Акафисты - 12 сентября 2025
Кондак 1
Избранному воеводе земли Российския, светлому украшению Церкве Православныя, святому благоверному великому князю Александру Невскому, похвальная восписующе, яко верою враги, видимыя же и невидимыя, победившему, и в вере своей, по речению апостолову, добродетель, в добродетели же разум, в разуме же воздержание, в воздержании же терпение, в терпении же благочестие, братолюбие и любовь явившему со умилением и радостию возопиим:
Радуйся, святый благоверный великий княже Александре.
Икос 1
Со Ангелы и всеми святыми предстоиши ныне Христу, блаженно Александре, моляся о любовию чтущих тя: темже, поминающе, яко, измлада Христа возлюбив, к небесным духом прилепился еси, бесплотных подражав житию, ублажаем тя, вопиюще:
Радуйся, корене благочестиваго отрасле пречестная;
Радуйся, благоверия предков наследниче.
Радуйся, добродетелей отца боголюбиваго подражателю;
Радуйся, кротости и благочестия матерняго преемниче.
Радуйся, вождю к Небесем стада своего христолюбиваго;
Радуйся, в житии всех рабов Божиих друже и ревнителей благочестия собеседниче.
Радуйся, преподобных лика богосветлаго сопричастниче;
Радуйся, веры Христовы непобедимый исповедниче.
Радуйся, волею мучениче, сликовствуяй ныне сонму мучеников добропобедному;
Радуйся, христианскаго упования и любве всем нам девственный проповедниче.
Радуйся, уставов и чина церковнаго благолепнаго ревнителю;
Радуйся, верных чад Церкве и угодников Божиих сонаследниче.
Радуйся, святый благоверный великий княже Александре.
Кондак 2
Видевше лепоту лица и телеснаго возраста твоего, новоградстии людие радовахуся и славляху Бога, взирающе на тя: мы же, поминающе светлейшия паче солнца добродетели твоя, блаженне Александре, прославившему тя Господеви поим: Аллилуиа.
Икос 2
Разумел еси, богомудре Александре, яко преходит образ мира сего, едино же есть на потребу человеком, еже благоугодити Господеви: сего ради измлада от любве к миру и яже в мире уклонился еси, вожделев же зде сущими стяжати небесная, яко верный раб Господу во всем житии неленостно послужил еси. Темже вопием ти:
Радуйся, подвижниче веры, угождение Богу паче всего предызбравый;
Радуйся, подобне Аврааму во всем житии непорочно пред Богом поживый.
Радуйся, Исааково послушание показавыи;
Радуйся, путем Иаковля смиренномудрия ходивый.
Радуйся, Иосифову чистоту и целомудрие стяжавый;
Радуйся, Моисееву любовь к людем своим в себе явивый.
Радуйся, якоже Самуил чиста себе от всякаго любостяжания соблюдавый;
Радуйся, кротостию Давидовою враги своя победивый.
Радуйся, Петровой пламенней вере поревновавый;
Радуйся, с Павлом игу Христову себе поработивый.
Радуйся, богомудрие Иоанново подвигом поучения в слове Божием снискавый;
Радуйся, многих святых добродетели в себе совокупивый.
Радуйся, святый благоверный великий княже Александре.
Кондак 3
Силою веры стяжал еси, блаженне Александре, высшее любомудрие, егоже ради, презирая плоть, прилежал еси о души безсмертней: темже ублажающе тя, яко стяжавша ныне безсмертие, вопием прославившему тя Христу: Аллилуиа.
Икос 3
Имеяй всегда пред очима своима Господа, трезвенно пожил еси, блаженне Александре, и вся яже творил еси, творя во славу Божию, угодил еси Богу, Емуже предстоиши ныне с лики от века угодивших: темже радующеся о тебе, зовем ти:
Радуйся, истиннаго трезвения подвижниче;
Радуйся, спасительнаго созерцания любителю.
Радуйся, наставниче наш в подвиге от мира удаления;
Радуйся, стяжателю совершеннаго дара бодрственнаго себе внимания.
Радуйся, всякаго безсловеснаго вожделения твердый противоборниче;
Радуйся, благочестия добрый подвижниче, преуспевый в разуме и деянии.
Радуйся, яко силою молитвы препобедил еси диавольская искушения;
Радуйся, яко себе от греха оградил еси последних воспоминанием.
Радуйся, яко возлюбил еси душею еже о небесных помышление;
Радуйся, яко преуспел еси в неленостных яже к Богу молитвенных предстояниих.
Радуйся, яко все житие свое освящал еси непрестанным Имене Вожия призыванием;
Радуйся, яко угождал еси Господеви всяким благоугождением.
Радуйся, святый благоверный великий княже Александре.
Кондак 4
Бури искушений воздвигоша врази и противу тебе, блаженне Александре. Ты же препобедил еси сия силою благодати Христовы: темже ныне, к тихому пристанищу притек, с лики искушенных в мире, победивших же мир, вопиеши Христу: Аллилуиа.
Икос 4
Слышав Павла, глаголюща: "Всяк подвизаяйся от всех воздержится", вся в уметы вменил еси, блаженне Александре, да Христа приобрящеши: подвигами же отвержения себе и ко благим делом принуждения стяжал еси свободу славы чад Божиих: темже ублажающе тя, вопием ти таковая:
Радуйся, образ отвержения себе нам показавый;
Радуйся, ношению креста в последовании Христу нас научивый.
Радуйся, плоть со страстьми и похотьми ея поправый;
Радуйся, житием твоим суету мира обличивый.
Радуйся, всякое пристрастие земное от себе отгнавый;
Радуйся, разум свой в послушание веры пленивый.
Радуйся, волею своею благое иго заповедей Христовых подъявый;
Радуйся, сердце свое от всякия страсти душевредныя чисто сохранивый.
Радуйся, себе Богу всесовершенне предавый;
Радуйся, чрез все житие свое Богу послуживый.
Радуйся, совершением заповедей любовь к себе Божию стяжавый;
Радуйся, наследие Царствия благоугождением Богу улучивый.
Радуйся, святый благоверный великий княже Александре.
Кондак 5
Боготечною звездою прешел еси в мире, блаженне Александре, блистающ славою и добродетелию: темже ныне сияеши на Небесех славою вечною с лики праведник, с нимиже выну воспеваеши Христу: Аллилуиа.
Икос 5
Видевше тя, блаженне Александре, николиже во бранех побеждаема, всегда же побеждающа, невернии единаго имене твоего устрашахуся, мы же, поминающе исполненное веры мужество твое, ублажаем тя, глаголюще:
Радуйся, доблественный в защиту веры и Церкве воителю;
Радуйся, своея земли мужественный защитителю.
Радуйся, наветов вражиих мудрый разорителю;
Радуйся, мира безпомощных сильный оградителю.
Радуйся, воинства свейскаго на брегах Невских славный победителю;
Радуйся, безопасности всея северныя страны земли Российския охранителю.
Радуйся, злых козней иноверия, подвигших чуждую рать на землю нашу, разрушителю;
Радуйся, законов правды богоукрепляемый утвердителю.
Радуйся, Пскова, отечества святыя Ольги, свободителю;
Радуйся, ненавидевших мира умирителю.
Радуйся, буйства неустроенныя в тыя дни Литвы укротителю;
Радуйся, во всех сих бранех христолюбиваго воинства своего мудрый предводителю.
Радуйся, святый благоверный великий княже Александре.
