Акафисты - 28 сентября 2025
Кондак 1
Избранный страстотерпче Христов и доблий воине Царя царей, Никито преславне, оружием Креста враги видимыя и невидимыя крепце победивый и во всесожжение тучное, яко жертву благоприятну, себе самаго Господеви принесый, в песнех с любовию восхваляем тя, святаго предстателя нашего, и радостно тебе вопием: Радуйся, великомучениче и чудотворче Никито.
Икос 1
Ангельски на земли пожив, победы тезоимените, великомучениче Никито, ты яко Ангел благий в стране Готфстей просиял еси, веру Христову людем, тьмою неверия помраченным, проповедуя, темже Апостолом равный деянии твоими показался еси. Мы же по долгу тя, яко проповедника Христова, ублажаем, со умилением зовуще ти сице:
Радуйся, благовестниче Евангельския истины.
Радуйся, языческое нечестие поправый.
Радуйся, веру Христову возлюбивый.
Радуйся, страну Готфскую духовно просветивый.
Радуйся, диавола и слуги его обличивый.
Радуйся, по имени твоему тех победоносно низложивый.
Радуйся, даже до крове во исповедании Христове послуживый.
Радуйся, мучения многовидная за Христа доблестно претерпевый.
Радуйся, огнем всесожженный и во обители райския вознесенный.
Радуйся, жертва непорочная Троице Святей явивыйся.
Радуйся, столпе крепкий Святыя Церкве.
Радуйся, красото и основание веры Христовы.
Радуйся, великомучениче и чудотворче Никито.
Кондак 2
Видев Афанарих, лютый христиан мучитель, како святый Никита веру Христову в готфех победоносно проповедует, аки зверь дивий нань устремися и муками лютыми содробляше того тело; обаче мужества души его поколебати не возможе, зане той победитель мучителей явлься, победоносно воспеваше Христу Богу: Аллилуиа.
Икос 2
Разумев мук телесных безбедность, яко на пир, на мучения за Христа изшел еси, святе Никито, икону Пресвятыя Богородицы с собою имея, с неюже и во всех муках неразлучен пребыл еси и, тоя силою благодатно укрепляем, победоносно путь мучений прошел еси, и от Христа увенчался еси, нас же научаеши вопити тебе таковая:
Радуйся, о немже возрадовашася Ангели.
Радуйся, емуже удивишася человецы.
Радуйся, крепкаго терпения адаманте.
Радуйся, совершеннаго мужества образе.
Радуйся, диавола победителю.
Радуйся, всех слуг его посрамителю.
Радуйся, воине Христов непобедимый.
Радуйся, Крест Христов во оружие победы приемый.
Радуйся, тем вся враги низложивый.
Радуйся, в броню веры Христовы облеченный.
Радуйся, от Христовой десницы свыше увенчанный.
Радуйся, Ангельским ликом сопричтенный.
Радуйся, великомучениче и чудотворче Никито.
Кондак 3
Сила Божия в тебе, Никито великомучениче добропобедне, славно прославися, не токмо бо мучителя Афанариха, но и самаго диавола терпением твоим победил еси, и мужество души твоея явив, огнем всесожжегся, яко феникс, в вечной жизни обновился еси и во обители горния душею твоею возлетел еси, во еже со Ангелы пети Богу: Аллилуиа.
Икос 3
Имеяй велию о Христе крепость, временныя муки, мучителем тебе налагаемыя, Никито премудре, ни во чтоже вменил еси и, радуяся, во огнь вшел еси: во огни бо, яко в цветнице, славу Божию воспел еси. Темже и мы тя славим и воспеваем гласы таковыми:
Радуйся, страстотерпче Христов, в чудесех предивный.
Радуйся, во огни смерть вкусивый и не опален пребывый.
Радуйся, Афанариха и клевреты его сим удививый.
Радуйся, вся верныя утешивый.
Радуйся, всем о Господе терпящим утверждение.
Радуйся, ленивым и слабодушным обличение.
Радуйся, чудесы многими по смерти прославленный.
Радуйся, благодать целебную от Господа приемый.
Радуйся, Готфския страны славо и похвало.
Радуйся, Церкви святыя радование и утешение.
Радуйся, святый предстателю и молитвенниче наш ко Господу.
Радуйся, присный наш заступниче.
Радуйся, воине Иисусов добропобедный.
Радуйся, любимиче Его преискренний.
Радуйся, великомучениче и чудотворче Никито.
Кондак 4
Буря лютых мук не потопи корабля души твоея, Никито предивне, но приведе тя к тихому блаженства вечнаго пристанищу: Крестом бо Христовым вооружився, святе, прешел еси огнь мучений невредимо и достигл еси в вечный покой, идеже сладце поеши Христу Богу песнь: Аллилуиа.
Икос 4
Слышавше, дивишася христиане, како звезда лучезарная в нощи другу твоему Мариану святыя мощи твоя, мучениче Никито, показа, якоже древле волхвам в Вифлееме Христа рождшагося. О сем убо Мариан радуяся, честное тело твое, страстотерпче, в дому своем погребает, сице к тебе взывая:
Радуйся, угодниче Божий, на небеси и на земли прославленный.
Радуйся, венценосче добропобедный.
Радуйся, сокровище исцелений многоценное.
