Акафисты - 19 июля 2025

Конда́къ 1

Избра́нный чудотво́рче и изря́дный уго́дниче Христо́въ, Арсе́ніе преподо́бне, восхваля́емъ тя́, безмо́лвія, терпѣ́нія и нищеты́ духо́вныя учи́теля. Ты́ же, я́ко имѣ́яй дерзнове́ніе ко Го́споду, моли́ Его́ изба́вити оби́тель твою́ и на́съ, грѣ́шныхъ, отъ всѣ́хъ бѣ́дъ и ско́рбныхъ обстоя́ній, да со умиле́ніемъ зове́мъ ти́:

Ра́дуйся, Арсе́ніе, Коме́льскій чудотво́рче.

Икосъ 1.

Ангела земна́го и небе́снаго человѣ́ка зри́мъ тя́, преподо́бне: ты́ бо измла́да Отца́ Небе́снаго возлюби́лъ еси́ и Тому́ Еди́ному во́лю твою́ порабо́тилъ еси́. Сего́ ра́ди ублажа́емъ тя́ си́це:

Ра́дуйся, измла́да гла́су Бо́жію въ со́вѣсти внима́вый; ра́дуйся, о́бразъ Бо́жій въ души́ твое́й въ чистотѣ́ храни́вый.

Ра́дуйся, земно́е вели́чіе твое́ по ро́ду ни во что́ вмѣни́вый; ра́дуйся, отъ ю́ности нищету́ духо́вную возлюби́вый.

Ра́дуйся, смире́нія учи́телю; ра́дуйся, дѣ́вства ревни́телю.

Ра́дуйся, оби́тель преподо́бнаго Се́ргія, я́ко ти́хое приста́нище, избра́вый; ра́дуйся, житію́ Се́ргіеву ре́вностнѣ подража́вый.

Ра́дуйся, Арсе́ніе, Коме́льскій чудотво́рче.

Конда́къ 2.

Ви́дѣвъ въ и́ночествѣ опло́тъ и огражде́ніе отъ суеты́ мірскíя и душевре́дныхъ по́мысловъ, преподо́бне, въ ю́ныхъ лѣ́тѣхъ, потща́лся еси́ прія́ти на ся́ а́нгельскій о́бразъ, смире́ннѣ взыва́я всеви́дящему Храни́телю ду́шъ и тѣле́съ: Аллилу́ія.

Икосъ 2.

Ра́зумъ тво́й, преподо́бне о́тче, Христо́вымъ свѣ́томъ просвѣти́ти возжела́въ, вда́лся еси́ чте́нію Боже́ственныхъ Писа́ній: узрѣ́въ же по́льзу отъ сего́ души́ твое́й, прія́лъ еси́ тру́дъ списова́ти свяще́нныя кни́ги и тѣ́ми бли́жнихъ твои́хъ умудря́ти. Сицево́му твоему́ усе́рдію дивя́щеся, взыва́емъ ти́:

Ра́дуйся, пи́щи духо́вныя, па́че тѣле́сныя рачи́телю; ра́дуйся, свяще́нныхъ кни́гъ списа́телю.

Ра́дуйся, о душе́внѣй по́льзѣ собра́тій твои́хъ ревнова́вый; ра́дуйся, молвы́ жите́йскія избѣжа́вый.

Ра́дуйся, труды́ душеполе́зныя че́стнѣ почита́вый; ра́дуйся, и́стиною Христо́вою, а́ки мече́мъ проти́ву врага́ душе́внаго спасе́нія вооруже́нный.

Ра́дуйся, сло́вомъ Госпо́днимъ, я́ко хлѣ́бомъ небе́снымъ насыще́нный; ра́дуйся, въ разли́чныхъ послуша́ніяхъ испыта́нный.

Ра́дуйся, Арсе́ніе, Коме́льскій чудотво́рче.

Конда́къ 3.

Си́лою свы́ше преумудре́нный, ты́ свя́те Арсе́ніе, избра́нъ бы́лъ еси́ во игу́мена оби́тели богоно́снаго Се́ргія, и возлага́я наде́жду на его́ многомо́щное предста́тельство предъ престо́ломъ Пресвяты́я Тро́ицы, въ смире́ніи и поко́рности Ея́ святѣ́й во́ли, со стра́хомъ и тре́петомъ взыва́лъ еси́: Аллилу́ія.

Икосъ 3.

Имѣ́я непреста́нное попече́ніе о ввѣ́ренныхъ твоему́ води́телству и́ноцѣхъ оби́тели Се́ргіевы, ты́, преподо́бне, пе́рвѣе умно́жилъ еси́ по́двиги твоя́, прилага́я труды́ ко трудо́мъ. Сего́ ра́ди возглаша́емъ тебѣ́:

Ра́дуйся, соверше́ннаго терпѣ́нія наста́вниче; ра́дуйся, смиренному́дрія проповѣ́дниче.

Ра́дуйся, наде́жный и́ночествующихъ руководи́телю; ра́дуйся, преподо́бныхъ Се́ргія, Ни́кона, Са́ввы и про́чихъ святы́хъ игу́меновъ Ла́вры Се́ргіевы досто́йный прее́мниче.

Ра́дуйся, свѣще́ на свѣ́щницѣ Це́ркве Россíйскія поста́вленная; ра́дуйся, и́ноковъ до́брыхъ о́бразъ и украше́ніе.

Ра́дуйся, Бо́гови вѣ́рный служи́телю; ра́дуйся, преподо́бныхъ Его́ небе́сный сожи́телю.

Ра́дуйся, Арсе́ніе, Коме́льскій чудотво́рче.

Конда́къ 4.

Бу́рю вну́трь имѣ́я помышле́ній сумни́тельныхъ, вели́кій кня́зь Васи́лій смути́ся, узрѣ́въ тя́, преподо́бне, игу́мена вели́кія Ла́вры въ ве́тсѣй и многошве́ннѣй оде́жди; увѣ́дѣвъ же отъ бра́тіи о твое́мъ вели́цѣмъ смире́ніи и нелицемѣ́рнѣй простотѣ́, просла́ви смири́вшаго Себе́ до кре́стныя сме́рти Го́спода, зовы́й: Аллилу́ія.

Икосъ 4.

Слы́шаша и́ноцы и мірстíи лю́діе о по́двизѣхъ твои́хъ, пресла́вне Арсе́ніе, прославля́ху Го́спода и тебе́, я́ко Его́ уго́дника. Ты́ же, пребыва́я въ Ла́врѣ послуша́нія ра́ди и бѣ́гая сла́вы мірскíя, поча́сту удаля́лся еси́ во оби́тель Ма́хрищскую, идѣ́же удосто́ился еси́ явле́нія сла́вы Бо́жіей на мощѣ́хъ преподо́бнаго Стефа́на и па́мять его́ твори́ти уста́вилъ еси́. Послѣди́ же по сло́ву Писа́нія, взыску́я гряду́щаго гра́да, преподо́бне, взе́мъ святы́й кре́стъ и ико́ну Пречи́стыя Богоро́дицы, та́йно удали́лся еси́ въ пусты́ню, ча́я Бо́га спаса́ющаго. Сего́ ра́ди пріими́ благосе́рднѣ похвалы́ сія́:

Ра́дуйся, самоотверже́нія учи́телю; ра́дуйся, простоты́ христіа́нскія храни́телю.

Ра́дуйся, прославле́нія преподо́бнаго Стефа́на свидѣ́телю; ра́дуйся, па́мяти его́ установи́телю.

Ра́дуйся, води́тельству про́мысла Бо́жія поко́рный; ра́дуйся, бу́имъ себе́ почита́вый.

Ра́дуйся, гра́да гряду́щаго иска́вый; ра́дуйся, го́рлице пустыннолю́бная, отъ мíра въ пусты́ню возлетѣ́вшая.

Ра́дуйся, Арсе́ніе, Коме́льскій чудотво́рче.

Конда́къ 5.

Боготе́чною звѣздо́ю яви́лся еси́, богому́дре Арсе́ніе, странѣ́ Волого́дстѣй, и посели́лся еси́ въ ве́си Ма́сленстѣй, идѣ́же предъ си́мъ просла́вися явле́ніемъ ико́на Пресвяты́я Богоро́дицы Одиги́тріи, къ не́й же я́ко благо́й путеводи́льницѣ прите́клъ еси́, зовы́й въ восхище́ніи духо́внѣмъ Бо́гу: Аллилу́ія.

Икосъ 5.

Ви́дяще вси́ окре́стніи и проходя́щіи лю́діе пусты́нное твое́ житіе́ и твоя́ по́двиги, прославля́ху Го́спода, яви́вшаго мíру сицева́го уго́дника. Мы́ же, грѣ́шніи, прино́симъ ти́ похвалы́ сія́:

Ра́дуйся, звѣздо́, страну́ Волого́дскую осія́вшая; ра́дуйся, лозо́ вертогра́да Се́ргіева.

Ра́дуйся, го́рдости прогони́телю; ра́дуйся, и́га Христо́ва носи́телю.

Ра́дуйся, темноты́ наро́дныя просвѣти́телю; ра́дуйся, пусты́ни Ма́сленскія пе́рвый насе́льниче.

Ра́дуйся, обурева́емыхъ страстьми́ приста́нище благоути́шное; ра́дуйся, оби́димыхъ прибѣ́жище наде́жное.

Ра́дуйся, Арсе́ніе, Коме́льскій чудотво́рче.

Конда́къ 6.

Проповѣ́дникъ несумнѣ́ннаго пути́ ко спасе́нію яви́лся еси́, прему́дре Арсе́ніе, твои́ми труды́, безкоры́стіемъ и терпѣ́ніемъ, на ни́хже взира́юще, усе́рднѣ сла́вимъ да́вшаго ти́ си́лу и крѣ́пость Го́спода, вопію́ще Ему́: Аллилу́ія.

Икосъ 6.

Возсія́, я́ко со́лнце въ пусты́ни Ма́сленстѣй, но бѣ́гая молвы́ человѣ́ческія, преподо́бне, отше́лъ еси́ въ непрохо́дныя де́бри Коме́льскія, нося́ смире́нія ра́ди древя́ный кре́стъ, и ту́ при рѣцѣ́ Ко́хтоши, идѣ́же но́ша съ раме́нъ твои́хъ спаде́ и свѣ́тъ небе́сный осія́ тя́, поста́вилъ еси́ кре́стъ и посели́лся еси́, ча́я въ безмо́лвіи рабо́тати Го́сподеви со стра́хомъ. Сего́ ра́ди пріими́ похвалы́ сія́:

Ра́дуйся, промышле́ніемъ Бо́жіимъ въ пусты́ню Коме́льскую приведе́нный; ра́дуйся, свѣ́томъ небе́снымъ здѣ́ осія́нный.

Ра́дуйся, пусты́ню сію́ отъ всея́ души́ возлюби́вый; ра́дуйся, отъ ко́зней вра́жескихъ святы́мъ кресто́мъ себе́ огради́вый.

Ра́дуйся, покро́ву Пресвяты́я Богоро́дицы ся́ преда́вый; ра́дуйся, еди́наго на потре́бу непреста́ннѣ иска́вый.

Ра́дуйся, славолю́бія искорени́телю; ра́дуйся, соиме́нному тебѣ́ вели́кому Арсе́нію вѣ́рный подража́телю.

Ра́дуйся, Арсе́ніе, Коме́льскій чудотво́рче.

Конда́къ 7.

Хотя́ вра́гъ ро́да человѣ́ча изгна́ти тя́, преподо́бне, изъ пусты́ни Коме́льскія, мно́га искуше́нія тебѣ́ дѣ́яше; но ты́ я́ко тве́рдый адама́нтъ неизмѣ́ненъ пребыва́лъ еси́ въ любви́ къ пусты́ни, взыва́я къ распя́тому за ны́ Го́споду: Аллилу́ія.

Икосъ 7.

Но́выя труды́ подъя́лъ еси́, блаже́нне Арсе́ніе, егда́, по внуше́нію Бо́жію, устро́ити оби́тель въ пусты́ни Коме́льстѣй восхотѣ́лъ еси́ и сея́ ра́ди вины́ ше́дъ нелѣ́ностнѣ во гра́дъ Москву́ и смире́ннѣ предъ о́чи царя́ Васи́лія Іоа́нновича предста́въ, моли́лъ еси́ огради́ти устроя́емую оби́тель отъ оби́дъ и утѣсне́ній, я́же науще́ніемъ вра́жескимъ дѣ́яша окре́стніи лю́діе. Ца́рь же, вѣ́дая тя́ я́ко уго́дника Бо́жія, и исполня́я Писа́ніе, — толку́щему отве́рзется, — повелѣ́ да́ти тебѣ́ гра́моту во огражде́ніе оби́тели. За сицевы́я твоя́ труды́ и по́двиги вопіе́мъ ти́ со умиле́ніемъ:

Ра́дуйся, зла́то въ горни́лѣ терпѣ́нія искуше́нное; ра́дуйся, би́сере честны́й, отъ скве́рны грѣхо́вныя безмо́лвіемъ очище́нный.

Ра́дуйся, пусты́нныхъ оби́телей основа́телю; ра́дуйся, вражды́ и нестрое́нія устрани́телю.

Ра́дуйся, се́рдце царе́во на ми́лость преклони́вый; ра́дуйся, безмо́лвіе твое́ ра́ди спасе́нія бли́жнихъ нару́шивый.

Ра́дуйся, прибѣга́ющимъ къ тебѣ́ въ ну́ждѣхъ усе́рдный помо́щниче; ра́дуйся, су́щимъ въ напа́стехъ ско́рый засту́пниче.

Ра́дуйся, Арсе́ніе, Коме́льскій чудотво́рче.

Конда́къ 8.

Стра́ннымъ твои́мъ житіе́мъ, преподо́бне, пусты́ня Коме́льская озари́ся, ему́же внима́юще, устрани́мся мíра, у́мъ на небеса́ возло́жше, а́ще бо спасе́нія душе́внаго ра́ди и удали́лся еси́ въ пусты́ню, но мно́зи пустыннолю́бцы сокро́вищами души́ твоея́ привле́клъ еси́, съ ни́миже ны́нѣ въ невече́рнѣмъ свѣ́тѣ сла́дко воспѣва́еши Свѣтопода́телю Христу́: Аллилу́ія.

Икосъ 8.

Ве́сь испо́лненъ бы́лъ еси́ любве́ къ Бо́гу и бли́жнимъ твои́мъ, свя́те Арсе́ніе, и сего́ ра́ди безро́потнѣ принима́лъ еси́ неисче́тныя оби́ды отъ гоня́щихъ тя́ изъ пусты́ни. Егда́ же вре́меннѣ отше́дшу ти́ изъ ке́ліи твое́й, лю́діе нечести́віи нападо́ша на ню́ и келе́йнаго твоего́ ста́рца уби́ша, ты́, преподо́бне, въ вели́цѣй ско́би о поте́ри бра́та и о духо́внѣй поги́бели тѣ́хъ бу́іихъ люде́й, да́лъ еси́ мѣ́сто гнѣ́ву и удали́лся еси́ за три́десять по́прищъ въ де́брь Шилего́дскую, идѣ́же пожи́лъ еси́ въ соверше́ннѣмъ безмо́лвіи, до́ндеже откры́тъ бы́лъ еси́ ловце́мъ звѣре́й. Сицево́му терпѣ́нію дивя́щеся, возглаша́емъ ти́:

Ра́дуйся, любве́ Христо́вы вѣ́рный носи́телю; ра́дуйся, спаси́тельнаго долготерпѣ́нія учи́телю.

Ра́дуйся, оби́ды, я́ко воздая́ніе за грѣхи́, принима́вый; ра́дуйся, содѣ́янное тебѣ́ зло́ незло́біемъ покры́вый.

Ра́дуйся, пусты́ню Шилего́дскую житіе́мъ твои́мъ освяти́вый; ра́дуйся, явле́ніемъ твои́мъ звѣре́й дубра́вныхъ удиви́вый.

Ра́дуйся, неви́нно стра́ждущихъ твои́мъ примѣ́ромъ укрѣпи́вый; ра́дуйся, си́рыхъ и убо́гихъ покрови́телю.

Ра́дуйся, Арсе́ніе, Коме́льскій чудотво́рче.

Конда́къ 9.

Вся́кую на́шу ско́рбь утоли́ твое́ю многомо́щную по́мощію, преподо́бне Арсе́ніе, и испроси́ на́мъ у Го́спода си́лу и крѣ́пость понести́ кре́стъ сво́й до конца́ живота́, взыва́я Влады́цѣ всѣ́хъ: Аллилу́ія.

Икосъ 9.

Вѣтíя многовѣща́нныя, я́ко ры́бы безгла́сныя, ви́димъ о тебѣ́, богому́дре Арсе́ніе: недоумѣ́ютъ бо досто́йнѣ восхвали́ти твоя́ по́двиги. Мы́ же, грѣ́шніи, любо́вію къ тебѣ́ подвиза́еміи, дерза́емъ ублажа́ти тя́ си́це:

Ра́дуйся, пусты́нниковъ дре́внихъ, Анто́нія, Па́вла, Гера́сима нелицемѣ́рный подража́телю; ра́дуйся, Христа́, не имѣ́вшаго гдѣ́ главы́ преклони́ти, тве́рдый послѣ́дователю.

Ра́дуйся, отъ звѣре́й лю́тыхъ почита́емый; ра́дуйся, отъ люде́й звѣронра́вныхъ гони́мый.

Ра́дуйся, ловцу́ звѣре́й себе́ яви́вый; ра́дуйся, безкоры́стіемъ и прозорли́востію ловца́ того́ порази́вый.

Ра́дуйся, но́вую оби́тель въ де́бри Шилего́дстѣй основа́вый; ра́дуйся, я́ко си́лою моли́твъ твои́хъ оби́тель та́ со всѣ́ми прите́кшими къ не́й отъ наше́ствія тата́ръ спасе́ся.

Ра́дуйся, Арсе́ніе, Коме́льскій чудотво́рче.

Конда́къ 10.

Спасти́ хотя́ ду́шу твою́ на мѣ́стѣ, Бо́гомъ ука́занномъ ти́, свя́те Арсе́ніе, вознамѣ́рился еси́ возврати́тися въ любе́зную тебѣ́ пусты́ню Коме́льскую и здѣ́ оби́тель устро́ити: пе́рвѣе же ты́ напра́вилъ еси́ стопы́ твоя́ во гра́дъ Москву́ къ царю́ Васи́лію Іоа́нновичу; испроси́въ же отъ него́ но́вую гра́моту ра́ди пусты́ни Коме́льскія, со ученико́мъ Гера́симомъ отше́лъ еси́ изъ оби́тели Шилего́дскія на пре́жнее мѣ́сто въ пусты́ню Коме́льскую и нача́лъ еси́ устроя́ти оби́тель во сла́ву и че́сть Пресвяты́я Богоро́дицы, Юже, я́ко непреста́нную Помо́щницу и ско́рую Засту́пницу прославля́я, съ вѣ́рою и наде́ждою взыва́лъ еси́ Бо́гу: Аллилу́ія.

