Тропарь священномученика Ермолая и иже с ним
Мученицы Tвои, Господи,/ во страданиих своих венцы прияша нетленныя от Тебе, Бога нашего:/ имуще бо крепость Tвою,/ мучителей низложиша,/ сокрушиша и демонов немощныя дерзости./ Tех молитвами// спаси души нaша.
Тропарь священномученика Ермолая
Миром благодати помазан,/ преблаженне отче Ермолае,/ иерей Бога Вышняго явился еси/ и благочестия светлый проповедник,/ мученик же твердый и безмездный врач притекающих к тебе./ Слава Давшему тебе крепость,/ слава Венчавшему тя,/ слава Действующему тобою всем исцеления.
Ин тропарь священномучеников Ермолая, Ермиппа и Ермократа
Троицы провозвестницы,/ троице мучеников честная,/ идольское нечестие обличивший/ и тьмочисленнаго врага сокрушивший,/ ныне, со Христом царствующе, молите,/ священный Ермолае со Ермиппом и Ермократом славным,/ яко да и наша враги победим/ и приимем от Царя всех, Бога, вечный живот/ и венец нетленный.
Кондак священномученика Ермолая
Яко святитель благочестно пожив/ и священномучения венец приял еси./ Идольския жертвы погасив,/ добрый пастырь Христова стада был еси, премудре,/ и Пантелеимону истинный учитель./ Сего ради почитаем тя песньми, вопиюще:// от бед избави нас присно молитвами твоими, Ермолае, отче наш.
Тропарь преподобного Моисея Угрина
Другаго тя Иосифа,/ великий чистоты и целомудрия рачителю,/ всечестне и равноангельне Моисее,/ священными песньми восхваляюще, грешнии,/ молимтися прилежно:/ моли Христа Бога,/ яко да исцелит вся наша страсти// и подаст велию милость.
Кондак преподобного Моисея Угрина
В Вышних единаго Бога ища,/ земная вся презрел еси,/ о телеси своем нерадив,/ на муки мужески себе вдал еси,/ глад, жажду, узы, в темнице затворяемь, доблественно претерпел еси,/ биения, крове излияние и удов отрезание,/ чистаго ради девства твоего,/ мужески понесл еси./ И ныне с девственными лики предстоя Пресветей Троице,/ от всех искушений моли избавитися вопиющим ти:/ радуйся, Моисее, отче блаженнейший.
Ин тропарь преподобного Моисея Угрина, Печерского, в Ближних пещерах
Труды и подвиги со страстьми по чистоте твоей видя, святе,/ кто не удивится?/ Глад бо, темницу и раны приемля,/ не поработился еси сластем ляховицы,/ но, яко царь, страстьми обладаяй,/ ныне и тогда воспрославился еси от Всевидящаго человеческая сердца,/ от Негоже во искушениих всем пособствовати благодать прием,/ пособствуй и нам, твою память чтущим,/ Моисее преподобне
Тропарь преподобномученице Параскеве Римской
Тщание имущи сообразно имени твоему, тезоименитая, равноимянную тебе веру в сожительство избрала еси, Параскево победоносная, темже изливаеши исцеления и молишися о душах наших.
Кондак преподобномученице Параскеве Римской
Храм твой, всечестная, яко врачебницу душевную обретше, в нем вси вернии велегласно почитаем тя, преподобномученице Параскево славная.
Ин кондак преподобномученице Параскеве Римской
Страстотерпице, вернии, песнь Параскеве, приидите, согласно воспоим, облиставает бо чудесы в мире, отгоняющи прелести тьму, и дающи верным благодать независтную, зовущим: радуйся, мученице многострадальная.
Тропарь священномученику Сергию Стрельникову
Оршанския веси отрасль доброцветную и Марийския земли благолепное украшение, новаго мученика Христова Сергия почтим, житие бо многоскорбное в гонениих лютых добродетельне совершив и славне в подвиге скончав, Божественною славою на Небесех обогатился есть. Ныне же предстоя престолу Подвигоположника Христа Бога нашего, молит непрестанно о всех нас.
Кондак священномученику Сергию Стрельникову
В молитвах твоих не оскудевая, отче святый, и предстательством ограждая притекающих к тебе, буди нам всем, верою чтущим память твою, просвещение совести и очищение нравов, яко да и мы, божественною благодатию вооружившеся, возлюбим, якоже и ты, узкий путь, священномучениче преблаженне Сергие.