Акафисты - 05 августа 2025
Кондак 1
Взбранной Воеводе родов христианских и страны нашея известней Избавительнице хвалебныя песни принесем, вернии, на святей горе Ея собравшеся; Ты же, яко имущая милосердие неизреченное, о Владычице Богородице, моления нашего, пред чудотворным Твоим образом возносимаго, не отвержи, да в умилении сердец зовем Ти:
Радуйся, похвало Почаевская и всего мира надеждо и утешение.
Икос 1
Архангел Гавриил первее «Радуйся!» тебе приношаше, Владычице, егда зачатие Сына Божия благовествоваше, по преславнем же Успении Твоем вся Небесныя силы туюжде хвалу на Небеси Тебе непрестанно приносят; како убо мы, грешнии, своя гласы с гласы Безплотных совокупити дерзнем? Обаче, милосердие Твое ко всем кающимся поминающе, устне наша со страхом и любовию отверзаем, глаголюще сице:
Радуйся, милости бездно; радуйся, любве неистощимое море.
Радуйся, рода христианскаго благая Предстательнице; радуйся, обители Почаевския стено нерушимая.
Радуйся, православныя люди на гору Почаевскую узами любве привлекающая; радуйся, всякую печаль от душ их отгоняющая.
Радуйся, Еяже чудотворный образ, яко звезда, от горы Почаевския нас путеводствует; радуйся, Ейже возносимыя молитвы страстныя прилоги вскоре отражают.
Радуйся, явлением Своим на горе сей люди утешившая; радуйся, след стопы Твоея на ней нам оставившая.
Радуйся, верных присное дерзновение; радуйся, сумнящихся доброе утверждение.
Радуйся, похвало Почаевская и всего мира надеждо и утешение.
Кондак 2
Видевше пустынницы почаевстии и простец Иоанн Босый Пресвятую Богородицу на скале во огненном столпе явившуюся, след стопы Ея облобызаху и водою, зде от камени истекшею, окропляяся, вопияху Богу: Аллилуиа.
Икос 2
Разум недоразумеваемый о явлении Твоем, Владычице, ищуще, в сицевом уповании утверждается, яко первее от агарян, послежде от еретиков оплот Православия на горе Почаевстей утвердити благоволила еси, сего ради в Твой святый храм приходяще, теплою верою сердца наша исполняем, глаголющи:
Радуйся, истинныя веры утверждение; радуйся, зловерия явное обличение.
Радуйся, древле в неопалимей купине синайстей известившаяся; радуйся, христианом в столпе огненном зде явившаяся.
Радуйся, яко в пещи горящей, росою спасеннии, Авраамстии отроцы Тя предвозвестиша; радуйся, яко водою от следа стопы Твоея исцеленнии благодать Твою проповедаша.
Радуйся, землю нашу, древле от агарян разоренную, явлением Твоим тогда утешившая; радуйся, и ныне многими знаменьми молящияся зде ободряющая.
Радуйся, кающихся скорое услышание; радуйся, подвизающимся помощь и прибежище.
Радуйся, и неведущих вразумление; радуйся, и малодушных укрепление.
Радуйся, похвало Почаевская и всего мира надеждо и утешение.
Кондак 3
Силу сугубыя благодати явила еси, Владычице, на горе Почаевстей, егда место явления Твоего по триех стех летех чудотворною иконою Своею обогатила еси, юже рукою святителя Неофита Эллина, из Москвы грядущаго, первее боярыне Анне даровала еси, потом же от нея во обитель Почаевскую прияла еси, радующимся людем и поющим Богу: Аллилуиа.
Икос 3
Имущи в дому своем икону Твою, Владычице, боярыня Анна и исцеление от нея слепорожденному брату своему Филиппу бывшее уведевши, абие духом ревности о славе Твоей возгореся и обитель из камене во имя пречестнаго Успения Твоего пустынником почаевским устрояет, в ней же чудотворному образу Твоему поклоняющися взывает сице:
Радуйся, сокровище богатное в Твоей святей иконе нам преподавшая; радуйся, святителя рукою дарованным образом Твоим землю нашу освятившая.
Радуйся, души наша от земнаго богатства отвращающая; радуйся, Славу Божию пети нас научающая.
Радуйся, яко чудеса Твоя зряще, к Небеси сердцы своими восхищаемся; радуйся, яко во обители Твоей, аки в преддверии рая обретаемся.
Радуйся, православныя люди иконою Твоею утешившая; радуйся, от всех стран молящияся люди во обитель Почаевскую призывающая.
Радуйся, Еюже вера умножается; радуйся, Еюже уныние отгонится.
Радуйся, иноков почаевских присное Радование; радуйся, мирских людей непостыдное Упование.
Радуйся, похвало Почаевская и всего мира надеждо и утешение.
Кондак 4
Буря еретическаго неистовства на святую обитель Твою устремившися, Владычице, святую икону Твою рукою злых иконоборцев пленивши и на злохуление тех подвигши, вскоре гневом Божиим удержана бысть, егда невидимая сила безстудне пиршествующия хульники, аки Артаксеркса и Ирода, сляче и в недуг вверже, над святынею Твоею ругавшихся и не уведевших пети: Аллилуиа.
Икос 4
Слышаша иноцы почаевстии и вси православнии людие, яко святая икона Твоя по седминадесяти летех еретическаго пленения во святую обитель от посрамленных хулителей возвращается, абие на сретение ея изыдоша и плач свой на радость преложше, вопияху Тебе:
Радуйся, христианом прибежище; радуйся, еретиков обличение.
