Каноны - 12 августа 2025

Песнь 1

Ирмос: Колесницегонителя фараоня погрузи чудотворяй иногда Моисейский жезл, крестообразно поразив и разделив море, Израиля же беглеца, пешеходца спасе, песнь Богови воспевающа.

Колесницею благодати Твоея, Господи, возвыси наша помыслы от дольних на Горняя и сподоби восхвалити угодника Твоего, святителя Алексия, песнь Тебе, Богу, воспевающа.

Колесницею ходатайств твоих ум наш, отягченный житейскими печальми, возвыси от земных к Небесным и настави восхвалити тя достойно, отче Алексие, песнь победную Богу воспевающа.

Колесницу гордости мира сего превозшел еси смирением, и, взем крест твой, последовал еси Христу добротами, и, во пристанище горняго селения достиг, песнь Богу победную воспеваеши.

Колесницею добродетелей, яко Илия огненною, возшел еси на Небо, отонудуже моли Бога низпослати яко милоть благодать Духа, учащую ны песнь победную Богу воспевати.

Богородичен: Колесница огнеобразная, носившая Бога Слова, во чреве Твоем воплощеннаго, моли Его прилежно спастися рабом Твоим, к Тебе притекающим и победную песнь Богу воспевающим.

Песнь 3

Ирмос: Небеснаго круга Верхотворче Господи, и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче.

Небеснаго круга и всея твари Господь, предведый тя, отче Алексие, будуща пастыря добра, ввери тебе паству словесную, яко Един Человеколюбец.

Небеснаго круга возлюбив Творца, постом облегчен, страстей море прешел еси и, на безстрастия верх добродетельми возшед, Бога узрел еси, Единаго Человеколюбца.

Небеснаго круга на высоту возшед Богоразумием, увидел еси умно тамо неизреченная и приял еси дар чудотворения от Бога Человеколюбца.

Богородичен: Небеснаго круга Верхотворца, хотяща родитися из Тебе, Пречистая, возвести Тебе Гавриил: радуйся, Дево, Господь с Тобою, Един Человеколюбец.

Седален, глас 4:

Благовонною слова Божияго пажитию словесную паству Христову Богоугодно воспитанную, пастырским Богодуховным исправления жезлом на правую спасения стезю путеводствив яко добрый пастырь, удостоился еси нетленну вечныя жизни мзду восприяти в Горнем Сионе от Пастыреначальника Христа Бога. Егоже моли, досточудне Алексие, нам, твоим овцам словесным, сохранитися от невидимых волков хищных.

Слава, глас 8:

Духом Божественным помазася верх твой священный, архиерее Алексие, и сниде на тя благодать богатно, и пребысть, яко миро, на главе сходящее на браду, браду Аароню, и сходящая, яко роса аермонская, и орошающая каплями благодеяний твоих притекающия к раце мощей твоих и зовущия тебе усердно: отче преподобне, моли Христа Бога грехов оставление даровати чтущим достойно святую память твою.

И ныне, Богородичен:

Повеленное тайно прием в разуме, в крове Иосифове тщанием предста безплотный, глаголя Неискусобрачней: приклонивый схождением Небеса вмещается неизменно весь в Тя, Егоже и видя в ложеснах Твоих, приемша рабий зрак, ужасаюся звати Тебе: радуйся, Невесто Неневестная.

Песнь 4

Ирмос: Ты моя крепость, Господи, Ты моя и сила, Ты мой Бог, Ты мое радование, не оставль недра Отча и нашу нищету посетив. Тем с пророком Аввакумом зову Ти: силе Твоей слава, Человеколюбче.

Ты моя крепость, Господи, Ты моя и сила, — вопия, отче Алексие, приял еси дар телесныя недуги целити и лукавыя духи отгоняти от зовущих Христу: силе Твоей слава, Человеколюбче.

Ты еси светило Российския земли и граду Москве стена нерушима, на враги же победитель, и христоименитым людем во бранех пособник, зовущим Христу: силе Твоей слава, Человеколюбче.

Ты Богословил еси Единицу несозданную, в Триех Лицех сущую, несливаему же и нераздельну, воумляя паству твою, отче Алексие, непрестанно звати: силе Твоей слава, Человеколюбче.

Богородичен: Ты моя крепость еси воистину и спасение, Богородице, и на Тя надежду мою возложих, спаси мя, Дево Чистая, и укрепи рождшемуся из Тебе звати: силе Твоей слава, Человеколюбче.

Песнь 5

Ирмос: Вскую мя отринул еси от лица Твоего, Свете Незаходимый, и покрыла мя есть чуждая тьма, окаяннаго? но обрати мя и к свету заповедей Твоих пути моя направи, молюся.

Вскую противнии ополчаются на ны, имущия тя крепка поборника? Ты, отче Алексие, дерзость их низложи и воинство наше молитвою твоею страшно им покажи.

Вскую унываем, согнетаемии множеством печалей, имуще скорбных утешителя — святителя Алексия, избавляюща ны от бед и скорбей наших и от враг видимых же и невидимых?

Вскую, отче Алексие, телесныя немощи находят на ны, и беды окружают ны, врача тя имущия в болезнех и утешителя в скорбех? изми убо ны от сих молитвами твоими.

Богородичен: Вскую обуревают мя волны страстей, кормчия Христа рождшая, Дево Всенепорочная? Ты Его моли сих исхитити мя и к стези заповедей Его пути моя управити, молюся.

Песнь 6

Ирмос: Очисти мя, Спасе, многа бо беззакония моя и из глубины зол возведи, молюся, к Тебе бо возопих, и услыши мя, Боже спасения моего.

Очисти ны, Спасе, от многих грехов наших и болезни отжени молитвами святителя Твоего Алексия, и мир Церквам Твоим подаждь и соединение.

Очисти сердца наша и мысли ходатайствы твоими, отче, и, приим от нас приносимыя тебе молитвы, испроси у Христа обрести нам велию милость.

Очистив сердце твое, отче Алексие, и трость языка твоего изострив Духом, написал еси в сердцах верных слово Богоразумия ученьми твоими.

Богородичен: Очищенну Тя Духом, Всенепорочная, Архангел Гавриил познав, зовяще Тебе: радуйся, Дево Марие, падших воззвание и клятвы разрешение.

Кондак, глас 8:

Божественнаго и пречестнаго святителя Христова, новаго чудотворца Алексия, верно вси поюще, людие, любовию да ублажим, яко пастыря великаго, служителя же и учителя премудра земли Россиистей. Днесь, в память его притекше, радостно возопием песнь Богоносному: яко имея дерзновение к Богу, многообразных нас избави обстояний, да зовем ти: радуйся, утверждение граду нашему.

Икос

Дивнаго и пречестнаго чудотворца видяще чудеса, исцеления подавающа всем, от души с верою притекающим, и Христовы люди невидимо посещающа, и землю Российскую просвещающа, радостно от души вси, вкупе сошедшеся к раце мощей его, слышаще же и видяще чудес множество и источник исцелений неисчерпаемь, чистыми сердцы и просвещенными разумы, яко благоуханно кадило, плоды добродетельны от души приносяще и радующеся, воззовем ему, глаголюще: радуйся, отче, честный наш учителю, яко приял еси трудов твоих воздаяние и в Вышних водворяешися, о нас моля Человеколюбца Бога. Чудес дар приял еси, земли Российстей отец и учитель, и святителем изрядная похвала, и воинству нашему во бранех пособник крепок. Радуйся, святителю Алексие, граду нашему утверждение.

Песнь 7

Ирмос: От Иудеи дошедше, отроцы в Вавилоне иногда, верою Троическою пламень пещный попраша, поюще: отцев Боже, благословен еси.

От Иудеи отроком поревновав, огнепальныя страсти угасил еси, Христу присно поя, блаженне Алексие: отцев Боже, благословен еси.

От Иудеи отроки подражал еси, живущею бо в тебе Духа благодатию просвещься, воспел еси Христу: отцев Боже, благословен еси.

От Иудеи отроком ревнуем, видяще мощи твоя чудоточащия, любовию распаляеми, Христу зовем: отцев Боже, благословен еси.

Богородичен: От Иудеи отроцы Твое прообразиша Рождество, Дево Всечистая, огнь бо в пещи не опали их, поющих: отцев Боже, благословен еси.

Песнь 8

Ирмос: Царя Небеснаго, Егоже поют вои Ангельстии, хвалите и превозносите во вся веки.

