Каноны - 22 сентября 2025

Песнь 1

Ирмос: Отверзу уста моя и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Согрешений прощение, и злых избавление, и жития исправление ныне ми испроси, твою светоносную память почитающему днесь, Анно всехвальная.

Живот рождшую боголепно родила еси, темже к присножизненней жизни преставилася еси, наслаждающися радости неизглаголанныя и Света невечерняго, Анно Богозванная.

Благодать Божественная к радости престави, без семене юже роди Дщи сея Чистая, и предстоит со многим дерзновением, Господеви молящися спастися всем.

Праведно и преподобно поживши, всехвальная, к Праведному Господу ныне преставилася еси радоватися с праведными, иже от века, темже, сошедшеся, тя верою почитаем.

Богородичен: Из Тебе нам возсия Солнце праведное, и всю озари Богоразумием землю, и разори мглу неразумия, Чистая, Всенепорочная, и Всеблаженная.

Песнь 3

Ирмос: Не мудростию, и силою, и богатством хвалимся, но Тобою, Отчею Ипостасною Мудростию, Христе, несть бо свят, паче Тебе, Человеколюбче.

Заченшую Содержащаго вся зачала еси и родила еси паче слова Христа рождшую, темже твое успение, Анно, почитаем.

С похвалами совершается славная память твоя, яко родила еси нам хвалений превысшую, Чистую Богоматерь, Анно Богоприятная.

Якоже солнце с луною, Анне совокупляяся, славный Иоаким, девства зарю раждает, Еяже ради Божества луча просия.

Гору Божественную из чресл твоих родила еси и к горам мысленным и рая селением, Анно, преминула еси, Богоблаженная.

Богородичен: Тя Предстательницу твердую, Богородительнице, стяжахом, упование на Тя возложивше, спасаемся и, к Тебе бо прибегающе, ограждаемся.

Седален, глас 8

Матере Владыки и Творца мати была еси, Анно всехвальная, Того повеления присно хранящи, сего ради, умерши, к жизни безсмертней преставилася еси воистину и к Свету невечернему. Темже светоносную и святую твою память совершаем, духом просвещаеми всегда, и согласно вопием ти: моли Христа Бога грехов оставление даровати чтущим любовию святую память твою.

Песнь 4

Ирмос: Седяй в Славе на Престоле Божества во облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей.

Иже в законе писаная, поучающися, совершила еси и Законодавца Матере мати была еси, темже тебе вся тварь по долгу ныне сотворяет твою радостно память.

Блаженное чрево твое воистину, носившее Свет мира внутрь во чреве носившую, и сосца твоя красная, яко доившая доившую, Анно, Христа, Питателя нашего.

Яко поживши непорочно, Юже непорочно родила еси, Богородицу Отроковицу, Слово Отчее породившую, и к Нему со славою вселилася еси, обожена честными воистину причастии.

Богородичен: Девы чрево—стог, якоже на гумне, воистину явися, клас неделанен имущи, имже питается всякое естество, зовущее: Всесильне, слава, Христе, силе Твоей.

Песнь 5

Ирмос: Нечестивии не узрят славы Твоея, Христе, но мы Тя, Единородне, Отеческия Славы Сияние Божества, от нощи утренююще, воспеваем Тя, Человеколюбче.

Небо родила еси на земли воистину, рождшую Небесе Творца, днесь тя преставляюща к Небесным со славою, Анно преславная.

С невещественными чинми невещественным умом ликуеши радостно, исполняема сияния Богатодавца, но нас поминай, верою хвалящих тя.

От корене Иессеева прозябшая яве, благоцветущий жезл, Чистую, израстила еси, славная, израстившую цвет неувядающий, Иисуса, Избавителя нашего.

Богородичен: К Тебе прибегаю единей державней, верных покрову, на Тя надежду возлагаю спасения моего, Пресвятая Владычице Богородице, не презри мене.

Песнь 6

Ирмос: Пожру Ти со гласом хваления, Господи, Церковь вопиет Ти, от бесовския крове очищшися ради милости от ребр Твоих истекшею Кровию.

Господа Иисуса Бога праотцы, Иоаким же и Анна, правдою украшени, по достоянию в песнех да восхвалятся днесь.

Всяческих похвал Анна превзыде, яко всякия похвалы превозшедшую родила есть, сего ради в лице праведных водворяется.

Светоносия и светлости исполнена память твоя, сияния же в мире спасительная испущающи, целомудренная Анно, дарований всяческих исполни.

Ручку, манну Божественную вместившую, во чреве носила еси, Анно, и, с Нею ныне на Небесех живущи, о всех молишися, прехвальная.

Богородичен: От Анны мирови родилася еси, Царице, всех Царя рождшая, и, девствующи по Рождестве, Херувим превышши, Пренепорочная.

Кондак, глас 2

Прародителей Христовых память празднуем, тех верно просяще помощи избавитися всем от всякия скорби, зовущим: Бог наш с нами, сих прославлей, якоже благоволи.

Икос

Пророчески снидемся вси достойно пети праматере Христовы блаженное преставление: днесь бо от временныя преставися жизни, на Небесех с радостию шествие творящи, радуется, яко сущи мати истинныя сущия Богородицы, и взывает верно: величит душа моя Господа, яко родих Сего Матерь на земли, Иже Сию прославлей, якоже благоволи.

