Тропари, кондаки и величания - 20 июля 2025
Боже отец наших,/ творяй присно с нами по Твоей кротости,/ не отстави милость Твою от нас,/ но молитвами их// в мире управи живот наш.
Светила богосиянная миру/ и иноков одушевленный зари,/ Фома чудесы, Акакий же послушанием,/ возсиясте светло;/ сих, яко имущих дерзновение к Богу,/ молитвами во бранех пособствовати молим,/ да просят от Христа Бога даровати прощение согрешений// чтущим их святую память.
Мир оставль, Христу последовал еси от младенства,/ премудре Акакие преподобне,/ Того подражая вольное смирение,/ низвергл еси гордостнаго мучителя,// моли непрестанно о всех нас.
Божественною любовию от юности своея распаляем, Преподобне, мир и вся яже в мире оставил еси, в пустыню вселился един. И в ней собрал еси ученик множество на Божие славословие, в молитвах и в посте и в трудах своих обителях добре подвизался во временней жизни. И ныне не остави посещая чад своих, Отче Герасиме, моли Христа Бога спастися душам нашим.
Яко преобидев тленная и долу влекущее мудрование, весь Христов быв и Того честный крест на рамо взем, последовал Ему невозвратно, в молитвах и постех бых, делех же и злостраданиях, образ быв своим учеником: но яко имея дерзновение ко Святей Троице, молися, блаженне, яко да святое успение твое празднующе вопием: радуйся преподобие Герасиме, отче наш.
По земнем вдовстве Небесному Жениху себе уневестивши/ и в княжестем чертозе подвижнически поживши,/ послежде и чертог, и чад твоих/ Бога ради оставила еси, преподобная Евфросиние,/ и вшедши во обитель, тобою созданную,/ и во иночестем образе многи подвиги показала еси,/ и святое твое житие по благодати Божией блаженною кончиною увенчала еси./ И ныне предстоящи Христу Богу,// моли спастися душам нашим.
Вся красная мира сего, яко суетная, презревши/ и тело твое постом и бдением изнуривши,/ непрестанными молитвами Богу угодила еси,/ преподобная Евфросиние,/ и, дар исцелений от Него прияти сподобльшися,/ слепому прозрение и многим недужным иcцеление даровала еси./ Темже радостно взываем, глаголюще:// слава Богу, прославляющему святыя Своя.
От юности предызбранная Богом угоднице,/ оставльши светлый чертог княжеский,/ уклонилася еси во обитель, тобою созданную,/ и, пучину житейскаго моря преплывши,/ ныне со Ангелы песнословиши Христа Бога./ Емуже непрестанно молися, преподобная,/ яко да сохраняет выну обитель, тобою созданную,/ и дарует нам мир и велию милость.
Велию победу мужески показал еси, отонудуже божественною любовию разгоревся, царя тленнаго и вся красная преобидел еси, на горе малейстей вселение совершив: от неяже в небесная возшел еси к царю царей, Фомо, моли непрестанно о всех нас.