Царя Небеснаго хвалити учил еси паству твою, зовый: пойте и превозносите Христа во веки.

Царя Небеснаго умоли о нас, чадех твоих, радостно поющих и превозносящих Его во веки.

Царю Небесному предстоя, паству твою назирай, поющую и превозносящую Христа во веки.

Богородичен: Царя Небеснаго родила еси, Дево, Егоже Ангели поют и превозносят во вся веки.

Песнь 9

Ирмос: Воистину Богородицу, Тя исповедуем, спасеннии Тобою, Дево Чистая, с Безплотными лики Тя величающе.

Воистину свет миру явился еси, светящ добродетельми, и пастырь изряден твоего стада был еси, Христа величающа.

Воистину вемы тя, отче, чудотворца велика, точаща многа чудеса верно к тебе приходящим и Христа величающим.

Воистину светло память празднуют святителя Алексия архиереи, и священницы, монаси и вси людие, Христа Бога величающе.

Богородичен: Воистину Ты еси христианом спасение: Христа бо родила еси, спасающаго ны, Деву Чисту Тя величающия.

Светилен

Благодать Святаго Духа, всельшаяся в тя, святителя тя показа, Христос же ти вручи паству Свою паствити на пажитех духовных, Егоже ради потщался еси наставляти люди, и ныне на Небесех, радуяся, живеши.

Песнь 1

Ирмос: Поим, людие, дивно чудодействовавшему в Чермнем мори Христу Богу, яко древле Израиля всевооружена стопами пешешествовати непроходную сотвори и злобы делодателя фараона во глубине потопи.

Богосиятельными Триипостаснаго Света зарями Боговидно озаренный, златозарный светильниче церковный, Богомудре Алексие, молим тя: светоносными твоих молитв лучами в достолепую твою похвалу просвети ум тя хвалящих.

Христоподражательный ангеле земный, Богомысленный Небесным Ангелом собеседниче, Боговенчанный адских ангел победителю, удостоивыйся зрети великаго совета Ангела, Бога воплощенна, треблаженне Алексие, молим тя: твоими Боговнушаемыми мольбами избави ны от душевредных прилог адских.

Горьководною душетленных прегрешений бурею потопляеми, к тебе, яко досточудну влающагося моря утишителю, прибегающе, вопием: святе Алексие, твоими Богоугодными молитвами утиши волнующееся страстей наших море.

Богородичен: Светоносный облаче, одождивый нам дождь Небесный, воплощенное Слово Божие, Богородительнице Дево, неботочною Твоего благоутробия водою погаси огнепальный вредоносных страстей наших пламень.

Песнь 3

Ирмос: Да не хвалится мудр хваляйся, но о сем еже разумевати, яко несть свят, яко Бог наш, возносяй рог наш, даяй крепость царем нашим.

Тя, Богомудра кормчия, Небесным слова Божияго кормилом Богохранимый корабль Российския Церкве к благотишному вечныя жизни пристанищу праве кормильствовавша, блажаще, молим: всечестне Алексие, к благоведрой покаяния тишине кормильствуй души наша.

Душеспасительну всемощнаго моря Творца заповедь благопоспешно сохраньша и бурная влающагося моря треволнения молитвою утишивша, твоим чудодействительным предстательством утиши волнующуюся скорбей наших бурю.

Златоточная реко Божия, Небесными Евангельскаго учения водами Богосажденный Церкве Российския рай наводнившая обильно, досточудне Алексие, неботочною духовныя радости струею напаяй скорбящия души наша.

Богородичен: В Богозданном Богословяще Церкве апостольския Небе, к Тебе, светоносному незаходимаго Солнца Небу, прибегаем, вопиюще: Всепетая Дево, Твоею Небесною помощию помози нам, Тя блажащим, в Небесная вселитися жилища.

Седален, глас 4:

Благовонною слова Божияго пажитию словесную паству Христову Богоугодно воспитанную, пастырским Богодуховным исправления жезлом на правую спасения стезю путеводствив яко добрый пастырь, удостоился еси нетленну вечныя жизни мзду восприяти в Горнем Сионе от Пастыреначальника Христа Бога. Егоже моли, досточудне Алексие, нам, твоим овцам словесным, сохранитися от невидимых волков хищных.

Слава, глас 8:

Духом Божественным помазася верх твой священный, архиерее Алексие, и сниде на тя благодать богатно, и пребысть, яко миро, на главе сходящее на браду, браду Аароню, и сходящая, яко роса аермонская, и орошающая каплями благодеяний твоих притекающия к раце мощей твоих и зовущия тебе усердно: отче преподобне, моли Христа Бога грехов оставление даровати чтущим достойно святую память твою.

И ныне, Богородичен:

Повеленное тайно прием в разуме, в крове Иосифове тщанием предста безплотный, глаголя Неискусобрачней: приклонивый схождением Небеса вмещается неизменно весь в Тя, Егоже и видя в ложеснах Твоих, приемша рабий зрак, ужасаюся звати Тебе: радуйся, Невесто Неневестная.

Песнь 4

Ирмос: Гласом благоглаголивым предразумев, Аввакум зряще Слова воплощение и взываше яве: слух услышах Божия совета, Бог бо непреложно Человеком возбеседует, из горы грядый Девственнаго чрева и мир избавляя началородныя клятвы.

Богосодеянною смиренномудраго исправления мрежею неисчетное рыб словесных множество Богопоспешно уловлей, Богомудрый ловче, досточудный Алексие, Богокованною предстательства твоего удицею извлецы ны из глубокия зол многих пучины.

Небесным слова Божия врачевством душетленныя уврачевствовавый людских грехопадений язи и Богоустроенным кроткаго наказания пластырем умовредныя исцеливый раны, безмездный целителю, досточудный Алексие, молим тя, исцели душевредныя грехов наших струпы.

Благоплодовитое Богонасажденнаго сада древо, благовонныя прозябшее достохвальных исправлений плоды и плодоносныя простершее к Небу Боговнушимых молений ветви, всечудне Алексие, молим тя: Богорасленным твоего покрова листвием осени ны от вредоноснаго лютых бед жега.

Богородичен: К Тебе, златозарная Света Невечерняго заре, Богородительнице Дево, прибегаем, вопиюще: светозарным Твоего защищения сиянием разреши темнозрачен облак печалей наших.

Песнь 5

Ирмос: Нощеборимых страстей тимением к Тебе утренюю, Единому Благоутробному, души моея мглу просвети и узы пресеки долгов моих, яко да Твоим Соприсносущным Духом просвещаемь, правды путь нетленный обрящу повелений Твоих.

Словесную паству Христову благовонным Евангельскаго учения злаком Богоугодно воспитавый и на правый Христоподражательнаго жития путь Боголепно наставлей, пастырю добрый, всеблаженне Алексие, молим тя: твоими молитвами настави ны на правую заповедей Божиих стезю.

Богозданный Духа Святаго сосуде, чистым любве Божия златом Боголепно позлащенный, Богомудре отче Алексие, раждеженным слова Божия сребром чада твоя обогащей обильно, молим тя: твоими молитвами подаждь нам Небесное Божия благодати богатство.

Богоначальному премирных умов лику сообщенный и Богосиятельными Триипостаснаго Света зарями Боговидно озаренный, уме Богомудрый, священноначальниче Алексие, Небесною Богооткровенныя ти мудрости лучею просвещай свыше мрачныя умы наша.

Богородичен: Богорасленный грозд, воплощенное Слово Божие прозябшая, Богосажденная лозо, Всенепорочная Дево, молим Тя: благовонным Божия благодати вином напаяй жаждущия души наша.

Песнь 6

Ирмос: Из чрева адова вопля моего услышал еси глас мой и возвел еси от тли бури прегрешений, обдержит бо, Спасе, и погружати искушает, Блаже: но якоже прежде Иону возвел еси от тли, и мене, молюся, Господи, предварив, спаси.

Златозарная Российская звездо, светоносными равноапостольских исправлений зарями Богозданное Церкве Божия Небо озарившая светло и темномрачну варварских наветов мглу разрешшая Богопоспешно, всеблаженне Алексие, разреши темен напастей вражиих облак.

В Боголепную Невещественнаго Бога славу вещественныя храмы Божия Боготщательно создавый, мысленный храме Божий, Богоносе Алексие, молим тя, Богоугодными твоими мольбами Богоприемный храм Божий созижди сердца наша.

