Акафисты - 18 августа 2025
Кондак 1
Избранные угодницы и стратотерпицы Христовы, мира сего безумие обличившие и благодатные дары источающии, восхваляем вас любовию: вы же имеющии на врага победу, от бед и напастей свободите нас, да зовем вам: Радуйтеся, мученицы Евдокие, Дарие, Дарие и Марие, молитвенницы к Богу усердныя.
Икос 1
Ангелов сонм удивися естеству вашему, мученицы, яко на земли небесному жительству уподобляяся, вся блага временная отринувши и Единому Христу апостольски последовавши, яко лучи солнечные миру возсияли есте: тако и Господь чудесами прославляя подвиги ваша, научи воспевати вам таковая: Радуйся, Евдокие, чашу страданий Христовых до конца испившая; Радуйся, юродством глубину мудрости от человек сокрывшая. Радуйся, яко горлица о едином Женихе взывающая; Радуйся, молитвою своею жизнь нашу ограждающая. Радуйтеся, мученицы, подвигам блаженныя Евдокии подражающии; Радуйтеся, силу Креста Господня, яко твердыню необоримую прославляющии. Радуйтеся, проповедницы Света Христова: Радуйся, тихии молитвенницы во времена тяжкии. Радуйтеся, мученицы, яко мудрые девы елеем светильники наполнившии: Радуйтеся, яко агнцы непорочные на заклание ведомые. Радуйтеся, землю Нижегородскую освящающии; Радуйся, мира концы облистающии. Радуйтеся, мученицы Евдокие, Дарие, Дарие и Марие, молитвенницы к Богу усердныя.
Кондак 2
Видяще земнаго существа немощь, сиротство без матери от младенства и во отрочестве многи скорби претерпевши, мученице Евдокие, печаль свою на Бога возложивши, теплою молитвою к Заступлице Усердной взывала еси: Аллилуйя.
Икос 2
Разум горних чинов Божественною Премудростию открываяся вам, мученицы, егда бреннаго тела отвергошася, в непрестанном служении Богу пребывали есте; пением, бдением и пощением образ подая любовию воспевающим вам: Радуйся, мученице Евдокие, от юности Христа всем сердцем возлюбившая; Радуйся, благословение от Преподобнаго Серафима во отрочестве своем приявшая. Радуйся, измлада псаломски искренняго своего не отметаяся; Радуйся, за то биения и метания камней от осуждающих тебя претерпевшая. Радуйся, подвигу блаженныя Пелагеи Дивеевской возревновавшая; Радуйся, яко незлобием своим Богу угодившая. Радуйся, стяжание земнаго удаляяся, к стяжанию благодати Духа Святаго ум и сердце приблизившая; Радуйся, яко непоколебимо воле Божией предалася еси. Радуйся, Дарие, споспешнице в подвизех досточудная; Радуйся, яко послушание затворнику Анатолию Саровскому исполнившая. Радуйся, пению псалмов и стихир безкнижно наученная; Радуйся, яко смирением своим просияла еси. Радуйтеся, мученицы Евдокие, Дарие, Дарие и Марие, молитвенницы к Богу усердныя.
Кондак 3
Силою Вышняго, скорби и болезни претерпевая, в подвизех не оскудевали еси, но добродетели умножая, воспевали Богу: Аллилуйя.
Икос 3
Имеяй благодатные дары в сердце своем, блаженная Евдокие. безмолвнаго жития возжелев и от славы под покровом юродства от мира укрываяся, за народ в бездну безбожия влекомый, к Богу со слезами взывала еси; мы же ведуще сие, поем таковая: Радуйся, Евдокие, нищету Христову возлюбившая; Радуйся, лице свое от мира сокрывшая. Радуйся, яко пение молитв, единое бысть тебе утешение; Радуйся, яко терпела на теле своем одежды тление. Радуйся, суету земную отлагающая; Радуйся, в молитве и посте день и ночь пребывающая. Радуйся, нелицемерной любовию сердца приходящих к тебе умягчающая; Радуйся, заботою о жизни ближних и дальних людей молитвенно усердствующая. Радуйся, Марие, верность Богу в служении старицы своей засвидетельствавшая; Радуйся, простотою сердца своего ей последовавшая. Радуйся, послушанием и смирением плоти Духа Святаго стяжавшая; Радуйся, повелением Святителя Николая с верою исполнившая. Радуйтеся, мученицы Евдокие, Дарие, Дарие и Марие, молитвенницы к Богу усердныя.
Кондак 4
Бурю помышлений сумнительных от умножения беззаконий имеяй людие земли нашея, к тебе, блаженная Евдокие. яко к тихому пристанищу прибегали, скорби свои на тя возлагая; ты же научала всех пети Богу: Аллилуйя.
Икос 4
Слышаша пастырие о многих подвизех твоих, блаженная Евдокие, и образ жития твоего, яко угодный Богу видя, напраляли люди к твоему пред Богом о них ходатайству, восхваляя любовь твою ко Господу, воспевающи таковая: Радуйся, Евдокие, не человеческое, но Божие разумевающая; Радуйся, вверенных тебе от Бога путем узким к Царству Небесному ведущая. Радуйся, подобно Иову многострадальному в болезни Бога прославляющая; Радуйся, временноть и тленность жития сего явно всем показующая. Радуйся, Дарие, молитвой непрестанной имя Божие призывающая; Радуйся, слова блаженной Евдокии в сердце своем вмещающая. Радуйся, твердостию духа славная; Радуйся, Божественного органа сладкозвучная струно. Радуйтеся, мученицы, Божия Матери всегдашние молитвенницы; Радуйтеся, Царицы Небесной хвалебную песнь возносящии. Радуйтеся, иноческаго жития добрые ревнители; Радуйтеся, общего жития избранные сосуды. Радуйтеся, мученицы Евдокие, Дарие, Дарие и Марие, молитвенницы к Богу усердныя.
Кондак 5
Боготечную звезду четырьми концами небо облистающую, зрим вас четыре мученицы Российстии егда небоязненно веру во Христа исповедовали еси, в радости взывая Ему: Аллилуйя.
Икос 5
Видя враг рода христианскаго богоугодное житие ваше, не вынося терпети огня пламенных молитв ваших, святии, подосла лукаваго человека, Божие на земное променявшаго, на вас же всю ненависть богоотступной власти наведшаго, яко тать бежа; вы же, святии мученицы, не осудили сего, но безропотно в руци Божий жизнь свою предали есте. Тако, видя кротость вашу, умиленно глаголем вам сицевая: Радуйся, Евдокие, Крестным знамением бесов прогоняющая; Радуйся, от рассвета до полудни молитву тайную творившая. Радуйся, видя грядушии испытания, мужеству ближних своих научающая; Радуйся, в теле немощном крепость духа великую стяжавшая. Радуйся, Дарие, кротости исполненная; Радуйся, в любви ко Христу земнаго жениха удалилася еси. Радуйся, сладость временную презревшая; Радуйся, от сродник своих поношение претерпевшая; Радуйтеся, мученицы. многими подвигами просиявший; Радуйтеся, в простоте голубиней сердца своя соблюдший. Радуйтеся, странности старицы вашея терпеливо сносивший; Радуйтеся, от соблазна и неверия устоявшии. Радуйтеся, мученицы Евдокие, Дарие, Дарие и Марие, молитвенницы к Богу усердныя.
