Акафисты - 08 августа 2025
Кондак 1
Возбранный чудотворче и Духа Святаго исполненный, преподобный отче Моисее, дивный подвижниче и недугов душевных и телесных целебниче, яко имеяй дерзновение ко Господу, от всяких нас бед свободи да в радости сердца зовем ти: Радуйся, преподобне отче Моисее, дивный чудотворче и чистоты поборниче.
Икос 1
Ангелов Творец и Господь сил яви тя, досточудне, Ангела во плоти и верных предстателя. Прибегающе убо к заступлению твоему, сицевая радостная тебе приносим: Радуйся, ангельския чистоты ревнителю; радуйся, предобрый иноков наставниче. Радуйся, целомудрия дивное светило; радуйся, усердный исполнителю поста и воздержания. Радуйся, светлый образе кротости и смирения; радуйся, утешение верным являяй. Радуйся, обителей земных покровителю небесный; радуйся, ярем благий на ся вземший. Радуйся, преподобне отче Моисее, дивный чудотворче и чистоты поборниче.
Кондак 2
Видя Господь чистоту сердца твоего, избра тя зрети славу небесную. Егда с двумя братиями твоими во град Киев преселился еси и святым страстотерпцем Борису и Глебу усердно поработал еси, тогда ты, блаженне, в молитвах потщался еси, елико бе мощно юноше святым подражати. Сего ради с веселием возопиял еси Богу: Аллилуиа.
Икос 2
Разум богодухновен имея, о преподобне отче Моисее, дивным смотрением Божиим, егда на реце Альте брата твоего Георгия вои Святополка погубиша вкупе со святыми страстотерпцами Борисом и Глебом, ты же един избавився убиения, пришел во град Киев к Предиславе сестре Ярославлей и был тамо моляся ко Господу прилежно, темже похваляюще Бога, спасшаго тя, глаголем ти сице: Радуйся, начало премудрости страх Божий правилом жизни себе предизбравый; радуйся, яко Ангела хранителя николиже опечалил еси. Радуйся, лучу Божественного света; радуйся, благоуханный крине девства и нетления. Радуйся, яко благочестием твоим угодил еси Христу Богу; радуйся, к Богородице молитвенниче наш неусыпный. Радуйся, немощей наших изрядный целебниче. Радуйся, избранный сосуде Духа Святаго. Радуйся, преподобне отче Моисее, дивный чудотворче и чистоты поборниче.
Кондак 3
Силою Вышняго, дарованною тебе, и долготерпением твоим был еси вельми преукрашен, егда же ведоша тя по руку и ногу железы тяжкими окована и твердо стрежаху, любовию к Богу выну пламенея, вопиял еси: Аллилуиа.
Икос 3
Имея благоприятную по благочестии ревность, был еси искушаем от некия жены младыя, имущей богатство многое, ея же муж с Болеславом идый не возвратися; та убо приемши во ум видения, доброту уязвися вожделением плотским к преподобному, он же вся терпя моляшеся. Сему убо благоговейно удивляющеся, с радостию вопием тебе: Радуйся, от млада возраста вдавый себя на служение Господу; радуйся. Того Единого паче всего возлюбивый. Радуйся, плоть духу покоривый; радуйся, вся по Бозе терпети изволивый. Радуйся, козни вдовы бодро отразивый; радуйся, тесным путем евангельским шествовавший. Радуйся, Киево-Печерския Лавры священное украшение; радуйся, яко тобою Господь прославляется. Радуйся, преподобне отче Моисее, дивный чудотворце и чистоты поборниче.
Кондак 4
Бурею одержима помышлений, восшуме нечестивая вдова на храм души твоея, преподобне, уведев же тя верного быти раба Христова, зело смятеся, темже и мы, зря житейское море воздвигаемое бурею страстей и напастей, притекаем к тихому пристанищу молитв твоих, вопия Христу Богу: Аллилуиа.
