Возбранный от Царя сил, Господа Иисуса, данный России воеводо и чудотворче предивный, преподобне отче Сергие! Прославляюще мы прославльшаго тя славы Господа, благодарственное пение воспеваем ти, ибо молитвами твоими от нашествия иноплеменник и скорбных обстояний нас присно избавляеши, яко имея дерзновение ко Господу, от всяких нас бед свободи, да зовем ти:
Радуйся, Сергие, скорый помощниче и преславный чудотворче.
Ангелов Творец, предуведевый, по самовластному чистаго сердца твоего изволению, всеусердствующее Его воли исполнение, еще во чреве матерни трикратным возглашением, показа тя миру истиннаго служителя быти Святыя Троицы и научи всех вопити тебе сице:
Радуйся, прежде век, яко имаши верный раб Христов быти, предусмотренный; радуйся, во оноже время во блаженное и небесное жилище предуставленный.
Радуйся, от чрева матерня на службу Небеснаго Царя, яко воин, хотящий верен Ему быти, призванный; радуйся, яко благодатию Божиею оправданный.
Радуйся, не точию России, но и всей вселенней прославленный; радуйся, трикратным твоим во чреве возглашением родителей и всех слышащих удививый.
Радуйся, по рождении своем постное иноческое житие показавый; радуйся, от сосца матерня воздержание чудное явивый.
Радуйся, яко в среду и пяток млека никакоже вкусивый; радуйся, родителей благих добрый и избранный плоде.
Радуйся, радости скорбящим и милости с верою у тебе просящим подателю; радуйся, печалей злых во всяких приключениих отгонителю.
Радуйся, Сергие, скорый помощниче и преславный чудотворче.
Видящи вся Россия и иныя страны данною тебе, преподобне отче Сергие, благодатию Божиею, с верою к святым твоим мощем приходящим, и скорое вспоможение, и присное преславное чудес творение, удивляются. И мы вси, веселящеся, яко имеем таковаго милостиваго помощника, Прославльшаго тя прославляюще и тя, благаго раба и вернаго слугу Господня, восхваляюще, вопием Ему: Аллилуиа.
Разум, еще сущу ти во чреве матерни, Святую Троицу прославити Иисус Христос даровавый, и веру крепкую, надежду несумненную, любовь истинную к Нему имети утвердивый, сподоби тя во имя Святыя Троицы преславный храм и обитель чудную устроити, и во ону множество инок собрати. Сего ради вернии научишася воспевати тебе тако:
Радуйся, честное Пресвятыя Троицы носило и похваление; радуйся, добре стадо, тобою собранное, во спасение наставляяй.
Радуйся, честный образе агнцем и пастырем; радуйся, правило веры и образе кротости духовныя.
Радуйся, святыням чистое и непорочное жилище; радуйся, еще при жизни сподобивыйся видети Пресвятую Богородицу со двема апостолома.
Радуйся, удостоивыйся во время совершения литургии сослужения ангельскаго; радуйся, во святую литургию в благодати Божией весь, аки во огни, стоящий.
Радуйся, оным Божественным огнем, в потир вшедым, причастивыйся; радуйся, достоин бывый ангельскаго собеседования.
Радуйся, преисполненный всякия благостыни; радуйся, чистоты душевныя и телесныя усердный хранителю.
Радуйся, Сергие, скорый помощниче и преславный чудотворче.
Силою, данною ти свыше, будущая, яко настоящая, созерцая, возвещал еси и великому князю Димитрию о победе многочисленных прегордых агарян, хотящих Россию огнем и мечем опустошити, прорекл еси, и от своего иноческаго лика двух монахов на противных в помощь дал еси, и молитвою твоею святою к Богу вопия, на агаряны победу сотворил еси. За еже тя прославляюще и о таковой же твоей на сопротивных православному воинству помощи просяще, Богу вопием: Аллилуиа.
Имуще помышление родителие твои и людие о трикратном твоем во чреве матернем в церкви глашении и удивльшеся, разумеша нечто преславное и чудное быти: и по сих уведевше твое радостное рождение, радовахуся и радостная тебе приношаху, глаголюще:
Радуйся, отроча добродушевное и благонадежное; радуйся, детище, всякия благодати Божия исполненное.
Радуйся, пречудное в младенчестве постничество нам являяй; радуйся, оным многих приводяй во удивление и увеселяяй.
Радуйся, яко с тобою всегда бе благодать Господня; радуйся, от юности твоея всем сердцем и мыслию Бога возлюбивый.
Радуйся, кротость, смирение и бдение имевый; радуйся, вся мира сего красная, яко скоро исчезающая, презревый.
Радуйся, вся плотския похоти Бога ради умертвивый; радуйся, многообразныя козни лукаваго силою Божиею победивый.
Радуйся, многия люди от греховнаго пути ко Господу обративый и спасый; радуйся, яко тобою сладостей духовных исполняемся.
Радуйся, Сергие, скорый помощниче и преславный чудотворче.
Бури жития мира сего, присно внутренними и внешними злострадании волнующагося, преподобне отче Сергие, избавився, пришел еси во пристанище немятежное небесное, на места злачна и прохладна, идеже потоцы сладости неисповедимыя, пища славы Божия нетленная, пения и гласы празднующих. Тамо почиваеши и веселишися, со всеми ангельскими силами поя Богу: Аллилуиа.
Слышаша, преподобне отче Сергие, ближнии и дальнии ангелоподобное твое житие и благодати чудес струю выну текущую, яко молитвою твоею прокаженнии очищаются, слепии прозирают, хромии ходят и разноообразных недуг с верою притекающии здравие улучают, сих избавльшеся, вопияху к тебе таковая:
Радуйся, мироварнице, на вся недуги врачевание подавающая; радуйся, безмездно паче естества врачу скоромилостивый.
Радуйся, милости превеликия и скорбным сострадания сокровище; радуйся, всеусерднаго о людех промышления приятелище.
Радуйся, душу свою за человеки положити готовый; радуйся, увеселение и отрада к тебе прибегающим.
Радуйся, мертвеца преславно молитвою твоею ожививый; радуйся, оскудение монастырское в пищи исполнивый.
Радуйся, в сусе месте поток водный тещи у Бога испросивый; радуйся, яко таяжде вода, молитвою твоею исцеляющи недуги, чудодействует.
Радуйся, чудес пучино, Богом излиянная; радуйся, желаемых благ пришедшим к тебе подателю.
Радуйся, Сергие, скорый помощниче и преславный чудотворче.
Боготечная пресветлая звезда явился еси, преподобне отче Сергие, небо церковное украшаяй и всех блудящих по морю страстнаго жития сего данною тебе от Солнца Правды Христа Иисуса, истиннаго Бога, благодатию озаряяй, мрак печалей и мглу всяких недуг и скорбей прогоняяй, наставляеши всех к тебе с верою притекающих на путь спасенный, к вечному Небесному Отечеству ведущий, поющих Богу: Аллилуиа.
Видев преподобный Сергий, яко в мире сем всяческая суета и тлению причастна, потщася вседушно Превечному Богу благоугодити, и воистину не вотще потрудися: премени бо тленная на нетленная, наипаче же предстояния сподобися у страшнаго Престола Владычня в славе вечней. Темже вопием ему:
Радуйся, яко идеже Христос в телеси, таможде и ты пребываеши; радуйся, тамо, яко в зерцале, в Бозе вся Ему любезная созерцаеши.
Радуйся, яко созерцая в Нем молящихся ти о помощи, молитвою твоею им полезная ходатайствуеши; радуйся, скорый помощниче призывающим тя во бранех православным.
Радуйся, молитвою твоею Российстей стране победы на противныя подаваяй; радуйся, скорбящим скоропредстательный утешителю.
Радуйся, немощей телесных и душевных немздоприемный исцелителю; радуйся, многая чудеса благодатию Духа Святаго содеваяй.
Радуйся, хромым хождение и слепым прозрение подаваяй; радуйся, грозд винный, питающий нас и веселящий.
Радуйся, розго Христа лозы истинныя, мног плод в пособие православным творящая; радуйся, благий рабе и верный, и добрый делателю винограда Христова.
Радуйся, Сергие, скорый помощниче и преславный чудотворче.