Песнь 7

Ирмос: Спасши во огни авраамския Твоя отроки и халдеи убив, яже Правда праведно уловляше, препетый Господи, Боже отец наших благословен еси.

Яко жизни истинныя, Анно, Матерь рождши, к жизни истинней преставилася еси ко свету, взывающи: препетый Господи, Боже отец наших, благословен еси.

Яже Матери Избавителя мати сущи, Анно, от земли к Небеси, добродетельми украшена, востече, во хвалении зовущи: Боже отец наших, благословен еси.

К нескончаемей жизни, к пространней широте райския пищи, к невечернему свету отшла еси, Богоносице, зовущи: Боже отец наших, благословен еси.

Испещрена добродетельми, добротою Божественных дарований украшена, к Богу преложися, непрестанно зовущи: препетый Господи, Боже отец наших, благословен еси.

Богородичен: Украшена добротами добродетелей, краснаго паче сынов человеческих и родила еси Слово, Пренепорочная, красными лепотами украшающаго Тебе песнословящих.

Песнь 8

Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Мати единыя Богородицы, яже неплоды прежде, ныне же прамати Христова, якоже неплодства, сице и мертвости, совлекши одежду, во стране живущих вопиет: Господа пойте, дела, и превозносите Его во вся веки.

Христос тебе двери Вышния отверзе, радостно тя прият, яко дверь родила еси, еюже Сам проиде и затворену яви по исхождении, Богомудрая достойнопетая Анно, темже тя почитаем, вернии, во веки.

Свято житие скончавши, Святыя Приснодевы мати была еси, Яже Пресвятое Слово породи, освящение и избавление нам подающа, Богомудрая и досточудная Анно, темже тя поем присно, вернии, во веки.

Богородичен: Многими мя содержима бедами и бурею греховною бедствующаго, ко пристанищу невлаемому дыханий Духа, Богородительнице Владычице, ныне настави: пристанище бо еси христиан. Темже Тя поем во вся веки.

Песнь 9

Ирмос: Ева убо недугом преслушания клятву вселила есть; Ты же, Дево Богородице, прозябением чревоношения мирови Благословение процвела еси. Тем Тя вси величаем.

От земли чрева твоего воистину родися земля святая, неделанен клас прозябши безсеменно, мирови Питателя и Господа, тебе к пищи неиждиваемой, Анно, премудро преставльшаго.

Память твоя днесь нам возсия, солнца светлейши, сиянием богатых даров нас просвещающи, всечестная, и мрак страстей изымающи, юже совершающих сохрани.

Божественный нас Иоаким и Анна Богомудрая и всеславная, супруг честный и светоносный, созывают божественне веселитися сих праздником, егоже уясни Светодавец всех Господь.

Богородичен: Марие Госпоже всех, всякими мя порабощена согрешении ныне свободи: Сама бо Свободителя родила еси всех, работы нас избавльшаго греховныя, Божественным мановением.

Светилен

Достодолжно воспоем Богозванную Анну: Богородицу бо та Деву Марию рождши паче надежды, сродница по плоти Христа, Избавителя нашего, явися, сию боголепно приемшаго днесь в Вышних, о нас молящуюся и о умирении мира.

Песнь 1

Ирмос: Во глубине постла иногда фараонитское всевоинство преоруженная сила, воплощшееся же Слово всезлобный грех потребило есть, Препрославленный Господь, славно бо прославися.

Тебе твоего, блаженне, учения долг приносяще, воздаяния простираем, венец похвальный плетуще: ты же любовию увязен, пребогате, твоими святыми молитвами, благодать нам подаждь духовную.

Всегубительное стремление страстей, отче, увядил еси, словесным объят Богомудрием, благопребытен был еси, и благогласен, кроток же и смирен, словом же премудрости, преподобне отче Иосифе, и разумом венчан.

Священно украсил еси себе, преподобне отче, детельным разумом благодати, Богоглаголиве Иосифе, желая венца славы Христовы, и своея надежды изрядно, блаженне, не погрешил еси.

Целомудрие удержал еси яве, крайнюю же кротость, и высокогласное смирение: имиже возвышаемь, трудов твоих действом и видением радуяся принесеся, венец неувядаемый приим трудов твоих воздаяния.

Богородичен: Тварей явилася еси Чистая, всех видимых и невидимых превышши Всенепорочная, Зиждителя бо родила еси, якоже изволи воплотитися во утробе Твоей. Егоже со дерзновением моли спасти поющия Тя.

Песнь 3

Ирмос: Процвела есть пустыня, яко крин Господи, языческая неплодящая церковь, пришествием Твоим, в нейже утвердися мое сердце.

Даждь Христе Спасе, прощение многих наших согрешений, яко да и мы почитаем память Твоего угодника преподобнаго Иосифа, его же молитвами спаси ны.

Твоими молитвами Милостиваго умоляй Бога, преподобне отче наш Иосифе, и греховный мрак печали нашея разори, и благодушия утешение низпосли.

От младенства ты, блаженне Иосифе, познан был еси Богом, и на Того надеялся еси, наставляемь на спасительная Его повеления. Емуже ныне предстоя, со дерзновением о нас молися.

Богородичен: Единаго Святыя Троицы, Слова Сына родила еси, Дево Пречистая. Егоже с преподобным Иосифом о рабех Твоих моли, верою просящих грехов прощения.