Радуйся, мироуханный райскаго прозябения цвете.
Радуйся, небесных радование и земных утешение.
Радуйся, болящих безмездное врачевание.
Радуйся, пресветлаго мученическаго воинства доброто.
Радуйся, верных некрадомое богатство.
Радуйся, небесным знамением погребение честное улучивый.
Радуйся, дары благодатными другу твоему воздавый.
Радуйся, изобилием благ земных дом его благословивый.
Радуйся, чудесы многими оный прославивый.
Радуйся, великомучениче и чудотворче Никито.
Кондак 5
Боготечный источник исцелений явися в дому Мариана гроб твой честный, святе Никито, егда той в страну греческую преселився, мощи твоя святыя тамо пренесе и в храме Божием, во имя твое созданном, оныя положи на общее поклонение верным, Богу, тя прославльшему, воспевшим: Аллилуиа.
Икос 5
Видевше чудеса преславная, Никито святе, от мощей твоих истекающая, Авксентий епископ восхоте часть их в иный град отделити, но того начинание дерзновенное абие воспятил еси и руку, мощем твоим прикоснувшуюся, омертвением поразил еси, дондеже Авксентий оный с покаянием к тебе припаде и, исцеление от тебе прияв, сице глаголаше:
Радуйся, долготерпеливый Христов подражателю.
Радуйся, с наказанием твоим милость явивый.
Радуйся, начинание дерзновенное чудесно воспятивый.
Радуйся, усохшую руку абие исцеливый.
Радуйся, и по смерти о Христе жив пребываяй.
Радуйся, и по умертвии чудеса совершаяй.
Радуйся, нетлением прославленный на земли.
Радуйся, за подвиг твой венчанный на небеси.
Радуйся, известный умилостивителю Царя Христа.
Радуйся, за верных мощный пред Ним предстателю.
Радуйся, и согрешающия вразумляяй.
Радуйся, и маловерныя умудряяй.
Радуйся, великомучениче и чудотворче Никито.
Кондак 6
Проповедуем чудеса твоя, не таим милостей твоих целебных, великомучениче Никито: от лет бо древних отцем нашим сия ведомы быша, и храмы Божия во имя твое святое в стране нашей созидахуся, идеже и лика твоего образы чудесы прославишася, и вся верныя в вере утверждают, к небеси же сердца их восхищают, поющих Богу: Аллилуиа.
Икос 6
Возсияша чудеса многая от святыя иконы чудотворца Никиты, во обители его пребывающия и вся верныя к пению мученика подвизающия; темже и мы с любовию святую память его чтим и песненно ему вопием:
Радуйся, чудес источниче преизобильный.
Радуйся, милости подателю предивный.
Радуйся, победоносче, Богом прославленный.
Радуйся, целебниче недугов душевных и телесных.
Радуйся, болящих младенцев присный врачевателю.
Радуйся, скорбящих и унывающих благодатный посетителю.
Радуйся, силы диавольския крепкий посрамителю.
Радуйся, на духи нечистыя власть от Господа приемый.
Радуйся, действа диавольскаго от человек прогонителю.
Радуйся, от беснования лютаго страждущих свободителю.
Радуйся, апостольских даров приемниче.
Радуйся, ангельския кротости подражателю.
Радуйся, великомучениче и чудотворче Никито.
Кондак 7
Хотящим нам славити подвиги твоя и чудеса, великомучениче преславне, помози свыше данною ти благодатию, сердца же наша от греховных помышлений очисти, да достойно и неосужденно прославим тя, о тебе воспевая Христу Богу хвалебную песнь: Аллилуиа.
Икос 7
Дивнаго победоносца и славнаго воина Христова, Никиту великоименитаго кто прославит по достоянию от земнородных: сей бо велиара победи и вся слуги его низложи, Христа же, Царя и Бога, верно даже до смерти исповеда и от Него прославлен бысть. Темже, в храме Его святем ликующе и пред чудотворною иконою того молящеся, взываем тако:
Радуйся, в юдоли сей земной наше утешение.
Радуйся, по Бозе и Пресвятей Богородице наше упование.
Радуйся, Ангельских ликов собеседниче.
Радуйся, святых всех сопричастниче.
Радуйся, мученическаго пресветлаго собора сияющая звездо.
Радуйся, от горних высот нас грешных посещаяй.
Радуйся, дары целебныя земнородным подаваяй.
Радуйся, к бедствующим на помощь ускоряяй.
Радуйся, молящихся молитвы милостиво приемляй.
Радуйся, любящим тя любовию святою воздаваяй.
Радуйся, всещедрый и милостивый наш предстателю.
Радуйся, всеблагий и скоропредстательный наш покровителю.
Радуйся, великомучениче и чудотворче Никито.
Кондак 8
Странствие земное совершив и путь мучений прошед победоносно, великомучениче Никито, от дел благотворения не почил еси, но от горних высот обитель твою и люди, верно тебе молящияся, назирая, различная нам подаеши дарования: дадеся бо тебе от Господа велия благодать недужныя врачевати, обидимыя заступати, сиротствующия младенцы окормляти. Темже благодарно тя славим и Богу, тя прославльшему, поем песнь: Аллилуиа.