Икосъ 10.

Стѣна́ еси́ крѣ́пкая оби́тели твое́й и всѣ́мъ къ тебѣ́ прибѣга́ющимъ, преподо́бне Арсе́ніе, твои́мъ бо святы́мъ житіе́мъ мно́гія въ пусты́ню привле́клъ еси́, сего́ ра́ди вопіе́мъ ти́:

Ра́дуйся, житія́ и́ноческаго му́дрый устрои́телю; ра́дуйся, смире́нія, цѣлому́дрія и нестяжа́тельности ре́вностный насади́телю.

Ра́дуйся, земны́й а́нгеле и небе́сный человѣ́че; ра́дуйся, къ тебѣ́ бо, я́ко му́дрому наста́внику, иска́вшіи соверше́нства прибѣга́ху.

Ра́дуйся, я́ко сло́ву твоему́ и звѣ́ри дубра́вніи внима́ху; ра́дуйся, злы́хъ серде́цъ умягче́ніе.

Ра́дуйся, оби́тели твое́й неусы́пный попечи́телю; ра́дуйся, Пречи́стыя Богоро́дицы вѣ́рный служи́телю.

Ра́дуйся, Арсе́ніе, Коме́льскій чудотво́рче.

Конда́къ 11.

Пѣ́ніе умиле́нное а́ще и прино́симъ ти́, достохва́льне Арсе́ніе, ничто́же соверша́емъ досто́йно, но ты́, преподо́бне, покры́й на́ше недосто́инство твои́мъ снисхожде́ніемъ и научи́ ны чи́стымъ се́рдцемъ воспѣва́ти просла́вившему тя́ Го́споду: Аллилу́ія.

Икосъ 11.

Свѣтоза́рнымъ свѣти́ломъ возсія́лъ еси́, преподо́бне Арсе́ніе, въ пусты́няхъ Шилего́дстѣй и Коме́льстѣй, а́ще и пресели́лся еси́ въ послѣ́днюю, но не забы́лъ еси́ посѣща́ти и пе́рвую, облича́я окре́стныя лю́ди въ наруше́ніи и́ми за́повѣдей и уста́вовъ церко́вныхъ. Предъ конце́мъ же живота́ твоего́ ты́, преподо́бне, затвори́лся еси́ въ ке́ліи твое́й и нача́лъ еси́ гото́витися; послѣди́ же собра́лъ еси́ бра́тію къ сме́ртному одру́ твоему́, моля́ и́хъ имѣ́ти любо́вь между́ собо́ю, благослови́въ же и́хъ, ми́рно пре́далъ еси́ ду́хъ тво́й Бо́гу, и погребе́нъ бы́лъ еси́ во оби́тели Коме́льстѣй, идѣ́же мо́щи твоя́ то́ки чуде́съ излива́ютъ, подвиза́я взыва́ти тебѣ́:

Ра́дуйся, свѣти́ло, свѣ́тъ сво́й отъ Христа́ воспрія́вшее; ра́дуйся, я́ко свѣ́томъ тѣ́мъ пусты́ни освѣти́шася.

Ра́дуйся, за́повѣдей Госпо́днихъ стро́гій исполни́телю; ра́дуйся, наруши́телей о́ныхъ ско́рый обличи́телю.

Ра́дуйся, кончи́ну твою́ предузна́вый; ра́дуйся, мо́щи твоя́ во благослове́ніе оби́тели да́вый.

Ра́дуйся, я́ко мо́щи сія́ то́ки чуде́съ источа́ютъ; ра́дуйся, я́ко чудеса́ ты́я восхваля́ти тя́ благода́рнѣ подвиза́ютъ.

Ра́дуйся, Арсе́ніе, Коме́льскій чудотво́рче.

Конда́къ 12.

Благода́ти исто́чникъ — святы́я мо́щи твоя́, и́мамы и до дне́сь, блаже́нне Арсе́ніе, а́ще бо и оби́тель твоя́ убѣ́жищемъ и́нокинь ны́нѣ содѣ́лана бы́сть: въ Ца́рствіи бо небе́снѣмъ нѣ́сть му́жескъ по́лъ, ни же́нскъ, но вси́ ро́ди, еди́нымъ се́рдцемъ и еди́ными усты́, немо́лчнѣ славосло́вятъ Пода́теля всѣ́хъ бла́гъ Свята́го Ду́ха Утѣ́шителя, пою́ще Ему́: Аллилу́ія.

Икосъ 12.

Пою́ще твоя́ по́двиги и чудеса́, славосло́вимъ просла́вльшаго тя́ Го́спода и про́симъ тя́, преподо́бне Арсе́ніе, освяти́, вразуми́ и научи́ ны, грѣ́шныя, со умиле́ніемъ взыва́ти тебѣ́:

Ра́дуйся, бу́іихъ вразуми́телю; ра́дуйся, разсла́бленныхъ возстанови́телю.

Ра́дуйся, слѣпы́мъ зрѣ́ніе, глухи́мъ слы́шаніе, нѣмы́мъ разрѣше́ніе язы́ка дарова́вый; ра́дуйся, тре́звости утверди́телю.

Ра́дуйся, вражду́ющихъ примири́телю; ра́дуйся, со́вѣсти пробуди́телю.

Ра́дуйся, душеполе́зныхъ бла́гъ пода́телю; ра́дуйся, не то́чію оби́тели твоея́, но и всея́ о́бласти Волого́дскія покрови́телю.

Ра́дуйся, Арсе́ніе, Коме́льскій чудотво́рче.

Конда́къ 13.

О, преподо́бне и богоно́сне о́тче на́шъ Арсе́ніе, пріими́ отъ на́съ, недосто́йныхъ, ма́лое сіе́ моле́ніе и богопрія́тнымъ хода́тайствомъ твои́мъ умоли́ Го́спода изба́вити Це́рковь Правосла́вную отъ безвѣ́рія, ересе́й и раско́ловъ, оте́чество на́ше отъ наше́ствія иноплеме́нныхъ, отъ неду́га и гла́да, отъ вся́кія ско́бри и смертоно́сныя ра́ны, оби́тель же твою́ и на́съ всѣ́хъ отъ вра́гъ ви́димыхъ и неви́димыхъ. Да твои́мъ всемо́щнымъ заступле́ніемъ укрѣпля́еми и твое́ю любо́вію согрѣва́еми съ вѣ́рою и наде́ждою благода́рнѣ вопіе́мъ Творцу́ небесе́ и земли́: Аллилу́ія.

[Се́й конда́къ глаго́лется три́жды. Та́же и́косъ 1-й: Ангела земна́го... И конда́къ 1-й: Избра́нный чудотво́рче...]

Молитва

О священная главо, преподобне отче, и преблаженный авво Арсение! Не забуди нищих нас до конца, но поминай всегда во святых твоих и благоприятных молитвах к Богу. Помяни стадо твое, еже сам упасл еси, и не забуди посещати чад твоих- моли за ны, отче священный, за дети твоя духовныя, яко имеяй дерзновение к Небесному Царю. Не премолчи за ны ко Господу и не презри нас, верою и любовию чтущих тя, помяни нас недостойных у Престола Вседержителева, и не престай моляся о нас Христу Богу- дана бо тебе благодать за ны молитися. Не мним тя суща мертва, аще телом и преставился еси от нас, но и по смерти убо жив сый пребываеши- не отступай от нас духом, сохраняй нас от стрел вражиих, и всякия прелести бесовския и козней диавольских, пастырю наш добрый! Аще мощей твоих рака предо очима и видима есть всегда, но святая твоя душа, со ангельскими воинствы, со безплотными лики, с небесными силами, у Престола Вседержителева предстоящи, достойно веселится. Темже к тебе припадаем, и тебе молим, и тебе милися деем, молися о нас всесильному Богу о спасении душ наших, испроси нам время на покаяние, и еже невозбранным прейти от земли на небо- мытарств же горьких воздушных князей и вечныя муки избавитися, и Небесному Царствию наследники быти, со всеми праведными, от века угодившими Господу нашему Иисусу Христу, Емуже подобает всякая слава, честь и поклонение, ныне и присно и во веки веков. Аминь.

Кондак 1

Избраннии чудотворцы и велицыи угодницы Господни, обители нашея заступницы и приснии о душах наших молитвенницы, преподобнии схимонаше Кирилле и схимонахине Марие! Пение похвальное вам приносяще, молим вы усердно: яко имущии дерзновение ко Господу, предстательством вашим от всяких бед нас свободите и наследники Царствия Небеснаго нас соделайте, да зовем вам радостно:
Радуйтеся, преподобнии Кирилле и Марие, блазии о нас пред Богом заступницы.

Икос 1

Ангели земнии и человецы небеснии воистину явистеся преподобнии Кирилле и Марие, от юности вашея чистую совесть имущии к Богу, и добре во благочестии и чистоте вкупе пожившии, нам же оставльшии в пример подражания житие ваше богоугодное, емуже чудящеся и чудесы вашими озаряеми, зовем вам гласы хвалебными сице:
Радуйтеся, от юности вашея Христа возлюбившии и Тому от души поработавшии;
Радуйтеся, целомудрия хранители и душевныя и телесныя чистоты рачители.
Радуйтеся, души ваши и телеса на земли в обиталище Духа Святаго уготовившии;
Радуйтеся, исполненнии премудрости и разума Божественного.
Радуйтеся, яко от земли на небо преидосте и тамо со Ангелы Троице предстоите;
Радуйтеся, яко со безплотными лики трисвятую песнь ей воспеваете.
Радуйтеся, на небеси и на земли от Господа прославленнии;
Радуйтеся, обретшии вечное всесветлое место упокоения.
Радуйтеся, преподобнии Кирилле и Марие, блазии о нас пред Богом заступницы.

Кондак 2

Видя всевидящее око Отца светов вельми благоугодное Богу ваше житие, благоволи избрати вас, блаженнии, да явите мирови светильник пресветлый Сергия преподобнаго, да о нем и ваши имена прославятся и вси вернии воспоют прославльшему вас Господеви: Аллилуиа.

Икос 2

Разума Божественнаго преисполненнии, Кирилле и Марие, неустанно работасте Господеви, наставляя чада своя в послушании и кротости. Умудрите убо и нас, преподобнии, непрестанно оправданием Господним следовати неложно, да обрящем вкупе с вами спасение вечное и принесем вам благохваления таковыя:
Радуйтеся, блаженнии, в боголюбии пожившии и благоверие сохраншии;
Радуйтеся, милости и сострадания преисполненнии.
Радуйтеся, милостынею и молитвами Небесное Царствие стяжавшии;
Радуйтеся, смирением и пощением вечное блаженство улучившии.
Радуйтеся, яко мзда ваша многа на Небесех есть;
Радуйтеся, яко молитвами вашими и мы надежды Царствия Христова не лишаемся.
Радуйтеся, яко радость ваша вечна во светлостех святых;
Радуйтеся, яко тояжде светлости вас ради и мы наследниками являемся.
Радуйтеся, преподобнии Кирилле и Марие, блазии о нас пред Богом заступницы.

Кондак 3

Силою Божиею ограждаемь преподобный Кирилл князю Ростовскому со всяким усердием служаше и вкупе с ним во орду Агарянскую, мира ради, хождаше, да люди русские ослабу от ига их имут и Богу непрестанно поют: Аллилуиа.

Икос 3

Имущи помышление преподобнии Кирилл и Мария и людие о трикратном во чреве Мариином в церкве плода глашении и удивльшеся, разумеша нечто преславное и чудное быти; и по сих уведевше радостное сына рождение, радовахуся и радостная вам приношаху глаголюще:
Радуйтеся, двоице пресветлая, Богом совокупленная;
Радуйтеся, звезды непрелестнии, путь супружескаго жития богоугоднаго верно указующии.
Радуйтеся, родители благии добраго и избранного плода;
Радуйтеся, всякия благодати Божия его исполнившии.
Радуйтеся, супругов христиан ко благочестию наставницы;
Радуйтеся, доброму богобоязненному чад воспитанию их научающии.
Радуйтеся, целомудрия и воздержания супружескаго образи преизящнии;
Радуйтеся, хотящих богоугодно жити богомудрии учителие.
Радуйтеся, преподобнии Кирилле и Марие, блазии о нас пред Богом заступницы.

Кондак 4

Буря скорбей и напастей, воздвизаемая наместником Великаго Князя, не ослаби крепкия любве вашея яже к Богу, Кирилле и Марие блаженнии, но паче научи вы изряднее отражати разженныя стрелы лукаваго. Научите убо и нас вся скорби мира сего с кротостию преносити, в веселии вопия Богу: Аллилуиа.

Икос 4

Слышавше, блаженнии, Варфоломея, дивное чадо ваше, некогда грамоте неискусна, чтуща богодухновенныя писмены, удивишася зело, и старца-схимника, премудрость ему даровавшаго, в дом свой прияша, заповедь Апостола Павла храняше: страннолюбия не забывайте; тем бо не ведяще неции странноприяша Ангелы. Таковую добродетель вашу воспевающе, вопием вам сице:
Радуйтеся, заповедей Христовых вернии исполнители;
Радуйтеся, учения Евангельского истиннии последователи.
Радуйтеся, угодницы Божии, житию великих святых сопричастницы;
Радуйтеся, странноприимства древняго праотца Авраама подражатели.
Радуйтеся, светом благочестнаго жития вашего, яко светила богосветлая, пресиявшии;
Радуйтеся, любовь и милосердие к бедным и сирым явившии.
Радуйтеся, безпомощным скории помощницы;
Радуйтеся, яко и нам присно помогаете и к Небесному Отечеству руководствуете.
Радуйтеся, преподобнии Кирилле и Марие, блазии о нас пред Богом заступницы.

Кондак 5

Боготечным звездам подобны бысте, преблаженнии Кирилле и Марие, егда пришедше от страны Ростовския в пределы княжества Московскаго и во граде Радонеже поселистеся, тамо сущих бо людей благочестием своим удивисте, подвизая пети: Аллилуиа.

Икос 5

Видевше, святии, тщание сына своего, преподобнаго Сергия, к иноческому житию, моляху его, да пребудет с вами до кончины вашея. Он же, яко сын послушания, издетска наученный вами заповеди Господни исполняти, покорися воле вашей, Кирилле и Марие, якоже Божией, научая всех вопити вам тако:
Радуйтеся, блаженств Христовых причастницы;
Радуйтеся, честнаго супружества и попечения о чадех добрии образи.
Радуйтеся, ангелонравнии человецы;
Радуйтеся, преподобных и праведных сопричастницы.
Радуйтеся, Пресвятыя Троицы вернии угодницы;
Радуйтеся, яко и чад ваших угождати Ей научившии.
Радуйтеся, того ради сын ваш Триипостасному Божеству обитель дивную устроивый;
Радуйтеся, сего ради и ваша святыя имена прославлены есть по всей Руси.
Радуйтеся, преподобнии Кирилле и Марие, блазии о нас пред Богом заступницы.

Кондак 6

Проповедницы веры православныя и ревнители благочестия не словом токмо, но и житием вашим, бысте во граде Радонеже, прехвальнии Кирилле и Марие: темже и святая Церковь достойно почитает вас, немолчно воспевая Дивному во святых Своих Богу: Аллилуиа.

Икос 6

Возсия во граде Радонеже свет добродетельнаго вашего жития, преблаженнии Кирилле и Марие; егда же достигше возраста преклонна, во обитель Хотьковскую устремишася под покров Божией Матери притекше, тамо велий образ Ангельский на ся восприяли есте, темже образ вышшаго нам смирения показуя, емуже поучаяся, с любовию вопием вам таковая:
Радуйтеся, яко любве ради Господа мира сего славу остависте;
Радуйтеся, яко иноческое равноангельное житие усердно восприясте.
Радуйтеся, во обитель древнюю пришедшии и тамо покой себе обретшии;
Радуйтеся, Пречистей Деве Богородице души свои вручившии.
Радуйтеся, образ ангельский восприимшии и непорочно его сохраншии;
Радуйтеся, всем иноком и инокиням добрии образи.
Радуйтеся, прежде кончины вашея вся страсти умертвившии воздержанием;
Радуйтеся, святую схиму в броню спасения восприявшии.
Радуйтеся, преподобнии Кирилле и Марие, блазии о нас пред Богом заступницы.

Кондак 7

Хотя Человеколюбец Господь явити в житии вашем, преподобнии Кирилле и Марие, образ назидания, не токмо людем мирским, но и иноческому лику, внуши вам в старости маститей оставите славу земную и восприяти образ иноческий, в немже постом, бдением и молитвою добре подвизастеся, неустанно воспевая Триединому Богу Серафимскую песнь: Аллилуиа.

Икос 7

Новую благодать показа всех Творец и Владыка чрез вас, преподобнии, егда прешли есте от временныя сея юдоли плачевныя во обители вечныя. Святыя мощи ваша, аще и под спудом сокровенны, многая чудеса источаху, многим болящим исцеления подаваху; паче же приносимыя к вам младенцы исцеляху. Сего ради приимите, врачеве наши блаженнии, от нас похвалы сицевыя:
Радуйтеся, смертию временною пришедшии к жизни вечней;
Радуйтеся, от Господа нетлением и чудесы прославленнии.
Радуйтеся, яко память ваша с похвалами и успение со святыми;
Радуйтеся, яко имена ваша честны суть и благословенны во Отечестве вашем.
Радуйтеся, болящим младенцем исцеление подающии;
Радуйтеся, тяжко болящую девицу, с любовию к вам притекшую, от недуга избавившии.
Радуйтеся, о любящих и чтущих вас небеснии предстатели;
Радуйтеся, приснопросящии нам у Господа дары благости Его.
Радуйтеся, преподобнии Кирилле и Марие, блазии о нас пред Богом заступницы.

Кондак 8

Страшное и ужасное бедствие прииде на землю Московскую, егда язвою моровою уязвлены быша людие мнози во градех и весех, и множество их умроша. Тогда собор освященный со инокини молебныя пения вам приношаху и предстательствы вашими избавление от беды получиша, вопиюще благодеющему чрез вас Богу: Аллилуиа.

Икос 8

Вси боголюбцы скорбию велиею объяты быша, егда во дни лихолетий, на землю Российскую пришедших, обитель Покрова Пречистая Девы в Хотькове богоборцы разорению и запустению предаша. Но память о вас, преподобнии, в людех жива бысть, и славляху чада российския житие ваше и чудеса благохвалении сицевыми:
Радуйтеся, чудотворцы наши предивныя;
Радуйтеся, не оставляющии нас в скорбныя дни.
Радуйтеся, града Хотькова и обители нашея ограждение несокрушимое;
Радуйтеся, на враги видимыя и невидимыя крепции нам споборницы.
Радуйтеся, благодеяний множество нам источающии;
Радуйтеся, милостию сострадания вашего всех объемлющии.
Радуйтеся, приснии всем нам ходатаи спасения;
Радуйтеся, неотступнии града Хотькова и обители нашея хранители.
Радуйтеся, преподобнии Кирилле и Марие, блазии о нас пред Богом заступницы.

