Тропарь преподобного Пимена Многоболезненного, Печерского, в Ближних пещерах
Богоноснаго Антония смиренномудрием подражая, / терпением Иову подобяся, / не исцеления от болезни, но паче протяжения тоя / желал еси себе, терпеливодушне Пимене, / да не како, здрав быв / и от места сего родительми исторжен, / сожития преподобных и чина их лишишися, / тем паче надежды от самих Ангел пострижен был еси, / с нимиже моли Христа Бога / спастися душам нашим.
Кондак преподобного Пимена Многоболезненного, Печерского, в Ближних пещерах
Долговременную болезнь благодарив претерпевшаго,/ приидите, сошедшеся, восхвалим Пимена многотерпеливаго,/ иже бо иногда за смрад в болезни бе гнушаемь,/ сей ныне благоухание испущает/ с верою к раце мощей его приходящим/ и прогонит злосмрадие страстей от вопиющих:/ прииди, Пимене, к нам, и ничтоже успеет враг на ны.
Тропарь преподобному Меркурию Печерскому, епископу Смоленскому, в Ближних пещерах
Постом душу твою просветил еси, / молитвами непрестанными сердце твое сосуд Духа Святаго соделал еси, / преподобне отче наш Меркурие; / темже вся вражия ополчения крепко посрамил еси / и, яко победоносец истинный, / воздаяние получил еси от Христа Бога. / Тому помолися о душах наших.
Кондак преподобному Меркурию Печерскому, епископу Смоленскому, в Ближних пещерах
Любовию ко Христу уязвив твою душу,/ преподобне отче наш Меркурие,/ в пещернем мраце свет спасения обрел еси/ и, яко чадо избранное великих отцев Печерских Антония и Феодосия,/ вкупе с ними обитель райскую наследовал еси,/ отонудуже призирай ныне на обитель земную,/ в нейже подвизался еси,/ и молися о чтущих память твою.
Тропарь священномученика протопресвитера Александра (Хотовицкого)
Кротость и смирение стяжавый, любовь Христову пастве своей показал еси в годину огненных искушений Церкве Российския и, яко пастырь добрый, душу свою за Него положил еси. Молися о нас, священномучениче Александре, просветити души наша.
Кондак священномученика протопресвитера Александра (Хотовицкого)
Труды и болезни на рамо свое взял еси и, радуяся, путем тесным шествовал еси, страданьми за Христа Небеснаго Царства достигл еси. Моли о нас Бога Спаса, священномучениче Александре, обрести нам милость в День Судный.
Кондак священномученику Алексию Воробьеву
Избранный от земли Уржумския за веру во Христа Господа нашего душу свою положившаго и венцем славы мученическим украшенный восхваляем подвиги и страдания твоя и с любовию воспеваем ти сице: Радуйся, новомучениче Алексие, теплый о нас Богу молитвенниче Радуйся отче наш Алексие, новый мучениче и скорый помощниче!