Икос 4
Слышавше и видевше святое житие твое, удивляхуся силе благодати, из уст твоих исходящей, и прославляху Бога, сего ради и мы радостно ублажаем тя: Радуйся, дивный избранниче Божий; радуйся, суетную славу мира сего во уметы вменивый; радуйся, за Сладчайшаго Иисуса душу твою положивый; радуйся, у престола Божия предстояй с горними силами; радуйся, на высоту безстрастия возшедый; радуйся, преподобне отче, в терпении неодоленный. Радуйся, Света Невечерняго причастниче. Радуйся, велию благодать от Господа стяжавый. Радуйся, преподобне отче Моисее, дивный чудотворче и чистоты поборниче.
Кондак 5
Боготечною звездою яви тя миру житие твое, преподобне отче Моисее, яко всего паче возлюбил еси чистоту душевную и телесную и ради мук временных уповая избавлен быти вечных мук, воспевал еси благодарне Богу: Аллилуиа.
Икос 5
Видя враг рода человеческаго чистое и святое житие твое, паче распаляет вдову, яже облече тя во ризы многоценныя и сладкими брашны питаше, безстудно влачаше на дело непреподобное, ты же, отче святый, прилежаше паче посту и молитве. Сего ради воспеваем ти сице: Радуйся, добрый воине Христов; радуйся, Святыя Церкве похвало и радование. Радуйся, дарами благодатными преисполненный; радуйся, не словом точию, но множае паче делом нас поучаяй. Радуйся, различными напастьми и искушеньми отягченных скоро пособствующий; радуйся, избранниче Христов, чудесы свидетельствованный. Радуйся, в подвигах земное течение совершивый; радуйся, сподобившийся зрети славу Божию. Радуйся, преподобне отче Моисее, дивный чудотворче и чистоты поборниче.
Кондак 6
Проповедуется во всем мире доблесть подвига твоего, блаженне, ибо ни во что же вменял еси житие мира сего. Гладом умысли злая жена уморити тя, вверженного в темницу. Друзии же увещаваху тя, глаголюще: кто не посмеется твоему безумию; уне ти есть покоритися жене сей. Ты же, блаженне, рече: вышняго ради Царства вся сия преобидех, поя Богу: Аллилуиа.
Икос 6
Возсиял еси в бренной плоти светом небесным, глаголя слова Евангельския: не оженивыйся печется о Господних, како угодити Господеви. Тем же вопием ти: Радуйся, отче, светом добродетелей твоих мир озаривый; радуйся, огнь любве Христовы в себе носивый. Радуйся, в бедах скорый помощниче; радуйся, ангельское житие являяй. Радуйся, не приложивый сердца к земному наслаждению; радуйся, молитвенниче о чтущих святую память твою. Радуйся, покоя вечного достигнувый. Радуйся, неизреченных благ наследниче. Радуйся, преподобне отче Моисее, дивный чудотворче и чистоты поборниче.
Кондак 7
Хотяй непрестанно житием и верою Господу благоугождати, был еси от черноризца святыя Афонския горы облечен во святый, ангельский, иноческий образ, тем же сиянием подвигов твоих просвещенни усердно величаем тя прославльшему тя Христу Богу вопием: Аллилуиа.
Икос 7
Новое показа зло оная лукавая жена егда в безумии своем оскопити тя повелела, ты же яко мертв лежал еси от течения крове, едва мало в себе дыхания имея. Благоговейне убо вспоминая долготерпение твое, блажим тя похвалами сими: Радуйся, яко огнь любве к Богу в сердце твоем непрестанно сохранивый; радуйся, бодрости и трезвения предобрый учителю. Радуйся, верных ко спасению наставляющий, Радуйся, твердее адаманта в терпении явивыйся, ибо кровию твоею, яко багряницею Церковь украсися. Радуйся, к преподобному Антонию работати Господеви пришедый. Радуйся, чудесы твоими обитель Печерскую прославивый. Радуйся, покоривый волю свою воле Отца Небесного. Радуйся, преподобне отче Моисее, дивный чудотворче и чистоты поборниче.