Кондак 6
Проповедь истины бысть житие ваше святии, яко путем скорбным и трудным внидем в Царство Небесное: тако вы сами себеи малого лишили в сем временном веце, купуя драгоценный бисер - Христа в жизни нескончаемой, непрестанно поя Ему: Аллилуйя.
Икос 6
Возсияла яко пресветлая заря, блаженная Евдокие, мрак греховный разгоняющая и приходящих к тебе от сетей вражиих изымающая. Мы же, усердной о нас Богу ходатаице, любовию воспеваем тако:Радуйся, Евдокие, света Евангельскаго свечо; Радуйся, целомудрия столпе. Радуйся, грехов тяжких мудрая обличительнице; Радуйся, яко ни единое слово твое бессмысленно бысть. Радуйся, сердца нераскаянныя покаянием врачующая; Радуйся, о грешных людех слезы проливающая. Радуйся, колокола звон, яко глас Господень провещавающая; Радуйся, молитвою своею усопших не оставляющая. Радуйтеся, мученицы древних пустынножителей последователи; Радуйтеся, стужу и глад добровольно претерпевшии. Радуйтеся, от уныния и тревоги свобождающии; Радуйтеся, безбожия и злобы окрест живущих не убоявшиися. Радуйтеся, мученицы Евдокие, Дарие, Дарие и Марие, молитвенницы к Богу усердныя.
Кондак 7
Хотя боголюбивый Архимандрит Софроний оповестити тя о скорой мученической кончине твоей, написа Образ Христа в терновом венце и яко дар в день Ангела твоего посла тебе: ты же, блаженная, не приемше икону сию, венец же Христов на главу свою восприяла еси, воспевая Ему: Аллилуйя.
Икос 7
Новых мучеников собор украшаете вы, святые жены, за Христа пострадавшие, егда Бога в Троице, яко Единаго Создателя душ и телес наших, безбоязненно пред мучители исповедасте, тако первым мученикам христианским воистину сродницы явилися; мы же, взирая на таковое мужество ваше, хвалебное воспеваем вам пение: Радуйся, Евдокие, стопам создавшаго вся, Божия Слова, последовавшая; Радуйся, сопричастницами ближних своих сему соделовавшая. Радуйся, Христовою любовию распаляемая, ищуще яже Богу угодная; Радуйся, приятелище Духа Всесвятаго явилася еси. Радуйся, Марие, воздержанием тело духу поработившая; Радуйся, путь странничества возлюбившая. Радуйся, благословение на служение блаженной Евдокии с верою приявшая; Радуйся, яко верный воин при нашествии врагов не малодушествующая. Радуйтеся, мученицы, духовною благодатию недуги отъемлющии; Радуйтеся, духи лукавыя отгоняющии. Радуйтеся, страсти неисцельныя исцеляющии; Радуйтеся, неверных к вере приводящии. Радуйтеся, мученицы Евдокие, Дарие, Дарие и Марие, молитвенницы к Богу усердныя.
Кондак 8
Странное чудо видим на тебе, мученице Евдокие, егда три дни и три нощи избиваема плетьми и ногами затаптываема отрядом неистовствующих богоборцев; яко безгласная агница вся претерпевала еси, взывала единому Богу: Аллилуйя.
Икос 8
Всем Ходатаица Неизменная, Сама Царица Небесная незримо простирала Покров свой над вами, мученицы Господни, егда узрев инок - иконописец чудное видение Оранской Божией Матери на воздусе молящуюся над тихой келией вашей, со слезами прощения у тебя испроси, блаженная Евдокие, яко написа тебе образ сей; мы же слыша о чудном явлении, воспеваем вашу память пресветлую:Радуйся, Евдокие, благ вечных, как единого счастья людем желающая; Радуйся, приходящих к тебе к молитве сердечной призывающая. Радуйся, о Горнем помышляти научающая; Радуйся, от огненного запаления домы верных ограждающая. Радуйся, Дарие, агнице незлобивая; Радуйся, откровением помыслов сердце чисто до конца сохранившая. Радуйся, в келии блаженной Евдокии долгий затвор на себя приявшая; Радуйся, все скорби духовною радостию претерпевающая. Радуйтеся, мученицы яко мног труд и тесен путь в житии своем прешли есте; Радуйтеся, монашествующих столпи крепции. Радуйтеся, вся яже в житии сем красная презрели есте; Радуйтеся, взявшии на рамена своя Крест Христов. Радуйтеся, мученицы Евдокие, Дарие, Дарие и Марие, молитвенницы к Богу усердныя.
Кондак 9
Все естество Ангельское удивися, егда видеша Духа Святаго, яко голубя, крилами своими от плетей вас ограждающаго и благодатию своею покрывающаго вас, мученицы, ведомых на казнь, в радости взывающих Ему: Аллилуйя.
Икос 9
Вития красноглаголивии не возмогут изрещи благолепие ликов ваших, святии, егда стояли пред убивающими тела ваша, души же не могущими коснутися; мы же воспеваем вам таковая: Радуйся, Евдокие, мудрости Божия вместилище; Радуйся, о себе ни единыя жалости не приемлющая. Радуйся, терпение ближних своих, яко злато в горниле закаляющая; Радуйся, причудами своими от всего земного отстраняющая. Радуйся, Дарие, под Богом ходившая; Радуйся, с любовию блаженной Евдокие послужившая. Радуйся, яко Псалмы Давидовы от начала до конца каждодневно воспевающая; Радуйся, благ нрав и послушание к наставнице твоей имела еси. Радуйтеся, мученицы, светлые голубицы; Радуйтеся, неувядаемые цвети райстии. Радуйтеся, в печалех утешение; Радуйтеся, в скорбех помощницы. Радуйтеся, мученицы Евдокие, Дарие, Дарие и Марие, молитвенницы к Богу усердныя.
Кондак 10
Спасти хотя род человеческий, Господь Вседержитель, подает образ спасения во святых Своих, православную веру утвердивших и добродетельми просиявших, нас же научающих пети Богу: Аллилуйя.
Икос 10
Стена нерушимая Пресвятая Владычице Богородице в образе иконы Своея Иверския изнесена бысть нечестивыми из келии блаженной Евдокии, вслед вам, мученицы; тогда видеша людие вси, сияние от Нея исходящее; мы же научишася пети вам похвальная:Радуйся, Евдокие, к двенадцати лампадам, яко к двенадцати апостолом во время молитвы лице свое обращающая; Радуйся, апостольских правил рачительнице. Радуйся, строгая обличительнице неправды; Радуйся, совести чистой от всякаго неуклонно требовавшая. Радуйся, Марие, со спокойной душею на заклание пришедшая; Радуйся, смерть от штыка претерпевшая. Радуйся, от мира сокрывшися, миру возсиявшая; Радуйся, волею за Христа пострадавшая. Радуйтеся, мученицы, молитвами своими от всякия скверны нас ограждающии; Радуйтеся, души верных веселящии. Радуйтеся, неугасимыя светильницы Российския земли; Радуйтеся, Божия благодати неиссякаемые струи. Радуйтеся, мученицы Евдокие, Дарие, Дарие и Марие, молитвенницы к Богу усердныя.