Пагубородное гордаго кичения терние исторгнувый и доброрасленныя смиреномудраго Богомыслия леторасли Богопоспешно возрастивый, благоплодовитый Небеснаго сада кореню, всечудне Алексие, насади в сердцах наших Богорастительный Богоугоднаго смирения корень.

Богородичен: Всемощнаго морских треволнений утишителя, воплощенное Слово Божие рождшая, Богородице Дево, Небесною Твоего заступничества тишиною многобурную утиши скорбей наших молву.

Кондак, глас 8.

Божественнаго и пречестнаго святителя Христова, новаго чудотворца Алексия, верно вси поюще, людие, любовию да ублажим, яко пастыря великаго, служителя же и учителя премудра земли Российстей. Днесь, в память его притекше, радостно возопием песнь Богоносному: яко имея дерзновение к Богу, многообразных нас избави обстояний, да зовем ти: радуйся, утверждение граду нашему.

Икос:

Дивнаго и пречестнаго чудотворца видяще чудеса, исцеления подавающа всем, от души с верою притекающим, и Христовы люди невидимо посещающа, и землю Российскую просвещающа, радостно от души вси, вкупе сошедшеся к раце мощей его, слышаще же и видяще чудес множество и источник исцелений неисчерпаемь, чистыми сердцы и просвещенными разумы, яко благоуханно кадило, плоды добродетельны от души приносяще и радующеся, воззовем ему, глаголюще: радуйся, отче, честный наш учителю, яко приял еси трудов твоих воздаяние и в Вышних водворяешися, о нас моля Человеколюбца Бога. Чудес дар приял еси, земли Российстей отец и учитель, и святителем изрядная похвала, и воинству нашему во бранех пособник крепок. Радуйся, святителю Алексие, граду нашему утверждение.

Песнь7

Ирмос: Тя живописующий ассирийский пламень юноши три спасе, Господи, якоже и Деву не опали Отроковицу, в Божественном Рождестве Твоем Божественная искра: препетый отцев Боже, благословен еси.

Тя, яко от Небеснаго врача дар исцеления туне приемша, тако вредоносныя к тебе прибегающих язи туне исцеливша, усердно молим, врачу безмездный, архиерее Алексие: Небесною твоих мольб цельбою исцели лютыя недуги душ и телес наших.

Боготканная православнаго благочестия ризо, многоценными превеликих добродетелей бисерми Боголепно удобреная, всехвальне Алексие, моли светом одеяющася Бога в светлую вечныя жизни ризу одеятися душам нашим.

Трудолюбный Богосажденнаго сада делателю, благовонную досточудных исправлений кассию насадивый и Богорасленную постническаго воздержания смирну в Боголюбивом сердцы твоем вкоренивый, святе Алексие, Неботочную защищения твоего стакту излий на любящая тя сердца наша.

Богородичен: От Богосиятельнаго Правды Солнца Богооткровенно паче умов премирных озаряема, светозарная луно, Всенепорочная Дево, светоносною Твоея благодати лучею мрачная просвети сердца наша.

Песнь 8

Ирмос: Находящия в пламени беззаконнаго мучителя велением отроки подражающе, немолчными устнами в Вышних похвально возопиим: Блаже, преестественно Сын Пресвятый, поющия Тя Светом умным Твоим озари.

Небесною Богоприятныя молитвы цельбою телесную варварския царицы слепоту преестественно исцеливый, Богомудрый, душевных и телесных недуг целителю, всеблаженне Алексие, молим тя: душевную исцели слепоту вредоносных прегрешений наших.

Церковная красото, преосвященная главо, непоколебленный благочестия столпе, Богозданный веры степеню, неисчерпаемая Божественных чудес пучино, всечестне Алексие, златоточными твоих мольб водами вредоносен погаси огнь печалей наших.

Пагубоносное грехопадений стволие Божественным любве Божия огнем Богоугодно сожег и Богозданным веры степенем к невещественну огню преестественну, в Живоначальной Троице Богу, приступив благоговейно, преподобне отче Алексие, от геенскаго огня избави души чад твоих, тя блажащих.

Богородичен: Присносущную Жизнь, воплощенное Слово Божие паче слова человеча истинно рождшая, Всепетая Богородице Дево, молим Тя: избави ны, рабы Твоя, от вечныя смерти.

Песнь 9

Ирмос: В Тебе, Богородице, наше умаление преста, невидимое бо Слово во утробе Твоей приемшая, сугуба Того родила еси, Бога вкупе и Человека, на Негоже Херувими воззрети не дерзают. Темже Тя величаем, Пречистая.

Благовидною архиерейских исправлений красотою Богопоставленный престол твой Боголепно украсивый, первопрестольный иерарше, всечестне Алексие, моли седящаго на премирных престолех Бога удостоитися нам, тя блажащим, в Царствии Небесном предстати Божию престолу.

К чудотворным твоим мощем притекающе усердно, молим тя, чудоточный источниче, досточудне Алексие: Боготочною Божественных чудес твоих струею угаси раждеженое бед и печалей наших горнило.

С царствуемым миром православныя люди наша от всяких бед защити, Богозданный православия щите и Церкви Русския первопрестольный иерарше, всеблаженне Алексие, в Боголепое церквей Божиих благостроение даждь свыше Небесную помощь.

Богородичен: Боговидцем Моисеем виденная в Синаи купино неопальная, огнь Божественный, воплощенное Слово Божие рождшая, Всесвятая Дево, Небесным любве Божия огнем разжзи оледевшая сердца наша.

Светилен

Благодать Святаго Духа, всельшаяся в тя, святителя тя показа, Христос же ти вручи паству Свою паствити на пажитех духовных, Егоже ради потщался еси наставляти люди, и ныне на Небесех, радуяся, живеши.

Песнь 1

Ирмос: Яко по суху, пешешествовав Израиль по бездне стопами, гонителя фараона видя потопляема, Богу победную песнь поим, вопияше.

Отверзи ми устне благодатию Твоего Божества, Христе, и, озарив, просвети душу же и сердце несумненною верою воспети обретение честных мощей святителя Твоего Алексия.

От уст недостойных, и от сердца нечиста, и от недостижнаго ума нашего приими малое хваление, святителю Алексие, воспети обретение честных мощей твоих.

Троицу Лицы, Единицу же Существом проповедал еси, святителю, и от Тоя независтныя дары приял еси, и исцеления различная подаваеши верою приходящим к раце мощей твоих.

Богородичен: Языков чаяние древле Тобою даровася, Пречистая Богородице: Ты бо Христа родила еси, от рова прегрешений возводяща во тлю поползшияся и от бед избавляюща Тя величающия.

Песнь 3

Ирмос: Несть свят, якоже Ты, Господи Боже мой, вознесый, рог верных Твоих, Блаже, и утвердивый нас на камени исповедания Твоего.

Смиреномудрия нравом и образа кротостию Ангельскому житию подобяся, нескверно и непорочно тело твое соблюл еси, преосвященный отче, святителю Алексие.

Яко звезда многосветлаго солнца, от гроба возсияша, от многих лет сокровены, честныя мощи святителя Алексия, чудес лучи испущающе и исцеления всем подающе.

Радостию убо возрадовашася вси московстии народи, архиерей великий со святители, и христолюбивии князи, и церковное все совокупление, егда обретошася честныя твоя мощи, ничимже вредимы, святителю Алексие.

Богородичен: Рождшая Свет всему миру, просвети наша помышления, Пречистая Владычице, и неразумия мглу далече отжени, едина Богоблаженная.

Кондак, глас 3

Яко светоносная память святителя всем разруши уныние и свет облиста Небесных даров, всех созывающи на веселие: от Бога бо, святителю Алексие, благодать обрете прогонити недуги и вся человеки исцеляти, и мнихом же степень показася.

Седален, глас 1

Память обретения честных мощей твоих наста нам светло празднество, пречудный святителю Христов, Алексие прехвальне, в нюже чудес благодать приял еси от всех Царя, Христа Бога, различныя недуги от человек отгонити, и от уз избавляти, и обидимых от лют изымати. Темже зовем: избави нас от враг наших.

Слава, и ныне, Богородичен

Гавриилу вещавшу Тебе, Дево, радуйся, со гласом воплощашеся всех Владыка в Тебе, святем кивоте, якоже рече праведный Давид, явилася еси, ширшая Небес, поносивши Зиждителя Твоего. Слава Всельшемуся в Тя, слава Прошедшему из Тебе, слава Свободившему нас рождеством Твоим.