Кондак 8
Странное чудо является притекающим к тебе, блаженне Моисее, ибо дарова тебе Господь побеждати страсти. Таже подражая первому Моисею, творящему жезлом чудеса, жезлом страсть братнюю исцелил еси. Мы же, благодаря о сем Бога, даровавшему тебе таковую крепость, с любовию взываем: Аллилуиа.
Икос 8
Весь благодатных дарований исполненный, десятолетным безмолвием пещерным равноангельским просиял еси светом небесным и сподобился еси боговидец быти, обретеся бо достоин блаженства чистых сердцем, преподобне отче Моисее. Сего ради по долгу зовем ти: Радуйся, яко тобою Господь от страстей исцеление дарует; радуйся, блаженне, заповедь чистым сердцем быти верно исполнивый. Радуйся, яко свет Божественный зрети сподобился еси; радуйся, о душах наших непрестанный молитвенниче. Радуйся, древних, святых, богоносных отец нравы себе усвоивый; радуйся, высокая преподобных похвало. Радуйся, во смирении зело преуспевый; радуйся, яко успение твое прославляет Святая Церковь. Радуйся, преподобне отче Моисее, дивный чудотворче и чистоты поборниче.
Кондак 9
Все естество ангельское удивися высоте чистоты твоея, Церковь же паки прославляет тя, яко великий таинник Божия благодати был еси и зрети лицем к лицу Господа удостоился еси, да и мы с тобою выну вопием: Аллилуиа.
Икос 9
Витии многовещаннии не возмогут изрещи чистоту твою, блаженне, мы же любовию побеждаеми дерзаем воспети тебе похвалы таковая: Радуйся, немощных укрепление; радуйся, скорбных и печальных утешение; радуйся, добрых насадителю; радуйся, за девственную чистоту от Господа венчанный. Радуйся, Божия славы теплый рачителю, радуйся, талант врученный ти умноживый. Радуйся, Христа Бога всем сердцем возлюбивый; радуйся, светильниче, просвещающий сердца память твою чтущих. Радуйся, преподобне отче Моисее, дивный чудотворче и чистоты поборниче.
Кондак 10
Спасти хотя твою душу, нерадил еси о твоей плоти и в Лавре Печерстей святаго Антония конец странствия земнаго совершил еси, почив о Господе кончиною праведною и святою, яко победитель не с человеки, но со Ангелы воспевал еси Богу: Аллилуиа.
Икос 10
Стеною терпения оградився, Царя Небеснаго Христа верный служитель был еси, житие твое тесною стезею прошел еси. Мы же чтуще любовию память твоего преставления и мощей твоих честных обретения, ублажаем тя, вопиюще таковая: Радуйся, преславный наш заступниче; радуйся, предваряющий прошения призывающих тя во искушениях; радуйся, многими скорбьми в радость Господа вшедый; радуйся, слез излияньми душу твою омывый; радуйся, слово апостольское: любы долготерпит, исполнивый. Радуйся, блаженство райское со святыми унаследовавый; радуйся, богоугодным житием веру утвердивый. Радуйся, ближним и дальним помощь свою подаваяй; радуйся, мира горняго блаженный обитателю. Радуйся, преподобне отче Моисее, дивный чудотворче и чистоты поборниче.
Кондак 11
Пением акафиста чествуем тя и величаем, преподобне отче Моисее, ревностно совершающе святую память твою. Ты же, милостиво приимше малое моление наше, нам поборником, предстателем и молитвенником ко Господу. Мы же, поминая житие твое богоугодное и подвиги твоя многотрудныя, воспеваем прославльшему тя Творцу: Аллилуиа.
Икос 11
Светоподательному светильнику подобны честныя и цельбоносныя мощи твоя, досточудне отче Моисее, свет бо невечерний возсиявает от них чрез чудесы обильныя, тем же от любве сердечныя восклицаем тебе радостно: Радуйся, смертию временной прешедый в живот вечный; радуйся, Иоанна Многострадального чудесно уврачевавый. Радуйся, крине возращенный на земли для райских селений; радуйся, делателю добрый винограда небеснаго. Радуйся, маслино многоплодная сада Иисусова; радуйся, преподобных Печерских отцев величание. Радуйся, тихое пристанище обуреваемых страстьми; радуйся, во всем мире Богом прославленный. Радуйся, преподобне отче Моисее, дивный чудотворче и чистоты поборниче.