Проповедует держава Российская, богомудре Сергие, труды твоя и болезни, бдение же и сухоядение, ради душевнаго твоего спасения подъятыя, егоже ради прослави тя Господь славою Своею Божественною. Темже, яко рай насажденный, в Церкви явился еси, имущи древо жизни Самаго Господа, от Негоже вкусившии вся скоро гибнущая в мире сем презирают и радостно в прекрасный виноград вышний входят, идеже ты, предстоя Ему, вопиеши: Аллилуиа.
Возсия Церкви и стране нашей Российстей просвещение совершенных твоих добродетелей, преподобне отче Сергие, о нихже благодаряще Отца Небеснаго, давшаго тебе толикую благодать величия Своего, к тебе, яко к теплому о нас молитвеннику, радостная воспеваем тако:
Радуйся, ангельское житие нам являяй; радуйся, страсти греховныя уставляяй.
Радуйся, образе истиннаго смирения; радуйся, зерцало совершеннаго терпения.
Радуйся, наставниче великий спасению; радуйся, приводяй грешных ко исправлению.
Радуйся, известный исполнителю заповедей Христовых; радуйся, душ немощных исцеление.
Радуйся, милостыню творити научаяй; радуйся, ризы и брашна немощным подавати повелеваяй.
Радуйся, пустынниче, мирскую честь и богатство возненавидевый; радуйся, постниче, от юности Богу послуживый.
Радуйся, Сергие, скорый помощниче и преславный чудотворче.
Хотя избран дом Духу Святому себе сотворити, потщался еси тесным и прискорбным путем, ведущим в жизнь вечную, взем на рамо свое Крест Христов, шествовати, еже благодатию Божиею от юности твоея непорочно в творениих заповедей Господних совершив, достигл еси уготованнаго тебе в небесном всевеселом пребывании воздаяния, и тамо благодарственно поеши Богу: Аллилуиа.
Новую благодать показа всех Творец и Владыка тебе, богомудре Сергие: аще бо и умерл еси на земли плотию, но душею в вышнем селении всегда жив сый, многая и преславная чудеса в мире живущим людем действуеши, и теплым твоим ходатайством пособствуеши, вопиющим к тебе таковая:
Радуйся, девственниче душею и телом; радуйся, иноком наставниче предивный.
Радуйся, душ наших радование; радуйся, быстрое нищим услышание.
Радуйся, скорбящим приятное попечение; радуйся, чистоты усердный хранителю.
Радуйся, ненадежным надеяние; радуйся, всея России увеселение.
Радуйся, древо чудоточное рая Иисусова; радуйся, крине райскаго прозябения.
Радуйся, миро Христова благоухания; радуйся, яко тобою приносится радование.
Радуйся, Сергие, скорый помощниче и преславный чудотворче.
Странное и преславное чудо является притекающим к тебе, богомудре Сергие: ибо данною тебе Божиею благодатию с верою просящим немедленно от всяких многообразных телесных и душевных скорбей исцеляеши, от бед избавляеши, от напастей охраняеши, и всем всяко благополезное прошение исполняеши, и вопиеши Богу: Аллилуиа.
Весь еси, преподобне отче Сергие, в вышних, но и нижних не оставляеши: присно со Христом Царем Вечным царствуеши и нас, грешных и недостойных, пред Ним воспоминаеши, моляся о спасении нашем. Темже от усердия нашего вопием к тебе сице:
Радуйся, оставльший имение и возлюбивый нищету Христову; радуйся, достигший к неистощимому богатству.
Радуйся, Духу Святому подклонивыйся со всяким смирением; радуйся, воине Христов непобедимый явльшийся.
Радуйся, крилома богомыслия сети вражия сокрушивый; радуйся, смирением возвышаемый, в вечныя кровы возлетевый.
Радуйся, просвещенный внутрь благодатию; радуйся, истребивый страстей мглу душевредную.
Радуйся, в подвизех дневных и нощных течение совершивый; радуйся, в невечернем дни Царствия Божия присно почиваяй.
Радуйся, тамо снедения пищи разумныя сподобльшийся; радуйся, яко того блаженства от Бога вечно удостоивыйся.
Радуйся, Сергие, скорый помощниче и преславный чудотворче.
Всякое естество ангельское удивися великому свыше тебе дарованию, яко на земли невещественное житие показал еси, и во плоти, аки безплотен, явился еси. Сего ради многих чудес творения от Господа прием, чистою и боголюбезною душею твоею Того благостию к Небесным причтен еси силам, в Небесех ныне поеши всесильному Богу: Аллилуиа.
Витии многовещаннии недоумеют достойно славити тя, достойный всякия славы, славне преподобне отче Сергие, ибо пачеестественная многая преславная чудодействия, еще жив сущь, показал еси, но и по смерти тая благодатию Божиею творити не престаеши. Мы же, любовию понуждаеми, дерзаем пети тебе сице:
Радуйся, земный ангеле и небесный человече; радуйся, во плоти живый духовно, на земли небесно.
Радуйся, в человечестве пребываяй ангельски, в мире премирно; радуйся, душевныма твоима очима выну Господа созерцавый.
Радуйся, пред лицем Божиим, яко раб пред Господем, ходивый; радуйся, пред Оным, яко сын пред Отцем, яко ученик пред Учителем, шествовавый.
Радуйся, яко воин пред Воеводою готов сый вся повеленная Им творити; радуйся, добрый стада своего иночествующих наставниче и правителю.
Радуйся, шествовавый от силы в силу, дондеже явися тебе Бог богов в Сионе; радуйся, Единаго Господа возлюбивый и к Нему очеса своя выну имевый.
Радуйся, во вся дни живота своего Его искавый и в Нем намерение полагавый; радуйся, ничесого на Небеси и на земли, разве Христа Иисуса, видети желавый.
Радуйся, Сергие, скорый помощниче и преславный чудотворче.
Спасти хотя душу твою, в юности возраста своего отреклся еси воли своея и во знамение отсечения ея постригл еси власы главы своея, и был еси монах, покоривый себе воли Божией и начальником, от Него поставленным, ихже веления тако слушал еси, яко Самаго Господа, никогда же прекословя, но слову веления исполнением дела отвещавая. Всяческая же приключения благодарно, яко верный раб, от Господа приимал еси, Емуже на Небесех предстоя, ныне вопиеши: Аллилуиа.
Стена еси всем человеком, к заступлению твоему прибегающим, преподобне богомудре Сергие. Темже и нам, к тебе приходящим и милостиваго твоего во всяких нуждах заступления у Царя Небеснаго просящим, буди стена крепкая и ограждение непреоборимое, от всяких нас бед и напастей застеняя и ограждая, за еже мы вопием тебе таковая:
Радуйся, воине Царя Небеснаго, не обязавыйся куплями житейскими, да Ему угоден будеши; радуйся, не восхотевый двема господинома, Богу и миру, работати, но Единому Богу точию.
Радуйся, от юности на тело свое, на мир сей и диавола вооруживыйся; радуйся, постом, поклоны, стоянием на молитве, бдением умертвивый плоть свою.
Радуйся, умертвивый оную прежде, нежели она жива страстем бяше; радуйся, мертву содеявый гортань противу приимания сластей.
Радуйся, мертв сотворивый язык противу глаголания скверных, клеветных и ложных; радуйся, мертвы устроивый ушеса противу слышания душевредных.
Радуйся, мертвы содеявый руце противу грабления и всяких зол творения; радуйся, мертво сотворивый чрево противу объядения и пиянства.
Радуйся, мертва соделавый трудами чресла своя противу нечистоты; радуйся, мертвы сотворивый нозе противу течения в путь грешников и на совет нечестивых.
Радуйся, Сергие, скорый помощниче и преславный чудотворче.
Пение благодарственное благотворителю Христу Иисусу, тя, преподобне отче, прославляюще, вси православнии взывают, яко даровал ти многих чудес силу творения: слепыя просвещати, прокаженныя очищати, больныя врачевати, бесныя от демонскаго дручения свобождати, толико сильне, якоже и не у приведенным к тебе бывшим бесным, еще на пути демони от них отбегаху и ктому не возвращахуся, боящеся в тебе силы Божия, юже выну в Небесех прославляя, вопиеши Богу: Аллилуиа.
