеди Евангельския, еже не пещися ни о чесом же, послушавый от сердца, вся сущая в мире Бога ради презрел и оставил еси, да Христа единаго приобрящеши, Тихоне преподобне. Темже и нам от Христа Бога получити ослабу от страстей умоли, вопиющим Ему: Аллилуиа.

Икос 6

Возсиял еси от Литовския земли, яко светозарная звезда от темнаго запада, преподобне отче Тихоне, и просветил еси пустыню Луховскую сиянием твоих доблестей. Темже молим тя усердно, от всяких вражеских наветов данною тебе от Бога благодатию избавити нас, вопиющих тебе сицевая: Радуйся, крест твой терпеливно носивый; Радуйся, плоть свою духови покоривый. Радуйся, усердный винограда Христова делателю; Радуйся, пустыни тщаливый устроителю. Радуйся, ублажаемый на земли; Радуйся, прославляемый на небеси. Радуйся, от страстей и бед чтущия тя избавляющий; Радуйся, молящихся тебе от уз греховных разрешающий. Радуйся, яко мзда твоя на небеси многа; Радуйся, яко восприял еси сугубо воздаяние трудов твоих от Бога. Радуйся, вышняго Сиона гражданине; Радуйся, моляйся тамо о нас, молитвенно воспоминающих тя ныне. Радуйся, Тихоне преподобне, преславный чудотворче.

Кондак 7

Удивися Суждальский епископ Симеон твоей нищете глубоцей и совершенному нестяжанию, преподобне отче Тихоне, еже наипаче по преставлении твоем всем яве показал еси; темже от своих си усердно послужи твоему погребению, зовый Богу песнь: Аллилуиа.

Икос 7

Новый воистинну подвижник показался еси и стране сей, Тихоне преподобне, с преподобным Макарием подвизався, с нимже купно и упокоеваешися в вечных обителех. Мы же почитающе твоя подвиги и труды, похвальными песнопении сице память твою ублажаем: Радуйся, постом и бдением и молитвою страсти греховныя разуму покоривый; Радуйся, оружием креста князя тьмы победивый. Радуйся, яко всякое желание плотское увядил еси; Радуйся, яко безстрастием природу победил еси. Радуйся, иноческих подвигов ревнителю; Радуйся, пустыни Луховския благоукрасителю. Радуйся, постников похвало и славо; Радуйся, воздержания подвижников зерцало. Радуйся, всякую добродетель в себе изобразивый; Радуйся, иго Христово и бремя Его легкое возлюбивый. Радуйся, истинную веру собою утверждающий; Радуйся, в невечернем дни Царствия Христова пребывающий. Радуйся, Тихоне преподобне, преславный чудотворче.

Кондак 8

Странное и жестокое житие твое бысть в мире сем, Тихоне преподобне; ты бо и землю пустынную орати рукама своима не возгнушался еси, и в древоделии упражняяся, неблагообразныя виды лепотным благообразием украшал еси, и телесную болезнь терпением побеждая, непрестанною молитвою воспевал еси выну, яко безплотен, песнь Богови: Аллилуиа.

Икос 8

Весь был еси умом и сердцем твоим в вышних, аще и в земледелии упражнялся еси, преподобне Тихоне, и горе оком души твоея присно взирал еси. Темже и ныне всецело водворялся тамо, заступаеши всех, верою и любовию вопиющих тебе таковая: Радуйся, новый пустынножителю; Радуйся, древних подвижник усердный ревнителю. Радуйся, Сергию Великому подражавый; Радуйся, в пустыни Луховстей чудесы просиявый. Радуйся, духовнаго совершенства учителю; Радуйся, добродетелей христианских рачителю. Радуйся, всяцем образом Владыце всех угодивый; Радуйся, равноангельное житие во плоти на земли поживый. Радуйся, яко молитвы Богу присно о нас приносиши; Радуйся, яко всем полезная от Бога просиши. Радуйся, яко Христа в души твоей вообразил еси; Радуйся, яко равную с первыми делатели, аще и последнейший леты, мзду от Него получил еси. Радуйся, Тихоне преподобне, преславный чудотворче.