Радуйся, обитель Почаевскую иконы Твоея до конца не лишившая; радуйся, злохуление иконоборцев посрамившая.
Радуйся, яко в бедах не унывати и нас научаеши; радуйся, яко правосудию Божию веровати нам повелеваеши.
Радуйся, Еюже Православие во стране нашей утвердися; радуйся, Еюже и вся вселенная воплощенную Истину прияти сподобися.
Радуйся, долготерпению Божию подражающая; радуйся, в терпении люди Твоя утверждающая.
Радуйся, яко смиреннии Тобою утешение приемлют; радуйся, яко горделивии Тобою смиряются.
Радуйся, похвало Почаевская и всего мира надеждо и утешение.
Кондак 5
Боготечная звезда ищущим спасения явилася еси, Владычице, к Солнцу Правды сих приводящая, якоже бо в земнем житии Твоем о людех предстательница к Сыну Твоему в Кане Галилейстей показалася еси, тако и по преславном Твоем на Небеса отшествии моления о верных, от конец земли приносимая, к Сыну Твоему возносиши и зде, на горе Почаевстей, исцеления многоразличная от Него людем подаеши, вопиющим Богу: Аллилуиа.
Икос 5
Видеша людие, на гору Почаевскую, якоже в древняя, тако и в последняя лета притекающии, множества исцелений, Тобою подаваемая, в желании спасения души своя утверждаху и о гресех своих покаяние теплое приношаху, вопиюще Тебе:
Радуйся, слепых прозрение и хромых исцеление; радуйся, бесных от демонов избавление.
Радуйся, плененнаго инока во обитель Твою на воздусе чудесне возвратившая; радуйся, младенца Симеона предумерша по молитве старицы воскресившая.
Радуйся, яко в сих знамениих сила древних чудес Твоих людем паки явися; радуйся, яко исцеления от святыя иконы Твоея и в последняя дни не оскудеша.
Радуйся, во всем мире источник исцелений от святых икон Твоих подающая; радуйся, паче сих духовными дарованьми молящияся обогащающая.
Радуйся, Еюже православнии роди хвалятся; радуйся, к Еяже помощи и маловернии притекают.
Радуйся, земнородных упование; радуйся, Небесных чинов радование.
Радуйся, похвало Почаевская и всего мира надеждо и утешение.
Кондак 6
Проповедницы славы Пречистая Девы явишася агаряне на обитель Почаевскую нашедшии и видения Пречистая Богородицы с преподобным Иовом первее не уразумевшии; егда бо стрелы, от них пущаемыя, паки на ня устремишася, абие силу Владычицы проразумевше и покаяние о безумии своем принесше, верою возопиша: Аллилуиа.
Икос 6
Возсия видение Твое, Владычице, на горе Почаевстей, егда братия обители, зело от агарян осаждаеми, с велиим воплем моление пред святою Твоею иконою и пред ракою преподобнаго Иова возношаше, егда же братия агаряны, видением сим смятенныя и бежащия, виде, абие с веселием воспе Тебе сице:
Радуйся, Избавительнице наша и спасение; радуйся, рода христианскаго присное вспоможение.
Радуйся, нечестивыя враги от Твоея святыни отгнавшая; радуйся, в покаяние их приводящая.
Радуйся, Еяже и невидимии спасения нашего врази трепещут; радуйся, Ейже Святии Ангели и преставльшиися праведницы на Небеси покланяются.
Радуйся, преподобнаго Иова в молитву с Собою приемшая; радуйся, агаряны ко Святому Крещению видением Своим приведшая.
Радуйся, яко Тобою вернии страх смертный в конец отложиша; радуйся, яко Тебе ради нецыи от агарян богобоязненнии иноцы зде явишася.
Радуйся, истины присное изъявление; радуйся, заблуждающимся доброе вразумление.
Радуйся, похвало Почаевская и всего мира надеждо и утешение.
Кондак 7
Хотящи желание вечнаго живота возгрети в сердцах христианских, Пресвятая Богородица болящия чудесы Своими исцеляет, бесы изгоняет, плененныя свобождает, мертвыя воскрешает, да мы вси, силу Божию уразумевше, земная возненавидим и о душах своих попечение приложим, непрестанно вопиюще Богу: Аллилуиа.
Икос 7
Новыя и тягчайшия беды претерпе обитель Почаевская, егда вкупе со всею страною от Православия лестию отторженная во обладание еретиков вдадеся, обаче прошедшим стом и десятим летом паки православным христианом вдана бысть, в нюже православнии иноцы, пришедше и святыя мощи преподобнаго Иова из-под спуда изъемше, к чудотворному образу Владычицы припадаху, глаголюще:
Радуйся, Православия защитнице; радуйся, еретиков обличительнице.
Радуйся, обитель Твою до конца не оставившая; радуйся, страху Божию нас научающая.
Радуйся, яко предстательством Твоим страна Волынская паки ко Православию возвратися; радуйся, яко от лет древних мнози еретицы Твоим вразумлением исправишася.
Радуйся, во святую Лавру Твою верных на молитву паки призывающая; радуйся, и неверныя зде поклонятися православней святыне научающая.
Радуйся, Юже праведницы и праведнии непрестанно воспевают; радуйся, к Нейже и падшии в покаянии притекают.