Светозарное светило в православной Российстей державе и во всей вселенней благодатию немерцающаго Солнца, Христа Иисуса, просвещающею возсиявшее, зрим тя, богомудре отче: с невещественными бо в вышних предстоя Престолу Троицы Пресвятыя, радости превеликия исполнен еси и Божественными лучами Трисолнечнаго Света осияваемь, облистаеши верныя, вопиющия к тебе таковая:
Радуйся, возшедый на гору превысоку добродетелей Божественных; радуйся, яко от тоя удобь возшел еси на гору небесную.
Радуйся, яко от обители земныя во обитель небесную водворился еси; радуйся, яко восходя тамо душею, нам мощи твоя святыя оставил еси.
Радуйся, яко мощи твоя исцелевают всякия скорби и болезни; радуйся, яко мощей твоих демони трепещут.
Радуйся, яко твоя мощи комуждо в приключшихся печалех бывают увеселение; радуйся, душею востекий в Сион Горний к Царю Небесному.
Радуйся, яко тамо предстоя, о всех к Нему тепле ходатайствуеши; радуйся, яко благоутробие Его о всех чтущих память твою умилостивляеши.
Радуйся, стране нашей на противных победу молитвою твоею содеваеши; радуйся, всем верным всякое прошение во их пользу исполняеши.
Радуйся, Сергие, скорый помощниче и преславный чудотворче.
Благодать, данную ти от Бога, сведуще, тебе, приснаго нашего милостиваго отца, прилежно просим: пролей ныне теплую твою молитву о нас, грешных, ко Господу, яко да презрев вся наша согрешения, дарует победы на враги, яко царю Константину на Максентиа, яко Давиду на Голиафа; державу Российскую да укрепит, Церковь Свою Святую от распрей и расколов непозыблему да сохранит, обилие всяких плодов земли да дарует и вся православныя христианы да спасет и помилует, чесого от Него твоими молитвами улучити ожидающе, вопием Ему: Аллилуиа.
Поюще дивнаго во святых Своих Царя Небеснаго, прославльшаго тя, вернаго Своего раба, преподобнаго отца Сергия, милостивое твое, скорое нам во всяких нуждах и печалех поможение прославляем, ибо в тебе в Троице прославляемый Бог наш преславным многим чудодействием дивно прославися, о чесом удивляющеся вопием к тебе сице:
Радуйся, великославный Российский наш заступниче, отче Сергие; радуйся, совершенный в добродетелех человече.
Радуйся, дивный подражателю совершенства Отца нашего Небеснаго; радуйся, преблагий и добрый наставниче иноков.
Радуйся, образе пустынножителей и устроителю общаго жития; радуйся, всех православных скорый помощниче и заступниче.
Радуйся, Царя Небеснаго и Бога известный умилостивителю; радуйся, многажды заступлением твоим прошения предваряяй.
Радуйся, покрове, Богом зданный, имже покрываются мнози; радуйся, ленивых подвигнувый твоими христоподражательными нравы.
Радуйся, доброзрачное света евангельскаго всесветлое сияние; радуйся, Трисолнечнаго Святыя Троицы света выну просвещающее озарение.
Радуйся, Сергие, скорый помощниче и преславный чудотворче.
О чудотворче преславный и заступниче всем нам во всяких бедах и скорбех скорый и пречудный, богомудре отче Сергие! Нынешнее наше приими приношение и богоприятным твоим ходатайством умоли Господа сил силу свыше православному нашему воинству на сопротивныя подати, и нам всем, Того благодатию очистившимся, от геены избавитися, и грядущая в Небесех благая улучити, вопиющим Ему: Аллилуиа.
Этот кондак читается трижды, затем 1й икос «Ангелов Творец…» и 1й кондак «Возбранный от Царя сил…».
О священная главо, преподобне и Богоносне отче наш Сергие, молитвою твоею, и верою, и любовию, яже к Богу, и чистотою сердца, еще на земли во обитель Пресвятыя Троицы душу твою устроивый, и ангельскаго общения и Пресвятыя Богородицы посещения сподобивыйся, и дар чудодейственныя благодати приемый, по отшествии же твоем от земных наипаче к Богу приближивыйся, и небесныя силы приобщивыйся, но и от нас духом любве своея не отступивый, и честныя твоя мощи, яко сосуд благодати полный и преизливающийся, нам оставивый! Велие имея дерзновение ко Всемилостивому Владыце, моли спасти рабы Его, сущей в тебе благодати Его верующия и к тебе с любовию притекающия. Испроси нам от Великодаровитаго Бога нашего всякий дар, всем и коемуждо благопотребен, веры непорочны соблюдение, градов наших утверждение, мира умирение, от глада и пагубы избавление, от нашествия иноплеменных сохранение, скорбящим утешение, недугующим исцеление, падшим возставление, заблуждающим на путь истины и спасения возвращение, подвизающимся укрепление, благоделающим в делах благих преуспеяние и благословение, младенцем воспитание, юным наставление, неведущим вразумление, сиротам и вдовицам заступление, отходящим от сего временнаго жития к вечному благое уготовление и напутствие, отшедшим блаженное упокоение, и вся ны споспешествующими твоими молитвами сподоби в день Страшнаго суда шуия части избавитися, десныя же страны общники быти и блаженный оный глас Владыки Христа услышати: приидите, благословеннии Отца Моего, наследуйте уготованное вам царствие от сложения мира. Аминь.
О священная главо, преподобне отче, преблаженне авво Сергие великий! Не забуди убогих своих до конца, но поминай нас во святых своих и благоприятных молитвах к Богу. Помяни стадо свое, еже сам упасл еси, и не забуди посещати чад своих. Моли за ны, отче священный, за дети своя духовныя, яко имея дерзновение к Небесному Царю, не премолчи за ны ко Господу и не презри нас, верою и любовию чтущих тя. Поминай нас, недостойных, у престола Вседержителева, и не престай моляся о нас ко Христу Богу, ибо дана тебе бысть благодать за ны молитися. Не мним бо тя суща мертва: аще бо и телом преставился еси от нас, но и по смерти жив сый пребываеши. Не отступай от нас духом, сохраняя нас от стрел вражиих, и всякия прелести бесовския, и козней диавольских, пастырю наш добрый; аще бо и мощей твоих рака пред очима нашима видима есть всегда, но святая твоя душа со ангельскими воинствы, со безплотными лики, с Небесными силами, у престола Вседержителя предстоящи, достойно веселится. Ведуще бо тя воистину и по смерти жива суща, тебе припадаем и тебе молимся, еже молитися о нас Всесильному Богу о пользе душ наших, и испросити время на покаяние, и о невозбранном преитии от земли на Небо, мытарств же горьких, бесов, воздушных князей и вечныя муки избавится, и Небесному Царствию наследником быти со всеми праведными, от века угодившими Господу нашему Иисусу Христу, Емуже подобает всякая слава, честь и поклонение со Безначальным Его Отцем и с Пресвятым, и Благим, и Животворящим Его Духом ныне, и присно, и во веки веков. Аминь.