Песнь 4

Ирмос: Христос моя сила, Бог и Господь, честная Церковь боголепно поет, взывающи, от смысла чиста о Господе празднующи.

Благодарственныя песни принесем Христу Богу нашему, таковаго святителя даровавшему Церкви Своей, пречестное удобрение и граду Mосквe великое утверждение.

Яко Аарон незлобием, Духа благодатию, славне, в ризу свыше облеклся если преподобия и правды и, предстоя престолу Христову, моли о нас непрестанно, святителю Алексие.

Яко луча светозарнаго солнца, от гроба нам взыде, святителю, озаряя всех, верою почитающих обретение честных мощей твоих, Богоблаженне Алексие.

Богородичен: Радости нам ходатаица явилася еси, яко приемши исполнение всего Божества, Всенепорочная. Тем вси, радуйся, Ангелово велегласно зовем, Богорадованная.

Песнь 5

Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.

Благодатию Божественнаго Духа молитва твоя поспешествуема: егда убо церковь падеся, образов, иже в ней, святых ничимже вреди, яко ни праху прикоснутися им, тако и ныне сохраняй град твой от сопротивных враг.

Всем христианом в бедах помощник и граду Москве велий заступник, недугующим врач безмездный, и сущим в нуждах и скорбех готовейший утешитель, и ходатай теплый ко всех Царю, Христу Богу.

На земли положено бысть честное тело твое, святителю Алексие, дух же возлете на Небеса, со апостолы же и святители и со Ангелы ликовствуя, Святей Троице предстоиши: молися прилежно за град и люди твоя, святе.

Богородичен: Тайны Твоея глубина, Пречистая Богородице, Ангельския чины удивляет, и честная Твоя икона бесы смущает и прогоняет, мы же покланяем Ти ся, ведуще Тя, Божию Матерь.

Песнь 6

Ирмос: Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.

Христовою силою облеклся еси, Алексие премудре, и священнодетель истинен показался еси, Божиим сиянием просветився, яко от окрина, честныя твоея раки исцеления различна неоскудно подаеши празднующим верно честных твоих мощей обретение.

Вседетальнаго Духа пресветлыми лучами осияемь присно, от различных искушений, и бед, и скорбей, обдержащих нас, яко Христов угодник, отче, избави рабы твоя, светоносное твое торжество всегда совершающих верно, святителю Алексие.

Ясно проповедал еси единство Троицы, и немудрых сердца в разум привел еси, и рождшему Слово сопрестольно Богоразумием истинным равно славословив. Тем, в Небесных селениих водворяяся, от бед нас избавляй.

Богородичен: Рождшая сияние славы Отчи, Дево Богородице Всепетая, просвети души поющих Тя: Твоею бо благодатию нетленны сохранены быша честныя мощи святителя Алексия, различныя дарования источающа верою чтущим память его.

Кондак, глас 8

Яко солнце незаходимое, от гроба возсия нам от мног лет сокровены честныя твоя мощи нетленны, святителю Алексие, тобою благодать приемлем: всю бо страну сию и вся ны чудесы и добротою обогащаеши, действом благодати, да поем ти: радуйся, отче, светило России.

Икос

Похвалим ныне святителя песньми, Российскаго пастыря и учителя, и благочестно притецем к paцe мощей его, и почерпем дарования, яко от источника исцелений. Юже обстояще ныне, радостно веселимся и, усердно обшедше, светоносными песньми прославим, глаголюще: чудотворче святителю Алексие, чудесы обогащай всех нас содеянием благодати, да поем ти: радуйся, отче, светило России.

Песнь 7

Ирмос: Росодательну убо пещь содела Ангел преподобным отроком, халдеи же опаляющее веление Божие мучителя увеща вопити: благословен еси, Боже отец наших.

От светоносныя десницы прием благодать чудес, верою просящим, отче, исцеления различная подаваеши, святителю Христов Алексие, благочестно поющим: благословен Бог отец наших.

Гроб, идеже положено бысть честное тело твое, сокрушен бысть от многаго камения, егда распадеся церковь, мощем же твоим никакоже прикоснуся. Ихже мы зряще, неизреченно светящихся, радостно зовем: благословен Бог отец наших.

В Триех Ипостасех Богоначальных державу Отца, равнодетельна Сына и Духа богословил еси, и Той тя прослави, и заступника тя показа нам, зовущим ти: избави нас, святе, от всех зол, находящих на ны.

Богородичен: Тя Заступницу, Чистая Богородице, стяжахом, и на Тя вси надежду возложихом, и к Тебе прибегаем: спаси нас, Всенепорочная, и избави молитвами Твоими от обдержащия скорби и мятежа и лютых напастей и бед.

Песнь 8

Ирмос: Из пламене преподобным росу источил еси и праведнаго жертву водою попалил еси: вся бо твориши, Христе, токмо еже хотети. Тя превозносим во вся веки.

На Небесех чини Ангельстии ликуют, и на земли верных собори светло празднуют обретение честнаго твоего телесе, святителю Алексие, песньми славяще Христа во веки.

Вонми и услыши глаголы наша, святителю Христов Алексие, и спаси Святейшаго Патриарха нашего, град же и люди изми от всякаго зла, поющия и превозносящия Христа во веки вся.

Единоначальная Троица, всеми владычествующая, Яже тобою воспеваемая, сим одари тя мановением Божественным, цело и нетленно священное твое тело сохрани, славящих бо Ю прославляет во веки.

Богородичен: Не умолчим никогдаже величати и глаголати заступление Твое, еже твориши, утишающи мятеж, прибегающим к покрову Твоему, Богомати, и надежду тверду имущим Тя во веки.

Песнь 9

Ирмос: Бога человеком невозможно видети, на Негоже не смеют чини Ангельстии взирати; Тобою же, Всечистая, явися человеком Слово воплощенно, Егоже величающе, с Небесными вои Тя ублажаем.

Со апостолы и святители Владычню престолу и с лики Ангельскими предстоя, моли избавити нас от печалей, находящих на ны: яко бо огнь, палящ и разжизающ, лютый пламень, обходящий нас, от негоже избави ны, святителю Алексие премудре, да тя ублажаем.

Явися звезде подобно, светоносивей подобие образа твоего, духовными лучами просвещая сердца верных, Богоразумия же светом лучи чудес испущаеши и исцеления подаваеши, святителю, празднующим любовию обретение честных мощей твоих.

В Триех Богоначальных Ипостасех Един Сый Бог, славимый всегда и царство имеяй непременно, всемощною твоею десницею шатания враг нечестивых, и братоубийц выи низверзи под нозе воинству нашему.

Богородичен: Роди вси Тя ублажают ныне, Пречистая Богородице, и всяк град и страна, оружие, и заступление, и забрало Тя имуще, хвалятся Тобою, яко крепость их рождшую, Владыку всех, Христа Бога, силу имущаго непобедимую.

Светилен

Приидите вси, дивнаго и славнаго в чудесех, великаго святителя Алексия песньми священными похвалим, Российскаго светильника и учителя, и Ангельским чином ссельника, и молитвенника тепла ко Господу о чтущих память его.

Песнь 1

Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.

Даждь ми слово, Слове, и ум мой благодатию Духа просвети, еже восхвалити Твоего угодника, святителя Алексия.

Испроси у Христа даровати ми благодать Духа, еже соплести тебе достодолжную хвалу, Богомудре отче Алексие.

Приими моление наше, святителю Алексие, и озари наша мысли светом твоих добродетелей, пети тя достойно.

Богородичен: Земнороднии Рождеством Твоим, Дево Богородице, от земли к Небесней высоте взяхомся и ангельским ликом причтохомся.

Песнь 3

Ирмос: Утвердися сердце мое во Господе, вознесеся рог мой в Бозе моем, разширишася на враги моя уста моя, возвеселихся о спасении Твоем.

Молим тя, святителю, моли о хвалящих тя и притекающих любовию к честным мощем твоим, еже получити грехов прощение и бед свобождение.

Прослави тя Господь, святителю Алексие, многа бо лета тело твое, землею покровено, соблюде нетленно, точащее чудеса просящим тя тепле.

Прояви Господь мощи твоя и, яко светильник светел, постави я не под спудом, но на свещнице, да светят сиянием чудес притекающим ти с верою.

Богородичен: Приводим Тебе в молитву милостивную Ходатаицу, рождшую Тя плотию, Христе Боже наш, Еяже молитвами, Щедре, мир Твой умири.