Седален, глас 3.

Христова угодника, Евангельскаго учения послушника, светло празднуем преподобнаго Иосифа память, приидите ублажим странноприимца суща, сиротам и вдовам заступника тепла, и нищим дателя нескудна, целомудрия хранителя, и добродетелей делателя, и ересей обличителя непостыдна, и светильника русскаго, егоже ради просяще от Христа душам нашим спасения, и миру велия милости.

Песнь 4

Ирмос: Пришел еси от Девы, не ходатай ни ангел, но Сам, Господи, воплощся, и спасл еси всего мя человека. Тем зову Ти: слава силе Твоей, Господи.

Ты, преподобне Иосифе, монашествующих был еси венец, не камением многоценным украшен, но добродетельми обложен, и явился еси, блаженне, благодарованное воистину украшение.

Божественную, Богомудре, почтил еси Мудрость, яже тя даровании благими обогати, славу вечную тебе исходатайствовавши, преподобне отче Иосифе, всечестне.

Светлостию нравов твоих, и образы благодати, преподобне отче Иосифе, подобне пожил еси: темже благоприступен ты всем был еси, всеблаженне досточудне.

Богородичен: Умерщвление плодом мне Ева принесе, Ты же, Жизнь рождши Ипостасную Пречистая, абие исправила еси. Темже зовем Ти: слава силе Твоей.

Песнь 5

Ирмос: Ходатай Богу и человеком был еси, Христе Боже, Тобою бо, Владыко, к Светоначальнику Отцу Твоему, от нощи неведения, приведение имамы.

Умом чистым Писанием Божественным беседовал еси, Богоглаголиве Иосифе, и видения и деяния собрав богатство, отче преподобне.

Премудрости глубину испытав, мудре Иосифе, достигл еси обрести, елико благопотребно, и бисер многоценный болезньми стяжал еси, преблаженне, разума.

Аще земное отечество, блаженне Иосифе, оставил еси, всячески благоименитну Божии Матери обитель создал еси, и множество монашествующих в ней собрал еси. Сего ради первое Отечество Небесное приял еси. Со дерзновением, отче, за ны молися Христу Богу, рабы твоя.

Богородичен: Се во чреве, Богородице Пречистая, Христа Бога паче слова имела еси, якоже Исаиа провозгласи: выше естества, Сего, Богородительнице, родила еси.

Песнь 6

Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.

Вселенней светило пресветлое, отче, явился еси, Иосифе, словесы духовными просвещая верою и любовию к тебе притекающия.

Блаженное житие, отче, прешел еси, наздав убо чувства, вне был еси мирскаго мятежа и Богу приближился еси, преподобне Иосифе.

Зело милостива и странноприимца показа тя Спас наш миру, отче, и врача болящим, Иосифе, сиротам и убогим заступника любезна.

Богородичен: Паче естества Дево, родила еси, и вечнуеши Дева, явльшися истиннаго Сына и Бога Твоего, Мати Чистая.

Кондак, глас 8.

Жития треволнения, и мятеж мирский, и страстная взыграния в ничтоже вменив, пустынный гражданин показался еси, многих быв наставник, Иосифе преподобне: монахов собратель и молебник верен, чистоты рачитель, моли Христа Бога спастися душам нашим.

Икос

Божественными добродетельми твоими себе, мудре, украсил еси и Спаса Христа жилище соделал еси, отче, мужественне, якоже злато искусився верою к Богу и надеждею, и любовию обеты полагая: воздержанием постився, яко безплотен, в целомудрии, и в смирении возвысился еси. Темже и мы молитвами Твоими просвещшеся, преподобне Иосифе, вопием ти: радуйся, яко измлада Богу послужил еси; радуйся, яко притекающих к тебе ко спасению ходатай был еси; радуйся, христолюбивому воинству похвала; радуйся, яко твоими молитвами противнии побеждаются; радуйся, яко всем просящим даеши дар, от Господа дарованный тебе; радуйся, яко чудесы тя Бог прославляет, и всех звати тебе научает; радуйся, преподобне отче Иосифе, постников удобрение. Моли Христа Бога спастися душам нашим.

Песнь 7

Ирмос. Богопротивное веление беззаконнующаго мучителя высок пламень вознесло есть: Христос же простре Богочестивым отроком росу духовную, Сый благословен и препрославлен.

Благоухают, преподобне Иосифе, твоих учений сладкая словеса любящим тая, устрашают же еретиков мудрования. Благодатию бо Святаго Духа глаголал еси, Божество Едино проповедуя в Трех Лицех: Слова же Воплощение поя, благоухаеши нас, пребогате.

Риз худость имел еси преподобне Иосифе, в зиме же и лете не пременяя, болезненно претерпевал еси Бога ради совершенно; темже и Небеснаго приятия сподобился еси наследник быти.

Слово твое солию растворено, отче, и житие твое благодатию, преблаженне, сияя явися пречудне. Темже и в Вышния Обители радуяся вселился еси, Христу со дерзновением ныне предстоиши о нас моляся.

Богородичен: Управляющи, Пречистая, наше житие, к Твоему всетихому пристанищу направи: Бога бо родила еси благих Источника, всем подающи верным нетления благодати.

