Тропарь святителя Филиппа Перваго
Чудо явися, извещением и делы возсияв,/ Духа Святаго произбранием святительства паству приим,/ откровением Божиим церковь разобра/ и величайшую воздвиже,/ всечестне Филиппе, святителю великий,/ мир граду даруй нашему Москве/ и велию милость.
Тропарь святителя Филиппа
Первопрестольников преемниче,/ столпе Православия, истины поборниче,/ новый исповедниче, святителю Филиппе,/ положивый душу за паству твою,/ темже, яко имея дерзновение ко Христу,/ моли за град же и люди,// чтущия достойно святую память твою.
Тропарь святителя Филиппа
Первопрестольников преемниче,/ столпе православия, истины поборниче,/ новый исповедниче, святителю Филиппе,/ положивый душу за паству твою,/ темже, яко имея дерзновение ко Христу,/ моли за Отечество наше, за град же и люди,// чтущия достойно святую память твою.
Тропарь святителя Филиппа, митрополита Московского и всея России чудотворца
Радостный возсия день светлаго торжества:/ днесь церковная расширяются недра,/ приемлюще духовных даров неоскудеемо боготворное сокровище,/ струю благодатей неисчерпаемую,/ источника чудесем обильна,/ чудотворивыя и священныя мощи твоя,/ святителю Филиппе./ Темже моли прославившаго тя Дародателя Христа Бога/ о воспевающих тя/ и кланяющихся священным мощем твоим.
Тропарь святителям Московским
Первопрестольницы Российстии,/ истиннии хранителие апостольских преданий,/ столпи непоколебимии, православия наставницы,/ Петре, Алексие, Ионо, Филиппе и Ермогене,/ Владыку всех молите/ мир вселенней даровати// и душам нашим велию милость.
Кондак святителя Филиппа Перваго
Во успении твоем обретоша на телеси твоем сокровище некрадомое:/ два креста и тяжчайшая железа, еже есть вериги,/ постом и молитвами Богу угодил еси, святителю Филиппе,/ моли Христа Бога о всех нас.
Кондак святителя Филиппа
Православия наставника и истины провозвестника,/ Златоустаго ревнителя,/ Российскаго светильника, Филиппа премудраго восхвалим,/ пищею словес своих разумно чада своя питающа,/ той бо языком хваление пояше,/ устнама же пение вещаше,// яко таинник Божия благодати.
Кондак святителя Филиппа
Православия наставника и истины провозвестника,/ златоустаго ревнителя, Российскаго светильника,/ Филиппа премудраго восхвалим,/ пищею словес своих разумно чада своя питающа:/ той бо языком хваления пояше,/ устнама же пение вещаше,// яко таинник Божия благодати.
Кондак святителя Филиппа, митрополита Московского и всея России чудотворца
Яко солнце, днесь от земных недр возсияша/ честныя твоя мощи, святителю./ Землю же и воздух шествием твоим осветил еси/ и всех верных чудес богознаменьми облистал еси,/ чудотворец предивен и молитвенник к Богу о мире изящен явися./ Сего ради вопием ти:/ спасай нас теплым своим предстательством,/ яко ученик Божия благодати.
Кондак святителям Московским
Во святителех благочестно пожисте/ и люди к богоразумию настависте,/ и добре Богу угодисте,/ сего ради от Него нетлением/ и чудесы прославистеся,// яко ученицы Божия благодати.
Величание
Величаем вас,/ святителие Христовы,/ Петре, Алексие, Ионо, Филиппе и Ермогене,/ и чтим святую память вашу,/ вы бо молите за нас// Христа Бога нашего.
Тропарь общий преподобным Иоанну и Лонгину, Яренгским
Яко звезды многосветлыя, от юности возсиявше, освятили есте сердца верных пренесением честных мощей ваших, добродетельми чудес ваших, во плоти, яко бо ангели на земли, показастеся, пощением насаждени бысте, яко древо при водах воздержания, напоени струями слез ваших, и скверну омысте, сего ради явистеся приятелище Божия Духа, Иоанне и Лонгине, молите Христа Бога спастися душам нашим.
Тропарь преподобному Лонгину Яренгскому
Свыше Божественною благодатию просветився, Богомудре, многим терпением во временней жизни течение совершил еси, темже и по успении источаеши чудес благодать, иже с верою приходящим к тебе, Лонгине всеблаженне. Слава Давшему ти крепость, слава Прославльшему тя в чудесех, слава Действующему тобою всем исцеления.