Кондак 9

Луховская страна удивися тебе, Тихоне преподобне, во дни подвигов и трудов твоих; но и доныне по достоянию ублажает честную память твою. Ты бо мира сего красная ни во чтоже вменив и Единаго Бога всем сердцем своим возлюбив, явился еси воистинну глас вопиющаго в пустыни, и яко безплотен во плоти пожив, воспевал еси непрестанно, и ныне со ангелы поеши присно Богу песнь: Аллилуиа.

Икос 9

Витии хитрословесныя по достоянию восхвалити тя не могут, богомудре отче наш Тихоне: ты бо от юности весь Богу прилепился еси, и даже до конца многотруднаго жития твоего Тому усердно послужил еси. Мы же любовию вопием тебе сице, по силе нашей тя ублажающе: Радуйся, православия ревнителю; Радуйся, благочестия рачителю. Радуйся, напастей тьму отгоняяй; Радуйся, на путь спасения наставляяй. Радуйся, яко нас, чад твоих, духовно посещаеши; Радуйся, яко многая благодеяния всем подаваеши. Радуйся, яко молитвы о нас Богу приносиши; Радуйся, яко о всех злостраждущих Господа просиши. Радуйся, унывающих утешение; Радуйся, согрешающих исправление. Радуйся, пустынножителей российских удобрение; Радуйся, костромских пределов славо и похваление. Радуйся, Тихоне преподобне, преславный чудотворче.

Кондак 10

Спасти хотя душу твою, преподобне отче наш Тихоне, инославнаго отступнического суемудрия благоразумно отбегл еси, и областей великия России достиг, в пустыни Луховския страны православную веру невредимо соблюл еси, еюже к вечному Востоку востек, со ангелы поеши присно песнь Богови: Аллилуиа.

Икос 10

Стену тя незыблему и град убежища необоримый во всех скорбех и напастех житейских стяжавше, преподобне отче наш Тихоне, тебе, яко присному к Богу о нас молитвеннику, похвальная приносим пения сице: Радуйся, сущих в бедах и треволнениях всегда готовый посетителю; Радуйся, Божественных велений ревностный исполнителю. Радуйся, яко молитвою и постом врагов шатания низложил еси; Радуйся, яко пути Господни правыя тщаливо сохранил еси. Радуйся, страсти плотския воздержанием умертвивый; Радуйся, во плоти, яко безплотен, на земли сей поживый. Радуйся, многосуетнаго мира любве ради Христовы отрекийся; Радуйся, в пустыни, яко в тихом пристанище, в нова человека, созданнаго по Богу, в правде и святости истины облекийся. Радуйся, яко неозрелся еси вспять, возложь руку твою на рало; Радуйся, граду нашему Луху и всей стране его стена и забрало. Радуйся, веры светлый светильниче; Радуйся, ко грядущему граду верный наставниче. Радуйся, Тихоне преподобне, преславный чудотворче.

Кондак 11

Пение всех Богови непрестанное во всем житии твоем приносил еси, преподобне отче наш Тихоне. Ныне же от нас воспеваемый и по достоянию ублажаемый на земли, тамо на небеси купно со ангелы прославльшему тя дивно Богу воспеваеши вечное: Аллилуиа.

