Избра́ннии от челове́ческаго ро́да прароди́телие Христо́вы, ро́ждшии Преблагослове́нную Богоотрокови́цу, из Нея́же по пло́ти Сын Бо́жий роди́ся, святи́и и пра́веднии Богоотцы́ Иоаки́ме и А́нно! Я́ко иму́щии дерзнове́ние ве́лие ко Христу́ Бо́гу и вы́ну предстоя́щии Престо́лу Его́ небе́сному, Тому́ приле́жно моли́теся от бед нам избавитися, да вы́ну зове́м вам:
Ра́дуйтеся, святи́и и пра́веднии Богоотцы́ Иоаки́ме и А́нно.
А́нгел предста́тель по́слан бысть к вам от Бо́га, святи́и и пра́веднии Богоотцы́ Иоаки́ме и А́нно, егда́ о безпло́дии свое́м ов у́бо в пусты́ни, о́ва же в саду́ свое́м се́товасте, к Бо́гу моли́тву вознося́ще; и та́ко благове́стие ра́достное принесе́ безпло́тный, я́ко роди́ти и́мате Дщерь Преблагослове́нную, о Нейже возблагослови́тся весь род челове́ческий, с ни́мже и мы вам ра́достное прино́сим хвале́ние:
Ра́дуйтеся, ко́рене Дави́дова святопроцве́тшия ро́зги виногра́да живо́тнаго; ра́дуйтеся, ро́ждшии Дщерь, от всех родо́в Преблагослове́нную.
Ра́дуйтеся, вопло́щшагося Сы́на Бо́жия прароди́телие всечестни́и; ра́дуйтеся, та́инства, от ве́ка утае́ннаго, прояви́телие всеизря́днии.
Ра́дуйтеся, уте́хи Изра́илевы ближа́йшии по пло́ти сро́дницы; ра́дуйтеся, обетова́ннаго ми́ру Спаси́теля единокро́внии ю́жицы.
Ра́дуйтеся, святи́и и пра́веднии Богоотцы́ Иоаки́ме и А́нно.
Ви́дев себе́ святы́й Иоаки́м, во хра́ме Иерусали́мстем безпло́дия ра́ди от архиере́я уничиже́нна, зело́ опеча́лися, и в го́рести ду́ши своея́ в пусты́ню к свои́м стадо́м удали́ся, и та́мо со мно́гими слеза́ми те́пле ко Го́споду моля́шеся, да сподо́бит его́ отце́м своему́ ча́ду нарещи́ся, и та́ко к моли́тве же пост прилага́ше, и в сокруше́нии сердца́ Вседержи́телю Бо́гу взыва́ше: Аллилу́иа.
Си́лу го́рести му́жа своего́ свята́я А́нна уве́девши, в до́му свое́м седя́щи, го́рце пла́кася и моля́шеся ко Го́споду, да поноше́ние безпло́дия от нея́ оты́мет. Мы же, толи́кое терпе́ние пра́ведных помина́юще, воззо́вем:
Ра́дуйтеся, богоизбра́нная дво́ице, Еди́ному от Тро́ицы Ма́терь по пло́ти породи́вшая; ра́дуйтеся, Зижди́телю ва́шему Роди́тельницу непоро́чную произве́дшии.
Ра́дуйтеся, супру́зи благослове́ннии, Преблагослове́нную в жена́х Дщерь воспита́вшии; ра́дуйтеся, в безпло́дии ва́шем от Го́спода услы́шаннии.
Ра́дуйтеся, я́ко сле́зныя моли́твы ва́ша пронико́ша не́бо и во у́шию Бо́га Изра́илева достиго́ша; ра́дуйтеся, я́ко поноше́ние ва́ше вре́менное во сла́ву ве́чную на небеси́ и на земли́ измени́ся.
Ра́дуйтеся, святи́и и пра́веднии Богоотцы́ Иоаки́ме и А́нно.
Си́лою Бо́жиею преиспо́лнен, яви́ся А́нгел Госпо́день свято́му Иоаки́му в пусты́ни и рече́ ему́: «Услы́ша Бог моли́тву твою́ и изво́ли да́ти тебе́ благода́ть Свою́, се бо жена́ твоя́ А́нна зачне́т и породи́т тебе́ Дщерь, о Нейже всему́ ми́ру бу́дет ра́дость». Сия́ рек безпло́тный, повеле́ ему́ ко хра́му Иерусали́мскому па́ки отыдти́, иде́же он супру́гу свою́ моля́щуся обря́щет, с не́юже вку́пе да воспое́т та́мо хвале́бную песнь Бо́гу Изра́илеву: Аллилу́иа.
Иму́щи скорбь ве́лию в се́рдце свое́м А́нна свята́я и в вертогра́д до́ма своего́ вше́дши, ви́де гнездо́ пти́чье на дре́ве сооруже́но, птенцы́ ма́лыя в нем лежа́щия, а́бие моле́ния к моле́ниям прилага́ти потща́ся, да сподо́бит ю Госпо́дь ма́терь ча́ду быти. И се яви́ся ей а́нгел Госпо́день, глаго́ля: «Услы́шана есть моли́тва твоя́ и воздыха́ния твоя́ проидо́ша о́блаки, сле́зы же твоя́ пред Бо́га внидо́ша: се зачне́ши и роди́ши Дщерь Преблагослове́нную, о Нейже возблагословя́тся вся коле́на земна́я, и То́ю да́стся спасе́ние всему́ ми́ру, нарече́тся же и́мя Ей Мари́я». Таково́е а́нгельское всера́достное благове́щение помина́юще, воспои́м Богоотце́м такова́я:
Ра́дуйтеся, супру́зи пра́веднии, от Бо́га свы́ше предызбра́ннии; ра́дуйтеся, во всех за́поведех Госпо́дних без поро́ка ходи́вшии.
Ра́дуйтеся, в ско́рби ва́шей вре́менней утеше́ние ве́чное получи́вшии; ра́дуйтеся, па́че ча́яния ва́шего десни́цею Бо́жиею превознесе́ннии.
Ра́дуйтеся, я́ко во смире́нии ва́шем и ско́рби помяну́ вы Госпо́дь; ра́дуйтеся, я́ко сподо́бистеся прароди́телие Сы́ну Бо́жию быти.
Ра́дуйтеся, святи́и и пра́веднии Богоотцы́ Иоаки́ме и А́нно.
Бу́рею сомне́ния Иоаки́м пра́ведный содержи́мь и о благове́стии ему́ а́нгела недоумева́я, а́бие во град Иерусали́м оты́де, иде́же пред враты́ хра́ма святу́ю А́нну обре́те, Го́спода вельми́ славосло́вящую и ра́дость а́нгельскаго явле́ния и о ча́де прорече́ния ему́ возвеща́ющу, те́мже и о свое́м виде́нии супру́жнице благовести́в, вку́пе с не́ю возопи́ ко Го́споду: Аллилу́иа.
Слы́шавше сро́дницы и зна́емии о пресла́вном святы́я А́нны зача́тии, Бо́га Изра́илева сла́вляху, А́нна же богому́драя плод чре́ва своего́ на служе́ние Бо́гу обрече́, те́плое благодаре́ние Го́сподеви возноша́ше; мы же све́тло всесла́вное зача́тие Богоотрокови́цы Мари́и воспева́юще, Той святы́м роди́телем глаго́лем си́це:
Ра́дуйтеся, ра́достнии нам гряду́щаго в мир Искупи́теля провозве́стницы; ра́дуйтеся, при́сно помина́емии ча́емаго Спаси́теля пра́отцы.
Ра́дуйтеся, чрез Дщерь ва́шу благослове́нную Сло́ву Бо́жию плоть взаимода́вшии; ра́дуйтеся, Бо́га воплоще́нна Вну́ка себе́ нарица́ющии.