Кондак 12
Благодать дана ти от Бога соблюдати от нечистыя страсти всякаго человека, с верою и любовию к заступлению твоему прибегающего. Мы же Господу, даровавшему нам тебе, скорого, милостиваго врачевателя, благодарственне воспеваем: Аллилуиа.
Икос 12
Поюще равноангельское житие твое, ублажаем тя, отче Моисее, яко молитвенника о нас пред Господем, заступника и наставника ко спасению, и со умилением возглашаем ти таковая: Радуйся, о мире молитвенниче преизрядне; радуйся, не точию иноком, но и миряном путь к небу озаряющий. Радуйся, всех сердца любовию твоею к себе привлекающий; радуйся множеством чудес от Бога прославленный. Радуйся, странниче, отечествия небеснаго достигнувый; радуйся, терпением скорбей древнему Иову подражавый. Радуйся, во искушениях присный помощниче; радуйся, миро целебное Божия благодати. Радуйся, о тебе бо радуются Ангели и Бога славят человецы. Радуйся, преподобне отче Моисее, дивный чудотворче и чистоты поборниче.
Кондак 13
О, предивный угодниче и святый чудотворче, преподобне отче Моисее, малое сие песнословие, с любовию в похвалу тебе приносимое, от нас милостивно приемши, умоли всех Творца и Господа даровати нам душевное спасение и телесное здравие, верно воспевающих Богу: Аллилуиа.
(Этот кондак читается трижды, затем икос 1 и кондак 1)
Молитва преподобному Моисею Угрину
О, пречудный и богоносный отче Моисее, изрядный угодниче Христов и великий чудотворче, к тебе смиренно припадаем и молимся: даждь нам быти причастником любве твоея ко Богу и ближнему, помози нам творити волю Господню в простоте сердца и смирении, заповеди Господни совершати непогрешительно, призри благоутробно на всякую душу верных твоих чтителей, милости и помощи твоея ищущих. Ей, всеблагий угодниче Божий, услыши нас, молящихся тебе, и не презри нас, требующих твоего заступления и достойную песнь тебе приносящих, тебе ублажаем, отче Моисее, тя воспеваем, чистоты светильниче, прославляюще милостиваго Бога, во Святей Безначальней Троице славимаго Отца и Сына и Святаго Духа, ныне и присно и во веки веков. Аминь.
Кондак 1
Взбранной невесте Христовой, святей преподобномученице Параскеве, с верой и любовию похвальное пение, яко благой целительнице, приносим; ты же, страстотерпице Христова, милостивно нам приклонися, подвиги и страдания твоя воспевающим, и от всяких бед свободи ны, со умилением зовущия ти:
Радуйся, преподобномученице Христова, Параскево всеславная.
Икос 1
Ангел Господень послан бысть возвестити неплодным родителем твоим, преподобномученице, яко Бог молитву их услыша: родити бо имут дщерь благословенную, Царствия Небеснаго наследницу. Таковому, предивному предвозвещению о рождении твоем дивящеся, яко избранницу Божию ублажаем тя похвалами сими:
Радуйся, ангельским проречением провозвещенная; радуйся, неплодие родителей своих рождением твоим разрешившая.
Радуйся, многими молитвами у Бога испрошенная; радуйся, всех в молитве не унывати научившая.
Радуйся, благаго корене святое прозябение; радуйся, христолюбивых отца и матере дщерь боголюбезная.
Радуйся, от чрева матерня на служение Христу предызбранная; радуйся, Жениху Нетленному девство свое обручившая.
Радуйся, божественнаго к людям милосердия явление; радуйся, молитвы кадило непрестанное.
Радуйся, ленивых обличение; радуйся, сумнящихся благое утверждение.
