Молитвы - 17 сентября 2025
О святителю Христов Иоасафе, чудотворче Белоградский! Веруем, грешнии и недостойнии, яко очи Господни на праведных и уши Его на молитву их, и того ради к молитвам твоим прибегаем и ходатайства твоего за нас просим, по глаголу апостольскому уповающе, яко любы твоя николиже отпадает. Во гресех и болезнех наших льну курящемуся и трости сокрушенней уподобихомся, и, аще живем, милостию Бога живем и за молитвы праведников Его. Преклони убо и ты, отче праведне, сердце твое к молению нашему, и предстательством твоим даждь роду христианскому от Господа мир и благословение. Православие укрепи, нападения же лукавнующих и беззаконных на Церковь Божию отжени. Умоли Отца Небеснаго избавитися нам от нашествия вражескаго, от междоусобий же и смятений народных, от губительных поветрий и смертоносныя язвы, от глада, огня и потопа и иных бед и обстояний. Испроси у Христа Бога душам нашим крепость и телесем нашим потребное здравие, болезнем же исцеление: хромым хождение, слепым прозрение, разслабленным утверждение, печальным утешение и от всех скорбей избавление. Отпадшия же лозы Христовы ветви паки с тою соедини, еяже и сам причастник быти сподобился еси, да тако прославится тобою пречестное и великолепое имя Бога нашего, Отца и Сына и Святаго Духа, ныне и присно и во веки веков. Аминь.
О великий святителю наш и чудотворче предивный Иоасафе, скорый помощниче к тебе припадающим! Милостиво призри на нас недостойных, со слезами умиления зде молящихся и благодарение тебе по силе приносящих. Благодарим тя, угодниче Христов, яко услышал еси моления нас недостойных и просимая нам изобильно даровал еси. Вемы и усты исповедуем, яко воистину Христу теплый о нас еси молитвенник и, по данной ти благодати и дару, во спасение всем нам потребная даруеши: болящия исцеляеши, страждущия утешаеши, мир и отраду скорбным сердцам изливаеши, плачущая радоватися твориши, печальныя ликовати содеваеши: родителем чада воздравляеши, супругом подружия от одра смертного возставляеши, враждующия умиротворяеши, завистливыя твориши милостивы и всякия неправды караеши, якоже и в житии твоем правды и милосердия мужественный ревнитель был еси. Благодарим тя, святителю, за великая твоя и нам явленная благодеяния и смиренно молимся тебе мы недостойнии: предстательствуй за нас у престола Христова и помози нам память присную твоих благодеяний и щедрот на нас излиянных хранити, да во смирении сердца прочее совершим житие и Небесное да наследуем селение Божественное молитвами твоими во веки веков. Аминь.
О великий угодниче Христов, святителю отче наш Иоасафе, скорый помощниче и дивный чудотворче! Призри милостивно на ны, недугующия. Вемы, угодниче Христов, вемы, и усты и сердцем исповедуем, яко по делом нашим беды постигоша нас. С разбойником благоразумным исповедуем Господеви, яко достойная по делом нашим восприемлем и злая сия якоже раби неключимии терпим. Сими бо временными мученьми Господь милосердный сокрушает гордыню и жестоковыйное сердце наше, да вечныя избежим казни, грешником уготованныя: сеяхом бо семена жития своевольного и жнем терния скорбей. Обаче, немощни суща, но в покаяние теплое пришедше, о сем молитися дерзаем, да гнев Господень на милость к нам преложится, и тебе, святителю Божий и чудотворче, усердно просим: пролей теплую молитву твою ко Христу Господу нашему, Емуже днесь предстоиши и молишися, о почитающих тя с любовию и смирением на твое престательство уповаем. Се бо в житии твоем, святителю Христов, ни единаго же скорбяща и милости твоея просяща, грехи же своя исповедающа, николиже презрел еси. Умоли праведнаго Судию, да преложит гнев правды Своея на милование наше. Благодатию Его, тебе данною, святителю милосердый, уврачуй наша немощи, болезней лютых течения устави, смерти отыти повели и на покаяние силу нам даруй. Старость поддержи, младенцы воспитай, юность уцеломудри, супружества в чистоте и смирении утверди, нам же всем послушание трудолюбное и мирное жительство молитвою твоею даруй, да терпением течем на предлежащий нам подвиг жития сего временнаго, взирающе на Начальника веры и Совершителя Господа Иисуса, Емуже слава во веки веков. Аминь.
О преславный угодниче Божий, преподобномучениче Парфение, услыши моление нас грешных, добродетельное житие, труды и страдания твоя мученическия почитающих, и теплым твоим предстательством умоли Господа Бога, да оградит Церковь Свою святую от ересей и расколов, да подаст крепость и мудрость верным чадом ея, да низпослет мир на грады и веси наша и избавит нас от нашествия агарянскаго, междоусобныя брани и всяких раздоров и нестроений. Ты, устроитель добрый Кизилташския киновии быв, подаждь и нам доброе устроение, умудряя нас ходити пред Богом в благочестии и чистоте, да сподобимся христианский кончины живота нашего и жизни вечныя в Царстве Господа нашего Иисуса Христа, Емуже подобает со Отцем и Святым Духом слава, честь и поклонение во веки веков. Аминь.