Песнь 8

Ирмос: Пещь иногда огненная в Вавилоне действа разделяше, Божиим велением халдеи опаляющая, верныя же орошающия поющия: благословите вся дела Господня Господа.

Венец благолепен, Христос Жизнодавец на верх твой положи, тезоименне Иосифе. Деяньми бо просиял еси и видении, зовый: благословите вся дела Господня Господа.

Вся прешед чувственная, преблаженне, Уму Первому приближился еси, души твоея чистотою, жития же светлостию, венченосче Иосифе, зовый: благословите вся дела Господня Господа.

В души твоей Божественное богатство Духа Святаго собрав, непорочную молитву и чистоту краснолепную, бдение и воздержание; сего ради жилище Святыя Троицы явился еси преподобне Иосифе.

Богородичен: Владычице Пречистая, грешников спасение, приими мольбу сию, и избави мя от грехов моих, Твоему Сыну прибегающаго, молитвами угодника Твоего, преподобнаго Иосифа.

Песнь 9

Ирмос: Безначальна Родителя Сын, Бог и Господь, воплощся от Девы нам явися, омраченная просветити, собрати расточенная. Тем Всепетую Богородицу величаем.

Пречестный отче Иосифе, ныне чисто услаждаешися пищею паче умною, идеже собори святых окрест Господа ликуют, блаженне, иже ныне чтущия тя, ходатайствуя к себе привлецы.

Прешел еси радуяся к желанием рая, ко единому истинно яве блаженству, к пребольшей доброте, и к жизни истинно нестареющейся, и к Свету Невечернему, Богоносе отче Иосифе.

Якоже солнце просиял еси в монашеских соборех, от младых бо ногтей освящен был еси, якоже зарю испущая добродетели своего жития, преподобне Иосифе, Богоносе отче пребогате.

Богородичен: Разумевше издалече, прозорливыми очесы, пророцы Тя яве провозвестиша, хотящую Матерь быти Вседетеля и Владыки всех. Тем Тя, Всепетая, Богородицу исповедуем.

Светилен

Мирскаго пристрастия, яко скверны уклонился еси, и алчбою плоть твою увядил еси, отче, и небесною славою со ангелы обогатился еси; темже непрестанно моли Христа Бога, преподобне Иосифе.

Песнь 1

Ирмос: Волною морскою Скрывшаго древле гонителя мучителя, под землею скрыша спасенных отроцы: но мы, яко отроковицы, Господеви поим, славно бо прославися.

О Божий Слове, Милостиве Христе Царю! Презри моя многая согрешения, и отверзи ми косноязычныя уста, и дух прав обнови во утробе моей, и даждь ми Христе, слово разума, да воспою Твоего угодника, преподобнаго Иосифа.

Повинулся еси преподобне, вседушно твоему отцу, преподобному Пафнутию: и был еси яко другий Исаак, ради крайняго послушания. Темже преподобне в тя вселися Пресвятый Дух, Егоже действием светло украшаемый, и ныне предстоиши Святей Троице радуяся.

Уподобился еси преподобне Иосифе, древнему Иакову, послушавшу своея матере, отчее благословение приемшему: ты же преподобному Пафнутию повинулся еси, и от него благословение приим, устрояешися пастырь Христова стада в тойже обители, Богу тако извольшу.

Богородичен: К Тебе прибегаем, Богородице Всепетая, и Тебе припадающе молимся, Твоим ходатайством, Владычице, и молитвами Твоего угодника преподобнаго Иосифа, милостива нам сотвори, Егоже пречисто и недоведомо родила еси Христа Бога нашего.

Песнь 3

Ирмос: Тобою, Христе, небеса утверждаема вся, Слово Божие и Сила, исповедуют славу неизреченну, и Вседетельныя руки Твоея сотворение; несть бо Пресвят, разве Тебе, Господи.

Не предаждь Владыко, Твоего достояния врагом хвалящимся на ны, молим Тя, Милостиве, спаси православныя христианы, и буди милостив Твоим рабом: и избави ны, Христе Царю, мучения и огня негасимаго, и сподоби ны деснаго предстояния, молитвами преподобнаго Иосифа.

Наполнися сердце твое, преподобне, благодати Христовы, и праваго учения, был еси образ монашествующих, всякими добротами духовными: не дал бо еси сна твоим очесем, ни веждам дремания, но яко стяжал еси дерзновение ко Господу, моли о нас, молим тя, да будет нам милостив в День Судный.

Яко лев страшен из пустыни устремився, устрашил еси безбожныя еретики, имея, преподобне, меч духовный, иже есть глагол Божий, посекл еси изникшая нечестия, и из корене исторгл еси злославных учения, собрал еси яко трудолюбива пчела от всех писаний Божественная словеса, и сими уста скверная безбожных заградил еси, преподобне Иосифе.

Богородичен: Дивятся, Мати Божия, небеснии чини красоте души Твоея, и чистоте девства Твоего: мы же, земнии, недоумеем глаголати несказаннаго Рождества Твоего, емуже тайно научающеся, познахом Тя, рождшую Христа Бога нашего, Егоже милостива нам сотвори в День Судный страшнаго Пришествия Его.

Седален, глас 3.

Христова угодника, Евангельскаго учения послушника, светло празднуем преподобнаго Иосифа память, приидите ублажим странноприимца суща, сиротам и вдовам заступника тепла, и нищим дателя нескудна, целомудрия хранителя, и добродетелей делателя, и ересей обличителя непостыдна, и светильника русскаго, егоже ради просяще от Христа душам нашим спасения, и миру велия милости.

