Акафисты - 31 августа 2025
Кондак 1
Избранный Богом и предивный житием, преподобне Иоанне, от юности Христа возлюбив, путем тесным к Нему шествовал еси; велиих же ради подвигов твоих и слез излияний дарованьми Духа Святаго обогатился еси. Темже яко велие ко Святей Троице дерзновение имуща ублажаем тя, просяще: от всяких нас бед свободи, зовущих: радуйся, преподобне Иоанне, Рыльский чудотворче, славо и радосте наша.
Икос 1
Ангел земный и человек небесный был еси, преподобне Иоанне. Како убо славу твою воспоем достойно, многими немощьми обдержимии? Но сам вложи песнь хвалебную во ycта нас, зовущих: Радуйся, от родителей благочестивых рожденный; радуйся, ими в страсе Божии добре воспитанный. Радуйся, из младенства от Церкве николиже отступивый; радуйся, тоя священными ученьми благодатный разум стяжавый. Радуйся, заповедей Господних блюстителю верный; радуйся, пощений и бдений непрестанных делателю усердный. Радуйся, по смерти родителей наследие свое убогим раздавый; радуйся, жития ради добраго гонение от человеков лукавых подъявый. Радуйся, клеветы неправедныя претерпевый; радуйся, досаждения с кротостию понесый. Радуйся, любовию Серафимскою вслед Христа последовавый; радуйся, ея ради путь узкий иночества избравый. Радуйся, преподобне Иоанне, Рыльский чудотворче, славо и радосте наша.
Кондак 2
Видя мира сего суету, преподобне Иоанне, невозвратно того отвратитися потщался еси; ничтоже бо тебе от Христа можаше разлучити: ни узы сродства, ни юность твоя, ниже слава мира сего и красота. Сия убо вся ни во чтоже вменив, якоже елень на источники водныя, к Богу востекл еси, вопия Ему: Аллилуиа.
Икос 2
Разуму божественному покорился еси, блаженне, егда Господа в видении соннем узрел еси, от земли твоея изыти повелевающа ти и место спасения твоего показующа, и вся, яже в мире презрев, во обитель Руенскую вселился еси, идеже образ иноческий восприял еси. Сего ради вопием ти таковая: Радуйся, житие иноческое возлюбивый; радуйся, противу греха воинствовати даже до смерти восхотевый. Радуйся, купно с власы своими мирская вожделения отложивый; радуйся, с ненасытною жаждею к подвигом иноческим себе устремивый. Радуйся, в предняя простираяся, задняя забвению предавый; радуйся, сладость жительства уединеннаго в себе обретый. Радуйся, любве ради божественныя житие пустынное возлюбивый; радуйся, вины ради сея место пострига своего оставивый. Радуйся, к горе, в видении тебе явленней, пришедый; радуйся, ничтоже имеяй, в колибе хврастней себе вселивый. Радуйся, дивный пустынножителю; радуйся, Иоанна Крестителя подражателю. Радуйся, преподобне Иоанне, Рыльский чудотворче, славо и радосте наша.
Кондак 3
Силою Духа Святаго осеняем в пустыни вселился еси, Иоанне, безмолвное житие провождати, с Богом невозбранно беседовати, Того ангельски непрестанно славословити, лучами света Божественнаго озарятися, за вся же люди и мир Спасителю Богу молитися, поя Ему присно: Аллилуиа.
Икос 3
Имея желание огнепальное боговидения Моисейскаго, преподобне, на гору возшел еси явления божественныя славы восприяти, ихже око не виде и ухо не слыша и яже на сердце человеку не взыдоша. И кто возможет изрещи вся подвиги твоя, в безмолвии сотворенныя? Но мы, дивящеся житию твоему, сице взываем ти: Радуйся, бремя подвиг велиих на рамена своя возложивый; радуйся, житием твоим Ангелов удививый. Радуйся, яко не хлебом, но былием травным себе питал еси; радуйся, и того бо зело мало по захождении солнца вкушал еси. Радуйся, жажду водою в меру утолявый; радуйся, купно с пророком “скотен бых у Тебе” Богу вопиявый. Радуйся, яко потоки слез от очей твоих источал еси; радуйся, молитвы бо твоя непрестанно Богу возсылал еси. Радуйся, подвиги сими от страстей себе очистивый; радуйся, бесов в зверине образе тебе устрашити тщащихся посрамивый. Радуйся, адаманте, козньми вражиими несокрушимый; радуйся, во всех искушениих и напастех всегда с Богом бывый. Радуйся, преподобне Иоанне, Рыльский чудотворче, славо и радосте наша.