Икос 8
Весь в Бозе быв, страстотерпче Христов, о Бозе чудеса многия совершил еси в жизни и по смерти и, дерзновение к Тому получив, выну молишися за люди христоименитыя и верно тя на помощь призывающим пособствуеши. Не остави убо и нас благодатною твоею помощию и заступлением, да благодарно тебе зовем:
Радуйся, предивный христиан помощниче.
Радуйся, преславный верующих заступниче.
Радуйся, великоименитый воинов споборниче.
Радуйся, вдовиц и сирот прибежище.
Радуйся, в сониих и видениих верныя посещаяй.
Радуйся, в бедах и напастех им на помощь ускоряяй.
Радуйся, победы тезоименитый.
Радуйся, венценосче нарочитый.
Радуйся, Святыя Церкве крепкий столпе.
Радуйся, православных щите и забрало.
Радуйся, веры утверждение.
Радуйся, страны нашея сохранение.
Радуйся, великомучениче и чудотворче Никито.
Кондак 9
Вси сынове русстии от лет древних проповедуют благодатную твою помощь во бранех, Никито предивный, яко воем православным присно на супостаты пособствуеши и молитвами твоими на иноплеменники, воюющия на нас и на веру нашу, право победы нам даруеши: сие бо во дни нашествий татарских множицею от лет древних отцы наша уведеша. Темже, тя по долгу ублажающе, поем о тебе Богу: Аллилуиа.
Икос 9
Витийство наше не довлеет прославити тя по достоянию, великомучениче Христов Никито, обаче ты, яко благий и милостивый подражатель Христов, не возгнушайся наших убогих песноглашений, но приими сия во благо, произволения сердец наших ведый, неотступен буди нам помощник, вся благая даруя нам твоими молитвами, да благоумиленно тебе зовем:
Радуйся, кедре благосеннолиственный, имже покрываются мнози.
Радуйся, цвете прекрасный, имже утешаются людие.
Радуйся, маслино благоплодная, елей милости нам обильно источающая.
Радуйся, кипарисе сада Христова, приходящия к тебе благоухаяй.
Радуйся, христолюбивому воинству невидимый воеводо.
Радуйся, иноверных воев страх и поражение.
Радуйся, страны христианския великоименитый покровителю.
Радуйся, со святителем Николаем присный ея предстателю.
Радуйся, на нечестиваго Мамая великому князю Димитрию невидимо пособствовавый.
Радуйся, царю Иоанну под Казанию благодатно споборствовавший.
Радуйся, соименнаго ти болярина Романова, твоего усерднаго чтителя, родоначальника дома царскаго явивый.
Радуйся, храм Божий, во имя твое им созданный, благоволением твоим осенивый.
Радуйся, великомучениче и чудотворче Никито.
Кондак 10
Спаса Христа за люди, тя чтущия, умоли, Никито чудодейственне, и, якоже отцем нашим древле, тако и ныне нам смиренным во благая пособствовати не престай, страстотерпче Христов, победы тезоимените, но и на враги одоление у Господа народу нашему испроси, да славим тя присно и поем Царю царей победную песнь: Аллилуиа.
Икос 10
Стеною молитв твоих, великомучениче Никито, страну нашу выну сохраняй от всякаго зла и вся люди и подвизающияся путем правым, во Царствие Христово руководи, зане дадеся тебе благодать молитися за ны. Сего ради со усердием тебе поем:
Радуйся, девственных ликостояний неотступный хранителю.
Радуйся, благочестно иночествующих, небесный наставниче.
Радуйся, молитвами твоими, яко кокош птенцы своя, нас сохраняяй.
Радуйся, яко орел крылами своими, нас покрываяй и соблюдаяй.
Радуйся, старым сединам силы обновляяй.
Радуйся, юным в благочестии и целомудрии утверждение.
Радуйся, начальствующим во благо помощниче.
Радуйся, всем ревнующим о спасении присный споспешниче.
Радуйся, чудесы твоими нас утешаяй.
Радуйся, враги невидимыя от нас отражаяй.
Радуйся, царствующаго града священное украшение.
Радуйся, небеснаго рая светлый гражданине.
Радуйся, великомучениче и чудотворче Никито.
Кондак 11
Пение молебное наше, пред чудотворною иконою твоею приносимое днесь, милостиво услыши, великомучениче Христов Никито, и утробу щедрот твоих не затвори нам, выну требующим твоея благодатныя помощи, но буди, якоже и до днесь был еси, благий наш предстатель и присный за ны ко Господу молитвенник, да о тебе радующеся и Бога славяще, поем Ему: Аллилуиа.
Икос 11
Светозарный светильник и предивный чудотворец великомученик Никита явися: той бо от лет древних отечествие наше своими молитвами и щедротами не оставляет, но яко победитель, вся враги наша видимыя же и невидимыя отражает и благочестно в мире жити нас устрояет. Темже и от нас, угодниче Божий, сие благодарное славословие приими:
Радуйся, великий наш предстателю.
Радуйся, наших врагов невидимых победителю.
Радуйся, преобладати им над нами не попущаяй.
Радуйся, вся козни их, аки паучину, расторгаяй.
Радуйся, и в час смертный любящих и чтущих тя не оставляяй.
Радуйся, от насилия диавольскаго их мощно сохраняяй.
Радуйся, о спасении нашем Бога выну умоляяй.