Песнь 4

Ирмос: Удивися Твой разум от мене, услышавшу преславная веления смотрения Твоего, укрепися же возлюблением Твоего схождения: Ты бо моея нищеты не отверглся еси.

Якоже древле Иосифу Прекрасному завидеша братия, совет лукав умыслиша, тако и на тя, преподобне Иосифе, советоваша лукавое умышление. Ты же любовию ко Христу вперяемь, сих негодования в ничтоже вменив, непрестанно молися о нас Господу.

Изшел еси, преподобне, от идеже прежде начальствуя, Христу Царю Небесному моляся и Пречистей Богородице, шествуя на место, Богом тебе показанное, и тамо пустыню населяеши, Христа ради, в нейже зарю светлу узрети сподобился еси благодати духовныя, блаженне Иосифе.

Преподобне отче, уподобился еси Иосифу Прекрасному: не покорился бо еси сладострастию, и зело тщался еси о целомудрии, мысленнаго змия победил еси, и соннаго жития небрегл еси, из темницы тела изшел еси, и царь не Египта, но страстей был еси, и добродетели пшеницу собрал еси: еюже ны, чада твоя, питаеши.

Богородичен: Пречистая Богородице, вемы Тя христиане твердую Защитницу, и скорую Помощницу, и в бедах избавление. Темже молим Тя: испроси нам у Христа множеству согрешений прощение и вечныя муки избавление.

Песнь 5

Ирмос: Мир мног любящим Тя Христе, и нощь просвещения в пищи словес Твоих, сего ради от нощи утренююще, просим милости от Тебе, Человеколюбче.

Всяк писменник, научився Божественному Писанию, подобен есть Царствию Небесному; ты же, преподобне, поревновав Евангельскому учению и от сего приял еси крепость духовную, Схариа евреина посрамил еси, и его проклятью ученики таяжде мудрствующии, и анафеме предал еси.

Преподобне отче, дарова тебе Бог мудрость, и слово разума: ты же проповедал еси в Триех Лицех Единаго Бога, и сему свидетельство привел еси от Божественных Писаний, научая покланятися в Троице Единому Богу.

Преподобне отче Иосифе, безумныя еретики глаголющия, яко еще Христос не родися, обличив ясно, сказал еси, яко родися Христос нашего ради спасения от Пречистыя Девы Марии, и нас ради пострада волею распятие, и воскресе тридневно. И паки грядет со святыми ангелы, судити весь мир.

Богородичен: О безумнии еретицы и отступницы, непокоривии еврее, егоже вы чаете, той несть Христос, но антихрист есть, якоже свидетельствуют Божественная Писания. Мы же исповедуем Христа Бога нашего, рождшагося неискусомужно от Девы Чистыя Марии; Еяже молитвами избави нас, Христе, от таковыя прелести, и спаси души наша.

Песнь 6

Ирмос: Бездна последняя грехов обыде мя, и волнения не ктому терпя, яко Иона Владыце вопию Ти: от тли мя возведи.

Яко священник сый поистине принося Христу Богу Жертву Безкровну, тайно возложенную и от ангел славимую, от Бога Отца приемлему и Святым Духом осеняему, и нам на спасение даруему.

О безумнии еретицы! Что поощряете языки богохульныя глаголюще: не можаше ли Бог не родився спасти мир инако? ты же, преподобне Иосифе, сих уста заградил еси, научая славити Христа Бога нашего.

Преподобне отче Иосифе, еретиков уста заградил еси, приводя свидетельства от Божественных Писаний.

Пытайте, рече, безумнии, Писания, яко явилася есть Святая Троица Аврааму в Трех Лицах, во Едином Божестве.

Богородичен: Припадаем Тебе, Пречистая Богородице, со умилением глаголюще: избави ны, Мати Христа Бога, веяния прелести разлучающия от Бога, и сподоби в День Судный получити от Христа милость и не отпасти деснаго предстояния.

Кондак, глас 8.

Жития треволнения, и мятеж мирский, и страстная взыграния в ничтоже вменив, пустынный гражданин показался еси, многих быв наставник, Иосифе преподобне: монахов собратель и молебник верен, чистоты рачитель, моли Христа Бога спастися душам нашим.

Икос

Божественными добродетельми твоими себе, мудре, украсил еси и Спаса Христа жилище соделал еси, отче, мужественне, якоже злато искусився верою к Богу и надеждею, и любовию обеты полагая: воздержанием постився, яко безплотен, в целомудрии, и в смирении возвысился еси. Темже и мы молитвами Твоими просвещшеся, преподобне Иосифе, вопием ти: радуйся, яко измлада Богу послужил еси; радуйся, яко притекающих к тебе ко спасению ходатай был еси; радуйся, христолюбивому воинству похвала; радуйся, яко твоими молитвами противнии побеждаются; радуйся, яко всем просящим даеши дар, от Господа дарованный тебе; радуйся, яко чудесы тя Бог прославляет, и всех звати тебе научает; радуйся, преподобне отче Иосифе, постников удобрение. Моли Христа Бога спастися душам нашим.