Икос 11

Светозарный светильниче благодати и великий угодниче Божий, Тихоне преблаженне, Ты многими и великими добродетельми сияющи, яко светило умнаго неба, вшел еси в небесныя обители и предстал еси Престолу Царя Славы, идеже ныне и нас поминай, вопиющих тебе сицевая: Радуйся, яко закон Христов не словом или языком, но самым делом истинно исполнил еси; Радуйся, яко всецело посвятився Богу, совершенно ему благоугодил еси. Радуйся, за сие восприятый от Него в горняя селения; Радуйся, сподобивыйся тамо с верными Его рабами вечнаго веселия. Радуйся, в истинней вере нас утверждающий; Радуйся, от напастей и бед свобождающий. Радуйся, яко безплотным подобно пожил еси; Радуйся, яко ангельских ликостояний сподобился еси. Радуйся, Божия благодати нам ходатаю; Радуйся, Божиих дарований всем подателю. Радуйся, яко врагов спасения нашего посрамляеши; Радуйся, яко вся козни и наветы их разрушаеши. Радуйся, Тихоне преподобне, преславный чудотворче.

Кондак 12

Благодать, данную тебе свыше от Отца светов, преподобне отче наш Тихоне, и вся труды твоя и подвиги кто от человек изрещи и похвалити возможет по достоянию; в пустыни бо нестяжательно и трудолюбно пожив, стяжал еси смирением твоим высокая и нищетою твоею богатая, и вселился еси со ангелы и всеми святыми в горнем Иерусалиме, поя присно Богу песнь: Аллилуиа.

Икос 12

Поем добльственныя твоя подвиги, ублажаем святое житие твое, почитаем честную и достохвальную кончину твою и прославляем священную память твою, преподобне отче наш Тихоне! И от избытка сердца похвальная вопием ти сице: Радуйся, от ангел с торжеством в радость Господа твоего введенный; Радуйся, в чертозе небеснем лику святых сопричтенный. Радуйся, православных крепкий поборниче; Радуйся, христианом скорый помощниче. Радуйся, истинныя веры, терпения и смиренномудрия добрый блюстителю; Радуйся, суеверия и всякия злобы и вражды искоренителю. Радуйся, пустынное стадо твое духовно посещаяй; Радуйся, нам, духовным чадом твоим, мир и благословение свыше невидимо подаваяй. Радуйся, делателю добрый; Радуйся, пастырю бодрый. Радуйся, избранный сосуд благостыни; Радуйся, прославленный от Господа благоуханием святыни. Радуйся, Тихоне преподобне, преславный чудотворче.

Кондак 13

О всехвальный угодниче Христов и чудотворче предивный, преподобне и блаженне отче Тихоне! Молим тя верою и любовию, и вопием тебе всеусердно: приими ныне малое моление сие наше и умоли милостиваго Бога, да избавит нас от всяких бед и напастей молитвами твоими, и будущия свободит муки вопиющих Ему: Аллилуиа.

(Этот кондак читается трижды, затем икос 1 и кондак 1)

Молитва преподобному Тихону, Луховскому чудотворцу

О священная главо, преподобне и достоблаженне отче наш Тихоне! Ты воистинну муж желаний духовных и вторый Даниил показался еси. Якоже бо оный древний высокою добродетелию и святостию жития своего небесных видений и дивных откровений сподобился; сице и ты, преподобне, восхождения в сердцы своем полагая, преспевал еси в добродетелех, восходя от силы в силу, и яко добрый и верный раб, вшел еси в радость Господа твоего. Темже и мы, яко духовная чада твоя, любовию побуждаеми, похвальная песнопения в честней памяти твоей, по мере веры нашея, тебе восписуем и молитвенно на помощь нашей немощи призываем. Смиренно молим тя, преподобне и преславне отче наш Тихоне, твоими благоприятными ко Господу молитвами заступи возлюбленную тобою пустыню сию, град же и весь, и всех верою чтущих святую память твою, от всякаго навета сопротивнаго, от всяких бед и напастей и от всякаго зла. Молися, преподобне, о всей державе нашей. Умоли милостиваго Бога и о нас смиренных и недостойных, да отпустит нам вся прегрешения наша, да спасет нас благодатию Своею, и сподобит радости вечныя наслаждатися в горнем онем Иерусалиме, иже есть мати всем нам, купно с тобою и со всеми святыми, от века Ему благоугодившими, в нихже в Троице славимый Бог благословен есть всегда, ныне и присно, и во веки веков. Аминь.