Кондак, глас 3

Яко светоносная память святителя всем разруши уныние и свет облиста Небесных даров, всех созывающи на веселие: от Бога бо, святителю Алексие, благодать обрете прогонити недуги и вся человеки исцеляти, и мнихом же степень показася.

Седален, глас 1

Память обретения честных мощей твоих наста нам светло празднество, пречудный святителю Христов, Алексие прехвальне, в нюже чудес благодать приял еси от всех Царя, Христа Бога, различныя недуги от человек отгонити, и от уз избавляти, и обидимых от лют изымати. Темже зовем: избави нас от враг наших.

Слава, и ныне, Богородичен

Гавриилу вещавшу Тебе, Дево, радуйся, со гласом воплощашеся всех Владыка в Тебе, святем кивоте, якоже рече праведный Давид, явилася еси, ширшая Небес, поносивши Зиждителя Твоего. Слава Всельшемуся в Тя, слава Прошедшему из Тебе, слава Свободившему нас рождеством Твоим.

Песнь 4

Ирмос: Из горы приосененныя, Слове, пророк, единыя Богородицы, хотяща воплотитися боговидно усмотри и со страхом славословяше силу Твою.

Теплый предстателю бедствующих и молящихся скорый услышателю, отче наш, святителю Алексие, избави от всяких напастей вся, призывающия тя.

Светильниче всесветлый, просиявый добродетельми твоими, озари сердца наша, омраченная прилоги льстиваго, и разжени тьму страстей присно борющих ны.

Празднующим светло память твою, отечеству нашему и людем мир у Христа испроси и избави от междоусобныя брани и нашествий противных.

Богородичен: Палата прекрасная и престол Всецаря Христа показалася еси: честнейшая бо еси воистину всех тварей, Богомати, Предстательница и покров душ наших.

Песнь 5

Ирмос: От нощи неведения Боговедением просветивый концы, просвети мя утром человеколюбия Твоего, Господи.

Блистаньми чудес твоих, Богомудре, церковь твою озари и люди возвесели, Христа моля дати всем нам грехов прощение.

Моли о нас Всесвятую Троицу, святителю Алексие, яко да низпослет нам благодать Свою, хвалящим тя любовию.

Всечестная рака твоя, святителю Алексие, чудеса точит приходящим верно и просящим подает цельбу обильно.

Богородичен: Единаго от Троицы воплощеннаго Бога истинно родила еси, Егоже моли от бед избавитися рабом Твоим.

Песнь 6

Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.

Преосвященне Алексие, красото церковная, архиереев благолепие, равностоятелю же святых Ангел, моли о хвалящих тя и испроси получити всем грехов оставление.

Преблаженне святителю Алексие, молися прилежно за град и люди твоя, и обдержащия скорби премени, и грехов прощение и горняго веселия наследие испроси.

Подвиг твоих трудами приял еси Божественная дарования: честныя бо твоя мощи в шестьдесятное лето обретошася нетленны, исцеления различная подающия.

Богородичен: Припадающе, молим Тя прилежно, всемилостивая Владычице: моли из Тебе рождшагося избавити ны лютыя скорби, и варварскаго прещения, и всякаго навета вражия.

Кондак, глас 8

Яко солнце незаходимое, от гроба возсия нам от мног лет сокровены честныя твоя мощи нетленны, святителю Алексие, тобою благодать приемлем: всю бо страну сию и вся ны чудесы и добротою обогащаеши, действом благодати, да поем ти: радуйся, отче, светило России.

Икос

Похвалим ныне святителя песньми, Российскаго пастыря и учителя, и благочестно притецем к paцe мощей его, и почерпем дарования, яко от источника исцелений. Юже обстояще ныне, радостно веселимся и, усердно обшедше, светоносными песньми прославим, глаголюще: чудотворче святителю Алексие, чудесы обогащай всех нас содеянием благодати, да поем ти: радуйся, отче, светило России.

Песнь 7

Ирмос: От Иудеи дошедше, отроцы в Вавилоне иногда верою Троическою пламень пещный попраша, поюще: отцев Боже, благословен еси.

Орган духовный был еси, отче святителю Алексие, умно движим благодатию, присно бряцал еси, поя: отец наших Боже, благословен еси.

На земли, яко солнце, сияеши чудесы, отче блаженне, на Небесех же венценосец, радуяся, поеши: отец наших Боже, благословен еси.

Благодатию Духа честныя мощи святителя Алексия различныя цельбы подают верою поющим: отец наших Боже, благословен еси.

Богородичен: Телесныя слабости и душевныя недуги, Богородительнице, любовию приходящих к крову Твоему исцели, врача Христа нам рождшая.

Песнь 8

Ирмос: На горе святей прославльшася и в купине огнем Приснодевы Моисеови тайну явльшаго, Господа пойте и превозносите во вся веки.

Потщися, святе, избавити ны от напастей и скорбей многих, обдержащих ны, плотских и душевных, да, радующеся, поем Христа во вся веки.

Призывающия тя, отче, избави всякаго зла и лютых нахождений и от напрасныя смерти исхити поющия Христа во вся веки.

Манием Божественным различныя цельбы подают честныя твоя мощи, святителю, просящим тя усердно и Христа поющим во вся веки.

Богородичен: Рождшая Единаго от Троицы, молити не престай, Богородице, избавитися нам от бед, поющим и превозносящим Его во веки.

Песнь 9

Ирмос: Проявленное на горе законоположнику во огни и купине Рождество Приснодевы в наше верных спасение, песньми немолчными величаем.

Помилуй ны, смиренныя рабы твоя, святителю Алексие, и от тьмы скорбей изми и пламене искушений исхити, верно к тебе притекающия.

Яко звезда светозарная, на Небесех водворяяся, с лики святых Ангел молися о хвалящих тя и притекающих к раце честных мощей твоих.

Архиереев украшение, монахов удобрение, всех верных прописание, Церкве изрядный пастырь и учитель ты еси, Алексие преосвященне.

Богородичен: Безсеменно рождшая плотию Ипостасное Слово Пребезначальнаго Отца, молися Ему, Богородице Всепетая, спасти души поющих Тя.

Светилен

Приидите вси, дивнаго и славнаго в чудесех, великаго святителя Алексия песньми священными похвалим, Российскаго светильника и учителя, и Ангельским чином ссельника, и молитвенника тепла ко Господу о чтущих память его.

Песнь 1

Ирмос: Грядите, людие, поим песнь Христу Богу, раздельшему море и наставльшему люди, яже изведе из работы египетския, яко прославися.

Светлое празднество твое, святе Иоанне, радостно на духовную трапезу нас созывает, в нейже учреждаеши ны вся, к тебе притекающия, даровании, в пользу прошения нам исполняя.

Подвигом добрым подвизався на земли, преблаженне Иоанне, и от злаго мучителя мученики Христовы сохраняя, приял еси от Христа Бога Небесную жизнь, отнюдуже в скорбех нам подаждь помощь.

Воинством истинным, Богомудре, злочестиваго царя небрег мучительства и богатство нищим Христа ради расточив, приял еси дар чудес от Бога, лукавыя человеки обличая, благочестивым способствуеши.

Воинство земное небрегл еси, иногда Христа ради тело свое удручая постом и молитвою, и враги посрамил еси. Сего ради и чудесы от Бога обогатился еси.

Богородичен: Воплотися из Тебе боголепно Слово Безплотное премножеством человеколюбия, Пречистая Дево; Егоже, Владычице, моли вечное блаженство даровати нам.

Песнь 3

Ирмос: На камене мя веры утвердив, разширил еси уста моя на враги моя, возвесели бо ся дух мой, внегда пети: несть свят, якоже Бог наш, и несть праведен, паче Тебе, Господи.

С мученики несумненну веру стяжав, благодушне, и Христу Иисусу быв воин, добродетельми обогатился еси; темже совершающим память твою честную благое просвещение всегда даруй.

Лукавнующим зле невидимый гонитель, мучениче Христов, являешися и крадьбы, в тайне сущия, открываеши, приял бо еси власть от Бога полезная ко спасению всем содевати.

Якоже столп непоколеблем, сердце твое, всечестне Иоанне, имея, любовь мучеником Христовым сотворил еси, не бояся царева суровства, темже в любви Господни утверждатися нам помози.

Яко дерзновение имея к Богу, Иоанне, воин ныне Небесному Царю сый, проси нам грехов оставления, празднующим память твою.