Кондак 11
Пение непрестанное возносили Ангелов Чини и Вышних стояния над многоскорбными телесами вашими, святии мученицы, егда Воззвавый вас к вечным Обителем, виде ярость людей, злобою врага рода человеческаго одержимых, возбраняющих верным пети: Аллилуйя.
Икос 11
Светозарным сиянием, озаряющим землю нашу, явистеся святии мученицы, егда и по смерти вашей подаете исцеления и от бед спасение; тако притекаяй к вам, яко к тихому пристанищу, со умилением поем: Радуйся, Евдокие, с одра болезни на лоно Авраамово возшедшая; Радуйся, мзду за труды строителям келии Небесным Чертогом уплатившая. Радуйся, у оскорбляющих тебя прощение испросившая; Радуйся, молчанием своим пред судившими тебя Христу последовавшая. Радуйся, Дарие, огненный столпе, непрестанно горевший к Богу; Радуйся, дух радости апостольски возогревающая. Радуйся, блаженной Евдокии тело немощное, яко сосуд драгоценный понесшая: Радуйся, яко старица твоя от мучителей смерть прияв, душу свою святую на руках твоих Богу предала еси. Радуйтеся, мученицы, ко крестам, яко на Голгофу приведенныя; Радуйтеся, яко достигли есте тихаго пристанища и радости неизреченныя. Радуйтеся, яко кости ваша источают чудеса и исцеления; Радуйтеся, многих спасение. Радуйтеся, мученицы Евдокие, Дарие, Дарие и Марие, молитвенницы к Богу усердныя.
Кондак 12
Благодатную жизнь во Христе показаша святии праведницы тако светолитными венцами увенча вас Господь, Ему же вси поем: Аллилуйя.
Икос 12
Поюще песнь хвалебную, премногими глаголы не возможем изрещи крепость любве вашей ко Господу, яко до конца возлюбили и до конца претерпели; сего ради величаем вас: Радуйся, Евдокие, цвете райский дивно процветший; Радуйся, страдания Христовы понесшая. Радуйся, прозрением грядущая возвещающая; Радуйся, прибегающим к твоему заступлению, помощь скоро подающая. Радуйся, полчища бесов посрамившая; Радуйся, от плена вражьего кающихся свобождающая. Радуйся, избавление от печали; Радуйся, устранение соблазнов. Радуйтеся, мученицы, неиссякаемый кладезь Божия благодати; Радуйтеся, тишину и мир утверждающий. Радуйтеся, иереев хвалебная песнь; Радуйтеся, монашествующих радосте. Радуйтеся, мученицы Евдокие, Дарие, Дарие и Марие, молитвенницы к Богу усердныя.
Кондак 13
О, святии мученицы, Евдокие, Дарие, Дарие и Марие, приимите песнь сию, прославляющую досточудное житие и яже за Христа страдания ваша; ныне же Лицу Божию предстоя и Пречистей Его Матери, молите о нас, поющих Богу: Аллилуйя, Аллилуйя, Аллилуйя.
Кондак 1
Взбраннаго Христова воина днесь дерзаем ублажити тя, преподобне Иове! Ты бо в терпении мнозе претек житие, прилоги врагов раззорил еси и страданием украсився, угоден Богови явился еси, Емуже на Небесех предстоя, выну молишися о вопиющих тебе таковая:
Радуйся, Иове, присный наш споспешниче, Ущельский чудотворче.
Икос 1
Ангелообразным Богови угоден житием, воистинну ищущым спасения светильник явился еси, преподобне Иове, ихже ради обитель создав, Мезенскую страну от лютаго миродержца свободил еси. Темже ти вопием:
Радуйся, мира славою не уязвленный.
Радуйся, в обители Соловецтей игу Христову поклонивыйся.
Радуйся, яко тамо, плоть умертвив, духом просветился еси.
Радуйся, яко последи в Мезенстей стране водворился еси.
Радуйся, яко ту, на спасение людей, обитель Ущельскую соградил еси, в нейже в подвизех добрых до конца подвизался еси.
Радуйся, в скончании жития добрый страдальче.
Радуйся, Иове, присный наш споспешниче, Ущельский чудотворче.
Кондак 2
Видяй, преподобне Иове, яко мира красная ни во что же вменяются, куплями к тому житейскими не обязался еси. Обаче, духом влеком, во обитель прешед Соловецкую, Христови единому поработати возжелал еси, смиренно поя: Аллилуиа.
Икос 2
Разум Христов стяжавая во обители преподобных отец посты и молитвами плоть истончив, дух же окрилив, в меру возраста исполнения Христова достигл еси, преподобне Иове, сего ради рцем:
Радуйся, Христову стаду приобщивыйся.
Радуйся, во бдении не ослабевый.
Радуйся, унынием не преодоленный.
Радуйся, терпением в подвизех укрепивыйся, и всеми добродетельми украсивыйся.
Радуйся, высоту подвигов утаевавый смирением, пребываяй в молчании.
Радуйся, темже всея братии любимиче.
Радуйся, Иове, присный наш споспешниче, Ущельский чудотворче.
Кондак 3
Силу благодати, яко спасения шлем, веру аки щит восприяв, чресла истиною препоясав, всякое искушение отразил еси, преподобне Иове, духовным мечем, иже есть Божий глагол: Аллилуиа.
Икос 3
Имеяй выну Крест Христов пред очима, муж желаний духовных неложно явился еси, преподобне Иове. Всех бо твоя исправление, паче солнца светлейшая, воздвизаша вопити тебе:
Радуйся, Зосимы, Савватиа и Германа воспитание дивное.
Радуйся, Антониа и Иринарха чадо всехвальное.
Радуйся, Елеазара, Елиссеа и Диодора сподвижниче.
Радуйся, ангелозрачнаго воинства совоителю, и в пагубу ловчих сетей раззорителю.
Радуйся, яко миру незримый, о мире ходатай явился еси.
Радуйся, яко о свершении всякаго блага усердно молился еси.
Радуйся, Иове, присный наш споспешниче, Ущельский чудотворче.
Кондак 4
Бурю греховную, миром воздвизаемую, Христос утишити хотяй, трапезе своей предстояти сподоби тя, преподобне Иове. Ты же, достойне жертву святую творя, исцеляя недуги благодарными усты воспевал еси Ему: Аллилуиа.
Икос 4
Слыша владыка Исидор прошение братии, видев же свет добродетелей твоих, преподобне Иове, священства тебе удостои, егоже ради усугубил еси подвиги воздержания братии служением, приемля от всех сицевая:
Радуйся, Святейшаго чистый служителю.
Радуйся, непорочный Тела и Крове Его преподателю.
Радуйся, о грешницех ходатаю.
Радуйся, скорбящым утешение.
Радуйся, яко молитва твоя на путь всех благий наставляше.
Радуйся, яко усопших сия лютых мытарств свобождаше.
Радуйся, Иове, присный наш споспешниче, Ущельский чудотворче.
