Тропарь преподобного Стефана Махрищского
Православия ревнителю,/ благочестия наставниче и чистоты,/ ищущим спасения путеводительный светильниче,/ монашествующих Богодухновенное удобрение,/ преподобнаго Сергия духовный собеседниче,/ Стефане премудре,/ ученьми и добродеяньми твоими души просветил еси/ и пустыни населил еси,/ моли Христа Бога спастися душам нашим.
Кондак преподобного Стефана Махрищского
Чистотою душевною божественно вооружився,/ блаженную жизнь совершил еси,/ в пустыню, яко во град, вселився,/ благодать приял еси от Бога/ исцеляти недуги приходящим к честней твоей раце/ и всех возвышати к Божественней высоте,/ темже, имея дерзновение ко Святей Троице,/ поминай нас, чтущих память твою, да зовем ти:/ радуйся, преподобне Стефане, постником удобрение.
Тропарь преподобному Никодиму Святогорцу
Мудрости благодатию, отче, украшенный,/ труба богогласная показался еси Духа/ и добродетелей наставник, Никодиме Богоглаголивый,/ всем бо подаеши спасительная учения,/ жития чистаго показуя сияние/ богатством Божественных твоих словес,/ имиже, яко свет, мирови возсиял еси.
Тропарь преподобному Никодиму Святогорцу
Светило Афонское, и Наксии отрасль,/ и Церкве всея богодухновеннаго учителя,/ Никодима, вернии, да почтим,/ иже, исполнялся мудрости Божественный,/ учения бо небесная и обильная изливает вопиющим:/ слава прославльшему тя Христу,/ слава венчавшему тя,/ слава подающему тобою нам помощь.
Кондак преподобному Никодиму Святогорцу
Яко таинника изряднейшаго добродетельнаго жития и благочестия,/ богоноснаго учителя Православия, празднует тя Церковь,/ с Небес бо дарования приемый,/ озарявши Божественными твоими писании вопиющих ти:/ радуйся, отче Никодиме.