Богородичен: Богородице, Мати Господа Иисуса, со всеми святыми Того моли избавити ны от всех бед и скорбей, яко да посрамятся вси, являющии рабом Твоим злая, хвалити же с Сыном Тя присно нас сподоби.

Седален, глас 8

Царю Небесному и Творцу веков угождая присно, законопреступнаго Иулиана мучителя вся злоковарныя и богомерзкия советы отразил еси, славне, идолом бездушным жертвы возбранив творити, и тако в подвизе душу твою в руце Господу Богу предал еси. Егоже моли, святе Иоанне, прегрешений оставление нам даровати, чествующим святую память твою.

Песнь 4

Ирмос: Пришел еси от Девы не ходатай, ни Ангел, но Сам, Господи, воплощся, и спасл еси всего мя, человека. Тем зову Ти: слава силе Твоей, Господи.

Уподобился еси распеншемуся волею на Древе Христу Богу нашему, всечестне, сраспенся Ему всяким воздержанием, молитвою же, и милостынею, и многими добродеяньми.

Се даже до смерти, Иоанне мучениче, смирился еси: святыя бо твоя мощи на месте в погребении странных быша сокровены, сего ради Господь по всей вселенней тебе прослави.

Царя преступника Иулиана воинство тленное во власти содержав, от того послан был еси убивати Христовы мученики. Но ты, блаженне, тыя храня, в вере утверждал еси, во еже пети: слава силе Твоей, Господи.

Небеснаго ради радования и будущаго праведным веселия земная вся оставил еси мудрования, и, всячески добродетельми Богу угождая, за ны молися, Иоанне всечестне.

Богородичен: Недоумение во спасение предлежит ми, от обышедших мя зол, Пречистая. Темже избави мя от них скоро, благоразумие подающи, к Тебе бо единей прибегох, Богомати.

Песнь 5

Ирмос: Света Подателю и веков Творче, Господи, во свете Твоих повелений настави нас: разве бо Тебе, иного бога не знаем.

Таин Божественных вкусив в разуме, Иоанне, проповедь Божия рождения исповедал еси, глаголя пред всеми: иного бога, разве Всетворца, не знаю.

Возлюбившаго Господа любите,— возглаголал еси, страстотерпче, страждущим мучеником, в Егоже любви утвердився, обогатился еси чудесы, врачуя болезни многия.

Славу мира сего ни во чтоже, Богомудре воине, вменил еси, славы ради Христовы, темже, страдальчество совершив и славы Божественныя сподобився, нам получити оную молися.

Не убоявся законопреступнаго царя повеления, вместо мук христианы заступаше, и сокрывахуся твоим повелением, и сего ради воин бысть Царю силам.

Богородичен: Тя, Владычице, молим, славяще Твое о нас милосердие: всяких ны скорбей, Марие, свободи и помози утреневати нам к Богу и вечнаго блаженства сподобитися.

Песнь 6

Ирмос: В бездне греховней валялся, неизследную милосердия Твоего призываю бездну: от тли, Боже, мя возведи.

Силою Божиею укрепився, мучеников славо, Иоанне, прещений нечестивых небрегл еси; ныне же зря радостне Бога, от злых нас избави.

Молитвами и постом и в целомудрии всяким воздержанием Богу угодил еси, всечестне; свыше назирая, свобождай ны от скорби.

Просимая чествующим тя верно, блаженне, подаеши, злыя человеки обличая, о кающихся же Богу моляся.

Мученическое дерзновение восприим, потщался еси по вере Христове поборати, якоже добрый воин, вооружи себе силою Креста Господня, от Негоже даром чудес обогатися.

Богородичен: Уврачуй, Богородице, страсти душ и телес наших, Врача Христа нам порождши, и вражие злоковарство посрами милосердием Твоим.

Кондак, глас 6

Благочестиваго воина Христова, победившаго враги душевныя и телесныя богомудренно, Иоанна мученика достодолжно песньми восхвалим, чудодействуя бо, подает обильная исцеления страждущим людем и молится Господу Богу от всяких бед спасти правоверныя.

Икос

Кто подвиги твоя и страдания ради веры в Господа Иисуса изрещи возможет, прехвальне Иоанне? Или киими тя увенчаем похвалами, ради мужественнаго твоего в законе Господни и во истиннем благочестии стояния? Попрал бо еси вся козни душетлителя врага, целомудрием и всякими добротворении вооружився; богатство и славу и похоть вредную возненавидев, нищету и поношение Христово возлюбил еси, страждущим в скорбех помогая. Темже, вселився в Небесныя кровы, дарований преславных чудес обогатился еси. Оттуду убо, блаженне, вся, притекающия к тебе, назирай, помощи творя, во еже от всяких бед спасти правоверныя.

Песнь 7

Ирмос: Образу златому, на поли Деире служиму, трие Твои отроцы небрегоша безбожнаго веления, посреде же огня ввержени, орошаемы, пояху: благословен еси, Боже отец наших,

Безбожное мучителя законопреступнаго веление, страстотерпче Иоанне, преобидев, богочестив Всемогущаго Царя воин показался еси, благодатне же орошаемь, с людьми Божиими пел еси: благословен еси, Боже отец наших.

Сладкое и великое и радостное торжество ныне люди Господни облиста, еже мучеников доблейший целомудрый Иоанн вообрази. Точит бо цельбы молящимся верно Господу, иже взывают: благословен еси, Боже отец наших.

Дерзновение имея ко Владыце всех, святе Иоанне, яко ближний угодник Его, во обстоянии напастей наших предстательствуй Ему о нас и помогай избавитися нам от грехов, да богомудренно поем: благословен еси, Боже отец наших.

Дерзновение имея к своему Владыце, о нас молитву сотвори, Иоанне, и прошения наша исполни, и грехов прощения испроси нам молитвами твоими, вопиющим: благословен еси, Боже отец наших.

Богородичен: Преславное совершися таинство в Тебе, Богомати, безсеменно бо зачала еси Сына бремя грех наших упразднившаго. Темже, упование на Тя имуще и Твою помощь зряще, усердно вопием: благословена еси, Дево Владычице.

Песнь 8

Ирмос: Пещь иногда огненная в Вавилоне действа разделяше, Божиим велением халдеи опаляющая, верныя же орошающая, поющия: благословите, вся дела Господня, Господа.

Вышних ищай, на земли прелести возненавидел еси, Богоблаженне. Темже, с мученики Христовыми в любви духовней соединився, дерзновенно Богочеловека Иисуса проповедал еси, о Немже зовеши: благословите, вся дела Господня, Господа.

Неоскудно требования подавая, нищим был еси готовый питатель, воине благочестивомудренне Иоанне. И ныне, притекающия к тебе назирая, исполни тех прошения, да радостно зовем: благословите, вся дела Господня, Господа.

Всезритель Бог, усердие твое, Иоанне, и совершенную веру видев, прослави тя славою вечною. Егоже моли в пользе ущедрити ны, богомудренно поющия: благословите, вся дела Господня, Господа.

Моления наша приими, ныне приносимая тебе, праведному страстотерпцу. Тебе бо даде Господь чудесем дарование подаяти просящим верно прошения и превозносящим Христа во веки и поющим: благословите, вся дела Господня, Господа.

Богородичен: Марие Богоневесто, к Тебе прибегаем и Тебе, припадающе, молимся: виждь, Владычице, скорбь нашу и озлобление от враг наших и умири жизнь всех нас, Миротворца порождши Господа, Егоже благословим во веки.

Песнь 9

Ирмос: Безначальна Родителя Сын, Бог и Господь, воплощся от Девы, нам явися, омраченная просветити, собрати расточенная. Тем Всепетую Богородицу величаем.

Добр явился еси пособник, преславне, людем Божиим, гонимыя сокрывая, и ныне чудесне помоществуеши верным, сего ради в памяти благодеяний твоих Христа Бога величаем.

Твоя чудеса, преблаженне Иоанне, во всем мире проповедаются; темже и днесь, собравшеся, славу возсылаем Христу, тебе прославльшему.

Нас, восхваляющих тя, мучениче Христов, и твоея помощи просящих, днесь услыши, и к полезным управляти не престай, молитвенник теплейший и ходатай к Богу нашему являяся.

Изряден врач сердец человеческих чудодеянии явился еси, Иоанне, помоществуя всем богочестивым; тем, воспевающе тя, Христа величаем.