Кондак общий преподобным Иоанну и Лонгину, Яренгским
Явистеся светильницы всесветлии, во плоти ангели, яко Живота древо райское, пощением, и бдением, и верою возращаеми, процвели есте. Молитвами своими Небесную благодать приемше, врачеве же крепции явльшеся, исцеляете недужныя и души с верою притекающих к раце мощей ваших, чудотворцы славнии Иоанне и Лонгине, сего ради вси верою и любовию вопием: радуйтеся, поморстей стране похвало и утверждение.
Величание преподобному Лонгину
Ублажаем тя, преподобне отче Лонгине, и чтим святую память твою, наставниче монахов и собеседниче ангелов.
Тропарь преподобного Елеазара Анзерского
Отверг плоти тленная, / нетленных потщался еси достигнути, / и, мира удалився, / вселился еси в морский остров, / и на нем усердно многа лета Господеви поработал еси, / сего ради и дары прозрения и чудес обогатился еси,/ отче преподобне Елеазаре. / Христа Бога моли даровати нам мир и велию милость.
Кондак преподобного Елеазара Анзерского
Яко лучу тя солнечную, Христос показа, преподобне,/ сияющу во стране приморстей чудес благодатию,/ уставлявши бо плавающим тишину морскую, верою молящимся тебе и вопиющим:/ радуйся, Елеазаре, отче наш,/ страны Беломорския похвало и утверждение.
Тропарь священномученику Петру (Звереву)
Верою пламенною апостолу Петру подобяся, таже и трикратным слышанием воззвания Христова, душу твою за Того положил еси, святителю отче Петре, каменю твердый Церкви Православныя: светильниче во мраце беззаконий добродетельми сияй, радостию страдати за Христа претерпети изволил еси, со исповедники и страстотерпцы Российскими. Молися с ними о нас, архиерею Божий, священномучениче Соловецкий.
Кондак священномученику Петру (Звереву)
Во святительстве твоем добро подвизался еси, богомудре, и мученичества венцем светло украсился еси, прещения врагов Христовых не устрашився, кровьми твоими землю во отоце Анзерстем освятил еси: сего ради силы небесныя удивишася терпению твоему, мы же с верою и любовию притекаем ко святым мощем твоим, досточудне. Ныне со всеми Соловецкими святыми моли о нас Христа Бога, всеблаженне Петре, да зовем ти: радуйся, отче приснопамятне.
Тропарь преподобному Иову Анзерскому
Показавый образ добродетелей, весь страха Божия и Духа Свята исполнен бысть, Преподобне отче Иове, безмолвия истинный рачитель явился еси, страстем Господним покланяяся, имже и обитель воздвигл еси во отоце Анзерстем. Пустынножителей наставниче, моли Христа Бога спастися душам нашим.
Кондак преподобному Иову Анзерскому
Любовь Христову в сердце стяжа, еяже ради многи скорби претерпевый, пристанище обрел еси в морстем отоце, Преподобнаго Елеазара заветов верный преемник явился еси, покровом Божия Матере осеняемый: достоблаженне отче Иове, поминай нас, чтущих святую память твою.
Тропарь преподобных Вассиана и Ионы
Прежде отвержением мира,/ яко морскаго треволнения, избегосте, отцы преподобнии,/ послежде же, изволением Божиим,/ в водах морских кончину блаженную приясте/ и к неболезненному покою преставистеся от земли, радующеся./ Тем и по кончине от Христа Бога прославистеся чудесы обильно,/ теплии в бедах верным помощницы показастеся,/ и ныне на Небесех предстояще Престолу Христову,/ Вассиане преблаженне и Ионо преславне,/ молитеся присно о душах наших.
Кондак преподобных Вассиана и Ионы
Яко сокровище богатно,/ верным Божественная благодать/ из морских недр издаде мощи ваша, отцы преблаженнии,/ и в месте пусте целы и невредимы обретошася преславно,/ и тако вас ради ныне славится Бог,/ Емуже со дерзновением предстояще ныне на Небесех,/ Вассиане и Ионо досточуднии,/ молитеся непрестанно о всех нас.
Тропарь преподобных Вассиана и Ионы
Прежде отвержением мира,/ яко морскаго треволнения, избегосте, отцы преподобнии,/ послежде же, изволением Божиим,/ в водах морских кончину блаженную приясте/ и к неболезненному покою преставистеся от земли, радующеся./ Тем и по кончине от Христа Бога прославистеся чудесы обильно,/ теплии в бедах верным помощницы показастеся,/ и ныне на Небесех предстояще Престолу Христову,/ Вассиане преблаженне и Ионо преславне,/ молитеся присно о душах наших.
