Каноны - 07 сентября 2025
Песнь 1
Ирмос: Моря чермную пучину невлажными стопами древний пешешествовав, Израиль крестообразныма Моисеовыма рукама Амаликову силу в пустыни победил есть.
Припев: Святии великомученицы Михаиле и Феодоре, молите Бога о нас.
Твоими молитвами страстотерпче Михаиле, благодать мне и просвещение с небесе даруй, яко да возмогу похвалити доблести и страдания твоя.
Святии великомученицы Михаиле и Феодоре, молите Бога о нас.
Божественным желанием разжигаемь, Михаиле святе, с Феодором болярином, паки к вашему отечеству возвращаетеся, идеже мучения венцы от десницы Вышняго приясте, изрядно поминайте вас почитающих.
Слава: Царствия вечнующаго, и никакоже мимотекущаго воспоминая наслаждение, святе, царство земное преобидев, и вместо скиптра крест взял еси, и самозван к подвигом устремился еси, купно со страдавшим с тобою Феодором болярином.
И ныне: Святых Святейшая была еси, Дево Чистая, святых Святаго на руку Христа носивши, Божественною силою тварь содержащаго.
Песнь 3
Ирмос: Веселится о Тебе Церковь Твоя, Христе, зовущи: Ты моя крепость, Господи, и прибежище, и утверждение.
Святии великомученицы Михаиле и Феодоре, молите Бога о нас.
Яряся зверь нечестивый, убити вас повелевает, сего скверным повелением повинутися не хотящих, и твари паче Творца не послужисте, но Христу вопиясте: Свят еси, Господи.
Святии великомученицы Михаиле и Феодоре, молите Бога о нас.
Любовию твоего Владыки снедаемь быв Михаиле, купно с Феодором болярином, ничтоже земнаго вменисте, и Того желанием мучения чашу исписте усердно, Христу вопиюще: Свят еси, Господи.
Слава: Самозван от дальных стран отечество твое пришед посетити, и злоименитаго царя богоборную прелесть обличити, от негоже пострадав, жертва Богу принеслся еси.
И ныне: Возставила еси, Чистая, паки падший мой образ, рождшая Виновнаго паче естественнаго воскресения.
Господи, помилуй (трижды).
Седален, глас 1-й
Камение твердо явистеся, и непреборими бысте мучителей прещением, Михаиле славне и Феодоре премудре. Сего ради Российстии собори вопиют радостно: слава Укрепльшему вы, слава Венчавшему вы, слава Просвещшему вами весь мир.
Слава, и ныне: Проображаше таинственно древле Иисус Навин Креста образ, егда руце простре крестовидно, Спасе мой, и ста солнце, дондеже враги низложи противостоящия Тебе Богу; ныне бо зайде на Кресте Тя зря, и державу смертную разрушив, весь мир совоздвигл еси.
Песнь 4
Ирмос: Вознесена Тя видевши Церковь на Кресте, Солнце Праведное, ста в чине своем, достойно взывающи: слава силе Твоей, Господи.
Святии великомученицы Михаиле и Феодоре, молите Бога о нас.
Богомерзскаго и злочестиваго царя неправедна и лукавнейша паче всея земли, безбожную веру укористе, и лютаго беса обличивше прелесть, яко агнцы за Христа заклани бысте, и яко солнце по кончине просияли есте.
Святии великомученицы Михаиле и Феодоре, молите Бога о нас.
Усты светлыми витийствуя, исповедал еси благочестно Единаго Бога, Михаиле, с пострадавшим с тобою Феодором: и сего ради злочестивый царь не терпя, повелевает убити вас на самей кончине Христа исповедающия.
Слава: О ярости царя злочестиваго и неправеднаго убиения! О терпения непобедимых страдалец! Иже по вере добре подвигшеся, Христу вопияху: слава силе Твоей, Господи.
И ныне: Неискусобрачно родила еси, о Дево! и по Рождестве явилася еси девствующи паки. Тем немолчными гласы, радуйся, Тебе, Владычице, верою несомненною вопием.
Песнь 5
Ирмос: Ты, Господи, мой Свет, в мир пришел еси, Свет Святый, обращаяй из мрачна неведения верою воспевающия Тя.
Святии великомученицы Михаиле и Феодоре, молите Бога о нас.
Дивлюся, о царю! твоему безумию, и суетному глаголу, исповедниче Михаиле рекл еси, и с благородным Феодором: твари паче Творца никакоже да будет нам покланятися, она бо человека ради сотворена есть.