О Небеснаго гражданине Иерусалима, преподобне отче Сергие! Воззри на нас милостиво и к земли приверженных возведи к высоте Небесней. Ты горе на Небеси; мы, на земли низу, удалены от тебе не толико местом, елико грехами своими и беззакониями; но к тебе, яко нам сродному, прибегаем и взываем: настави нас ходити путем твоим, вразуми и руководствуй. Свойственно есть тебе, отче наш, благоутробие и человеколюбие: на земли живущу, не о своем токмо спасении бысть тебе попечение, но и о всех к тебе притекающих. Наставления твоя быша тростию книжника скорописца, на сердце каждаго глаголы жизни начертавающаго. Не телесныя токмо врачевал еси болезни, но паче душевных врач изящный явился еси; и вся твоя святая жизнь бысть зерцалом всякия добродетели. Аще толик был еси, святче Божий, на земли, колик ныне еси, на Небеси! Ты днесь предстоиши Престолу Света Неприступнаго и в нем, яко в зерцале, зриши вся наша нужды и прошения; ты водворяешися вкупе со Ангелы, о едином грешнице кающемся радующимися. И человеколюбие Божие есть неистощимо, и твое к Нему дерзновение много, не престани о нас вопия ко Господу. Испроси предстательством своим у Всемилостиваго Бога нашего мир Церкви Его, под знамением креста воинствующей, согласие в вере и единомудрие, суемудрия же и расколов истребление, утверждение во благих делех, больным исцеление, печальным утешение, обиженным заступление, бедствующим помощь. Не посрами нас, к тебе с верою притекающих. Аще бо и недостойни есмы толикаго отца и ходатая, но ты, быв подражатель человеколюбия Божия, сотвори нас достойны чрез обращение от злых дел к благому житию. Вся богопросвещенная Россия, твоими чудесы исполненная и милостями облагодетельствованная, исповедует тя быти своего покровителя и заступника. Яви древния милости твоя и ихже отцем спомоществовал еси, не отрини и нас, чад их, стопами их к тебе шествующих. Веруем, яко духом нам соприсутствуеши. Идеже бо есть Господь, якоже слово Его учит нас, тамо и слуга Его будет. Ты верный еси раб Господень, и Богу везде сущу, ты в Нем еси, и Он в тебе есть, паче же и телом с нами еси. Се нетленныя и живоносныя твоя мощи, яко сокровище безценное, вручи нам чудес Бог. Предстояще им, яко тебе живу сушу, припадаем и молимся: приими моления наша и вознеси их на жертвенник благоутробия Божия, да приимем тобою благодать и благовременну в нуждах наших помощь. Укрепи наше малодушие и утверди нас в вере, да несомненно уповаем получити вся благая от благосердия Владыки молитвами твоими. Паству же твою духовную, тобою собранную, не престани управляти жезлом духовныя мудрости: подвизающимся помози, разслабленных возстави, споспеши иго Христово нести во благодушии и терпении и всех нас управи в мире и покаянии скончати живот наш и преселитися со упованием в блаженная недра Авраамова, идеже ты радостно по трудех и подвизех ныне почиваеши, прославляя со всеми святыми Бога, в Троице славимаго, Отца и Сына и Святаго Духа. Аминь.
Избранный от града Трапезунта и во Афоне постнически просиявый, дивный подвижниче и чудотворче, преподобне отче Афанасие, скорый помощниче и целебниче недугов душевных и телесных, яко имеяй велие дерзновение к прославльшему тя Господу, от всяких нас бед свободи и на спасения стези руководи, да зовем ти хвалебно:
Радуйся, преподобне Афанасие, Афонский чудотворче.
Ангелов и всея твари Содетель, избравый Гору Афонскую земным уделом Пречистыя Своея Матере и даровавый ю в вечное достояние иночествующих, яви тя в ней светла светильника, весь собор преподобных украшающа. Темже убо, яко великому угоднику Христову, воспеваем ти сице:
Радуйся, предобрый иноков наставниче;
Радуйся, преславный ангелов собеседниче.
Радуйся, целомудрия дивное светило;
Радуйся, усерднейший исполнителю поста и воздержания.
Радуйся, духовной во Христе жизни премудрый учителю;
Радуйся, светлый образе кротости и смирения.
Радуйся, имя твое делы безсмертия оправдавый;
Радуйся, деяние и видение чудно в себе сочетавый.
Радуйся, преподобному Петру Афонскому в равноангельном житии подражавый;
Радуйся, равную с ним на Небеси славу восприявый.
Радуйся, преподобне Афанасие, Афонский чудотворче.
Егда, по блаженном успении родителей твоих, еще младенцу ти сущу и не могущу о себе промышляти, Всеблагий Господь Божественным Своим Промыслом устрои едину черноризицу пещися о тебе, и та воспитоваше тя вместо сына, тогда ты, блаженне, видя сию питательницу твою пребывающу в пощении и молитвах, потщался еси, елико бе мощно отрочати, подражати святому тоя житию, поя с нею Христу Богу: Аллилуиа.
Разум небесный даровася тебе, угодниче Божий, егда в Константинград пришед, в любомудрии книжнем обучитися тщался еси: ибо толико в оном преуспев, яко в мале времени изряден ритор и премудр учитель показался еси. Мы же сице Богом умудренному ти приносим сицевыя немудрыя хвалы:
Радуйся, начало премудрости, страх Божий, правилом жизни себе предложивый;
Радуйся, вся заповеди Господни со тщанием хранивый.
Радуйся, любомудрием твоим суету мира сего ясно разсмотревый;
Радуйся, пещися о душе своей усердно вожделевый.
Радуйся, в юности посту и молитве обучивыйся;
Радуйся, в священных писаниих прилежно поучивыйся.
Радуйся, измлада сединою мудрости украсивыйся;
Радуйся, о лишении родителей твоих Господем утешенный.
Радуйся, воздержанием паче неже млеком воспитавыйся;
Радуйся, от сверстных тебе отроков наставником монахов презнаменовавыйся.
Радуйся, преподобне Афанасие, Афонский чудотворче.
Сила благодати Божией сочетаваяся благому произволению твоему, поможе ти, блаженне, избежати многоплетенных сетей мира сего и посла тебе святаго старца Михаила, вождя и наставника житию иноческому, в немже до кончины твоея добре подвизался еси, поя Богу: Аллилуиа.
Имея велие желание равноангельнаго жития иноческаго, Царьград оставил еси, блаженне, и обители Малеины достиг, преподобным Михаилом в иноческую власяницу, яко воин в броня, оболчен был еси; и тако мужественно ополчился еси противу невидимых врагов рода человеческаго. Сего ради ублажаем тя сице:
Радуйся, от млада возраста вдавый себе на служение Господу;
Радуйся, Того единаго паче всего возлюбивый.
Радуйся, Царствия ради Небеснаго честь и славу мира оставивый;
Радуйся, вся временная яко уметы презревый.
Радуйся, плоть духу покоривый;
Радуйся, ум твой в богомыслие вперивый.
Радуйся, помыслы вражия бодро отразивый;
Радуйся, святынею и чистотою ангелом уподобивыйся.
Радуйся, Кименския обители велие украшение;
Радуйся, Афону слава и благолепие.
Радуйся, преподобне Афанасие, Афонский чудотворче.
Славы временныя и почитания от боголюбивых воевод, яко бури и волнения морскаго избегая, Кименскую обитель оставив, во святую Гору Афонскую, яко в тихое пристанище, достигл еси, преподобне Афанасие, и тамо предался еси в послушание старцев подвижников, поя с ними Христу Богу: Аллилуиа.
Слышаще прот и прочии отцы Святыя Горы сладкое твое Священных Писаний добровещание, удивляхуся силе благодати из уст твоих исходящей и прославляху Бога; един же от них, преподобный Павел, пророчески о тебе рече: сей, последи нас пришедый, будет первейший добродетелию и славою в Царствии Небеснем. Сего пророчества мы ныне сбытие ведяще, радостно вопием ти:
Радуйся, дивный избранниче Божий;
Радуйся, пречестное Святаго Духа селение.
Радуйся, преподобных отцев восхваление;
Радуйся, проречений их исполнение.
Радуйся, риторе сладковещанный и богомудрый;
Радуйся, краснописче предобрый и трудолюбивый.
Радуйся, благочиния церковнаго ревнителю;
Радуйся, душевредных в храме шептаний искоренителю.
Радуйся, премудрыми твоими и благодатными глаголы благочестивыя воеводы удививый;
Радуся, на спасения стези тех руководивый.
Радуйся, преподобне Афанасие, Афонский чудотворче.
Звезды светлее явися миру житие твое, преподобне отче Афанасие: ты бо сам шествуя путем тесным и скорбным, право ведущим в Царствие Небесное, и иных многих научал еси творити волю Господню и представил еси тех Христу Богу добродетельми сияющих, поя с ними: Аллилуиа.
Видя враг рода человеческаго созидание тобою обители ко вселению иночествующих, вельми раздражися и рече другом своим: о друзи и силы мои! Доколе терпим и не расторгнем враждебника нашего Афанасия? Ты же отче, молитвою твоею ко Господу, яко жезлом, поразил еси тех ополчения. Сего ради воспеваем ти сице:
Радуйся, добрый воине Христов;
Радуйся, славный победителю невидимых врагов.