Радуйся, отступников к вере возвращение; радуйся, прельщаемых к свету истины возведение.
Радуйся, похвало Почаевская и всего мира надеждо и утешение.
Кондак 8
Странное чудо зрим о Тебе, Богомати, елико бо телеснии недузи святыя Твоея иконы целованием и воды почаевския кроплением исцеляются, тако и душевныя страсти видением святыни Твоея отъемлются, вера утверждается и умиления сердца наша исполняются, поющих Богу: Аллилуиа.
Икос 8
Весь аз недостойный грехами исполнихся, мирскому разсеянию вдався и о души своей вознерадев, обаче на святую икону Твою, Владычице, взирая, и просвещение от нея безчисленным людем, зде приходящим, видя, паки на путь спасения устремляюся и в радости сердца воспеваю Ти сице:
Радуйся, чистоты сокровище; радуйся, милостей бездно.
Радуйся, к Сыну Твоему о верных моления выну приносящая; радуйся, моления грешных не отвергающая.
Радуйся, яко Тобою мнози отчаяния греховнаго избегоша; радуйся, яко призывающии имя Твое от падения страннаго восташа.
Радуйся, Еюже иконоборная ересь во вселенней посрамися; радуйся, Еюже истинная вера Волынской стране возвратися.
Радуйся, к подвигу целомудрия души возводящая; радуйся, обидящим прощати научающая.
Радуйся сердец наших умиление; радуйся, душ наших упование.
Радуйся, похвало Почаевская и всего мира надеждо и утешение.
Кондак 9
Всякия отступства и еретическая блуждания покаявшемуся народу земли Волынския отпустила еси, Владычице, и паки источник исцелений от чудотворныя Твоея иконы, от следа стопы Твоея на горе Почаевстей в православной Лавре Твоей людем открыла еси, токмо аще покаяние о гресех своих принесут Богу и, о Твоей помощи не сумнящеся, возопиют Ему: Аллилуиа.
Икос 9
Вития славы Твоея явишася, Владычице, слепии и хромии исцеление от Твоея иконы, православным людем возвращенныя, приявшии, яко и еретической жене некоей болящей, Тя в помощь призвати и по исцелении истинную веру исповедати и облобызати, нам же вопити Тебе сице:
Радуйся, Царя Небеснаго умоление; радуйся, земных присное предстательство.
Радуйся, от лютерских заблуждений жену некую недуга исцелением отвратившая; радуйся, вся люди во истине Православия уверившая.
Радуйся, яко Тебе ради православнии людие столькраты прельщения агарянская победиша; радуйся, яко Тебе ради и совращеннии от латын паки православную веру облобызаша.
Радуйся, к Нейже вси живущии молитвенно очи воздвизают; радуйся, Юже и молящиися о упокоении умерших в помощь призывают.
Радуйся, и от житейских нужд притекающия к Тебе изъемлющая; радуйся, паче сих всякия нужды претерпевающим крепость дарствующая.
Радуйся, христолюбивому воинству во бранех вспоможение; радуйся, на демоны воинствующим благое наставление.
Радуйся, похвало Почаевская и всего мира надеждо и утешение.
Кондак 10
Спасти хотящи Пречистая Богородица препростую некую старицу, во ослеплении латынстем бывшую и внуку малую имущую, Православием убо просвещенную, но телесными очесы слепотствующу, сима обема благое желание влагает, еже на горе Почаевстей чудотворному Ея образу поклонитися, идеже абие слепую отроковицу чудесне исцеляет и старицу православную веру исповедати научает, вопиющую Богу: Аллилуиа.
Икос 10
Стена нерушимая истинныя веры явилася еси, Владычице, зане, якоже нечестивии еретицы от прославления Тебе, яко Истинныя Богородицы, со упорством отвергошася, тако и православнии в вере Твоей тверди пребыша и от молитв, непрестанно Тебе приносимых, николиже отвратитися восхощут, и сих ради еретических глагол во ушеса своя приимати не дерзнут, но сердцем благодарным восхваляти Тя не престанут, глаголюще:
Радуйся, христианом отрадо и утешение; радуйся, ангельским чином славо и поклонение.
Радуйся, от льстивых глагол еретических нас отвращающая; радуйся, памятованием милостей Твоих умы наша к Богу возносящая.
Радуйся, святыя Апостолы ко Успению Твоему на облацех воздушных призвавшая; радуйся, и грешныя люди в той день на гору Почаевскую в тысящах и тмах на всяко лето собирающая.
Радуйся, Еяже ради христиане трудность пути, аки сладкое упокоение, подъемлют; радуйся, Еяже ради и ленивии подражати им тщатся.
Радуйся, иноком сладость мирскую забыти благодатию Твоею пособствующая; радуйся, вспять озирающияся сновиденьми грозными устрашающая.
Радуйся, Церкве Христовы лучшая диадимо; радуйся, страны нашея щите неодолимый.
Радуйся, похвало Почаевская и всего мира надеждо и утешение.
Кондак 11
Пение благодарное о Твоих, Владычице, благодеяниях во всем мире от христиан возносимое, аки фимиам, к Небеси непрестанно восходящий, помышляюще, и наша убогая хваления не отвратити Тебе просим, еще же и благодать покаяния даровати Тебе молим, со упованием поюще Богу: Аллилуиа.