Кондак 9

Вси Ангели и святых лики радовахуся радостию велиею, егда обитель ваша, преподобнии Кирилле и Марие, Церкви возвращена бысть и мощи ваша честныя, от лет древних Богом сокровенныя, в храме соборнем положены бысть. И возженна бяху молитвы лампада и людие вси узревше свет ея удивляхуся зело, к вам в напастех прибегают и помощь от вас получают; еяже и нас сподобите преподобнии, о вас вопиющих Богу: Аллилуиа.

Икос 9

Витийство человеческое не довлеет к достойному прославлению чудес от мощей ваших и поныне совершающихся, преблаженнии Кирилле и Марие: старица бо немощная монахиня костное преломление претерпевшая и от врачей не утешанная, к вам, преподобнии, притекше и со слезами моляху вас. Вскоре же исцеление совершенное получив, во умилении сердца воспеша вам:
Радуйтеся, благодати Святаго Духа сосуди избраннии;
Радуйтеся, радости нам вечныя благоприятнии ходатаи.
Радуйтеся, старицу немощную от недуга скоро исцелившии;
Радуйтеся, исцелением сим искусных врачей удивившии.
Радуйтеся, нетленныя благоухающии цветы;
Радуйтеся, безсмертия немерцающии лучи.
Радуйтеся, на земли величием чудес блистающии;
Радуйтеся, на небеси со Ангелы Бога славящии.
Радуйтеся, преподобнии Кирилле и Марие, блазии о нас пред Богом заступницы.

Кондак 10

Спасение вечное унаследовавше, богоблаженнии Кирилле и Марие, душами вашими во обителех горних неразлучно в Бозе пребываете, святыми же мощми вашими во обители Пренепорочныя Девы нетленно вкупе почиваете и обильная исцеления источаете, нас в Горний Иерусалим оный руководствуя, вопиющих того Града Управителю: Аллилуиа.

Икос 10

Стена и прибежище всем к вам притекающим вы есте, преподобнии. Обитель бо ваша к жизни иночестей возрожденная множество ищущих спасения собра, их же вы от искушений и соблазнов сохраните, блаженнии, и монашескому деланию научите, да улучивше желаемое, принесут вам сицевыя благодарственныя словеса:
Радуйтеся, чадолюбивыя наши предстателие;
Радуйтеся, руководствующии нас ко Христу Богу.
Радуйтеся, наставляющии шествовати по заповедем Господним;
Радуйтеся, научающии терпеливо носити крест свой и Владыце нашему последовати.
Радуйтеся, яко с преподобным отцем нашим Сергием имеете дерзновение ко Христу Богу нашему и ко Святей Его Богоматери;
Радуйтеся, яко вы есте ходатаи о нас недостойных, жительствующих во святей обители нашей, ей же вы и начальницы.
Радуйтеся, яко Богом собранней дружине сей вы помощницы, заступницы и молитвенницы;
Радуйтеся, яко вашими молитвами сохраняема невредимы от бесов и от человек злых пребываем.
Радуйтеся, преподобнии Кирилле и Марие, блазии о нас пред Богом заступницы.

Кондак 11

Пение молебное приносят вам, преблаженнии Кирилле и Марие, не во обители Хотьковской токмо, но и в Высоцкой, сыном вашим основанней, многоцелебных мощей ваших часть имущей, славят чудеса вами совершаемыя: младенец бо недуг неисцельный имеяй, исцеление от вас получает, родителей радости безмерныя исполняя, вопиющих исцелений подателю Богу: Аллилуиа.

Икос 11

Светом трисиянным осияваеми, Кирилле и Марие, всеблаженнии, со всеми святыми предстоите ныне на Небеси Престолу Царя царствующих и оттуду, яко светила светозарнии, присно просвещаете души притекающих к раце мощей ваших и покаянию истинному научаете. Сего ради, прославляюще вас, глаголем:
Радуйтеся, яко скончали есте жизнь свою телом, но духом не отступаете от нас;
Радуйтеся, с верою приходящих к раце мощей ваших благодатно освящающии.
Радуйтеся, бисери сияющии и благодатно просвещающии человеков;
Радуйтеся, свети умнии, зарею Святаго Духа облистающии.
Радуйтеся, известнии умилостивители Царя Небеснаго;
Радуйтеся, призывающих молитвенно честная имена ваши скории услышатели.
Радуйтеся, упование на вас по Бозе возлагающих дивнии помощницы;
Радуйтеся, всем правоверным всякое прошение во их пользу исполняющии.
Радуйтеся, преподобнии Кирилле и Марие, блазии о нас пред Богом заступницы.

Кондак 12

Благодать от Бога данную вам ведяще, прилежно молим вы ныне, прехвальнии схимонаси: пролейте теплую о нас молитву ко Господу, да сохранит обитель нашу неврежденну от напастей и нестроений, и нас да помилует и спасет, вопиющих Ему: Аллилуиа.

Икос 12

Поюще ваше Богоугодное житие, преподобнии, и на небеси от Бога прославление, ублажаем праведное преставление ваше, величаем безчисленныя чудеса от святых мощей ваших истекающия, и на неусыпныя молитвы ваша уповающе, взываем вам сицевая:
Радуйтеся, житие ваше земное благочестне скончавшии;
Радуйтеся, от Царя Небеснаго венцы славы приемшии.
Радуйтеся, обличеннии в ризу благодатнаго нетления;
Радуйтеся, во благоухании святыни нетленно почивающии.
Радуйтеся, препоясаннии силою многих чудес;
Радуйтеся, яко рака ваша честная врачебница явися недугом человеческим.
Радуйтеся, яко от нея всяк с верою приходяй дары целебныя приемлет;
Радуйтеся, яко обитель наша мощей ради ваших по всей земле Российстей прославляется.
Радуйтеся, преподобнии Кирилле и Марие, блазии о нас пред Богом заступницы.

Кондак 13

О, преславнии чудотворцы и угодницы Господни Кирилле и Марие! Приимите сия моления наша от всея души вам ныне возносимыя и сподобите нас предстательствы вашими в чине ангельском достигнути Небеснаго Царствия, идеже вси святии, Ангели и человецы воспевают непрестанными гласы хвалу Пресвятей Троице, Богу нашему: Аллилуиа, Аллилуиа, Аллилуиа.

Этот кондак читается трижды, а затем икос 1-й и кондак 1-й

Молитва преподобным Кириллу и Марии Радонежским

О раби Божии, преподобнии Кирилле и Марие! Аще и скончали есте временную жизнь свою телом, но духом не отступаете от нас, руководствуете же ны ко Христу Богу, наставляете шествовати по заповедем Господним и носити крест свой и последовати Владыце нашему. Вы, преподобнии, вкупе с преподобным и Богоносным отцем нашим Сергием, вашим возлюбленным сыном, имеете дерзновение ко Христу Богу нашему и ко Святей Его Богоматери. Будите молитвенницы и ходатаи о нас, недостойных, жительствующих во святей обители вашей, ей же вы и начальницы. Будите помощницы и заступницы Богом собранней дружине сей, да жительствующим на месте сем и приходящий с верою, вашими молитвами сохраняеми, невредими от бесов и от человек злых пребудем, славяще Святую Троицу, Отца и Сына и Святаго Духа, ныне, и присно, и во веки веков. Аминь.

Кондак 1

Великого строителя Лавры богоноснаго Сергия достойными похвалами ублажим преславно. Ты же, яко добрый любителю благолепия, прими от нас сицевая, с любовию тебе приносимыя пения: Радуйся, Никоне, Церкви Российстей украшение.

Икос 1

Ангелу, пустынному подражателю, к Сергию, отцу твоему притекл еси и до конца верен заветам его пребыл еси, темже поминай нас, в веселии зовущих ти:
Радуйся, Никоне, избегший житейских попечений.
Радуйся, добрый послушателю отеческих учений.
Радуйся, корень зла в себе победивый.
Радуйся, лилию благочестия в сердце своем возрастивый.
Радуйся, Никоне, Церкви Российстей украшение.

Кондак 2

Видя в родителех своих доброе благочестие и веры православныя твердое исповедание, яко чадо их возлюбленное воспевал еси с ними: Аллилуиа.

Икос 2

Разум добр стяжав себе, плоды благочестиваго воспитания вскоре, в младом возрасте явил еси: кротостью и смирением Богу угождая, сим добродетелем твоим подражая, сих добродетелей достигнути желая, велегласно зовем:
Радуйся, добрая отрасле родителей благочестивых;
Радуйся, в юности еще сад Христу в сердце своем насадивый.
Радуйся, иноческий путь на земли избравый;
Радуйся, прелести мира сего поправый.
Радуйся, Никоне, Церкви Российстей украшение.

Кондак 3

Силою свыше умудренный, к подвижнику великому пришед и к стопам его припал, умоляя его, дабы одним сердцем пети с ним песнь Христу Господу: Аллилуиа.

Икос 3

Имея от Бога дар прозрения, Сергий Преподобный, отец твой духовный, узрев в тебе искреннее излияние души твоея, повеле [ко] ученику своему Афанасию в обитель его шествовати и в ней иноческому житию поучатися. Мы же на сем пути твоем зовем:
Радуйся, сердце свое преподобному отцу открывый;
Радуйся, душу свою в послушание ему преклонивый.
Радуйся, ревностным иноком себе явивый;
Радуйся, радость небесную получивый.
Радуйся, Никоне, Церкви Российстей украшение.

Кондак 4

Бурю житейских помышлений презревши, сан иерея Божия восприял еси, в новом подвизе своем всерадостно воспевая средцем и усты: Аллилуиа.

Икос 4

Слыша о твоем добрем житии, по двоих летех преподобный отец твой Сергий возжела видети тя и с радостию прияв, в единой келии с собою житии повеле, благодатию сердце твое к совершенству уготовляя, мы же вас вкупе яко единых прославляем:
Радуйтеся, добрии добродетелей подвижницы;
Радуйтеся, души свои в храм божий устроителие.
Радуйтеся, Христовых совершенств достизателие;
Радуйтеся, ангельского жития подражателие.
Радуйтеся, отцы наши Сергие и Никоне, Церкви Российстей славо и украшение.

Кондак 5

Боготочною рукою духовная дарования источая, вся на полезная наставляя, Сергие и Никоне преподобне, песнь Богу воспевающе: Аллилуиа.

Икос 5

Видевше добраго себе помощника в попечении о братии, учитель твой Сергий преподобный избра тя и постави игуменом обители своея, ты же Никоне всеславный, безмолвие возлюбивый, токмо воле отца повинувшеся приял еси бремя трудов его, того ради зовем:
Радуйтеся, искреннии наши наставницы;
Радуйтеся, славнии домов Божиих строителие.
Радуйтеся, сокровищ духовных обладателие;
Радуйтеся, монашествующих собирателие.
Радуйтеся, отцы наши Сергие и Никоне, Церкви Российстей славо и украшение.

Кондак 6

Проповедник божественных учений был еси, Никоне преподобне, в церкви братию поучая, пети всегда: Аллилуиа.

Икос 6

Возсия миру светом евангельского благочестия, к миру ангельскому преставися учитель твой, Никоне преподобне, ты же скорбию исполненный, прими яко общника печали твоея, песнопения сия:
Радуйтеся, преподобнии Сергие и Никоне, истиннии друзи Христовы;
Радуйтеся, вернии исполнителие заповедей его.
Радуйтеся, добрии делателие вертограда его;
Радуйтеся, блаженнии наследницы, горния славы его.
Радуйтеся, отцы наши Сергие и Никоне, Церкви Российстей славо и украшение.

Кондак 7

Хотя добре исполнити служение свое, любовь отеческую к братии изливал еси, темже и имя твое, яко миро всюду, благоуханием своим подвизая всех пети: Аллилуиа.

Икос 7

Дивно являя в житии своем многие труды твоя, еще и словом поучения монашествующих наставляя како жити им по воле Творца своего; за сию ревность делания твоего прими похвалу сию:
Радуйся, добрый пастырю овец своих;
Радуйся, игумене, достойный преподобнаго Сергия преемниче.
Радуйся, твердый исполнителю его велений;
Радуйся, любимый посреде монашествующих селений.
Радуйся, Никоне, Церкви Российстей украшение.

Кондак 8

Странно безмолвия любителю обителью иноков управляти и игуменом братии бытии и по шести летех на подвиг совершеннаго уединения, преподобне отче, устремися, да единою душею неразлучно Богу предстоя вопити Ему: Аллилуиа.

Икос 8

Весь горе возвысися и созерцая сердцем неизреченная и преславная, не можаше отринути моление братии: «Попекись и о спасении ближних твоих», с любовию приял паки бремя трудов в обители: сих ради и мы паки зовем ти:
Радуйся, скорый послушателю верных молений;
Радуйся, теплый ходатаю наших прошений.
Радуйся горе предстоящий;
Радуйся, доле усердием горящий.
Радуйся, Никоне, Церкви Российстей украшение.

Кондак 9

Вся братия обители Святыя Троицы печали исполнишася, егда хан Едигей опустоши землю Российскую и к обители их приступи, токмо молитвами Никона игумена своего не остави пети песнь: Аллилуиа.

Икос 9

Ветии многовещании недоумевают, что и глаголати о пречудном видении преподобнаго, егда святителие Московские Петр и Алексей, а с ними и преподобный Сергий явишася и рекоша ему: «Угодно сие Господу, да коснутся сего места иноплеменницы, да не скорбите и не смущайте сердец ваших; искушение скоро прейде и обитель не токмо не запустеет, но более расцветет». За сие откровение тебе достойне воспевати похвалы сия:
Радуйся, Никоне, молитвенниче теплый и преизрядный;
Радуйся, откровений Божиих зрителю.
Радуйся, будущих яко настоящая созерцателю.
Радуйся, Никоне, Церкви Российстей украшение.

Кондак 10

Спасти хотя святыни неким удалихся временно с братию своею из обители и в изгнании не преста с надеждею воспевати Богу: Аллилуиа.

Икос 10

Царю Превечный, Утешителю, Троице Пребожественная, не даде погибнути месту избранному и по удалении Едигея с полчищами, превратившаго всю обитель в развалины, возвратишася преподобный с братиею и нача восставляти обитель своего чуднаго наставника, за сию ревность пламенную и за великое множество трудов твоих, прими всеблаженне Никоне, песнь сию к тебе возносимую:
Радуйся, возлюбленное чадо Святыя Троицы;
Радуйся, избранный сосуде Божественнаго промышления.
Радуйся, многи скорби претерпевый;
Радуйся, от них же Господом избавивыйся.
Радуйся, Никоне, Церкви Российстей украшение.

Кондак 11

Пение всеумиленное приносим тебе, преподобне, яко по триех летех через тя исполнишася пророческое проречение отца твоего духовного и обитель яко крин процвете на месте опустошения и все множества иноков воспеша благодарственную песнь Господу: Аллилуиа.

Икос 11

Светоподателя узрев в тебе Церковь Российская, яко сподобишася обрести и на свещнице мира отца твоего Сергия богоноснаго, мощи святыя поставити и над сими храм Живначальныя Троицы воздвигнути и живописью лучшею украсити его, за сия труды твоя прими от недостойных уст славословия:
Радуйся, сподобивыйся узрети и миру всему явити святаго тела Сергиева нетление;
Радуйся, чрез сие громогласно проповедавый таинство Воскресения.
Радуйся, Пасху вечную миру явивый;
Радуйся, строителю церкви Божией и украсителю.
Радуйся, Никоне, Церкви Российстей украшение.

Кондак 12

Благодать подаждь ми, Господи, да воспою достойно угодника твоего, научающа всех пети: Аллилуиа.

Икос 12

Поюще житие твое, отче преподобне, восхваляем и скончание твое, како поучая братию: «Держати веру правую и житие благочестивое» умолк и в радости воскликнув: «Отнесите меня в храмину светлую, уготованную мне молитвами отца моего», и, оградив себя крестным знамением, душу свою Богу предал еси, темже мы вечно тебе благодарнии, благоговейно поем:
Радуйся, светильниче веры и благочестия;
Радуйся, луче Света Невечерняго.
Радуйся, наследниче жизни вечныя;
Радуйся, радосте наша и похваление.
Радуйся, Никоне, Церкви Российстей украшение.

Кондак 13

О великий угодниче Божий, друже Сергиев и сожителю всем святым, не престай посещати нас, любовию поминающих тя, подавая требующим исцеление и миру всему утешение, да с радостию всегда вопием: Аллилуиа, аллилуиа, аллилуиа.

Этот кондак читается трижды, затем 1-й икос и 1-й кондак.

Кондак 1

Избранный и дивный во святых, отче наш Павле, от Христа Бога дар чудес обильно приемый! Похвальная приносим ти ныне любовию чтущии тя: ты же яко имея дерзновение многое ко Святей Троице, моли избавитися от всяких бед верно хвалящим тя: Радуйся, Павле преподобне, пустынный жителю!

Икос 1

Ангела земного и небесного человека яви тебе всех Создатель, и благоплодную душу твою измлада провидев, преподобне Павле, научи всех вопити тебе сице: Радуйся, чистое Святаго Духа приятелище. Радуйся, ангельским ликом собеседниче. Радуйся, любве ради Христовы преименитый град отечества твоего оставивый, и в пустынях со зверьми жити изволивый. Радуйся, древо благосеннолитвенное, при исходящих вод насажденное. Радуйся, яко плод присноцветущь послушания принесл еси. Радуйся, яко терпением твоим вся страсти плотския умертвил еси. Радуйся, яко крестным знамением лукавых духов далече от тебе отгнал еси. Радуйся, столпе житейскими бурями непоколебимый. Радуйся, яко до ныне обильную реку исцелений источаеши. Радуйся, яко о благоденствии земли Российския умоляеши. Радуйся, яко обитель твою и нас рабов твоих в молитвах не оставляеши. Радуйся, яко скорбящим в недугах исцеление подаваеши. Радуйся, Павле преподобне, пустынный жителю! 

Кондак 2

Видяще свет добродетелей твоих отче наш Павле, душами и телесы просвещаемся, и дивнаго тя во святых чудотворца почитающе, чудесем твоим, по благодати Божией от тебе бывающим, удивляемся, и во умилении сердца Богу вопием: Аллилуиа. 

Икос 2

Разум недоразуменный от юности уразумевая божественными учении, еже бы улучити восход от земных в небесная, сего ради презрев все плотское мудрование, и возжелав весь жити Христу, в непроходимую пустыню вселився, в трудех и бдениих подвизался еси: сего ради глаголем тебе, отче наш Павле, таковая: Радуйся, яко Христово смирение вельми возлюбил еси. Радуйся, яко нищету духовную во всем соблюл еси. Радуйся, яко Крест Христов на раменах твоих без роптания носил еси. Радуйся, яко жестокое житие на земли показал еси. Радуйся, яко и учителя твоего великаго Сергия тем утешил еси. Радуйся, яко братии твоей образ великих добродетелей был еси. Радуйся, яко правым путем выну шествуя вход в Царство Небесное улучил еси. Радуйся, яко тамо со ангелы водворяяся предстоиши Святей Троице во мнозем дерзновении. Радуйся, воздержания и чистоты истинный хранителю. Радуйся, смиренномудрия и кротости присный блюстителю. Радуйся, светоносный светильниче Божия благодати. Радуйся, Храме Бога живаго одушевленный. Радуйся, Павле преподобне, пустынный жителю! 