Кондак 5
Боготечный, аки древле звезда, ко Христови приведением мудрецы от Восток просветившая, к Мезенстей стране устремился еси, преподобне Иове, идеже Рождшуся от Девы дом молитвы создав, научил еси вся смиренно пети Ему: Аллилуиа.
Икос 5
Видяще, страны тоя людие, яко древняго Иова сбыстся упование, егда искупитель за ны явися Христос, о пришествии твоем веселяхуся. Христу бо верно служити учай, Иов новый явился еси, преподобне, слыша от всяких таковая:
Радуйся, звавших тя услышавый.
Радуйся, яко мразныя страны, духом горяй, не убоялся еси.
Радуйся, во благо людем тоя изнесый благодать искупления.
Радуйся, исповедания неложнаго научителю.
Радуйся, жития богоугоднаго наказателю.
Радуйся, светильниче, егоже дому Владыка не скры.
Радуйся, Иове, присный наш споспешниче, Ущельский чудотворче.
Кондак 6
Проповедник Христова учения делами вся словеса оправдал еси, преподобне Иове. Живый бо в Мезенстей стране, людем глаголя, яко добрыми делы благоугождается Бог, первее сия сотворил еси сам, Жизнодавцу Христу смиренно поя: Аллилуиа.
Икос 6
Возсияв, яко солнце, в полунощней стране, светом твоих добродетелей, многих привлекл еси, преподобне Иове, иже крестом плоть распяв, чужди мирови, о Христе восхваляху тебе:
Радуйся, Христовы любве исполнение.
Радуйся, образе надежды крепкия.
Радуйся, в горняя управителю.
Радуйся, благочестия страны утвердителю.
Радуйся, аки столп светел, имже демоном путь во страну заградися.
Радуйся, аки лествица, еюже к небесем открыся восхождение.
Радуйся, Иове, присный наш споспешниче, Ущельский чудотворче.
Кондак 7
Спасения ради сошедшихся обитель Ущельскую соградил еси, преподобне Иове. Христова Рождества ю храмом украсив, иноческаго жития уставы утвердил еси, да иноцы, неблазненно живуще, выну Богови поют: Аллилуиа.
Икос 7
Новая купель Силоамская бысть обитель твоя, преподобне Иове. В нейже язвами греха изможденнии душы мир улучаху, по слову Христову живуще: «Иже ити по Мне хощет, да отвержет себе, и взем крест свой, Мене вслед грядет: иго бо благо и бремя Мое есть легко». Темже чтим тя, глаголюще:
Радуйся, пастырю добрый, душу за овцы своя полагавый.
Радуйся, сеятелю добраго семене, слова Христова.
Радуйся, яко сие на ниву благую паде.
Радуйся, яко тем израсте благочестия древо.
Радуйся, яко избранным плодом соградил еси кошницу.
Радуйся, яко Церкве Зиждителя трудом приобщился еси.
Радуйся, Иове, присный наш споспешниче, Ущельский чудотворче.
Кондак 8
Странное явися видение, яко тоя быв начальник обители, тяжкия труды приимал еси, преподобне Иове. Во плоти бо, яко безплотен, в постех и молитвах живый, ничтоже себе недостойно возмнил еси, выну сладце Христови поя: Аллилуиа.
Икос 8
Всем единожды братием на селе трудящымся, един, обитель блюдяй, помышлял еси в себе, преподобне Иове: трава яко дние суть наши, яже ожестеет и изсхнет, и множае в них труд и болезнь, егда приидоша разбойницы, о нихже помышляюще со страхом, ти рцем:
Радуйся, ангельскаго образа блаженный носителю.
Радуйся, иноком братием независтный содетелю.
Радуйся, трудником образе.
Радуйся, яко тобою труд всякий освятися.
Радуйся, яко тем праздность гордых обличися.
Радуйся, обители своея даже до крове защитниче.
Радуйся, Иове, присный наш споспешниче, Ущельский чудотворче.
Кондак 9
Всякия исполньше радости, о сокровищех разбойницы вопрошаху тя, преподобне Иове; имже противустал еси кротце глаголя: «Чадца, ничесоже сих имамы: нам Христос есть едино сокровище, во еже жити о нем и умрети, смиренно поя во трудех: Аллилуиа.
Икос 9
Витийством твоим посрамленнии ничесоже пояти могуще, сии сердце свое озлобиша на тя преподобне Иове. Жгуще бо тя, нещадно влачаху, пхаху, бияху, яко тело твое, постом изсушенное, раздирашася, кровь же твоя напаяше сию освященную землю. Зряще сия умиленно вопием ти:
Радуйся, яко дадеся ти область страдания.
Радуйся, яко терпением губителей уничижил еси.
Радуйся, яко малодушным мужества образ явился еси.
Радуйся, яко в страдании Творца не укорил еси.
Радуйся, яко диавола древнюю лжу паки обличил еси.
Радуйся, Иова Тидийскаго достойный соименниче.
Радуйся, Иове, присный наш споспешниче, Ущельский чудотворче.
Кондак 10
Спасл еси тела страданием душу твою, преподобне Иове, терпением бо твоим изможденнии разбойницы ти усекоша главу, и тело повергше, отъидоша в погибель. Ты же Христови представ, с лики старцев Ему вопиеши: Аллилуиа.
Икос 10
Стену тя имущи, узрев же убиена, ужасеся о сем братия, привлачащи окрестная плачем. Егда купно вси соидошася, честне тело твое погребоша, к немуже притекающе, молитвы творяще, вопияху тебе:
Радуйся, страдания светлое совершение.
Радуйся, яко руце твои мечу не прикоснушася.
Радуйся, яко седины твоя кровию за ны обагришася.
Радуйся, яко усечением главы тайна жития твоего запечатлеся.
Радуйся, яко душа твоя ангелы на небеса возведеся и Цареви предста.
Радуйся, яко в ризы брачныя одеявся, Христу, на Фаворе преобразившуся, уподобился.
Радуйся, Иове, присный наш споспешниче, Ущельский чудотворче.
Кондак 11
Пение Рожденному от Девы благодатныя иереи и вси людие принесоша велие, зряще, яко по мнозех летех нетленно тело твое соблюдеся, чудесы же источая, научи вся вопити о тебе: Аллилуиа.
Икос 11
Светозарен, яко сияние небес, чудесы, аки света столпы облистал еси, преподобне Иове, мрачную страну; теплыми же Богови молитвами хлад тоя испразднил еси, от от любящих тя приемля сердец таковыя хвалы:
Радуйся, сияние мрака силы разгоняющее.
Радуйся, луно, умирение душам подающая.
Радуйся, пустыни мразныя согреяние и вихрей хладных утишение.
Радуйся, океана-моря украшение, в немже плавающих от потопления спасаеши.
Радуйся, яко от бесов дручимых свобождаеши и всякия недуги целиши.
Радуйся, яко звезда и нам путь указует твое житие.
Радуйся, Иове, присный наш споспешниче, Ущельский чудотворче.
Кондак 12
Благодати причастник, чудеса показуеши всем, преподобне Иове, яко присныя ти не оставляеши, обаче со святыми усердно моляся о нас, козни злых раззоряеши муринов, победне Цареви поя: Аллилуиа.