Икос 11
Свет живота временнаго и вечныя жизни упование явилася еси, Владычице, человеку некоему в Бессарабии умрети имущему, но внезапу, по вкушении воды от святыни Почаевския, здраву бывшему, еже сродницы его видевше, со страхом и умилением Тебе воззваша:
Радуйся, болящих исцеление; радуйся, скорбящих слышание.
Радуйся, Тобою бо смерть пришедшая отгнася; радуйся, Тобою бо вера несуменная нам даровася.
Радуйся, яко предвещание Гавриила пред очию нашею сбывается; радуйся, яко от всех родов, по глаголу Твоему, ныне и присно ублажаешися.
Радуйся, гору Почаевскую, яко место пребывания Твоего освятившая; радуйся, аки вторый Назарет тую явившая.
Радуйся, Яже никогоже упования отвратившая; радуйся, всех молитвы тепле приемлющая.
Радуйся, здравие нам подавающая; радуйся, ко спасению нас возводящая.
Радуйся, похвало Почаевская и всего мира надеждо и утешение.
Кондак 12
Благодать исцелений и умиления молитвеннаго от Твоея, Владычице, иконы источаемая, да не вотще душам нашим будет, аще бо грех ради во окамененное безчувствие впадохом, обаче, яко имущая власть мертвыя воскрешати, и наше пробуди душевное омертвение и помыслом лучшим сердца наша озари, да, греховную прелесть возненавидевше, воспоем Богу: Аллилуиа.
Икос 12
Поюше Твоя чудеса во обители Почаевстей явленная, молим Тя, Владычице, лица Твоего от страны нашея не отврати, но и всем приходящим на святую гору Твою и милости от Тебе ищущим во благое прошение исполни, да вси воспоют Ти сице:
Радуйся, всеправеднаго Бога умилостивление; радуйся, христиан ко Христу дерзновение.
Радуйся, торжество веры в Лавре Твоей являющая; радуйся, сердца человеков любовию распаляющая.
Радуйся, яко древним чудесем подобное зде видети людие сподобишася; радуйся, яко гора сия, аки вторый Синай, в странах христианских прославися.
Радуйся, Бога, на земли явльшагося, во чреве Твоем понесшая; радуйся, человеки молитвою Твоею к Богу возносящая.
Радуйся, икону Твою, яко проповедницу спасения во обители Твоей оставившая; радуйся, след стопы Твоея, целебною водою исполняемый, чудесы прославившая.
Радуйся, с небесных высот на рабы Твоя призирающая; радуйся, на благия деяния верныя наставляющая.
Радуйся, похвало Почаевская и всего мира надеждо и утешение.
Кондак 13
О Всепетая Мати Христа Бога, вся роды христианския любовию Себе всыновившая, достойныя похвалы воспети Тебе недоумеем мы, грешнии, обаче, любовию Твоею побеждаемии и к Твоему чудотворному образу очи своя возносяще, молим Тя: в борении и нуждах наших не остави чад Твоих, заступлению Твоему тепле верующих и Сыну Твоему вопиющих: Аллилуиа.
Этот кондак читается трижды, затем икос 1-й «Архангел Гавриил…» и кондак 1-й «Взбранной Воеводе…».
Молитва
К Тебе, о Богомати, молитвенно притекаем мы, грешнии, чудеса Твоя, во святей лавре Почаевстей явленная, поминающе и о своих сокрушающеся прегрешениих. Вемы, Владычице, вемы, яко не подобаше нам, грешным, чесого просити, токмо о еже Праведному Судии беззакония наша оставити нам. Вся бо нами в житии претерпенная, скорби же, и нужды, и болезни, яко плоды падений наших прозябоша нам, Богу сия на исправление наше попущающу. Темже вся сия истиною и судом Своим наведе Господь на грешныя рабы Своя, иже в печалех своих к заступлению Твоему, Пречистая, притекоша и во умилении сердец к Тебе взывают сице: грехов и беззаконий наших, Благая, не помяни, но паче всечестнеи руце Твои воздвигши, к Сыну Твоему и Богу предстани, да люте содеянная нами отпустит нам, да за премногая неисполненная обещания наша лица Своего от рабов Своих не отвратит, да благодати Своея, спасению нашему пособствующия, от душ наших не отымет. Ей, Владычице, буди спасению нашему Ходатаица и, малодушия нашего не возгнушавшися, призри на стенания наша, яже в бедах и скорбех наших пред чудотворным Твоим образом возносим. Просвети умиленными помыслы умы наша, веру нашу укрепи, надежду утверди, любве сладчайший дар сподоби нас прияти. Сими убо, Пречистая, дарованьми, а не болезньми и скорбьми живот наш ко спасению да возводится, но, от уныния и отчаяния души наша ограждающи, избави нас, маломощных, от находящих на ны бед, и нужд, и клеветы человеческия, и болезней нестерпимых. Даруй мир и благоустроение жительству христианскому предстательством Твоим, Владычице, утверди Православную веру в стране нашей и во всем мире. Церковь Апостольскую и Соборную умалению не предаждь, уставы святых отец на веки непоколебимы сохрани и всех к Тебе притекающих от рова погибельнаго спаси. Еще же и ересию прельщенных братий наших или веру спасительную в греховных страстех погубивших паки ко истинней вере и покаянию приведи, да вкупе с нами, Твоему чудотворному образу покланяющеся, Твое предстательство исповедят. Сподоби убо нас, Пресвятая Госпоже Богородице, еще в животе сем победу истины Твоим заступлением узрети, сподоби нас благодатную радость прежде кончины нашея восприяти, якоже древле насельники Почаевския Твоим явлением победители и просветители агарян показала еси, да вси мы благодарным сердцем вкупе со Ангелы, и пророки, и апостолы, и со всеми святыми, Твое милосердие прославляюще, воздадим славу, честь и поклонение в Троице певаемому Богу Отцу, и Сыну, и Святому Духу, во веки веков. Аминь.