Радуйся, на мытарствах воздушных верным помощь твою являяй.
Радуйся, и на земли недугов лютых прогонителю.
Радуйся, болезней неисцелимых целителю.
Радуйся, безнадежных надеждо.
Радуйся, христиан похвало. Радуйся, великомучениче и чудотворче Никито.
Кондак 12
Благодать Божию видим от святыя и чудотворныя иконы твоея действующую, Никито великоимените, к ней бо с верою притекающии исцеления получают и здравы из храма твоего отходят, темже и мы твой священный образ благоговейно почитаем и с любовию лобызаем, и поем тобою чудодействующему Христу Богу: Аллилуиа.
Икос 12
Поюще твоя милости и многое к страждущим сострадание, великомучениче Никито, славим и величаем тя, Богом возвеличеннаго, и от любве сердечныя воспеваем ти песни таковыя:
Радуйся, бедствующих скорый помощниче.
Радуйся, богатящихся вразумление.
Радуйся, всея Руси Богом данный покровителю.
Радуйся, страны нашея присное радование.
Радуйся, ходатаю о ней немолчный.
Радуйся, молящихся врачу безмездный.
Радуйся, ко исцелению единыя токмо веры требуяй.
Радуйся, души и телеса исцеляяй.
Радуйся, верным выну помогаяй.
Радуйся, маловерных в вере утверждаяй.
Радуйся, веры отвращихся грозно наказуяй.
Радуйся, страха Божия учителю.
Радуйся, дерзости самочинныя обличителю.
Радуйся, великомучениче и чудотворче Никито.
Кондак 13
О великий угодниче Божий, страстотерпче Христов и чудотворче Никито! Вонми молитве нашей и малаго моления сего нашего не презри, но Христа Бога умоли избавитися нам от мучений вечных, Небеснаго же Царствия чрез покаяние сподобитися, да с тобою воспоем на земли живых песнь Богу: Аллилуиа.
(Этот кондак читается трижды, затем икос 1 и кондак 1).
Молитва
О великий страстотерпче Христов и чудотворче великомучениче Никито! Припадающе к святому и чудотворному образу твоему, подвиги же и чудеса твоя и многое сострадание твое к людем прославляюще, молим тя прилежно: яви нам, смиренным и грешным, святое и многомощное твое заступление: се бо, грех ради наших, не имамы свободы чад Божиих, еже о потребах наших Господа и Владыку нашего дерзновенно просити, но тебе молитвенника к Нему благоприятнаго предлагаем и о твоем предстательстве взываем: испроси нам у Господа благопотребныя дары душам и телесем нашим: веру правую, спасения надежду несумненную, любовь же ко всем нелицемерную, во искушениих мужество, в злостраданиих терпение, в молитвах постоянство, душ и телес здравие, земли плодоносие, воздуха благорастворение, житейских потреб довольство, мирное и благочестное на земли житие, христианскую жития кончину и добрый ответ на страшнем судище Христовем. Еще, о страстотерпче Христов, у Царя Небеснаго испроси всем православным христианом мир, здравие и спасение, на враги победу и одоление, всей же богохранимей стране нашей благоустроение, тишину и благоденствие. Христолюбивому воинству буди соратай и помощник на враги, и всем людем православным яви твое святое заступление: болящия исцели, скорбящия утеши, бедствующим помози. Ей, угодниче Божий и мучениче долготерпеливый! Всех убо нас приведи в тихое пристанище спасения и наследники сподоби быти пресветлаго Царствия Христова святыми твоими молитвами, да славим и поем великия щедроты Отца и Сына и Святаго Духа, в Троице славимаго и покланяемаго Бога, и твое святое заступление во веки веков. Аминь.
Кондак 1
Избранный от множества ученик Господа и Спаса нашего, яко исполненный веры, Духа Свята и премудрости, на служение вдовицам молитвою и возложением рук апостольских, явился еси первый во диаконех, и тако в сем чину Господу даже до смерти мученическия послужил еси, яко имеяй велие дерзновение ко Господу, от всяких нас смертоносных бед и скорбей свобождай, да с любовию зовем ти: Радуйся, апостоле Христов, первомучениче и архидиаконе Стефане.
Икос 1
Ангелоподобная чистота твоя, серафимская любовь и вера в Господа Вседержителя соделаша тя, святе Стефане, сосудом избранным и жилищем Духа Всесвятаго; сего ради вси в Господа Иисуса Христа верующии дивляхуся святому житию твоему и возглашаху тебе со умилением сицевая:
Радуйся, истинный учениче Христов.
Радуйся, апостолом единонравный.
Радуйся, Духа Святаго исполненный.
Радуйся, благодатными дарованиями сияющий.
Радуйся, паче всего мирскаго Господа возлюбивый.
Радуйся, вся красная мира сего ради Господа оставивый.
Радуйся, Небесное Отечество взыскавый.
Радуйся, Ангелом собеседниче.
Радуйся, добрый воине Царя Небеснаго.
Радуйся, не обязавыйся куплями житейскими.
Радуйся, истинный Христов служителю.
Радуйся, от юности добрый и верный рабе Христов.
Радуйся, апостоле Христов, первомучениче и архидиаконе Стефане.