Богородичен: Пети, Дево, Тя не престаем, Помощницу, покров, скорое заступление и Предстательницу нашу непостыдную; соблюди Твоя рабы от всякаго озлобления и от козней лукаваго свобождай присно.

Светилен

Венценосче святе, предстояй со Ангелы Христову Престолу и света оттуду исполняяйся, страстотерпче, мир миру молитвами твоими исходатайствуй и нам спасение, благочестно память твою совершающим и в скорбех притекающим к тебе, Иоанне всебогате.

Песнь 1

Ирмос: Вознесу Тя, Боже, Спасе мой, яко воскресл еси от мертвых, поправ смерть.

Иисусе, Спасе наш, подаждь нам усердие благодарити Тя о всем и восхвалити угодника Твоего, Иоанна.

Страстотерпче славне Иоанне, богомудрым смыслом ввоинился еси Всетворцу Богу, победи убо вся враги наша.

Зрети удостоивыйся Бога воплощена, всехвальне воине, молим тя: твоими мольбами избави ны от всех бед.

Богородичен: Богорадованная, Слова Предвечнаго Палато, Марие Дево, милосердием Твоим сердца наша в скорбех увеселяй о Бозе присно.

Песнь 3

Ирмос: Утверждей словом Твоим вселенную, яже не подвижится, утверди и нашу мысль в страх Твой, Владыко Господи.

Тебе, Творцу нашему Богу, во всяком обстоянии, припадающе, молимся: мученика Твоего мольбами в воли и любви Твоей утверди нас.

Твердым умом стал еси на правоте богознания, Богоблаженне Иоанне, темже утверждай души наша во Господе надежду во всем полагати.

Похоть плоти, похоть очес и гордость жития презрев, утвердился еси в любви Иисусове, мучениче, нам в тойжде помощник буди.

Богородичен: Всеблаженная Владычице, утверждающаго вся Христа Господа порождши, в промысле Его пребывати укрепи ны всегда.

Седален, глас 8

Царю Небесному и Творцу веков угождая присно, законопреступнаго Иулиана мучителя вся злоковарныя и богомерзкия советы отразил еси, славне, идолом бездушным жертвы возбранив творити, и тако в подвизе душу твою в руце Господу Богу предал еси. Егоже моли, святе Иоанне, прегрешений оставление нам даровати, чествующим святую память твою.

Песнь 4

Ирмос: Разумех, Всесильне, Твое смотрение и со страхом прославих Тя, Спасе.

Велие Твое, Господи, смотрение во всем мире, емуже усердно предаемся, Тебе со святыми молящеся.

Подвиг добр, мучениче, во страдании совершив, благоразумием во страсе Господа прославляти помози нам.

Братолюбие в гонении людем Божиим помогал еси, страх отвергий мучителей, Иоанне: страх напастей отвержи от нас.

Богородичен: Всесильнаго Царя Царица и Мати сподобилася еси быти; сподоби ны славити Его к нам в милости смотрение.

Песнь 5

Ирмос: От нощи неведения просвещей концы, просвети мя утром человеколюбия Твоего, Господи.

Человеколюбче Владыко, просвещай ны в памяти молебней страдальца Твоего утреневати к Тебе благоговеинством.

Просветился еси, мучениче Иоанне, богодарованными чудесы, тем от злых человек, тщеты и болезни славящия тя премени.

Светоносным утром, побеждая вся душетлительныя враги доблественне, от скорбных тьмы страстей во свет, радости привлецы ны.

Богородичен: Яже Бога во плоти нашей родила еси, Дево Пречистая, светом Небесным осиятися нам Ему молися, милость ко всем простирающи.

Песнь 6

Ирмос: Со Ионою вопием Ти, Господи, со гласом хваления молящеся: возведи от тли живот наш.

Не престанем молити Тя, Всещедраго Господа, подвижуще с нами вернаго воина, изымая от грех, всели ны в Небесную жизнь.

Хвалиши, святе Иоанне, в Вышних Бога, верно зде служив Ему, отнюдуже приближися и нам, тя хвалящим, во спасение.

Страсти Христа ради терпев, всехвальне, всерадостное блаженство получил еси, темже и наша мольбы приими и введи ны в радость.

Велию веру стяжал еси ко Христу Богу, велики же и дары чудес Божественных приял еси от Него, и от действия их проявился еси. И ныне творящих твое празднество и память молися Господеви избавити от всякия нужды и печали.

Богородичен: Пречистая Дево, от тления пагубоноснаго мир спасшая, от всякаго злаго обстояния нас избави.

Кондак, глас 6

Благочестиваго воина Христова, победившаго враги душевныя и телесныя богомудренно, Иоанна мученика достодолжно песньми восхвалим, чудодействуя бо, подает обильная исцеления страждущим людем и молится Господу Богу от всяких бед спасти правоверныя.

Икос

Кто подвиги твоя и страдания ради веры в Господа Иисуса изрещи возможет, прехвальне Иоанне? Или киими тя увенчаем похвалами, ради мужественнаго твоего в законе Господни и во истиннем благочестии стояния? Попрал бо еси вся козни душетлителя врага, целомудрием и всякими добротворении вооружився; богатство и славу и похоть вредную возненавидев, нищету и поношение Христово возлюбил еси, страждущим в скорбех помогая. Темже, вселився в Небесныя кровы, дарований преславных чудес обогатился еси. Оттуду убо, блаженне, вся, притекающия к тебе, назирай, помощи творя, во еже от всяких бед спасти правоверныя.

Песнь 7

Ирмос: Вся дела Твоя истинна и прави путие Твои, Боже отец наших.

Безмездный врачу Иоанне, исцели молитвами твоими недуги и страсти душ и телес Господеви вопиющих: благословен еси, Боже отец наших.

Дело всякия добродетели исправил еси и жертву тя Всетворцу возложил еси, вопия: благословен еси, Боже отец наших.

Всеблагому Богу в чистоте молитвою и постом угождая, мучениче, даждь нам богоугодне звати: благословен еси, Боже отец наших.

Богородичен: Всенепорочная Дево, Путь и Истину, Христа, рождши, руководи нас в Горнюю жизнь, к Богу отец наших.

Песнь 8

Ирмос: Царя славы и Победителя смерти, Иисуса Назорея, Того превозносите во вся веки.

Царю Небесный, победу на силу вражию святому Твоему мученику даровавый, даруй и нам во избавление от нужд славити Тя во вся веки.

Царя Господа радостно, блаженне, в Вышних узрел еси, молися, да мы чистым сердцем Его превозносим во вся веки.

Царюяй во Христе воине, вся варвары победи и злокозненныя разори на нас советы, да превозносим Господа во вся веки.

Царю царствующим и Господу господствующим воин изряден показася и с праведными венцем венчася нетленным от руки Вседержителя Господа.

Богородичен: Царице Всемощная, Царя и Бога матерски моли, да везде Его превозносим и Тя, Госпожу, поем во вся веки.

Песнь 9

Ирмос: Служитель безплотный предста, глаголя Благодатней: Господь с Тобою! Юже величаем.

Господи сил, буди с нами, укрепляя иерархи, иереи же и вся люди Твоя, молитвами святаго спасая, да благочестно Тя и Богородицу непрестанно вси величаем.

Молися, святе Иоанне, Богу в Троице, да удостоит верующия во Имя Его богомудренно, яко Всетворца, присно величати.

Твою память совершающия, Господень угодниче, представ, от печалей свободи и напой радости, во еже с Богоматерию Господа величати.

Аще и на земли воинство оставив, но Небесному Царю воин наречеся Христов, лукавых находы вспять возвращая и верным прося грехов прощения. Темже, Иоанне блаженне, тя воспевающе, Христа величаем.

Богородичен: Облагодатствованная Марие, призри на вся люди Твоя милостию, да Тя безконечно в радости величаем.

Светилен

Венценосче святе, предстояй со Ангелы Христову Престолу и света оттуду исполняяйся, страстотерпче, мир миру молитвами твоими исходатайствуй и нам спасение, благочестно память твою совершающим и в скорбех притекающим к тебе, Иоанне всебогате.

Песнь 1

Ирмос: Поим Богу, от горькия работы фараоновы избавльшему Израиля и огненным столпом и светлым облаком наставльшему, яко прославися.

Слово ми подаждь, Слове Божий, во отверзение уст моих на похвалу угодника Твоего, преподобнаго Германа, пустыннаго жителя и монахов наставника и обители Соловецкия утверждения.