Кондак 1

Возбранный чудотворче и предивный иерарше, великий угодниче Христов, святителю отче Дионисие, граду и стране нашей источаяй щедроты и милости, восхваляем тя с любовию, чада твоя, ты же, яко имеяй дерзновение ко Господу, от всяких нас бед свобода, да зовем ти:
Радуйся, святителю отче Дионисие, земли Российския пресветлое украшение.

Икос 1

Ангелов Творец и всея твари Создатель яви тя Церкви Своей святителя, и учителя, и заступника Руси Святей, имущаго к Нему дерзновение молитися об избавлении нас от всяких зол, бед и скорбей. Мы же, вернии, научившеся, поем ти сице:
Радуйся, сыновнею любовию ко Господу сердце исполнивый; радуйся, совершенну любовь ко Христу показавый. Радуйся, талант, от Бога ти данный, в земли не сокрывый; радуйся, на спасение душ людских его источивый. Радуйся, на небесех духовныма очима выну Господа созерцавый; радуйся, крест на рамена вземый и Христу последовавый. Радуйся, мзду на небесех от Бога восприявый; радуйся, молитвы и пения к тебе взывающих не презревый.
Радуйся, святителю отче Дионисие, земли Российския пресветлое украшение.

Кондак 2

Видяще, яко дана тебе бысть от Господа, преподобне отче наш Дионисие, благодать подавати скорое вспоможение и утешение всем с верою к тебе притекающим, имамы убо таковаго милостиваго и скораго помощника, прославляем Всесильнаго Бога, поюще Ему: Аллилуиа!

Икос 2

Разум богомудрый стяжав и усмотрев суету мира сего, преподобне отче Дионисие, помышляяй о небеснем и жития постническаго ища, потщался еси тесным и прискорбным путем течение жизни сея совершити. Мы же, любовию побеждаеми, вопием ти сице:
Радуйся, винограда Христова неувядаемая розго; радуйся, цветов смирения прекрасное село. Радуйся, монашествующих предивное похвало; радуйся, постников путеводительная звезда. Радуйся, иноков пресветлая красото; радуйся, веры благочестивыя правило. Радуйся, святителей преславная высото; радуйся, елея премудрости неугасимая лампадо.
Радуйся, святителю отче Дионисие, земли Российския пресветлое украшение.

Кондак 3

Смирением и постом и непрестанною молитвою на страсти плотския крепко ополчився, святителю Дионисие, плоть твою духови поработил еси, и сего ради ныне предстоиши с ликами Ангелов Престолу Пресвятыя Троицы, выну поя: Аллилуиа!

Икос 3

В пустыни, в нюже вселился еси, преподобне отче Дионисие, обитель устроися Божиим произволением, в нейже в преподобии и правде денно и нощно Богу работал еси. Мы же, прославляюще Господа Бога, вопием ти:
Радуйся, на брегах Волги обитель чудную основавый; радуйся, множество иноков в ней собравый. Радуйся, преподобных Евфимия и Макария духовно возрастивый; радуйся, образ монашескаго жития им показавый. Радуйся, дванадесять иноков на проповедь Евангелия пославый; радуйся, во страны и грады верхния их направивый. Радуйся, княгиню Василиссу во ангельский образ посвятивый; радуйся, уставу иноческаго общежития ю наставивый.
Радуйся, святителю отче Дионисие, земли Российския пресветлое украшение.

Кондак 4

Боготечная звезда всея страны явился еси, преподобне отче Дионисие, всем быв образ словом, житием, любовию, тихостию, кротостию и смирением; темже и мы, видяще добродетели твоя, воспеваем Богу: Аллилуиа!