Ра́дуйтеся, ве́лией благоче́стия та́йны досто́йнии служи́телие; ра́дуйтеся, Бо́жия к челове́ком снисхожде́ния всеизря́днии посре́дницы.
Ра́дуйтеся, святи́и и пра́веднии Богоотцы́ Иоаки́ме и А́нно.
Богосве́тлую звезду́ я́вльшую Со́лнце Пра́вды Христа́ Бо́га, Пресвяту́ю Богоро́дицу, пло́тию роди́ти сподо́бистеся, и вожделе́нное и́мя Богооте́ц прия́сте, Иоаки́ме и А́нно всеблаже́ннии, о Ея́же рождестве́ святе́м не́бо и земля́ возра́довашася, и весь род челове́ческий освяти́ся, вопия́ ди́вному во святы́х Свои́х Бо́гу Изра́илеву: Аллилу́иа.
Ви́девше роди́телие от них ро́ждшуюся Богоотрокови́цу Мари́ю, Зижди́телеву же Ма́терь, я́ко киво́ту Бо́жию, благогове́йно Той послужи́ша; те́мже и нас, к вам моли́твенно припа́дающих, не отврати́тесь, глаго́лющих:
Ра́дуйтеся, в рождестве́ Богоотрокови́цы Мари́и све́тло возликова́вшии; ра́дуйтеся, виде́нием Богоотрокови́цы услажде́ннии.
Ра́дуйтеся, слы́шанием Ея́ умиле́ннии; ра́дуйтеся, по сих от архиере́я Бо́жия благослове́ннии и ублаже́ннии.
Ра́дуйтеся, А́гницу непоро́чную в до́му свое́м до́бре упа́сшии; ра́дуйтеся, А́гнца и Па́стыря Ма́терь во Дщерь себе́ прие́мшии.
Ра́дуйтеся, святи́и и пра́веднии Богоотцы́ Иоаки́ме и А́нно.
Пропове́дницы чуде́с Бо́жиих яви́стеся святи́и, егда́ обе́т свой Бо́гови соверши́сте и триле́тнюю Богоотрокови́цу Мари́ю в храм Бо́жий со сла́вою введо́сте, да обита́ет та́мо во свята́я святы́х, о сих у́бо ра́достно Бо́гу оте́ц ва́ших славосло́вия песнь воспева́ти потща́стеся: Аллилу́иа.
Возсия́ Богоотрокови́ца, я́ко луна́ по́лная, в честне́м Свое́м в храм Госпо́день вхожде́нии, Ея́же чистоте́ а́нгелы удивля́хуся, и архиере́й Бо́жий Заха́рия прие́м Ю от рук ва́ших, святи́и Иоаки́ме и А́нно, во вну́тренняя свята́я святы́х с че́стию введе́, я́ко вои́стину одушевле́нный Бо́жий киво́т, вас же по достоя́нию ублажи́ хвале́ньми таковы́ми:
Ра́дуйтеся, ра́дость всеми́рную ро́ду челове́ческому породи́вшии; ра́дуйтеся, Вино́вницу челове́ческаго обновле́ния воспита́вшии.
Ра́дуйтеся, в храм Госпо́день Киво́т одушевле́нный Бо́жий приве́дшии; ра́дуйтеся, Дщерь ва́шу Святу́ю во свята́я святы́х вмести́вшии.
Ра́дуйтеся, Бо́гу, воплоти́тися хотя́щему, сро́дницы явля́ющиися; ра́дуйтеся, а́нгелом собесе́дницы бы́вшии.
Ра́дуйтеся, святи́и и пра́веднии Богоотцы́ Иоаки́ме и А́нно.
Жела́ние ду́ши твоея́ испо́лнив и обе́т твой Бо́гови возда́в, Иоаки́ме преблаже́нне, в ста́рости до́брей свя́то и пра́ведно жизнь земну́ю о Го́споде сконча́л еси́. Те́мже ны́не Тому́ и о нас сотвори́ моли́тву, да благу́ю, ми́рную и непосты́дную кончи́ну получи́ти сподо́бимся, зову́ще Ему́: Аллилу́иа.
Но́вое и богоугодное житие́ во вдовстве́ твое́м, А́нно свята́я, провожда́ла еси́, у хра́ма Бо́жия примета́ющися и Святе́й и Преблагослове́нней Дще́ри твое́й сослужа́щи, те́мже я́ко и́стинную и богоуго́дную вдови́цу, Христо́ву же праба́бу, тя восхваля́ем, вку́пе же и му́жа твоего́, Богоотца́ Иоаки́ма, усе́рдно че́ствуем и с любо́вию пе́сни таковы́я вам прино́сим:
Ра́дуйтеся, пра́ведницы, и́хже пра́вда, я́ко со́лнце, сия́ет во ве́ки; ра́дуйтеся, А́нгелом дру́зи, сожи́телие святы́м и при́снии Бо́гу.
Ра́дуйтеся, бли́жнии небе́снаго Престо́ла предстоя́телие; ра́дуйтеся, дерзнове́ние ве́лие ко Христу́ Бо́гу иму́щии.
Ра́дуйтеся, Це́ркве, на небеси́ торжеству́ющия, украше́ние; ра́дуйтеся, Це́ркве, во́инствующия на земли́, до́брое заступле́ние.
Ра́дуйтеся, святи́и и пра́веднии Богоотцы́ Иоаки́ме и А́нно.
Стра́нствие земно́е соверши́в, свята́я и пра́ведная А́нно, на рука́х Пребоже́ственныя твоея́ Дще́ри, Богоро́дицы Мари́и, сном сме́ртным почи́ла еси́ и к Бо́гу со упова́нием престави́лася еси́, те́мже свято́е успе́ние твое́ сла́вяще, мо́лим тя, о Богопрама́терь всечестна́я, да егда́ и мы сном сме́ртным усыпа́ти начне́м, умоли́ Спа́са Христа́ кро́тко ду́шу на́шу от те́ла отдели́ти и бесо́вския вла́сти ю изба́вити, спасе́ния же ве́чнаго нас удосто́ити, да зове́м Ему́ в ра́дости святы́х: Аллилу́иа.
Весь мир христиа́нский блажи́т вас по достоя́нию, святи́и и пра́веднии Богоотцы́ Иоаки́ме и А́нно, и моли́твенно ва́ша честна́я имена́ прославля́ет, Це́рковь же Христо́ва све́тло па́мять ва́шу пра́зднует и пе́сни хвале́бныя вам прино́сит си́це:
Ра́дуйтеся, свети́льницы, мрак душ на́ших благода́тно озаря́ющии; ра́дуйтеся, от го́рних высо́т сла́вы ва́шея к земноро́дным ми́лостиво проница́ющии.
Ра́дуйтеся, Богоро́дице Мари́и сомоли́твенницы всегда́шнии; ра́дуйтеся, Христа́ Бо́га умилостиви́телие многомо́щнии.
Ра́дуйтеся, любо́вь и ве́ру к вам иму́щих от вся́ких бед спаса́ющии; ра́дуйтеся, моли́твенно на по́мощь вас призыва́ющих от напра́сныя и на́глыя сме́рти избавля́ющии.
Ра́дуйтеся, святи́и и пра́веднии Богоотцы́ Иоаки́ме и А́нно.
Вси а́нгели Бо́жии и ли́цы святы́х Бо́жиих на небеси́ вас, святи́и и пра́веднии Богоотцы́ Иоаки́ме и А́нно, целу́ют, ро́ди же челове́честии на земли́ моли́твенными пе́сньми вас похваля́ют и о предста́тельстве ва́шем благода́рно вопию́т Бо́гу: Аллилу́иа.