Тропарь, глас 5
Пред святою Твоею иконою, Владычице, молящиися исцелений сподобляются, веры истинныя познание приемлют и агарянская нашествия отражают. Темже и нам, к Тебе припадающим, грехов оставление испроси, помыслы благочестия сердца наша просвети и к Сыну Твоему молитву вознеси о спасении душ наших.
Кондак, глас 1
Источник исцелений и веры Православныя утверждение Почаевская Твоя икона, Богородице, явися, темже и нас, к ней притекающих, от бед и искушений свободи, лавру Твою невредиму сохрани, Православие во окрест стоящих странах утверди и грехи разреши молитвенник Твоих: елика бо хощеши, можеши.
Кондак 1
Избранному флотоводцу земли Русския,/ делами доблестными для славы Отечества нашего православнаго достойне потрудившемуся,/ святому праведному воину Феодору похвальное приносим пение./ Ты же, яко имеяй велие дерзновение ко Господу,/ от всяких нас бед свободи, зовущих:/ Радуйся, праведный флотоводче Феодоре, славный Архистратиже края Херсонскаго.
Икос 1
Ангелы и боголюбивыя люди днесь Христу Богу благодарение и славословие приносят, яви бо тя, праведне воине Феодоре, яко славнаго покровителя и защитителя роду нашему. Мы же, видяще тя предстоящаго у Престола Божия и милости нам у Него просящаго, со умилением сердечным воспеваем:
Радуйся, рода благочестиваго рождение.
Радуйся, земли Ярославския многоплодное прозябение.
Радуйся, яко посреди празднования памяти двух воинов-великомучеников Феодора Стратилата и Феодора Тирона преславно родивыйся.
Радуйся, яко от младенчества до самыя кончины твоея подражателем подвигов их явивыйся.
Радуйся, в законе Господни непрестанно поучавыйся.
Радуйся, молитвами преподобнаго Феодора Санаксарскаго в духовней брани побеждати научивыйся.
Радуйся, дух мирен в душе своей стяжавый.
Радуйся, силою Креста Господня вся враги побеждавый.
Радуйся, любовь Христову в сердце своем носивый.
Радуйся, сладкою тою любовию душу свою усладивый.
Радуйся, Ангела Хранителя твоего непрестанно возвеселявый.
Радуйся, родителей и наставников твоих кротостию и усердием удивлявый.
Радуйся, праведный флотоводче Феодоре, славный Архистратиже края Херсонскаго.
Кондак 2
Видя Господь чистоту сердца твоего, преизобильно дарова тебе, Феодоре преславне, благодать Свою, да тою укрепляемый, житие твое поживеши во благочестии и служении Отечеству, прославляя Творца своего песнию: Аллилуиа.
Икос 2
Разум Божественный просвети и укрепи тя, праведне и достохвальне Феодоре, егда учение книжное со усердием познавал еси и велие прилежание к сему имел еси. Егда же чином воинским почтен быв, клятву пред Всемогущим Богом, святым Евангелием Его и Крестом принесл еси: верно и нелицемерно Отечеству Русскому служити. Сего ради приими от нас похвалы сия:
Радуйся, паче всего в мире сем Господа возлюбивый.
Радуйся, от лет младых чистоту жития сохранивый.
Радуйся, к книжной премудрости усердие от юности имевый.
Радуйся, праздность и суету мира сего презревый.
Радуйся, закон Господний прилежно изучивый.
Радуйся, целомудрия сокровище драгое сохранивый.
Радуйся, в страсе Божием добре наставление получивый.
Радуйся, в житии твоем добродетели высокия возрастивый.
Радуйся, душу свою всецело ко Господу устремивый.
Радуйся, другом твоим примером прилежания бывый.
Радуйся, христианскаго благочестия неустанный блюстителю.
Радуйся, милости и помощи нуждающимся подателю.
Радуйся, праведный флотоводче Феодоре, славный Архистратиже края Херсонскаго.
Кондак 3
Силою Божиею укрепляем, все житие твое в праведности проводил еси, славне воине Феодоре, и, не щадя живота своего, Отечество православное от супостат защищал еси, Творцу же своему в ратных делех твоих вспомоществующу ти, воспевал еси благодарно: Аллилуиа.
Икос 3
Имея в сердце своем веру твердую во Христа Иисуса и силою тоя вооруживыйся, на морях Балтийстем и Азовстем служением ратным славу Отечества твоего преумножал еси. Помози и нам во всем подражати тебе, угодниче Божий Феодоре, да не погибнем в пучине беззаконий наших, обаче радостно да зовем тебе:
Радуйся, Евангелия Христова добрый хранителю.
Радуйся, заповедей Иисусовых усердный исполнителю.
Радуйся, Богу житием твоим совершенно угодивый.
Радуйся, страсти в душе своей победивый.
Радуйся, Духа Святаго жилище, преукрашенное чистотою.