Святии великомученицы Михаиле и Феодоре, молите Бога о нас.
Злочестивый он законопреступный Доман, иже первее веры христианския отвергся, не терпя твоего исповедания, зле огорчися, ножем отрезует главу твою честную, исповедниче Христов Михаиле.
Слава: Аще честная святая телеса ваша и небрегома пребыша от кровоядец онех, повержена псом на снедение, но Бог соблюдаше оная, и столпом огненным осияваше, пресветлыми зарями.
И ныне: Бог в Тя, Богомати, вселися, человека назидая во тлю падшаго прелестию змия.
Песнь 6
Ирмос: Пожру Ти со гласом хваления, Господи, Церковь вопиет Ти, от бесовския крове очищшися ради милости от ребр Твоих истекшею Кровию.
Святии великомученицы Михаиле и Феодоре, молите Бога о нас.
Недоволен злочестивый быв мучитель, о убиении благочестиваго Михаила, покушашеся и страдальца Феодора лестию увещати: аще бо, рече, богом моим поклонишися, со мною во славе будеши, и имению господина твоего наследник будеши.
Святии великомученицы Михаиле и Феодоре, молите Бога о нас.
Мне да не будет, о царю пребеззаконне! Христе отврещися, и ложным твоим богом поклонитися. Мне бо еже жити Христос, и еже умрети за Него, приобретение.
Слава: От юности житие твое чисто явися, Пресвятаго Духа дарованием Феодоре, посреде бо злочестивых мучителей, твоему господину поборник был еси, и с ним на небесех присно веселишися.
И ныне: Излияв первее яд во уши Евины змий вселукавый, ты же сего Едина оттрясла еси, Богомати, Истребителя сему рождши.
Господи, помилуй (трижды). Слава, и ныне:
Кондак, глас 8-й
Царство земное в ничтоже вменив, славу яко преходящую оставил еси, самозван пришед к подвигом, Троицу проповедал еси пред нечестивым мучителем, страстотерпче Михаиле, с доблим Феодором, Царю Сил предстояще, молите без вреда сохранити отечество ваше, град же и люди, да вас непрестанно почитаем.
Икос
Кто подвиги ваша и болезни возможет извещати, страстотерпцы, яже мужески претерпесте за веру Господню? и дарований, ихже сподобистеся, не довлеют уста человеческая исповедати. Премудростию бо украшени и мужеством, богатство и славу привременную возненавидесте, Михаиле славный, и с пострадавшим с тобою дивным Феодором, с ним не разлучастеся на земли и на небеси. Тем молите без вреда сохранити отечество ваше, град же и люди, да вас непрестанно почитаем.
Песнь 7
Ирмос: В пещи авраамстии отроцы персидстей, любовию благочестия паче, нежели пламенем, опаляеми, взываху: благословен еси в храме славы Твоея, Господи.
Святии великомученицы Михаиле и Феодоре, молите Бога о нас.
Ни любви сопружницы, ни чад разлучению внимал еси, но сия вся в руки предав Божия, яко Творца и Промысленника всех, вопиял еси: благословен Бог отцев наших (дважды).
Слава: Поревновав мужеству прежде бывших мучеников, тех блаженство и славу получил еси, достохвальне Михаиле, купно с Феодором, вопиюще: благословен Бог отцев наших.
И ныне: Вышняго Освященное Божественное Селение, радуйся, Тобою бо дадеся радость, Богородице, зовущим: благословена Ты в женах еси, Всенепорочная Владычице.
Песнь 8
Ирмос: Руце распростер, Даниил львов зияния в рове затче; огненную же силу угасиша, добродетелию препоясавшеся, благочестия рачители, отроцы, взывающе: благословите, вся дела Господня, Господа.
Святии великомученицы Михаиле и Феодоре, молите Бога о нас.
Взирая на воздаяния, сущая на небесех всечестне, яже любящим Христос предуготова, и вопиющим Ему от души: благословите, вся дела Господня, Господа.
Святии великомученицы Михаиле и Феодоре, молите Бога о нас.
Божественная мученик страдания воистинну превзыдоша похваления, паче слова и помышления, яко тленным телом безплотныя враги победиша, вопиюще: благословите, вся дела Господня, Господа.
Слава: Непоколебимь в подвизех пребыл еси, паче же нечестивых сердца поколебал еси, видевших тя непреклонна, святе Михаиле, купно с Феодором вопиюща: благословите, вся дела Господня, Господа.