Кондак 4
Бурю напастей демонских укротити восхотев, в пещеру некую зело мрачную вселился еси, преподобне Иоанне, порабощая тело твое и лишаяся света солнечнаго, яко да не лишишися Божественнаго Света в Царствии Господа твоего и да поеши Ему тамо со всеми святыми: Аллилуиа.
Икос 4
Слышав о тебе, преподобне, сын брата твоего, Лука отрок, и родителей утаився, к тебе в пустыню приде и тобою наставляем восприя подвиги твоя. Мы же силою благодати твоея ужасаеми, вопием ти сице: Радуйся, Светом Божественным южика своего озаривый; радуйся, дитя малое пустынна жителя соделавый. Радуйся, от злобы древния сего ради напасть новую приемый; радуйся, клевету в похищении отрока претерпевый. Радуйся, от брата своего поругания понесый; радуйся, детище от тебе отторженное благословением укрепивый. Радуйся, молитвою слезною диаволи посрамивый; радуйся, отрока от змия ужаленнаго смертию с Господем соединивый. Радуйся, цвете райский на камени гор Рыльских прозябый; радуйся, от Камене Божественнаго водою живою обильно напоенный. Радуйся, таинниче Божий, в пустыни не утайвыйся; радуйся светильниче Христов во мраце пещернем просветивыйся. Радуйся, преподобне Иоанне, Рыльский чудотворче, славо и радосте наша.
Кондак 5
Боготечней звезде подобни суть святии человецы: не точию бо сами ко Христу шествуют, но и прочиим людем спасения путь указуют. Сего ради вселукавый творит им напасти, якоже и тебе, Иоанне: нападе бо на тя во образе разбойник, иже избивше тя, отгнаша от пещеры первыя. Тогда ты в пустыню Рыльскую глубочае вшед, в дупло дуба великаго вселился еси, во еже большими труды Господа твоего прославляти и пети Ему: Аллилуиа.
Икос 5
Видя Господь толикое озлобление твое, преподобне, повеле земли да израстит слануток тебе в напитание; славна же тя яви пастырем, близ пустыни тоя обретшимся, да и мы купно с видевшими дивная дела твоя вопием тебе таковая: Радуйся, от демонов велия страдания приемый; радуйся, воине Христов непобедимый. Радуйся, не до конца от них озлобленный; радуйся, Христа покровом всемогущим покровенный. Радуйся, пред лицем пастырей от Господа прославленный; радуйся, обретшим тя житие твое неволею известивый. Радуйся, злаком чудесным тех напитавый; радуйся, отшедших их чудом дивным наставивый. Радуйся, прочиим людем от них проповеданный; радуйся, от приходивших к тебе дарований Божиих не скрывый. Радуйся, зело страждуща бесна молитвою слезною исцеливый; радуйся, к совершению чудесе сего всю надежду на Бога возложивый. Радуйся, преподобне Иоанне, Рыльский чудотворче, славо и радосте наша.
Кондак 6
Проповедницы должни есмы быти смирения твоего, преподобне Иоанне, явленнаго пред исцелением беснаго в молитве твоей сицевой: “Боже милосердный, несмь достоин именовати Твое имя моими нечистыми усты!” Сего ради тщимся убо и мы во смирении молитися Господеви и пети Ему: Аллилуиа.
Икос 6
Возсиявшу ти чудесы велиими, множайшую к тебе веру и любовь возимеша людие православнии. Но славе твоей по всей Болгарстей стране прошедшей, востав изшел еси от дуба, славы человеческия бегая. Темже смирения ради твоего ублажаем тя сице: Радуйся, смирение божественное возлюбивый; радуйся, славу человеческую возненавидевый. Радуйся, гласа Христова к смирению призывающа, послушавый; радуйся, словеса Писания еже не нам, но имени Божию славу даяти, присно соблюдавый. Радуйся, высокая достигнувый и ни киих дел благих в себе не видевый; радуйся, древу плодоносну, ветвьми низу клонящуся, подобен бывый. Радуйся, смирением Давиду, рекшему “аз есмь червь, а не человек”, поревновавый; радуйся, купно с пророком Исаиею “о, окаянный аз” вопиявый. Радуйся, со апостолом грешника себе перваго нарицавый; радуйся, во смирении своем Самому Господу подражавый. Радуйся, тщеславию доблественне противоставый; радуйся, сие яко прах земный ногами поправый. Радуйся, преподобне Иоанне, Рыльский чудотворче, славо и радосте наша.