Радуйся, клеветавшия на тя старцы радостно простивый;
Радуйся, враги твоя яко други возлюбивый.
Радуйся, Богом врученному ти стаду добрый пастырь бывый;
Радуйся, словесныя твоя овцы от волков мысленных защитивый.
Радуйся, дар умиления от Бога приявый;
Радуйся, богатство добродетелей собравый.
Радуйся, Самаго Христа Господа в видении зрети сподобивыйся;
Радуйся, яко Того ныне зриши на Престоле Славы седяща.
Радуйся, преподобне Афанасие, Афонский чудотворче.
Проповедует Гора Афонская труды твоя и подвиги, имиже в удолиих и дебрех ея яко безплотен подвизался еси, преподобне; наипаче же вещает славу твою священная твоя Лавра, в нейже цельбоподательныя мощи твоя почивают, источающия токи чудес и исцелений, верою о тебе поющим Богу: Аллилуиа.
Возсиял еси, преподобне, в бренней плоти светом небесным, яко пламень огненный, еже ученик твой Герасим сподобився зрети, со ужасом возопи: о, отче! Темже и мы вопием ти:
Радуйся, отче, светом добродетелей твоих мир озаривый;
Радуйся, темная бесовская полчища из пустыни Афона отгнавый.
Радуйся, сиянием твоего лица ученика твоего удививый.
Радуйся, лютую того болезнь единым словом исцеливый.
Радуйся, в тленней плоти нетленною славою озарен бывый;
Радуйся, огнь любве Божественныя в себе носивый.
Радуйся, в Царствии Отца Небеснаго яко солнце сияющий;
Радуйся, молитвенниче наш ко Христу Богу теплейший.
Радуйся, в бедах скорый помощниче;
Радуйся, в печалех великий утешителю.
Радуйся, преподобне Афанасие, Афонский чудотворче.
Хотя христолюбивый воевода Никифор изыти на брань противу нечестивых агарян, моляше отцев Афонских, да помолятся о нем к Богу и да послют тя к нему. Ты же, отче Афанасие, повинуяся отцем, аще и не хотя, путешествовал еси до Крита, и тамо молитвами твоими помогл еси христианом победити агаряны, неведущия пети Богу: Аллилуиа.
Новое умысли зло прелукавый диавол, егда подвиже на зависть единаго от ученик твоих, и научи его заклати тя, яко агнца непорочна. Ты же, отче, десницею Вышняго спасен быв, убийцу онаго отечески простил и облобызал еси. Темже вси мы, таковому твоему незлобию дивящеся, хвалебно вопием:
Радуйся, в кротости и смирении твоем Христу Богу подражавый;
Радуйся, незлобием твоим духа злобы победивый.
Радуйся, сокровищ Христовых дражайший бисере, егоже не возможе душегубец похитити;
Радуйся, егоже десница Господня храняше от всех зол.
Радуйся, от внезапнаго убийства спасенный;
Радуйся, смертоносным питием, по слову Господню, неврежденный.
Радуйся, триех мужей, от глада и мраза изнемогших, смерти избавивый;
Радуйся, многих от различных болезней исцеливый.
Радуйся, верныя в православии утвердивый;
Радуйся, лжеверныя и неверныя посрамивый.
Радуйся, преподобне Афанасие, Афонский чудотворче.
Странное чудо бе видети, егда повелением твоим, отче, в знойное время почерпнутая из моря сланая вода сотворися хладна и сладка, пиющия ю прохладившая и жажду утолившая. Темже убо величаем Господа, даровавшаго тебе таковый дар чудотворения, и во умилении вопием Ему: Аллилуиа.
Дивно явися тебе Матерь Христа Бога нашего, и повеле ти жезлом поразити камень, из негоже абие истече источник водный, иже и до ныне источает воду живу и целебну. Таковому к тебе благоволению Владычицы чудящеся, взываем сице:
Радуйся, яко пресветлое лице Царицы Небесныя зрети сподобился еси;
Радуйся, яко повелением Ея извел еси воду из камене.
Радуйся, яко сим преславным чудом боговидцу Моисею подобен показался еси;
Радуйся, яко с сим великим пророком в райских обителех ныне обитаеши.
Радуйся, яко источник твой благодатно посещаеши;
Радуйся, яко болящим здравие подаваеши.
Радуйся, яко прокаженныя очищаеши;
Радуйся, яко нечистыя духи от человек отгоняеши.
Радуйся, яко недужным усердно послужил еси;
Радуйся, яко чревныя и неудобоцелимыя язвы уврачевал еси.
Радуйся, преподобне Афанасие, Афонский чудотворче.
Всяк язык человечь недоумевает по достоянию восхвалити благоволения Царицы Небесныя к подвижником христианским: Та бо в Лавру твою, отче, с двема ангелома прииде, и учеником твоим Матфием видима бысть в храме, раздающа златницы и цаты, усердно предстоящим и поющим Богу: Аллилуиа.
Вси иноцы Горы Афонския блажат тя, отче Афанасие, яко наставника своего и тепла ходатая; не лишены же суть благодатныя твоея помощи и вси православнии людие, с любовию почитающии святую память твою и взывающии сице:
Радуйся, святым и чудным твоим житием святоименный Афон возвеличивый;
Радуйся, небовосходную добродетелей твоих лествицу нам в образ оставивый.
Радуйся, земнаго жребия Матери Божией честное украшение;
Радуйся, иночества православнаго похвало.
Радуйся, за многую твою к согрешающим любовь и милосердие милость Божию получивый;
Радуйся, за великое твое о странных попечение от странствовавшаго нас ради Господа в вечных скиниих славно почтенный.
Радуйся за славную твою над плотию и диаволом победу венцем славы увенчанный;
Радуйся, за девственную чистоту и сердечную простоту от Приснодевы Марии в ближайшее содружество приятый.
Радуйся, яко благоволением Царицы Небесныя, созданная тобою во имя Ея обитель в твое имя преименовася;
Радуйся, яко день преставления твоего в сей обители светло торжествуется.
Радуйся, преподобне Афанасие, Афонский чудотворче.
Спасти хотя Богом врученное ти стадо от раздоров и соблазнов, и к скончанию смертному приближаяся, завет учеником твоим письмены начертал еси, отче, поучая всех взаимной братской любви и хранению отеческих преданий. Мы же, хваляще таковое твое о чадех попечение, поем Христу Спасителю нашему: Аллилуиа.
Стеною терпения оградився и надеждою вечных благ укрепився, земное странствие тесною стезею прошел еси, преподобне Афанасие, нося ярем поста, многонощнаго бдения и о вверенных тебе душах попечения; ныне же, в небеснем пребывая блаженстве, помяни нас, восхваляющих тя сице:
Радуйся, крепкий подвижниче, вся разжженныя стрелы лукаваго угасивый;
Радуйся, слез излияньми душу твою чисто омывый.
Радуйся, немощи немощных отечески носивый;
Радуйся, в глубину прегрешений впадшия на гору добродетелей возводивый.
Радвйся, многих великих мужей наставник бывый;
Радуйся, царя Никифора в неисполнении даннаго Богу обета кротко обличивый.
Радуйся, будущая пророчески предвидевый;
Радуйся, далече отстоящая ясно зревый.
Радуйся, Божия славы теплый рачителю;
Радуйся, велений его ревностный исполнителю.
Радуйся, преподобне Афанасие, Афонский чудотворче.
Песнь благодарения принесл еси, отче, Богу, дивно спасшему тя от потопления морскаго со ученики твоими, егда, действом духа злобы, ладия, в нейже плыл еси, опровержена бысть, и вси в ней сущии, в пучину впадше, не погибоша и воспеша хвалу Господеви: Аллилуиа.
Светом благодати Божия озарен имея твой ум и сердце, преподобне отче Афанасие, таинственно предрекл еси твою страдальческую кончину, в нейже яко мученик под развалинами падшаго храма телом погребся, духом преселился еси в горния обители, в нихже, ходатайством твоим ко Господу помози водворитися и нам, вопиющим ти сице:
Радуйся, в животе и по преставлении твоем многая и преславная чудеса сотворивый;
Радуйся, от ноги твоея кровь яко миро благовонное чудесно источивый.