Радуйся, преподобномученице Христова, Параскево всеславная.
Кондак 2
Видевши мира суету и непостоянство, Параскево Богомудрая, от мира удалитися вожделела еси, да возможеши непрестанно благоугождати Христу Богу и невозбранно иго Его благое понести, в молитвах же присно прилежати, зовущи Ему: Аллилуиа.
Икос 2
Разум небесный стяжавши, преподобномученице Параскево, по кончине родителей твоих вся имения нищим раздала есть, в путь исповедания Христова усердно потекши, того ради восхваляем тя сице:
Радуйся, красотою душевною просиявшая; радуйся, о телесной доброте небрегшая.
Радуйся, благодатию Святаго Духа душу твою исполнившая; радуйся, исповедания имене Его не убоявшаяся.
Радуйся, исповеднице Христова непоколебимая; радуйся, страстотерпице Иисусова многострадальная.
Радуйся, благовестнице Евангелия богомудрая; радуйся, добродетелей многих вместилище.
Радуйся, преподобномученице Христова, Параскево всеславная.
Кондак 3
Силою Божиею свыше укрепляема, святая преподобномученице Параскево, немощь естества женскаго отложила еси и, в броню исповедания Христова облекшися, со идолослужители крепко ратовала еси, иже аще и лютыми мученьми от любве Христа Бога тя отвратити тщахуся, но терпением твоим побежденни явишася, и со Ангелы Богу воспевала еси: Аллилуиа.
Икос 3
Имела еси душу, мужеством о Христе преисполненную, Параскево богомудрая, мучителей нечестивых крепко посрамила еси, темже мучительству их посмевающеся, аки в чуждем телеси бывши, Христа ради вся претерпела еси, нас же научила еси воспевати ти сицевая:
Радуйся, громогласная Божия исповеднице; радуйся, Сладчайшего Иисуса невесто прекрасная.
Радуйся, девство непорочное Ему в дар принесшая; радуйся, кровь твою за Него пролиявшая.
Радуйся, пред судии и мучители имя Его небоязненно исповедавшая; радуйся, свидетелей мучений твоих к вере приведшая.
Радуйся, в молитвах наших теплое прибежище; радуйся, нашего на Господа упования утверждение.
Радуйся, любителем временных наслаждений обличение; радуйся, горних ищущих ободрение.
Радуйся, в борениих сущим помощнице; радуйся, обидимым благое утешение.
Радуйся, преподобномученице Христова, Параскево всеславная.
Кондак 4
Бурею неверия одержимый царь Антонин удивися, егда тя виде в котле кипящем невредиму; егда же руце свои, от котла исполнивши, на лице мучителя повергла еси, той опален вопияше: «Помилуй мя, рабо истиннаго Бога, и даждь ми свет очей моих, да уверую в Бога, Его же ты проповедуеши, и пою Ему купно с тобою: Аллилуиа».
Икос 4
Слышавше многая и лютая страдания твоя, Параскево преславная, и мы, грешнии, терпению твоему умиленно дивимся: како и железо разженное на главе твоей носила еси и биения лютая многажды претерпела еси; темже тя ублажающе зовем:
Радуйся, язвы Господа Иисуса на теле твоем носившая; радуйся, Того Единаго возлюбившая.
Радуйся, об укрепляющем тя Господе вся возмогшая; радуйся, чудеса многая во уверение идолослужителей сотворившая.
Радуйся, терпением мучителей твоих препобедившая; радуйся, невернаго царя покаравшая.
Радуйся, исцеление тому милостиво подавшая; радуйся, среди народа римскаго имя Христово вельми прославившая.
Радуйся, всем языком образ долготерпения явившая; радуйся, всем родом исполнение веры показавшая.
Радуйся, восхваляющим подвиги твоя благодатное просвещение дарующая; радуйся, о гресех их Господа умоляющая.
Радуйся, преподобномученице Христова, Параскево всеславная.