Икос 4

Возсия в тебе обильно благодать Божия, святителю отче Дионисие, яви тя светильника земли Российския: пребывая игуменом обители Печерския, о словесных овцах твоих, тебе Богом врученных, денно и нощно имел еси попечение. Мы же, взирающе на преподобническия труды твоя, вопием ти:
Радуйся, древних отец неленостный подражателю; радуйся, печальми обуреваемых смиренный утешителю. Радуйся, скорбящих скорый услышателю; радуйся, ран сердечных милостивый целитетелю. Радуйся, благочиния монастырскаго премудрый устроителю; радуйся, братии сострадательный и терпеливый учителю. Радуйся, строптивых и нерадивых строгий обличителю; радуйся, кающихся пред Богом добрый предстателю.
Радуйся, святителю отче Дионисие, земли Российския пресветлое украшение.

Кондак 5

Видя тя воистину, отче Дионисие, подвижника крепкаго и молитвенника неусыпнаго, святитель Алексий почти тя саном епископским, граду Суздалю и Нижнему Новуграду архипастыря постави; мы же, мысленно взирающе на досточудныя твоя подвиги и труды, избравшему тя Богу вопием: Аллилуиа!

Икос 5

Видя Человеколюбец Господь твое добродетельное житие, да не сокрыт будет светильник под спудом, но да светит всем верху горы, да прославят Отца Небеснаго вси человецы, изведе тя из обители пустынныя и постави тя во епископа Нижегородскаго и Суздальскаго. Мы же, чтуще труды твоя, умиленно вопием ти:
Радуйся, истины Христовы ревностный исповедниче; радуйся, от ереси стригольников мужественный защитниче. Радуйся, иноческаго общежития наставниче; радуйся, пасомых овец мудрый начальниче. Радуйся, словесе Божия усердный проповедниче; радуйся, правил церковных непреодолимый поборниче. Радуйся, преподобному Сергию спостниче и собеседниче; радуйся, взывающих пред Богом надежный заступниче.
Радуйся, святителю отче Дионисие, земли Российския пресветлое украшение.

Кондак 6

Илииною ревностию распалаяся, неправо ходящим противостал еси, никакоже соизволяяй недостойнаго на престол митрополичий поставити и нечестно дати волка в пастыря овцам, благочестно Христа славящим, поющим Ему: Аллилуиа!

Икос 6

Во град первопрестольный на собор призван был еси и тамо един от всех епископов княжескому повелению противостал еси, честь Митрополии Московския оберегая, противу ставленника князя возставая и на кафедру первосвятительскую взыти ему возбраняя. Мы же, видяще ревность твою, взываем ти:
Радуйся, яко древним каноном ревностный исполнитель был еси; радуйся, честь бо Митрополии ревностно оберегал еси. Радуйся, ты же мудростию словес твоих князя обличил еси; радуйся, яко мудрования человеча в Церковь не допустил еси. Радуйся, гнева бо князева не устрашен пребыл еси; радуйся, яко един от всех безстрашно противостал еси. Радуйся, ты же ревность в послушании церковнем показал еси; радуйся, худаго бо намерения диавола посрамитель был еси.
Радуйся, святителю отче Дионисие, земли Российския пресветлое украшение.

Кондак 7

Днесь восхвалим вси великаго святителя Дионисия и почтим заступника и утверждение земли Российския, края Суздальскаго хранителя, Пскову и Новуграду от лжеучения оградителя, ереси стригольников ревностнаго искоренителя, и тако возопиим Богу: Аллилуиа!

Икос 7

Слыша премногую твою добродетель, видя искусна познателя Священных Писаний и Преданием прилежна исполнителя, уготова тя Патриарх Нил быти ереси стригольников искоренителя. Мы же, дивящеся явленней в тебе силе Божии, благодарне вопием:
Радуйся, Пскова и Новаграда от лжеучения охранителю; радуйся, ереси стригольников неустрашимый искоренителю. Радуйся, в непрестанных трудех святительских рачителю; радуйся, паствы Христовы от ереси добрый хранителю. Радуйся, нелицеприемный истины ревнителю; радуйся, в подвизе учительства неутомимый служителю. Радуйся, безбожных и нечестивых уст заградителю; радуйся, кающихся в лжеименнем мудровании наставниче и учителю.
Радуйся, святителю отче Дионисие, земли Российския пресветлое украшение.