И ныне: Таинство странно, истинно, под солнцем Едина показала еси, Бога бо родила еси, Чистая, Невидимаго и Безначальнаго, Невместимаго, всем Непостижимаго, Емуже вопием: благословите, вся дела Господня, Господа.
Песнь 9
Ирмос: Камень нерукосечный от несекомыя горы, Тебе, Дево, краеугольный отсечеся, Христос, совокупивый разстоящаяся естества. Тем, веселящеся, Тя, Богородице, величаем.
Святии великомученицы Михаиле и Феодоре, молите Бога о нас.
Приидите чистым сердцем и трезвою совестию, великомученика Михаила, с советником крепким Феодором, паче злата светящася зряще величаем.
Святии великомученицы Михаиле и Феодоре, молите Бога о нас.
Светлая ваша, пребогатии, победная храборствия на врага, видев Всевидящее Око подвиги ваша, венцы одоления венчает Спас душ наших.
Святии великомученицы Михаиле и Феодоре, молите Бога о нас.
Воинства Ангелов удивишася, мучеников же лики и праведных собори согласно похвалиша Христа, таковое терпение вам даровавшаго.
Слава: Непобедимая честная мученик двоица, на небесех живущи, певцы своя поминай, совершающих во хвалении священная ваша страдания, вас непрестанно величающих.
И ныне: Земля избавися от клятвы древния Рождеством Твоим. Темже Тя, Богородительнице, величаем.
Песнь 1
Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.
Священнаго ты Писания от младенства научився, Богоносе Стефане, в дальняя места пришел еси, и неведущим Бог тобою познася.
Идеже прелесть почитаема бяше, тамо же ныне тобою Бог неведущим, святителю Стефане, познася. Темже священную Твою память достодолжно ублажаем.
Богодохновенным твоим учением научил еси люди веровати во Христа и от идольския прелести уклонятися. Сего ради тя вси, яко единоревнителя апостолом, песньми почитаем.
Богородичен: Ты Единаго, Богоневесто, в Вышних седящаго, на руку носила еси, плоть бывша: Ты бо была еси избранна от всех век, приятелище достойно Вседержителя.
Песнь 3
Ирмос: Твоя песнословцы, Богородице, живый и независтный источниче, лик себе совокупльшия, духовно утверди, в Божественней Твоей славе венцев славы сподоби.
Не убоялся еси, святителю, людей тогда нечествующих, но тех дерзновенно кумирницу со идолы огню предал еси и всех научил еси вопити: несть свят, паче Тебе, Господи.
Тезоименитым мужеством и смирения нравом на овчу кротость убийц преложил еси, сего ради и венцы венчался еси, святителю Стефане.
Богородичен: Тя, заступление неблазненно, Богомати, стяжавше и упование на Тя возлагающе, спасаемся и, к Тебе прибегающе, сохраняемся вси.
Седален, глас 4
Ума пречуднаго и бодреннаго учителя, священнодействы Церковь украсивша, и мутным учением волхва, яко возбесневша волка, от Христовых овец словесы своими отгнавша, и невредно духовная своя чада сохранша, восхвалим, вернии, Стефана прехвальнаго, глаголюще: моли Христа Бога спастися душам нашим.
Песнь 4
Ирмос: Седяй в славе на престоле Божества во облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей.
Яко солнце, чистое житие твое возсия, святителю, тьму идолобесия от людей твоих отгнав, всех научил еси взывати: слава силе Твоей, Господи.
Волшебная буесловия, яко премудр, посрамил еси, и сих от Христова стада словесы твоими, яко пращею, отгнал еси, и звати всех научил еси: слава силе Твоей, Господи.
Яко истинный святитель тих и кроток, отче, был еси и столп благочестия Церкве явился еси, люди твоя благочестию научив вопити Христу: слава силе Твоей, Господи.
Богородичен: Тя оружие на враги предлагаем, скорби всякия лютых обстояний отреваем, и возмущения еретическаго, Мати Божия, избегаем.
Песнь 5
Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.
Воздвигл еси учением твоим древле во тьме неведения люди лежащия, чада Божия и света показал еси наследники, отонудуже тя, святителю, вси любомудренно почитаем.
Премудрость Духа Святаго благодатию во устнах твоих излиявшися самотворительно и ко Христову познанию приведе люди, святителю.
Свету великому яко венечник ныне, святителю, предстоиши, поминай изрядное твое достояние, еже многими труды, отче, стяжал еси, да вси тя ублажаем.
Богородичен: Возсия из Тебе мысленное Солнце и светлыя лучи Своего Божества всем простре, Богородице Владычице, тем Тя вси славим.
Песнь 6
Ирмос Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.
