Акафисты - 29 сентября 2025
Кондак 1
Избранней и венчанней деве мученице, истинней поклоннице сущаго на Небесех истиннаго Бога, невесте Христовой Евфимии, от сердец умиленных похвальное пение воспоим. Ты же, яко всехвальная победительнице и низложительнице врага лукаваго, от всяких нас бед защити, Господа о нас присно умоляя, да зовем ти:
Радуйся, святая великомученице Евфимие, невесто Христова всехвальная.
Икос 1
Ангелом чистотою души своея уподобилася еси, святая дево Евфимие, с ними же ныне в светлости неизреченней ликуеши и от трудов своих почиваеши. Темже, не забуди и нас, живущих на земли, да и мы сподобимся причастницами славы Божия явитися, поющии ти:
Радуйся, от родителей благочестивих рожденная.
Радуйся, благочестию ими наученная.
Радуйся, красотою своею ангелам уподобившаяся.
Радуйся, благородным происхождениим своим не возгордившаяся.
Радуйся, яко в послушании Господу своему славно пожила еси.
Радуйся, яко Его всем сердцем своим пламенне возлюбила еси.
Радуйся, святая великомученице Евфимие, невесто Христова всехвальная.
Кондак 2
Видяще нечестивий Диоклетиан, яко христиане гнушахуся жертвы идолом богомерзким воздавати, повеле предавати их на мучения лютыя. Ты же, всехвальная Евфимие, в тайнем месте с сорока христианы служение Господу нашему Иисусу Христу совершала еси, чистым сердцем Его славя: Аллилуиа.
Икос 2
Силу веры своея показуя, купно с присными твоими, боголюбивая Евфимие, влекомая яко овца на заклание, небоязненно пред мучителем своим стала еси, даже до крови пострадати за Господа своего готовившаяся. Темже, таковую крепость твою видя, восхваляем тя пении сими:
Радуйся, яко повелению цареву не покорилася еси.
Радуйся, яко твари вместо Творца не поклонилася еси.
Радуйся, поклонницею истиннаго Бога себя показавшая.
Радуйся, идолом мерзким жертву не воздавшая.
Радуйся, льстивой речью царя не прельстившаяся.
Радуйся, от пути прямого, в рай ведущий, не уклонившаяся.
Радуйся, святая великомученице Евфимие, невесто Христова всехвальная.
Кондак 3
Верою своею в мучениих непоколебима бе, блаженная Евфимия, купно с тобою бо страдавшыя, тако укрепляху тя, юную и прекрасную: «Подвизайся дево, Жениха Небеснаго ради, подвизайся страданиим Ему угодити, подвизайся во сретение Его изыти с мудрыми девами, да возлюбит Он тя, яко невесту Свою и введет тя в чертог Свой, в нем же воспоеши Ему сладце: Аллилуиа.»
Икос 3
Видя нечестивый проконсул тя, достоблаженная Евфимие, в лике святых мучеников, яко луно посреди звезд сиявшую, аки волк хищный похити тя из Христова стада. Мы же, словесам твоим радуяся: «Не остави мене, вселюбезнейший Женише мой, на Тя токмо надеющуся, не выдай зверем душу, любящую Тя и исповедающую имя Твое святое, не дай врагу моему возрадоватися надо мною, укрепи мя, немощную рабу Твою, да не одолеет мя беззаконие», воспеваем ти:
Радуйся, к Богу за помощию взывавшая.
Радуйся, в руце Его спасение свое отдавшая.
Радуйся, яко на Господа упование свое возложила еси.
Радуйся, яко в отчаяние не впадала еси.
Радуйся, благодатию Господа укрепившаяся.
Радуйся, пред мучителем не посрамившаяся.
Радуйся, святая великомученице Евфимие, невесто Христова всехвальная.
Кондак 4
Восхотев к безбожию своему обратити тя, святая Евфимие, мучитель лестию тя уловити потщися, абие с твердостию отвещавала еси ему: «На Христа моего токмо уповаю, яко не оставит мя и не отымет руку Своея от мене и Ему Единому душой взываю: Аллилуиа.»
Икос 4
Хотяй волю твою сломити и к идолом мерзким приклонити, повеле нечестивый мучитель твой на мучения тяжкая тя отдати, непреклонная в исповедании своем Евфимие. Егда же служителие привязаху тя к колесу со множеством ножей, ты крестным знамением осенивши ся, ко Господу с усердием молилася еси: «Господи, просвещение души моея, прииди ныне на помощь ми, да уразумеют вси, яко Ты еси Единый Бог!» Таковое исповедание твое зряще, умиленными сердцы вопием ти:
Радуйся, яко пыток мучителя не убоялася еси.