Вити́йства на́ша не довле́ют к досто́йной вам похвале́, святи́и прароди́телие Христо́вы; оба́че вы, ми́лостивы су́ще, и на́ша убо́гая хвале́ния не отврати́те, но бу́дите о нас те́плии предста́тели и моли́твенницы ко Го́споду, ва́шими святы́ми моли́твами ску́дость душ на́ших восполня́юще, да благода́рственне вам зове́м:
Ра́дуйтеся, ра́дости и сла́вы ве́чныя вожделе́ннии нам стяжа́телие; ра́дуйтеся, благ вре́менных и ве́чных усе́рднии нам пред Го́сподем хода́таи.
Ра́дуйтеся, от смертоно́сныя я́звы предста́тельством ва́шим ве́рныя сохраня́ющии; ра́дуйтеся, тлетво́рныя ве́тры моли́твами ва́шими разгоня́ющии.
Ра́дуйтеся, трясе́ние земли́ и бу́ри зе́льныя хода́тайством ва́шим установля́ющии и в тишину́ прелага́ющии; ра́дуйтеся, во вся́ких беда́х и злоключе́ниих на по́мощь к нам ускоря́ющии.
Ра́дуйтеся, святи́и и пра́веднии Богоотцы́ Иоаки́ме и А́нно.
Спасе́ния душе́внаго жела́ющим и о сем усе́рдно подвиза́ющимся, помо́щницы блази́и, святи́и и пра́веднии Богоотцы́ Иоаки́ме и А́нно, яви́стеся, ов у́бо и́ноком, о́ва же и́нокинем храни́тели имену́етеся, о́бщее моле́ние за всех ве́рных Бо́гу принося́ще, да вси благода́рственно зову́т просла́вльшему вас во вселе́нней, Царю́ сла́вы Христу́: Аллилу́иа.
Стено́ю моли́тв ва́ших небе́сных, святи́и и пра́веднии Богоотцы́ Иоаки́ме и А́нно, сохраня́йте и огражда́йте нас от искуше́ний врага́ диа́вола, и́щущаго душе́вней поги́бели на́шей: ве́мы бо, ве́мы, я́ко мно́го мо́жет моли́тва ва́ша пред лице́м Христа́ Бо́га на́шего, ва́шего же по пло́ти Вну́ка. Его́же умоля́ти не преста́йте о всех, с любо́вию вас почита́ющих и вопию́щих:
Ра́дуйтеся, ма́слина благопло́дная, еле́й ми́лости Божией оби́льно нам источа́ющая; ра́дуйтеся, кипари́си дво́е благосенноли́ственнии, зной страсте́й на́ших в поко́й безстра́стия приводя́щии.
Ра́дуйтеся, виссо́не и багряни́це, из ни́хже Ски́ния Бо́жия селе́ния сооруди́ся; ра́дуйтеся, го́рлицы единосупру́жнии, Голуби́цу непоро́чную произве́дшии.
Ра́дуйтеся, со Дще́рию ва́шею, всех Цари́цею, вечно ца́рствующии; ра́дуйтеся, в Сио́не го́рнем в оби́тели Ея́ небе́сней све́тло торжеству́ющии.
Ра́дуйтеся, святи́и и пра́веднии Богоотцы́ Иоаки́ме и А́нно.
Пе́ние на́ше хвале́бное ми́лостивно приими́те и щедро́т ва́ших моли́твенных нас не лиши́те, о святи́и прароди́телие Христо́вы Иоаки́ме и А́нно, а́ще и недосто́йнии есмы, грехо́в ра́ди на́ших, ва́шего свята́го заступле́ния: оба́че я́ко бла́зи и всеще́дри су́ще, сие́ нам подади́те, и помози́те нам покая́нием очи́ститися от скве́рны грехо́вныя, да в чистоте́ серде́ц воспое́м Созда́телю на́шему хвале́бную песнь: Аллилу́иа.
Светопода́тельная два свети́льника, всеми́рную Свещу́ возже́гшии, позна́ем святы́х Богооте́ц Иоаки́ма и А́нну, о бра́тие, и сия́нием тех небе́сныя сла́вы озаря́еми, воспои́м им такова́я:
Ра́дуйтеся, сла́внейшую без сравне́ния Серафи́м воспита́ти удосто́ившиися; ра́дуйтеся, луча́ми благода́ти Бо́жия осия́нии.
Ра́дуйтеся, благоуха́ния духо́внаго преиспо́лненнии; ра́дуйтеся, фимиа́м моли́тв ва́ших о всем ми́ре христиа́нстем Бо́гу принося́щии.
Ра́дуйтеся, с Богоро́дицею Мари́ею и Предте́чею Иоа́нном у Престо́ла Христо́ва вы́ну предстоя́щии.
Ра́дуйтеся, святи́и и пра́веднии Богоотцы́ Иоаки́ме и А́нно.
Благода́ть Бо́жию и ми́лость нам пода́ти, проще́ние же грехо́в и исправле́ния жития́ ниспосла́ти проси́те нам у Го́спода, святи́и Богоотцы́ Иоаки́ме и А́нно, и не преста́йте о нас пред лице́м Вседержи́теля Бо́га моля́ще, я́ко стяжа́вшии к Нему́ дерзнове́ние мно́гое. О сем усе́рдно к вам припа́дающе, я́ко при́сных предста́телей и засту́пников на́ших, про́сим и благоумиле́нно зове́м всех Творцу́: Аллилу́иа.
Пою́ще многомо́щное предста́тельство ва́ше к Бо́гу, Иоаки́ме и А́нно пра́веднии, велича́ем возвели́чившаго вас Христа́ Го́спода, воспева́ем и рожде́нную от вас Пренепоро́чную Его́ Ма́терь, вам же от усе́рдия на́шего сия́ достодо́лжныя похвалы́ прино́сим:
Ра́дуйтеся, от восто́ка и до за́пада препросла́вленнии; ра́дуйтеся, стра́жие боже́ственнии, неусы́пно бдя́щии в моли́твах к Бо́гу о всех ве́рных.
Ра́дуйтеся, по́мощь ва́шу благода́тную вся́цей душе́ христиа́нстей подаю́щии; ра́дуйтеся, во благи́х моле́ния и проше́ния благочести́вых исполня́ющии.
Ра́дуйтеся, душе́вных и теле́сных неду́гов преизря́днии и безме́зднии цели́тели; ра́дуйтеся, благ вре́менных и ве́чных всеусе́рднии и благоприя́тнии нам хода́таи.
Ра́дуйтеся, святи́и и пра́веднии Богоотцы́ Иоаки́ме и А́нно.
О святи́и и пра́веднии Богоотцы́ Иоаки́ме и А́нно! Мо́лим вас со усе́рдием и любо́вию, к подно́жию ног ва́ших припа́дающе: умоли́те Го́спода Бо́га изба́вити нас от поги́бели ве́чныя, гре́шником угото́ванныя, да милосе́рдием Бо́га на́шего спаса́еми и ва́шими святы́ми моли́твами споспешеству́еми, благода́рственно воспои́м Ему́ а́нгельскую песнь: Аллилу́иа.
Этот кондак читается трижды, зате́м икос 1-й «А́нгел предста́тель …» и кондак 1-й «Избра́ннии от челове́ческаго ро́да …».