Икос 12
Песньми превозносяще Христа, Емуже послужив, приложился еси Церкве Святых, яже бо, зрящи на текущыя, спасения ищущым велие творит вспоможение, сице тя величаем:
Радуйся, Троице Единосущныя предстоятелю, в райских кущех радости великия наслаждаяйся.
Радуйся, Рождшия Сына Божия ублажателю.
Радуйся, Симеонови и Анне со Предтечею соутешенный.
Радуйся, Иова Многострадальнаго совсельниче.
Радуйся, всем святым сотаинниче.
Радуйся, яко на земли тя чтущыя призираеши и моления сих любезне приемлеши.
Радуйся, Иове, присный наш споспешниче, Ущельский чудотворче.
Кондак 13
О преподобне отче наш Иове! Вечно живый в невечернем дни Царствия Христова, умоли всех Владыку, да верою тя ублажающе, молитвами твоими, наше житие преобразив во благое, тояжде причастимся благодати, во веки поюще Искупившему нас: Аллилуиа.
Этот Кондак читается трижды, затем Икос 1-й и Кондак 1-й.
Молитва преподобному Иову, Ущельскому чудотворцу
Преподобне отче наш Иове, молитвою твоею и верою и любовию и чистотою сердца еще на земли во обитель Предвечнаго Бога Слова душу свою устроивый и мечным от разбойник усечением главы твоея житие запечатлевый, по отшествии же твоем от земных наипаче к Богу приближивыйся, но и от нас духом любве твоея не отступивый, и честныя твоя мощи, яко сосуд благодати полный, нам оставивый. Велие имея дерзновение ко Всемилостивому Владыце, моли Его спасти ны верующыя и к тебе с любовию и теплою молитвою притекающыя. Ходатайствуй пред Ним: страждущую страну Российскую от лютых безбожник и власти их да свободит, и да возставит престол православных правителей: верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш. Испроси нам у Великодаровитаго Бога нашего всякий дар, коемуждо благопотребен во спасение, веры непорочны соблюдение, градов наших утверждение, мира умирение, от нашествия иноплеменных избавление, от глада и пагубы сохранение, младенцем воспитание, юным наставление, сиротам и вдовицам заступление, скорбящым утешение, по морю плавающым, хладныя пустыни и темныя дебри преходящым верное ко пристанищу приведение, недугующым исцеление, бесным от демонскаго нашествия свобождение, падшым во грехи покаяние и возстание, от Церкви Христовы отпадшым вразумление и на путь спасения возвращение, подвизающымся укрепление, благоделающым в делех благих преспеяние и благословение, отходящым от сего временнаго жития к вечному благое напутствие, отшедшым блаженное упокоение. О священная главо! Посети место сие святое, древле кровию твоею честною обагренное и омовенное: соблюди и укрепи молитвами твоими обитель твою, разшири ю, украси добродетельми тоя сестры, и вся притекающыя к тебе добре сохрани во веки веков. Аминь.
Молитва иная
О преподобне и богоносне отче наш Иове! Велие имея к Богу дерзновение, молися непрестанно о всех нас, зане буря многих бед и скорбей обдержит ны: се бо недузи телеснии, болезни душевныя, приражения вражия обуревают ны. Ходит бо враг наш, иский кого поглотити: мы же о спасении нашем нерадяще, несмы достойни ниже воззрети на высоту небесную, ни Господа в помощь свою призвати. Но ты буди нам помощник во спасение скорый и от зол избавитель неодолимый. Подаждь нам память смертную, слезы покаяния и надежду спасения, да не в отчаяние впадем, ниже дерзостным на милосердие Божие упованием, во гресех же пребыванием, в конец себе погубим: но да будет нам память грехов наших во источник теплых слез и сокрушения сердечнаго, милосердие же Божие и благодать Его во спасение наше, молитвами твоими, да подастся нам твоим чадом, во веки веков. Аминь.
Молитва третья
О преподобне отче и богоносне наш Иове! Предстоя Престолу Пресвятыя Троицы, молися непрестанно: страждущую страну Российскую от лютых безбожник и власти их да свободит, и да возставит престол православных правителей: верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш: да ходим кийждо достойно звания нашего, в немже звани быхом, и да будет земля наша добра, и вси живущии на ней род избран, царское священие, язык свят, людие обновления, ныне и присно и во веки веков. Аминь.
Кондак 1
Возбранный Воеводо и Царю славы, Тебе небеси и земли Создателя, зрящи на горе Фаворстей преобразившася со славою, вся тварь удивися, небес вострепеташа, и вси земнороднии возрадовашася, мы же недостойнии Твоему нас ради Преображению благодарственно поклонение приносяще, с Петром от души вопием Ти: Иисусе, Превечный Боже, добро нам всегда быти под кровом благодати Твоея.
Икос 1
Ангелом недоведомое и человеком неприступное Твое, Светодавче Христе, Божество, незаходительными молниями и лучами Невечерняго Света Твоего, явил еси на горе Фаворстей начальнейшим учеником Твоим, тии же Божественным изменишася ужасом, облаком осиявшеся светлым и глас Отечь слышавше, разумеша Твоего вочеловечения таинство, вопиюще Тебе таковая: Иисусе, Сыне Божий Безсмертный, просвети нас светом Лица Твоего осияннаго. Иисусе, Благий Боже Всесильный, возбуди нас спящих из глубины тьмы сна греховнаго. Иисусе, во свете живый неприступнем, из области темныя изведи нас. Иисусе, Славою Твоею исполнивый весь мир, во обители райския введи нас. Иисусе, Свете мира, от мира лукавого свободи нас во тьме седящих. Иисусе, Солнце Правды, силою и правдою облеки нас, в сени смертней спящих. Иисусе, Превечный Боже, добро нам всегда быти под кровом благодати Твоея.
Кондак 2
Видя, яко ученицы Твои, Человеколюбче Господи, непросвещенни еще суще, не разумеют, яко подобает Тебе идти во Иерусалим и тамо много пострадати и убиену быти, Ты оттоле начал еси сказовати им, яко вся сия належит Тебе волею претерпети нашего ради спасения. Обаче тии не возмогоша еще мыслити, яже суть Божия, но яже суть человеческая, сего ради по днех шестих поял еси Петра, Иакова и Иоанна и возвел еси я на гору Фаворскую показати им прежде Креста Божественную Славу Твою, да и во время страданий Твоих разумно воспоют Тебе: Аллилуиа.
Икос 2
Разума неуразуменна вольнаго Твоего страдания не разумеша ученицы Твои, Господи. Сего ради прежде Креста Твоего нощию глубокою возвел еси на гору высоку лучшия ученики Твоя, да видят чудо страшнаго Преображения Твоего и нестерпимое Божественного пришествия Твоего издалеча присносущное благолепие, да егда Тя узрят распинаема, страдание убо Твое, да уразумеют вольное. Сего ради вопием Тебе сице: Иисусе, от удолий на гору высоку возведый Твоя ученики, возведи и нас горе, да горних научимся искати наслаждений. Иисусе, от житейских попечений и множества народнаго отлучивый Петра и Заведеовых, отлучи наш ум от благ земных, да дольных навыкнем избегати пристрастий. Иисусе, многими труды на превелию высоту вознесый други своя, и нас многими труды и поты научи по вся дни подвизатися. Иисусе, в молчании ночныя молитвы Преображение Твое учеником показавый, и ныне верным Твоим сподоби сладостию словес Твоих в нощи просвещатися. Иисусе, трех точию свидетелей славы Твоея в тишине Фаворстей явивый, и ныне безмолвным и пустынным даждь славу Твою всегда созерцати. Иисусе, Фавор и Ермон о Имени Твоем возвеселивый, даждь нам призыванием сладчайшаго Имени Твоего восход горе совершати. Иисусе, Превечный Боже, добро нам всегда быти под кровом благодати Твоея.