Кондак 6
Проповедника кротости и терпения явил еси себе, блаженне Александре, посреди преславных побед твоих: темже и стяжал еси сугубый венец от Царя Христа, Емуже предстоиши ныне, вопия: Аллилуиа.
Икос 6
Провозсиял еси, блаженне Александре, паче мужества, терпением твоим, егоже стяжал еси, взирая на Начальника веры и Совершителя Иисуса, Иже вместо предлежащия ему радосте претерпе Крест: темже восхваляюще тя, усердно вопием:
Радуйся, до конца в подвизех служения Богу претерпевый;
Радуйся, терпению Христову верно подражавый.
Радуйся, силу заповеди Христовы, яже о любви ко врагом, премудро уразумевый;
Радуйся, и согрешшим противу тебе избавленным тобою людем любовь истинную показавый.
Радуйся, во искушении от народа своего хитрость лукавого прозревый;
Радуйся, мирным отбытием своим из земли своея злобу врага поправый.
Радуйся, и во всем житии своем ухищрения сатаны проразумевый;
Радуйся, злое благим, по апостолу, выну препобеждавый.
Радуйся, паки, в годину скорби, в помощь оскорбившему тя Новуграду предуспевый;
Радуйся, сего ради пламенную любовь от народа своего себе снискавый.
Радуйся, Божия посещения, болезни и лишения, со упованием терпевый;
Радуйся, сего ради светлый венец от Господа стяжавый.
Радуйся, святый благоверный великий княже Александре.
Кондак 7
Хотяй провозсияти тебе всеми добродетельми, блаженне Александре, Владыка Христос призвал есть тебе к служению людем своим во дни посещения: ты же притяжал еси к терпению смирение, егоже ради ныне превознесен еси, предстоя Богу с песнию: Аллилуиа.
Икос 7
Дивно бе видети, како непобедимый воитель смиренно преклоняет главу свою пред неверными, ихже посла Господь на люди своя ради грех их: дивно же есть и воспомянути непобедимое смирение твое, блаженне Александре, имже и Господеви благоугодил еси, и люди своя спасл еси. Темже благодарно вопием ти:
Радуйся, смирения Господня подражателю;
Радуйся, подобающаго богопоставленным властем почитания учителю.
Радуйся, всякаго превозношения противоборче;
Радуйся, истиннаго послушания подвижниче.
Радуйся, всем нам образе вернаго Богу служения;
Радуйся, начальствующим наставниче в богоприятном людем предстоянии.
Радуйся, подвластных руководителю в богозаповеданном предержащим властем повиновении;
Радуйся, яко многажды ради блага людей своих путьшествовал еси к безбожным, ни во чтоже вменяя яже от них испытания.
Радуйся, яко не устрашился еси, призвав Бога, прийти к Батыеви, исполняя его веление;
Радуйся, яко многащи воспринимал еси на себе страшный ответ о неразумных народа своего востаниих.
Радуйся, яко оградил еси люди твоя от зловреднаго с неверными общения;
Радуйся, яко мудре оградил еси в земли своей отеческия доблести и предания.
Радуйся, святый благоверный великий княже Александре.
Кондак 8
Странническое житие прешел еси на земли, блаженне Александре, не ведый покоя в трудех своих и не имый зде пребывающаго града, но грядущаго взыскуяй: сего ради ныне, блаженне, вселился еси в вечных обителех, выну поя Богу: Аллилуиа.
Икос 8
Всею душею послужив Господу и всем житием своим благоугодив ему, прославился еси благочестием, егоже ради и исповедник явился еси веры Христовы, блаженне Александре: поминающе убо подвиг исповедничества твоего, вопием ти:
Радуйся, злобы неверных не устрашивыйся;
Радуйся, твари паче Создавшаго не послуживый.
Радуйся, солнцу и огню в стане безбожных не поклонивыйся;
Радуйся, веру свою во искушении сохранивый.
Радуйся, велению безбожному не покоривыйся;
Радуйся, твердый проповедник веры пред неверными себе явивый.
Радуйся, с сугубою славою, по исповедании своем, в землю свою возвративыйся;
Радуйся, во всем житии верным вере отцев пребывый.
Радуйся, от лести иноверия премудре уклонивыйся;
Радуйся, лукавство проповедников лжеверия яве обличивый.
Радуйся, твердый защитник правоверия явивыйся;
Радуйся, лжесловесие врагов Православия словом здравым препобедивый.
Радуйся, святый благоверный великий княже Александре.
Кондак 9
Всего себе повинув Богови, яко раб благий и верный послужил еси Ему, блаженне Александре, паче сверстник твоих для земли твоея потрудився: темже и внити сподобился еси в радость Господа своего, Емуже предстоиши ныне, со Ангелы поя: Аллилуиа.
Икос 9
Витийствующий язык не возмогл бы восхвалити дела твоя, блаженне Александре, яже совершил еси, полагая по братии душу свою: смиренно убо поминающе сицевая исправления твоя, умиленную песнь приносим ти, глаголюще:
Радуйся, братолюбия христианскаго приискренний ревнителю;
Радуйся, Моисеевы и Павловы любве ко братии подражателю.
Радуйся, заповедей Христовых яже о любви верный исполнителю;
Радуйся, и всех нас в любви к присным дивный наставниче.
Радуйся, примером своим паче слова явивыйся стязающихся о наследии братии своих примиритель;
Радуйся, о благе народа усердно в житии своем пекийся.
Радуйся, общаго мира во днех своих устроителю;
Радуйся, изгнаннаго страхом нашествий татарских народа своего собирателю.
Радуйся, безпомощных присный защитителю;
Радуйся, нищих и алчущих питателю.
Радуйся, сирых сильный покровителю;
Радуйся, и ныне всех скорбящих и нуждающихся мощный пред Господом предстателю.
Радуйся, святый благоверный великий княже Александре.
Кондак 10
Спасти хотя душу свою, ведый же, яко не имущему любве к Богу никиими же подвигами и добродетельми улучити спасение возможно есть, стяжал еси венец добродетелей, еже есть любовь к Богу, Емуже предстоя ныне, радостно вопиеши: Аллилуиа.
Икос 10
Царя Небеснаго возлюбив от всего сердца твоего, и от всея души твоея, и всею мыслию твоею, принесл еси Ему, блаженне Александре, последи многоразличных приношений веры и усердия, себе самаго в жертву живу, святу, благоугодну: темже ублажающе тя, вопием ти:
Радуйся, в житии своем всеми богоугодными делы Господеви послуживый;
Радуйся, обетами иночества святое житие свое увенчавый.
Радуйся, многи храмы Божий, безбожными раззоренныя, обновивый;
Радуйся, к просиянию подвигов постничества обители святыя созидавый.
Радуйся, подвизающихся измлада в благочестии ради Бога возлюбивый;
Радуйся, ангельский образ и себе чистою душею предызбравый.
Радуйся, в конец жития своего всего себе Богу посвятивый;
Радуйся, приятием схимы, с новым именем Алексия, всесовершенне себе Богу предавый.
Радуйся, обетом девства чистоту сердца своего явивый;
Радуйся, обетом нестяжания высоту духа своего показавый.
Радуйся, обетом послушания всецелое служение свое Единому Богу во веки утвердивый;
Радуйся, к венцу мудраго и благаго князя мзду инока притяжавый.
Радуйся, святый благоверный великий княже Александре.
Кондак 11
Пение погребальное слезами растворяшеся у гроба твоего, блаженне Алексадре; людие твои плакахуся о тебе, солнце земли Русския, в полудни зашедшем, и рыдания прерываху умиленную песнь их к Богу: Аллилуиа.