О присносла́внии Христо́вы пра́ведницы, святи́и Богоотцы́ Иоаки́ме и А́нно, предстоя́щии небе́сному Престо́лу Вели́каго Царя́ и ве́лие дерзнове́ние к Нему́ иму́щии, я́ко от Преблагослове́нныя Дще́ри ва́шея, Пречи́стыя Богоро́дицы и Присноде́вы Мари́и, воплоти́тися изво́лившему, к вам, я́ко многомо́щным предста́телем и усе́рдным о нас моли́твенникам, прибега́ем мы, гре́шнии и недосто́йнии. Моли́те бла́гость Его́, я́ко да отврати́т от нас гнев Свой, по де́лом на́шим пра́ведно на ны дви́жимый, и да безчи́сленныя прегреше́ния на́ша презре́в, обрати́т нас на путь покая́ния и на стезе́ за́поведей Свои́х да утверди́т нас. Та́же моли́твами ва́шими в ми́ре живо́т наш сохрани́те и во всех благи́х благо́е поспеше́ние испроси́те, вся я́же к животу́ и благоче́стию потре́бная нам от Бо́га да́рующе, от вся́ких напа́стей и бед и напра́сныя сме́рти предста́тельством ва́шим нас избавля́юще, и от всех враг ви́димых и неви́димых защища́юще, я́ко да ти́хое и безмо́лвное житие́ поживем во вся́ком благоче́стии и чистоте́, и та́ко в ми́ре вре́менное сие́ житие́ преше́дше, в ве́чный дости́гнем поко́й, иде́же ва́шим святы́м умоле́нием да сподо́бимся Небе́снаго Ца́рствия Христа́ Бо́га на́шего, Ему́же со Отце́м и Пресвятым Ду́хом подоба́ет всякая сла́ва, честь и поклонение во ве́ки веко́в. Ами́нь.
Избранный угодниче Христов и дивный благочестия подвижниче, преподобне отче Иосифе, иже сугубый свыше дар приемый боговедения же и исцелений, яко имеяй дерзновение ко Святей Троице моли избавитися нам от находящих бед и скорбей и болезней, да любовию зовем ти:
Радуйся, преподобне отче Иосифе, богомудре, чудотворче.
Ангела во плоти тя ведуще, преподобне Иосифе, посланна от Бога, да явит тобою в человецех образ истиннаго благочестия и добрых дел, чудящеся путем Его, во временнем житии твоем явленным, и величие благоутробия Его прославляюще, во умилении сердечнем взываем ти сице:
Радуйся, добраго корене отрасле благородная; радуйся, лозо винограда Христова многоплодная.
Радуйся, чадо молитвы родителей благочестивых; радуйся, надеждо и утешение сердец их боголюбивых.
Радуйся, издетска страх Господень стяжавый; радуйся, семя слова Божия от юности восприявый.
Радуйся, измлада смирения и молчания хранителю; радуйся, молитвы и воздержания ревнителю.
Радуйся, преподобне отче Иосифе, богомудре, чудотворче.
Видя Христос благое сердца твоего изволение и рачение, яко от юности немолчно прославлял еси Имя Господне чтением и пением псалмов и песней священных во святем храме Его, в скинии небесней вчини тя, преподобне, в лице праведник совершенных возносити ему купно с ними ангельское пение: Аллилуиа.
Разумев от писаний отеческих благих мира сего тщету, исход же от временнаго сего жития непрестанно помышляя и пребывая присно в сокровеннем подвизе молитвы, никакоже сердцем прилепился еси к сущим от мира, разве точию к единому достойнейшему от сверстник твоих, с нимже и путь богоугоднаго иноческаго жития от дней отрочества предъизбрал еси, преподобне. Темже ублажаем тя сице:
Радуйся, цвете благоуханный добраго воспитания; радуйся, сосуде Божественнаго избрания.
Радуйся, в разуме Богом просвещенный; радуйся, сердцем в Бозе утвержденный.
Радуйся, образе содружества непорочнаго и нелестнаго; радуйся, вседушевне взыскавый Царствия Небеснаго.
Радуйся, преподобне отче Иосифе, богомудре, чудотворче.
Бурю помышлений мирских препобеждая благодатию Христовою, помыслом лучшим востекл еси к Небесным, преподобне, в Горняя вперив ум твой безмятежный и безстрастный, и волю всецело покорив под иго Христово, тело же твое соделал еси жилищем Духа Святаго, отнюдуже и в телеси, яко безплотен, со безплотными взывал еси Богу: Аллилуиа.
Ревность имеяй о совершеннем житии христианстем и от писаний отеческих научен, еже вдати себе в послушание искусну руководителю и наставнику нелестну, в юности родители твоя оставил еси, преподобне, и положил еси в сердцы твоем вопросити духовнаго старца Варсонофия, да еще что речет, буди то тебе, яко слово Самаго Бога, еже и свершися во благое Божиим устроением; сего ради, толикое веры твоея упование ублажающе, взываем ти:
Радуйся, яко любезная и красная мира сего презрел еси; радуйся, яко Небесных и нетленных желанием вожделел еси.
Радуйся, внутреннею Креста Христова красотою восхищенный; радуйся, силою Свыше на труд крестоношения облеченный.
Радуйся, волею твердою воли своея отрекийся; радуйся, отсечением страстей угодивый Богу и спасыйся.
Радуйся, преподобне отче Иосифе, богомудре, чудотворче.
Силою любве Божия влеком к вящшему жития иноческаго совершенству и мудре последуя совету и благословению прозорливаго и святаго старца Варсонофия, пришел еси во обитель преподобнаго Пафнутия и того умолил еси прияти тя в послушание, да купно с ним в трудех и подвизех выну благоугождаяй Богу, воспеваеши: Аллилуиа.
Провидя духом благое произволение юноши, чистоту же душевную и благодатное призвание его, преподобный Пафнутий абие облече его во иноческий образ и возложи нань иго послушаний, яже со усердием в простоте и в терпении мнозе исполняше, яко быти ему образом безпрекословнаго повиновения, труда и благочестия; темже ныне зовем ему сице:
Радуйся, тесный путь спасения от юности возлюбивый; радуйся, ярем Господень на выю свою возложивый.
Радуйся, священными обеты волю свою связавый; радуйся, себе и весь живот свой Господеви предавый.
Радуйся, коемуждо во благо усердный служителю; радуйся, болящих и немощных успокоителю.
Радуйся, помыслы плотския силою молитвы прогоняяй; радуйся, сомнящихся в вере словом Божиим утверждаяй.
Радуйся, преподобне отче Иосифе, богомудре, чудотворче.
Божественною любовию распалаем и ближних твоих, иже в мире, не отверглся еси сердцем, преподобне: слышав бо старца отца твоего в разслаблении телеснем суща, умолил еси преподобнаго Пафнутия во обитель того прияти и надолзе послужил еси болящему родителю твоему, со всяким рачением призирая его и питая телесне рукама твоима и духовне словом Божиим до самыя кончины, яко тому взывати к тебе: Не аз ти отец, но ты ми отец еси. Сей убо труд любве твоея сыновния восхваляюще, яко жертву богоприятну, поем: Аллилуиа.
Имый во обители осмьнадесять лет жития в послушании, бдении, пощении и научении писанием святых и духоносных отец, егда наста час блаженныя кончины преподобнаго Пафнутия, начальствовати по нем, аще и не хотяй, призван был еси и во пресвитера поставлен, да управиши добре собранное им стадо Христово; ты же вмале начальствовав, паки управляем восхотел еси быти, да приумножиши добродетелей нетленная сокровища. Темже, дивящеся ревностному добротолюбию и смиренномудрию твоему, вопием ти:
Радуйся, лишении телесными многа блага духовная собравый; радуйся, нищетою дарования Небесная стяжавый.
Радуйся, молчания изрядный хранителю; радуйся, строгий уставов иноческих блюстителю.
Радуйся, болящим, яко братии Христовой, послуживый; радуйся, высокий образ любве сыновния явивый.
Радуйся, власти над другими и чести уклонивыйся; радуйся, паки, яко слуга незнаемь, во обитель Кириллову вселивыйся.
Радуйся, тамо брашна уготовляти определенный; радуйся, и в рубище рабстем познанный и обличенный.
Радуйся, преподобне отче Иосифе, богомудре, чудотворче.
Купцу уподобился еси, ищущему добраго бисера, Иосифе преподобне, егда в послушании и всяцем подвизе духовнем благоискусен быв, обители иноческия посещал еси: да испытно познаеши в тех лучшая и совершеннейшая и приусвоиши на пользу душ стада твоего словеснаго, еже радостию велиею возрадовася возвращению твоему, благодарственне взывая Пастыреначальнику Христу: Аллилуиа.