Кондак преподобных Вассиана и Ионы
Яко сокровище богатно,/ верным Божественная благодать/ из морских недр издаде мощи ваша, отцы преблаженнии,/ и в месте пусте целы и невредимы обретошася преславно,/ и тако вас ради ныне славится Бог,/ Емуже со дерзновением предстояще ныне на Небесех,/ Вассиане и Ионо досточуднии,/ молитеся непрестанно о всех нас.
Тропарь преподобному Иоанну Яренгскому
От земли Возведый тя к вечным обителем соблюдает и по смерти невредимо тело твое, святе Иоанне, ты бо в целомудрии и чистоте жития, блаженне, пожил еси, не осквернив тело, темже со дерзновением моли Христа Бога спастися душам нашим.
Тропарь преподобному Иринарху Соловецкому
Постническое по Бозе житие возлюбив,/ вся плотская мудрования духу покорил еси/ и воздержанием страсти умертвил еси,/ во трудех, и бдениих, и молитвах образ быв добродетели,/ тем монашескаго жития наставник показался еси,/ отче преподобне Иринарше./ Моли Христа Бога спастися душам нашим.
Тропарь преподобному Иринарху Соловецкому
Бодростию ума жизнь твою управляя,/ прилежанием Бога взыскуя,/ отонудуже и стаду монахов предстатель показался еси,/ и, благодать прием целити души и телеса/ приходящим с верою к честному гробу твоему,/ Иринарше, отче наш,/ моли Христа Бога спастися душам нашим.
Кондак преподобному Иринарху Соловецкому
Чистотою душевною Божественныя благодати дары стяжав,/ блаженную жизнь совершил еси,/ и путь ко спасению всем указал еси,/ и богомудрый начальник монахов явился еси./ Темже имея дерзновение ко Святей Троице,/ поминай нас, чтущих память твою, да зовем ти:/ радуйся, преподобне Иринарше, монашествующих похвало.
Тропарь преподобного Германа Соловецкого
Желанием духовным от юности распаляемь, преподобне Германе,/ Христу тесным жития путем последовал еси/ и, в морский пустынный остров, аки в тихое пристанище, вселився,/ в нем многа лета постнически пожил еси,/ идеже блаженным отцем Зосиме и Савватию сожитель был еси,/ с ними же моли Христа Бога о нас,/ любовию чтущих святую память твою.
Ин тропарь, древний, преподобного Германа Соловецкого
Украсився, премудре, постническим житием,/ спостник был еси и сожитель в морстем отоце/ преподобным отцем Зосиме и Савватию,/ сподвизавел в молитвах, и трудех, и в пощениих,/ преподобне отче Германе,/ но, яко имея дерзновение к Богу,/ моли избавити нас от враг и спасти души наша.
Кондак преподобного Германа Соловецкого
Вышних желая,/ вся долу влекущая возненавидел еси/ и, отечество свое оставль,/ в поморие пустынное отшел еси,/ таже в морский остров удалився,/ в нем многа лета Господеви поработал еси./ Темже, память твою празднующе,/ любовию вопием ти:/ радуйся, Германе Богомудре, отче наш.
Собор славных и всехвальных 12-ти апостолов. Тропарь
Апостолов первопрестольницы/ и вселенныя учителие,/ Владыку всех молите/ мир вселенней даровати// и душам нашим велию милость.
Тропарь апостола Матфия
Апостоле святый Матфие,/ моли Милостиваго Бога,/ да прегрешений оставление// подаст душам нашим.
Кондак апостолам
Камень Христос каменя веры прославляет светло,/ учеников преизрядна,/ и с Павлом весь дванадесяточисленный собор днесь,/ ихже память совершающе верно,// сих Прославльшаго прославляем.
Ин кондак славных и всехвальных 12-ти апостолов
Петра, вернии, каменя веры, похвалим/ и Павла Богомудраго,/ созывают бо всех праздновати верою,/ соборне вкупе вся дванадесяте, яко проповедники вере,// просяща грехов оставления.
Кондак апостола Матфия
Светозарное, яко солнце,/ во весь мир изшедшее/ вещание твое/ просвещает языческую Церковь благодатию,// чудоносче Матфие апостоле.