Кондак 2
Видел еси архиереев Анну и Каиафу, Иоанна и Александра, и прочия, елицы быша от рода архиерейскаго, на свой нечестивый суд апостолы Христовы позвавшия, и озлобление их на вся ученики Христа Господа ведал еси, Стефане; сего ради в сердце твоем готовился еси стопами апостолов шествовати, всякое безчестие за Господа приимати, и Тому во веки взывати: Аллилуиа.
Икос 2
Разум богопросвещен имея, о дивный первомучениче, светло уразумел еси, яко вера во Христа Господа зовет вся за имя Его безчестие и раны всякия от владык и князей мира сего носити, позор на сонмищах и соборищах терпети, и тако был еси предуготовлен всякое поношение за Христа радостно приимати. Сего ради восхваляем тя, глаголюще:
Радуйся, юным и чистым сердцем твоим Христа возлюбивый.
Радуйся, Того Единаго в житии твоем возжелавый.
Радуйся, ангельскую непорочность стяжавый.
Радуйся, скверн мира сего не приобщивыйся.
Радуйся, в молитве пламенный.
Радуйся, в скорбех терпеливый.
Радуйся, за имя Христово всякое гонение прияти себе уготовавый.
Радуйся, скорбьми многими путь в Царствие Небесное себе устроивый.
Радуйся, и нам в скорбех помогаяй.
Радуйся, от тяжких искушений нас свобождаяй.
Радуйся, престолу Господню предстояй.
Радуйся, молитвы о нас грешных Господеви приносяй.
Радуйся, апостоле Христов, первомучениче и архидиаконе Стефане.
Кондак 3
Силою свыше облечен, подвигом добрым подвизался еси во имя Господа, славный воине Христов Стефане, уготовляя себе быти мучеником за Христа Спасителя, Емуже из глубины сердца твоего выну взывал еси: Аллилуиа.
Икос 3
Имея богатство Божиих дарований, святе Стефане, всеми дарами Господу Христу работати восхотел еси, и всем верным ведом был еси, яко добрый ученик Христа и Его славных апостолов. За сие твое благое изволение ублажаем тя сице:
Радуйся, добрая лоза винограда Христова.
Радуйся, силою Христовою воистинну плодоносен явившийся.
Радуйся, Господа Христа путем шествовати восхотевый.
Радуйся, истине Христовой всего себе поработивый.
Радуйся, житию Христову подражавый.
Радуйся, глаголы Христовы в сердце твоем запечатлевый.
Радуйся, Духа Святаго жилище.
Радуйся, кладезю мудрости Божественныя.
Радуйся, яко из чрева твоего реки воды живы истекоша.
Радуйся, яко струи воды сия мнозем во спасение послужиша.
Радуйся, Божественныя премудрости исполненный.
Радуйся, устами твоими Бога во Святей Троице прославивый.
Радуйся, апостоле Христов, первомучениче и архидиаконе Стефане.
Кондак 4
Буря смущений порази юную Церковь Христову, егда бысть роптание еллинов ко евреем, яко презираеми бываху во вседневном служении вдовицы их. Ты же, святче Божий, веруя мудрости апостолов, усердно взывал еси к Богу чистыми устами своими: Аллилуиа.
Икос 4
Слыша святии апостолы роптание еллинов, созвавша множество ученик, реша: «Не удобно есть нам, оставльше слово Божие, служити трапезам.» Верни же, зряще твою верность и любовь ко апостолом святым, единодушно возглашаху тебе, святее Стефане, сице:
Радуйся, добрый послушателю апостольских вещаний.
Радуйся, любовию ко апостольской проповеди дух твой окрыливый.
Радуйся, всякому слову апостольскому всеусердно внимавый.
Радуйся, апостолы, устроители Церкви Христовы, почитавый.
Радуйся, устами Христовыми апостолов именовавый.
Радуйся, таин Божиих строителей в них видевый.
Радуйся, яко самовидцы Слова и слуги Христовы тех быти веруяй.
Радуйся, никакоже противу апостольских вещаний глаголати дерзавый.
Радуйся, яко в руце апостолов Церковь Христова предана, вещавый.
Радуйся, Апостольскою сию именовавый.
Радуйся, столпе церковный.
Радуйся, церковная красото.
Радуйся, апостоле Христов, первомучениче и архидиаконе Стефане.
Кондак 5
Боготечныя звезды, святии апостоли, верующим во Христа рекоша: «Усмотрите, братие, мужи от вас свидетельствованы седмь, исполнены Духа Свята и премудрости, их же поставим над службою сею: мы же в молитве и служении слова пребудем». Сия слышав святый Стефан, всем сердцем радующеся, возопи премудрому Господу: Аллилуиа.
Икос 5
Видеша во Христа верующии Стефана - мужа исполнена премудрости, веры и Духа Святаго, перваго его нарекоша быти достойна службу диаконскую пред лицем апостолов исправляти, и возгласиша ему сицевая:
Радуйся, добрый сотрудниче духоносных апостолов.
Радуйся, житию их подражателю прилежный.
Радуйся, и еллинов и евреев единою и тоюжде любовию питавый.
Радуйся, о вдовицах мудре пекийся.
Радуйся, нищих кормителю.
Радуйся, любве Христовы живый проповедниче.
Радуйся, по слову Господа всем служити восхотевый.