Слышав благоверный князь Борис о пришествии преподобнаго Иосифа в его пределы, изшед усердно моляше и, да изберет в его наследии место, да соградит на нем святую обитель и пребывает в ней со иноки, еже и свершися, дыханию бурну указующу место, и устройся рачением князя, паче же благословением Божиим по молитвам преподобнаго, емуже с любовию взываем сице:
Радуйся, высоких подвигов жития христианскаго ревнителю; радуйся, новоначальных искусный руководителю.
Радуйся, неизменное правило поста и покаяния; радуйся, хранителю непрестаннаго воздержания.
Радуйся, мирским наставниче жизни богоугодныя; радуйся, основателю обители благоплодныя.
Радуйся, яко благая начинания твоя Христос благослови; радуйся, яко сотрудника тебе в лице державнаго яви.
Радуйся, преподобне отче Иосифе, богомудре, чудотворче.
Велие стяжав сокровище любве, преподобне, якоже во дни первых христиан, имже бе сердце и душа едина и от нихже никтоже от имений глаголаше что свое быти, судил еси и во иноцех обители твоея, яко изволением сердца отвергшихся мира и его стяжаний, уставити сицеваго жительства образ, да вси вкупе едино взыщут стяжание вечное, Бога, Емуже и да взывают выну: Аллилуиа.
Новаго Феодосия, общих житий начальника, зрит в тебе страна Российская, преподобне отче Иосифе, якоже бо той, иноческия обеты восприяв, всем сердцем и душею уставом общаго иноческаго жития предан бяше, сице и ты, сим шествуяй путем, в терпении мнозе заповедем общежития святых отец неуклонно последовал еси, темже от чтущих тя слышиши таковая:
Радуйся, общее житие монашествующих основавый; радуйся, тем всеоружие благочестия им подавый.
Радуйся, общими труды праздных помыслов шатания упразднивый; радуйся, теми, яко бронею, страстей разжженныя стрелы отразивый.
Радуйся, вселивый во обители дух общаго воздержания; радуйся, потребивый в ней плевелы любостяжания.
Радуйся, бодрствованию духовному многи иноки научивый; радуйся, до конца жития первый в труждающихся бывый.
Радуйся, преподобне отче Иосифе, богомудре, чудотворче.
Странник пришел еси в пустыню отечествия твоего, преподобне, и абие домовладыка явился еси Богу, преклоньшу сердце во власти сущаго благовернаго князя Бориса еже послужити от имений своих на созидание церкве каменныя на месте сем, благоукрасити же ю боголепно, и келлии воздвигнути множащимся братиям, да и зде сими, яко на небеси святыми Ангелы, возносится Богу песнь: Аллилуиа.
Видяще ревностное по Бозе и жестокое житие преподобнаго Иосифа и братии, непрестанно в трудех и пощении подвизающихся и ходящих в рубищных и худых одеждах, нецыи от инок и всякаго чина мирских людей и князей не точию сих не отвращахуся, но паче равностию духовною горяще и во обители купно с ними подвизатися желающе, приношаху ту имения своя на пользу общую; темже здателю той возглашаем тако:
Радуйся, мудре предначертавый обитель нову; радуйся, поревновавый нищетолюбному житию Христову.
Радуйся, святыя храмы во обители создивый; радуйся, мног собор монашествующих собравый.
Радуйся, яко труд твой свыше благословися; радуйся, яко святое желание сердца твоего совершися.
Радуйся, яко во обители твоей мнози души своя спасоша; радуйся, яко из нея пастыреначальницы изыдоша.
Радуйся, преподобне отче Иосифе, богомудре, чудотворче.
Всем сердцем возлюбивый Бога и многа дарования духовная от Него восприемый, преподобне Иосифе, и пред человеки толику благодать обрел еси, яко не точию мнози от простых, но и князи, требующе твоих наставлений, в послушание тебе вдаяху себе совершенно, имже миротворец был еси, исходатайствовав благоволение самодержца князю Юрию, иже неповинне оклеветан под страхом смертным бяше, избавлен же быв в радости душевней возопи Богу: Аллилуиа.
Благодать Божественная, привлекаемая молитвами преподобнаго, яве знаменася в нем даровании чудотворений и ведением сокровенных: умерша бо благочестиваго князя Иоанна молитвою своею возбуди, да конечне предуготовится покаянием и восприимет залог жизни вечныя, и тако да отыдет ко Господу; темже во гресех живущии и действеннаго возбуждения на покаяние требующии возопиим к нему:
Радуйся, благочестивых отрадо и утешение; радуйся, колеблющихся в вере твердое ограждение.
Радуйся, отчаявающихся утверждаяй во уповании; радуйся, просветивый многих твоими писании.
Радуйся, мир посреде враждующих устрояяй; радуйся, неповинныя от смерти избавляяй.
Радуйся, умирающия возставляяй на покаяние: радуйся, всем внушаяй жизни вечныя взыскание.
Радуйся, шествовавый путем трудным и тесным; радуйся, возводяй других к обителем небесным.
Радуйся, преподобне отче Иосифе, богомудре, чудотворче.
Новоустроенну обитель преподобнаго Иосифа испыта Господь посещением гнева Своего, купно же и милости: за грехи бо людския глад крепок наведе на землю Волоколамску и на вся окрестныя веси, яко многим людем безгодно погибати. Преподобный же, уведев сия, усугуби во обители моление и отверзе житницы тоя алчущим; раздав же вся сущая и не могий ктому не точию тысящ пришедшаго народа, но ниже братии своея препитати, посла заимовати на обитель сребро и куплю деяй семен хлебных, никакоже остави требующия погибати гладом, детем же их малым особь созда дом, дондеже державный благочестивый царь Василий, слышав сия, внезапу прииде во обитель и дарова довольная ко призрению бедствующих, иже, видяще в сем милосердующую руку Божию, во умилении сердец вознесоша хвалебный глас Богу: Аллилуиа.
Благому изволению державнаго последующе, мнози от военачальник и князей удельных и иных христолюбцев богатая даяния в обитель Иосифову приношаху, яко всем пришедшим к ней глада ради безбедно в домы своя возвратитися и новым изобилием благословитися обители преподобнаго, к немуже взываем ныне:
Радуйся, надеждо светлая в нужде и обстоянии сущих; радуйся, покровителю сирых и крова неимущих.
Радуйся, гладом погибающих питателю; радуйся, чадом их виталища созидателю.
Радуйся, милости источниче неистощимый; радуйся, скорбящих утешителю незримый.
Радуйся, последняя твоя взаим Богови давый; радуйся, добрым расточением сущих богатая собравый.
Радуйся, преподобне отче Иосифе, богомудре, чудотворче.
Ведый от Божественных писаний, яко един уповающий на Господа поженет тысящи, и два двигнета тмы, не убоялся еси, преподобне, един со святым Геннадием сонмищу сильных поборников суетных лжеучений противустати; и оружием истины в конец сих поразил еси: вси бо разсеяшася, яко прах пред лицем ветра, тебе же благодарственно сердцем и усты взывающу: Аллилуиа.
Веруяй в Мя,— рече Господь,— реки от чрева его истекут воды живы. Сия убо в тебе оправдишася, досточудне Иосифе, не бо священным догматом богословия во училищи некоем наставлен был еси, но сам живою верою сердца взыскуяй Бога, истину обрел еси в слове Божии и писаниих отеческих и явился еси оплот необорим Православия. Темже взываем ти:
Радуйся, лжеучителей злых лукавство разоривый; радуйся, сомнящихся в православней вере утвердивый.
Радуйся, бодрый учения Христова защитниче; радуйся, боголюбивою ревностию возжженный светильниче.