Ралом словес твоих оляденевшая людей сердца возделал еси, Божественное семя в них всеяв, плод красный Христу, святителю, привел еси.
Быстринами твоих учений идольская разжжения, премудре Стефане, угасив, Божественными твоими словесы верных сердца утвердил еси.
Во Единосущную Троицу веровати люди научив, премудре Стефане, от скверны идольския к Живому Богу привел еси.
Богородичен: Расторгни моих согрешений рукописание, одержащих мя печалей и страстей разрешение даруя, и соблюди мя неврежденна, Владычице.
Кондак, глас 8
Самозванен не ищущим тебе, святителю, обрелся еси, люди, от идольския лести свободив, ко Христове вере привел еси и волхва пансотника посрамил еси, темже и первый епископ и учитель Перми был еси. Сего ради духовная твоя чада, яко тобою избавльшеся от идол, благодарная тебе возопием: радуйся, Стефане, учителю премудрый.
Икос
Всякаго мирскаго пристрастия кроме, отче, быв, от юности прилежал еси премудрости и детельное художество достигл еси Богословия. И в дальния страны пришед, идеже весьма Бог не познавашеся, но прелесть бесовская почиташеся, тамо апостольски люди научил еси веровати во Христа, идолы сокрушив и волхва посрамив, святитель тем был еси. Темже духовная твоя чада, яко тобою избавльшеся от идол, благодарная тебе зовем: радуйся, Стефане, учителю премудрый.
Песнь 7
Ирмос: Не послужиша твари Богомудрии паче Создавшаго, но огненное прещение мужески поправше, радовахуся, поюще: препетый отцев Господь и Бог, благословен еси.
Злочестивый он чародей, иже на благочестие хулу глаголавый, тобою, премудре, яко беззаконен, от Христова стада новых людей отгоним бывает. Мы же Христу зовем: благословен Бог отец наших.
Преславно яко прешед от мира к премирным, святителю, жилищем и причастием Богу приближився, воспеваеши: благословен Бог отец наших.
Богородичен: Избавльшеся Тобою первыя клятвы, к присносущней Жизни прешедше, радуйся, зовем Ти, преславная Владычице, Яже Бога нам рождшая.
Песнь 8
Ирмос: Отроки благочестивыя в пещи Рождество Богородичо спасло есть. Тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.
Словесы твоими наставляема чада твоя, святителю, от тьмы идольския к свету Богоразумия прешедше, единогласно Христу вопием: благословите, вся дела Господня, Господа и превозносите Его во веки.
Свет трисолнечныя Троицы, вселився в Божественное твое сердце, люди вся просвети святым крещением и научи Творцу Избавителю вопити: благословите, вся дела Господня, Господа и превозносите Его во веки.
Богородичен: Усты и разумом Богородицу Тя мудрствующе, песнословим Тя, Пренепорочная: родила бо еси, Пречистая, плотию обложена Бога и Господа. Тем Тя, Дево, поем и превозносим во веки.
Песнь 9
Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.
Твоими труды, святителю, яже на земли, Небесный покой прият, идеже святых ликове и праведных всесветлое торжество. Отонудуже и нас поминай, память твою присно славящих.
Вечных и нетленных улучити желая, святителю, и яже в мире мнящихся сладких оставив, Христу последовал еси. Темже и лику архиерейскому сочетался еси, преславне.
Догматом благочестия научився, премудре святителю, апостолом ревнитель был еси и идольскую прелесть низложил еси. Темже твою память достойно ублажаем.
Богородичен: Плоть прияти восхотев, в Тя вселися, едину святейшу всех обрет Богородицу, воистину яви Матерь Деву.
Светилен
Ни человеком, ни от человек, но от Бога избрание святительства приим, иже прежде тьмы сыны, ныне же чада и наследники Света, твоим учением сотворил еси, премудре Стефане.
Песнь 1
Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.
Пермь яко достигл еси, святителю, и тамо возвышенную прелесть, премудре Стефане, смирил еси, и лютаго чародея премудрыми твоими учении посрамил еси.
Бесовская оружия крепко, святителю, притупил еси, и, тех победив Божиею силою, всем Христа, истиннаго Бога, Того исповедал еси, темже и венец от Него приял еси, Стефане.
Божественною любовию, отче, распалаемь, не убоялся еси долготы путныя, ниже тамо нечестивых человек сопротивления, но вся претерпел еси и всех Богу привел еси.
Богородичен: Из корене царскаго прозябла еси, Царя Христа, Божие Слово, паче ума и смысла родила еси из чистых кровей Твоих, сугуба естеством являема и единствующа Ипостасию.