Икос 11
Свет славы небесныя осия тя вскоре, блаженне Александре, утешая плачущия люди твоя: темже видяще при гробе твоем знамения и чудеса, сынове российстии достойне призываху тя, яко в молитвах предстателя; мы же, понимающе скорое заступление твое, вопием ти:
Радуйся, угодниче Божий, в самом погребении прославление от Бога получивый;
Радуйся, скорый предстателю наш, егоже призываху отцы наши в нуждех и озлоблениих.
Радуйся, в борьбе с татары князю Димитрию Донскому вспоможение явивый;
Радуйся, царю Иоанну и казанцы одоление исходатаивый.
Радуйся, исцеления многоразличныя всем подаваяй;
Радуйся, слепым зрение молитвою твоею возвращаяй.
Радуйся, хромым, припадающим ко гробу твоему, хождение даруяй;
Радуйся, разслабленных неможение врачуяй.
Радуйся, одержимым от бесов свобождение подаваяй;
Радуйся, безнадежных надеждою спасения оживляяй.
Радуйся, в погубльших разум разумение возставляяй;
Радуйся, от гроба твоего многообразныя чудотворения присно источаяй.
Радуйся, святый благоверный великий княже Александре.
Кондак 12
Благодать познавше, живущую в нетленных мощех твоих, людие владимирстии с любовию прихождаху ко святей раце твоей и, радостно лобызающе ю, славляху о тебе Бога, прославляющаго святыя Своя, со умилением вопиюще Ему: Аллилуиа.
Икос 12
Поюще добродетели и чудеса твоя, радостию сретаху и провождаху отцы наши святое тело твое, егда, преселяхуся святыя мощи твоя на новое место покоища в славном святаго Петра граде: и мы ныне, радующеся о небесней славе твоей и обитании нетленных мощей твоих в богоизбранном граде сем со онеми вопием ти:
Радуйся, российский Иосифе, на новое место упокоения преселивыйся;
Радуйся, всех концев земли Российския покровителю.
Радуйся, Петрова града благонадежное утверждение;
Радуйся, тогоже во бранех Небесный защитителю.
Радуйся, северныя столицы неоцененное украшение;
Радуйся, тезоименитыя тебе обители славо и утверждение.
Радуйся, народу русскому здравие же и спасение молитвами твоими подаваяй;
Радуйся, всех упование на тя возложивших, богомудрый учителю.
Радуйся, иноком, яко инок, полезное, примером жизни своея, наставление преподаваяй;
Радуйся, мирским людем, яко в мире потрудивыйся, к добродетелем общежития руководителю.
Радуйся, нетлением своим всем нам надежду воскресения подаваяй;
Радуйся, всех нас в напастех и скорбех поборниче, хранителю и свободителю.
Радуйся, святый благоверный великий княже Александре.
Кондак 13
О святый благоверный великий княже Александре! От благоговейных сердец приносимую ти, аще и недостойную, хвалебную песнь сию, приими от нас, яко усердную жертву сердец, любящих тя и ублажающих святую память твою. Охраняй всех нас молитвами твоими: огради ходатайствы твоими град твой и вся люди земли Российския, да тихое и безмолвное житие поживше в нынешнем веце блаженство вечное наследим и купно с тобою и всеми святыми выну сподобимся воспевати Богу: Аллилуиа.
Этот кондак читается трижды, затем 1-й икос "Со Ангелы и всеми..." и 1-й кондак "Избранному воеводе...".
Молитва первая
Скорый помощниче всех усердно к тебе прибегающих и теплый наш пред Господем предстателю, святый благоверный великий княже Александре! Призри милостивно на ны, недостойныя, многими беззаконии непотребны себе сотворшия, к раце мощей твоих ныне притекающия и из глубины сердца к тебе взывающия- ты в житии своем ревнитель и защитник православныя веры был еси, и нас в ней теплыми твоими к Богу молитвами непоколебимы утверди. Ты великое возложенное на тя служение тщательно проходил еси, и нас твоею помощию пребывати коегождо, в неже призван есть, настави. Ты, победив полки супостатов, от пределов Российских оных отгнал еси, и на нас ополчающихся всех видимых и невидимых врагов низложи. Ты, оставив тленный венец царства земнаго, избрал еси безмолвное житие и ныне, праведно венцем нетленным увенчанный, на Небесех царствуеши, исходатайствуй и нам, смиренно молим тя, житие тихое и безмятежное, и к Вечному Царствию шествие неуклонное твоим предстательством устрой нам. Предстоя же со всеми святыми Престолу Божию, молися о всех православных христианех, да сохранит их Господь Бог Своею благодатию в мире, здравии, долгоденствии и всяком благополучии в должайшая лета, да присно славим и благословим Бога, в Троице Святей славимаго, Отца и Сына и Святаго Духа, ныне и присно и во веки веков. Аминь.
Молитва вторая
О святый благоверный княже Александре! Призри милостивно на ны, недостойныя рабы Божии (имена), исходатайствуй нам житие тихое и безмятежное, и к вечному Царствию шествие неуклонное твоим предстательством устрой нам, да сохранит нас Господь Бог Своею благодатию в мире, здравии, долгоденствии и всяком благополучии в должайшая лета, да присно славим и благословим Бога в Троице Святей славимаго, Отца и Сына и Святаго Духа, ныне и присно, и во веки веков. Аминь.
Кондак 1
Избранный чудотворче и предивный угодниче Христов, града Москвы и державы Российския крепкое ограждение, раздоров и нестроений искоренителю, благоверный княже Данииле, похвальная восписуем ти, к раце мощей твоих притекающе. Ты же, яко имеяй дерзновение ко Господу, от всяких нас бед свободи, зовущих:
Радуйся, преподобне княже Данииле, Московский чудотворче.
Икос 1
Ангелов Творец и Господь во дни великих бед и напастей, обышедших страну нашу от нечестиваго царства агарянскаго, восхотев людем страждущим утешение даровати, яви тя, княже Данииле, яко плод красен от чресл великаго князя Александра; людие же, о рождении твоем радости исполнившеся, взываху ти сицевая:
Радуйся, корене благочестиваго прозябение; радуйся, добродетелей отца твоего и матере наследниче.
Радуйся, рождением твоим люди града Владимира возвеселивый; радуйся, грядущую славу Москвы предвозвестивый.
Радуйся, избранниче Божий; радуйся, правило веры благочестивыя.
Радуйся, образе кротости духовныя; радуйся, Бога, яко истиннаго Отца нашего, издетска познавый.
Радуйся, яко Иосиф, от братии твоея досаждения сладце претерпевый; радуйся, последи и братию свою в любовь себе призвавый.
Радуйся, преподобне княже Данииле, Московский чудотворче.
Кондак 2
Видяще ближнии твои, блаженне, день от дне во благочестии тя возрастающа, и не точию млеком матерним, но паче благодатию Божиею питаема, радовахуся и, Господа о сем хваляще, взываху: Аллилуиа.
Икос 2
Разум богопросвещен имея, уразумел еси, всехвальне, по словеси апостольскому, яко нужнейши всего есть благочестие, имже и потщался еси обогатити душу твою, в молитвах и научении словеси Божию всеусердно пребывая. Того ради людие ублажаху тя сице:
Радуйся, молитвенниче теплейший; радуйся, послушниче Евангелия усерднейший.
