Тропари, кондаки и величания - 08 сентября 2025
Глас апостола Павла услышавша глаголющ: мы юроди Христа ради, рабы Твои, Христе Боже, Пелагия, Параскева и Мария, юроди быша на земли Тебе ради; темже, память их почитающе, Тебе молим: Господи, спаси души наша.
Вышния красоты возжелевша, нижния сласти телесныя тощно оставили есте, нестяжанием суетнаго мира, ангельское житие проходяща, скончавшася, Пелагие, Параскево и Марие блаженныя: Христа Бога молите непрестанно о всех нас.
Пастырю добрый Бога в сердце смирением стяжавый / Орловския земли предивное украшение. / Послушанием, терпением страхования преодолевый, / на месте пусте храм и школу создавый. / Любовью Христовой всех согревая, / силою благодати бесы изгоняя, / явлением мощей твоих нас ободряя, / святой праведный отче Георгие, / молись Пресвятой Троице спастися душам нашим.
Чудесы и подвиги украшенный / святое житие оставил еси нам в память. / Мы же с любовию верно чтущие Тя / молим, покрывай нас от всех бед и напастей / святою своею любовию, / священноисповедниче Георгие.
Величаем тя, священноисповедниче Георгие, и чтим святую память твою, ты бо молиши за нас Христа Бога нашего.
Кронштадтскаго пастыря чадо духовное,| флота Черноморскаго окормителя,| московския паствы похвалу и радование,| исповедника православныя веры непоколебимаго, | сохраньшаго в страданиих своих|Безценный Бисер - Христа,| приидите, вернии,| светло прославим священноисповедника Романа и воспоим ему:|| моли, пастырю добрый, Христа Бога спастися душам нашим.
Яко светозарное светило, / лучами Божественных дарований сияющее, / яви тя Солнце Правды Христос Бог наш, / тьму безбожия и злонравия далече отгоняюща, / и зарями богопознания осияюща вопиющих верно: / Радуйся, святе Николае, / Христов исповедниче и Казахстанский чудотворче.
Избранный от Предвечнаго Архиерея и Церкви Зиждителя, / данный Казахстану ходатаю изрядный и заступниче пречудный, святителю Николае, / ублажая подвиги и труды твоя, / любве ради Господа тобою подъятыя, / восхваляем дивнаго во святых Своих Бога нашего, / давшаго тебе благодать величия Своего / и научившаго нас любовию пети тебе: / Радуйся, святе Николае, / Христов исповедниче и Казахстанский чудотворче.
Величаем тя, Христов исповедниче, святителю Николае, и чтим болезни и труды твоя, имиже трудился еси во благовестии Христове.
В тебе, отче, известно спасеся еже по образу: приим бо крест, последовал еси Христу, и дея учил еси презирати убо плоть, преходит бо, прилежати же о души, вещи безсмертней. Темже и со ангелы срадуется, преподобне Сергие, дух твой.
Издетска монашескую жизнь возжелал еси, преподобне отче Сергие, в нейже любовь Христову стяжав, пастырь добрый многим людем был еси, последи же и изгнание претерпев, венцем исповедничества украсился еси. И ныне, предстоя престолу Святыя Троицы, непрестанно моли просветити и спасти души наша.
Чистотою душевною божественне вооружився, и непрестанныя молитвы, яко копие вручив крепко, пробол еси бесовская ополчения, Сергие отче наш, моли непрестанно о всех нас.