Кондак мученикам Проклу и Иларию
Яко денница звезда, возсия/ мучеников Прокла и Илария/ честное страдание,/ предозаряющи нас чудес светлостьми./ Темже празднуем память вашу:/ Христа Бога молите,// да спасет души наша.
Тропарь преподобнаго Михаила Малеина
Крилами мысленными к Боговедению возлетев разумно,/ мятеж мира оставил еси, блаженне,/ презрев плоти мудрования,/ мудрость Вышнюю взыскал еси, еже жити с Богом,/ и всем образ дав собою, глаголя:/ добро есть с Богом жити, Михаиле преподобне.
Ин тропарь преподобнаго Михаила Малеина
В тебе, отче, известно спасеся, еже по образу:/ приим бо крест, последовал еси Христу/ и, дея, учил еси презирати убо плоть, преходит бо,/ прилежати же о души, вещи безсмертней./ Темже и со Ангелы срадуется, преподобне Михаиле, дух твой.
Кондак преподобного Михаила Малеина
Плотскую тяготу утончил еси делы,/ душевную же быстрость вперил еси просвещением, Михаиле,/ и явился еси Троице жилище,/ Юже зря, блаженне, ясно,// моли непрестанно о всех нас.
Тропарь преподобному Арсению Новгородскому
Божественною любовию разгоревся,/ вся мирская пристрастия отринул еси,/ крест же Христов на рамо взем,/ во след Его изволил еси ходити,/ отечество твое оставив,/ Великаго Новаграда достигл еси/ и, работая Богови невозвратным помыслом,/ дарования чудотворений сподобился еси./ Темже, чтутце тя, преподобне Арсение, вопием:/ слава Давшему ти крепость,/ слава Венчавшему тя,/ слава Действующему тобою всем исцеления.
Кондак преподобному Арсению Новгородскому
Тяжелоносныя волны тимения отгна,/ и вся плотская двизания/ и, похоти палящия нивочтоже вменив,/ взем крест и пойде вслед Христа,/ Имже наставляемь, лукавыя сети до конца раздра/ и под ногами предложи,/ молимтися, преподобне отче Арсение,/ избави нас от належащих на ны соблазн,/ ты бо еси Великому Новуграду похвала и утверждение и сущим в печалех радость.
Тропарь преподобного Симона Воломского
От юности твоея вперив ум твой к Богу, блаженне Симоне,/ мира же отвергся, вселился еси в пустыню непроходимую,/ и тамо, от Господа укрепляемь,/ в молитвах и пощениих доблественне пожил еси,/ и жизнь твою страдальчески/ убиением от сынов противления скончал еси./ Сего ради со преподобными и мученики венчался еси,/ с ними же и ныне предстоиши Престолу Пресвятыя Троицы./ Сию моли, молим тя,/ оставление подати согрешений наших/ и даровати нам велию милость.
Кондак преподобного Симона Воломского
Возложив себе Богу, паче всех возлюбленному,/ от юности, преподобномучениче, Тому от всея души любовию последовал еси,/ мира же тленная ни во что же вменив,/ и в непроходимую пустыню вселился еси,/ и в ней добре противу невидимаго врага подвизався,/ и, яко светозарное солнце, во вся концы возсиял еси,/ и от человеков ненавистных нуждную смерть, и мечное посечение,/ и ножи разбодение, и огненное опаление приял еси,/ и, радуяся, пришел еси к Небесным чертогом./ И ныне со Безплотными лики Владычнему Престолу предстоя,/ поминай нас, чтущих память твою, да зовем ти:/ радуйся, Симоне преподобне, пустынный жителю.