Песнь 3
Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, едине Человеколюбче.
Яко мудр и смыслен споспешник, душевное благородие паче плотских сластей предпочет, яко премудрая учения всем являеши и в Божие познание новыя люди, отче, привел еси.
Очистив твой ум от страстнаго треволнения, Христу подобяся, взыскати заблуждших пришел еси, ихже обрет, с ними Тому поеши: несть свят, паче Тебе, Господи.
Богоглаголивый язык яко стяжав, святителю, таинством Богословия научил еси люди веровати в Троицу, Едино Божество, Ейже о нас, Стефане, молися.
Богородичен: Жезл, прозябший Христа, цвет нетленный, златую кадильницу, вси Тя вемы, Чистая, Божественнаго Существа носящи на руку угль, Богоблаженная.
Седален, глас 4
Ума пречуднаго и бодреннаго учителя, священнодействы Церковь украсивша, и мутным учением волхва, яко возбесневша волка, от Христовых овец словесы своими отгнавша, и невредно духовная своя чада сохранша, восхвалим, вернии, Стефана прехвальнаго, глаголюще: моли Христа Бога спастися душам нашим.
Песнь 4
Ирмос: Услышах, Господи, смотрения Твоего таинство, разумех дела Твоя и прославих Твое Божество.
Спастися моли людем, ихже учением твоим просветил еси и научил еси вопити: слава силе Твоей, Человекелюбче.
От Бога прием священства избрание, Божественною силою свыше одеян, апостольски люди от тьмы идольския просветил еси и научил еси вопити: силе Твоей слава, Человеколюбче.
Богородичен: Ковчег Тя издалеча прообразова приемший закон Богонаписанный, во чреве Слово Божие заченшую несказанно, Всенепорочная, питающее богатно души вопиющих: слава силе Твоей, Господи.
Песнь 5
Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.
Божественною ревностию, святителю, разжизаемь, суетныя идолы пагубы конечныя огню предал еси и, неверныя в веру привед, всех научил еси в Трех Лицех Едино Божество веровати.
Постыдеся окаянный волхв, хотя Христовы люди отвратити от веры, Богу, тя прославляющу, священнейший Стефане премудре.
Богородичен: Украсилася еси девства добротами, Евин покрыла еси студ злообразный, Христа рождшая, одеяние безсмертия дарующаго Тебе чтущим.
Песнь 6
Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.
Пастырский жезл прием, святителю, новым людем учитель был еси, преславне Стефане, по апостолу, всем всяк быв, да всех ко Христу приведеши, преславне.
Меч обоюду остр язык твой на лукаваго волхва бысть, святителю, пресекая того мутное учение; темже тя священными песньми прославляем.
Богородичен: Найде Вседетельный Дух на Тя, Всенепорочная, и Слово Божие в Тя вселися, и плоть бысть неизреченно, и пребысть неизменен.
Кондак, глас 8
Самозванен не ищущим тебе, святителю, обрелся еси, люди, от идольския лести свободив, ко Христове вере привел еси и волхва пансотника посрамил еси, темже и первый епископ и учитель Перми был еси. Сего ради духовная твоя чада, яко тобою избавльшеся от идол, благодарная тебе возопием: радуйся, Стефане, учителю премудрый.
Икос
Всякаго мирскаго пристрастия кроме, отче, быв, от юности прилежал еси премудрости и детельное художество достигл еси Богословия. И в дальния страны пришед, идеже весьма Бог не познавашеся, но прелесть бесовская почиташеся, тамо апостольски люди научил еси веровати во Христа, идолы сокрушив и волхва посрамив, святитель тем был еси. Темже духовная твоя чада, яко тобою избавльшеся от идол, благодарная тебе зовем: радуйся, Стефане, учителю премудрый.
Песнь 7
Ирмос: От Иудеи, дошедше, отроцы в Вавилоне иногда верою Троическою пламень пещный попраша, поюще: отцев Боже, благословен еси.
Бегает убо, побежден быв тобою, преблаженне Стефане, злочестивый волхв, егоже мудрования и злобы вси избавляемся, Христу вопиюще: благословен Бог отец наших.
Иже тобою древле просвещеннии людие, пречудне святителю Стефане, яко к живу, глаголем: не остави нас, твоих чад, якоже обещался еси, да вси с тобою Христу зовем: благословен Бог отец наших.
Елеем Божественнаго радования яко святитель помазан быв, новыя люди ко Христову познанию привел еси и всех научил еси Христу взывати: благословен Бог отец наших.