Радуйся, на честное погребение твое множество иноков собравый;
Радуйся, во гробе тело твое небесною радостию светящееся показавый.
Радуйся, помазанием крове твоея болящаго корабленника со одра смертнаго здрава возставивый;
Радуйся, сею же твоею кровию кровоточивую жену уврачевавый.
Радуйся, всех сердца любовию твоею, к себе привлекающий;
Радуйся, благоуханием Божия благодати смрад страстей от многих отгоняющий.
Радуйся, светильниче пресветлый, от горы Афона всему миру православному сияющий;
Радуйся, не точию иноком, но и миряном путь к небу озаряющий.
Радуйся, преподобне Афанасие, Афонский чудотворче.
Благодать велия тебе, отче, от Бога дадеся, добродетельные человеки на вящшее преуспеяние наставляти, грешныя же к покаянию побуждати, пруги от нив отгоняти и различныя недуги и страсти врачевати. Темже убо смиренно молим тя, отче: не лиши помощи твоея и нас, поющих Богу: Аллилуиа.
Поюще святое, равноангельное твое житие, ублажаем тя, отче Афанасие, яко многомощна молитвенника о нас пред Господем, тепла заступника и наставника ко спасению, и с любовию возглашаем ти сице:
Радуйся, православныя Церкве похвало;
Радуйся, обители твоея и всея Горы Афонския покровителю.
Радуйся, пустыннаго безмолвия искренний любителю;
Радуйся, общежития мудрый руководителю;
Радуйся, постническаго жития истинный ревнителю;
Радуйся, всех иноческих добродетелей светлый образе и учителю.
Радуйся, яко смирения ради не восхотел еси явити миру мощей твоих;
Радуйся, яко хотящим изъяти оныя из недр земных огнем воспретил еси.
Радуйся, яко до ныне православнии людие покланяются святому твоему гробу;
Радуйся, яко и чудодейственный жезл твой тамо зрим есть.
Радуйся, преподобне Афанасие, Афонский чудотворче.
О, предивный иноков наставниче и чудотворче, преподобне отче Афанасие, предстояй ныне Престолу Царя Славы Господа нашего Иисуса Христа, молися Ему даровати всем нам дух истинныя кротости, любве и целомудрия, да, скончавши живот наш в покаянии, сподобимся со всеми святыми в Небесном Царствии пети Богу: Аллилуиа.
(Сей кондак чтется трижды. И паки чтутся: Икос 1 и Кондак 1)
Преподобне отче Афанасие, изрядный угодниче Христов, и великий Афонский чудотворче! Во дни земнаго жития твоего многия на путь правый наставивый, и в Царствие Небесное мудре руководивый, скорбныя утешивый, падающим подавый руку помощи, и всем любезен, милостив и сострадателен отец бывый; ты ныне, в небесней пребывая светлости, наипаче умножаеши любовь твою к нам немощным, в море житейстем различне бедствующим, искушаемым духом злобы и страстьми своими, воюющими на дух. Сего ради смиренно молим тя, святый отче: по данней тебе от Бога благодати помози нам творити волю Господню в простоте сердца и смирении, искушения же вражия победити и свирепое страстей море изсушити; да тако немокренно прейдем житейскую пучину, и предстательством твоим ко Господу, сподобимся достигнути обетованнаго нам Царствия Небеснаго, славяще Безначальную Троицу, Отца и Сына и Святаго Духа, ныне и присно и во веки веков. Аминь.
Избранная от рода державнаго дщерь Российская, любовию изобильною и милосердием Богу и ближним добре послужившая, за веру во Христа Господа нашего душу свою положившая и венцем славы Христовы украшенная, восхваляем; подвиги и страдания твоя, с любовию воспевающе ти сице: Радуйся, святая преподобномученице Елисавето, красото Церкве Российския, невестою Христовою быти удостоенная.
Ангельскою любовию Христа возлюбившая и Тому Единому служити желавшая измлада материю твоею поучаемая, в трудех, молитвах и милостыни образ добродетелей явила еси. По кончине же матере твоея и ближних сродников крестный путь, Господем заповеданный, уразумела еси. Темже дивящеся таковому от юности твоему избранию, со умилением взываем ти: Радуйся, от юности Христа возлюбившая; радуйся, Христова агнице избранная. Радуйся, от родителей семена веры приимшая; радуйся, в страсе Божии ими воспитанная. Радуйся, добродетели матере твоея унаследившая; радуйся, трудолюбию и милосердию ею наученная. Радуйся, сердцем в Бозе утвержденная; радуйся, с верою и упованием понесшая крест твой и Христу последовавшая. Радуйся, земли отечества твоего цвете благоуханный; радуйся, чистотою жизни твоея Небеса возвеселившая. Радуйся, избранная Богом на служение страждущим; радуйся, молитвеннице наша пред Богом. Радуйся, святая преподобномученице Елисавето, красото Церкве Российския, невестою Христовою быти удостоенная.
Виде Господь благое сердца твоего изволение, яко от юности возжелела еси житие проводити во благочестии и чистоте, к небесней красоте очи сердца твоего устремляющи и огнь любве к Богу в себе воспламеняющи. Молитвами твоими и наша сердца любовию к Богу просвети, да с тобою воспоим Ему: Аллилуиа.
Разумом свыше просвещаема, святая Елисавето, не убоялася еси оставити отечество, род и дом отца твоего и в новое отечество вселитися, егда браком сочеталася еси с российским: великим князем Сергием, да с ним Богу послужиши, и вкупе с супругом твоим в целомудрии пожила еси, истинную любовь к людем российским показующи. Мы же с любовию взываем ти сице: Радуйся, славная от земли Запада пришелице; радуйся, новую отчизну — землю Российскую обретшая. Радуйся, благоверная княгине, стране нашей верно послужившая; радуйся, в добрых делех наших наставнице. Радуйся, в супружестве в любви и целомудрии пожившая; радуйся, яко супругу твоему в делех благих помощница была еси мудрая. Радуйся, супругом благочестивым покровительнице; радуйся, материнскою любовию нас согревающая. Радуйся, заповеди Господни исполнити возжелевшая; радуйся, ревность по Бозе в сердцах наших воспламеняющая. Радуйся, красотою душевною и телесною всех возрадовавшая; радуйся, всего мира христианскаго украшение. Радуйся, святая преподобномученице Елисавето, красото Церкве Российския, невестою Христовою быти удостоенная.
Силою Божественный благодати во спасение умудренная, разумом твоим познала еси веру истинную, княгине милостивая Елисавето, и во Святей Земли пребывающи, утвердилася еси в желании прияти Православие, воспевающи просветившему тя Богу: Аллилуиа.
Имущи сердце, добрей земле подобящееся, веру православную удобь восприяла еси, темже святаго миропомазания и причащения Святых Христовых Тайн в праздник Воскрешения праведнаго Лазаря сподобилася еси. Мы же, славяще просвещение твое благодатию Святаго Духа, величаем тя: Радуйся, в день Воскрешения праведнаго Лазаря веру православную приявшая; радуйся, плоде благословенный Российския земли. Радуйся, миропомазанием Святаго Духа запечатленная; радуйся, во Православии имя, данное ти от рождения, сохраншая. Радуйся, святей праведней Елисавете тезоименитая; радуйся, яко той житию усердно в подвизех подражала еси. Радуйся, сыновом Запада путь к истинней вере показующая; радуйся, яко благочестивии людие земли Российския память твою любовию чтут. Радуйся, милостивая мати, милость у Владыки и Господа обретшая; радуйся, и о нашем помиловании усердно молящаяся. Радуйся, свет Божественный в сердце своем носившая; радуйся, тьму жизни нашея светом Христовых заповедей озаряющая. Радуйся, святая преподобномученице Елисавето, красото Церкве Российския, невестою Христовою быти удостоенная.
Буря злобы врага рода человеческаго непоколеба тя, святая, егда благоверный супруг твой мученически смерть претерпе, емуже сострадающи, велие мужество и христианскую любовь явила еси. Ангели же, душу супруга твоего возносяще, пояху: Аллилуиа.