Радуйся, благопотребне во отечествии твоем возсиявый; радуйся, веру в делех жития твоего показавый.
Радуйся, разумных и препростых благоискусный учителю; радуйся, ближних и дальних россиан просветителю.
Радуйся, преподобне отче Иосифе, богомудре, чудотворче.
Миру водворившуся в Церкви дух злобы паки, пакости дея, подвигну сердце волоцкаго владетеля корысти ради многа смущения и утеснения творити обители, еще же и осуждение неправедно воздвигнути на преподобнаго, еже и паде на главу осудившаго; собором бо священным преподобный Иосиф с великою честию оправдан бысть, присно воспеваяй Богу: Аллилуиа.
Течение жития скончавая в трудех и молитвах, и подвизех благочестия, завеща преподобный неизменно хранити преданный им устав знаменательне прирек: аще получу от Бога милость, то обитель сия ничимже скудна будет, и тако, завесу плоти отложив, отыде ко Господу и по сих исцеления подаваше больным, приходящим с молитвою к его мощем. Сего ради приносим ему похваления таковая:
Радуйся, чистоты душевныя хранителю нелицемерный; радуйся, истинный рабе Христов благий и верный.
Радуйся, стрелами вражиих навет неуязвимый; радуйся, спасаемых вождю непобедимый.
Радуйся, досточудный образе терпения; радуйся, наставниче нелестнаго благоговения.
Радуйся, и по отшествии обитель твою соблюдаяй; радуйся, молящимся благопотребная подаваяй.
Радуйся, от Господа венец правды восприявый; радуйся, славою чудотворений просиявый.
Радуйся, преподобне отче Иосифе, богомудре, чудотаорче.
О преподобне и богоносне отче Иосифе! Воспоминающе ныне подвиги и труды твоя, яже о Христе содеянная, мы, грешнии и недостойнии раби твои, смиренно просим тя: моли милостиваго Бога, да дарует мир жительству нашему и Церкви Своей Святей, да оградит ю от всех душепагубных и безбожных учений, да подаст же нам вся благопотребная в житии сем, и в будущем веце да сподобит нас воспевати Ему: Аллилуиа.
Этот кондак читается трижды, затем 1-й икос «Ангела во плоти...» в 1-й кондак «Избранный угодниче...».
О великий наставниче, ревнителю и учителю православныя веры, святе премудре Иосифе! Приими моление нас, грешных, тебе приносимое, и теплым предстательством умоли в Троице славимаго Бога, да ниспослет богатыя Своя милости нам, грешным, да утвердит во Святей Своей Православней Церкви правую веру и благочестие: пастырем ея да подаст святую ревность о спасении словеснаго стада, яко да верующих соблюдут, неверующих же и отпадших от истинныя веры вразумят и обратят. Всем же нам испроси вся благопотребная во временнем сем житии и полезная к вечному спасению нашему. Помяни стадо твое, еже собрал еси, не забуди посещати чад твоих и, яко чадолюбивый отец, не презри, ниже отрини моления наша, но воздежи руце твои молитвеннеи ко Господу Богу, да отложит праведный гнев Свой, движимый на ны, и избавит нас от враг видимых и невидимых, от глада, потопа, меча, смертоносныя язвы, нашествия иноплеменных и междоусобныя брани. Ей, премилосердый заступниче наш, преславный чудотворче, всех нас управи в мире и покаянии скончати живот наш и преселитися со упованием в блаженная селения райския, идеже непрестанно славословится всепетое Имя Отца и Сына и Святаго Духа. Аминь.
О преблаженне и приснославне отче наш Иосифе! Ведуще твое велие к Богу дерзновение и к твоему твердому заступлению прибегающе, в сокрушении сердца молим тя, озари нас светом дарованныя тебе благодати и молитвами твоими помози нам бурное море жития сего прейти безмятежно и пристанища спасения неблазненно достигнути: порабощени бо суще суетными, и грехолюбиви, и немощни еже от обышедших нас зол возникнути, к кому прибегнем, аще не к тебе, явившему неоскудеваемое богатство милости в земнем житии твоем? Веруем же, яко и по отшествии твоем множайшее стяжал еси дарование милосердовати бедствующим. Темже убо, припадающе ныне к цельбоносней иконе твоей, умиленно просим тя, святче Божий: сам искушен быв, помози и нам, искушаемым; постом и бдением поправый силу демонскую, и нас от нападений вражиих защити; препитавый гладом погибающих, и нам испроси у Господа изобилие плодов земных и вся яже ко спасению потребная; посрамивый еретическая мудрования, Церковь Святую от ересей и расколов, и смущений молитвами твоими огради: да тожде мудрствуем вси, единем сердцем славяще Святую, Единосущную, Животворящую и Нераздельную Троицу, Отца и Сына и Святаго Духа, во вся веки. Аминь.
Избранный чудотворче, великий угодниче Христов, святителю отче Феодосие, нетлением мощей твоих и множеством чудес от Бога прославленный, в песнех радостных ублажаем тя, заступника нашего. Ты же, яко имеяй дерзновение ко Господу, от всяких нас бед свобождай, да зовем ти:
Радуйся, угодниче Божий, святителю Феодосие, чудотворче преславный.
Ангел во плоти явился еси, богомудре Феодосие, ангельскими нравы измлада себе украшая; темже и Ангел церкве Черниговския достойне поставлен был еси от Бога, всех наставляя ко спасению и всем являя в себе правило веры и образ кротости, воздержания же и любве. Сего ради, чада твоя суще, любовию вопием ти сице:
Радуйся, Ангеле земный и человече небесный; радуйся, небесных сил собеседниче и сослужителю.
Радуйся, в житии твоем безплотным поревновавый; радуйся, и по смерти с ними водворивыйся.
Радуйся, от юности Христа всем сердцем твоим возлюбивый; радуйся, от утра жизни твоея Тому единому поработавый.
Радуйся, вся заповеди Господни верно и непорочно сохранивый; радуйся, мног плод духовный о Христе сотворивый.
Радуйся, усердною молитвою дух твой окриливый; радуйся, чтущих любовию память твою от бед покрывающий.
Радуйся, угодниче Божий, святителю Феодосие, чудотворче преславный.
Видев суету мира сего скорогибнущую, всем сердцем возжелал еси, отче Феодосие, мир сей оставити и во иночестве Богу послужити. Темже иго Христово благое и легкое усердие восприяв, инок святыя обители Киево-Печерския смирен и послушлив был еси, воспевая всех Творцу ангельскую песнь: Аллилуиа.
Разум богопросвещенный твой видев, святитель Киевский Дионисий постави тя, Феодосие, архидиакона соборныя церкве Софии Премудрости Божией, да служиши алтарю Господню при совершении Таин Божиих. Мы же, в тебе избранный сосуд Духа Святаго ведуще, со умилением зовем ти сицевая:
Радуйся, под кровом чудотворцев Печерских начало подвигов твоих положивый; радуйся, от юности добродетельми монашескаго жития преизрядно себе украсивый.
Радуйся, иноков пресветлая красото; радуйся, постников преславная похвало.
Радуйся, святителей благоговейных любимый собеседниче; радуйся, послушания нелицемерный рачителю.
Радуйся, подвижниче смиренный, на Господа все упование возложивый; радуйся, уединеннаго жития добрый ревнителю.
Радуйся, избранниче Христов преблаженный; радуйся, Богом данный нам заступниче непреоборимый.
Радуйся, угодниче Божий, святителю Феодосие, чудотворче преславный.
Сила Божия осени тя, отче Феодосие, егда во иерея посвящен был еси от святителя Дионисия и во игумена обители Корсунския от него поставлен, да пасеши Христово стадо и руководиши иноки ко спасению, воспевая купно с ними хвалебную песнь в Троице славимому Богу: Аллипуиа.