Кондак 7
Хотящу ти страдания большая подъяти пламенныя ради ко Христу любве твоя, столпнику дивному Симеону уподобился еси, на камень возшед, преподобне Иоанне, во дни и нощи аки бесплотен молитву дея, слезами камень омакая и единому токмо Богу беседовати желая. Мы же на подвиг сей взирающе, прославляем всемогущаго Бога в тебе дивнаго и поем Ему: Аллилуиа.
Икос 7
Новаго подвига твоего, блаженне, не стерпев диавол, поемлет с собою легион бесов, иже с камене тя в пропасть глубокую свергоша. Но ты с трудом велиим востав, паки на камень возшел еси творити молитвы твоя и дивящихся воставляеши звати ти: Радуйся, ко Христу любовь велию стяжавый; радуйся, сего ради тяжце от полков демонских пострадавый. Радуйся, страдания сия ни во чтоже вменивый; радуйся, Христа паче жизни твоея возлюбивый. Радуйся, ни чим же от Христа разлученный; радуйся, Им сего ради возлюбленный. Радуйся, служения ангельскаго сподобивыйся; радуйся, от руки Ангела хлебом питавыйся. Радуйся, любовию ко Христу вся диавольская искушения победивый; радуйся, тою вся Христа заповеди соблюдый. Радуйся, любве ради сея токмо славы Божественныя искавый; радуйся, сего ради от Господа прославленный. Радуйся, преподобне Иоанне, Рыльский чудотворче, славо и радосте наша.
Кондак 8
Странный образ жития твоего, велие смирение и любовь твоя ко Христу приумножиша в тебе благодать, яже ти в крещении Христовых ради страстей и смерти крестныя даровася. Сего ради сотвори тя Господь солнце духовное Православныя Церкве, да просвещаются тобою чада ея ко спасению и да вопиют Богу: Аллилуиа.
Икос 8
Весь был еси сосуд избран Божия благодати, великий Иоанне, на тебе исполнися Крестителя слово, яко не в меру Бог дает Духа. Киими благодатными дарованьми не увенча тя Бог? Киими явленьми благодати не исполнено бысть твое житие? Темже на тя взирающе, приносим ти похвалы сия наша: Радуйся, дар смирения Христова стяжавый; радуйся, слез и умиления благодать снискавый. Радуйся, чистотою и целомудрием от Бога украшенный; радуйся, верою чудодейственною озаренный. Радуйся, не токмо Христу веровавый, но и страдания за Него понесый; радуйся, даром ревности по Бозе увенчанный. Радуйся, любве к ближним исполненный; радуйся, даром Божественнаго ведения сподобленный. Радуйся, даром прозорливства просиявый; радуйся, дарование молитвы непрестающия имый. Радуйся, до конца надежду будущаго блаженства сохранивый; радуйся, блаженство сие еще в жизни сей предвкусивый. Радуйся, преподобне Иоанне, Рыльский чудотворче, славо и радосте наша.
Кондак 9
Всякое дарование Духа Святаго восприимшу ти, преподобне Иоанне, достиже вещание твое благочестиваго царя Петра, иже видети тя вожделев посла к тебе девять мужей. Ты же алчных их быти духом разумев, малым хлебом напитал еси, иже преславное чудо сие видевше, вопияху Богу: Аллилуиа.
Икос 9
Ветии мира сего не разумеют, како царь Петр, сый во славе своей, к тебе с дары устремися, блаженне, и зело опечалися, не возмогий стремнин ради горных ко святыни твоей приблизитися: но мы, словеса Господа поминающе, ко всем людем реченная, “ищите прежде царствия Божия и правды Его”, вопием ти: Радуйся, яко Царство Небесное на земли достигл еси; радуйся, Царство бо сие, пришедшее в силе, яви ти Господь. Радуйся, яко Царство Божие в стяжании благодати людем явил еси; радуйся, во плоти бо сый блаженство райское в себе таил еси. Радуйся, яко бисер многоценный стяжав, суету благ временных показал еси; радуйся, яко правду и мир и радость о Дусе Святе имел еси. Радуйся, сиянием бо благодати славу царскую затмил еси; радуйся, яко сокровище небесное имый, даров царских не приял еси. Радуйся, яко зрети друг друга в небесном царствии царю Петру обещал еси; радуйся, яко царя в Писании твоем милосерда и Церкви послушна быти увещал еси. Радуйся, яко покаянию царя научил еси; радуйся, яко покаяния ради царство вечное ему предрекл еси. Радуйся, преподобне Иоанне, Рыльский чудотворче, славо и радосте наша.