Песнь 7

Ирмос: Отроцы в Вавилоне пещнаго пламене не убояшася, но посреде пламене ввержени, орошаеми пояху: благословен еси, Господи Боже отец наших.

Сказуя, преподобне, от Божественных Писании, како и коея ради вины подобает христианом покланятися и почитати святыя иконы, и Честный Крест Христов, и прочая священная воображения. Сим приял еси от Христа дарования, поя: благословен еси, Господи Боже отец наших.

Из Египта страстей изшел еси, преподобне, и прешел еси море житейское без истопления, и достигл еси Гору Небесную, многая грешных души приводя Христу покаянием, и поя: благословен еси, Господи Боже отец наших.

Потопил еси, преподобне, фараона мысленнаго в водах слез твоих, и его колесницы, иже суть лукавыя демоны, и кони и всадники, злоумныя еретики и безбожныя, и радуяся песнь победную воспел еси: благословен еси, Господи Боже отец наших.

Богородичен: Аз, Дево Чистая, к Тебе прибегаю, окаянный, иский Тобою обрести спасение: вем бо, Пречистая Владычице, яко можеши, елика хощеши. Христа, Егоже родила еси, Пречистая, моли, да будет нам милостив в День Испытания, поющим: благословен еси, Господи Боже отец наших.

Песнь 8

Ирмос Ужаснися бояйся небо, и да подвижатся основания земли. Се бо в мертвецех вменяется, в Вышних Живый, и во гроб мал странноприемлется. Егоже отроцы благословите, священницы воспойте, людие превозносите во вся веки.

Что безумнии еретицы всуе мятетеся, глаголюще: яко уже седмь тысящь лет скончашася, Христово же пришествие еще несть. Сия глаголющих дерзостне обличил еси, сказуя: близ есть при дверех пришествие. Яко глаголют пророцы и апостоли, имже сказа Святый Дух, и научая пети: Егоже дети благословите, священницы пойте, и превозносите во вся веки.

Страшно есть впасти в руце Бога Жива, безумнии не льститеся, не крестит Христос по смерти спасенным крещением, неправе о нем мудрствующих, но во огни негасающем мучит. Мы же вернии у Христа просим время покаяния, да будет нам милостив в День страшнаго Его Пришествия. Сия преподобне глаголал еси и нас учил еси пети: Господа, дети, благословите, священницы воспойте, и превозносите Его во веки.

Моисей Великий в пустыни повеле Израилю выспрь на медный змий взирати, и тако угрызения змиина избавляхуся. Ты же, преподобне, нечестивыя научая покланятися Кресту Животворящему, и славити Святую Троицу во Едином Божестве, и сим избавлятися прелести змия мысленнаго диавола, и нас уча пети: дети благословите Господа, священницы пойте и превозносите Его во веки.

Богородичен: Тобою Пречистая Богородице, от всякия напасти избавляемся, избави ны, Мати Божия, вечнаго осуждения, да зовем Ти немолчно: радуйся, Купино Неопалимая; радуйся, Горо присенная, радуйся, запечатанный Источниче, радуйся, Дево Чистая, Господь с Тобою. Егоже благословит вся тварь, и превозносит во вся веки.

Песнь 9

Ирмос: Не рыдай, Мене, Мати, зрящи во гробе, Егоже во чреве без семене зачала еси Сына. Востану бо и прославлюся, и вознесу со славою непрестанно яко Бог, верою и любовию Тя величающия.

Преподобне отче Иосифе, поминай нас, чада твоя, ко Христу Богу нашему, да спасет от всяких бед и скорбей, и сподобит милости и деснаго предстояния в День Судный, славити Свое Божество, верою и любовию Того величающия.

Преподобне отче Иосифе, монашеское житие возлюбил еси, и хулящих тое уста заградил еси, апостола Павла яже к Тимофею словеса возвещая, яко монашеское житие Богу приятно есть, Емуже и ты сим благоугодил еси; сего ради тя ублажаем.

Яко Иисус Навин подвизася на иерихоняны, тако ты, блаженне словесы твоими безбожных уста заградил еси отступников и многая неверия укротил еси, научая славити Святую Троицу: сего ради тя ублажаем.

Богородичен: О Пресвятая Владычице Богородице! Не имамы помощи иныя разве Тебе, молися Сыну Твоему и Богу нашему, с преподобным Иосифом, да соблюдет люди Твоя и сохранит страну нашу нерушимо, и да спасет ны верою и любовию Тя величающия.

Светилен

Мирскаго пристрастия, яко скверны уклонился еси, и алчбою плоть твою увядил еси, отче, и небесною славою со ангелы обогатился еси; темже непрестанно моли Христа Бога, преподобне Иосифе.

Песнь 1

Ирмос: Воду прошед яко сушу, и египетскаго зла избежав, израильтянин вопияше: Избавителю и Богу нашему поим.

Приими хваление, от уст недостойных тебе приносимое, и воздаждь теплыми твоими молитвами к Богу, чтущим святую память твою, отче наш Феодосие.

От юности Господа возлюбил еси, чистоту непорочну сохраняя, от детства Тому прилепился еси чистою твоею душею, в простоте и незлобии сердце твое соблюдая. Темже и чадо Божие воистину был еси, святе Феодосие.

Благо есть мужу, егда возьмет ярем в юности своей, глаголет Писание. Сему глаголу последуя, с радостию иго Господне от юности восприял еси и был еси инок преизрядный, блаженне Феодосие.