От юности безмолвное житие возлюбив, пустыннаго пребывания взыскатель был еси, преподобне, темже, улучив желаемое со блаженным Савватием, равноангельное жительство показал еси.

Богоизбраннаго во иноческое селение пустыннаго места острова Соловецкаго первый насельник явился еси, блаженне Германе, и купножитель и сподвижник преподобному Зосиме, с нимже обитель зде возградил еси.

Богородичен: Егоже родила еси во спасение всем верным, Пречистая Дево, моли прилежно, яко Зиждителя всех и Бога, помиловатися нам, рабом Твоим, Богородицу воистину Тя исповедающим.

Песнь 3

Ирмос: Утвердися сердце мое во Господе, вознесеся рог мой в Бозе моем, разширишася на враги моя уста моя, возвеселихся о спасении Твоем.

Кто изречет подвиги и труды твоя, отче Германе? Ты бо, в дебри пустынныя вшед, день и нощь труждался еси, постом и бдением тело свое удручая.

Злостраданием и молитвою страсти душевныя от корене исторгл еси, воздержанием же и злых удалением вся плотская вожделения потребил еси, блаженне.

Бесов борения не возмогоша одолети тя в добрем произволении, но благою надеждею и крепким терпением вся козни их ничтожны сотворил еси.

Богородичен: Владычице мира, Благая Помощнице, Твоим всесильным предстательством сокруши вся востающия на ны силы вражия и вознеси рог людий Твоих.

Седален, глас 8

Возшед на высоту добродетелей, образ был еси учеником твоим, воздержанию и кротости, смирению же и послушанию тех наставляя, и, яко пастырь, стаду своему предходя, добре шествовати путем жестоким пустыннаго жития научил еси. Темже ублажаем твое успение, Германе преподобне, моли Христа Бога согрешений оставление даровати чтущим любовию святую память твою.

Песнь 4

Ирмос: Ты моя крепость, Господи, Ты моя и сила, Ты мой Бог, Ты мое радование, не оставль недра Отча и нашу нищету посетив. Тем с пророком Аввакумом зову Ти: силе Твоей слава, Человеколюбче.

Напоив душу твою слезными потоки, соделал еси ю плодоносну и добродетели всякия износящу, темже путеводитель ко спасению многим был еси.

Аще и купно со блаженным Савватием в безмолвие пустынное вселился еси, обаче яко един Единому Богу молитвою непрестанною тамо беседовал еси, преподобне.

Ум просветлен жития чистотою имый, мысленныя прилоги лукавых демонов удобно низлагал еси, вся тех ухищрения и коварства обличая.

Богородичен: Блажит Тя, Пречистая, преподобных лик и всякое верных совокупление, Божие бо Слово паче ума и слова родила еси.

Песнь 5

Ирмос: Утренюет дух мой к Тебе, Боже, от Отца рожденному неизреченно и воздвигнувшему рог спасения нам.

Во плоти сый, безплотных жительству поревновал еси, блаженне Германе, темже победу на враги безплотныя приял еси от Бога и венец славы.

Вольную нищету возлюбив, в нестяжании безпечальное житие препроводил еси, сокровище некрадомое скрывая себе на Небеси, по словеси евангельскому.

Очистив себе от всякия скверны плотския и душевныя, приятелище Духу Пресвятому был еси, преподобне, от Негоже дарованиии духовными обогатился еси.

Богородичен: Тя надежду нашему спасению стяжахом, Богомати, и оружие непобедимое на враги видимыя же и невидимыя.

Песнь 6

Ирмос: Очисти мя, Спасе, многа бо беззакония моя, и из глубины зол возведи, молюся, к Тебе бо возопих, и услыши мя, Боже спасения моего.

Плакал и сетовал еси о разлучении с сожителем твоим, блаженным отцем Савватием, не обрет того в живых, егда возвратился еси во остров от путешествия твоего.

Радости и веселия исполнился еси, егда по разлучении Савватиеве обрел еси Зосиму преподобнаго, с нимже паки во остров вшел еси, Божиим смотрением направляемь.

Ангельския глаголы, к жене рыбареве бывшия, яко недостоит женам селитися во острове сем, возвестил еси Зосиме, церковь чудну на воздусе узревшему.

Богородичен: Бога, Егоже родила еси плотию, моли, Пречистая, яко Человеколюбца, ущедрити люди согрешшия.

Кондак, глас 4

Вышних желая, вся долу влекущая возненавидел еси и, отечество свое оставль, в поморие пустынное отшел еси, таже в морский остров удалився, в нем многа лета Господеви поработал еси. Темже, память твою празднующе, любовию вопием ти: радуйся, Германе Богомудре, отче наш.

Икос

Духу Святому в жилище себе уготовав, от Него всеми Божественными добротами украшен был еси и наставник монахом явился еси, отче, делы благими поучая чада твоя. Темже, память твою празднующе, взываем тебе таковая: радуйся, богоизбраннаго места острова Соловецкаго небесное насаждение; радуйся, селений иноческих Божественное удобрение; радуйся, пустыннаго жития любителю; радуйся, безмолвия добрый рачителю; радуйся, преподобнаго Савватия во остров Соловецкий приведый и сожитель ему бывый; радуйся, преподобному Зосиме в создании обители иноческия послуживый; радуйся, от нас купно с сими преподобными отцы ублажаемый; радуйся, на Небесех со всеми святыми от Христа Бога прославляемый; радуйся, Германе Богомудре, отче наш.

Песнь 7

Ирмос: Божия снизхождения огнь устыдеся в Вавилоне иногда. Сего ради отроцы в пещи, радованною ногою, яко во цветнице, ликующе, пояху: благословен еси, Боже отец наших.

Ничтоже земное предпочел еси паче Небесных и, яко злато в горниле, искусился еси, в послушаниих иноческих труждаяся и присно взывая: благословен еси, Боже отец наших.

Молитвою непрестанною Господеви прилепляяся, Тому Единому послужил еси и кончиною блаженною от земных удолий к Небесным обителем прешел еси, радостно поя: благословен еси, Боже отец наших.

Гроб твой, преподобне, благодатию Христовою цельбоподателен является, к немуже с верою притекающе и исцеления приемлюще, вопием Прославляющему угодники Своя: благословен еси, Боже отец наших.

Богородичен: Благословен Плод благословеннаго чрева Твоего, Егоже благословят Небесныя силы и преподобных собори, нас избавльшаго клятвы древния, Благословенная.

Песнь 8

Ирмос: Ангели и небеса, на Престоле Славы седящаго и яко Бога непрестанно славимаго, благословите, пойте и превозносите Его во веки.

Подвизався добре на земли и победив вся вражия действа, венчался еси славою на Небеси и лику преподобных сочетался еси.

Нетление мощей твоих являет, преподобне, яко обрел еси благодать у Бога и имаши наследие со святыми и со Ангелы ликостояние.

Яко обогатившуся всеми добродетельми в житии, благодать чудес даровася тебе по смерти, и точиши исцеления верно тя блажащим.

Богородичен: Спаси мя, Мати Божия, спасению начало мирови явльшая, избавляющи мя треволнения страстей и всякия скорби, да Тя славлю во веки.

Песнь 9

Ирмос: Благословен Господь, Бог Израилев, воздвигнувый рог спасения нам в дому Давидове, отрока Своего, в нихже посети нас Восток с высоты и направил ны есть на путь мира.

Иерею благоговейну во отечествии твоем явлься, повелел еси списати образ твой и песнь тебе сложити, той же со тщанием сие сотвори, в похвалу твою и во славу Христа Бога, прославляющаго угодники Своя.

Икона твоя, на нейже вкупе со преподобными отцы Зосимою и Савватием изображен был еси, чудотворна явися, еже бысть во изъявление святыни твоея, яко да память твоя со святыми почитается.

Аще и не на месте подвигов твоих преставился еси, отче преподобне, обаче честныя мощи твоя пренесены быша во обитель твою, идеже во храме, имени твоему созданнем, святолепно почивают.

Богородичен: О, чудесе, всех чудес превышшаго! Яко Дева, во чреве всяческая Содержащаго словом неискусомужно приимши, без истления родила еси.

Светилен

Яко воистину звезда путеводная явился еси, Германе преподобне, блаженным отцем нашим Зосиме и Савватию и с ними множеству монахов, приведшая их в немятежное пристанище Соловецкаго острова и светлостию жития твоего озаряющая стези пустыннаго жительства нам, почитающим святую память твою.