Радуйся, нозе святых омывый.
Радуйся, сирых отец чадолюбивый.
Радуйся, нагих одеяние.
Радуйся, в печалех утешителю.
Радуйся, от напрасныя смерти избавителю.
Радуйся, апостоле Христов, первомучениче и архидиаконе Стефане.
Кондак 6
Проповедник словом и делом истины Христовы явился еси, святый первомучениче Стефане, егда святии апостолы помолившеся, возложиша руце свои на тя и на соизбранных с тобою, и слово Божие ростяше и умножашеся число ученик во Иерусалиме зело: мног же народ священников послушаху веры. Ты же с прочими диаконы радостно взывал еси Господу Христу: Аллилуиа.
Икос 6
Возсия паче солнца светлейше слово твоея проповеди, святый архидиаконе Стефане, ты бо, исполнь веры и силы, творил еси знамения и чудеса велия в людех, иже познавше тобою Христа распятаго возглашаху тебе благодарными усты со умилением похвалы сицевая:
Радуйся, огненный проповедниче Евангелия Христова.
Радуйся, чудес великих дивный совершителю.
Радуйся, иудейскаго зловерия обличителю.
Радуйся, таин Божиих мудрый изъяснителю.
Радуйся, Троице Пресвятей покланятися научивый.
Радуйся, серафимскую песнь во славу Святыя Троицы во уме, в сердце и устах твоих имевый.
Радуйся, Духа Святаго светильниче пресветлый.
Радуйся, тогожде Духа Святаго благодати новыя люди причастники сотворивый.
Радуйся, златословесный учителю.
Радуйся, неустанный проповедниче.
Радуйся, Царствия Божия достойный наследниче.
Радуйся, и нам молитвою твоею врата райская отверзающий.
Радуйся, апостоле Христов, первомучениче и архидиаконе Стефане.
Кондак 7
Хотя Христову истину явити всем иудеом, яко избранником Божиим от всея земли, имже и словеса Божия вверена быша, стязался еси, святый апостоле, с мужами от сонма Либертинска, и Киринейска, и Александрска, и от Киликии и Асии, побеждая их глаголами Духа и премудрости, вопиял еси источнику разума и премудрости, Спасителю мира победную песнь: Аллилуиа.
Икос 7
Новую благодать и силу в твоих премудрых словесах узреша и невозмогше противостати Христовой истине, великий первомучениче, врази твои подучиша мужи, глаголющия, яко слышаша от тебе глаголы хульныя на Моисея и на Бога изрекающа. Сподвигоша же на тя люди, и старцы и книжники и, нападше на тя, восхитиша и приведоша тя на сонмище свое нечестивое. Мы же, зряще тя на беззаконное судилище влекома, со слезами в похвалу сице тебе глаголем:
Радуйся, неустрашимый проведниче Христовой веры.
Радуйся, народ твой весь ко Христу привлещи желавый.
Радуйся, всякая лживая учения в народе израильском обличивый.
Радуйся, противящихся Божией истине к молчанию приведый.
Радуйся, яко ложная противу тебе свидетели обличивый.
Радуйся, яко влеком на судилище, радостно за Христа позор приимал еси.
Радуйся, яко за Господа Иисуса Христа безчестие терпел еси.
Радуйся, яко за имя Его пресвятое хулы, и клеветы, и всяк зол глагол приял еси.
Радуйся, мучениче Христов неодоленный.
Радуйся, врага спасения нашего низложивый.
Радуйся, апостоле Христов, первомучениче и архидиаконе Стефане.
Кондак 8
Странно бысть неверующим во Христа, злобы сатанинския служителем, юнаго и святаго Стефана на сонмище своем лукавом видети: вси бо сидящии в сонмищи узреша лице его, яко лице Ангела. Мы же верующе в Господа, достойне прославляющаго святыя Своя и, восхваляюще великаго апостола и первомученика, ангельским светом светло озареннаго, радостно вопием нашему Спасителю песнь: Аллилуиа.
Икос 8
Весь любовию ко Христу Господу горя, не убоялся еси, первомучениче, лукаваго сонмища иудейскаго, словеса же Господа и Спасителя своего: «Егда приведут вы на соборища, и власти, и владычества, не пецытеся, како или что отвещаете или что речете: Святый бо Дух научит вы в той час, яже подобает рещи», - памятуя, безбоязненно ожидал еси беззаконнаго судии злаго вопрошения. Сего ради и мы, созерцая лице твое, яко лице Ангела, своими нечистыми устами дерзаем тебе глаголати:
Радуйся, ангельским сиянием осиянный.
Радуйся, огнь благодати Божественныя яве восприявый.
Радуйся, мудрый исповедниче святаго Евангелия Христова.
Радуйся, провозвестниче несказанныя Божественныя благодати.
Радуйся, яко кроткий агнец волком на съедение отданный.
Радуйся, на сем судилище беззаконном безгрешному Агнцу Божию уподобивыйся.
Радуйся, сиянием лица твоего вся сидящия в сонмище осиявый.
Радуйся, ожесточение сердец их яве уразумевый.
Радуйся, мужественный рабе Христов.
Радуйся, похвало и главизно мучеников добропобедных.
Радуйся, крепкая надеждо к тебе прибегающих.