Имея смирение нелицемерное, прах и пепел себе именовал еси, преблаженне Феодосие, и запрещение от архиерея, неповинен сый, безропотно понесл еси; темже и мы, ублажающе таковое, воистину христоподражательное, незлобие твое, воспеваем тебе сице:
Радуйся, агнче незлобивый, никомуже зла за зло воздавый; радуйся, яко запрещение архиерейское нося, послушание великое явил еси.
Радуйся, яко тогда и епитрахили коснутися не дерзал еси; радуйся, смирением и преданием себе в волю Божию врага победивый.
Радуйся, иноче боголюбезный, преподобием и кротостию благоукрашенный; радуйся, постническим житием, яко безкровным мученичеством увенчанный.
Радуйся, монашествующим отец и наставник богомудрый; радуйся, обителей иноческих многоопытный руководителю.
Радуйся, Престола Божия верный и благоговейный служителю; радуйся, пред Богом теплый о нас ходатаю.
Радуйся, угодниче Божий, святителю Феодосие, чудотворче преславный.
Бурю гонений на Церковь Божию во граде Киеве воздвиже мудрование латинское; ты же, богомудре Феодосие, во игумена обители Выдубецкия тогда поставлен быв, сию от лжеучения оградил еси, утверждая братию свою в православней вере непорочно воспевати Богу: Аллилуиа.
Слышав богоугодное житие твое, отче Феодосие, святитель Божий Лазарь, призва тя от Киева в Чернигов и, поставив во архимандрита пречестныя обители Елецкия, сотвори помощника себе во управлении церковнем; ты же с любовию сыновнею послужил еси ему и воистину достоин явился еси, да воспеваем ти сицевая:
Радуйся, старцу святителю с любовию послуживый; радуйся, яко сын отцу во всем ему послушен бывый.
Радуйся, старость его упокоивый; радуйся, труды святительския ему облегчивый.
Радуйся, благолепия церковнаго усердный рачителю; радуйся, преданий апостольских верный хранителю.
Радуйся, правды ревностный блюстителю; радуйся, долга пастырска непоколебимый исполнителю.
Радуйся, алтаря Господня служителю непорочный; радуйся, пастырем светлый образе.
Радуйся, угодниче Божий, святителю Феодосие, чудотворче преславный.
Боготечную звезду, к горнему Иерусалиму путеводящую и добродетельми светло сияющую, зряще тя, предивный Феодосие, иноцы же и мирстии с любовию последоваху тебе, внимающе твоему учению душеполезному и взирающе на образ чистаго жития твоего, поучахуся взывати с тобою Богу, дивному во святых Своих: Аллилуиа.
Видев себе святитель Лазарь старостию преутруждена и в силах телесных изнемогша, возжела имети тя, Феодосие, преемника по себе во святительстве и проси Святейшаго Патриарха Московскаго посвятити тя во архиепископа. Мы же в сем Божие звание, еже на тебе, уразумевающе, любовию прославляем тя сице:
Радуйся, архиерею Божий, от Предвечнаго Архиерея дивно предызбранный; радуйся, Апостолов достойный преемниче и усердный ревнителю.
Радуйся, святителю Христов, от собора святителей российских освященный; радуйся, иерарше благий и нищелюбивый.
Радуйся, архипастырю милостивый и сострадательный; радуйся, святителем Митрофану и Димитрию собеседниче и сопрестольниче.
Радуйся, архиереев православных красото; радуйся, пастырю добрый, душу твою за овцы положити готовый.
Радуйся, учителю златословесный; радуйся, богосветлый светильниче Церкве Христовы, во тьме века сего возсиявший.
Радуйся, угодниче Божий, святителю Феодосие, чудотворче преславный.
Проповедник не словом точию, но и делом явился еси Христова учения, святителю Феодосие, яко пастырь добрый, по образу Пастыреначальника Христа всех с лобовию наставляя ко спасению, всем образ жития по заповедем Христовым подавая и всех поучая взывати присно Богу: Аллилуиа.
Возсиял еси, яко утро светозарное, стране Черниговстей, святителю Божий Феодосие, и паству, тебе вверенную, светом добродетелей твоих озарил еси, смирением высокая стяжавая и нищету иноческую соблюдая; вся бо, яже имел еси, неимущим усердне раздавал еси. О сем дивящеся, яко нищелюбца совершеннаго ублажаем тя, зовуще:
Радуйся, милосердия источниче неисчерпаемый; радуйся, сирым прибежище благонадежное.
Радуйся, вдовицам милостивый покровителю; радуйся, алчущих неоскудный питателю.
Радуйся, обидимым скорый заступниче; радуйся, скорбящим благонадежный утешителю.
Радуйся, сущим в бедах готовый помощниче; радуйся, младенцем добрый воспитателю.
Радуйся, юношам и девам в целомудрии наставниче; радуйся, старцем и немощным твердое укрепление.
Радуйся, угодниче Божий, святителю Феодосие, чудотворче преславный.
Хотя всем сердцем твоим единому Господу благоугождати, подвигом добрым до конца подвизался еси, Феодосие, труды к трудом во смирении прилагая, постом и бдением с молитвою плоть твою умерщвляя и любовию всех согревая. Темже и сподобился еси еще на земли достойно и праведно воспевати ангельскую песнь Богу: Аллилуиа.
Новаго тя молитвенника и чудотворца предивнаго яви Господь в стране Российстей, святителю отче Феодосие; темже и светло красуется тобою Церковь Православная, яко дерзновение велие ко Христу имаши, Емуже молися, святителю, о нас грешных, любовию тебе вопиющих сицевая:
Радуйся, пресветлый светильниче веры православныя; радуйся, православия страже неусыпающий.
Радуйся, благочестия ревностный поборниче; радуйся, Церкве Божия столпе непоколебимый.
Радуйся, храмино добродетелей приукрашенная; радуйся, безстрастия и чистоты ревнителю преизрядный.
Радуйся, молитвы сокровище неистощимое; радуйся, таин Божиих верный строителю.
Радуйся, паству твою в вере и благочестии соблюдаяй; радуйся, со святыми сликования в Небесном Царствии сподобивыйся.
Радуйся, угодниче Божий, святителю Феодосие, чудотворче преславный.
Странствие земное богоугодне совершив, святителю отче Феодосие, свято и праведно почил еси о Господе сном смерти, яже бысть тебе прохождение от трудов на покой вечный; приял бо еси от Христа Бога венец славы нетленный и водворился еси со святыми воспевати Ему вечно хвалебную песнь: Аллилуиа.
Весь еси любовь неоскудевающая, святителю Божий Феодосие; якоже бо в житии сем, тако и по преставлении к Богу чад твоих не оставляеши; на всех, к тебе верою притекающих, милостивне призираеши, болящим исцеление подавая, скорбящих утешая, от бед избавляя. Сего ради, благодарни суще, воспеваем ти сице:
Радуйся, нищету духовную от юности возлюбивый; радуйся, Христу в меньших братиях Его верно послуживый.
Радуйся, двери милосердия Божия нам отверзающий; радуйся, гнев Божий, праведно на ны движимый, на милость прелагающий.
Радуйся, по отшествии твоем к Богу с нами пребывающий; радуйся, умерщвленныя грехами души благодатию Христовою оживляющий.
Радуйся, источниче сострадания к людем приснотекущий; радуйся, омраченных заблуждениями благостный просветителю.
Радуйся, с небесных высот на скорби наши призирающий; радуйся, всех нас любовию твоею объемлющий.
Радуйся, угодниче Божий, святителю Феодосие, чудотворче преславный.
Вси людие черниговстии прославиша Бога, егда услышаша о преславном явлении твоем, святителю Феодосие, преемнику твоему архиепископу Иоанну, егоже от недуга тяжка исцелил еси, являя дерзновение твое ко Господу. Сего ради и потщася гроб твой благоукрасити и подобие лица твоего над ним поставити, зовый дивному во святых Своих Богу: Аллилуиа.