Кондак 3
Силою свыше избранныя Твоя Апостолы облекий, Иисусе, на Фавор возвел еси я, да навыкнут вышних искати и горняя мудрствовати, а не земная, облецы и нас, долу поникших и немощию плоти всегда побеждаемых, силою и славою Твоею, да сила Твоя в немощи нашей совершится, чесо ради с любовию воспоем Тебе: Аллилуиа.
Икос 3
Имеяй прежде Креста и вольнаго страдания Твоего явити учеником отчасти Божества Славу Твою, Христе Спасе наш, Ты трех точию от живущих на земли избираеши, да зрителие Божественныя Твоея славы будут, ибо тии три пред очима Твоима лучши бяху паче всех народов и язык: Петр, яко паче иных Тебе возлюбивый, и яко первый от всех Сына Божия Тебе исповедавый, Иаков, яко первый во Апостолех надежды ради будущих благ под меч главу свою преклонивый и тако начало мучеником Твоим положивый, Иоанн же, яко девственник и паче всех чистоту плоти и духа целомудренно сохранивый и сего ради благодать особную паче иных получивый к зрению неизреченных откровений и Божественныя Славы Твоея. С нимиже приими и от нас похвалы Тебе сицевыя: Иисусе, от Петра прежде Преображения Твоего исповедание веры приемый, приими и мое теплое исповедание. Иисусе, тому же Петру на Фаворе дерзновение даровавый глаголати с Тобою, возглаголи благая и мирная в сердце моем. Иисусе, сынов Заведеевых за пламень любви их сынами громовыми нарекий, громом гнева Твоего не порази мя. Иисусе, тем же учеником огнь с небесе на Самарян низвести не попустивый, огнь страстей угаси во мне. Иисусе, с девственным Иоанном в чистоте плоти и духа на Фавор горний возведи мя. Иисусе, с мужественным Иаковом, первее чащу Твою испившим, врай введи мя. Иисусе, Превечный Боже, добро нам всегда быти под кровом благодати Твоея.
Кондак 4
Буря Богоявления Твоего на горе Синайстей бысть, егда во громех и молниях даровал еси закон угоднику Твоему Моисеови, такожде и на горе Хориве бысть дух крепок, разоряяй горы, трус и огнь, егда Илия пророк хотяше зрети Тя, обаче не в вихре бурне, не в трусе и не во огне Господь, но во гласе хлада тонка Ты показал еси им Лице Свое и славу Божества Своего, егда на горе Фаворстей Ты предстал еси им, с радостию вопиющим Тебе: Аллилуиа.
Икос 4
Слышавше Моисей и Илия на Фаворе глаголы Твоя о исходе Твоем, егоже хотяше скончати во Иерусалиме, быша всему миру свидетелие Твои, Господи, яко Ты еси воистину Сын Божий на спасение людей от Бога Отца посланный и гласом с небесе Тем показанный. Моисей убо от мертвых призван бысть да свидетельствует во аде держимым Твое в мир пришествие. Илия же от рая призван бысть, да скажет Еноху Славу Твою в Преображении пречистыя Плоти Твоея виденную. Мы же, чудящеся тайне пророк Твоих на Фаворе явления, со умилением зовем Тебе: Иисусе, Боговидцу Моисею, Лице Твое узрети восхотевшему, на Фаворе Лицем к лицу явивыйся, яви нам в грядущем веце Лица Твоего сладость превожделенную. Иисусе, в боговидении задних Твоих древле Моисею сияние Славы Твоея Показавый, покажи нам во Царствии Твоем лицем к Лицу Зрака Твоего доброту неизреченную. Иисусе, в тишине и гласе хлада тонка Илию откровением Своим наставивый, настави мя чудно в тишине безстрастия божественнаго. Иисусе, на огненней колеснице неопальнаго небошественника Твоего Илию в рай возведый, возведи мя дивно на высоту жития совершеннейшаго. Иисусе, древле с пророки многообразно глаголавый, и на Фаворе исход Свой им возвестивый, глаголами живота вечнаго напитай алчущую душу мою. Иисусе, при устех двою свидетелей Тайну Преображения учеником Твоим открывый, воздыханьми неизглаголанными Святаго Духа воспламени хладную веру мою. Иисусе, Превечный Боже, добро нам всегда быти под кровом благодати Твоея.
Кондак 5
Боготечней звезде в нощи возсиявшей, уподобися, Светодавче Господи, неизреченное осияние пречистыя Плоти Твоея, егда учеником спящим и нощи, уже ко утру приближающейся, Ты возносил еси Отцу Твоему на высоте горы премирную молитву Свою. Тогда просветися Лице Твое, яко солнце, и ризы Твоя быша блещащяся, белы зело, яко снег. Апостоли же от нашедшия Божественный силы убудившеся, увидеша Славу Твою, яко Единороднаго от Отца, исполнь благодати и истины, и стояху трепетни, поюще Тебе: Аллилуиа.
Икос 5
Видевше Апостоли Тя на Фаворе во образе человечестем сущаго, славою же Божественною Преобразившася и с Моисеом и Илиею о исходе Твоем беседующа, разумеша присносущную силу Твою и Божество под покровом плоти сокрываемо, и ужасни быша, послушающе глаголемых и наслаждающеся зрения Твоея Божественныя славы, юже толико видеша, елика телесных очес зрение их вместити можаше. С нимиже и мы поем Тебе таковая: Иисусе, возсиявый учеником Твоим неизреченную и Богосиянную Славу Твою, возсияй в душах наших Свет Твой присносущный. Иисусе, причастивый первостоятели закона и благодати премирнаго Света Твоего, причащением Того собери ум наш приснозаблудший. Иисусе, сокровенную во плоти молнию Божества Твоего на Фаворе мало обнаживый, обнажи сокровенныя грехопадения в убогой совести моей Иисусе, несозданнаго Света Твоего лучами из Плоти Твоея Святую гору озаривый, озари свет заповедей Твоих во мрачней души моей. Иисусе, Преображением причистыя Плоти Твоея просветивый мира концы, просвети и украси нас помраченных. Иисусе, блистанием Фаворскаго Света Твоего очистивый, яко снег, твоя ученики, очисти и обнови нас потемненных. Иисусе, Превечный Боже, добро нам всегда быти под кровом благодати Твоея.