Богородичен: Пресвятая Дево, Мати Божия, Заступнице наша непостыдная, спаси, услыши нас, страстьми люте одержимых, и даждь руку помощи молитвами Твоими.

Песнь 3

Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, едине Человеколюбче.

Блажени нищии духом, глаголет Господь, сему спасительному глаголу внимая, паче всех добродетелей нищету духовную потщался еси стяжати, преподобне, возлюбив тую яко ограду крепкую от всякаго искушения и яко Боголюбезную Матерь всех добродетелей.

Познав, яко от послушания раждается смирение, от смирения же безстрастие, всем сердцем возлюбил еси послушание, во всем волю свою и злыя помыслы отсекая. Темже и безстрастия достигл еси, уготовав душу твою в чистую обитель Духа Пресвятаго.

Кротость велию стяжал еси, Богомудре Феодосие, вся скорбная благодушне претерпевая, всякую обиду и уничижение в молчании любовию покрывая. Сего ради и приял еси наследие на земли живых, идеже праведнии во веки пребывают, славяще Господа Иисуса.

Богородичен: Не имамы дерзновения к Сыну и Богу Твоему, Пресвятая Владычице, не имамы дерзновения и к Тебе, Пренепорочная, грехми присно оскверняеми, аще не Сама Ты, Премилосердая Мати, воззовеши нас, заблуждших, к покаянию, надеждею спасения отревающи от нас всякое уныние и разленение.

Седален, глас 4

Явился еси светильник благодатный, отче наш Феодосие, тихим светом смирения и любве сияяй и нас любовию твоею озаряяй. Темже и мы, любовию чтуще память твою, вопием ти: моли о нас, святителю Божий, новоявленный чудотворче.

Песнь 4

Ирмос: Ты моя крепость, Господи, Ты моя и сила, Ты мой Бог, Ты мое радование, не оставль недра Отча и нашу нищету посетив. Тем с пророком Аввакумом зову Ти: силе Твоей слава, Человеколюбче.

Немощию отягчен и старостию претружден быв, архипастырь Лазарь первее убо сослужителя, последи же и наследника себе устрояет тя, святителю Феодосие, и церкви Черниговстей светильника, юже молитвами твоими просвещай во вся веки.

Воистину чести и власти святительския достоин явился еси, отче Феодосие, словом премудр быв, житием же добродетелен, в Божественных Писаниих искусен и словесныя овцы наставляти зело доволен.

Благочестием украшаяся, и в духовнем жительстве всем людем страны Черниговския известен быв, единодушне теми избран был еси в великое служение Церкви Божией, отче Феодосие, Юже и ныне назирай твоими молитвами.

Богородичен: Много может молитва праведнаго поспешествуема, глаголет Иаков, брат Господень. Много может и молитва святителя Феодосиа, споспешествуема Твоею Матернею молитвою, Пресвятая Владычице Богородице: еси бо предстательство и покров и заступление наше, Благодатная.

Песнь 5

Ирмос: Вскую мя отринул еси от лица Твоего, Свете Незаходимый, и покрыла мя есть чуждая тьма окаяннаго, но обрати мя и к свету заповедей Твоих, пути моя направи, молюся.

Радовахуся людие града Чернигова, зряще тебе светлостию сана святительскаго облечена, и купно со архипастырем Лазарем престолу благодати Божия предстояща, и преподобныя своя руце о пастве воздеюща, и Христа благодаряще, сердцы своими умилишася.

Образ был еси всей богоданней пастве твоей, словом и житием, любовию и духом, верою и чистотою. Сего ради не точию овцы твоя любовию к тебе прилепляхуся, но и инославнии тя яко человека Божия, отче наш Феодосие, почитаху.

Пастырь воистину добрый словесному стаду твоему, святителю Феодосие, был еси, душу твою за овцы твоя положити готовый. Темже и явился еси обидимым убо заступник непреоборимый, правды же ревнитель неустрашимый, сильных мира сего с любовию обличая и пасомых своих отечески вразумляя, заблуждшия же на путь правый премудре наставляя.

Богородичен: Умерщвленную душу мою оживи, падшую возстави, уязвленную исцели, ум мой просвети, искушений волны укроти, Мати Божия, Дево Пресвятая, и спаси мя молитвами Твоими, Пречистая.

Песнь 6

Ирмос: Молитву пролию ко Господу, и Тому возвещу печали моя, яко зол душа моя исполнися, и живот мой аду приближися, и молюся яко Иона: от тли, Боже, возведи мя.

От юности инок преизрядный быв, иноческия обители с любовию созидал еси, и вся на пользу жития иноческаго в тех благоустроил еси, всех присно к Богу наставляя отеческими твоими поученьми, отче наш, Феодосие Богомудре.

Благолепне душу твою во храм Духа Божия добродетельми устрояя, благолепие Дому Божия возлюбил еси и, всеусердное попечение о том имея, еще и храмы новы созидал еси во славу Творца и Бога, мир весь несказанною красотою благоукрасившаго.

Радостию Ангельскою, святителю Божий, радовался еси, егда чада твоя во истине ходяща видел еси, и, якоже отец чадолюбивый, сердцем твоим о заблуждающихся скорбел еси и о спасении всех молитву творил еси, вся любовию объемля и о всех предстательствуя, отче наш, святителю Феодосие.