Богородичен: Ныне вся исполнишася света Божественнаго Тобою, Пречистая, Ты бо дверь явилася еси, еюже миру Бог беседова, просвещая верою зовущия: благословен, Пречистая, Плод чрева Твоего.
Песнь 8
Ирмос: Царя Небеснаго, Егоже поют вои Ангельстии, хвалите и превозносите во вся веки.
Якоже некий храбрый воевода явился еси, преблаженне, идольския храмы искореняя, и, люди от тех прелести избавив, научил еси от души Христу вопити: благословите, вся дела, Господа и превозносите Его во веки.
Во глубину Духа Святаго приникнув, разум Божественный оттуду почерпл еси. Темже и Церковь православием обогатил еси Творцу Избавителю вопити: благословите, вся дела, Господа и превозносите Его во веки.
Во Христово пособие оболкся, лукавыя бесы от человек отгнал еси. Тем и Небесное наследие, отче, со святители приял еси и с ними Христу вопиеши: благословите, вся дела, Господа и превозносите Его во веки.
Богородичен: Ева убо древа животнаго изгнана бысть, возбраняема причащения; Ты же, Дево Богородице, Живот вечный источила еси миру, живоносное действо дарующий верным.
Песнь 9
Ирмос: Воистину Богородицу, Тя исповедуем, спасеннии Тобою, Дево Чистая, с Безплотными лики Тя величающе.
Божественным желанием всегда подвизаемь, мудрости и разума извык, по апостолу, людей от прелести отвратил еси, и Богу Живу веровати научил еси, святителю прехвальне.
Всем благим образ доволен был еси, к Вышнему житию ведущ, смирением и кротостию. Темже отсюду Христос пастыря тя людей Своих устрояет, Егоже моли спасти всех, поющих тя.
Иже к Богу желанием страстей успил еси востание, всенощным стоянием дарования восприял еси видети сущия тамо неизреченныя доброты, Стефане.
Богородичен: Явилася еси, Дево, Мати Божия, паче естества рождшая Божие Слово, Егоже Отец отрыгну прежде всех век, яко Благ; Егоже ныне и телес вышше разумеваем, аще и в тело одеяся.
Светилен
Ни человеком, ни от человек, но от Бога избрание святительства приим, иже прежде тьмы сыны, ныне же чада и наследники Света, твоим учением сотворил еси, премудре Стефане.
Песнь 1
Ирмос: Во глубине постла иногда фараонитское всевоинство преоруженная сила, воплощшееся же Слово всезлобный грех потребило есть: препрославленный Господь славно бо прославися.
Припев: Святый благоверный княже-мучениче Димитрие, моли Бога о нас.
Мученика Твоего, Христе, Димитрия, пети мне желающему, молитвами его, яко Благ, осияние Пресвятаго Духа даруй, да воспою светло Твоего угодника торжество.
Святый благоверный княже-мучениче Димитрие, моли Бога о нас.
Умертвившему крепость смерти подобяся, мучениче Димитрие, от раба заколение претерпел еси и, преславно в Небесныя обители вселився, трудов воздаяние приял еси, прехвальне.
Слава: Честная твоя память, мучениче, освящающи мир, приспе. Радуется же днесь преславный град Москва, твоего благаго получив заступления, и, благодаря, Спасу вопиет: препрославленный Господь, яко прославися.
И ныне: О Тебе ныне пророчество совершися, Богородительнице Владычице Чистая, Егоже бо провозвестиша высокогласно вси пророцы, Того, Невместимаго, преславно во чреве вместила еси, во двою естеству совершенна Бога же и Человека.
Песнь 3
Ирмос: Процвете есть пустыня, яко крин, Господи, языческая неплодящая, Церковь Пришествием Твоим, в нейже утвердися мое сердце.
Святый благоверный княже-мучениче Димитрие, моли Бога о нас.
Егда оставль земнаго мира темность, страдальчески же обагрено кровию тело твое скрыв на Углече, душу в Небесныя Обители, Димитрие, вселил еси, прехвальне.
Святый благоверный княже-мучениче Димитрие, моли Бога о нас.
Нощи и тьмы сынове нарекошася убийцы беззаконнии: яко агнца бо тя непорочна, ножем сбодоша, ходатаи твоему венцу Божественному, Димитрие, бывше.
Слава: Исцеления струи источаеши ко гробу твоему, мучениче Димитрие, верою притекающим, благодарно же радование подаеши поющим: несть свят, яко же Бог наш.