Кондак 6
Видевше преблагостное и спасительное собеседование Твое, Христе Боже наш, со Моисеом и Илиею на горе Фаворстей, возрадовашеся зело ученицы Твоя: Петр, Иаков и Иоанн. Петр же гласом любве божественней исполненным рече: “Господи, добро сеть нам зде быти: аще хощеши, сотворим зде три сени, Тебе едину, и Моисеови едину, и едину Илии”. Мы же недостойнии, не дерзаем прямо Тебе вопрошати, обаче смиренно о помиловании молим Тя и гласом трепетним вопием Ти: Аллилуиа.
Икос 6
Возсия на Фаворе во знамение всей вселенней облак светел, Петру о сенях вопрошающу, откровение гласа Отеческаго возвещающ и Духа Святаго пришествие, и егда осени Апостолы, верх горы окружающе, тии паче убояшася и во облак со страхом вступивше, ощутиша Твое неприступное Божество, и со дерзновением многим возопиша к Тебе таковая: Иисусе, Израиля древле столпом облачным в пустыне путеводивый, Сам и ныне путь во Царствие Твое нам укажи. Иисусе, Апостолы Твоя во облаце светле на Фаворе осенивый, росою Духа Твоего Святаго нас осени. Иисусе, во Храме нерукотвореннем Живый на небеси, храм световиден и сень пречистую покажи ми Твоего Божества. Иисусе, скиний рукотворенных не восхотевый на земли, внутреннюю благообразную скинию Духа Твоего сотвори мя, во еже взыти на небеса. Иисусе, одеяйся светом, яко ризою, облеки мя обнаженнаго в боготканныя ризы целомудрия и чистоты. Иисусе, простираяй небо, яко кожу, одени мя острупленнаго в снегосветлыя одежды Твоея небесныя красоты. Иисусе, Превечный Боже, добро нам всегда быти под кровом благодати Твоея.
Кондак 7
Хотя открыти сокровенную от века тайну Твоего, Христе, Божества, Отец Твой Небесный паки якоже прежде на Иордане во время Крещения Твоего, Богосыновство Твое возвести и тако гласом из облака бывшим свидетельствова, глаголя: “Сей есть Сын Мой Возлюбленный, Того послушайте”. Апостоли же от великаго ужаса крепости своея лишившися, падоша ниц на землю, вопиюще Тебе: Аллилуиа.
Икос 7
Новая видевше и преславная на Фаворе бывшая, Словесе Твоего, Владыко Господи, самовидцы и слуги, и глас Отеческий и шум из облака слышавше, ужасни быша и новым светолитием внезапу освещахуся, друг друга зряху, удивляющеся и к земли падше ниц, Тебе Владыце всяческих поклонишася, похвалы Тебе возсылая таковыя: Иисусе, Образе Пресветлыя Ипостаси Отчия, преобрази мрачное и нечистое житие мое. Иисусе, Славы Отчия Сияние, просвети падшую и во тьму воглубльшуюся душу мою. Иисусе дивный и страшный во славе Божественнаго зрака Твоего, тлением растленный душевный наш зрак обнови. Иисусе тихий, любви полный, неизреченною светлостию Плоти Твоея всю нечистоту плоти моея паче снега убели. Иисусе, Свете Безначальный, во свете Твоем, на Фаворе явленном, Свет покажи нам Отца. Иисусе, Свете неизменный, в незримом Свете Царства Твоего, Свет покажи нам и Духа. Иисусе, Превечный Боже, добро нам всегда быти под кровом благодати Твоея.
Кондак 8
Дивно и странно явистася Тебе Моисей и Илия на Фаворе, Владыко Господи, начертание Божественныя Ипостаси видевше, и глаголаста о вольном страдании Твоем, священнолепно предстояще Тебе. Осенившу же их облаку светлу и гласу с небесе бывшу, взятся Слава Господня от видения ученик Твоих, взяшася же и пророцы во своя места, поюще Тебе: Аллилуиа.
Икос 8
Весь был еси от вышних, Неисчетный Слове Божий, егда пречистая Плоть Твоя преображашася на Фаворе, но и от нижних никакоже отступил еси, егда отшедшим пророком и видению уже скончавшуся, Ты приступил еси к лежащим страха ради на земли Твоим учеником, и рукою коснувся их, глаголал еси им: “востаните, не бойтеся”. Ученицы же, возведше очи свои и никогоже видевше, точию Тебе Единаго с ними сущаго, возрадовахуся зело и возблагодариша Бога, поюще Тебе таковая: Иисусе, имеяй глаголы Живота вечнаго, всегда пребуди с нами во странствии земном. Иисусе, насытивый нас зраком Твоего Божества, не остави нас сирых на служении Твоем. Иисусе, прежде Креста Твоего Тайну вольнаго страдания уяснивый, подаждь нам всегда памятовати Твое нас ради истощание. Иисусе, прежде еже умрети, нам славу Твою Показавый, подаждь нам всегда да разумети Твоея Плоти обожение. Иисусе, образе непременный Сущаго, обнови в души моей вожделеннаго зрака Твоего образ и подобие. Иисусе, печате равнообразная Отца, запечатлей во плоти моей неизреченныя доброты Твоея благообразие. Иисусе, Превечный Боже, добро нам всегда быти под кровом благодати Твоея.
Кондак 9
Все естество смятеся, зря Твое преславное на Фаворе Преображение, Христе Спасе: Ангели, незримо предстояще, со страхом и трепетом служаху Тебе, небеса убояшася, подвижеся и трепетна бысть вся земля, видящи славу Господа, “гора Фавор, прежде мрачна и дымна”, светлым облаком покрывашеся, “на нейже” пречистии “нозе Твои стоясте”, ученицы же Твои, Господи, не терпяще зрети нестерпимаго зрака Твоего, повергоша себе долу на землю, лица покрывающе, дондеже Ты Сам, видению скончавшуся, воздвигл еси я, Тебе вопиющих: Аллилуиа.
Икос 9
Витии суемудреннии, благодатиею непросвещеннии, не могут разумети Твоего преславнаго Преображения таинства, Господи. Сего ради, егда со ученики сходил еси с горы, дню возсиявати начинающу, Ты заповедал еси другом Твоим, да никомуже поведят видения бывшаго, дондеже по приятии страдания и смерти воскреснеши в третий день от гроба. И тии умолчаша, и никомуже возвестиша в тыя дни ничесоже от тех, яже видеша и слышаша, обаче точию в сердце своем вопияху Тебе сице: Иисусе, во всего Адама оболкийся, очерневшее древле естество человече просвети. Иисусе, во облаце, огни и мраце носимый, Твоею светлостию весь мрак душевный в нас потреби. Иисусе, сиянием Божественного шума Апостолы Твоя усладивый, услаждай нас всегда глаголами Божественного Твоего откровения. Иисусе, росодательным облаком ученики Твои Просветивый, просвещай нас всегда зарями преславнаго Твоего Преображения. Иисусе, пречистыми ногами Твоими гору Фаворскую освятивый, направи нозе наша на присное служение Тебе. Иисусе, с неповинными руками на гору Твою восходити повелевый, возбуди руце наши на молитвенное воздеяние горе. Иисусе, Превечный Боже, добро нам всегда быти под кровом благодати Твоея.