Слышавше российстии людие о убиении благовернаго князя Сергия, моляху Бога, да укрепит тя, святая Елисавето, в несении скорби сея. Ты же, жертвенною любовию укрепляема, в темнице убийцу супруга твоего посетила еси, к покаянию его подвизающи и молитвы возносящи ко Господу о прощении его. Сего ради приими от нас, недостойных, похвалы сия: Радуйся, заповедь Христову о любви ко врагом исполнившая; радуйся, убийцу супруга твоего евангельски простившая. Радуйся, мнози скорби и беды претерпевшая; радуйся, бремя скорбей и печалей нести нам помогающая. Радуйся, заблуждших на путь истины и покаяния наставляющая; радуйся, о спасении грешников теплая ходатаице. Радуйся, во тьме печалей светом надежды нас озаряющая; радуйся, путеводная звездо всем чающим спасения. Радуйся, окамененныя сердца наша во умиление приводящая; радуйся, во всякой скорби нашей ко Христу за ны теплая молитвеннице. Радуйся, злобу мира добром побеждавшая; радуйся, людем российским любовь истинную показавшая. Радуйся, святая преподобномученице Елисавето, красото Церкве Российския, невестою Христовою быти удостоенная.
Боготечною звездою возсияла еси в земли Российстей, святая Елисавето, егда богатство и славу яко прах вменивши, в руце Божии жизнь свою предала еси, да послужиши Ему постом и молитвою, и к страждущим явила еси велию любовь и милосердие. Тако и путь жития нашего светом добродетелей твоих озари, да радостно возопиим Богу: Аллилуиа.
Видевше тя людие богоспасаемаго града Москвы дивную устроительницу Обители милосердия, возрадовашася, яко мнози жены и девы российския обретоша зде тихое и душеспасительное пристанище, подражающе святым женам-мироносицам Марии и Марфе в служении Богу и ближним. Сего ради, прославляюще тя, глаголем сице: Радуйся, во славе земной суету мирскаго жития уразумевшая; радуйся, имение свое раздавшая и нищету Христову возлюбившая. Радуйся, град Москву обителию дивною украсившая; радуйся, благое иго Христово на себе восприимшая. Радуйся, многия жены и девы во Обитель милосердия приведшая; радуйся, мудрая управительнице во спасение сестер твоих. Радуйся, служению святых жен-мироносиц Марфы и Марии подражавшая; радуйся, Обители твоя неусыпная хранительнице. Радуйся, в подвизе жизни духовныя нас утверждающая; радуйся, путь от земли на Небо нам показующая. Радуйся, светило милосердия, над градом Москвою восшедшее; радуйся, всех отдавших жизнь на служение ближним покровительнице. Радуйся, святая преподобномученице Елисавето, красото Церкве Российския, невестою Христовою быти удостоенная.
Проповедницею любве Божественныя и милосердия Его и ревнительницею благочестия была еси в земли нашей, святая Елисавето, в сердцах людей российских любовь ко Господу и милосердие к братиям и сестрам нашим, в бедах сущим, возгреваюши, да и мы твоим заветом последующе, воспоим Богу: Аллилуиа.
Возсияла еси светом добродетельнаго жития в стране Российстей, преподобная мати наша Елисавето, во образе иночестем в посте и воздержании, в нощных бдениях и пениих молебных пожила еси, благочестию и смирению сестры обители твоея поучающи, да и мы, тобою на путь тесный подвига духовнаго наставляеми, ублажаем тя: Радуйся, путь иноческаго равноангельнаго жития избравшая; радуйся, обетом целомудрия чистоту сердца твоего явившая. Радуйся, обетом нестяжания высоту духа твоего показавшая; радуйся, обетом послушания Богу и ближним послужившая. Радуйся, мудрая княгине и инокине пречестная; радуйся, во образ женам христианским свыше предназначенная. Радуйся, постом, бдением и непрестанными молитвами Богу угодившая; радуйся, от сна греховнаго души наша пробуждающая. Радуйся, ко исполнению заповеди о любви к Богу и ближним всех наставляющая; радуйся, молитве сердечней нас научающая. Радуйся, наставнице инокиням и собеседнице Ангелом; радуйся, в сонме преподобных жен на Небеси прославленная. Радуйся, святая преподобномученице Елисавето, красото Церкве Российския, невестою Христовою быти удостоенная.
Хотящи волю Господню разумети, святая Елисавето, всецело предала еси себе в послушание старцем Гавриилу Спасо-Елеазаровскому, Алексию Зосимовскому, такожде и другие богомудрыя старцы вопрошала еси, ничтоже без их благословения творящи, волю же свою отсекающи, темже и житие во Обители милосердия ко благу устрояла еси, непрестанно взывающи Богу: Аллилуиа.
Новое чудо показа Господь, егда дарова ти, святая Елисавето, благодать и силу болезни врачевати, разслабленныя укрепляти, бедствующим помогати, обидимых заступати. Ты же, облегчение и отраду страждущим содевающи, немощным, всеми оставленным и увечным послужила еси со смирением и любовию. Темже и нас, грешных, твоею молитвою исцели и буди нам ко спасению управительница, да благодарственно воспоем ти: Радуйся, в послушании духовным отцем и великим старцем пожившая; радуйся, Великою Матушкою людьми российскими нареченная. Радуйся, дар немощных души врачевати от Бога стяжавшая; радуйся, болящия и безнадежныя от одра болезни возставляющая. Радуйся, вдовиц и сирот благосердая попечительнице; радуйся, алчущих питателънице и сущим в бедах скорая заступнице. Радуйся, всеми презренных и отверженных не оставляющая; радуйся, многия души от тьмы греховныя и погибели спасшая. Радуйся, унывающим в скорбех и обстояниих мудрая утешительнице; радуйся, и нас, удрученных болезньми и скорбьми укрепляющая. Радуйся, кающимся грешником пред Богом предстательнице; радуйся, людем российским помощнице милостивая богодарованная. Радуйся, святая преподобномученице Елисавето, красото Церкве Российския, невестою Христовою быти удостоенная.
Странное и страшное видение яви Господь духовнику Обители милосердия отцу Митрофанию. Ты же, о святая мати, сие видение изьясняющи, прорекла еси, яко велие и грозное испытание грядет на Церковь Русскую и державу нашу: святынь поругание, брань братоубийственная, смута велия, мученическая кончина царския семьи; но помилует Бог Россию по молитвам святых ея, с ними же ты ныне воспеваеши Богу: Аллилуиа.
Вся благодатию Божественною просвещаема, святая Елисавето, мысленныма очима гневное посещение Божие страны нашея зрела еси и пророчески вещала еси, яко мнози мученицы и исповедницы в земли Российстей возсияют. Темже все упование на Божию Матерь возложити люди русския призывала еси, верующи, яко молитвами Ея устроится и благословится земля наша. Мы же, ведуще проречения твоего о судьбе отчизны нашея сбытие, ублажаем тя сице: Радуйся, храм Покрова Пресвятыя Богородицы во Обители милосердия воздвигшая; радуйся, тем в руце Пречистей Матери Господа обитель твою предавшая. Радуйся, храмов Божиих устроительнице; радуйся, к Богородице молитвеннице наша неусыпная. Радуйся, церквам Божиим благодеявшая; радуйся, ради жизни вечныя неусыпно потрудившаяся. Радуйся, житием своим Богу и Пресвятой Деве Богородице верно послужившая; радуйся, все упование возлагати на Бога нас научающая. Радуйся, кротость, тишину и мир сердцам нашим подающая; радуйся, благодатными дары Духа Святаго украшенная. Радуйся, яко прозорливо предрекла еси великия скорби земли нашея; радуйся, яко помилова ю Господь. Радуйся, святая преподобномученице Елисавето, красото Церкве Российския, невестою Христовою быти удостоенная.
Вся любовию к Богу пламенеющи, святая Елисавето, не убоялася еси, егда приидоша во обитель, тобою созданную, безумнии людие, хотящии суд неправеден над тобою совершити. Ты же, Господом сохраняема, смерти тогда убегла еси, о вразумлении и просвещении неразумных и заблуждших молящися, Богу же во благодарении воспевающи: Аллилуиа.