Радуйся, Божия благодати приятелище, сияющее добродетелей красотою.
Радуйся, Царствия Горняго ревностный искателю.
Радуйся, роду христианскому благ небесных ходатаю.
Радуйся, Духом Святым насыщенный и просвещенный.
Радуйся, соблазнами мира сего суетнаго не прельщенный.
Радуйся, измлада Господа своего всею душею возлюбивый.
Радуйся, в заповедех Божиих неуклонно ходивый.
Радуйся, праведный флотоводче Феодоре, славный Архистратиже края Херсонскаго.
Кондак 4
Бури бед и искушений не устрашился еси, святе Феодоре, егда прибывши в богоспасаемый град Херсон, службу свою совершал еси. Господь же укрепляше тя, да трудами твоими край Херсонский прославиши, воспевая Богу: Аллилуиа.
Икос 4
Слышаще и видяще вси людие града Херсона, яко моровым поветрием град их одержим бысть, на единаго Господа все упование возложиша. Ты же, праведне Феодоре, свыше Господом вразумленный, вверенныя тебе воины от тяжкия болезни оградил еси. Темже и мы усердно к тебе прибегающе, смиренно молим: управи нас предстательством твоим к тихому и мирному житию, и сподоби наслаждатися нетленныя радости святых, вопиющих тебе:
Радуйся, ближним своим благодетелю милостивый.
Радуйся, за дивное милосердие твое Господом хранимый.
Радуйся, изнемогающих внезапное укрепление.
Радуйся, унывающим благодатное ободрение.
Радуйся, ближняго своего, яко себе, возлюбивый.
Радуйся, меньшей братии твоей, яко Христу, послуживый.
Радуйся, скорбящих благий утешителю.
Радуйся, благ вечных нам от Господа подателю.
Радуйся, ризу душевную чистотою убеливый.
Радуйся, ратными подвигами своими всех удививый.
Радуйся, милостию и состраданием душу свою наполнивый.
Радуйся, служащих с тобою на путь благочестия направлявый.
Радуйся, праведный флотоводче Феодоре, славный Архистратиже края Херсонскаго.
Кондак 5
Боготочный источник дарований духовных явился еси, боголюбиве Феодоре, и за великия подвиги твоя чинами воинскими почтен быв, царския милости сподобился еси. Обаче вемы, яко ты более жаждал еси мзды Господа своего, нежели почести человеков, к Немуже благодарно взывал еси: Аллилуиа.
Икос 5
Видевше яко врагами страны Русския мир нарушен бысть, на защиту Отечества своего флот Черноморский направил еси, славне Феодоре, и в дивной победе над нечестивыми, христианское самоотвержение показав, славу воинства православнаго преумножил еси. Мы же, любовию усердною к тебе пламенея, мысленно созерцаем тя, горе за ны молящагося, и возсылаем ти пение сие:
Радуйся, в терпении мнозем паче иных преуспевый.
Радуйся, заповеди Господни в сердце своем верно хранивый.
Радуйся, прилежно во славу Божию подвизавыйся.
Радуйся, во благо Отечества своего славно потрудивыйся.
Радуйся, к Богу и ближним великия любови горение.
Радуйся, Церкви Христовы благодатное удобрение.
Радуйся, плоть свою духови всецело покоривый.
Радуйся, плоды духовныя миру преизобильно явивый.
Радуйся, обетований Иисусовых достойный наследниче.
Радуйся, со ангелы и святыми предивный собеседниче.
Радуйся, гнев на ближняго своего до конца в себе умертвивый.
Радуйся, уста своя от клеветы и неправды заградивый.
Радуйся, праведный флотоводче Феодоре, славный Архистратиже края Херсонскаго.
Кондак 6
Проповедник веры Христовы и благочестия христианскаго не словом точию, но и делом явился еси, богомудре Феодоре, яко отец благий бывый вверенным ти людем, образ им жития по заповедем Христовым подавая. Молися убо, да и мы, в житейстем море сущии, к тихому пристанищу, Господу нашему, притецем, во умилении зовуще: Аллилуиа.
Икос 6
Возсия в тебе обильно благодать Божия, праведне Феодоре, егда за усердное служение Отечеству вверено ти бысть управление флотом Черноморским. Таковому о тебе Божию промышлению радующеся, зовем:
Радуйся, добродетельми своими небесныя дары получивый.
Радуйся, воспоминанием страданий Христовых скорби своя усладивый.
Радуйся, терпением своим многим святым угодникам уподобивыйся.
Радуйся, пред Ангелы пресветлыми не посрамивыйся.
Радуйся, всего себе в волю Божию безропотно предавый.
Радуйся, болезньми своими здравие души своей стяжавый.
Радуйся, за други своя душу полагавый.
Радуйся, со всеми в мире пребывати желавый.
Радуйся, добрыми делами Бога прославлявый.
Радуйся, Отечество свое от врагов охранявый.
Радуйся, дивный образ любви Отца Небеснаго в себе явивый.
Радуйся, братолюбием христианским дольний мир удививый.
Радуйся, праведный флотоводче Феодоре, славный Архистратиже края Херсонскаго.
Кондак 7
Хотяй Человеколюбец Господь защитити страну нашу православную от ига агарянскаго, вдохнови тя, славне Феодоре, на великия подвиги, коими турецкий флот низложен бысть и людем русским мирное жительство даровася. Даждь убо и нам благое утешение в мирном житии от Господа прияти, Емуже ангельскую песнь приносим: Аллилуиа.