Кондак 10
Спасти хотяй мир, на Фаворе преобразился еси нас ради, Господи, да сотвориши ны достойны уготованныя избранным Твоим небесныя славы и да преобразиши тело смирения нашего, яко быти ему сообразну телу Славы Твоея во общее всех воскресение и в безконечном Твоем Царствии, еже уготовал еси от сложения мира любящим Тя, в немже да сподобиши и нас, яко Моисея и Илию на Фаворе лицем к лицу лицезрети Тя и со всеми святыми воспевати Тебе вечную песнь: Аллилуиа.
Икос 10
Царю Превечный! Вся твориши нашего ради спасения. Мене ради восприял еси плоть пречистую от Пресвятыя Девы Марии и в зраце раба пришел еси в мир сей. Такожде и преобразился еси на святей горе, не Себе угождая, не требует бо Свет просвещения, но нас ради осужденных, да нашу просветиши тьму и нас, во тьме седящих и среди сени смертныя, от сынов гнева в возлюбленныя чада Твоя да преобразиши. Сего ради благодарственно вопием Тебе таковая: Иисусе, зрак рабий на Фаворе преобразивый, да нас из рабов греха чада Божия сотвориши. Иисусе, даже до плоти Себе истощивый, да наше падшее естество с Собою преобразиши. Иисусе, неизреченное благолепие Царства Твоего на Фаворе явивый, радость, мир и правду о Дусе Святе в нас утверди. Иисусе, Божественным блистанием плоти Твоея всю тварь обоживый, обожением плоти во Втором пришествии Твоем нас обнови. Иисусе, огнь Божества Твоего на Фаворе явивый, огнем невещественным грехи моя попали. Иисусе, сладчайшею беседою Твоею тамо ученики Своя напитавый, Святыми Тайнами Твоими гладную душу мою освяти. Иисусе, Превечный Боже, добро нам всегда быти под кровом благодати Твоея.
Кондак 11
Пение всеумиленное приношу Ти недостойный, Твоего Преображения совершая светлое торжество и вопию Тебе: высоту небеснаго жития и славы присносущныя Божественное сияние даруй ныне рабом Твоим, сердцем же чистым сподоби нас мысленно взыти на гору святую Твою, видети разумными очесы преславное Преображение Твое, да светло воспоем Тебе: Аллилуиа.
Икос 11
Свет Сый Неприступен и Света Податель, Иисусе, Безначальный и Присносущный Свете, Свет Твой в мир принесл еси, егда с пречистою плотию Твоею вшел еси на гору Фаворскую и тамо Несозданный и Божественный Свет явил еси учеником Твоим, Славы Отчия показуя образ. Сего Света Твоего преестественнаго причастники быти желающе, из глубины души вопием Тебе таковая: Иисусе Христе Свете Истинный, помыслы добрыми душу мою живи во вся дни земнаго странствия моего. Иисусе Царю, Свете Безначальный, угасший светильник души моея паки возжги до дне скончания моего. Иисусе, Свете тихий, живот даяй, свет и живот низпосли души моей в час ужасный смерти моея. Иисусе, Свете Святый, светяй и горяй, из огня неугасимаго и тьмы кромешныя изхити мя тогда. Иисусе, Сладчайший и Святейший Свете, к свету небеснаго чертога Твоего среди горьких мытарств воздушных проведи мя. Иисусе, солнца всякого Светлейший Свете, во светлостях святых Твоих в невечернем дни Царствия Твоего просвети мя. Иисусе, Превечный Боже, добро нам всегда быти под кровом благодати Твоея.
Кондак 12
Благодать Твою подаждь мне, Иисусе Боже мой, юже на Фаворе даровал еси избранным учеником Твоим Петру, Иоанну и Иакову, и приими нас, якоже оных, да облеченнии силою Твоею свыше и Духом Святым просвещеннии, сердце же чисто имущи и дух обновлен, взыдем на мысленный Фавор, восходяще от силы в силу, наипаче же в посте и молитве подвизающеся, в целомудрии же и в чистоте пребывающе, и тамо да воспоем Тебе: Аллилуиа.
Икос 12
Поюще пречистыя Плоти Твоея преславное Преображение, прославляем Божественную Славу Твою на Фаворе явленную, поклоняемся присносущней Силе Твоей и Божеству, Егоже зарю малую тамо обнажил еси, Христе, и веруем с Петром, яко Ты еси воистину Христос, Сын Бога Живаго, пришедый в мир грешныя спасти, тем же и вопием с ним из глубины души: добро нам зде быти с Тобою. Сего ради не посрами нас в Тя право верующих, обаче немощных и плотию обложенных и покрый нас Светом Богосиянныя Плоти Твоея, с любовию зовущих Тебе сице: Иисусе, Солнце Незаходимое, на Фаворе возшедшее. Твоим Божественным сиянием осияй мя, Иисусе, Свете несокрываемый в Преображении явленный, Твоея благодати причащением согрей мя. Иисусе, Храме Предвечный Небеснаго Иерусалима, в скинию Божию с человеки всели мя. Иисусе, Цвете Благовонный Рая Всесвятаго, небесными ароматами святыни и чистоты облагоухай мя. Иисусе, Огню чистительный, небо и землю от всякия скверны очистити хотяй, от скверны плоти и духа очисти мя. Иисусе, Каменю вседрагий, Горний Сион вместо солнца красотою Божественною освещати имеяй, от зрения иныя красоты паче Тебе избави мя. Иисусе, Превечный Боже, добро нам всегда быти под кровом благодати Твоея.
Кондак 13
О, Пресладкий и Всещедрый Иисусе, на Фаворе Божественною славою просиявый! Приими ныне малое моление сие наше, и якоже приял еси от ученик Твоих на святей горе поклонение, тако и нас сподоби преславному Преображению Твоему поклонитися, во свете добрых дел сияюще, да просветится Тобою тьма греховная в нас живущая, и да явимся достойны быти наследники безконечнаго Царствия Твоего на небеси, идеже со всеми святыми сподоби и нам воспевати Тебе: Аллилуиа. (Трижды).
(Этот кондак читается трижды, затем икос 1 и кондак 1)
Молитва Преображению Господню
Господи Иисусе Христе, Боже наш, во Свете живый неприступнем, Сияние сый Славы Отчия и Образ Ипостаси Его! Егда прииде исполнение времен, Ты за милосердие неизреченное к падшему роду человеческому Себе умалил еси, зрак раба приял еси, смирил еси Себе, послушлив бысть даже до смерти. Обаче прежде Креста и вольныя страсти Твоея на горе Фаворстей преобразился еси в Божественней Славе Своей пред святыми Твоими ученики и Апостолы, мало скрыв плоти восприятие, да егда Тя узрят распинаема, и смерти предаваема, уразумеют убо страдание Твое вольное и Божество. Даруй же и нам всем, пречистыя Плоти Твоея Преображение празднующим, чистым сердцем и нескверными умы взыти на Святую гору Твою, в селения святыя славы Твоея, идеже глас чист празднующих, глас несказаннаго радования, да тамо купно с ними лицем к лицу узрим Славу Твою в невечернем дни Царствия Твоего, и со всеми святыми, от века Тебе благоугодившими прославим Всесвятое имя Твое со Безначальным Твоим Отцем и Пресвятым и Благим и Животворящим Твоим Духом ныне и присно и во веки веков.