Кондак 3

Силою свыше ти дарованною, всякую слезу от очес зле страждущих отъяти готов сый, богоносне отче Павле, был еси болезнующим исцеления податель, и по смерти твоей великий помощник всем показался еси, вопиющим Богу: Аллилуиа. 

Икос 3

Имея поспешенствующую тебе Божию силу, отче наш Павле, добродетельми украсился еси и ангельски пожил еси: темже и мы смиреннии, любовию к тебе понуждаеми, глаголем сице: Радуйся, ангелов собеседниче. Радуйся, преподобных и праведных сопричастниче. Радуйся, чистое и честное жилище святыни. Радуйся, великих добродетелей вместилище. Радуйся, яко ярем Господень на себе восприяти усердно восхотевый. Радуйся, яко от млада возраста в дому Божием пребывати возжелавый. Радуйся, яко и Господь желания твоего не отринул есть. Радуйся, яко и на небесех мзду трудов твоих обрел еси. Радуйся, яко ныне во свете святых пребываеши. Радуйся, яко выну Господа сил созерцаеши. Радуйся, яко со ангельскими чинми трисвятую песнь воспеваеши. Радуйся, невещественным светом трисиянного Божества озаренный. Радуйся, Павле преподобне, пустынный жителю! 

Кондак 4

Буря помышлений страстных обдержит ны: но воздержанием и трудами уморивый страсти и волнений множество укротивый, отче наш Павле, моли избавитися от напастей и нам, чтущим тя, да припадая во умилении душ и сердец наших к дивному Богу, прославляемому во святых своих, выну воспеваем: Аллилуиа. 

Икос 4

Слышаша ближнии и дальнии величие чудес твоих, авво наш Павле, яко скорый еси в бедах и обстояниих помощник, и яко на крилех повсюду являешися призывающим тя по имени в молитвах своих, и вопиющим в тебе: Радуйся, твердое в печалех утешение. Радуйся, скорбящих недремленное попечение. Радуйся, всяких недугов и болезней безмездный целителю. Радуйся, в напастех и бедах скорый подателю помощи. Радуйся, велия пучина сокровищ богатства душевнаго. Радуйся, скорбных и бедне живущих небесное утешение. Радуйся, неоскудеваемая пища алчущим правды. Радуйся, источниче неисчерпаемый жаждущим жития духовнаго. Радуйся, ненадеждных крепкое надеяние. Радуйся, верный кормчию в мори плавающих. Радуйся, яко молитвами твоими от страстей избавляемся. Радуйся, яко от цельбоносных твоих мощей сладости духовныя исполняемся. Радуйся, Павле преподобне, пустынный жителю! 

Кондак 5

Боготечная звезда во странах сих явился еси, преподобне отче Павле, и непроходимую пустыню светом богоугодного жития твоего озарил еси и вся верныя, назидатися к тебе приходящия, всегда поучал еси в Троице Святей славимому Богу пети сице: Аллилуиа. 

Икос 5

Видеша корыстолюбивии человецы, татие и хищницы, яко не токмо ко обители твоей святей на расхищение приступити несть возможно, но и стад твоих, вне ограды пасущихся, жезлом твоим, блаженне отче наш Павле, ограждаеши, дезнувших же на сие, слепотою и разслаблением поражая, в раскаяние и ужас приводиши, и тем всех богобоязненных возставляеши глаголати тебе таковая: Радуйся, неусыпный обители твоей хранителю. Радуйся, бодрый пастырю, выну пекущийся о чадех твоих. Радуйся, пустыножителю бодрственный, вся видимая и невидимая злая побеждающий. Радуйся, монашествующих спасения ходатай усерднейший. Радуйся, братии твоей в бедах и обстоянии варварском сущей утешителю скорый. Радуйся, нещастных защитниче предивный. Радуйся, смирения и кротости насадителю. Радуйся, мирских нравов из братии твоей искоренителю. Радуйся, плотския и духовныя нищеты любителю. Радуйся, гордости и великолепия мирского потребителю. Радуйся, целомудрием и кротостию, яко многоценною багряницею, оделся еси. Радуйся, правдою и чистотою, яко светлым венцем венчался еси. Радуйся, Павле преподобне, пустынный жителю! 

Кондак 6

Проповедает вся великая Россия о тебе, авво Павле, яко ты еси скорый податель исцеления недугующим, и разслабленныя и ума лишенныя и беснующияся молитвами твоими к Богу, здравы сортворяеши. Буди же и о нас смиренных рабех твоих всегдашний молитвенник ко Иисусу, к немуже воспеваем песнь выну славословимую: Аллилуиа. 

Икос 6

Возсиял еси во стране вологодстей, яко солнце пресветлое, преподобне отче наш Павле, уясняя сердца верных добродетельми твоими и яко луча огнесиянная теплотою молитв твоих всех скорбных и больных оживляеши: сего ради мы сошедшеся при гробе твоем, благодарственно вопием ти таковая: Радуйся, светильниче всесветлый, повсюду чудесы твоими осиявающий. Радуйся, свете, освещающий потемненныя лютыми страстьми. Радуйся, цвете сельный, благовонием Духа Святаго напоенней. Радуйся, божественных заповедей усерднейший ревнителю. Радуйся, апостольских и отеческих преданий твердый хранителю. Радуйся, церкви российския великое украшение. Радуйся, яко финик в пустыни сей процвел еси. Радуйся, яко кедр долголетний на горах сих прославился еси. Радуйся, яко присный отец о братии твоей промышлял еси. Радуйся, яко выну в законе господнем поучатися наставлял еси. Радуйся, яко и во успении твоем нас не оставляеши. Радуйся, яко о оставлении грехов наших Господа Бога умоляеши. Радуйся, Павле преподобне, пустынный жителю! 

Кондак 7

Хотящу игумену с братиею открыти гроб твой, и видети святые мощи твоя, преподобне отче Павле, в сонном видении представ, со гневом рекл еси им: оставите таковое тщетное дело, да не огнь снидет с небеси и пожжет вы: мы же слышаще таковая, яко непотребнии со страхом и трепетом припадающе к раце цельбоносных мощей твоих, молим тя о милости твоей вопиюще Богу: Аллилуиа. 

Икос 7

Новаго тя Илию фесвитянина, новаго тя Иоанна Крестителя, новаго тя Моисея Боговидца познаваем, Священнейший отче наш Павле, всю бо жизнь твою в непрестаннем посте и смиренномудрии, в деннонощных молитвах и коленопреклонениих, в нищите и наготе, в трудах и бдении провел еси: сего ради и Господь управи тя в пустыню сию, яко в обетованную землю, юже множеством последующих тебе в преславный град обратил еси, тем и вопием тебе ныне таковая: Радуйся, пустынный предобрый гражданине. Радуйся, духовный купец, обретший многоценен бисер Христа Иисуса Сладчайшего. Радуйся, мудрый путеводителю, управляющий стадо твое от земли на горняя. Радуйся, известный охранителю бедствующих в пустыни сей греховней. Радуйся, истинный проповедниче покаяния. Радуйся, искусный кормчий плавающих в пучине житейских страстей и попечений. Радуйся, яко крестным знамением, аки мечем обоюду острым, безстудныя помыслы от диавола тебе находящия посекл еси. Радуйся, яко и от человек жезлом твоим бесы во адскую бездну низвергаеши. Радуйся, светило страну сию прежде непроходимую, собою просвещающее. Радуйся, звездо, греховную тьму, таящуюся в нас, светом учения твоего разгоняющая. Радуйся, угодниче Христов, дивный в чудесех и по отшествии твоем от мира сего лукаваго. Радуйся, яко и мы тобою мир с Богом имамы. Радуйся, Павле преподобне, пустынный жителю! 

Кондак 8

Странное и велие чудо является притекающим к раце мощей твоих, блаженне отче Павле, пред ними бо и малое моление тебе приносяще, всяких болезней исцеление приемлем и в благоверии утверждающеся, упование на тя возлагаем, выну вопиюще Богу: Аллилуиа. 

Икос 8

Всем вся был еси, и ныне являешися, да всяко некия спасеши, по слову тезоименнаго ти апостола, богоносне отче Павле, и никакоже отступил еси от созданныя тобою обители, но поучением и наставлением наказуеши собранныя чада твоя, глаголющия и ныне тебе таковая: Радуйся, спасение и заступление наше у Бога. Радуйся, всем притекающим к раце мощей твоих вернаго исцеления подателю. Радуйся, яко любовь нелицемерную к Богу и ближнему стяжавый. Радуйся, яко тем апостол и пророк законную главизну исполнивый. Радуйся, яко учению тезоименнаго апостола Павла во всем последовал еси. Радуйся, яко от млада возраста Бога познал еси. Радуйся, яко от него словесных овец, извествованный учителем твоим Сергием, пастырь устроен был еси. Радуйся, яко в нищите и бедности от Господа прославленный. Радуйся, яко мраз и храд терпеливо понесл еси. Радуйся, яко вся воздушныя перемены непоколеблемо претерпел еси. Радуйся, яко все внешнее злостарадание без роптания восприял еси. Радуйся, яко дупленым древом, аки лествицею, на небо возшел еси. Радуйся, Павле преподобне, пустынный жителю! 

Кондак 9

Весь предался еси Вседержителю, отче наш Павле, егда тя распали божественное желание, и егда в горняя весь ум твой впери: сего ради оставив родителей твоих и все стяжание мирское в ничтоже вменив, последовал еси учению Христову, выну поя священную песнь: Аллилуиа. 

Икос 9

Ветии суемудренных богопротивному учению не последовав, преблаженне отче Павле, истинный ученик апостолов был еси, житием твоим в православней вере паче и паче утверждая и чудесы твоими удивляя всех, глаголющих тебе таковая: Радуйся, насадителю благочестия. Радуйся, искоренителю нечестивых и дел их посрамителю. Радуйся, подражателю ликом ангельским в песнопении духовном. Радуйся, богоносных и великих отец подвигом и трудом последователю усерднейший. Радуйся, яко и духовнаго отца твоего бдением и молитвою удивил еси. Радуйся, яко от него в святости жития свидетельствованный. Радуйся, непроходимыя пустыни светильниче пресветлый. Радуйся, пустынножителей лепотное украшение. Радуйся, яко дикии звери пред тобою аки агнцы кротцы бываху. Радуйся, яко хищнии птицы от руки твоея пищу небоязненно приимаху. Радуйся, яко всем вся нужная от тебе требующим подавал еси. Радуйся, яко и ныне притекающии к тебе с молением нетщы отходят. Радуйся, Павле преподобне, пустынный жителю! 

Кондак 10

Спасти хотя братию обители твоея, отче наш Павле, от нахождения варвар, представ им в сонном видении укреплял вся страдания сносити терпеливно, обещавая за сие воздаяние небесное: сего ради и мы, твои ученицы, якоже и они, да не постраждем от невидимых враг подобное, молим тебе не оставити нас, и молящеся умильно глаголем Богу: Аллилуиа. 

Икос 10

Стена еси тверда и оплот нерушим восхваляющим, блаженне Павле, болезни и труды твоя и всем требующим в бедах и напастех твоего заступления: темже и нас, немоществующих грехи многими и всякаго блага лишенных, заступи молитвами твоими, со усердием тебе вопиющих таковая: Радуйся, указателю пути праваго. Радуйся, вождю и законоположителю пустынножителей. Радуйся, дерзостно правил твоих несоблюдающих наказателю. Радуйся, присный молитвенниче о поминающих чесную память твою. Радуйся, в нуждах и бедах преславный заступниче. Радуйся, в напастех и скорбех скорый защитниче. Радуйся, маслино в дому Божием насажденная. Радуйся, красныя плоды добродетелей произращающая. Радуйся, благопрозябший грозде винограда Христова. Радуйся, сладосте духовная, искапающая вино, сердца верных веселящее. Радуйся, от Безначальнаго Отца, Единородна Слова несозданна и Святаго Духа сиянием просвещенный. Радуйся, яко в дуплене древе на камени божественныя веры сердцем и душею твердо укрепленный. Радуйся, Павле преподобне, пустынный жителю! 

Кондак 11

Пение всеумильное принося Пресвятей Троице, богоизбранный отче Павле, храм преславен в честь ея воздвигл еси, в нем же и ныне приносится безкровная жертва, о возвышении и разширении всероссийскаго царства и церкви, о низложении супостатов, и о спасении всех православных христиан, вопиющих Богу: Аллилуиа. 

Икос 11

Светозарною звездою в непроходимей сей пустыни сияяй, богоносне Павле, яко многорастительный финик в дому Святыя Троицы процвел, и яко сад живоносен всем притекающим к раце мощей твоих был еси: сего ради и глаголем ти таковая: Радуйся, поборниче православия. Радуйся, храме Триипостаснаго Божества одушевленный. Радуйся, луче, озаряющая сущия во мраце жития плотскаго. Радуйся, светоподательный светильниче сущим во тьме неразумия. Радуйся, деннице пресветлая, возвещающая всем грешным покаяние. Радуйся, цевнице духовная услаждающая чувства сладкопением небесным. Радуйся, источниче приснотекущий жаждущим вечныя жизни. Радуйся, кладезю воды живыя, всем исцеление подавающий. Радуйся, каменю пустынный, источаяй мед и млеко от неверия обращенным. Радуйся, свеще, пламенем божественныя любве возжженная. Радуйся, яко в горах, в пустынях и островех каменных всякое неприязненное искушение доблественно победил еси. Радуйся, яко за сия благорасленными Божественнаго рая цветы украсился еси. Радуйся, Павле преподобне, пустынный жителю! 

Кондак 12

Благодатию Божественною осеняем, просиял еси, в животе твоем, богоносне отче Павле, якоже всесветлое солнце в мире, и во успении твоем с верою и любовию к раце мощей твоих притекающия не оставляеши, и глаголющия Богу: Аллилуиа. 

Икос 12

Поюще твоя чудеса, преподобне отче Павле, воспеваем прославльшего тя Бога, в Троице Святей покланяемаго, и молим его научити нас, славити и глаголати тебе таковая: Радуйся, истинный и верный поклонниче Бога Вышняго. Радуйся, неложный заповедей Его хранителю. Радуйся, церковный строителю неоскудный. Радуйся, церковное украшение и истины поборниче. Радуйся, неусыпный исполнителю отеческих преданий. Радуйся, верный всего священнаго почитателю и ревнителю неуклонный. Радуйся, яко вся мирския волны страстей теплым желанием безстрастия укротил еси. Радуйся, яко вся губительная демонская коварства всеоружием крестным попрал еси. Радуйся, яко сугубу мзду ради трудов твоих от Бога приял еси. Радуйся, яко пресветел венец ради трудов твоих от руки Господней восприял еси. Радуйся, покланяющихся раце мощей твоих заступление. Радуйся, святей обители твоей утверждение, и нам почитающим тя спасение. Радуйся, Павле преподобне, пустынный жителю!

Кондак 13

О добрый наш пастырю и Учителю! О Великий чудотворче, преподобне отче Павле! Приими сие наше малое хваление, и моли Царя царствующих и Господа господствующих: страждущую страну российскую от лютых безбожник и власти их Господь да свободит, и да возставит престол православных царей: верных рабов Его, в скорби и печали день и нощь вопиющих к нему, многоболезный вопль да услышит и да изведет от погибели живот наш, нам же почитающим тя и всем православным христианом спасение и в болезнех исцеление даруй, и молитвами твоими изми нас будущия муки да выну воспеваем Богу победную песнь: Аллилуиа, Аллилуиа, Аллилуиа. 

(Этот кондак читается трижды, затем икос 1 и кондак 1)

Молитва

О добрый наш пастырю и богомудрый наставниче, преподобне отче Павле! Услыши нас грешных, молящихся тебе и призывающих в помощь скорое предстательство твое: виждь нас грешных, в толицех обстояниих сущих, виждь нас немощных, отвсюду уловляемых, всякаго блага лишенных и умом от малодушия помраченных: потщися, угодниче Божий, не оставити нас в греховном плену быти, да не будем в радость врагом нашим и не умрем в лукавых деяниях наших. Моли о нас недостойных Содетеля нашего и Владыку, Емуже ты со безплотными лики предстоиши. Милостива к нам сотвори Бога нашего в нынешнем веце и в будущем, да не воздаст нам по делам нашим и по нечистоте сердец наших, но по своей благости воздаст нам: на твое бо ходатайство уповающе, твоим предстательством хвалимся, твое заступление на помощь призываем и, к цельбоносному гробу твоему припадающе, исцеления просим: избави нас, угодниче Христов, от злых, находящих на нас, и укроти волны страстей и бед, востающих на нас, да ради святых твоих молитв не обымет нас напасть, и не погрязнем в пучине греховней и в тине страстей наших. Моли, преподобне отче Павле, Христа Бога нашего, да подаст нам мирное жительство, оставление грехов, душам нашим спасение и велию милость. Аминь.

Тропарь, глас 1

Божественною любовию от юности распаляем, Павле преподобне, вся, яже в мире, красная возненавидев, Христа единаго возлюбил еси, и сего ради во внутреннюю пустыню вселился еси со зверьми жити весь Христу: отонудуже и всевидящее Око, твоя труды видев, даром чудес и по преставлении обогати тя. Темже вопием ти: моли непрестанно о всех нас, честную память твою присно в песнех почитающих.

Кондак 1

Избранный чудотворче, и предивный угодниче Христов Иакове, источаяй неоскудно исцеления приходящих к тебе с верою, с любовию похвальная восписуем ти, преподобне; ты же, яко имеяй дерзновение ко Святей Троице, от всяких нас бед твоими молитвами избави, и вся полезная испроси зовущим ти: радуйся, Иакове, богомудре отче наш.

Икос 1

Ангел земный и небесный человек явился еси, преподобне отче наш Иакове; аще бо и человек естеством быв, но яко безплотен на земли пожил еси, всякое житейское отложив попечение, да Единому благоугодиши Богу; темже тя, яко угодника Христова и приснаго собеседника Ангелов любовию почитающе, похвальными песньми ублажаем сице:
радуйся, Костромских пределов славное прозябение.
Радуйся, отца благочестиваго отрасль;
радуйся, матере благоговейной плод.
Радуйся, Христа Бога от юности паче всего возлюбивый;
радуйся, стезем Того последовати всеусердно возжелевый.
радуйся, вся красная мира сего во уметы вменивый;
радуйся, заповедь Евангелия, еже ни о чесом же от сущих в мире пещися, с любовию исполнивый.
Радуйся, велиим воздержанием измлада тело твое изнуривый;
радуйся, плоть твою духови покоривый.
Радуйся, благий рабе и верный, данный тебе талант сугубо возрастивый;
радуйся, слуго Господень, преблагую волю Владыки своего сотворивый.
Радуйся, от утра до вечера твоея жизни в винограде
Христове потрудивыйся.
РАДУЙСЯ, ИАКОВЕ, БОГОМУДРЕ ОТЧЕ НАШ.