Радуйся, непостыдное упование правды ради гонимых.
Радуйся, апостоле Христов, первомучениче и архидиаконе Стефане.
Кондак 9
Всякое естество ангельское обрадовал еси, святый первомучениче, егда на лукавое вопрошание первосвященника не токмо не умолчал еси, но Духом Святым водимый, пламенное исповедание любве твоея к закону Божественному, в Ветхом Завете данному, изъяснил еси, пророка Моисея, закон и храм Иерусалимский восхваляя и вся верныя научая единому во обоих заветах Законодавцу Господу во веки воспевати: Аллилуиа.
Икос 9
Витий суемудренных суетным преданиям и злым измышлениям старцев, паче нежели закону Божию и Моисею веровавших, посрамил еси, святый апостоле, архидиаконе и мучениче Христов Стефане, вси бо сущии в сонмищи ясно уразумеша лжу глаголавших о тебе, яко ты словесы хульными Бога, Моисея, Закон и храм поносил еси: изрек бо еси в сонмищи словеса похвальныя и Божию закону в Ветхом Завете данному, и праведником, ради Господа в законе сени и писаний подвизавшимся. Научаемии тобою почитати словеса Завета Ветхаго, яко воистинну словеса Божия, а нечестия иудейскаго отвращатися, сице в похвалу тебе глаголем:
Радуйся, всех словес Завета Ветхаго почитателю.
Радуйся, яко сей завет ко Христу детоводящий мудре изъяснил еси.
Радуйся, доблести веры патриархов Авраама, Исаака и Иакова, яко рабов Божиих послушливых, показавый.
Радуйся, скорби Иосифа и мудрость его в Египте прославивый.
Радуйся, тяжкия и горькия работы фараоновы народа твоего в Египте живо описавый.
Радуйся, молитвы, труды и скорби пророка Моисея во избавление народа израильскаго достойно возвеличивый.
Радуйся, пророчество Моисея о Христе Господе лукавому сонмишу изъяснивый.
Радуйся, егоже восхождение на гору Синайскую и явления ему Господа красно возвестивый.
Радуйся, Моисеево послушание Господу в созидании скинии добре указавый.
Радуйся, Иисуса Навина и Давида труды честне изобразивый.
Радуйся, мудрость Соломонову воспевый.
Радуйся, добрый и послушный рабе Христов.
Радуйся, апостоле Христов, первомучениче и архидиаконе Стефане.
Кондак 10
Спасения всем сыновом Израилевым желая, ясно учил еси, святый первомучениче, всех сидящих в сонмищи, яко вси пророцы и праведницы словом и делом в Ветхом Завете о Христе Господе прорекоша и к вере во Христа Спасителя вся вел еси, да и вси израильтяне, и вси людие из глубины сердца своего возопиют ко Господу, нас ради на кресте распятому: Аллилуиа.
Икос 10
Стеною крепкою во исповедании Христова Евангелия был еси, святый первомучениче и архидиаконе Стефане. Сего ради и в лукавом сонмищи тогожде Христа, яко Праведника, злонравными иудеями убиеннаго, безбоязненно проповедал еси и всех беззаконных убийц Господа - нечестие обличил еси. Таковому твоему великому дерзновению дивящеся, вси христианстии роди велегласно вохваляют тя:
Радуйся, беззаконнаго соборища иудейскаго явное обличение.
Радуйся, Христа Господа сему сонмищу проповедниче неустрашимый.
Радуйся, яко конец почитания храма Иерусалимскаго яве предрекл еси.
Радуйся, яко всех иудеев, во Христа неверующих, жестоковыйными именовал еси.
Радуйся, яко у тех же неверующих необрезанное сердце и необрезанная ушеса узрел еси.
Радуйся, и отцев их, и их самех, яко Духу Святому противящихся, гневно обличивый.
Радуйся, оных убийцами пророков наименовавый.
Радуйся, яко самех первых убийц Господа, Анну и Каиафу, на сем сонмищи явно обличил еси.
Радуйся, яко весь синедрион убийцами и предателями Господа дерзновенно наименовал еси.
Радуйся, грехов людских обличителю. Радуйся, покаяния проповедниче.
Радуйся, братолюбия наставниче. Радуйся, апостоле Христов, первомучениче и архидиаконе Стефане.
Кондак 11
Песни хвалебныя приими от убогих сердец наших и уст наших, дивный мучениче и апостоле Христов Стефане, исполнь бо Духа Святаго, воззрев на небо, видел еси славу Божию и Иисуса одесную Отца Своего стояща, и рекл еси: «Се вижу небеса отверста и Сына Человеча одесную стояща Бога». Таковому видению и гласу твоему дивящеся, радостно восписуем Господу, дающему сладость лицезрения Своего святым Своим: Аллилуиа.
Икос 11
Светоноснаго зрака твоего, небеснаго видения и гласа радостнаго, исповедающаго славу Господа, с небес сшедшаго во спасение рода человеческаго, не возмогше понести обличаемии тобою иудее, сердцами своими зле распыхахуся, зубы своими скрежетаху и устремившеся единодушно на тя, и извлекоша тя, блаженне Стефане, из сонмища вне же града поставивше, камением побиваху тя, злонравнии. Мы же, мучениче Христов преславный, с любовию провождающе тя на место блаженныя кончины твоея, прославляем мужество твое, велегласно глаголя:
Радуйся, первый в мученицех, кровию своею веру во Христа распятаго запечатлевый.