Радуйся, добродетели высокия в сердце твоем вкоренивый; радуйся, в заповедех Господних вся дни живота твоего ходивый.
Радуйся, образом жития твоего мир посреде братии водворивый; радуйся, Господа твоего паче всех возлюбивый.
Радуйся, положити душу свою за други своя непрестанное желание имевый; радуйся, благодать Господню в сердце свое заключивый.
Радуйся, и тело свое тою просветивый; радуйся, оное и по смерти нетленно сохранивый.
Радуйся, преподобне княже Данииле, Московский чудотворче.
Кондак 3
Сила Вышняго укрепляше тя, блаженне, егда в кротости и в смирении души твоея возрастая, уготовлял еси себе на служение княжеское и о помощи небесней молился еси, взывая Богу: Аллилуиа.
Икос 3
Имея присно в души твоей глагол Господень, пророку реченный: «На кого воззрю, токмо на кроткаго и смиреннаго, и трепещущаго словес Моих», потщался еси, святе, оными добродетельми себя украсити. Того ради ублажаем тя сице:
Радуйся, подвижниче доблий, на высоту добродетелей возшедый; радуйся, нищетою духовною Царствие Небесное стяжавый.
Радуйся, кротости ради землю обетования наследивый; радуйся, правды и истины паче всего искавый.
Радуйся, чистотою сердца твоего Господа созерцавый; радуйся, миротворец нарочит в житии своем явивыйся.
Радуйся, изгнания правды ради смиренно претерпевый; радуйся, мзду вечную добродетельми стяжавый.
Радуйся, чистоты душевныя и телесныя сокровище; радуйся, любве и кротости Христовы вместилище.
Радуйся, преподобне княже Данииле, Московский чудотворче.
Кондак 4
Бурею агарянскаго нашествия людие российстии потрясаеми, на тя, всечестне, яко на избранника Божия, взираху и, под кров твой державный прибегающе, защищение и утешение приимаху, вкупе с тобою взывающе Богу: Аллилуиа.
Икос 4
Видяще, святе, братия твоя отрока тя еще мала суща, наследия отча лишити тя умыслиша и удел малейший, Московский, точию вдати ти изволиша; ты же, кроток сый и незлобив, ничтоже противовещал еси и за обидящих тя Господеви молился еси. Сего ради ублажаем тя сице:
Радуйся, кротости Христовы подражателю; радуйся, предивный нестяжателю.
Радуйся, удел твой малейший возвеличивый; радуйся, всего себе воле Божией предавый.
Радуйся, от Него токмо единаго помощи искавый; радуйся, богатство тленное презревый.
Радуйся, сокровища духовная возлюбивый; радуйся, от юности в благодати у Бога и человек возраставый.
Радуйся, яко и по скончании земнаго жития твоего тую же благодать сугубо восприявый; радуйся, яко и мы благодати Божия по молитвам твоим сподобляемся.
Радуйся, преподобне княже Данииле, Московский чудотворче.
Кондак 5
Боготечней звезде подобяся, на земли течение твое светло совершил еси, благоверный княже Данииле, лучи святости и потоцы милости всем изливая; ихже ради и в сонме святых пребываеши, поя с ними: Аллилуиа.
Икос 5
Слышавше ближнии и дальнии, яко в малем еще граде Москве на высоте стола княжескаго возоблистал еси, преславне княже Данииле, под сень крилу твоею притекаху, похвалы таковыя ти приносяще:
Радуйся, княже благосердый, любовию своею вся покрываяй; радуйся, владыко прелюбимый, бедствующия защищаяй.
Радуйся, мудрость отца твоего, князя Александра, восприявый; радуйся, страны Московския утверждение.
Радуйся, державы Российския украшение; радуйся, Церкве Христовы похвало высокая.
Радуйся, людей российских упование благонадежное; радуйся, тобою бо во едино братство совокупляемся.
Радуйся, яко твоим научением от распрей свобождаемся; радуйся, заповедей Божиих верный исполнителю.
Радуйся, преподобне княже Данииле, Московский чудотворче.
Кондак 6
Проповедник Царствия Божия явился еси, благоверный княже Данииле: над людьми бо своими царствуя, слезу всяку от лица страждущих отымал еси, подвизая звати всех: Аллилуиа.
Икос 6
Возсиял еси, яко пресветлое солнце, на престоле Московстем, благоверный княже Данииле, величием души твоея и добродетельми всю землю Российскую озаряя и подвизая всех ублажати тя сице:
Радуйся, мужу желаний духовных; радуйся, стяжателю даров небесных.
Радуйся, милосердия сокровище неисчерпаемое; радуйся, кротости наставниче.
Радуйся, заповедей евангельских делателю неленостный; радуйся, нищету вольную Христа ради возлюбивый.
Радуйся, сиротам и вдовицам отче благосердый; радуйся, людем твоим помощниче богодарованный.
Радуйся, в чине властителя кротость детскую проявивый; радуйся, душу твою в храм Божий добре претворивый.
Радуйся, преподобне княже Данииле, Московский чудотворче.
Кондак 7
Хотяй Всевидец Господь прославити тя, блаженне, постави тя владыку преславна во смирении людем Своим, иже и взирающе на тя, и добродетелей твоих богатству чудящеся, пояху Ему: Аллилуиа.
Икос 7
Новаго и дивнаго устроителя земли Российския вемы тя, княже Данииле, кротостию бо, смиренномудрием, братолюбием и мудростию небесною княжение Московское возвеличил еси и сильно сотворил еси е. Сего ради приими от нас сицевая:
Радуйся, мудрость Соломонову стяжавый; радуйся, кротость Давидову восприявый и тою враги твоя победивый.
Радуйся, многия други себе стяжавый; радуйся, стольный град твой храмы Божиими украсивый.
Радуйся, величию Москвы тем послуживый; радуйся, воине Христов неодоленный.
Радуйся, от бед и скорбей всем скорое прибежище; радуйся, от всех зол твердое защищение.
Радуйся, унывающим доброе вразумление; радуйся, всем братолюбцем присное ободрение.
Радуйся, преподобне княже Данииле, Московский чудотворче.
Кондак 8
Странника и пришельца себе на земли быти помышляя, час кончины твоея пред очима твоима присно имел еси и сего ради обитель иноком во славу тезоименитаго ти преподобнаго Даниила возградил еси, идеже молитвы твоя Господеви возсылал еси, поя Ему: Аллилуиа.
Икос 8
Всего себе от юности Господу возложив, вся дни живота твоего, благоверный княже. Тому усердно работал еси и, ко блаженному успению достиг, в мире глубоце дух свой Ему предал еси. Людие же княжения твоего, окрест гроба твоего собравшеся, пояху ти сицевая:
Радуйся, княже наш превожделенный, ко Господу отошедый; радуйся, нетленное тело твое нам оставивый.
Радуйся, ароматы добродетелей твоих нам благоухаяй; радуйся, сиянием небеснаго света озаренный.
Радуйся, обилием любве твоея вся удививый; радуйся, и врагом твоим благое упокоение у себе устроявый.
Радуйся, крепость державы твоея тем созидавый; радуйся, наследником твоим присное научение.
Радуйся, гроб твой, аки краеугольный камень, граду Москве положивый; радуйся, яко молитва твоя о людех и по смерти не оскудевает.
Радуйся, преподобне княже Данииле, Московский чудотворче.
Кондак 9
Вси небеснии чини и святых собори радостно тя прияша, богомудре, подвиг земнаго течения своего добре совершивша и к вечному животу пресельшася, идеже с ними поеши: Аллилуиа.