Радуйся, яко Господу со тщанием молилася еси.
Радуйся, крестом святым себе осеняяй.
Радуйся, сим знамением враги своя побеждаяй.
Радуйся, яко Вышняго положила еси прибежище себе.
Радуйся, яко зло и рана не приближися тебе.
Радуйся, святая великомученице Евфимие, невесто Христова всехвальная.
Кондак 5
Боготечней звезде уподобилася еси, всехвальная Евфимие, егда ангельский свет освети тя и ангел Божий сокруши колесо и снем тя, раны исцели твоя. С ним же радостно воспела еси Богу, Его силу прославляя: Аллилуиа.
Икос 5
Видевши сие чудо мучитель и вси бывшии тамо, в недоумение приидоша и много чуду сему дивляхуся, обаче не возмогоша познати крепкую руку истиннаго Бога: видяще бо не видеша и слышаще не уразумеша, окамене бо сердце их. Мы же, силу Божию на тебе зряще, Богом возлюбленная Евфимие, с радостию воспеваем ти:
Радуйся, силою Божиею чудеса творяяй.
Радуйся, неверующых исцелением своим удивляяй.
Радуйся, ангелом незримо охраняемая.
Радуйся, крепкой мышцею Господней укрепляемая.
Радуйся, яко во славу Христа подвизалася еси.
Радуйся, яко исповеданием своим Господа прославляла еси.
Радуйся, святая великомученице Евфимие, невесто Христова всехвальная.
Кондак 6
Проповедницею славы Божией явилася еси, богомудрая Евфимие, к пещи бо огненней приведенная, огня вещественнаго не убоялася еси, огнем любви ко Богу пламенея. На небо очи возведя, молитву Господу творила: Аллилуиа.
Икос 6
Возсия свет чудный воином Виктору и Сосфену, во огни бо дивное видение узреша: пред ними ангели Божий предсташа, огнь разметая и воспящая невесты Христовой касатися. Увидев чудо сие, мучителю глаголаша: «Не посмеем мы коснутися к сей святей деве и ввергнути ю в огнь, аще бо и повелиши главы нам усекнути, ибо зрим мы чудо велие, еже ты не зриши. И не терпети нам ярость твою, нежели гнев светоносных мужей, в пламене огненнем стоящих». Купно с благоразумными воины, воспеваем ти, мужественная Евфимие:
Радуйся, яко пламени огненнаго не убоялася еси.
Радуйся, яко паки ангельским заступлением сохранилася еси.
Радуйся, яко к свету истинному Виктора и Сосфена привела еси.
Радуйся, яко им в Бога уверовати помогла еси.
Радуйся, силою молитвы своея огнь в пещи угасившая.
Радуйся, паки чудо ново пред всеми сотворившая.
Радуйся, святая великомученице Евфимие, невесто Христова всехвальная.
Кондак 7
Хотящу тя погубити, повеле нечестивый мучитель твой, доблестная Евфимие, иным воином Кесарю и Варию паки тя в пещь ввергнути. Пламя сильное попали сих неразумных воев, ты же, ликуя посреди пещи, яко в чертозе светлем, песнь триех отроков воспевала еси, славя Бога: Аллилуиа.
Икос 7
Новое чудо людем неверующим показа Господь, огнь бо не коснуся святой Евфимии, ибо Сам Жених нетленный Иисус Христос тайно прииде в пещь к невесте Своей и ороси ю небеснею прохладою. Мы же, изумляяся чудеси сему, поем ти умиленно:
Радуйся, от пламене огненнаго Господом сохраненная.
Радуйся, росою небесною Им орошенная.
Радуйся, целою и здравою из пещи изшедшая.
Радуйся, в изумление дивное всех приведшая.
Радуйся, яко паки мучителя посрамила еси.
Радуйся, яко веру на поругание тому не дала еси.
Радуйся, святая великомученице Евфимие, невесто Христова всехвальная.
Кондак 8
Странно есть видети нечестивому проконсулу чудесы, на тебе творящиися силою Божиею, преславная Евфимие, не ведая более чесо сотворити с тобою, повеле в темницу тя ввергнути. Послежде воев Виктора и Сосфена к себе призвавши, повеле им идолом мерзким поклонитися. Они же, Господу поклонишася, славя имя Его святое: Аллилуиа.