Кондак 10
Спасти хотя себе до конца от козней вражиих, преподобне Иоанне, пребыл еси в подвизе стояния на камени седмь лет и четыре месяцы. Мнози же поревновавше тебе, близ камене твоего церковь создаша и обитель составиша, начальника тя перваго и пастыря имуще, да возсылается оттуду присно хвалебная Богу песнь: Аллилуиа.
Икос 10
Стена непреоборима бысть ти смирение твое даже до смерти, блаженне Иоанне; разумев бо время отшествия твоего, моление слезное Богу вознесл еси, глаголя: “Отче Вседержителю, ничтоже на земли благо сотворих! Сего ради молю Тя повелети Ангелу благу прийти, да не возбранен ми будет восход от духов лукавствия! Господи, в руце Твои предаю дух мой!” И сия рек, абие дух испустил еси. Мы же, сицевому праведному преставлению дивящеся, тако тя ублажаем: Радуйся, житием и исходом твоим нас поучаяй; радуйся, горняя мудрствовати, а не земная нас призываяй. Радуйся, никиимже сластем мирским себе приобщивый; радуйся, блаженную кончину от Бога приемый. Радуйся, о смерти присно в животе своем помышлявый; радуйся, словеса апостола “по вся дни умираю” исполнивый. Радуйся, со апостолом Павлом смерти вожделевый; радуйся, разрешитися и со Христом быти присно желание имевый. Радуйся, слезами и молитвами себе к смерти уготовавый; радуйся, сего ради от смерти не на суд, но в живот пришедый. Радуйся, вечней радости со Христом по смерти приобщивыйся; радуйся, дерзновение велие пред Богом стяжавый. Радуйся, преподобне Иоанне, Рыльский чудотворче, славо и радосте наша.
Кондак 11
Пением молебным ублажати тя наставшу времени, благовоние нача от гроба твоего источатися, преподобне Иоанне. Сего ради гроб твой отверзоша и тело твое обретоша нетленно и благоухания исполнено. Оттоле многая чудеса совершахуся от мощей твоих во исцеление к тебе прибегающих и Богу вопиющих: Аллилуиа.
Икос 11
Светоприемную свещу яви тя Господь, преподобне, и храм Духа Святаго, тело же твое тлению непричастно соблюде. Взирающи убо на благодать сию, прославляем тя сице: Радуйся, нетлением твоим всемогущество Божие благовествуяй; радуйся, безсмертие телес последи общаго воскресения предобразуяй. Радуйся, нетлением твоим славу Божию в Церкви явивый; радуйся, истину воскресения мертвых утвердивый. Радуйся, по смерти игумену обители Рыльския во сне явивыйся; радуйся, твоя мощи в Средец град пренести повелевый. Радуйся, дивная чудеса и зде сотворивый; радуйся, в град Тернов пренесен велия знамения соделавый. Радуйся, от мощей твоих во градех стольных благодать пролиявый; радуйся, и в пленении быв силами всех ужасивый. Радуйся, Мануилу царю греческому исцеление даровавый; радуйся, епископу Остригомскому язык связавый и разверзавый. Радуйся, преподобне Иоанне, Рыльский чудотворче, славо и радосте наша.
Кондак 12
Благодать велию дарова ти Господь за многую любовь, предивный угодниче Божий, преподобне отче наш Иоанне, недуги исцеляти, заблуждшия просвещати и всем просящим быти во спасение. Темже благодаряще Господа, нам тебе даровавшаго, присно зовем ему: Аллилуиа.
Икос 12
Поюще тебе песнь недоумеем, како вся дивная деяния твоя словесы немощными изобразити, преподобне! Зряще же тя велика в угодницех Божиих, дерзаем сице восхвалити тя, зовуще: Радуйся, в подвизех и трудех предивный; радуйся, прославленным тобою Богом прославленный. Радуйся, далече вне Церкве Болгарския просиявый; радуйся, и иными Православными Церквами чтимый. Радуйся, нетленною десницею в Церкви Российстей обитаяй; радуйся, благодатию великих отцев Церкве блистаяй. Радуйся, подвиги преподобных Антония и Макария явивый; радуйся, деяния светил российских Сергия и Серафима предизобразивый. Радуйся, от краля унгарскаго прославленный; радуйся, и от турских султанов почтенный. Радуйся, во обители Рыльстей верными и неверными доселе почитаемый; радуйся, велиих ради чудес твоих от всех прославляемый. Радуйся, преподобне Иоанне, Рыльский чудотворче, славо и радосте наша.