Икос 9
Витий человеческих уста не возмогут изрещи пречуднаго прославления памяти твоея, угодниче Божий, егда бо гроба твоего место забвению предадеся, сам яве предстал еси юноше благочестивому, господина месту тому себе нарицая, и князя Иоанна обличая, и глаголя: «Чесо ради предал мя еси забвению? Аще же и забвен аз тобою, не забы мя Господь». Мы же, явление Твое благоговейно почитающе, сице вопием:
Радуйся, града нашего Москвы Богом данный покровителю; радуйся, обители твоея неусыпный хранителю.
Радуйся, яко и по успении твоем нас не оставляеши; радуйся, яко милосердие Божие о гресех наших умоляеши.
Радуйся, мзду трудов твоих восприявый; радуйся, небесною славою душу твою осиявый.
Радуйся, наследников твоих добрый учителю; радуйся, к добродетели твердый тем наставниче.
Радуйся, всем людем благий пред Богом предстателю; радуйся, молитвы их к престолу Его возносяй.
Радуйся, преподобне княже Данииле, Московский чудотворче.
Кондак 10
Спастися всем хотяй Господь вельможу некоего, гроб твой, святе, поправша, недугом порази, обаче согрешение свое познавша и прощение от тебе приемша помилова, да и мы вси, достойно почитающе тя, благодарно вопием: Аллилуиа.
Икос 10
Стену необоримую и забрало крепкое граду Москве и всей державе Российстей Господь дарова тя, блаженне, верным в скорбех и нуждах пребыстрое заступление, да зовем ти сице:
Радуйся, призывающим тя во благое скорый помощниче; радуйся, чистоты душевныя и телесныя сокровище.
Радуйся, душевных и телесных недугов целителю; радуйся, державы нашея утверждение.
Радуйся, Церкве Российския украшение; радуйся, яко отец чадолюбивый, чада твоя назираяй.
Радуйся, яко воевода непобедимый пределы земли нашея ограждаяй; радуйся, небрегущия о святыне страхом вразумляяй.
Радуйся, яко кающимся скорое прощение испрошаеши; радуйся, яко благим подвигом тех научаеши.
Радуйся, преподобне княже Данииле, Московский чудотворче.
Кондак 11
Пение всеумиленное приими от нас, прехвальне, и молитвы, приносимыя тебе, не презри: к тебе бо в скорбех прибегаем и пред гробом твоим слезы проливаем, зовуще: Аллилуиа.
Икос 11
Светозарна светильника благодати яви тебе всех Творец, силою бо, данною ти свыше, юношу при гробе твоем от одра смерти возставил еси. Сего ради ублажаем тя сице:
Радуйся, милостивый скорбящим помощниче; радуйся, сосуде, Святаго Духа исполненный.
Радуйся, дарами Того обогащенный; радуйся, сими дарами и молящихся тебе обогащаяй.
Радуйся, ко Святей Троице дерзновение велие стяжавый; радуйся, дерзновение сие на помощь людем направляяй.
Радуйся, силу чудес от Бога приявый; радуйся, за грешныя Господа умоляяй.
Радуйся, любве и кротости Христовы вместилище; радуйся, безпомощных скорый помощниче.
Радуйся, преподобне княже Данииле, Московский чудотворче.
Кондак 12
Благодатию, данною ти свыше, недуги исцеляеши, враги и супостаты от нас отгоняеши, жизнь нашу умиряеши и душам нашим полезная подаеши, да благодарственно взываем Богу: Аллилуиа.
Икос 12
Поем честныя подвиги твоя, ублажаем чистое житие твое, восхваляем священную память твою, Данииле благоверне, и, прославляюще Господа всех, вопием ти сице:
Радуйся, яко крест богоугоднаго жития до конца понесл еси; радуйся, яко о скорбех твоих Бога благодарил еси.
Радуйся, всяку добродетель в себе изобразивый; радуйся, иго Христово возлюбивый.
Радуйся, немощи немощных на себе носивый; радуйся, благоволение Божие людем твоим испросивый.
Радуйся, присно на Небеси торжествуяй; радуйся, на земли преславно чудодействуяй.
Радуйся, людем твоим помощниче богодарованный; радуйся, ангелом собеседниче достойный.
Радуйся, преподобне княже Данииле, Московский чудотворче.
Кондак 13
О преславный угодниче Христов и чудотворче, преподобне княже Данииле, отрадо и утешение всех с верою к тебе прибегающих! Приими от нас, недостойных, сие малое моление, с любовию тебе приносимое, и теплым ходатайством твоим ко Господу огради святую обитель твою, умири жизнь нашу и даруй нам покаяние совершенное, избави нас от бед и вечныя муки, да купно с тобою благодарственно вопием: Аллилуиа.
Этот кондак читается трижды, затем 1-й икос «Ангелов Творец …» и 1-й кондак «Избранный чудотворче …».
Молитва первая
Церкве Христовы похвало высокая, града Москвы стено необоримая, державы Российския Божественное утверждение, преподобне Данииле. К раце мощей твоих притекающе, усердно молим тя: призри на нас, память твою воспевающих и с верою под кров молитв твоих прибегающих. Пролей теплое твое ходатайство ко Спасу всех, яко да утвердит миром страну нашу, грады и веси ея и обитель сию добре да сохранит, благочестие и любовь в людех твоих насаждая, злобу же, междоусобие и нравов развращение искореняя; всем же нам вся благая ко временному животу и вечному спасению даруй молитвами твоими, яко да прославляем дивнаго во святых Своих Христа Бога нашего во веки веков. Аминь.
Молитва вторая
О угодниче Божий, святый благоверный княже Данииле, сада Христова благовонный цвете, неба церковнаго кроткая звездо, земли нашея небесный уме, града Москвы и державы нашея мудрый здателю. Теплый к Богу молитвенниче, скорый в помощи, милостивый в нуждах, к тебе припадаем и тебе молимся: буди предстатель наш пред Престолом Божией славы неусыпный. Собери нас друг ко другу, да печали ближняго своего кийждо любовию нелицемерною приобщается. Онебеси ум наш, да, иго тяжкое земных попечений отвергше, бремя легкое Христова Евангелия возлюбим. Открый очи наши, да узрим нетленную красоту Господню и да не отчуждени будем жизни Божией. Тихость Духа Божия да соблюдет сердце наше. Весна покаяния да украсит дела наша.
Княже милостивый и щедрый, сохрани страну нашу, град твой и зде молящихся тебе от всякия напасти, от враг видимых и невидимых, от губительства и глада, от междоусобныя распри и внезапныя смерти. Отверзи нам двери милосердия Божия и избави нас от всякаго зла. Под крепкий покров благостыни твоея прибегающе, молим: буди нам тихое пристанище в скорбех. Остени нас молитвами твоими. Соблюди нас от падений греховных и заблуждений, да сердцем сокрушенным, духом смиренным в печали и радости выну зовем: Господи, предстательством преподобнаго Твоего помилуй нас. Аминь.
Кондак 1
Избранный угодниче Христов и чудотворче, преподобный отче Александре, возсиявый мирови, яко звезда богосветлая, жития твоего добротою и множеством чудотворений, восхваляем тя любовию в песнех духовных: ты же, яко имеяй дерзновение ко Господу, молитвами твоими от всяких нас бед свободи, да зовем ти: Радуйся, преподобне Александре, Свирский чудотворче.