Кондак 2

Видя суету земных попечений, мирскаго мятежа избегнути потщался еси, богомудре Иакове, возлюбив же тишину и безмолвие, в пустыни вселитися восхотел еси, да един Единому Богу работаеши, присно воспевая: Аллилуиа.

Икос 2

Разум недоразуменный имамы, како восхвалити по достоянию подвиги и труды твоя, преподобне отче Иакове; сего ради молим тя, моли, угодниче Христов, подати нам свыше разум, да возможем по долгу воспети богоугодное житие твое; благоговейне совершающе святую память твою, вопием ти сице:
радуйся, яко блага земная еще юн сый, презрел еси.
Радуйся, яко вся имения твоя, от родителей оставшаяся, нищим раздал еси;
радуйся, яко ни к чемуже от сущих в мире сердцем твоим прилепился еси.
Радуйся, яко Духом Святым от сует земных воззван был еси, во еже работати Господеви;
радуйся, яко в воинство слуг Христовых вписатися
преискренне восхотел еси.
Радуйся, яко куплями житейскими не обязался еси, да
Небесному Воеводе угоден будеши;
радуйся, яко иноческое житие зело возлюбил еси.
Радуйся, яко богомудраго наставника на путь спасения
взыскал еси;
радуйся, яко преподобному и богоносному Сергию
всеусердно в послушание себе предал еси.
Радуйся, яко к богособранному стаду духовных чад его причтен был еси;
радуйся, яко благий ярем иноческаго жития от преподобных рук его с радостию восприял еси.
Радуйся, яко труды, скорби и тесноты иноческаго жития ради Господа Иисуса понесл еси до конца.
РАДУЙСЯ, ИАКОВЕ, БОГОМУДРЕ ОТЧЕ НАШ.

Кондак 3

Сила Божественныя любве, еюже измлада исполнено бысть сердце твое, толико укрепи тя в подвизех, яко возложь руку твою на рало, никакоже вспять обратился еси, радостно воспевая Богу: Аллилуиа.

Икос 3

Зряще равноангельное твое житие, како кто возможет поведати глубину твоего смирения, высоту самоотречения и широту твоея любве, яже к Богу; по силе же нашей, хвалебными песньми ублажающе, зовем ти:
радуйся, мужу желаний Господних.
Радуйся, Царства Небеснаго искренний искателю;
радуйся, столпе благочестия непоколебимый.
Радуйся, верный исполнителю Уставов Святыя Церкве;
радуйся, многосуетнаго мира любве ради Божия отрекийся.
Радуйся, благое иго Христово на себе восприявый;
радуйся, вечное спасение души твоея паче всего взыскавый.
Радуйся, в богомыслии и памятовании смерти всю жизнь препроводивый;
радуйся, горняя мудрствовати, а не земная, от ранняго
возраста научивыйся.
Радуйся, водительству Небесныя Мудрости всего себе
вручивый;
радуйся, всякое плотское мудрование далече от себе
отринувый.
Радуйся, не имевый зде пребывающаго града, но
грядущаго взыскавый.
РАДУЙСЯ, ИАКОВЕ, БОГОМУДРЕ ОТЧЕ НАШ.

Кондак 4

Бурею уныния и туги сердечныя, яже воздвиже на тя ненавидяй всякаго добра диавол, никакоже сокрушити возможе крепкаго твоего произволения, еже работати Господеви, ни воспретити от благаго твоего начинания; надеждею бо на помощь укрепився, Спасающему тя от малодушия и от бури, взывал еси Богу: Аллилуиа.

Икос 4

Слышав во Евангелии глас Господа, глаголющий: иже хощет по мне ити, да отвержется себе, и возмет крест свой и по мне грядет, ни единоже исполнил еси плотских похотений твоих, но всеусердно взем на рамена своя крест свой, последовал еси во всем Господу Иисусу Христу; сего ради достойно есть величати тя сице:
радуйся, яко в законе Господни день и нощь поучался еси.
Радуйся, яко заповеди Божии поставил еси аки светильник ногама твоима, и свет стезем твоим;
радуйся, яко оправдания Господня безпорочна сохранил еси.
Радуйся, яко Пресвятей Троице всеусердно послужил еси;
радуйся, яко любовию твоею к Богу Отцу
приближался еси.
Радуйся, яко послушанием твоим Богу Сыну
последовал еси;
радуйся, яко чистотою твоею Богу Духу Святому
во обитель себе уготовал еси.
Радуйся, яко утвердил еси мышцы твоя на труды
иноческаго послушания;
радуйся, яко связал еси руце твоя для всякаго
дела, Богу неугоднаго.
Радуйся, яко нозе твои скоры соделал еси к течению на всякия добродетели;
радуйся, яко стопы твоя уклонил еси от шествия по пути грешных.
Радуйся, яко уста твоя отверзал еси точию на славословие Божие и молитву.
РАДУЙСЯ, ИАКОВЕ, БОГОМУДРЕ ОТЧЕ НАШ.

Кондак 5

Боготечная звезда явился еси, преподобне Иакове, руководящая многих ко спасительному пути; постом бо, молитвами, и всенощными бдении очистив душу твою, возшел еси на высоту добродетелей, воспевая Богу: Аллилуиа.

Икос 5

Видев, смиренномудре отче Иакове, многих во обители преподобнаго Сергия безмолвию прилежащих, потщался еси подражатель сих быти, и устом твоим положил еси хранение, в молчании выну пребывая; удивляющеся убо таковому подвигу твоему, ублажаем тя сице:
радуйся, житию богоноснаго наставника твоего
Сергия поревновавый.
Радуйся, в посте и воздержании древних великих
отцев подражавый;
радуйся, в бдениих неутомима себе явивый.
Радуйся, дни и нощи в молитвах препроводивый;
радуйся, всякий вид добродетелей исправити вожделевый.
Радуйся, образ нестяжания всем бывый;
радуйся, вольную нищету возлюбивый.
Радуйся, тою богатство вечное стяжавый;
радуйся, чистоту душевную, вкупе и телесную сохранивый.
Радуйся, подвиг молчания с любовию понесый;
радуйся, незлобием и братолюбием душу твою украсивый.
Радуйся, всякое телесное озлобление с радостию
претерпевый.
РАДУЙСЯ, ИАКОВЕ, БОГОМУДРЕ ОТЧЕ НАШ.

Кондак 6

Проповедник немолчный истиннаго смирения всем был еси, блаженне Иакове, и с сокрушенным сердцем непрестанно взывал еси Богу: Аллилуиа.

Икос 6

Возсиял еси, яко звезда пресветлая посреде богособраннаго сонма иноков во обители великаго во отцех Сергия, светолепным житием твоим, Преподобне Иакове; труды бо к трудам прилагал еси, нощи провождая во бдениих и коленопреклонениих, на правило же церковное и на всякое обительное послушание первый являяся. Воспоминающе сия, любовию вопием ти сице:
радуйся, яко на камени Православныя веры себе
утвердил еси.
Радуйся, яко страх Божий в сердце твоем от юности
насадил еси;
радуйся, яко любовию крепко, аки смерть, ко Христу Богу прилепился еси.
Радуйся, яко надежду во всем на Единаго Бога
возложил еси;
радуйся, яко гордость житейскую далече от себе
отринул еси.
Радуйся, яко воздержанием страсти плотския умертвил еси;
радуйся, яко от мира дольняго в Горний мир ум и сердце твое вперил еси.
Радуйся, яко вместо тленных благ нетленная и вечная
возлюбил еси;
радуйся, яко всяку Евангельскую добродетель на сердце
твоем изобразил еси.
Радуйся, яко всеми благими делы Господеви всеусердно
послужил еси;
радуйся, яко в нощи бдел еси, пребывая в молитвах
и молениих к Богу.
Радуйся, яко во плоти сый, безплотных житию
поревновал еси.
РАДУЙСЯ, ИАКОВЕ, БОГОМУДРЕ ОТЧЕ НАШ.

Кондак 7

Хотя преискренне к вящим подвигом устремитися, умолил еси богомудраго наставника твоего Сергия отпустити тя в пустыню на одинокое пребывание. Благословение убо прием, и молитву многу сотворив Живоначальней Троице, отшел, преподобне Иакове, в путь свой, Господу Богу со умилением взывая: Аллилуиа.

Икос 7

Велия радости исполнися сердце твое, достоблаженне Иакове, егда пришед в Железный Борок рекомый, обрел еси место, идеже сподобился еси видети пресветлое сияние; отонудуже уразумев, яко благоугодно есть место сие Господеви, и Крест ту водрузив, малую келлию устроил еси; послежде и обитель твоими молитвами, поты же и труды, возградися, на спасение приходящих с тобою. Мы убо, духовная чада твоя, святую память твою совершающе, сия тебе любовию восписуем:
радуйся, удалитися в пустыню совершеннаго ради безмолвия вожделевый.
Радуйся, в сокровеннем от человек месте работати
Господеви изволивый;
радуйся, яко пустыннолюбивая горлица уединеннаго
обиталища взыскавый.
Радуйся, градов и населенных весей удаливыйся;
радуйся, славу и похвалу от человек возненавидевый.
Радуйся, в пределех отеческаго града Костромы вселитися восхотевый;
радуйся, весь Железноборовскую своим пришествием
просветивый.
Радуйся, сподобивыйся тамо Божественнаго видения;
радуйся, помощию Божиею, твоими молитвами и труды
обитель устроивый.
Радуйся, лик иноков в ней собравый;
радуйся, пречестный храм во имя Великаго во пророцех
Крестителя Иоанна соорудивый.
Радуйся, добрый пастырю и благий наставниче
ищущим спасения.
РАДУЙСЯ, ИАКОВЕ, БОГОМУДРЕ ОТЧЕ НАШ.

Кондак 8

Странен был еси всякаго мирскаго пристрастия, приснопамятне отче наш Иакове; память бо смертную во уме и сердце непрестанно имел еси, и душевныма очима Господа Славы, на Престоле Седящаго, выну созерцал еси, воспевая Ему: Аллилуиа.

Икос 8

Вся дни и нощи в трудех препроводил еси, Преподобне отче наш Иакове, образ был еси терпения и кротости; сего ради достоин явился еси почести вышняго звания, и наследовал еси Царствие Небесное, идеже водворяяся, поминай нас, похвальная вопиющих ти:
радуйся, яко бодренно и неусыпно стоял еси на страже души твоея.
Радуйся, яко положил еси хранение устом твоим, еже не
глаголати тщеты, и всякия неправды;
радуйся, яко заградил еси ушеса твоя от празднословия душевреднаго.
Радуйся, яко слух твой изощрил еси точию на слышание
песнопений Божественных;
радуйся, яко и в глубоцей старости обычных ти подвигов не оставил еси.
Радуйся, яко в ископании водных хранилищь сам, паче иных потрудился еси;
радуйся, яко братии твоей образ трудолюбия был еси.
Радуйся, яко мудрыми словесы, паче же благим житием
твоим, на путь спасения наставил еси;
радуйся, яко и безмолвием твоим паче слова многих
поучил еси.
Радуйся, яко многая чудеса, еще жив сый, сотворил еси;
радуйся, яко множество гладных людей во обители твоей пропитал еси.
Радуйся, яко николиже оскудети ей обещал еси.
РАДУЙСЯ, ИАКОВЕ, БОГОМУДРЕ ОТЧЕ НАШ.

Кондак 9

Всякия собрал еси в души твоей плоды духовнаго делания, и сих ради честное обиталище Пресвятаго Духа был еси, во смирении сердца присно воспевая: Аллилуиа.

Икос 9

Витийствующий язык не может изрещи, коликия напасти и искушения претерпел еси, Богоблаженне Иакове, непрестанную имый брань противу тьмы предстателя; обаче помощию Божиею, твоим же смирением и умиленными ко Господу молитвами до конца того низложил еси. Темже тя величаем сими:
радуйся, противу князя тьмы мужественно
ратоборствовавый.
Радуйся, мудростию твоего рассуждения лестныя помыслы, от врага наносимыя, изобличивый;
радуйся, бесовския страхования аки призрак вменивый.
Радуйся, силою Крестною полчища демонская далече от себе прогнавый;
радуйся, твоими молитвами, аки мечем, всю силу вражию поразивый.
Радуйся, будущая предведети благодать приемый;
радуйся, прозираяй будущая, аки настоящая.
Радуйся, благоверному князю Василию о рождении сына
прорекий;
радуйся, благоверней княгине Софии скорое и легкое от бремене разрешение у Господа испросивый.
Радуйся, источниче благодатных утешений князем и всем, с верою притекающим к тебе;
радуйся, сподобивыйся сана игуменскаго чрез блаженнаго Святителя Иону.
Радуйся, яко последовал еси того учению и житию.
РАДУЙСЯ, ИАКОВЕ, БОГОМУДРЕ ОТЧЕ НАШ.

Кондак 10

Спасти хотя душу твою, присноблаженне Иакове, всего себе Господу Богу предал еси, сущу ти зде, на земли, и в райских селениих со всеми святыми воспеваеши Ему: Аллилуиа.

Икос 10

Стена еси незыблема, и град убежища необоримый всем, с верою притекающим к заступлению твоему, и во всех нуждах в помощь тя призывающим. Сего ради тебе, Преподобне отче наш Иакове, яко присному к Богу молитвеннику вопием:
радуйся, яко о всех просящих у тебе помощи и
заступления ходатайствуеши пред Богом.
Радуйся, яко вся полезная и ко спасению потребная у
Господа просиши;
радуйся, яко немощным и недужным подаеши исцеления.
Радуйся, яко нечистыя духи от страждущих человек отгоняеши;
радуйся, яко от всех бед и напастей нас избавляеши.
Радуйся, яко скорбящим и унывающим утешение подаеши;
радуйся, яко вдовицам и сирым покровитель являешися.
Радуйся, яко обидимых и невинно гонимых защищаеши;
радуйся, яко обитель твою своими молитвами
ограждаеши и сохраняеши.
Радуйся, яко духовная чада своя присно посещаеши;
радуйся, яко и окрестныя веси твоим предстательством от находящих зол невредимы сохраняются.
Радуйся, твоим бо ходатайством от губительных
болезней избавляются.
РАДУЙСЯ, ИАКОВЕ, БОГОМУДРЕ ОТЧЕ НАШ.

Кондак 11

Светозарный светильник явился еси, Преподобне Иакове, не точию в Костромских пределех, но и всей Российстей земли; лучи бо чудес от цельбоноснаго образа твоего истекающии, достигают и дольних пределов. Темже прославляюще Прославльшаго тя Господа Бога, воспеваем Ему: Аллилуиа.

Икос 11

Предстоя Престолу Царя Славы вкупе с лики Ангельскими и всеми святыми, не презри присно, отче, моления нашего, и не забуди нас, вопющих ти сицевая:
радуйся, в теплейшей к Богу любве земное поприще твое скончавый.
Радуйся, в час кончины твоея Пресвятаго Тела и
Пречестныя Крове приобщивыйся;
радуйся, в мире дух твой в руце Бога Отца предавый.
Радуйся, от земныя юдоли в Небесное Царствие
преселивыйся;
радуйся, с лики Ангельскими на Небеси торжествуяй.
Радуйся, сонму Преподобных отец и постников
сопричтенный;
радуйся, со всеми святыми неизреченнаго веселия
наслаждаяйся.
Радуйся, от Ангелов с торжеством в радость Господа
твоего введенный;
радуйся, венец Царствия от Христа, Царя Славы,
по достоянию подвигов твоих приемый.
Радуйся, яко царствуеши на Небеси со Христом,
Емуже сраспинался еси на земли;
радуйся, ублажаемый на земли.
Радуйся, прославляемый на Небеси.
РАДУЙСЯ, ИАКОВЕ, БОГОМУДРЕ ОТЧЕ НАШ.

Кондак 12

Благодать Божия и доныне изливается от целебнаго образа твоего на всех, с верою и любовию приступающих к нему, и молитвенно в скорбех, в болезнех же и злых обстояниих тя призывающих, Богу же вопиющих: Аллилуиа.

Икос 12

Поем твоя подвиги, ублажаем равноангельное житие твое, почитаем память твою, дивный угодниче Христов Иакове; от избытка сердца вопием ти сице:
радуйся, постников похвало и утверждение.
Радуйся, монашествующих добрый пастырю и наставниче;
радуйся, Костромских пределов украшение.
Радуйся, теплый и присный о нас ко Христу Богу
молитвенниче;
радуйся, сея страны светильниче пресветлый.
Радуйся, Божия благодати нам ходатаю;
радуйся, немощных врачу и недужных целителю.
Радуйся, телес наших здравия хранителю;
радуйся, душ наших на стезех спасения руководителю.
Радуйся, всем православным христианом во всех
нуждах помощниче.
РАДУЙСЯ, ИАКОВЕ, БОГОМУДРЕ ОТЧЕ НАШ.

Кондак 13

О, Преблаженне и Богомудре отче наш Иакове, нынешнее наше приемши приношение, умоли Господа Бога, о еже избавитися нам от всякия скорби, бед и напастей, и смертоносных болезней, паче же вечных мук; Царствие же небесное со всеми святыми наследовати, да сподобимся выну с тобою воспевати: Аллилуиа.

Этот Кондак читается трижды. Затем Икос 1: «Ангел земный...», и Кондак 1: «Избранный чудотворче...».

Молитва преподобному Иакову Железноборовскому

О, Преподобне и Богомудре отче наш Иакове! Вемы, яко с лики Ангельскими и всеми святыми предстоиши присно Престолу Господа Вседержителя, и велие имаши к Нему дерзновение молитися о всех, с верою и умиленными слезами в помощь тя призывающих. Не премолчи убо, вопия за ны, недостойныя, ко Господу Богу, да отвратит гнев свой, праведно за беззакония наша на ны движимый, и да избавимся всяких скорбей, бед же и напастей, и злых обстояний, и благочестно поживем в будущем веце, ходяще в заповедех и оправданиих Господних непорочно. О, Преблаженне и Боголюбезне отче наш Иакове! Умоли Господа, да не оскудеют во обители твоей истинные ревнители иноческаго жития и подражатели святому и богоугодному житию твоему- сохрани предстательством твоим к Богу обитель и страну сию от огня, глада, меча, нашествия иноплеменных и от всякаго зла, и всем, с верою и любовию притекающим во твою обитель испроси у Господа Бога грехов прощение, телесем здравие, исправление греховнаго жития и вечное спасение- да с тобою и всеми святыми сподобимся прославляти в Троице Славимаго Бога, Отца, и Сына и Святаго Духа, во веки веков. Аминь.