Кондак 13
О, великий Иоанне, Рыльский чудотворче! Приими сию малую похвалу нашу и молися за ны ко Господу, да ниспослет нам милость Свою и покаянию истинному научит нас, избавит же нас от власти миродержителей тьмы века сего и сохранит в православней вере же и благодатном жительстве под дивным покровом Божия Матере, да спасеннии твоим ходатайством вопием Богу: Аллилуиа.
(Этот кондак читается трижды, затем икос 1 и кондак 1)
Молитва к преподобному Иоанну, Рыльскому чудотворцу и пустынножителю
О, великий и предивный чудотворче, преподобне Иоанне, приими моление наше и не отвратися от нас, к твоему заступлению прибегающих: никогдаже бо отвращался еси от приходивших к тебе с печальми своими во дни земнаго твоего жития; вемы же, коликая знамения милосердия являл еси и по преставлении твоем людем православным! Услыши и нас ныне, велиими скорбьми обдержимых, нашедшими на ны в лукавыя дни сия, егда диавол чрез пагубныя козни своя тщится попрати Церковь Святую, лишити же нас спасения вечнаго и благ временныя жизни! Испроси нам у Господа Иисуса Христа прощения грехов, а наипаче греха непослушания Матери нашей Церкви! Даруй нам сокрушение сердца, во еже со умилением неуклонно приступати ко святому Таинству Покаяния, яко да не во осуждение и погибель будет нам причащение Тела и Крове Христовых, но во здравие и спасение. Отжени от нас дух братоненавидения, даруй нам дух любве и мира к братскому единению всех людей твоих! Соеди всех нас любовию ко Христу и Его Церкве Православней, яко да соблюдающе спасительную волю Его, истинная чада Божия будем! Буди нам путевождь во вся дни наша, яко да присно в благодати Духа Святаго суще в чистоте веру содержим и волю Господню до самыя смерти сотворим! В час же кончины нашея явися нам представити души наша к престолу Божественнаго Судии и рещи Ему: “Се аз и дети моя”, яко да твоим заступлением вечных мук избавльшеся, неизреченное блаженство Небеснаго Царствия Христова наследим купно с тобою и всеми святыми во веки веков. Аминь.
Кондак 1
Избранную двоицу пресветлую, Христу спострадавшую даже до крове, Флора преблаженнаго и Лавра всечестнаго, в песнех, вернии, почтим духовных и, яко молитвами сих от бед избавляеми, благодарственно вопием, зовуще: Радуйтеся, Флоре и Лавре, рая Христова цвети прекраснии.
Икос 1
Ангельстии чини яко сликовники прияша вы, блаженнии мученицы, егда по страдании своем Престолу Господню предстасте, во еже со всеми, кровию Агнца Божия запечатленными, взывати “Осанна!” Седящему на Престоле. Мы же, бреннии, на земли, о таковой славе вашей дивящеся, восхваляем вы сице: Радуйтеся, Христу последовавшии верою; радуйтеся, крест Его, яко ярем, вземшии. Радуйтеся, кровию Агнца Божия искупленнии; радуйтеся, и своея крове Христа ради не пощадевшии. Радуйтеся, смертию красною Христови спогребшиися; радуйтеся, жизни источник обретшии. Радуйтеся, путь узкий, прискорбный прошедшии; радуйтеся, яко отверзошася вам райския двери. Радуйтеся, Флоре и Лавре, рая Христова цвети прекраснии.
Кондак 2
Видяще, яко многа мзда на небесех дана святым страстотерпцем, потщимся, вернии, тех житие земное прилежно разсмотревше, от сего научитися, колико может вера, деяньми споспешествуема, како воздвизает от земных к небесным и како научает взывати Богу: Аллилуиа.
Икос 2
Разум Божественный озари вы, Флоре и Лавре, егда благочестия хранители Прокл и Максим не токмо каменосечней хитрости вы научиша, но и на камени веры Христовой добре утвердиша, на немже несокрушими даже до конца пребысте, трудолюбно Господеви работающе, сего ради ублажаем вы, зовуще: Радуйтеся, в трудех от юности воспитаннии; радуйтеся, Христу себе поработившии. Радуйтеся, леность далече отгнавшии; радуйтеся, данный вам талант много усугубившии. Радуйтеся, рабства плоти избегшии; радуйтеся, духом Господеви работавшии. Радуйтеся, трудолюбцев удобрение; радуйтеся, ленивых укорение. Радуйтеся, Флоре и Лавре, рая Христова цвети прекраснии.