Икос 7
Новыя таланты преумножил еси, святый воине Феодоре, егда несомненным упованием на помощь Божию вся враги побеждал еси. Темже и нас молитвами твоими в горния обители приведи, восхваляющих тя:
Радуйся, высотою подвигов твоих Ангелы удививый.
Радуйся, крепостию произволения твоего демоны посрамивый.
Радуйся, почести царския достойно восприявый.
Радуйся, мужество велие во всех творимых бранех показавый.
Радуйся, умения своего флотоводческаго не сокрывый.
Радуйся, во славу Божию и Отечества нашего сие употребивый.
Радуйся, христианскаго рода велие и славное возвышение.
Радуйся, горняго мира пресветлое радование и украшение.
Радуйся, за враги твоя с любовию моливыйся.
Радуйся, прощати всех у Христа научивыйся.
Радуйся, образ вернаго служения Богу и Отечеству показавый.
Радуйся, дивное отвержение себе, спасения ради ближних, проявивый.
Радуйся, праведный флотоводче Феодоре, славный Архистратиже края Херсонскаго.
Кондак 8
Странное и преславное чудо совершися, егда ты, достоблаженне Феодоре, велию святыню - мощи угодника Божия Спиридона Тримифунтскаго, на острове Корфу пребывающия, от зловредных супостат свободил еси и в день Святыя Пасхи со славою многою на раменах своих перенесение их совершил еси. Темже молися за ны, да избавлени будем от враг видимых и невидимых, и да возгорится в сердцах наших огнь любве ко Владыце Христу, поющих Ему: Аллилуиа.
Икос 8
Всего себе воли Божией предав, служение ратное совершал еси, доблесть русскаго воинства всему миру показуя. Мы же, зряще сия, со умилением поем ти:
Радуйся, Христа Бога, яко Хлеба Жизни, взалкавый.
Радуйся, Тем душу свою неизменно питавый.
Радуйся, Пречистыя Крови Его, яко истиннаго пития приобщавыйся.
Радуйся, ко преславным праведником приложивыйся.
Радуйся, за усердие твое от Богоматери мзду восприявый.
Радуйся, Сына Ея на земли житием своим прославлявый.
Радуйся, Царя царей, Христа Господа, служителю.
Радуйся, чистых сердцем смиренный и мудрый учителю.
Радуйся, чин воинский, яко велий дар Божий, приявый.
Радуйся, повиноватися воле Господней всех научавый.
Радуйся, Отечества нашего неустрашимый защитниче.
Радуйся, Православия ревностный проповедниче.
Радуйся, праведный флотоводче Феодоре, славный Архистратиже края Херсонскаго.
Кондак 9
Вси людие гречестии, свободу от злокозненных враг от тебе получившия, достославне Феодоре, благодарни тебе за сие быша, отцем своим тя величая. Ты же, за вся сия Бога благодарил еси, яко дарова ти силу и мужество, да послужиши не токмо русскому, но и иным народам православным, да вси поют едиными усты и единым сердцем: Аллилуиа.
Икос 9
Витийство человеческое не довлеет, святе Феодоре, к восхвалению всех предивных трудов и побед твоих, и мужества, с коим переносил еси вся скорби и лишения, клевету и зависть, от врагов твоих исходящия. Темже, величающе вся подвиги, терпение и труды твоя, прославляем тя сице:
Радуйся, душу свою с кротостию Господеви вручивый.
Радуйся, искренних своих христианскому терпению научивый.
Радуйся, радости духовныя боголюбивым душам подателю.
Радуйся, новый наш пред Богом молитвенниче и предстателю.
Радуйся, яко твоими молитвами Господь оставляет нам прегрешения.
Радуйся, помогающий нам претерпевати скорби и поношения.
Радуйся, не своея славы, но Божия непрестанно искавый.
Радуйся, венец праведника от Царя Небеснаго восприявый.
Радуйся, миротворцев и правдолюбцев любвеобильный наставниче.
Радуйся, Божия правды предивный проповедниче.
Радуйся, живота своего за веру и Отечество николиже щадивый.
Радуйся, душу свою за други своя полагавый.
Радуйся, праведный флотоводче Феодоре, славный Архистратиже края Херсонскаго.
Кондак 10
Спастися хотящим пример благий житие твое бысть, праведне Феодоре, имже вся ны научаеши искати единаго на потребу, еже есть богоугождение. Помози убо и нам в сем тебе подражати, вдохни в нас мужество душевное, украси нас добродетельми небесными, да с тобою возможем сонаследники Царствия Небеснаго быти и воспевати Создателю нашему: Аллилуиа.
Икос 10
Стеною ограждения в Церкви Православней являешися, славне Феодоре, защищаеши бо люди верныя от враг видимых и невидимых; не сокрыт же бысть и светильник добродетелей твоих, да светом, от него исходящим, прославляеши Отца Небеснаго. Мы же, чтущии память твою, со умилением взирая на образ твой святый, с радостию зовем:
Радуйся, лжи и коварства нелицемерный обличителю.
Радуйся, веры Православныя неустанный насадителю.
Радуйся, житием своим Ангелы возвеселивый.
Радуйся, праведностию твоею духи тьмы посрамивый.
Радуйся, бедствующим добрый предстателю.