Кондак 8

Видя Господь твое добродетельное житие, любовь к Писанию и Священному Преданию, апостольскую ревность о Христе, молитвы многия, пост нелицемерный и милостыню всещедрую, любовь к ближним всесовершенную, возвыси тя, яко кедр ливанский; мы же, славу твою зряще, поем Богу: Аллилуиа!

Икос 8

Видя тя Патриарх града Константина в Священнем Писании прилежна познателя, трудов поста, молитвы и милостыни исполнителя, возложи крещатыя ризы на тя и возведе в сан архиепископский. Мы же, дивящеся житию твоему, умиленно вопием ти:
Радуйся, на скрижалех сердца закон Божий начертавый; радуйся, слезами житие свое украсивый. Радуйся, милостынями Богу угодивый; радуйся, пост нелицемерный стяжавый. Радуйся, молитвы непрестанныя от Бога удостоивыйся; радуйся, в Писании Священнем искусен познавыйся. Радуйся, своим бдением Ангелом уподобивыйся; радуйся, и благих иных от Бога сподобивыйся.
Радуйся, святителю отче Дионисие, земли Российския пресветлое украшение.

Кондак 9

Проповедник не словом точию, но и делом явился еси Христова учения, святителю отче Дионисие яко пастырь добрый, душу твою полагал еси за овцы Христовы и вся с любовию наставлял еси ко спасению, всем образ жития по Бозе подавая и вся поучая взывати присно Богу: Аллилуиа!

Икос 9

Егда пастырски подвизался еси, святителю Дионисие, о просвещении верою Христовою людей суздальских и нижегородских, благодать Господня излияся во мнозех делех твоих, приводящи овцы заблуждшия к познанию Христову. Мы же, поминая труды и подвиги твоя, зовем ти:
Радуйся, времена и лета достопамятных деяний списати благоволивый; радуйся, на писание летописи инока Лаврентия благословивый. Радуйся, иконы Божия Матере Одигитрии списати наказавый; радуйся, ихже в Суздаль и Нижний Новград доставите повелевый. Радуйся, кивот со Страстьми Христовыми с Царьграда принести изволивый; радуйся, имиже землю Нижегородскую духовно украсивый. Радуйся, Малахию Философа для просвещения на Русь пославый; радуйся, тьму суемудрия стригольническаго изобличивый.
Радуйся, святителю отче Дионисие, земли Российския пресветлое украшение.

Кондак 10

Православныя каноны утверждая, пришел еси в Царьград со святым Феодором и тамо вся своими добродетельми удивил еси. Патриархом Нилом митрополитом Российския земли поставлен был еси и в Киеве многия скорби и заточения претерпел еси; мы же, Бога прославляя, поем Ему: Аллилуиа!

Икос 10

В Константине граде на Митрополию Российскую поставлен был еси, великаго града Киева вскоре достигл еси и, от князя тамо заточение смиренно прием, в темнице святую душу свою честно Господеви предал еси. Мы же, на тя взирающе и тобою просвещаеми, дерзаем глаголати сице:
Радуйся, яко от Патриарха Нила митрополитом на Русь поставлен был еси; радуйся, якоже сана первосвятительскаго удостоился еси. Радуйся, от князя бо заточение претерпел еси; радуйся, ты же вся скорби, яко от Бога, приял еси. Радуйся, яко мирно и радостно час смертный сретил еси; радуйся, душу бо твою во смирении предал еси. Радуйся, якоже в пещере великаго Антония погребен был еси; радуйся, ты же и по смерти твоей нас не оставил еси.
Радуйся, святителю отче Дионисие, земли Российския пресветлое украшение.