Кондак 3
Сила Вышняго подвиже правителя страны некия призвати делателей святых ко устроению храма идольскаго, капищу бо сему сооружаему бывшу, иный храм нерукотворенный созидашеся; людие страны тоя, Флора и Лавра проповедию наученнии, Истиннаго Бога познаша и Тому Единому пети навыкоша: Аллилуиа.
Икос 3
Имуще твердую веру в сердцах своих, небоязненно отыдоша богоноснии братия во ину страну на делание чуждое, и, по мале времени, в труд апостолов обратися делание их; людие, во тме и сени смертней седящии, светом Евангелия озаришася, еже каменосечцы богомудрии с собою принесоша, сего ради воспоем сих, зовуще: Радуйтеся, языков просветители; радуйтеся, апостолов подражатели. Радуйтеся, Евангелия Христова провозвестницы; радуйтеся, на ниве неоранней Господни работницы. Радуйтеся, в людех тяжцех Господа восхвалившии; радуйтеся, во языцех славу Его возвестившии. Радуйтеся, Церкве прекрасное прозябение; радуйтеся, небесных садов леторасленное украшение. Радуйтеся, Флоре и Лавре, рая Христова цвети прекраснии.
Кондак 4
Бурю злобы неистовыя воздвиже на вы Мемертин, идольский жрец, егда сыну его, на делание ваше неопасно взиравшу, око каменцем, внезапу отторгшимся, избодеся, и хулы многи отрыгаху на вы, делателие незлобивии, уста еще не ведевшаго пети: Аллилуиа.
Икос 4
Слышавше хуления многа и пристрашия свирепа Мемертина озлобленнаго, без страха прияша сия кротце Флор же и Лавр и, сострадания исполнени бывше, велие дерзновение веры проявиша, егда отрока уранена цела и здрава отцу предпоставити обещаша; мы же, таковей вере, кротости и упованию святых дивящеся, воспоем им тако: Радуйтеся, равноангельныя кротости воплощение; радуйтеся, велия веры исправление. Радуйтеся, злословящаго вы благословившии; радуйтеся, кленящему вас благотворившии. Радуйтеся, на Бога, Помощника и Защитника, уповавшии; радуйтеся, прибежище и утверждение в Бозе полагавшии. Радуйтеся, в незлобии пред Господем ходившии; радуйтеся, во уповании на Него николиже изнемогшии. Радуйтеся, Флоре и Лавре, рая Христова цвети прекраснии.
Кондак 5
Боготечныя звезды явистеся, святии, юноше тому, емуже уломком камене око плотское избодено бысть; вас бо держайся, не токмо от раны исцеле, но и очесы духовными прозре, проповеданием вашим научен, Истиннаго Бога позна и Тому в радости возопи: Аллилуиа.
Икос 5
Видя чудо велие, в сыне явленное, и отец его Мемертин ему споследова, идольскую прелесть отверг, Бога Истинна, яко же и сын, позна и по исповедании добрем двоице преславных мученик спострада, юже и мы ныне воспеваем, зовуще: Радуйтеся, чудотворцы предивнии; радуйтеся, врачеве духовнии. Радуйтеся, идольскую прелесть чудесы ниспровергшии; радуйтеся, неразумных души светом веры озарившии. Радуйтеся, идольскаго жреца от идолобесия отвратившии и Христу сочетавшии; радуйтеся, и сына его из вражеских сетей извлекшии. Радуйтеся, демонов огорчение; радуйтеся, Ангелов радование. Радуйтеся, Флоре и Лавре, рая Христова цвети прекраснии.
Кондак 6
Проповедницы любве истинныя явишася святии мученицы, егда при делании своем цену, за труд вземлемую, нищим раздаваху и, алчущих довольно питающе, сами в посте и лишении не сетующе пребываху, бодрственне воспевающе Богу: Аллилуиа.
Икос 6
Возсия свет неизреченныя славы небесныя и озари храм, руками Флора и Лавра созданный, и не яко идолов вместилище, но во славу Имени Иисуса Христа освященный, людие же, свет той видевше, вся кумиры идольския, для храма того уготованныя, сокрушше, храмоздателем взываху сице: Радуйтеся, светом богоразумия нас озарившии; радуйтеся, мрак идолослужения разсеявшии. Радуйтеся, от обдержащия прелести ны свободившии; радуйтеся, путь жизни истинныя нам показавшии. Радуйтеся, яко благоухания честнаго Церковь исполнисте; радуйтеся, яко злосмрадие вражие далече отгнасте. Радуйтеся, бесов дерзновенное поражение; радуйтеся, Богу красное присвоение. Радуйтеся, Флоре и Лавре, рая Христова цвети прекраснии.