Богородичен: Приидите, вси вернии, припадем к теплей Заступнице рода нашего, Матери Божией, и во умилении сердца воззовем: Пресвятая Владычице Богородице, покрый нас благодатным покровом Твоим и молитвами Твоими избави нас от всякаго зла.

Кондак, глас 4

Пастырей Начальнику Христу трудился еси, святителю Феодосие, на пажити духовней словесныя твоя овцы питая, и целебен дар от Христа Спаса приял еси, во еже немощи душевныя и телесныя целити всех, с верою к тебе приходящих. Темже и ныне, святе, молися, всем, имя твое призывающим, от наветов вражиих спастися и помиловатися душам нашим.

Икос

Дар Божий воистину явился еси земли Российстей, святе Феодосие, от юности бо себе Богу возложив, подвигом добрым до конца подвизался еси, и дарования велия приял еси, благодати сосуд быв избранный. Темже яко в житии твоем, тако наипаче по блаженнем успении, предстоя Престолу Пресвятыя Троицы, со дерзновением воздееши преподобныя твоя руце о пастве твоей, и о всей Российстей тепле моляся. Сего ради, с верою и любовию к тебе притекающе, вси скорбящии неоскудно утешение приемлют и болящии исцелений сподобляются. С нимиже и мы тебе, яко чадолюбивому отцу, взываем: моли, святе, о призывающих имя твое, от наветов вражиих спастися и помиловатися душам нашим.

Песнь 7

Ирмос: Отроцы еврейстии в пещи попраша пламень дерзновенно, и на росу огнь преложиша, вопиюще: благословен еси, Господи Боже, во веки.

Присно поучаяся памяти смертней, непрестанно желал еси Крест Господень пред очесы твоими держати, Егоже воображение и в пути неразлучно пред тобою пребываше, во еже всегда от сердца взывати ко Господу: благословен еси, Господи Боже, во веки.

И по смерти, яко жив сый, благодатию Божиею, с чады твоими пребываеши, и по преставлении твоем пастырь добрый тем являешися, отче Феодосие, в сонных видениих неведущия в вере наставляя и всех вопити научая: благословен еси, Господи Боже, во веки.

В церковь Божию ходити и молитися болящему иноку повелел еси, отче Феодосие, во сне тому представ и отечески того вразумляя, грехи его воспомянул еси, к покаянию призывая, и исцеление тому подал еси, да выну славит Господа: благословен еси, Господи Боже, во веки.

Богородичен: Разсеяся ум мой, одебеле сердце, немоществует мое произволение. Владычице Богородице, умилосердися о мне грешнем, исцели душу мою и, яко Благаго Спаса моего Благая Мати, спаси мя, да выну вопию Ему: Благословен еси, Господи Боже, во веки.

Песнь 8

Ирмос: Ангели и Небеса на Престоле Славы Седящаго, и яко Бога непрестанно славимаго, благословите, пойте и превозносите Его во веки.

Кто по достоянию может поведати вся чудеса твоя, святителю Феодосие, и неимущим тебе болящим являешися врач преизрядный, всех призывая исповедати Славу Бога, прославляющаго святыя Своя и превозносимаго во веки.

Стужаемым от духов нечистых заступник и прибежище явился еси, святителю Феодосие, прогоняя силою Божиею всякое действо бесовское от иже с верою к тебе притекающих, да славится имя Божие во веки.

Имя твое, святителю Феодосие, яко миро излиянное, якоже благоухание рая Божия по лицу всея земли Российския обносится, услаждая сердца верующих и призывая в радости духовней воспевати Господа, превозносимаго во вся веки.

Богородичен: Не презри молений раб Твоих, Мати Божия, приими молитвы наша ради угодника твоего, святителя Феодосиа, и принеси ко Престолу Сына и Бога Твоего, да славится имя Его от всея твари во веки.

Песнь 9

Ирмос: Тя, Неискусобрачную Матерь Бога Вышняго, Тя, паче ума Рождшую словом воистину Бога, Вышшую Пречистых Сил, немолчными славословлении величаем.

Яко целитель премилостивый, святе Феодосие, не точию призывающим тя болящим милостивне внемлеши, но и присных их послушаеши, и по вере тех скорый врач болящим являешися, всех милуя и утешая, на всех щедроты твоя преизобильне изливая.

Воистину дивна и паче слова чудеса твоя, Феодосие отче наш, явил бо ся еси слава Церкве Российския, Православныя веры Небесный проповедник, истины же свидетель непреложный.

Святче Божий, угодниче Христов, милости неистощимое сокровище, призри на немощи моя, исцели душу мою, страстьми зле обуреваемую, исцели и тело мое, немощьми обложенное, да прославлю в тебе благодать и милосердие Христа Бога, Дивнаго во святых Своих.

Богородичен: К Тебе, Премилосердая Мати, возношу мое грешное сердце, пред Тобою, Благодатная, повергаю немощи души и тела моего: молитвами Твоими заступи и помилуй мя.

Светилен

Небо звездами Украсивый, новую звезду пресветлую яви тя, святителю Феодосие, Небо Церковное украшающую и мрак нечестивых мудрований разгоняющую. Темже и наша сердца, грехом омраченная, просвети и к покаянию молитвами твоими, преподобне, настави.