Молитва иная преподобному Иакову Железноборовскому

Преподобне и богоносне отче наш Иакове! Приими ныне нас тебе усердно молящихся и припадающих ко всечестному и многоцелебному твоему гробу, идеже святое твое и многотрудное покоится тело, духом же на небесех предстоя Святей Троице со ангелы и преподобных отец лики- молися о чадех твоих, отче, да избавимся от всяких скорбей, болезней и обстояний, и благочестно поживем в настоящем житии, ходяще в заповедех и оправданиих Господних безпорочно, и да явимся последователи святому и равноангельному житию твоему. Ей, Преподобне отче, молим тя, испроси нам же и всем, верою к тебе притекающим грехов прощение, телесем здравие, исправление жития и вечное спасение. Яко да твоим предстательством спасеннии, славу возсылати сподобимся в Троице славимому Богу, Отцу и Сыну и Святому Духу, ныне и присно и во веки веков. Аминь.

Кондак 1

Возбранный святителю, учителю премудрый, равноапостольный Стефане, всем верою к тебе прибегающим источаяй многоцелебныя дары, похвальная восписуем ти любовию творящии память твою; ты же, имеяй дерзновение ко Господу, от всяких нас бед свободи, зовущих: Радуйся, Стефане, великий чудотворче.

Икос 1

Ангельское твое во плоти житие провидев всея твари Создатель, от юности твоея уготова тя в сосуд честен, темже научи вопити тебе сице: Радуйся, трехлетней сущей матери твоей, блаженным Прокопием святитель возвещенный; Радуйся, прежде рождения твоего великим прореченный. Радуйся, рождением своим родителей удививый; Радуйся, благочестивых родителей богоприятное испрошение. Радуйся, от благочестиваго корене отрасль святейшая; Радуйся, в научении книжнем паче сверстник просвещенный. Радуйся, в юности разум совершенный явивый; Радуйся, измлада Христа возлюбивший. Радуйся, ярем Его носивый; Радуйся, мир и благая его презревый. Радуйся, плоть свою духови покоривый; Радуйся, изрядное благодати жилище. Радуйся, Стефане, великий чудотворче.

Кондак 2

Видя тщету мирских попечений, блаженне Стефане, отшел еси от дому родителей твоих, водворяяся с работающими Богу во иночестем житии; тем же жизнь твою не мирови, но Богу посвятил еси, благоприятно Ему вопия: Аллилуиа.

Икос 2

Разум, плотскому человеку неуразуменный, от юности твоея стяжав, богомудре Стефане, удивил еси талантами любомудрия души твоея. Темже взываем ти сице: Радуйся, образе кротости духовныя; Радуйся, вместо временных благих вечная стяжавый. Радуйся, чистоты усердный хранителю; Радуйся, терпения богомудрый учителю. Радуйся, братолюбия зерцало; Радуйся, постников первостоятелю. Радуйся, молитвами твоими дивная сотворивый; Радуйся, иноком правило благочестия. Радуйся, святителей собеседниче; Радуйся, терпением видимых и невидимых врагов победивый. Радуйся, веры поборниче; Радуйся, апостолов подражателю. Радуйся, Стефане, великий чудотворче.

Кондак 3

Сила Вышняго, в душеспасительных подвизех чудно укрепившая тя, угодниче Христов Стефане, показа пермяном перваго проповедника Евангелия, потом перваго епископа и молитвенника, да вси, просвещаеми светом добродетелей твоих, дивному во святых Своих Богу взываем: Аллилуиа.

Икос 3

Имея данную ти от Бога благодать недуги отгоняти, был еси пастырь добрый, по горам нечестия заблуждающих обретаяй и на путь истинный направляяй. Сего ради, молитвами твоими врачуеми, взываем ти: Радуйся, богомерзкаго идолослужения искоренителю; Радуйся, ересей истребителю. Радуйся, правоверия насадителю; Радуйся, заблуждающих наставниче. Радуйся, миролюбцев обличителю; Радуйся, сластолюбцев наказателю. Радуйся, враждебных примирителю; Радуйся, малодушных утешителю. Радуйся, злобы и зависти исторгателю; Радуйся, к воздержанию путеводителю. Радуйся, к трезвенному житию наставниче; Радуйся, во унынии закосневающих исправителю. Радуйся, Стефане, великий чудотворче.

Кондак 4

Бурю злых помыслов прилежно от себе постом и молитвами отражая, явился еси храм Духа Святаго, о Немже непрестанно от юности твоея во всяком благочестии и чистоте пребывая, обвыкл еси воспевати Богу: Аллилуиа.

Икос 4

Слышав архиерей Ростовский Арсений целомудренное житие твое и тщание во славословии и воспевании дивных дел Божиих, действующу и наставляющу Святому Духу, призва тя и клир и града Устюга в соборнем храме проглагола тя чтецем; потом во иночестем житии паче иных потрудившася Коломенский архиерей Герасим, приосенением тогожде Святаго Духа, постави тя диакона и пресвитера, и в сем священнем достоинстве действием Божественныя благодати показался еси мирови добрый наставник монахов и мирских, да славяще Бога, в Троице покланяемаго, взываем и тебе: Радуйся, мудрости небесныя жилище; Радуйся, радости истинныя причастниче. Радуйся, миром небесным приосененный; Радуйся, долготерпения искус стяжавый. Радуйся, веры христианския правило; Радуйся, благости Божественныя струя. Радуйся, кротости духовныя доблий хранителю; Радуйся, воздержания учителю. Радуйся, соль мира; Радуйся, светильниче всесветлый. Радуйся, на свещнице нетления всем светити поставленный; Радуйся, граде, верху горы стояй. Радуйся, Стефане, великий чудотворче.

Кондак 5

Боготечная звезда северо-восточная явился еси, егда просвещения ради светом богопознания в идольския земли текл еси, да вси, познавше Творца вселенныя, с нами единеми усты и единем сердцем Ему вопиют: Аллилуиа.

Икос 5

Видев доброту души твоея, многими даровании свидетельствуему, архиерей Герасим, по твоему желанию снабдив для крещения людей и освящения церквей потребными с радостию отпусти тя в Великую Пермь. Мы же апостольство твое чествуем приветствии сими: Радуйся, апостолов единоревнителю; Радуйся, мудрости сосуде. Радуйся, разумное светило; Радуйся, таин Божиих вещателю. Радуйся, кротости Евангельския образе, Радуйся, боговедения рачителю. Радуйся, благочестия столпе; Радуйся, страха Божия приятелище. Радуйся, духовная труба Евангелия; Радуйся, органе псалмопения и славословия. Радуйся, премудрый наставниче; Радуйся, ко блаженству вечному путеводителю. Радуйся, Стефане, великий чудотворче.

Кондак 6

Проповедник боговедения неленостен был еси в неведущей Бога земли, и благим своим житием любовь и благоверие к вещанием твоим приобрел еси толикое, яко и невернии, чтуще добрая дела твоя, научишася тобою взывати Богу: Аллилуиа.

Икос 6

Возсия христианское благочестие в земли, растленней идолослужением, егда начал еси Божественное семя в безбожных сеяти, и утверждая их в вере истинней примером своим, всего себе посвятил еси Богу; мы же похвальная восписуем ти: Радуйся, волю, ищущую нетления, стяжавый; Радуйся, главу горния мудрости исполнивый. Радуйся, земная мудрования презревый; Радуйся, очи от мирския прелести отвративый. Радуйся, уста на хваление Господа употребивый; Радуйся, язык к божественней проповеди устроивый. Радуйся, руце прострый на молитву и подаяние милостыни; Радуйся, теми же множество книг душеспасительных написавый. Радуйся, сердце твое постом и молитвою в жилище Духа Святаго уготовавый; Радуйся, нозе ко бдению и благовествованию мира направивый. Радуйся, все твое тело воздержанием удручивый; Радуйся, непрестанным богомыслием душу и тело освятивый. Радуйся, Стефане, великий чудотворче.

Кондак 7

Хотя тайну вечнаго спасения пермяном поведати, потщался еси первее навыкнути несведомому их словеси и близкий к ним быти беседник; таже составив письмена и ими к назиданию их и службе Божественней потребная изобразив многая писания, даровал еси пособне пети: Аллилуиа.

Икос 7

Новое и спасительное слышавше учение пермстии людие, овии ругахуся, овии же крещения просяху, и чудящеся дивному житию твоему, с учением, из уст исходящим, согласному, прославиша Бога; ты же потщался ее крещением просвещати люди и к славословии Божию освящати храмы. Сего ради воспеваем тебе: Радуйся, пастырю добрый; Радуйся, Христов новый исповедниче. Радуйся, учителю премудрый; Радуйся, апостольство твое свято совершивый. Радуйся, идольскую лесть упразднивый; Радуйся, луче света Евангельскаго. Радуйся, тьмы заблуждения истребителю; Радуйся, неверных учением своим удививый. Радуйся, кротостию своею гордость мирскую поправый; Радуйся, овцы Христовы во едино стадо совокупивый. Радуйся, духовную паству твоими к Богу благоприятными молитвами оградивый; Радуйся, всем призывающим тя скорый помощниче. Радуйся, Стефане, великий чудотворче.

Кондак 8

Странное чудо показал еси, богомудре Стефане, предав огню скверную идольскую божницу, егда с разными орудии обступиша тя бесовстии чтителе, убити тя хотяще; ты же, моляся о обращении заблуждающих, молчаливою кротостию сих победил еси, воспевая Богу: Аллилуиа.

Икос 8

Весь, Стефане пречудне, телом и душею посвятился еси Богу, пребывая в непрестанных трудех Божественнаго богословия и презирая угрожения нечестивых, претящих ти проповедати славу Божию. Сего ради вопием ти: Радуйся, земный Ангеле; Радуйся, небесный человече. Радуйся, вития непобедимый; Радуйся, воине Христов неустрашимый. Радуйся, христианскаго благочестия истинный ревнителю; Радуйся, врагов Церкве Христовы обличителю. Радуйся, нечестивых витий посрамителю; Радуйся, столпе, от нощи неведения к Солнцу Правды приводяй. Радуйся, уста божественная, миру спасение возвещающая; Радуйся, гласе небесныя истины, буих умудряяй. Радуйся, неверных светом Евангелия Христова просветивый; Радуйся, подобно теплоте солнечней, оляденевшая сердца их согреявый и тем плод мног Церкви Божией принесый. Радуйся, Стефане, великий чудотворче.

Кондак 9

Все естество ангельское возвеселися о твоем благочестии и чистоте, о твоем мужестве, терпении, бдении в молитвах, пощении и по Бозе ревности; во онех бо претерпевая, яко безплотен явился еси. Мы же прославляющемуся чрез тебе Богу взываем: Аллилуиа.

Икос 9

Ветии многовещаннии безбожных, чары творящии, онемеша, сила бо крестная превозмогаше всем их волхвованием. Мы же, видевше на видимых и невидимых врагов победительная, усердно вопием ти: Радуйся, несумненною верою дивная сотворивый; Радуйся, живым на Бога Живаго упованием чтителей бесовских посрамивый. Радуйся, за любовь к Богу и ближнему душу твою положивый; Радуйся, крепости божественный приятелище. Радуйся, органе, возвещаяй славу Божию; Радуйся, громе, устрашаяй соблажняющия. Радуйся, идольския лести истребителю; Радуйся, диавольских козней обличителю. Радуйся, гордости его сокрушителю; Радуйся, плоды трудов твоих во сто уплодоносивый. Радуйся, неверных умудривый твоими нравы; Радуйся, погибающих руководствуяй ко приятию вечныя славы. Радуйся, Стефане, великий чудотворче.

Кондак 10

Спасти хотя Пермскую землю, всемерно потщался еси просветити ю святым Крещением; потом своима рукама идолов раздробляя и сокрушая богомерзкая капища, на развалинах их церкви христианския, монастыри и училища довольная воздвигл и научил еси Единому Триипостасному Богу пети: Аллилуиа.

Икос 10

Стена и укрепление в нечестии пермяном, пансотник волхв с велиею дерзостию в сонмищи глагол безумный утверди: кто пройдет в зимнее время невредим водою и кто огня не устрашится, того вера есть истинная и жертвоприношение Творцу неба и земли есть приятное. Ты же, смиренномудрия вещая глаголы, ко Всевышнему о помощи взывал еси, и верою, вся возмощи о имени Его, стяжав упование, повлекл еси суемудраго волхва в пламень огненный. Он же, силою Божиею устрашенный, исповеда пред всеми свое безсилие и малодушных обольщение. И тако всея Пермския страны в веру истинную сверится обращение. Сего ради блажим тя, премудре Стефане, сими: Радуйся, щите Православия; Радуйся, смиренномудрия зерцало. Радуйся, великаго упования образе; Радуйся, ковчеже чудес, Богом устроенный. Радуйся, злочестиваго волхва славно препревый и из земли тоя изгнавый; Радуйся, последователи его на путь истинный обративый. Радуйся, князя мира сего посрамивый; Радуйся, жертвоприношения идольская упразднивый. Радуйся, труды пермян от лова зверей им в пользу сотворивый; Радуйся, благая их, вместо душевреднаго пред идолы сожжения, в потребу им и на службу человеком показавый, и тако страну их умудривый. Радуйся, пределы российския проповедию слова Божия разширивый; Радуйся, не токмо временная, но и вечная благая пермяном открывый. Радуйся, Стефане, великий чудотворче.

Кондак 11

Пение молебное приносим ти, святителю Стефане, егоже, на возвратном из Перми пути молящася Святей Троице и благословляюща обитель, преподобный Сергий Радонежский умныма очима за несколько поприщ провидев, благодарным со братиею на трапезе почтил есть поклонением. Мы же, всегдашняго тя о душах наших стяжавше молитвенника и щедроты твоя изчести не могуще, благодарными сердцем и усты Богу, тобою действующему всем исцеления, взываем: Аллилуиа.

Икос 11

Светоподательный светильник сущим во тьме идолослужения, отче Стефане, явился еси, и до конца паству твою бодренно упасл еси, ограждая новопросвещенныя люди своими к Богу молитвами и поставляя из них самих пастырей и учителей Перми; посем, скончавая течение твое, о немже пророчески предсказал еси, мощи твоя многоцелебныя царствующему граду Москве в залог молитв твоих и теплаго ходатайства даровал еси, духом же со ангельскими чинми ликуеши. Сего ради восхваляюще тя, глаголем: Радуйся, духом везде верныя посещаяй; Радуйся, от адския погибели изымаяй. Радуйся, от сетей льстиваго избавляяй; Радуйся, вместо временных вечная блага нам подаваяй. Радуйся, врачу, раны греховныя исцеляяй; Радуйся, вместо смерти живота вечнаго ходатаю. Радуйся, недужных целителю; Радуйся, особенный России хранителю. Радуйся, всем прибегающим к тебе крепкое забрало; Радуйся, царствующаго града украшение. Радуйся, светило всероссийское; Радуйся, Ангелов собеседниче. Радуйся, Стефане, великий чудотворче.

Кондак 12

Благодать цельбы стяжавшаго, великаго во святителех Стефана почтим сердцем и усты; и да вящшее благим его подвигом воздадим чествование, потщимся всемерно подражати его добродетелем, да благоприятно Богу вопием: Аллилуиа.

Икос 12

Поюще твое, Стефане святителю, о призывающих тя в помощь теплое предстательство и от врагов видимых и невидимых скорое заступление, хвалим тя вси, равноапостольный богопроповедниче, и веруем, яко Господь и Бог, проповеданный тобою в Перми и прославляемый в телеси твоем, молитвами твоими вся нам дарствует. Темже вопием ти: Радуйся, нищетою духовною Царство Небесное получивый; Радуйся, покаяния и умиления слезами утешение вечное приявый. Радуйся, кротостию земли новыя наследие приявый; Радуйся, алкая и жаждая правды, ныне насыщаяйся. Радуйся, милостынями обретый помилование; Радуйся, чистотою сердца сподобивыйся зрети Бога. Радуйся, миротвореньми Богу усыновивыйся; Радуйся, терпением правды ради Царство Небесное стяжавый. Радуйся, поношеньми и претерпением всех зол Христа ради ублаживыйся; Радуйся, твоим примером нам путь ко спасению открывый. Радуйся, молитвами твоими труды и подвиги облегчаяй; Радуйся, предстательством твоим у Христа Бога вечное спасение нам подаваяй. Радуйся, Стефане, великий чудотворче.

Кондак 13

О великий святителю, равноапостольный Стефане, малое сие моление наше приемь, умоли Подвигоположника и Совершителя Иисуса, да избавит царствующий град и всякий град и страну христианскую от нахождения иноплеменных, от ересей и расколов и от всякия напасти, и да измет грядущия муки всех, Ему вопиющих: Аллилуиа.

(Этот кондак читается трижды, затем икос 1 и кондак 1)

Молитва первая

О Богоосвященный и равноапостольный Стефане, новый боговедения проповедниче и просветителю Крещением святым великопермских во идолопоклонстве живущих людей, ко истинному Евангельскому свету путеводителю, пастырю добрый и учителю премудрый, Духа Святаго сосуде избранный, Христоподражательный в небесный Сион наставниче и руководителю, образ благонравия всем благочестно жити желающим, благоискусный мысленнаго корабля, чрез море мира сего к небесному пристанищу плавающаго, правителю, дивный во иерарсех, увенчанный Божественною благодатию, всероссийский светильниче, великий чудотворче и молитвенниче теплый! К тебе во умилении души и сокрушении сердца моего, аз окаянный и грешный (имярек) благонадежно притекаю и пред чудотворным твоим гробом, в немже святыя мощи твоя почивают, вопию, прося смиренно помощи твоея и теплаго ко Преблагому Богу ходатайства, да твоими богоприятными молитвами испросиши ми от Него человеколюбную милость, оставление многих моих согрешений, души и телеси здравие со спасением; и, яко Благ и Человеколюбец, да благоволит безбедно в мире сем ходити ми до скончания живота моего, во время же разлучения моего от жизни сея дух мой в покаянии и мире Ангелом Своим святым милостивно прияти, и да даст ми мимо мрачных и злоковарных и лютых духов демонских на воздусе проити невозбранно и к Нему непостыдно предстати поклонитися, и безсмертныя и блаженныя жизни сподобитися со всеми святыми во веки. Аминь.

Молитва вторая

О равноапостольный святителю Христов Стефане! К тебе мы, окаяннии, благонадежно притекаем и пред святым твоим образом вопием, просяще помощи твоея и к Богу ходатайства, да твоими молитвами испросиши нам, рабам Божиим (имена), от Него милость: оставление многих наших согрешений, душам и телесем здравие со спасением; да благоволит же Господь твоими молитвами безбедно в мире сем ходити нам до скончания жития нашего, во время же разлучения нашего от жизни сея дух наш ангелы Своими в покаянии и мире милостивно да приимет, яко да от мрачных и злоковарных и лютых духов демонских на воздусе прошедше невозбранно, к Нему непостыдно предстанем и поклонимся, и безсмертныя и блаженныя жизни сподобимся, со всеми святыми, во веки веков.