Кондак 7
Хотящим братиям святым по скончании делания, на неже звани быша, мирно во своя отыти, возбрани им работодавец жестокий; связав бо их и бив, яко злодеи к правителю Ликиону отведе, зане Христа яко Бога исповедаху и люди научиша взывати Ему: Аллилуиа.
Икос 7
Новая и лютая мучения уготова вам, страстотерпцы святии, правитель, егда возвратистеся связаннии и раны за Христа приимшии во страну свою, твердости же веры вашея отнюд не поколеба, мы же, терпение ваше ублажающе, взываем к вам сице: Радуйтеся, Христови спотерпевшии; радуйтеся, с Ним и воцарившиися. Радуйтеся, в терпении души ваша стяжавшии; радуйтеся, обетование, еже на небесех, приимшии. Радуйтеся, на Начальника веры и Совершителя, Господа Иисуса взиравшии; радуйтеся, на предлежавший вам подвиг добре востекшии. Радуйтеся, малодушных ободрение; радуйтеся, страждущих утешение. Радуйтеся, Флоре и Лавре, рая Христова цвети прекраснии.
Кондак 8
Странную и ужасную смерть изобрете людское жестокосердие кротчайшим братиям Флору и Лавру: в кладенец бо безводный ввержени и землею в нем посыпани быша; тако мняху нечестивии заглушити святых глас, к Богу вопиющих: Аллилуиа.
Икос 8
Весь мир не бе достоин вас, мученицы святии: вы бо, на земли себе места не обретше, в небесная преселившеся и яко истиннии граждане тамо отечествие снискавше, непрестанными благохвалениями Царю своему и Господу служите, восхвалим убо и мы сих богохвалящих похвалении сицевыми: Радуйтеся, о земных небрегшии; радуйтеся, на небесная ум свой вперившии. Радуйтеся, нощь жития земнаго добре прешедшии; радуйтеся, дне невечерняго — Царства Христова достигшии. Радуйтеся, яко злато, в горниле мучений искушеннии; радуйтеся, яко всеплодие жертвенное Богом приятии. Радуйтеся, пред лицем человеческим муки приявшии; радуйтеся, яко упование ваше безсмертия исполнено. Радуйтеся, Флоре и Лавре, рая Христова цвети прекраснии.
Кондак 9
“Всяк, иже исповесть Мя пред человеки, исповем его и Аз пред Отцем Моим”, — рече Господь; по Господню сему словеси и вы, страстотерпцы Флоре и Лавре, яко доблии Христови исповедницы, пред Отцем Небесным прославлени есте и со всеми святыми выну зовете Святей Троице: Аллилуиа.
Икос 9
Витийство мира сего не может изрещи величие подвига страстотерпцев святых, яко же и премудрость века сего слова крестнаго вместити никакоже может; мы же, смиреннии, буйством проповеди о Распятом спасаеми, Флора и Лавра, яко себе самех отвергшихся и души своя Христа ради отщетивших, несумненно прославляем, зовуще к ним тако: Радуйтеся, Христа пред человеки исповедавшии; радуйтеся, яко и Сам Господь исповесть вы пред Ангелы Божии. Радуйтеся, страсти Господа Иисуса Христа не устыдевшиися; радуйтеся, ради благовестия Христова пострадавшии. Радуйтеся, яко подвиг крепок подаде вам Господь; радуйтеся, яко и разум свят дадеся вам от Вышняго. Радуйтеся, яко искры по стеблию на небо востекшии; радуйтеся, во время посещения вашего добре возсиявшии. Радуйтеся, Флоре и Лавре, рая Христова цвети прекраснии.
Кондак 10
Спасению нашему ходатаи молим вас быти, святии мученицы, добре страдавшии и венчавшиеся, и того ради благодать приимшии; о нас молитеся, да, избавльшеся от суетныя работы вражия, благодарственно вопием Богу: Аллилуиа.