Кондак 5
Боготечней звезде уподобилася еси, святая преподобномученице Параскево, грады и страны многия обходящи и Имя Христово проповедающи, за Него же многажды даже до крове пострадала еси, темже днесь томужде Господу предстоиши, непрестанно воспевающи ангельскую песнь: Аллилуиа.
Икос 5
Видевше людие преславное чудо твое, преподобномученице, како дракона великаго Имени Божия призыванием поразила еси, во Христа абие увероваша, глаголюще ти:
Радуйся, Господа и Христа твоего страданьми и чудесы прославившая; радуйся, спасения многих душ человеческих виновнице.
Радуйся, добропобедная страстотерпице Христова; радуйся, многочудесная свидетельнице Иисусова.
Радуйся, насадительнице веры истинныя; радуйся, милостивая целительнице недугов человеческих.
Радуйся, и грешныя люди любовию твоею не оставившая; радуйся, о просвещении душ наших возревновавшая.
Радуйся, труды многия Евангелия ради подъявшая; радуйся, сего ради велия в Царствии Небеснем пронареченная.
Радуйся, лика девственниц украшение; радуйся, полка мученическаго похвало преславная.
Радуйся, преподобномученице Христова, Параскево всеславная.
Кондак 6
Проповедником Христовым, богоносным Апостолом верно подражала еси, Параскево многострадальная, и в проповедании Евангелия чрез все житие твое подвизалася еси, человеки во спасение уловляющи. Темже чудес дарованием от Христа Бога обогатилася еси, о них же и невернии в веру приидоша и воспеша Богу: Аллилуиа.
Икос 6
Возсияла еси, яко звезда, на тверди Церкви Христовой, Параскево добропобедная, и всем нам образом жития твоего светиши ясно, темже верою и любовию память твою святую почитающе, вопием ти:
Радуйся, подвижнице Божия, постом и молитвою воспитанная; радуйся, голубице непорочная, кротости и незлобия преисполненная.
Радуйся, за своя мучители молитвы Господеви приносившая; радуйся, Христу, Спасителю нашему, тем уподобившаяся.
Радуйся, злобу врагов добром препобедившая; радуйся, Стефана первомученика венцу поревновавшая.
Радуйся, евангельских заповедей верная исполнительнице; радуйся, неверия грозная обличительнице.
Радуйся, кающихся прощения от Бога скорая подательнице; радуйся, верных ко спасению добрая наставнице.
Радуйся, сердца наша умиления исполняющая; радуйся, помыслы наша к Богу возносящая.
Радуйся, преподобномученице Христова, Параскево всеславная.
Кондак 7
Хотящи душу свою за Христа положити, Его ради многая мучения претерпевши, от нечестиваго мучителя Тарасия во главу усечена была еси, но от Христа венец нетленный на главу свою прияла еси, душею же твоею в горния обители райския востекла еси, идеже со Ангелы и всеми святыми сладце поеши Богу: Аллилуиа.
Икос 7
Новый живот вечный прияла еси, богохвальная, егда мечною кончиною от плоти разрешившися, на брак Небеснаго Жениха возшла еси. Его же молти не престай за ны, грешныя, любовию страдания твоя чествующия и глаголющия присно:
Радуйся, мученическое течение твое мечною кончиною увенчавшая; радуйся, тем главу невидимаго змия стершая.
Радуйся, во гласе пения ангельскаго на небо душею твоею воспарившая; радуйся, мученический лик на небесех возвеселившая.
Радуйся, постнический полк возрадовавшая; радуйся, девственнаго сонма веселящее украшение.
Радуйся, постническое житие, мученическую же кончину в себе сочетавшая; радуйся, и нас о добродетелех ревновати подвизающая.
Радуйся, свято и непорочно на земле пожившая; радуйся, идольскую лесть обличившая.
Радуйся, демоны посрамившая; радуйся, мучителю помысл покаяния вложившая.
Радуйся, преподобномученице Христова, Параскево всеславная.
Кондак 8
Странно есть неверным видети, како от единаго молитвеннаго призывания имени твоего святаго, Параскево многострадальная, недужным исцеления подаются и духи нечистии от человек отбегают, нам, грешным, тебе в помощь призывающим и поющим Богу: Аллилуиа.