Икос 1
Ангельский нрав имел еси, отче преподобне, и яко безплотный, непорочно житие совершил еси на земли, дивный образ совершенства духовнаго нам оставив, да подражаем добродетелем твоим, и зовем ти сице: Радуйся, благочестивых родителей плод богодарованный. Радуйся, неплодие рождших тя разрешивый. Радуйся, сетование их на радость преложивый. Радуйся, от пелен Богом избранный. Радуйся, от утробы матерния на службу Ему предуставленный. Радуйся, от юности Его Единаго всем сердцем возлюбивый. Радуйся, вся красная мира сего ни во что же вменивый. Радуйся, постом и бдением молитвенным плоть твою удручивый. Радуйся, непорочный сосуде Божия благодати. Радуйся, жилище Духа Святаго, украшенное чистотою. Радуйся, мужу желаний духовных. Радуйся, главо, освященная десницею Всевышняго. Радуйся, преподобне Александре, Свирский чудотворче.
Кондак 2
Видя Господь душу твою, яко ниву благовозделанную к плодоносию духовному, от юности к исканию единаго на потребу направи твой помысл, преподобне, темже любве ради Христовы, родителей твоих и дом отеческий оставил еси, всякаго пристрастия суетнаго свободився, притекл еси в пустынную обитель Валаамскую на подвиги иноческия, зовый спасающему тя Богу: Аллилуиа.
Икос 2
Разумом богопросвещенным постигл еси суету мира сего и непостоянство, в немже радость сменяется скорбию, благополучие наветуется нечаянными бедами. Темже вечных нетленных благ возжелел еси, отче преподобне, и сия взыскати потщался еси отречением мирских благ и вольною нищетою, подвигая нас звати тебе: Радуйся, пустыннаго безмолвия любителю. Радуйся, смирения и нестяжания рачителю. Радуйся, истиннаго самоотвержения совершенный образе. Радуйся, иноческаго равноангельскаго жития всеизрядное явление. Радуйся, правило веры и благочестия. Радуйся, зерцало терпеливаго послушания. Радуйся, безмолвие иноческое возлюбивый. Радуйся, слезы духовныя стяжавый. Радуйся, плачем временным блаженство вечное снискавый. Радуйся, молитвами непрестанными прилоги вражия сокрушивый. Радуйся, бдением и труды плоть твою духови покоривый. Радуйся, постом и воздержанием страсти укротивый. Радуйся, преподобне Александре, Свирский чудотворче.
Кондак 3
Силою Всевышняго осененный и укрепляемый, в иночестем пострижении власов главы твоея, все плотское мудрование отложил еси, преподобне, и яко воин благоискусный, схиму иноческую в броню спасения стяжав, и непобедимым оружием Креста Христова вооружився, крепко ратовал еси противу врага невидимаго – диавола, смирением глубоким побеждая его вознесенную гордыню, и выну вопия ко Господу: Аллилуиа.
Икос 3
Имея слез источник изобильный, угодниче Божий, и умиления велию благодать, хлеб твой слезами орошал еси, и питие плачем растворял, от преизбытка желания Божественнаго и любве ко Господу. Темже и мы ублажаем тя звании сими: Радуйся, крепости и мужества тезоименитый подвижниче. Радуйся, ангелоподобный человече. Радуйся, Царя Небеснаго воине добропобедный. Радуйся, валаамския обители плоде добрый. Радуйся, пустынножителю благоприятный. Радуйся, молитвенниче неусыпающий. Радуйся, постниче изрядный. Радуйся, безмолвниче дивный. Радуйся, подвигом древних богоносных отцев последователю. Радуйся, их терпению и трудом подражателю. Радуйся, благовременно могилу себе ископавый. Радуйся, о смертнем часе непрестанно помышлявый. Радуйся, преподобне Александре, Свирский чудотворче
Кондак 4
Буря искушений и устремлений диавольских не возможе поколебати храмины твоея душевныя, преподобне отче, основана бо бе на твердем камени веры во Христа, и хранима трезвением и молитвами непрестанными, имиже выну противоборствовал еси врагу спасения человеческаго, и непреткновенно восходил еси по стезем добродетелей к совершенству духовному в меру возраста Христова, воспевая Богу: Аллилуиа.
Икос 4
Слышав похваляема себе от человек, убоялся еси превозношения суетнаго, отче богомудре, и яко истинный смирения образ, умыслил еси убежати в пустыню неизведанную, на реку Свирь, на место свыше тебе указанное в видении чудном, да тамо и невозбранно единому Богу поработаеши, идеже мы сретаем тя благохвалении сими: Радуйся, смирившагося до рабия зрака Христа Господа благий последователю. Радуйся, святых Его заповедий усердный исполнителю. Радуйся, девственниче душею и телом. Радуйся, трудолюбче нелицемерный. Радуйся, презревый славу человеческую суетную. Радуйся, сокрушивый сети тщеславия и гордыни. Радуйся, поправый высокоумия душевредную прелесть. Радуйся, усвоивый себе святое смирение Христово. Радуйся, исполнивый вся обеты иночества. Радуйся, украсивыйся дарами благодати Божия. Радуйся, по благодати приемый власть на духи нечистыя. Радуйся, ни во что же вменивый тех устрашения и привидения. Радуйся, преподобне Александре, Свирский чудотворче.
Кондак 5
Светозарный луч озари в нощней темноте место пустынное, на немже вселитися пришел еси, преподобне, знаменуя собою светлость души твоея, и пламенеющее любовию ко Господу сердце твое, идеже благоприятно бысть Творцу твое произволение работати Ему в преподобии и святости, и пети Ему тамо хвалебную песнь: Аллилуиа.
Икос 5
Видевше ангельстии чинове равноангельское житие твое отче богоблаженне, смирения твоего глубину, молитвы неотступность, воздержания твердость и велию ревность духа твоего о чистоте, удивишася и прославиша человеколюбца Бога, укрепляющаго немощное естество человеческое. Мы же ублажаем тя и зовем: Радуйся, светилниче пустынный, просветивый страну корельскую сиянием твоих добродетелей. Радуйся, монашествующих дивное украшение. Радуйся, крине благоуханный пустыннаго прозябения. Радуйся, древо благоплодное небеснаго насаждения. Радуйся, возлюбивый благолепие дому Божия. Радуйся, в самем себе храм Триипостасному Божеству уготовивый. Радуйся, преподобием и правдою одеянный. Радуйся, союзом добродетелей удобренный. Радуйся, помазание приемый от Святаго Духа. Радуйся, освященный сосуде благодати Божия. Радуйся, рабе Христов, благий и верный. Радуйся, слуго Господень истинный. Радуйся, преподобне Александре, Свирский чудотворче.
Кондак 6
Проповедник подвигов твоих в пустыни Свирстей явился ловец зверей дивиих, иже гнав еленя в дубраве непроходимей, смотрением Божиим обрете храмину твою, преподобне отче: видев же тя во плоти ангела, знамение благодатнаго озарения на лице своем носяща, страха и радости исполнися и припад к честным твоим стопам, во умилении сердца возопи Зиждителю Богу: Аллилуиа.