Икос 10
Стен каменных здатели иногда бывше, веры же твердостию, многоразличных мук и лютыя смерти за Христа претерпением велие дерзновение у Него снискавше, молятся ныне о чтущих память их верно, и в бедах многоразличных и напастех осеняют надежно поющих им сице: Радуйтеся, Церкве Христовы столпи непоколебимии; радуйтеся, веры христианския ограждение твердое. Радуйтеся, в вере колеблемым утверждение крепкое; радуйтеся, в мори напастей гибнущим пристанище надежное. Радуйтеся, фиали златии, фимиама молитв исполненнии; радуйтеся, смрадные страсти далече от нас прогоняющии. Радуйтеся, теплии к Богу молитвенницы; радуйтеся, преистиннии ходатаи. Радуйтеся, Флоре и Лавре, рая Христова цвети прекраснии.
Кондак 11
Пение неумолчно и лики светлы исполниша Царский град, егда по обретении принесени и честно положени в нем быша многоцелебнии мощи ваша, святии мученицы Флоре и Лавре, от них же мнози цельбу чудну приимше, благодарно пояху Богу: Аллилуиа.
Икос 11
Светом невещественным облистаеми, в селениях святых водворяеми и радости неизреченныя исполняеми, ликуете ныне со Ангелы светло, мученицы Господни, осветите и нас, мраком суетствий покрываемых, злобою мира сего озлобляемых и едину токмо отраду имущих, еже к вам прибегати и сице вы воспевати: Радуйтеся, мглу прелести разгнавшии; радуйтеся, безбожия нощь осветившии. Радуйтеся, ненавидением неправедным возненавиденнии на земли; радуйтеся, в радость Господа вшедшии на небеси. Радуйтеся, скорбьми многими живот вечный наследствовавшии; радуйтеся, в скорбех и теснотах сущим утешение от Духа Свята просящии. Радуйтеся, звезды, блистания терпения испущающия; радуйтеся, светила, верных души просвещающия. Радуйтеся, Флоре и Лавре, рая Христова цвети прекраснии.
Кондак 12
Благодать велика дана есть от Вышняго вам, доблии страдальцы, яко пришедшим от скорби великия и окропившим в крови Агнчей ризы своя; сего ради со всеми святыми Престолу Божию предстоите, выну зовуще: Аллилуиа.
Икос 12
Поюще вы во храме вашем, хвалим вас, Флоре и Лавре, яко благочестия мученики, в трудех от юности пребывшия, веру в Троицу Нераздельную соблюдшия и ко Христу победно отшедшия, Ему же ныне предстояще, не забудите зовущих к вам сице: Радуйтеся, Царя Небеснаго воини изряднии; радуйтеся, венцы победными добре венчаннии. Радуйтеся, камение многоценное в сокровищах Владыки Небеснаго; радуйтеся, богатство неиждиваемое Церкве, на земли воинствующия. Радуйтеся, зодчии, храм Духа Божественнаго в себе самех явившии; радуйтеся, здатели, на недвижимем камени веры души многих утвердившии. Радуйтеся, блистанием небесным ныне осияваемии; радуйтеся, сумрак мыслей тяжких от нас прогоняющии. Радуйтеся, Флоре и Лавре, рая Христова цвети прекраснии.
Кондак 13
О преславная мученик двоице Флоре и Лавре, самобратное единение, Троице Святей честное похваление! Нынешнее приимши наше пение, молите Господа за ны, да избавит нас от всяких бед и скорбей, даровав же нам до конца пребывание во Святей Церкви Своей, да сподобит по кончине и последнем Суде с вами и со всеми святыми воспевати Богу: Аллилуиа, Аллилуиа, Аллилуиа.
(Этот кондак читается трижды, затем икос 1 и кондак 1)
Молитва святым мученикам Флору и Лавру
Прехвальнии мученицы Флоре и Лавре, вас не земля потаила есть, но небо прият вы, во еже быти вам молитвенники и предстатели о чтущих с любовию честную память вашу. Молитеся же за ны, трудолюбцы незлобивии, да подвигнет Господь и нас, в трудех и утеснении сущих, к деланию заповедей Его, да не токмо о пищи и питии, но и о еже како угодити Господеви попечемся; споболите печалем и воздыханием нашим, и да не озлобятся до конца души наша, но да возгорятся любовию друг ко другу, да пребудем в мире и единомыслии, якоже и вы, самобратнии блаженнии. Наипаче же утвердите ны в вере святей и правей, юже имуще в сердцам наших, не устрашимся в поношении и унижении и всяких обстояниих, имиже одержими есмы, но, яко испытание силы веры нашея с благодарением сие приимше, доброе исповедание соблюдем, в немже и прейдем от юдоли сей в вечное Царствие Господа нашего, Емуже слава и держава во веки веков. Аминь.