И ныне: Марие, златая кадильнице, страстей моих отжени смрад и утверди мя, колеблема прираженьми лукаваго ратоборца.
Господи, помилуй (трижды).
Седален, глас 4-й
Наста, празднолюбцы, светлое торжество, память славная страстоносца Христова, веселящи всяческая, сияющи в мире зарями чудес. Темже непрестанную благодать твоими молитвами у Христа испроси, мучениче Димитрие, душам нашим и велию милость.
Слава: Яко от младенства лишен еси земнаго царства, благородне Димитрие, и в того место в Небесное преселився, тамо сподобился еси Небесная благая видети, и ныне ясно зриши Святую Троицу и молишися о державе твоих сродников и за вся верныя люди, во еже бы им получити вся благая и полезная.
И ныне: Дево Всенепорочная, яже пресущнаго Бога рождшая, с мучеником Того непрестанно моли оставление прегрешений и исправление жития дати нам прежде конца, верою и любовию поющим Тя по долгу, Едина Всепетая.
Песнь 4
Ирмос: Пришел еси от Девы не ходатай, ни Ангел, но Сам, Господи, воплощся, и спасл еси всего мя, человека. Тем зову Ти: слава силе Твоей, Господи.
Святый благоверный княже-мучениче Димитрие, моли Бога о нас.
Кровию страдания тленнаго смрада избежав, Богомудре, вместо земнаго Небеснаго Царствия наследник был еси, страстотерпче, тем вси, чтуще, тя ублажаем.
Святый благоверный княже-мучениче Димитрие, моли Бога о нас.
Ангельскаго селения во дворех пребываеши и в Российстей земли благодать источаеши к раце мощей твоих любовию припадающим, страдальче, и вопиющим: слава силе Твоей, Господи.
Слава: Двери Небесныя светло отверзошася, приемше тя, мучениче, и Церковь тя ныне имеет, ликовствующи со избранными, поющи Богу: силе Твоей слава, Человеколюбче.
И ныне: Священнии провозвестиша древле гласи чревоношения Твоего глубину, ихже сбытие видяще, Чистая, поем: силе Твоей слава, Владычице.
Песнь 5
Ирмос: Ходатай Богу и человеком был еси, Христе Боже: Тобою бо, Владыко, к Светоначальнику, Отцу Твоему, от нощи неведения приведение имамы.
Святый благоверный княже-мучениче Димитрие, моли Бога о нас.
Мучениче Димитрие, яко звезда пресветлая, в Российстей земли возсиял еси, Церковь Христову светом Богоразумия озарив, тьму же от нея отгнав неведения, просветил еси ту преславных чудес явлением.
Святый благоверный княже-мучениче Димитрие, моли Бога о нас.
Имея к Богу дерзновение, Божественное твое торжество, мучениче, творящия и честное твое страдание верою чистою хвалящия поминай, преблаженне, и от бури, и бед, и напастей спасай.
Слава: Ты, яко крин благоцветущ, течением крове твоея показался еси, блаженне, и, грозд мысленный винограда Христова, благовонием чудес мир облагоухал еси, верою тя, мучениче, славящия.
И ныне: Ново яко Младенца нам Превечное Слово родила еси, двема волема и действы суща сугуба, яко Человека купно же и Бога, Всенепорочная.
Песнь 6
Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.
Святый благоверный княже-мучениче Димитрие, моли Бога о нас.
Разжегся завистию, раб убийца победися властолюбием и к зависти убийство приплете: закла тя, яко агнца непорочна, мучениче, отмщения же праведнаго не убежа.
Святый благоверный княже-мучениче Димитрие, моли Бога о нас.
Истинную чашу от твоих кровей страдальческих почерпл еси, прехвальне мучениче, и сию всегда предлагаеши Церкви, и питаеши твоими чудесы, Димитрие, вопиющия Христу: от тли, Боже, избави нас.
Слава: Яко пречестна жертва, тайней трапезе принесен быв заколением, мучениче, в Небесных Обителех преславно водворяешися, зря славу Божию и приемля болезней твоих почести и страдания.
И ныне: На Тя сошедши роса Небесная и оляденевшую землю, Приснодево, Богоразумия водами напоивши, многоплодну яви.
Господи, помилуй (трижды). Слава, и ныне:
Кондак, глас 8-й
Возсия днесь в славней памяти твоей верным веселие, яко бо доброрасленный грозд, прозябл еси и Христу красен плод принесл еси себе; темже и по убиении твоем соблюде тело твое нетленно, страдальчески обагреное кровию. Благородне святе Димитрие, соблюдай отечество твое и град твой невредим, тому бо еси утверждение.