Акафист святому благоверному великому князю Димитрию Донскому в формате PDF

Акафист святому преподобному Ферапонту Белоезерскому, Можайскому и Лужецкому чудотворцу в формате PDF

Акафист святым преподобным Андронику и Савве в формате PDF

Кондак 1

Истиннаго богословия обретение, преподобне Андрее, познав Всесвятую Троицу во Единице, начертал еси изображения святая, чудесами прославленная, мир просвещающая. Имеяй дерзновение ко Пресвятей Троице, моли просветити и наша души, да зовем ти: Радуйся, преподобне отче Андрее, иконописче предивный.

Икос 1

Ангельскаго жития от юности твоея возжадал еси, преподобне: убо ко святей обители великаго Сергия притекл еси и в послушании авве земли русския, дондеже призва тя Господь в небесную обитель, живописа святии образы еси и ныне благодать даруяй всем припадающим к ним. Темже и мы благодарно вопием ти:
Радуйся, ангельскую чистоту возлюбивый;
Радуйся, во ангельстем образе послуживый;
Радуйся, в одежду послушания облаченный;
Радуйся, тезоименный храбрости, во иночестве Андреем нареченный.
Радуйся, смирения ради мирское имя сокрывый;
Радуйся, смирения образы на иконах явивый.
Радуйся, Безначальныя Троицы во Единице воспевателю;
Радуйся, Трисветлаго Бога служителю.
Радуйся, преподобне отче Андрее, иконописче предивный.

Кондак 2

Видя скорбь и разорение земли русския от нечестивых, Андрее славне, оставил еси надежду на князей и возложив ея на Единаго Человеколюбца, научаеши и нас с верою взывати Богу: Аллилуиа.

Икос 2

Разум богоозаренный, Андрее всехвальне, стяжав, в истощенней нашествии иноплеменными земли возскорбел еси оскудевшаго верою Отечествия ради и служителем Спасителя стал еси. Сего ради мы с любовию восклицаем ти:
Радуйся, скорби земли русския в свое сердце сложивый;
Радуйся, сосудом Божиим послуживый.
Радуйся, полона иноплеменнаго избежал еси;
Радуйся, от плена страстей сердце удержал еси.
Радуйся, в обители Святыя Троицы духом возраставый;
Радуйся, Триипостасное Божество воспевавый.
Радуйся, в любви Христове ныне пребываеши;
Радуйся, нас в вере, надежде и любви укрепляеши.
Радуйся, преподобне отче Андрее, иконописче предивный.

Кондак 3

Силою Всевышняго притекла благодать к воздвижению монастыря Нерукотвореннаго образа Спасова, волею Господа направился ты, преподобне, к сему месту святому и пел еси Богу песнь ангельскую: Аллилуиа.

Икос 3

Имея сердце, послушное Богу и авве Сергию, в обитель на Яузе реце ко святому Андронику направился еси, Андрее богомудре, ведал бо преподобный Сергий грядущее прославление тобою имени Божия во граде Москве. Мы же, дивяся Божию промышлению, воспеваем ти таковая:
Радуйся, благодатию Божиею в град Москву приведенный;
Радуйся, ко святому иконописательству определенный.
Радуйся, искуснаго живописца Даниила спостника обрел еси;
Радуйся, дар образописания растил еси.
Радуйся, Евангелия в красках воплотителю;
Радуйся, Нерукотвореннаго Спаса изобразителю.
Радуйся, яко иконы твоя свидетельство православныя веры явили;
Радуйся, яко чрез тебе явленныя образы вселенную просветили.
Радуйся, преподобне отче Андрее, иконописче предивный.

Кондак 4

Бурею житейскаго моря сокрушаемы есмы, созерцанием мира горняго на иконах твоих, Андрее пречудне, тихое пристанище обретаем. И светом дивным озарены есмы, поем Богу: Аллилуиа.

Икос 4

Слышав, создателю икон дивных, посвящение времени праздников Богу Единому, сии дни не писал еси образов, но святыя иконы созерцал еси. Темже ти рцем таковая:
Радуйся, во дни Господския и Богородичныя созерцанием икон к первообразам восходивый;
Радуйся, слезными мольбами у Господа подвига иконописательства испросивый.
Радуйся, яко Первому Творцу икон, создавшему ветхаго Адама уподоблен еси;
Радуйся, яко Искупителя Адамова падения в ликах воплотил еси.
Радуйся, иконотворчеством окна в Царство Божие открывый;
Радуйся, себе в икону Божию претворивый.
Радуйся, яко к невидиму свету ум возносиши;
Радуйся, от мира дольняго к миру горнему нас возводиши.
Радуйся, преподобне отче Андрее, иконописче предивный.

Кондак 5

Богородицу и Матерь Света достойнословля, со тщанием писал еси образы Ея, воздавая хвалу Единаго от Троицы Бога Слова Рождшей, и воспевая: Аллилуиа.

Икос 5

Видев нашествие грознаго врага, Андрее святый, молил еси со Церковию и всем народом о даровании избавы от полчищь вражиих. Радость же спасения Державною Помощницею града от супостата запечатлел еси в иконе Всемилостивыя Заступницы. Мы же, видя любовь твою ко Пречистой, умиленно поем:
Радуйся, любовь велию ко Всепетой Мати имеяй;
Радуйся, в печали и скорби Ей молитвенно предстояй.
Радуйся, защиты Отечествия ради ко Пресвятей Заступнице взывавый;
Радуйся, по изгнании сопостатных поган Приснодеву величавый.
Радуйся, на руку Своею Царя Славы несшую превозносиши;
Радуйся, рукама своима образ Присноцарствующей запечатлеваеши.
Радуйся, сретение с Богом в сердце хранивый;
Радуйся, Сретенскому монастырю образ Богоматери подаривый.
Радуйся, преподобне отче Андрее, иконописче предивный.

Кондак 6

Проповедник живописательный Царствия обетованнаго верным был еси, и благим своим житием и милостию Божиею обрел еси его. Помози, отче, достигнути райских блаженств и нам, дерзающим взывати Богу: Аллилуиа.

Икос 6

Возсиял дар богодухновенный в соборней Церкви Благовещения Пресвятыя Богородицы, егда пророчески созидал еси, Андрее богоизбранне, со Феофаном Гречином и старцем Прохором с Городка. Дивляся видению твоему, поем:
Радуйся, изрядный молитвенниче и постниче;
Радуйся, Андрее светлоподобниче.
Радуйся, подобно учеником Христовым Фаворским светом освященный;
Радуйся, Небеснаго Владыки служителю верный.
Радуйся, ангелов собеседниче;
Радуйся, равноангельнаго жития проповедниче.
Радуйся, со Феофаном и Прохором зерцало райскаго блажества нам даруеши;
Радуйся, к Царствию Небесному путь показуеши.
Радуйся, преподобне отче Андрее, иконописче предивный.

Кондак 7

Хотя обновити Успенский собор во граде Владимире, великий князь призва тя со спостником Даниилом. Вы же двоица блаженная, возводяще ум к Невещественному и Божественному Свету, вознесеста молитву: Аллилуиа.

Икос 7

Новыя и чудныя образы написали еста, Данииле и Андрее, во утихновение страждущим. Украсили еста Владимирский собор Успения Пресвятыя Богородицы шествием в рай праведных со святыми апостолы Петром и Павлом во главе и Второе пришествие Господа Иисуса Христа начертали еста. Мы же, дивляся провозвещению твоему, отче Андрее, глаголем:
Радуйся, собора Успения Пресвятыя Богородицы обновителю;
Радуйся, Не Оставляющия нас во Успении Своем дивный похвалителю.
Радуйся, скорбное и светлое шествие праведников в рай начертал еси;
Радуйся, ангелов огнь испускающих расписал еси.
Радуйся, Втораго пришествия Господа Всевышняго прославителю;
Радуйся, пространств и времен просветителю.
Радуйся, велию радость граду Владимиру доставляяй;
Радуйся, по окончании трудов в Москве пребываяй.
Радуйся, преподобне отче Андрее, иконописче предивный.

Кондак 8

Странником на земли бе еси Андрее светонаставниче, дара образописания ради в веси многажды призываемь. Но и пешешествуя, ум и сердце в стоянии пред Богом держал еси, непрестанно воспевая Ему: Аллилуиа.

Икос 8

Веси иныя преукрасив, старче Андрее, направил еси стопы твоя во Звениград, идеже во соборе Успения по благословению святаго Саввы игумена создал еси Деисус чудно велми. Сего ради тебе зовем:
Радуйся, по зову Божию стопы своя в путь направляеши;
Радуйся, ум и сердце к стоянию пред Богом принуждаеши.
Радуйся, собора Успенскаго дивный украсителю;
Радуйся, красоты совершенныя в образе Спасове явителю.
Радуйся, Священнаго Писания ревнителю усердный;
Радуйся, Учения Христова живописателю верный.
Радуйся, Святыя Руси прозябение;
Радуйся, града нашего заступление.
Радуйся, преподобне отче Андрее, иконописче предивный.

Кондак 9

Весь монастырь разорение от нечестиваго князя понесл есть, ты же, Андрее святе, ведая о упреждении братии обители Пресвятыя Троицы аввою Сергием в тонцем сне, возгласил еси: Аллилуиа.

Икос 9

Ветии многовещаннии како могут поведати скорбь и тесноту земли русския от нашествия князя татарскаго, грады жегущаго и грабящаго. Ты же, Андрее преподобне, призван был образописати в каменнем храме во имя Пресвятыя Троицы, воздвигнутем вместо сожженныя древяныя церкви. Молим тебе: укрепи верою сердца наша, страстьми пожженная, и запечатлей в них образ Пресвятыя Троицы. Милостив буди нам, поющим:
Радуйся, свидетелем спасения братии аввою Сергием ставый;
Радуйся, икону Господа Иисуса Христа-Спасителя написавый.
Радуйся, учиши бо и по разорении церкви не унывати;
Радуйся, помогаеши бо крепчайший храм воздвизати.
Радуйся, образы в обители обновляеши;
Радуйся, образ Божий в сердцах возставляти научаеши.
Радуйся, храма во имя Пресвятыя Троицы украсителю;
Радуйся, себе в храм Трисияннаго Божества претворителю.
Радуйся, преподобне отче Андрее, иконописче предивный.

Кондак 10

Спасти хотя землю русскую от розни мира сего и памятуя о ревнители Святыя и Живоначальныя Троицы преподобном отце нашем Сергии, уподобился отче Андрее Аврааму гостеприимцу, в образе триех странник у дуба Мамврийскаго Единаго Господа воспринимая, и написал еси икону Пресвятыя Троицы, непрестанно моляся: Аллилуиа.

Икос 10

Стеною необоримою буди всем православным христианом, Андрее славословимый, дерзновенно моля Пресвятую Троицу о нас, поющих тебе сице:
Радуйся, сподобился еси явление Триипостаснаго Бога у дуба Мамврийскаго написати;
Радуйся, помогаеши бо душам в Царство Небесное прорастати.
Радуйся, Церкви Российския чудный плоде;
Радуйся, иконописателю таинственнаго догмата Троицы.
Радуйся, преподобнаго Никона прилежный послушниче;
Радуйся, святаго Сергия Радонежскаго чудотворца достойная похвало.
Радуйся, тобою бо Единство в Троице Отца и Сына и Святаго Духа прославляется;
Радуйся, воззрением на чудотворныя иконы твоя рознь мира побеждается.
Радуйся, преподобне отче Андрее, иконописче предивный.

Кондак 11

Пение ангельское ублажа тебе, егда возвратився в Андроникову обитель, в небесныя обители преселитися готовился еси, вопия Богу: Аллилуиа.

Икос 11

Светоявлением во славе Даниилу спостнику, на одре смертнем лежащу призвал еси последовати себе, и сретил еси с любовию от мира сего отшедшаго. Чесо ради водворение тебе, преподобне Андрее, во Царствие Пресвятыя Троицы воспеваем:
Радуйся, земная странства завершивый;
Радуйся, друга из мира дольняго и в мире горнем любивый.
Радуйся, свидетельство истины Православия всему миру являеши;
Радуйся, и ныне истинно Бога в Троице прославляеши.
Радуйся, талант вверенных умножение;
Радуйся, Царствия Святыя Троицы достижение.
Радуйся, и по преставлении нас не оставляеши;
Радуйся, радость православным христианом доставляеши.
Радуйся, преподобне отче Андрее, иконописче предивный.

Кондак 12

Благодать храма во имя твое, иконописче Андрее, изливается окрест и зовет всех отвратився от тленнаго, обратити ум, сердце и дела к Богу, прославляя Его: Аллилуиа.

Икос 12

Поюще созидание храма твоего в Раменках, ублажаем тя, отче наш Андрее, яко молитвеннаго предстателя за ны Пресвятей Троице и возглашаем ти таковая:
Радуйся, нас яко овчу заблудшую на рамена взявый;
Радуйся, по прославлении местом храма своего Раменки избравый.
Радуйся, общину верных Пресвятей Троице созидая;
Радуйся, святым житием твоим к святости призывая.
Радуйся, дерзновением к познанию истины поучаеши;
Радуйся, Отца и Сына и Святаго Духа прославляеши.
Радуйся, един из воинства Христова;
Радуйся, пастырю наш предобрый.
Радуйся, преподобне отче Андрее, иконописче предивный.

Кондак 13

О дивный иконописче, преподобне и богоносне отче Андрее! Приими с любовию тебе приносимое малое сие хваление и моли Пресвятую Троицу: да укрепит веру православную, да избавит нас от розни и сподобит со избранными своими воспевати славимаго в Троице Бога: Аллилуиа.

Этот кондак читается трижды, затем 1-й икос: Ангельскаго жития: и 1-й кондак: Истиннаго богословия обретение:

Кондак 1

Возбранный чудотворче, угодниче Христов, преподобне отче наш Авраамие, благодарно исповедующе, яко всем притекающым к тебе с верою и творящым всечестную память твою подаваеши от Всещедраго Бога великия и богатыя милости, восхваляем тя любовию. Ты же, яко имеяй дерзновение ко Господу, молися присно о спасении нас грешных, да зовем ти:
Радуйся, Авраамие богоносне, отче наш, изрядный чудотворче.

Икос 1

Ангелоподобную доброту души твоея провидя всея твари Создатель, избра тя от юности твоея в жилище Себе; Егоже вместилищем тщался еси быти во вся дни живота твоего, и достигл еси желаннаго. Тем же днесь со ангелы ликовствуя на небеси, приими от нас, преблаженне, пения сия:
Радуйся, яко по мирскому житию твоему мало нам познался еси, да взыскуем небеснаго.
Радуйся, по благочестию твоея жизни родителей и сродников твоих сущих прославивый.
Радуйся, духовное родство паче плотскаго от ранних лет возлюбивый.
Радуйся, сродники своя по плоти Христа ради оставивый.
Радуйся, Духом Святым от сует мирских воззвавый, во еже работати Господеви.
Радуйся, от юности в воинство Христово вписатися изволивый.
Радуйся, куплями житейскими не обязавыйся, да воеводе угоден будеши.
Радуйся, к малому стаду, о нем же благоволи Отец Небесный, сопричтенный.
Радуйся, всеоружием Христовым, в вере, любви и в уповании спасения оболченный.
Радуйся, мужественно врагом плоти, миру и диаволу противоставый.
Радуйся, яко, да имя твое не на земных хартиях, но в небесех написано будет, желание имевый.
Радуйся, яко того ради паче дивен в тебе Господь Бог, в знамениих благодати Своея, Себе нам явил есть.
Радуйся, Авраамие богоносне, отче наш, изрядный чудотворче.

Кондак 2

Видя суету земных попечений, от мирскаго мятежа изшед, преподобне отче наш Авраамие, в тихое пустынное пристанище
водворился еси с работающими Богу, во еже благоприятно воспевати Ему выну: Аллилуиа.

Икос 2

Разум неудобоуразумеваемый мирскому человеку от юности твоея стяжал еси, преподобне отче наш Авраамие, яко небесная
мудрствовати, а не земная, от ранняго возраста научился еси, тем же и взыскал еси стези к небесным обителем в пустыннем
жителстве. Сего ради вопием ти:
Радуйся, водительству мудрости небесныя всего себе предавый.
Радуйся, всякое плотское мудрование от себе отринувый.
Радуйся, в соблюдении закона евангельскаго неуклонно ходивый.
Радуйся, чувства души и тела твоего Богови покоривый.
Радуйся, на камени православныя веры крепко себе поставивый.
Радуйся, благочестия ревнителю премудрый.
Радуйся, страх Божий в сердцы своем твердо насадивый.
Радуйся, любовию ко Христу Богу присно пламеневый.
Радуйся, в братолюбии и незлобии образе благоподражательный.
Радуйся, всякую гордость житейскую в себе искоренивый.
Радуйся, вместо земных тленных благ возлюбивый вечная небесная.
Радуйся, от мира дольнаго в мир горний ум и сердце свое вперивый.
Радуйся, Авраамие богоносне, отче наш, изрядный чудотворче.

Кондак 3

Сила Вышняго измлада вложи в сердце твое, преподобне отче наш Авраамие, ко иноческому житию великую ревность, еюже путеводимь до обители преподобнаго Сергия достигл еси, со слезами умоляя его приобщити тебе к работающым Богу и вопиющым Ему: Аллилуиа.

Икос 3

Имый Сергий преподобный в пустыни своей для ищущих спасения обитель возградити, и прозорливыма очима провидя в тебе добраго о Господе подвижника, приемь тя благосердно, к лику иночествующих сопричте, уставу монашествующих настави, и сам
бысть ти, яко отец чадолюбивый, тем же духа его причастник доблестне явился еси. Сего ради с радостию зовем ти сицевая:
Радуйся, от рук преподобнических ярем Господень иноческаго жития любезне приявый.
Радуйся, сожителства и собеседования со святым Сергием удостоенный.
Радуйся, самим Господом к святому содружеству сему приведенный.
Радуйся, преподобнаго Сергиа прозорливыма очима, яко муж желаний еси духовных, усмотренный.
Радуйся, скрижали сердца своего, да напишется ту закон Христов, отверсти изволивый.
Радуйся, в труды и послушание отцу своему духовному предатися усердне восхотевый.
Радуйся, вся блага земная презревый.
Радуйся, иноков благочестивых украшение.
Радуйся, постом и бдением плоть свою умертвивый.
Радуйся, в трезвенном житии твердо себе укрепивый.
Радуйся, воздержания всякаго опытный наставник явивыйся.
Радуйся, Авраамие богоносне, отче наш, изрядный чудотворче.

Кондак 4

Бурю страстей и душевредных помыслов утишив в уме и сердце твоем бдении и молитвенными слезами, преподобне отче наш, всею душею своею и всем сердцем своим прилепился еси Богови, присно поя Ему: Аллилуиа.