Икос 8
Всех Господь и Создатель просвети светом истины Виктора и Сосфена, шедшим бо им на казнь и усердно Богу молившимся, раздася с Небеси глас Божественный, ко упокоению их призывающий. С радостию души своя Богу предавши, ныне на небесех купно с тобою, святая Евфимие, воспевают Бога, с ними же приими и наша похвалы сия:
Радуйся, яко душы многих исповеданием своим к Богу привела еси.
Радуйся, яко с ними ныне ликуеши на Небеси.
Радуйся, чистотою своею присно сияяй.
Радуйся, звездою яркою нам блистаяй.
Радуйся, в Царство Божие нас путеводящая.
Радуйся, всем нам спастися хотящая.
Радуйся, святая великомученице Евфимие, невесто Христова всехвальная.
Кондак 9
Всею душею своею Бога славила еси, достоблаженная Евфимие, егда ведену ти бывшу на судище, воспевала еси Ему: «Боже, песнь нову воспою Тебе и буду славити Тя посреди племен и языков, Ты бо еси Единый истинный Бог и несть инаго Бога, паче Тебе!». С тобою и мы воздаем хвалу истинному Богу нашему: Аллилуиа.
Икос 9
Ветийство человеческое не довлеет по достоянию восхвалити вся претерпенныя тобою мучения и страдания во славу Бога истиннаго: не можаху бо нечестивый мучитель твой принудити тя жертвы идолом воздати, повеле повесити тя и тело твое острыми ножами строгати. Ты же, силою Божиею, и послежди сего мучения невредима осталася еси. Мужество и долготерпение твое прославляя, дражайшая Евфимие, вопием ти умиленными гласы:
Радуйся, кровию себя от главы до ног обагрившая.
Радуйся, кровию истекшею душу свою убелившая.
Радуйся, повешение со Христом претерпевшая.
Радуйся, в страданиих лютых Бога воспевшая.
Радуйся, яко воспевая Бога, укрепилася еси.
Радуйся, яко в мучениих с Господом сочеталася еси.
Радуйся, святая великомученице Евфимие, невесто Христова всехвальная.
Кондак 10
Спасти хотящи душу твою, тело свое не жалела еси, прехвальная Евфимие, и в ров изрытый, гады и ехидны исполненный, небоязненно вошла еси, крестным знамением себя осеняя и ко Господу моляся: «Свете мой Иисусе Христе! Ты во утробе воднаго зверя невредимым Иону сохранил еси, Ты избавил еси Даниила от уст львовых, сохрани и мя крепкою руку Твоею, да прославится во мне имя святое Твое, да воспою Тебе песнь славы: Аллилуиа.»
Икос 10
Стеною твердою и неодолимою бысть тебе Господь, на Него же упование свое возлагала еси, славная дево Евфимие, яко изо рва воднаго, по милости Божией, невредима от гадов и змий вышла еси, мучителя жестокость и неверие посрамляя. Того ради приими хваления наша, с любовию тебе приносимыя:
Радуйся, в ров безбоязненно вшедшая.
Радуйся, погибели в нем не нашедшая.
Радуйся, в вере своей мучителем неодолимая.
Радуйся, Божией десницей верно хранимая.
Радуйся, яко и твари водныя тебе не вредиша.
Радуйся, яко и ангели тебе служаху и от смерти храниша.
Радуйся, святая великомученице Евфимие, невесто Христова всехвальная.
Кондак 11
Пение похвальное приносим тебе, богорадованная Евфимие, немогущии разумом своим постигнути, яко ты, столь млада сущи, такия велия страдания претерпевала еси: ты бо по острым мечам и копиям, хврастием и землею прикровенным, яко птица, легце прешла еси, Господа преславно восхваляя: Аллилуиа.
Икос 11
Свещею, немерцаемо горящею и мрак идольский разгоняющею, явилася еси, богомудрая Евфимие, слышаще бо людие неверующии, яко ты неустанне восхваляеши Господа: «Кто возглаголет силы Господни, слышаны сотворит вся хвалы Его», в вере истинней просвещахуся, с ними же приими и наша похвалы тебе:
Радуйся, Господа верно и неустанно прославляяй.
Радуйся, на Его Единаго искренне уповаяй.
Радуйся, яко проконсула терпением своим посрамила еси.
Радуйся, яко в сети, им расставленныя, не уловилася еси.
Радуйся, преодолением страданий своих мучителя утомившая.
Радуйся, от истиннаго Бога ни на шаг не отступившая.
Радуйся, святая великомученице Евфимие, невесто Христова всехвальная.