Икос
Яко агнец непорочен, кровь твою излиял еси, богомудре Димитрие, и от Благодателя всех Бога чудес дар приял еси, и вместо тленнаго обрел еси богатство нетленное, предстоиши бо престолу славы всех Царя. Емуже о нас, мучениче, молися, да твоими молитвами от бед свободившеся, радостно возопием, глаголюще: радуйся, верных правителю. Радуйся, веры твердое забрало. Радуйся, чудо чудес преславное и пристанище тихое притекающих к тебе. Радуйся, кореню веры и молебниче о молящих ти ся. Радуйся, отечеству твоему похвала и воинству нашему на враги поборник. Сохраняй град твой невредим, тому бо еси утверждение.
Песнь 7
Ирмос: Богопротивное веление беззаконнующаго мучителя высок пламень вознесло есть, Христос же простре Богочестивым отроком росу духовную, Сый благословен и препрославлен.
Святый благоверный княже-мучениче Димитрие, моли Бога о нас.
Соблазн лукаваго раба и того хитростей превыше, яко победитель изряден, мучениче, быв, прославился еси, зовый: Боже, благословен еси.
Святый благоверный княже-мучениче Димитрие, моли Бога о нас.
Лучами, яко звезда, Соборную Церковь чудесы просветил еси, верою же притекающим к раце мощей твоих исцеление неоскудно подаеши, преблаженне, и зовущим: Боже, благословен еси.
Слава: Аки агнец непорочен и кадило благоприятно, Агнцу истинному и Пастырю, мучениче, принеслся еси в приношение всебогатно и приятно всесожжение, Емуже поем: благословен Бог отец наших.
И ныне: Невещественнаго Света вселение Твое чрево бысть, светлостьми Божественнаго разума безбожие отгнавшаго, Пречистая Богоневесто Отроковице. Емуже поем, взывающе: благословен Бог отец наших.
Песнь 8
Ирмос: Пещь иногда огненная в Вавилоне действа разделяше, Божиим велением халдеи опаляющая, верныя же орошающая, поющия: благословите, вся дела Господня, Господа.
Святый благоверный княже-мучениче Димитрие, моли Бога о нас.
Вшед, мучениче, в небеснаго круга течения, на добродетельный воздух, страданьми препоясан, Крест за скипетр в десную руку имея, сцарствовати Христу сподобился еси, Димитрие царевиче. Моли спастися нам, поющим: благословите, вся дела Господня, Господа.
Святый благоверный княже-мучениче Димитрие, моли Бога о нас.
Украшен разумом, красному Владыце предстоиши, светел присно, яко победоносец Богоприятен, укроти молитвами твоими варварская нахождения и низложи мучащее нас искушение, согнетающее злом во глубину погибели, страстотерпче Димитрие, поющих: благословите, вся дела Господня, Господа.
Слава: Пречестная твоя память, освящающи мир, приспе, всехвальне страстоносче, в нюже молимся получити тобою заступление, Димитрие, поющим славу благаго угодника: благословите, вся дела Господня, Господа.
И ныне: Священных пророк честный лик Тя прописует, кивот и несекомую гору, жезл и дверь, еюже, яко весть, пройде Вышний и паки затворену остави Тя Деву.
Песнь 9
Ирмос: Безначальна Родителя Сын, Бог и Господь, воплощся от Девы, нам явися, омраченная просветити, собрати расточенная. Тем Всепетую Богородицу величаем.
Святый благоверный княже-мучениче Димитрие, моли Бога о нас.
Обрел еси от Христа возмездие, мудре мучениче, правды венец приим и радость некончаемую, и, Небеснаго селения во дворех пребывая, державу отечества твоего поминай, мучениче Димитрие.
Святый благоверный княже-мучениче Димитрие, моли Бога о нас.
Егда принесени быша честныя твоя мощи, страстотерпче Димитрие, тогда святители, обстояще одр, царь же, и князи, и вси российстии народи воскликнуша купно память вечную, Христа величающе.
Слава: Мученик днесь сословие, святых и праведных души, яко победоносца тя и сликовника прияша, мучениче Димитрие, с нимиже радуяся, поеши Бога в Троице, спасающаго души наша.
И ныне: Разумевше издалеча прозорливыма очима, пророцы Тя яве провозвестиша, хотящую Матерь быти Вседетелю и всех Владыце. Тем Тя поем, Всепетая Богородице, и исповедуем, яко воистинну сущую Богородицу.