Икос 6
Возсиял еси в пустыни Свирстей богосветлое светило, и на спасения стезю наставил еси многи души человеческия: яви бо тя Христос наставника и учителя иноком пустыннолюбивым, иже стекахуся к тебе, яко овцы к пастырю, могущу упасти их на пажити живоносней. Темже, яко сотворившаго и научившаго, чествуем тя сими похвальными словесы: Радуйся, источниче богодухновенных учений. Радуйся, хранилище изобильнаго умиления. Радуйся, одушевленныя скрижали закона Господня. Радуйся, немолчный проповедниче Евангелия Христова. Радуйся, заповеди Господни исполнивый, и оным научивый учеников твоих. Радуйся, ленивых подвигнувый к исправлению твоими Христоподражательными нравы. Радуйся, немощных укрепивый данною ти от Господа благодатию. Радуйся, скорбящих утешивый сладостию твоих словес. Радуйся, грешных к покаянию направивый. Радуйся, юныя уцеломудривый. Радуйся, сострадания исполненный. Радуйся, в милости богатый. Радуйся, преподобне Александре, Свирский чудотворче.
Кондак 7
Хотя Человеколюбец Господь прославити место подвигов твоих, отче, посла Ангела своего благовестити тебе, яко будет на месте том обитель иноком во спасение, и в ней храм во имя Святыя Троицы. Ты же явлением безплотнаго просвещен, с радостным трепетом внимал еси благовестию небесному, зовый в смирении духа Владыце Ангелов и человеков: Аллилуиа.
Икос 7
Новое знамение благоволения Божия даровася тебе, преподобне, егда безмолвствующу ти в избранней пустыни, в нощи свет велий облиста тя, и три мужа в одеждах светлых предсташа пред тобою, мир тебе дарующе и повелевающе, да устроиши тамо обитель иноческую, и в ней храм во имя Святыя Троицы. Дивяся убо сему пречудному в триех ангельских лицех Троическому явлению, зовем ти: Радуйся, таинниче Пресвятыя и Единосущныя Троицы. Радуйся, самовидче неизреченнаго Божия явления. Радуйся, собеседниче светоносных ангельских сил. Радуйся, созерцателю лучезарнаго Божественнаго видения. Радуйся, причастниче огнезрачнаго трисолнечнаго сияния. Радуйся, поклонниче Триипостаснаго Божества. Радуйся, в смертнем телеси, безсмертия зарею просвещенный. Радуйся, на земли небеснаго посещения удостоенный. Радуйся, смирением высокая стяжавый. Радуйся, нищетою богатую милость Господню улучивый. Радуйся, сеявый слезами радость присносущную. Радуйся, приемый исполнение обетований непреложных. Радуйся, преподобне Александре, Свирский чудотворче.
Кондак 8
Страннолепно явился ти на воздусе Ангел Господень в мантии и куколи иночестем, указуяй место, на немже храм во имя Живоначальныя Троицы имел еси создати в пустыни Свирстей, преподобне отче, егоже Божиим поспешением совершив и освятив, со ученики твоими немолчныя хвалы возсылал еси в нем Господеви, зовый: Аллилуиа.
Икос 8
Всего себе предав воле Господней, учениками твоими умоленный, священства благодать восприяти не уклонился еси, отче, аще и тужаше дух твой, ужасаяся высоты сея, но послушание явил еси духовным чадом твоим, подвизая их согласно звати тебе: Радуйся, безкровныя жертвы достойный совершителю. Радуйся, олтаря Господня благоговейный служителю. Радуйся, преподобныя руце твои со многим дерзновением ко Господу воздеявый. Радуйся, молитвы теплейшия от сердца чиста к престолу Вседержителя возносивый. Радуйся, образ благочестия бывый твоим учеником. Радуйся, мастию священства умащенная главо. Радуйся, вождю благоискусный воинов духовных. Радуйся, отче благомудрый общежития иноческаго. Радуйся, свеще, в молитве к Богу возжженная. Радуйся, звездо ко спасению путь верный показующая. Радуйся, маслино, елей милости Божия источившая. Радуйся, чаше, жаждущих учения спасительнаго напоившая. Радуйся, преподобне Александре, Свирский чудотворче.
Кондак 9
Вси иноцы обители твоея в радостный трепет приидоша, егда устремление потока воднаго, на святую обитель твою движущееся, молитвою твоею укротил еси, и призыванием всесильнаго имене Иисус Христова, бурному потоку тещи безвредно устроил еси на благую потребу иночествующих, еже видевше духовная чада твоя всеумиленно возгласиша купно с тобою Богу: Аллилуиа.
Икос 9
Ветийство человеческое не довлеет изрещи обилие радости духовныя, еюже преисполнился еси, отче богоносне, егда во время молитвы твоея нощныя, явися ти Пресвятая Богородица с ликом чинов ангельских и обетовании непреложными душу твою возвесели, яко присная заступница обители твоея будет, снабдевающи и покрывающи ю по вся дни. Темже и мы сия радостныя тебе приносим глаголы: Радуйся, благоволением Богоматере осененный. Радуйся, посещением Царицы небесе и земли утешенный. Радуйся, слышавый милостивыя от уст Ея глаголы. Радуйся, приемый обетование крепкаго Ея обители заступления. Радуйся, любимиче Ея преискренний. Радуйся, избранниче Сына Ея и Бога. Радуйся, даром чудотворения облагодатствованный. Радуйся, будущая, яко настоящая провидевый. Радуйся, рыбарем ловитву чудесно умноживый. Радуйся, неплодным родителем чадородие даровавый. Радуйся, болящия здравы возставивый. Радуйся, тайная согрешения человеческая обличивый. Радуйся, преподобне Александре, Свирский чудотворче.
Кондак 10
Спасти хотя души ученик твоих, отечески назидал еси их, богомудре, оваго словом, оваго примером жития твоего, с кротостию обличая, с любовию увещавая их преуспевати в благочестии и чистоте: наипаче же пред кончиною твоею, вся ко спасению душевному благопотребная заповедал еси им, и научил еси их в молитвах бодрствовати и немолчно пети Богу: Аллилуиа.
Икос 10
Стена заступления быша молитвы твоя чудотворче святый, всем с верою к тебе притекающим во всякой скорби, ибо чистоты ради твоея сердечныя сила духовная от Бога тебе даровася, болящих изцеляти, бедствующим помогати, будущая прорицати, яко славити ближним и дальным величия Божия, в тебе явленная, и звати тебе сице: Радуйся, врачу немздоприемный недугов человеческих. Радуйся, не токмо телесных, но и душевных болезней изрядный целителю. Радуйся, слепым прозрение даровавый. Радуйся, сляченных и увечных здравы сотворивый. Радуйся, бесных от диавольскаго удручения свободивый. Радуйся, изступленным ум здравый возвративый. Радуйся, покрытых струпами уврачевавый. Радуйся, печальных утешивый. Радуйся, бедствующим на помощь ускоривый. Радуйся, плененным и в темнице седящим ослабу и свободу явлением твоим даровавый. Радуйся, преподобне Александре, Свирский чудотворче.
Кондак 11
Пение всеумиленное принесл еси Пресвятей Троице во время кончины твоея, преподобне, и молитве сущей на устех твоих предал еси святую душу твою в руце Живаго Бога, Егоже от юности возлюбил еси, и Емуже до старости маститыя работал еси нелицемерно, темже со упованием благим радостно прешел еси к обителем небесным, со ангельскими лики пети Триипостасному Богу: Аллилуиа.