Ветий человеческих уста не возмогут достойно восхвалити крепость любве твоея во дни бед и напастей великих, обышедших отечество наше, егда не восхотела еси покинути Россию и обитель, тобою созданную, сестры тоя за веру православную даже до смерти стояти побуждающи. Мы же с любовию восхваляем тя: Радуйся, землю нашу возлюбившая, радуйся, от людей российских с любовию прославляемая. Радуйся, щитом веры во брани с врагом ограждатися нас научающая; радуйся, решимость Господу последовати крестным путем в нас укрепляющая. Радуйся, сестры Обители милосердия в вере и надежде утвердившая; радуйся, на подвиг мученичества за Христа их наставльшая. Радуйся, приобщитися страстем Христовым удостоившаяся; радуйся, в исповедничестем подвизе люди российския утверждающая. Радуйся, от рова погибели мнози спасшая; радуйся, обители твоей и граду Москве помощнице, покрове и защитнице. Радуйся, любви жертвенней, вечней нас научающая; радуйся, вшедшая в радость Господа твоего. Радуйся, святая преподобномученице Елисавето, красото Церкве Российския, невестою Христовою быти удостоенная.
Спасительнаго подвига ищущи, святая Елисавето, с радостию благодарила еси Бога, яко сподоби тя понести крест Его. Темже просия победою вера твоя, егда, к Голгофе своей восходящи, непрестанно возглашала еси: “Слава Богу за все!” Умоли, о мати наша, да дарует нам Господь стяжати мудрость и силу за веру правую даже до смерти стояти и воспевати Ему едиными усты и единым сердцем: Аллилуиа.
Стена необоримая и заступление стране Российстей даровася святая икона Божия Матере Державная, Юже прияла есть во Обители милосердия святая Елисавето, яко знамение победы над миродержительми тьмы века сего. Сего ради и мы, все упование на Державную Владычицу отчизны нашей возложивше, тебе яко истинную служительницу и послушницу Пречистыя Матере Господа восхваляем: Радуйся, благодати и силы Божия исполненная; радуйся, благую часть избравшая, яже не отымется от тебе. Радуйся, в кротости и смирении Божией Матери подражавшая; радуйся, мудрая евангельская дево, елей благодати собравшая. Радуйся, Пресвятыя Девы Богородицы благоговейная почитательнице; радуйся, у Престола Ея непрестанно за ны молящаяся. Радуйся, образ самоотвержения нам явившая; радуйся, друг друга тяготы носити нас научающая. Радуйся, чрез земныя скорби и страдания в Царство Небесное вшедшая; радуйся, любви и терпению в страданиях ради Господа всех научающая. Радуйся, ангельски на земли пожившая; радуйся, унаследившая на Небеси венец славы. Радуйся, святая преподобномученице Елисавето, красото Церкве Российския, невестою Христовою быти удостоенная.
Пение молебное Божией Матери возносила еси, святая Елисавето, в день празднования Иверския иконы Ея, егда взяша тя нечестивии и в темницу ввергоша. Ты же благодарила еси Христа Бога нашего, давшаго тебе не точию еже в Него веровати, но и по Нем страдати, в узах темничных воспевающи Ему: Аллилуиа.
Свет Божественный осия тя, страстотерпице святая княгине Елисавето, купно с преподобномученицею Варварою, о Христе сестрою твоею, и с прочими страстотерпцы именитыми, егда в глубокий ров ввержена сущи, тамо раны великаго князя Иоанна обязала еси, страдания умирающих облегчала еси, воспевающи священныя песнопения, за убивающих же тя молилася еси: “Отче, отпусти им, не ведят бо, что творят”. Уврачуй и наших душ раны, о мати наша, да с любовию воспоем ти: Радуйся, мученическую кончину свою предуведевшая; радуйся, страстотерпице царственная. Радуйся, в день памяти преподобнаго Сергия отрастем Христовым приобщившаяся; радуйся, силою Божественною в страданиих укрепляемая. Радуйся, за мучителей своих, Христу подражающи, молившаяся; радуйся, до самыя кончины твоея песнь Богу воспевавшая. Радуйся, кровию своею землю нашу оросившая; радуйся, к сонму новомучеников Российских сопричтенная. Радуйся, яко лику преподобных и праведных жен приобщилася еси; радуйся, святых благоверных княгинь земли Русския достойная сонаследнице. Радуйся, жертво непорочная, благоприятная, Богу принесенная; радуйся, со всеми святыми земли нашея торжествующая. Радуйся, святая преподобномученице Елисавето, красото Церкве Российския, невестою Христовою быти удостоенная.
Благодати исполненнии сосуди явишася честныя мощи ваша, святыя преподобномученицы Елисавето и Варваро, ихже от поругания и безчестия спасти хотяще, благочестивии людие из России во святый град Иерусалим принесоша и в веси Гефсиманийстей на горе Елеон погребоша, к нимже приходящии ублажают вас, воспевающе Богу, дивному во святых Своих: Аллилуиа.
Света небеснаго и благоухания чуднаго храм святыя мироносицы Марии Магдалини во Иерусалиме исполнися, егда гроб с телом великия княгини Елисаветы открыша. Темже ныне Церкве Православныя чада вси радуются и ликуют о Господе, притекающе к раце мощей твоих, преподобномученице Елисавето, чудеса точащих всем верующим, и благодаряще прославльшаго тя Господа, поют сице: Радуйся, яко мощи твоя, во святый град Иерусалим принесенныя, процветоша нетлением; радуйся, мощами твоими Святую Землю с землею Российскою духовно соединившая. Радуйся, явлением мощей твоих Церковь Русскую возвеселившая; радуйся, тем находящихся в разсеянии российских людей духовно укрепившая. Радуйся, у гроба Господня погребенная; радуйся, во храме святыя жены-мироносицы Марии Магдалини упокоенная. Радуйся, яко мощи твоя исцеляют всякия скорби и болезни; радуйся, свидетельнице вечности в жизни временней. Радуйся, венец добродетелей в себе соединившая; радуйся, неисповедимыми судьбами Божиими прославленная. Радуйся, Горняго Иерусалима обитательнице блаженная; радуйся, ко Иерусалиму Небесному всем нам путеводительнице. Радуйся, святая преподобномученице Елисавето, красото Церкве Российския, невестою Христовою быти удостоенная.
О великая страстотерпице, жен российских украшение и радосте наша, княгине милостивая Елисавето, приими воздыхание сердец наших, с любовию тебе приносимое, и твоим предстательством ко Господу дух правыя веры и благочестия в нас укрепи, в добродетели и милосердии нас утверди, помози крест скорбей с терпением и надеждою понести, в любви и согласии народ наш сохрани, да сподобимся в радость Господа внити, со Ангелы и всеми святыми поюще Ему: Аллилуиа.
(Этот кондак читается трижды, затем икос 1 и кондак 1)
О святыя новомученицы Российския, великая княгине Елисавето и сестро ея крестовая пречестная инокине Варваро, купно путь свой во мнозех муках скончавшия, евангельския заповеди делом во Обители милосердия совершившия, веры ради православныя подвизающися до смерти в последняя времена сия, и добрый плод в терпении страстей Христу принесшия! Молитеся Ему, яко победителю смерти, да утвердит Церковь Русскую Православную и отечество наше, кровию и страданьми новомучеников искупленныя, и не даст в расхищение врагом России достояния нашего. Се бо лукавый враг вооружися на ны, хотя нас погубити в междоусобных бранех, скорбех, нестерпимых печалех, болезнех, нуждах и бедах лютых. Умолите Господа низложити вся немощныя дерзости их; веру в сердцах людей российских укрепите, да егда найдет на ны испытания час, мужества дар восприимем вашими молитвами, отвергшеся себе и вземше крест свой, последуем, Христу, распинающе плоть свою со страстьми и похотьми. Сохраните нас от всякаго зла, освятите пути жизни нашея, даруйте покаяние нелицемерное, тишину и мир душам нашим, испросите у Господа всем нам мытарств горьких и вечныя муки избавитися и Небесному Царствию наследники быти со всеми святыми, от века угодившими Богу, да радующеся воздадим хвалу, честь и поклонение Отцу и Сыну и Святому Духу во веки веков. Аминь.