Икос 4

Слышав о многотрудном во обители преподобнаго Сергиа жителстве и узрев тое самоличне, не устрашился еси всякую тесноту и
скорбь пустынножителства понести: тем же и благодать терпения в послушании тебе даровася. Сего ради на подвизе сем сретаем тя приветствии сими:
Радуйся, яко благое иго Христово измлада возлюбил еси.
Радуйся, яко и прияти на ся бремя Христово не обинулся еси.
Радуйся, яко в подвизе спасения руку свою на рало возложив, вспять никакоже обратился еси.
Радуйся, плоть свою господству духа покоривый.
Радуйся, противу козней диавольских оружием Божиим мужественне ратоборствовавый.
Радуйся, над лукавствии врага, пособием благодати победы приемый.
Радуйся, искус долготерпения благоспешно прошедый.
Радуйся, Единаго Господа во всегдашнюю помощь ти вседушно поискавый.
Радуйся, данный от Бога ти талант сугубо возрастивый.
Радуйся, благодатию Божиею приосененный.
Радуйся, верный рабе, ведый волю Господа своего и тую свято исполнивый.
Радуйся, блаженный рабе, во вся стражи нощи житейския, пришествия Господня в бдении ожидавый.
Радуйся, Авраамие богоносне, отче наш, изрядный чудотворче.

Кондак 5

Боготечною звездою в пустыни Сергия преподобнаго, путь спасения другим указующею, явился еси, преподобне отче наш Авраамие, и сам непрестанно славословя Бога и других научая пети Ему: Аллилуиа.

Икос 5

Видя во обители Сергиа преподобнаго некиих безмолвствующих, поревновал еси, преподобне отче наш Авраамие, на больший подвиг простретися, дивному молчанию себе посвятив, не отлучая бо себе ни от единаго же послушания обительнаго с братиею, подвиг молчания несл еси, содействующу ти в том святыми своими молитвами преподобному Сергию. Таковому убо твердому искусу твоему в терпении удивляющеся, вопием ти сице:
Радуйся, верный блюстителю вертограда души твоея.
Радуйся, заградивый любомудренно входы и исходы мысленныя от прилогов вражиих.
Радуйся, умом своим в Иерусалиме небеснем жителствовавый.
Радуйся, безмолвием своим паче слова других поучаяй.
Радуйся, заградивый уста своя не глаголати тщеты и всякия неправды.
Радуйся, изощривый слух свой на слушание песнопений церковных и поучений божественных.
Радуйся, заградивый слух свой от слышания словес неподобных и празднословия душевреднаго.
Радуйся, утвердивый мышцы своя на труды послушания иноческаго.
Радуйся, связавый руце свои для всякаго дела Богу неугоднаго.
Радуйся, нозе свои скоры соделавый к течению на славословие Божие и молитву.
Радуйся, стопы своя уклонивый от шествия на совет неподобный.
Радуйся, умертвивый чрево свое на пресыщение и всякое невоздержание.
Радуйся, Авраамие богоносне, отче наш, изрядный чудотворче.

Кондак 6

Проповедник немолчный смирения и благочестия явился еси всем ведущым тя, преподобне отче наш, егда славы человеческия
всемерно бегая, от сердца, исполненнаго верою, надеждою и любовию, немолчную воспевал еси песнь Богу: Аллилуиа.

Икос 6

Возсия свет радости в богоугодней души твоей, егда Сергием преподобным на безмолвие благословляемь, узрел еси из десницы
его яко пламень огненен на тебе низходящь, и всего тебе окружающь; мы же в видении сем проразумевающе чистое, яко
пламень огня, житие твое о Господе, ублажаем тя сице:
Радуйся, безмолвный языком и устами, но благоглаголивый умом и сердцем молитвенниче.
Радуйся, аще не словом, но паче благими делы и житием других поучаяй.
Радуйся, воздержанием чувств своих ангелов и человеков удививый.
Радуйся, всех добродетелей иноческих твердое охранение.
Радуйся, любве христианския ревнителю.
Радуйся, очи ума своего на высоту небесную твердо вперивый.
Радуйся, бодрый воине Христов, оболченный в броню веры и любве к Царю Небесному.
Радуйся, сокровенных зрителю, врага темнаго наветы и ловления прозреваяй и благомощно отражаяй.
Радуйся, образе незлобия и чистоты.
Радуйся, сладости райския желателю.
Радуйся, в посте и воздержании великим отцем древним Арсению и Антонию подражати тщавыйся.
Радуйся, в трудех и молитвенных бдениих великому Сергию поревновавый.
Радуйся, Авраамие богоносне, отче наш, изрядный чудотворче.

Кондак 7

Хотя к вящшым пустынным подвигом устремитися, умолил еси преподобнаго Сергия отпустити тебе на одинокое в пусте месте
подвижничество. Благословение же прием и молитву многу сотворив Животворящей Троице, отшел еси в путь свой радуяся и
благодарным сердцем вопия к Богу: Аллилуиа.

Икос 7

Новыя радости исполнися сердце твое, преподобне отче наш Авраамие, егда, Богом водимь, до Галических стран достигл еси и
при горе велице об он пол езера Галическаго пусто место с дубравы высокими обрет, вселися еси ту, да явится в пришествии
твоем ко граду Галичу имеющее быти Божие к людем страны тоя благоволение. Темже приветственно вопием ти:
Радуйся, градов и населенных мест бегаяй, яко да взыщеши града грядущаго.
Радуйся, Иерусалима Небеснаго, основание незыблемое имущаго, присно вожделеваяй.
Радуйся, благодатию Божиею водимый, яко един от древних патриархов.
Радуйся, смотрением Божиим, яко звезда светлая, от пределов Радонежских в страны Галичския прешедый.
Радуйся, заре умнаго света, на просвещение окрестных жителей Галича светло возблиставшая.
Радуйся, яко светилник, в нощи неведения ко озарению всех ищущих света по благопотребным местом поставляемый.
Радуйся, крине благоухаяй в дебрех пустынных, среди народа мглою неведения покрытаго дикаго.
Радуйся, цвете духовный, благодатию привлекаяй взоры душевныя к тебе приходящих.
Радуйся, горлице пустыннолюбивая, галичския дебри огласившая пением славы Божия.
Радуйся, пчело трудолюбивая, соты добродетелей в насыщение ближних с собою носящая.
Радуйся, пастырю, распужаемыя овцы стада Христова благоискусно созывати устроивыйся.
Радуйся, древо благосеннолиственное, от бури мирскаго мятежа многих укрыти присно готовое.
Радуйся, Авраамие богоносне, отче наш, изрядный чудотворче.

Кондак 8

Страннаго слышания и страннаго видения удостоился еси, преподобне отче наш, егда на избраннем месте молитву сотворив
Господу и Богородице и от трудов дальняго странствия мало почив, услышал еси глас повелевающь ти взыти на гору и
поклонитися пречистому образу Богоматере; ты же, воспрянув от сна и возшед абие на высоту горы, узрел еси на древе стоящую и
яко светом зари освещаемую икону Матере Господни Умилением именуемую, зело умилися еси сердцем, славя Бога и воспевая Ему: Аллилуиа.

Икос 8

Весь в видение превратился еси, преподобне отче наш Авраамие, егда в полунощи зарею чуднаго света облистаемая икона Владычицы с древа подвижеся и на преподобныя руце твои, молитвенно к пречудному образу Ея воздетыя, никим же носима сниде; мы же зряще тя таковаго велия дарования сподоблшася, ублажаем тя сице:
Радуйся, мужу желаний Господних изряднейший.
Радуйся, откровений Господних приемниче.
Радуйся, свыше воззванный на гору явления Пресвятыя Богоматерния иконы.
Радуйся, тыяжде самыя Владычицы покров и заступление в сем явлении прозревый и в путех своих положивый.
Радуйся, от сего восхождения на гору поучавыйся трудолюбному восхождению к вышнему Сиону.
Радуйся, яко отсюду восхождения в сердце своем полагая, преходил еси от силы в силу, дондеже достигл еси высоты добродетелей и созерцания духовнаго.
Радуйся, слышателю глаголов небесных.
Радуйся, не точию зрителю, но и причастниче, еще сый на земли, света небеснаго, от иконы Приснодевы возсиявшаго.
Радуйся, град Божий, на верху горы устроенный.
Радуйся, во умилении сердечнем пред чудно явльшеюся тебе иконою похвалная сладко воспевый.
Радуйся, тую на перси твоя славно низшедшую со страхом и трепетом облобызавый.
Радуйся, тую и самую землю, древом явления ея осененную, обильно слезами своими омочивый.
Радуйся, Авраамие богоносне, отче наш, изрядный чудотворче.

Кондак 9

Всякое разумение естественное превосходящия скорби и печали исполнися боголюбное сердце твое, богоносне отче наш Авраамие, егда из малаго храма, устроеннаго тобою на другой смежней пространнейшей первыя горе, в первую же по поставлении своем нощь скрыся икона Владычицы, и на томже древе, идеже первее явися, обретеся; ты же проразумев, яко новоизбранное тобою место не угодно есть Ей, небесней Царице, ускорил еси исправити помышление свое и устроенный тобою храм на плещу своею пренесл еси на место перваго Ея явления, и ту поставив пречудный образ Ея на присное пребывание, хвалебно вопиял еси пред Нею Богу: Аллилуиа.

Икос 9

Ветийствуяй язык не может изглаголати твоего терпения, отче преподобне, како в пусте месте пребывая един, единым сухим
хлебом и то скудно питался еси, како боролся еси со многими искушении демонов, иже овогда в виде зверей дивиих, овогда же в
виде змий ядовитых являхуся и устрашаху тя, нудя отити от места того; ты же верою и крестнаго знамения силою вся козни
вражеския славно победил еси, змиев ядовитых от всех имеющих потом устроитися обителей твоих заклятием своим навсегда далече отгнал еси. Сего ради мы, яко велика угодника тя почитающе, воспеваем сице:
Радуйся, яко чистотою душевною на нечистыя силы крепко поборствовал еси.
Радуйся, яко благодатию Христовою лютаго миродержителя державно низложил еси.
Радуйся, яко молитвами твоими тмы предстателя аки мечем поразил еси.
радуйся, яко струями слезными того потопил еси.
Радуйся, щитом веры от разжженных стрел лукаваго оградивыйся.
Радуйся, силою крестнаго знамения полки бесов далече от себе отгнавый.
Радуйся, умерщвлением страстей своих весь умерый мирови.
Радуйся, духом своим выну живый Богови.
Радуйся, душевнима очима своима на престоле славы Господа выну созерцавый.
Радуйся, любовию своею к Богу Отцу вожделевый.
Радуйся, послушанием своим Богу Сыну последовавый.
Радуйся, чистотою своею Богу Духу Святому во обитель себе уготовавый.
Радуйся, Авраамие богоносне, отче наш, изрядный чудотворче.

Кондак 10

Спасти желая душу свою, аще славы мирския всемерно бегал еси, но якоже град, по слову Господню, не может укрытися верху горы стоя, тако и о твоем пустыннем подвизе известно уведев галичский князь Димитрий Феодорович, умоли тя посетити с чудно
явльшеюся тебе иконою град его; ты же, даровав ему радость воздати усердное поклонение иконе Владычицы, твоея же
душеспасителныя беседы насладитися, и многим сущым во граде его немощным исцелитися, велие получил еси от него благоволение, и толь велия дары от него сподобился еси получити, яко возмогл еси и храм в честь успения Богородицы вельми украшен устроити и обитель возградити, воспевая в ней с иночествующими Богу: Аллилуиа.

Икос 10

Стеною твердою и оплотом нерушимым, ограждающим от всех прилогов вражиих, имея себе чудотворную икону Владычицы,
обитель твоя преподобне отче, вскоре процвете, и подвиги иночествующих в ней зело украсися. Ты же, поручив обитель сию
предстателству Матере Господни, и в знамение того образ Ея ту оставив, в другую пустыню отай отшел еси, и в ней при малом
езере ради безмолвнаго жителства вселитися изволил еси, но якоже рече Господь: идеже будет труп, тамо соберутся орли, тако
и твое богоугодное жителство не утаися от ищущих спасения, иже яко птицы легкокрылии отвсюду к тебе стекшеся, умолиша тя ту
храм Богородице воздвигнути, да прославляют в ней Господа. Темже, угодниче Божий, ублажаем тя, взывающе сице:
Радуйся, всякому доброму желанию, якоже и желанию боголюбиваго князя галичскаго Димитриа, споспешествуяй.
Радуйся, оскудевающих в вере благодатию Божию чрез молитвы своя восполняяй.
Радуйся, предстателством к Богородице немощныя врачуяй.
Радуйся, телес наших здравия охранителю.
Радуйся, душ наших на стезях спасения руководителю.
Радуйся, буиих мудрый наказателю.
Радуйся, восхищаемых прелестию вражиею от двора Христова тщаливейший взыскателю.
Радуйся, добрый ловец людей распужаемых исконным врагом в мрежу спасения уловляяй.
Радуйся, вместо сетей в пустынных местех воздвизаяй крепости во спасение душ погибающих.
Радуйся, в местех твоего пребывания обители и многи церкви создавый, якоже светочи на пути ко спасению.
Радуйся, страннопреселниче, приносяй благоволение Божие к людем ненаученым.
Радуйся, в безмолвии твоем умевый приходящыя к тебе люди наставляти видением трудов и чином твоего богослужения.
Радуйся, Авраамие богоносне, отче наш, изрядный чудотворче.

Кондак 11

В пении немолчном крепко утвердив братию свою во второй обители твоей, якоже и в первой, поревновал еси, отче преблаженне, на уединенное пребывание паки избрати себе новую пустыню на реце, Вигою нарицаемей, и ту для умножившейся братии в честь собора Богородицы храм устроив и обитель велию возградив, сам, яко добрый на пути спасения подвижник, задняя забывая, в предняя же простираяся, устремился еси на север далее, и при езере Чухломстем внизу горы великия в малей церкви, вновь тобою устроенней, вселися еси, идеже уединенно во всенощных бдениих воспевал еси Богу: Аллилуиа.

Икос 11

Лучезарным светилником, на свещнице поставленным, явился еси стране Чухломстей, преподобне Авраамие отче наш, егда провидел прозорливыма очима о велицей обители, имевшей возградитися некогда на горе, при нейже вселился еси жити, и многотрудному телу своему во оней положену быти, приступил еси ко устроению на горе той храма в честь Покрова Богородицы, и при оном ко общежитию монастырскому все нужное устроив, и братии ту пребывати, сам в малей церкви, под горою устроенней, до блаженнаго преставления своего подвизался еси, и паству свою словом и житием добре поучив, отшел еси напоследок ко Господу, прияти мзду противу трудов твоих; мы же о таковых исправлениих твоих слышати сподобльшеся, не престаем взывати к тебе сице:
Радуйся, розго, мног плод о Христе сотворшая.
Радуйся, семя доброе, на земли блазе посеянное и сторичный плод принесшее.
Радуйся, трудолюбче, течение жизни своея в великих подвизех совершивый.
Радуйся, отрадо к тебе прибегающым.
Радуйся, омраченных просветителю.
Радуйся, многи храмы Богородице любовию воздвигнувый.
Радуйся, обители многи для ищущих спасения добре устроивый.
Радуйся, для водворившихся в них добрый учителю и богомудрый наставниче.
Радуйся, от земных обителей в небесныя водворивыйся.
Радуйся, со святыми во онех почиваеши.
Радуйся, яко с лики ангелов на небесех тожествуеши.
Радуйся, яко венец царствия от Христа Царя приял еси.
Радуйся, Авраамие богоносне, отче наш, изрядный чудотворче.

Кондак 12

Благодать Божия, изливавшаяся от цельбоносных мощей твоих в день преставления твоего, и доныне преизъобилно изливающаяся на всех, притекающих к раце мощей твоих с верою и любовию во всех нуждах, скорбех и болезнех, утвердила есть нас в крепком уповании на помощь Божию, молитвами твоими подаваемую, к нейже присно притекающе, молитвенно взываем к Богу: Аллилулиа.

Икос 12

Поюще твое великое к нам бывающее милосердие, и ничтоже равно дарованию чудес твоих и благодеяний к нам бывших воздати могуще, паче же недоумением объяти бывше, дерзаем восхваляти тя любовию, преподобне отче наш Авраамие, и благодарственно воспевати тебе сице:
Радуйся, Галичския, Чухломския и всех окрестных стран похвало и утверждение.
Радуйся, великий и теплый о нас предстателю к Богу и молитвенниче.
Радуйся, град Чухлому и вся прилежащыя ему веси от моровыя язвы и напрасныя смерти многажды избавивый.
Радуйся, во всех благоначинаниих наших скорый и благопотребный успех подаваяй.
Радуйся, вся на пользу душ наших потребная содевати о благодати Божией помогаяй.
Радуйся, во время засух и непогод молитвами своими у Бога благорастворение воздуха испрошаяй.
Радуйся, преисполненный к нам всякия благостыни.
Радуйся, превеликия к нам милости сокровище.
Радуйся, чаше, токи милосердия Божия на нас изливающая.
Радуйся, злых помыслов и дел от нас прогонителю.
Радуйся, о обращении и исправлении грешников усердный к Богу и Богородице ходатаю.
Радуйся, во всех нуждах наших скорый помощниче.
Радуйся, Авраамие богоносне, отче наш, изрядный чудотворче.

Кондак 13

О преблаженне и богоносне отче наш Авраамие, изрядный чудотворче; приими сие малое, приносимое тебе, моление наше, и умоли Господа и пречистую Его Матерь, избавити обитель твою сию, всех нас и вся грады и страны христианския от всех зол и бед, паче же избегнути скверн мира и очиститися от страстей греховных, да сподобимся и мы, в покаянии живот свой скончавше, небесных селений достигнути, и в них вместе с тобою во Святей Троице славимому Богу вечно воспевати: Аллилуиа.

Кондак сей глаголи трижды, таже икос 1-й и кондак 1-й.

Молитва

О пречестная и священная главо, отче преблаженне, авво Авраамие! Не забуди нищих своих до конца, но поминай нас во святых своих и благоприятных молитвах к Богу. Помяни стадо свое, еже сам упасл еси, и не забуди посещати нас чад своих. Моли за ны, отче священный, за дети своя духовныя, яко имеяй дерзновение к Небесному Царю; не премолчи за ны, вопия ко Господу, и не презри нас верою и любовию чтущих тя, но поминай недостойных у престола Вседержителева, и не престай моляся о нас ко Христу Богу, яко дана тебе бысть благодать молитися за ны. Не мним бо тя мертва суща; аще бо и телом преставился еси от нас, но и по смерти убо жив сый пребываеши неотступно от нас духом, сохраняя нас от стрел вражиих и всякия прелести бесовския и козней диавольских, пастырю наш добрый. Аще бо и мощей твоих рака пред очима нашими видима есть, но святая твоя душа со ангельскими воинствы, со безплотными лики и с небесными силами у престола Вседержителева предстоящи, достойно веселится. Нам бо тя ведущым воистинну и по смерти яко живу ти сущу, тебе припадаем и тебе молимся, еже молитися о нас всесилному Богу о пользе душ наших, и испросити время на покаяние и невозбранно преити от земли на небо, мытарств же горьких, бесов, воздушных княжей и вечныя муки избавитися и Небесному Царствию наследником быти со всеми праведными, от века угодившими Господу нашему Иисусу Христу, Ему же подобает всякая слава, честь и поклонение со безначальным Его Отцем и с Пресвятым и Животворящим Его Духом ныне и присно и во веки веков. Аминь.