Икос 8
Вся Церковь Христова честная страдания твоя, святая и всехвальная преподобномученице, прославляет, исцелений же благодать от тебе приемлет и радостно взывает ти, глаголющи:
Радуйся, в житии по смерти многими чудесы прославленная; радуйся, дары целебныя независтно подающая.
Радуйся, любящим и чтущим тя любовию сугубою воздающая; радуйся, во благих прошения наша скоро исполняющая.
Радуйся, в недузех страждущия благодатно посещающая; радуйся, неисцельныя болезни скоро исцеляющая.
Радуйся, болезни терпети хотящим помощь дарствующая; радуйся, душевныя страсти поборати помогающая.
Радуйся, яко на подвиг долготерпения твоего зряще, малодушия нашего устыждаемся; радуйся, яко мужество твое воспоминающе, воинствовати на плоть подвизаемся.
Радуйся, в животе твоем многия люди просветившая; радуйся, по преставлении твоем множайшия роды во благочестии утвердившая.
Радуйся, преподобномученице Христова, Параскево всеславная.
Кондак 9
Вси Ангели Небеснии и святых лицы радостно тя, преподобномученице, сретоша, егда во врата Царствия Небеснаго возшла еси, воеже мзду твоим подвигом и страданиям от Господа прияти; убо и нам, недостойным, наследие вечное со святыми испроси, молящи да сподобит нас Господь купно с тобою пети Ему во Царствии Небеснем: Аллилуиа.
Икос 9
Витийство человеческое не довлеет, воеже по достоянию тя, Параскево всеблаженная, прославити, обаче любовию твоею побеждаеми, приносим ти хваления сицевая:
Радуйся, со Христом вечно царствующая и о нас Его умоляющая; радуйся, дары Его Божественныя молитвами твоими щедро нам подающая.
Радуйся, кающимся снизхождение; радуйся, подвизающимся благое наставление.
Радуйся, от горних высот к земнородным милостию приникающая; радуйся, искушения демонская молитвою твоею отражающая.
Радуйся, ветвь победную в шуицу свою приявшая; радуйся, всем, во спасении труждающимся, помощь невидимо подающая.
Радуйся, Ангелом прореченная; радуйся, и собеседнице Ангелов явившаяся.
Радуйся, ум наш горе возносящая.
Радуйся, преподобномученице Христова, Параскево всеславная.
Кондак 10
Спастися молящимся ти пособляющи, святая преподобномученице, с верою приходящим в храм твой святый, дары благодатныя присно подаеши и всякое во благих прошение наше скоро исполняеши, яко дерзновение велие ко Христу Богу стяжавши. Ему же радостно поеши победную песнь: Аллилуиа.
Икос 10
Стеною молитв твоих, преподобномученице, от всякаго искушения диавольскаго нас огради, да не порадуется враг падениям нашим, но тобою крепко да посрамится в нас, хвалебно зовущих ти:
Радуйся, по Бозе и Богородице крепкое наше упование; радуйся, непостыдное в бедах предстательство.
Радуйся, в сонних видениих верных посещающая; радуйся, и неверным дары целебныя милостиво подавающая.
Радуйся, звездо Божия благодати, еюже мрак в нас прогоняется; радуйся, чудес пучино, всех нас неоскудно напояющая.
Радуйся, воздержанием древней Иудифи уподобившаяся; радуйся, мужеством сию превозшедшая.
Радуйся, яко Христовы мироносицы Христа возлюбившая; радуйся, Тому верная в мучениях своих пребывшая.
Радуйся, по глаголу Его прославленная; радуйся, Того выну лицем к лицу созерцающая.
Радуйся, преподобномученице Христова, Параскево всеславная.
Кондак 11
Пение наше хвалебное не довольно есть к прославлению многих и предивных чудотворений твоих, святая преподобномученице, обаче, яко благая и милостивая Христова подражательница, благосердием твоим на нас грешных воззри и святыми и благомощными твоими молитвами ко Господу мир душевный нам испроси, воеже взывати Богу: Аллилуиа.