Икос 11
Мирную кончину твою видевше твои ученицы, великий угодниче Божий, скорбь разлучения с тобою утешением благодатным раствориша, в уповании всесильнаго предстательства твоего горе у престола Божия, идеже слышиши с любовию тебе зовущих: Радуйся, венец безсмертныя жизни приемый от руки Вседержителя. Радуйся, ликовствуяй в чертозе Небеснаго Домовладыки. Радуйся, откровенным лицем созерцаяй славу Трисияннаго Божества. Радуйся, со старцы белоризными покланяяйся Творцу. Радуйся, наследниче всесветлаго Царствия Христова. Радуйся, гражданине Иерусалима Горняго. Радуйся, небеснаго Сиона жителю. Радуйся, нерукотворенных скиний райских обитателю. Радуйся, по трудех временныя жизни, покой вечный получивый. Радуйся, блаженство, от века праведным уготованное, праведно восприявый. Радуйся, лучами невечерняго света свыше осиянный. Радуйся, долу величием чудес блистаяй. Радуйся, преподобне Александре, Свирский чудотворче.
Кондак 12
Благодати причастна явися священная рака, содержащая многоцелебныя мощи твоя, чудотворче святый, ихже по летех мнозех яви Господь в недрах земных нетленными, изцеления неоскудно источающия, и всяк недуг врачующия силою Бога, дивнаго во святых Своих, дивно прославльшаго тя на небеси и на земли, Емуже воспеваем: Аллилуиа.
Икос 12
Поюще радостную песнь хвалы и благодарения Человеколюбцу Богу, прославльшему тя в стране российстей чудотворца дивнаго и милостиваго, молим тя преподобне отче наш: буди ходатай к Нему и молитвенник присный о нас зовущих ти: Радуйся, заступниче рода христианскаго. Радуйся, сокровищнице даров многоразличных. Радуйся, покрове, Богом зданный Радуйся, от Бога благодать изцелений восприявый. Радуйся, цвете нетления, облагоухавый святую Церковь. Радуйся, заре безсмертия, от гроба преславно возсиявшая. Радуйся, щедрот и милования струе неизсякаемая. Радуйся, благоутробия источниче неоскудеваемый. Радуйся, любве и сострадания явление многочудесное. Радуйся, телес наших богодарованное врачевание. Радуйся, о душах наших благоприятное предстательство. Радуйся, преподобне Александре, Свирский чудотворче.
Кондак 13
О великий и преславный чудотворче, преподобне отче наш Александре! Милостивно приими сие малое моление наше, и молитвами твоими сохрани нас от недугов душевных и телесных в жизни сей, и от грядущих мучений вечных избави, и сподоби нас вкупе с тобою во Царствии Небеснем выну пети Богу: Аллилуиа.
Кондак сей глаголется трижды, также икос 1-ый и кондак 1-ый.
Молитва
О священная главо, Ангеле земный и человече Небесный, преподобне и Богоносне отче наш Александре, изрядный угодниче Пресвятыя и Единосущныя Троицы, являяй многия милости живущим во святей обители твоей и всем с верою и любовию притекающим к тебе! Испроси нам вся благопотребная к житию сему временному и нужная к вечному спасению нашему. Пособствуй и предстательством твоим, угодниче Божий, на враги видимыя и невидимыя, да в мире глубоце пребудет Святая Православная Церковь Христова и благостроении зиждется, во всяком благочестии нерушимо. Буди всем нам, чудотворче святый, помощник скорый во всякой скорби и обстоянии. Наипаче же в час кончины нашея явися нам заступник благосердый, да не предани будем на мытарствех воздушных власти злобнаго миродержца, но да сподобимся непреткновеннаго восхода в Царствие Небесное. Ей, отче, молитвенниче наш присный! Не посрами упования нашего, не презри смиренная моления наша и предстательствуй за нас пред Престолом Живоначальныя Троицы, да сподобимся вкупе с тобою и со всеми святыми мы, недостойнии, в селениях райских славити величие, благодать и милость Единаго в Троице Бога, Отца, и Сына, и Святаго Духа, во веки веков. Аминь.
Молитва преподобнаго Александра Свирскаго Господу Богу и Пресвятей Богородице.
Боже, очисти мя, грешнаго, и помилуй мя, и прости ми, Господи Боже, Спасе Милостивый! Даждь ми, Господи, христианский конец с Пречистым Телом и с Честною Кровию, со слезами и покаянием. Избави, Господи, муки вечныя, огня негасимаго, и червия неусыпающаго, и смолы кипящия. Господи, Ты создал мя еси, Господи, Ты помилуй. Господи, Твое есмь создание.
Пречистая Госпоже Милостивая, Царице Небесная, помолися Господу Богу и Спасу нашему Иисусу Христу, Сыну Твоему, за мене, грешнаго раба Твоего (имя рек). Даждь ми, Госпоже, христианский конец с Пречистым Телом и с Честною Кровию и со слезами и покаянием. Избави, Госпоже, муки вечныя, огня неугасимаго, и червия неусыпающаго, и смолы кипящия. Пречистая Госпоже, Милостивая Царице Небесная, Ты еси Молебница ко Господу Богу и Спасу нашему Иисусу Христу за мене, грешнаго и окаяннаго раба Твоего (имя рек), Ты еси Помощница, Ты Заступница от всякаго зла и сопостата, не забуди, Пречистая Госпоже, нищаго Твоего до конца.
Посем:
Заступнице Усердная, Благоутробная Господа Мати, к Тебе прибегаю аз, окаянный и паче всех человек грешнейший. Вонми гласу моления моего и вопль мой и стенание услыши. Яко беззакония моя превзыдоша главу мою и аз, якоже корабль в пучине, погружаюся в море грехов моих. Но Ты, Всеблагая и Милосердая Владычице, не презри мене, отчаяннаго и во гресех погибающаго. Помилуй мя, кающагося в злых делех моих, и обрати на путь правый заблуждшую окаянную душу мою. На Тебе, Владычице моя Богородице, возлагаю все упование мое. Ты, Мати Божия, сохрани и соблюди мя под кровом Твоим ныне, и присно, и во веки веков. Аминь.
Таже молитва по вся дни.
Душе, душе моя, почто жалуешися на Господа? Яко леность твоя вечней муце ходатай есть. Аще бы ведала дар Божий, плакала бы ся горящими слезами, стенающи со воздыханием, скорбящи о всяком гресе, о малем и о велицем. Возопий ко Своему Владыце, да не предварит тебе ярость одержащаго всесильною рукою праведною. Аз же, грешный и ленивый и льстивый язык имеяй, како помолюся Владыце моему, да избавит мя Господь от Страшнаго Суда? Всегда бо трепещу помыслом в сердцы моем о Страшнем Суде, да избавит мя от муки вечныя, и червия неусыпающаго, и тьмы кромешныя, и от грозы несогреемыя. Помилуй мя, грешнаго раба Твоего (имя рек), яко Павла апостола, егоже любляше паче всех, и от нас, убогих, не отврати лица Твоего во он День Страшный, егоже трепещет душа моя и составы тела моего ужасаются. Господи, избави мя страшнаго часа, да не отпаду от милости Твоей. Но молю святыя Ангелы и Архангелы, и пророки, и мученики, и вся святыя, да молят Бога за мою душу. Вашего ради моления да возвратит Владыка требы Своя от мене, грешнаго. И ты, Пречистая Госпоже Дево, имущи дерзновение к Сыну о рабех Твоих, не забуди трудов раба Твоего (имя рек). Владыко Спасе, от убогия души Тебе молюся, избави мя от печали грехов моих и введи в радость безконечнаго жития, идеже прославляется всесвятое Имя Твое, Отца и Сына и Святаго Духа, всегда, ныне, и присно, и во веки веков. Аминь.