Радуйся, за обидимых и унижаемых присный ходатаю.
Радуйся, кротость Христову в душу свою восприявый.
Радуйся, смирению Его притекающия к тебе научавый.
Радуйся, заблуждших наставниче и скорбящих утешителю.
Радуйся, просящих помощи твоея скорый тоя подателю.
Радуйся, яко и по преставлении твоем милости творити не преставаеши.
Радуйся, яко молящимся у гроба твоего скорую помощь подаваеши.
Радуйся, праведный флотоводче Феодоре, славный Архистратиже края Херсонскаго.
Кондак 11
Пение всеумиленное Триединому Богу принесл еси, блаженне Феодоре, в Санаксарстей обители, идеже от ратных подвигов почивая, в молитве пламенней душею своею ко Господу всецело устремился еси. Темже сподоби тя Господь причаститися Святых Своих Таин пред славною кончиною твоею, в празднование Покрова Пресвятыя Богородицы. Ныне же, предстоя у Престола Царя Славы, молися, да и мы души своя Нетленному Жениху Христу чистыми принесем со ангельским пением: Аллилуиа.
Икос 11
Светозарное светило, в стране нашей возсиявшее, и по честнем успении твоем зрим тя, праведне воине Феодоре, зане и ныне светиши нам знамении и чудесы от святых мощей твоих истекающими. Темже, благодарственная Богу приносяще о тебе пения, взываем ти сице:
Радуйся, во Иисусе Сладчайшем единое утешение обретавый.
Радуйся, к бедствующим на помощь стопы своя ускорявый.
Радуйся, окамененнаго нечувствия из сердец наших прогонителю.
Радуйся, во отчаянии сущим благия надежды подателю.
Радуйся, яко тобою вернии истиною Христовою просвещаются.
Радуйся, яко тобою покаявшияся от постыдныя смерти избавляются.
Радуйся, чудесныя исцеления от святых мощей твоих обильно источаяй.
Радуйся, николиже во отчаяние впадати нас научаяй.
Радуйся, праведною кончиною своею праведность жития твоего запечатлевый.
Радуйся, в райских обителех Творца и Спасителя с радостию узревый.
Радуйся, яко тобою и доныне Отечество наше от врагов избавляется.
Радуйся, яко тобою град Херсон торжествует и прославляется.
Радуйся, праведный флотоводче Феодоре, славный Архистратиже края Херсонскаго.
Кондак 12
Благодати и милости испроси нам у Христа, Создателя и Владыки нашего, преславне Феодоре, много бо может молитва праведника пред лицем Его. Мы же, душами своими умиляемся, яко яви нам Господь во утешение святыя мощи твоя, вопиющим Ему: Аллилуиа.
Икос 12
Поюще неисчетныя подвиги предивнаго жития твоего, великий воине и флотоводче Феодоре, хвалим и ублажаем тя, яко небеснаго многомощнаго покровителя богоспасаемаго града нашего. Ты же, данною ти свыше благодатию, подавай нам полезная ко спасению душ наших, да присно тя величаем:
Радуйся, святче Божий, свято и праведно жизнь земную совершивый.
Радуйся, во благоухании святыни сном блаженным опочивый.
Радуйся, великий флотоводче, Богом на укрепление нам дарованный.
Радуйся, венцем безсмертныя жизни от Господа увенчанный.
Радуйся, Пресветлое Лице Создателя выну созерцаяй.
Радуйся, Пресвятей Троице песнь немолчно возглашаяй.
Радуйся, Господа ходатайством твоим умилостивляяй.
Радуйся, град Херсон покровительством твоим защищаяй.
Радуйся, яко имя твое со святыми прославляется.
Радуйся, яко молитвами твоим град Херсон утверждается.
Радуйся, Престолу Царя Небеснаго во славе предстоящий.
Радуйся, о граде, тебе вверенном, Господу молитвы возносящий.
Радуйся, праведный флотоводче Феодоре, славный Архистратиже края Херсонскаго.
Кондак 13
О преславный воине и мужественный флотоводче Феодоре, приими от нас сие малое похвальное пение, еже пред иконою твоею ныне воспеваем, и молитвами твоими испроси нам у Христа Бога избавитися от бед, скорбей и напастей, наипаче же от внезапныя смерти и вечныя муки. Буди нам путевождь во блаженныя обители небесныя, да тамо с тобою воспоем Богу: Аллилуиа.
(Этот кондак читается трижды, затем икос 1 и кондак 1)
Молитва
О преславный и достохвальный воине, флотоводче Феодоре, небесный защитниче и покровителю града нашего! В день славнаго прославления твоего, память твою почитая и православно тя величая, смиренно молим тя: вознеси ко Господу Богу теплыя молитвы твоя о нас и испроси у Него оставление всех согрешений наших, коими ежечасно преогорчеваем Его. Умоли Господа даровати нам ко Отечеству нашему любовь нелицемерную, мир и благоденствие Церкви нашей Православней, всем же нам телесное здравие и душевное спасение, христианскую кончину живота нашего и добрый ответ на Страшнем Суде Его. Ей, святче Божий, не посрами упования нашего, еже на тя по Бозе и Богородице возлагаем, но буди нам помощник и покровитель во спасение, да твоими молитвами получивше благодать и милость от Господа, прославим человеколюбие Отца и Сына и Святаго Духа и твое святое заступление, ныне и присно, и во веки веков. Аминь.