Великий и празднственный день сей, день твоего на земли прославления, святителю отче наш Иоасафе, земли нашея славо и радование великое, приими сия смиренная и теплая моления наша. Днесь зрим исполнившийся глагол Господень: прославляющия Мя прославлю. Се бо во дни земнаго жития твоего ничтоже искал еси, точию же волю Божию исполняти и чада паствы твоея управити во спасение, и того ради многия труды, скорби, болезни, путешествия подъял еси. По скончании же твоем прослави тя милосердый Господь, телеси твоему нетление и силы целебныя даровавый; темже токи исцелений молящимся источил еси и призывающим тя недугующим и скорбящим многажды являлся еси, и утешение и цельбу скорую тем подавая. Сего ради, якоже избранника Божественныя благодати тя ведущи, Церковь Христова прославите тя якоже новаго чудотворца земли нашея сподобися. Благослови убо и помилуй, архиерею истиннаго Бога, люди православныя. Даруй им утешение сердца, отраду и мир и радость присную о Господе. Сохрани в мире державу Российскую и люди ея во истине утверди, воином мужество непоколебимое даруй и вся люди безпечальны сохрани. Изжени всякую крамолу и крамольных человек лукавая разруши советования, паче же тех самых в покаяние приведи. Пастырем и архиреем подаждь премудрость, чистоту и праведное житие, якоже и сам сими украшался еси. Младенцем воспитание благое даждь, юныя научи, болящим и скорбящим здравие испроси. Сущим во трудех терпение и упование посли, богатым смиренномудрие и ко ближним милосердие даруй. Нам же всем радость о Господе присную подаждь, да вси благодарне тя ублажаем, глаголюще тако: величаем тя, святителю отче Иоасафе, и чтим святую память твою, ты бо молиши за нас Христа Бога нашего.
О, святителю Христов, отче Антоние, светило преславное земли Воронежския! Скорый помошниче всем с верою к тебе притекающим, услыши ныне наш вопль сердечный, к тебе возносимый. Исходатайствуй нам вечное спасение и прощение множества грехов наших. Молися прилежно, да помиловани будем, и Царствия Небеснаго наследницы явимся. Таже и в многоразличных скорбех и нуждах наших помози нам: болящия исцели, обидимыя защити, печальныя возвесели, о Державе Российстей и людех ея молитву теплую сотвори. Егда же приблизится время скончания земнаго жития нашего, моли, да не без покаяния и причащения Святых Христовых Таин отыдем, да неосужденно предстанем Царю Славы, грозному Судии всех и да сподобимся со всеми святыми славити Единаго Истиннаго Бога, Отца и Сына и Святаго Духа, во веки веков. Аминь.
О, чудотво́рче преди́вный, святи́телю о́тче Серафи́ме! Ты́, еще́ жи́в сы́й, ре́кл еси́ ве́рным: я́ко а́ще улучу́ дерзнове́ние у Го́спода, не оста́влю ва́с си́рых. Сего́ ра́ди, помина́юще глаго́лы твоя́ и дела́ милосе́рдия твоего́ в жи́зни вре́менней, любо́вию припа́даем и усе́рдно про́сим: моли́ся непреста́нно у Престо́ла Царя́ Сла́вы о все́х на́с, бли́жних и да́льних, при́сных и стра́нных, немощны́х и гре́шных, любо́вию почита́ющих тя́. Ты́ от младе́нства благода́тию Бо́жиею просвеще́н бы́л еси́, в ю́ности же у́м соверше́нный стяжа́в, ю́ноши и де́вы умудри́л еси́. Дости́гше же му́жеска во́зраста, усе́рдный де́латель Боже́ственных доброде́телей яви́лся еси́. Сего́ ра́ди утверди́ и на́с во благоугожде́нии Бо́гу и, я́ко па́стырь до́брый изря́дно е́же о́вцы Христо́вы упа́сл еси́, наста́ви на́с на пу́ть покая́ния. Я́ко свети́льник Све́та И́стиннаго просвети́ на́с и сохрани́ от заблужде́ний и собла́знов ми́ра сего́, и, я́ко чудотво́рец ди́вный, не преста́й явля́ти ми́лость свою́ все́м, с любо́вию притека́ющим к тебе́. Па́стырю до́брый, не оста́ви па́ству в земля́х Бо́лгарской и Ру́сской и и́нуде су́щей. Бу́ди ско́рый помо́щник призыва́ющим тя́ от все́х конце́в земли́, да просла́вится неизрече́нное милосе́рдие Пастыренача́льника и Го́спода на́шего Иису́са Христа́, при́сно прославля́емаго и спокланя́емаго со Безнача́льным Его́ Отце́м, и Всесвяты́м, и Благи́м, и Животворя́щим Его́ Ду́хом, ны́не и при́сно, и во ве́ки веко́в. Ами́нь.