Икос 11
Светлыми лучами чудес немерцаемо сияеши, Параскево Богохвальная, вся же, благочестно жити хотящия, благодатно к незаходимому Солнцу правды, Христу Богу, путеводиши, зовущих ти сице:
Радуйся, целомудрия цвете драгий и прекрасный; радуйся, мировместилище ароматы райскими преисполненное.
Радуйся, от исполнения твоего и нам дары благодатныя неискудно источающая; радуйся, доблестная исповеднице Христова, благодатию облеченная.
Радуйся, во смирении твоем на Небеси и на земли дивно возвеличенная; радуйся, нищетою временною богатство нетленное стяжавшая.
Радуйся, о Царствии Божием плач духовный выну явльшая; радуйся, в мучениях телеси своего плачу не предавшаяся.
Радуйся, кротостию твоего языка Христу унаследовавшаяся; радуйся, правды Его алкавшая.
Радуйся, о пище тленней Его ради забывшая; радуйся, милость Божию и на неверных молитвою твоею призывавшая.
Радуйся, преподобномученице Христова, Параскево всеславная.
Кондак 12
Благодать Господня молитвами твоими источнику воды от лет древних зде даровася. Темже и храму Божию со обители дев создатися тамо во имя твое благоволила еси. Сию убо выну присещай и не забуди духовных чад твоих, в преподобии тебе подражати хотящим и поющим Богу: Аллилуиа.
Икос 12
Поюще твоя подвиги и страдания и многая чудеса твоя, святая и всехвальная Параскево, молимся ти прилежно: молися о нас к прославльшему тя Владыце о еже избавитися нам от погибели вечныя, часть же спасаемых улучити, благодарно зовущим:
Радуйся, венценосице, от руки Христовы увенчанная; радуйся, чистотою сердца Боговидения сподобившаяся.
Радуйся, многия люди, Христу тобою уверовавшия, Богу примирившая; радуйся, ненависть от человек Христа ради приявшая.
Радуйся, страшныя муки Его ради подъявшая; радуйся, с светлою свещею на брак Жениха Небеснаго пришедшая.
Радуйся, свеще Божия ревности, елеем милости исполненная; радуйся, душы наша мастию Духа Святаго, в тебе живущаго, умащающая.
Радуйся, дщерь благословенная Отца Небеснаго; радуйся, яко мзда твоя многа на Небеси.
Радуйся, яко молитвы твоя действенны на земли; радуйся, яко силы твоея трепещут преисподнии.
Радуйся, преподобномученице Христова, Параскево всеславная.
Кондак 13
О, святая и многострадальная преподобномученице Парасксво! Приими милостивно моление сие наше и умоли Святую и приснопокланяемую Троицу избавити нас от мучений вечных и сподобити вкупе с тобою Царствие Небесное улучити и вечно Создателю нашему пети: Аллилуиа.
Этот кондак читается трижды, затем 1-й икос «Ангел Господень…» и 1-й кондак «Взбранной невесте Христовой…».
Молитва
О, святая и многострадальная преподобномученице Параскево! К тебе, аки теплей за ны к Богу молитвеннице, припадаем и прилежно молимся: умоли Господа и Владыку нашего пробавити милость Свою к нам, недостойным рабом Его, даровати же нам душевное и телесное здравие, земли плодоносие, воздуха благорастворение, во благочестии христианстем преуспеяние, к житию временному нужная и довольная, и вся ко спасению потребная; да мирно и благочестно поживше, сподобимся благую кончину христианскую улучити и Царствие Небесное наследити. Ей, предстательнице наша благая! Не посрами упования нашего, еже по Бозе и Пресвятей Богородице крепкое на Тя возлагаем, но буди нам ходатаица во спасение, да сподобимся вкупе с тобою и всеми святыми в радости блаженства вечнаго славити во твоем заступлении великую милость Бога нашего, Отца, и Сына, и Святаго Духа ныне, и присно, и во веки веков. Аминь.