Радуйся, своею кровию землю освятивый. Радуйся, яко и самих апостолов подвигом мученическим предварил еси.
Радуйся, яко за собою тысящи и тьмы тем мученик и мучениц за славное имя Христово привел еси.
Радуйся, яко за Господом Иисусом Христом безбоязненно шествовал еси и поношение Его славно понесл еси.
Радуйся, светом страданий твоих блистаяйся.
Радуйся, темже светом и нам путь ко Христу верно показующий.
Радуйся, светильниче пресветлый, Божиим несозданным светом озаренный.
Радуйся, тьму неверия и всякия нечистоты светом веры твоея разгоняющий.
Радуйся, светлых селений райских обитателю.
Радуйся, потемненныя и спящия совести нашея добрый пробудителю.
Радуйся, яко тобою благочестно имя Христово прославляется.
Радуйся, апостоле Христов, первомучениче и архидиаконе Стефане.
Кондак 12
Благодать Божия воистину спребываше тебе, славный апостоле и первомучениче Христов Стефане, крестную бо смерть на Голгофе Спаса Господа, в руце Отца Своего дух Свой предавшаго, воспоминая, молился и глаголал еси, камением от рук беззаконных побиваемь: «Господи Иисусе, приими дух мой». Молитву же Спасителя о распинателях своих в сердце своем нося, преклонь колена возопил еси гласом велиим: «Господи, не постави им греха сего». И с сею молитвою славное земное поприще твое скончал еси. Мы же, восхваляя таковое светлое успение твое, Господу Богу, давшему тебе благодать Сыну Божию в кончине твоей уподобитися, из глубины души вопием: Аллилуиа.
Икос 12
Поюще славное житие твое, восхваляюще апостольския труды твоя, умильно воспоминающе блаженную во Христе кончину твою, доблестный первомучениче Христов и архидиаконе Стефане, молим тя: дух непоколебимой веры правыя испроси нам от Господа и Спаса нашего, сердце чистое и сокрушенное да пребудет в нас выну, апостольскую ревность в проповеди Евангелия возгревай в нас, да тако будем готовы всякия скорби за Сладчайшаго Иисуса терпети, и тебе, славнаго первомученика, восхваляти сице:
Радуйся, великий Христов апостоле.
Радуйся, пастырем Церкви Христовы светлый образе.
Радуйся, верный Христов свидетелю.
Радуйся, славы Божия пламенный ревнителю.
Радуйся, добрый вдовиц питателю.
Радуйся, нещадный лицемерия искоренителю.
Радуйся, истины Христовы крепкий исповедниче.
Радуйся, в тяжких обидах наш твердый заступниче.
Радуйся, Христу Господу всего себе посвятивый.
Радуйся, в кончине твоей вседушно Христов ученик явивыйся.
Радуйся, страстотерпче незлобивый.
Радуйся, убийцам твоим милости Божией и прощения дивный ходатаю.
Радуйся, апостоле Христов, первомучениче и архидиаконе Стефане.
Кондак 13
О великий апостоле Христов, первомучениче и архидиаконе Стефане! Приими сие малое, в похвалу тебе составленное, моление наше и, яко велий ученик Сладчайшаго Сына Человеческаго, Спасителя нашего, святыми твоими молитвами споспешествуй и нам добрыми учениками Господа быти, да о Его вечной славе помышляюще, всякаго зла и в сей, и будущей жизни избегнем, и выну хвалебную песнь Ему да воспеваем: Аллилуиа.
(Этот кондак читается трижды, затем икос 1 и кондак 1)
Молитва
О великий первомучениче Христов, апостоле и архидиаконе Стефане! Тебе, яко верному Христову подражателю, приносим мы грешнии молитвы своя недостойныя, твоему милостивому предстательству о нас пред престолом Божиим тепле верующе. Ты, еще жив, печать Господа Иисуса Христа в себе всегда имел еси, не токмо своими добродетельми, знаменьми и чудесами, изобильно тобою совершаемыми, сию показуя, но явно на лице твоем, сияющем, яко лице Ангела, печать благодати Божия носил еси. Славу Божию и Сладчайшаго Иисуса, стояща одесную Бога, твоима телесныма очима узрел еси, Духом Святым осияваемый. Еще же печать Божества, в тебе пребывающую, явно показал еси всей вселенней, егда в смертный мученический час твой не токмо о всех людех, но и о вразех усердно молился еси, молитву Сына Божия на Кресте воспоминая. Сию печать Божества в себе богатоносиши, и скорбьми прибегающих к тебе видеши, и к престолу Божию молитву о сих усердно приносиши. Подаждь и нам, Боговидче преславный, Христа Спасителя нашего всем сердцем любити, волю Его вседушно исполняти, во имя Христово вся скорби с терпением носити, и не токмо о присных, но и о всех людех, и о вразех своих уседно молитися, да и наши грехи покрыет Господь твоими теплыми молитвами, наипаче же благодатию и человеколюбием и милосердием Своим: яко Тому подобает всякая слава, честь и поклонение Отцу и Сыну и Святому Духу, ныне и присно, и во веки веков. Аминь.