Витии многовещаннии не возмогут восхвалити тя по достоянию, вечныя славы достойнаго, святителю отче Феодосие; и кто может поведати многая и преславная чудеса твоя, яже источил еси от нетленных мощей и икон твоих святых; о сем убо радующеся и Бога, святых Своих прославляющаго, славяще, вопием ти сице:
Радуйся, в пресветлых райских чертозех обитающий; радуйся, нетлением мощей твоих зарю общаго воскресения нам предпоказующий.
Радуйся, в видениих во благо верующим являющийся; радуйся, в сониих на молитву к твоему ходатайству призывающий.
Радуйся, слезы и воздыхания скорбящих с любовию утоляющий; радуйся, прошения труждающихся и обремененных скоро исполняющий.
Радуйся, от внезапныя смерти верных избавляющий; радуйся, данныя Богу обеты исполняти побуждающий.
Радуйся, слепым прозрение, глухим слышание подающий; радуйся, отче чадолюбивый, якоже кокош под криле, духовная чада твоя у гроба твоего собирающий.
Радуйся, угодниче Божий, святителю Феодосие, чудотворче преславный.
Спасение вечное унаследовал еси, святителю Феодосие, и светло ныне ликуеши со Ангелы и всеми святыми, присно созерцая пресветлое лице Христа Бога нашего, Егоже молити не престай за ны грешныя, да твоим заступлением сподобимся купно с тобою воспевати Ему: Аллилуиа.
Стена ограждения в Церкви Православней являешися, святителю Божий, множеством дивных чудес твоих верныя утверждающая и явлением силы Божиея вся еретическая мудрования отражающая; наставников бо раскола нетлением мощей твоих зело удивил еси и исповедати истину православия возбудил еси. Темже со страхом и благоговением вкупе с верными взываху ти сице:
Радуйся, прославлением мощей твоих всех нас радости исполнивый; радуйся, нетлением телесе твоего неверие глаголемых старообрядцев в веру претворивый.
Радуйся, ересь штунды чудесы преславными посрамивый; радуйся, жену от люторовы ереси крестное знамение православне полагати научивый.
Радуйся, младенцу слепому у мощей твоих внезапу прозрение даровавый; радуйся, немотствующий язык помазанием елея от лампады твоея разрешивый.
Радуйся, тем же елеем струпы неисцельныя исцеляяй; радуйся, близ смерти сущих болящих к жизни возвращаяй.
Радуйся, яко лишеннии разума у мощей твоих благодатию Христовою исцеляются; радуйся, яко и пелены от гроба твоего чудодействуют.
Радуйся, угодниче Божий, святителю Феодосие, чудотворче преславный.
Пение молитвенное не умолкаше у мощей твоих, святителю Феодосие, от дне погребения даже до дне прославления твоего со святыми, егда собор святителей Церкве Российския со славою из пещеры мощи твоя изнесе и в соборней церкви града Чернигова на общее поклонение честне положи. Приими убо и наше смиренное пение хвалебное и помози нам покаянием очиститися, да во исполнении заповедей Христовых преуспевающе и тобою наставляеми, с тобою благодарственне вопием Богу: Аллилуиа.
Светильник благодатный быв в житии твоем, святителю Феодосие, тихим светом смирения и любве на свещнице Церкве Христовы сияющий, и по преставлении твоем возсиял еси, яко солнце, предивными чудесы мглу раскола и ересей разгоняя и верных сердца к Богу обращая. Темже, с любовию празднующе святую память твою, вопием ти:
Радуйся, звездо лучезарная, над землею черниговскою возсиявшая; радуйся, и всю страну Российскую светом своим озарившая.
Радуйся, града Чернигова славо и ограждение; радуйся, всея земли нашея страже неусыпный и теплый молитвенниче.
Радуйся, у Престола Царя царствующих за царя нашего предстательствующий; радуйся, яко имя твое по всей стране нашей от конца в конец прославляется.
Радуйся, яко явлении твоими неверныя в веру православную обращаеши; радуйся, яко чудесы твоими инославныя к православию наставляеши.
Радуйся, яко с небесными силами присно Богу воспеваеши; радуйся, яко на небесех выну славу Его созерцаеши.
Радуйся, угодниче Божий, святителю Феодосие, чудотворче преславный.
Благодати Божией сосуд избранный был еси, святителю Феодосие; благодать Божию и в помощь немощи нашей испроси у Господа, да сею благодатию спасаеми, присноборющия ны страсти победим, и тою укрепляеми, Подателя всех благ Господа Иисуса всегда с тобою прославляем, зовуще Ему: Аллилуиа.
Поюще многая и преславная чудеса твоя и прославляюще великия подвиги твоя, святителю отче наш Феодосие, со умилением сердца славим, хвалим и величаем возвеличившаго тя Господа, в тебе явльшаго нам новое знамение Своего благоволения к Церкви Православней, яко вечному столпу и утверждению истины; тебе же, яко теплому предстателю нашему пред Богом, возглашаем сицевая:
Радуйся, в вертограде Господни от утра до вечера жизни твоея добре потрудивыйся; радуйся, в радость Господа своего, яко раб благий и верный, вшедый.
Радуйся, житием твоим путь в обители небесныя нам показавый; радуйся, венцем безсмертия и славы небесныя увенчанный.
Радуйся, неба церковнаго звездо пресветлая; радуйся, земли Российския похвало пречудная.
Радуйся, яко со всеми святыми в горних обитаеши; радуйся, яко и нас грешных на земли любовию посещаеши.
Радуйся, имже Христос прославися; радуйся, имже сатана посрамися.
Радуйся, угодниче Божий, святителю Феодосие, чудотворче преславный.
О великий угодниче Божий и чудотворце, святителю отче наш Феодосие! Приими сие малое моление наше, в похвалу тебе, аще и недостойне, обаче с любовию сыновнею приносимое, и умоли Господа Бога избавитися нам от всяких бед, скорбей и напастей, от междоусобныя брани и внезапныя смерти, и от мучений вечных в будущем веце, и сподобитися в вечней жизни с тобою воспевати Ему: Аллилуиа.
Этот кондак читается трижды, затем 1-й икос «Ангел во плоти …» и 1-й кондак «Избранный чудотворче …».
О священная главо, крепкий наш молитненниче и заступниче, святителю Феодосие, услыши нас, с верою призывающих тя и усердно припадающих к раце честных и многоцелебных мощей твоих (или: иконе твоей). Поминай нас у Престола Вседержителева и не престай молитися за ны. Вемы, яко грехи наши разлучают нас между нами и тобою, и недостойни есмы толикаго отца и ходатая. Но ты, быв подражатель человеколюбия Божия, не престани вопия о нас ко Господу, испроси предстательством твоим у Всемилостивейшаго Бога нашего мир Церкви Его, на земли воинствующей, пастырем ея силу ревностно подвизатися о спасении людей. Умоли Небеснаго Отца всем нам подати дар, коемуждо благопотребен, веру истинную, надежду твердую и любовь неоскудевающую, градов наших утверждение, мира умирение, от глада и пагубы избавление, от нашествия иноплеменников сохранение, юным и младенцем благое в вере возрастание, старым и немощным утешение и подкрепление, болящим исцеление, сиротам и вдовицам милость и заступление, заблуждшим исправление, бедствующим благовременную помощь. Не посрами нас в уповании нашем, споспешествуй, яко отец чадолюбивый, и нам понести иго Христово во благодушии и терпении, и всех управи в мире и покаянии непостыдно скончати живот свой и Царствия Божия наследником быти, идеже ты ныне водворяешися со Ангелы и всеми святыми, прославляя Бога, в Троице славимаго, Отца и Сына и Святаго Духа. Аминь.