Кондак 11

Благодать от Бога стяжавшаго, дивнаго во святых Дионисия почтим сердцем и усты: кто исчислит твоя труды, молитвы и посты, о святителю? Мы же потщимся тебе всемерно подражати и благоприятно Богу вопияти: Аллилуиа!

Икос 11

Светоподательными лучи блистает житие твое, святителю отче Дионисие; евангельския заветы исполняя, крест на раменех своих за Христом безропотно понесл еси. Темже и мы глаголем ти:
Радуйся, Пресвятыя Троицы верный служителю; радуйся, Матере Божия усердный почитателю. Радуйся, Ангелов Божиих сослужителю; радуйся, пророков святых ревнователю. Радуйся, апостолов Господних подражателю; радуйся, мучеников Христовых соревнователю. Радуйся, святителей ревностных равностоятелю; радуйся, преподобных отец сопредстателю.
Радуйся, святителю отче Дионисие, земли Российския пресветлое украшение.

Кондак 12

Благодать, данную ти от Бога, ведуще, притекаем к твоему заступлению, святителю отче Дионисие, усердно моляще тя. Не остави нас, чад твоих, в святых твоих молитвах, да и мы по скончании нашего земнаго жительства с тобою воспоем Богу: Аллилуиа!

Икос 12

Светоприемный светильник истиннаго света сущим на земли являешися, святителю Дионисие, просвещаеши бо верных сердца и к разуму Божественному вся наставляеши, поучая и нас радостно взывати ти:
Радуйся, свеще светозарная, Церковь озаряющая; радуйся, звездо, землю Российскую просвещающая. Радуйся, заре, мрак страстей и грехов разгоняющая; радуйся, молние, еретичествующих устрашающая. Радуйся, лучу, в иночестве подвизающихся укрепляющий; радуйся, свете, в подвизех благочестия наставляющий. Радуйся, светильниче, Нижегородский удел просветляющий; радуйся, светило, Суздальский край освещающее.
Радуйся, святителю отче Дионисие, земли Российския пресветлое украшение.

Кондак 13

О предивный и преславный святителю отче Дионисие, приими от нас, недостойных, хвалебное пение сие, пролей о нас твоя теплыя молитвы и умоли Человеколюбца Господа, да не погубит нас со беззаконии нашими, но обратит к покаянию и исправлению, да прочее время жития нашего земнаго не в работе греху и страстем, но в делании заповедей Его святых и во благочестии провождаем; мы же с тобою вопием Ему: Аллилуиа!

(Этот кондак читается трижды, затем икос 1 и кондак 1)

Молитва

О святителю отче Дионисие, ты веси немощь естества нашего и скорбь времен настоящих, пролей о нас твоя теплыя молитвы и умоли Человеколюбца Господа, да не погубит нас со беззаконии нашими, но обратит к покаянию и исправлению, да прочее время жития нашего земнаго не в работе греху и страстем, но в делании заповедей Его святых и во благочестии провождаем. Не презри и не посрами упования нашего, но буди о нас предстатель немолчный к Богу, да сохранит нас от мирских искушений, от диавольских сетей и от плотских похотей, да дарует нам во бранех терпение неослабное. В час же смертный явися нам, отче, заступник необоримый, ускори тогда на молитву о нас, безпомощных, и помози нам мирную и благую кончину улучити, грозная мытарства воздушная без препятия минути и в Небесный Горний Иерусалим внити. О всеблаженне отче наш Дионисие, сподоби ны последовати, по силе нашей, святому твоему житию! Яко да всемилостивым предстательством Преблагословенныя Владычицы нашея Богородицы и Приснодевы Марии и твоими святыми молитвами сподобит нас Преблагий Христос Бог наш наследники быти Царствия Своего Небеснаго, славящих и величающих Его купно со Безначальным Его Отцем и Пресвятым и Благим и Животворящим Духом, ныне и присно и во веки веков. Аминь.