Кондак 12
Благодатию данною ти от Бога, новыя страдания претерпела еси, доблестная Евфимие, яже на тя мучитель твой воздвиже: перепилити бо тя намереваяся, не возможе вреда тебе причинити, на раскаленных углиях сожигати тя повеле, абие углие ангелы, с тобою неотступно пребывающии, остудиша. Ты же, вся мучения мужественно преодолевая, Подателю сил и крепости Господу Иисусу воспевала неустанно: Аллилуиа.
Икос 12
Поюще крепкия подвиги твоя, хвалим терпение и смирение твое, боговенчанная Евфимие, ими бо врага невидимаго посрамила еси и венец нетленный от Господа на Небеси стяжала еси. Темже на последнее мучение твое ведомая, осуди бо тя мучитель твой на снедение зверем, молилася еси ко Господу: «Господи сил! Ты явил еси на мне Твою непобедимую силу и неодоленную десницу, Ты показал еси немощь бесов и безумие мучителя, а мене поставил еси высше всех мучений. Приими ныне мою жертву, принесенную Тебе от души сокрушенной и смиреннаго духа, и упокой душу мою в селениих святых и в лице мученик, яко благословен еси во веки». Просвети и нас, всехвальным исповеданием твоим, да зовем ти умиленно:
Радуйся, яко лютыя звери ноги тебе лизаху.
Радуйся, яко причинити вреда зверие тебе не можаху.
Радуйся, глас с Небеси, во обители горния тя призывавший, услыхавшая.
Радуйся, с радостию душу свою Господу отдавшая.
Радуйся, яко с почестьми родители твоими погребена была еси.
Радуйся, яко чрез пролитие крове своея невестою Жениха Небеснаго стала еси.
Радуйся, святая великомученице Евфимие, невесто Христова всехвальная.
Кондак 13
О святая великомученице Евфимие, Господа неустанно в мучениих своих восхвалявшая и от благодарных чад Божиих всехвальною нареченная. Научи же и ны все упование наше на Единаго Господа возлагати, да Им Единым в бедах и скорбех наших укреплятися, да возможем причастницами Царствия Его стати, в нем же с тобою воспевати Ему будем: Аллилуиа.
Этот кондак читается трижды, затем икос 1-й и кондак 1-й
Кондак 1
Избранный угодниче Христов и великий в скорбех помощниче, праведный отче Алексие! К тебе яко к теплому предстателю мы, грешнии, со дерзновением притекаем и умильно взываем: умоли о нас всесильнаго Бога не попустити нам блуждати по распутиям греховным, но просветити и наша сердца духом твоея любве, да зовем ти:
Радуйся, праведный старче Алексие, утешителю благостный.
Икос 1
Ангелов Творец яви в рождении твоем молитвенное заступление святителя Филарета, егда, не могущу матери разродитися тобою, родитель твой притече к нему, и того молитвою явлен был еси в мир сей во время совершения Божественныя Евхаристии, показуя тем, яко будеши великий служитель таинств церковных. Сего ради взываем ти:
Радуйся, святителем Филаретом благословенный и воспитанный; радуйся, от пелен того подвижническому житию научивыйся.
Радуйся, отрасль родителей пречестных, плод благий принесшая; радуйся, яко издетска гласом своим Бога прославлял еси.
Радуйся, благоговение и любовь ко службам Божиим от отца унаследовавый; радуйся, от матери твоея странноприимство и попечение о ближних восприявый.
Радуйся, ушеса своя к пению церковному от рождения приклонивый; радуйся, во еже не видети суеты, очеса своя в горняя вперивый.
Радуйся, праведный старче Алексие, утешителю благостный.
Кондак 2
Видя человеколюбец Господь широту сердца твоего, готоваго послужити ближним своим, яви в благословении матери твоея волю Свою, да будеши не врач телес, но пастырь Церкве Христовы, врачуяй души притекающих к тебе, темже вси людие, видяще образ добраго пастырствования твоего, воззовут Богу: Аллилуиа.
Икос 2
Разумом Божественным просвещен, узрел еси путь спасения во отсечении воли своея, егда поставлен был еси причетником во храм Богоматере, с велием терпением восприял еси суровство начальствующаго и тако возрастил еси в сердце твоем плод Христова смирения. Многолетнее твое терпение славяще, возглашаем ти тако:
Радуйся, послушниче усердный; радуйся, яко Богу работал еси неленостно.
Радуйся, укорения и поругания, яко Божие изволение, восприявый; радуйся, осуждати и укоряти других всегда избегавый.
Радуйся, поучавый обличающих нас яко благодетелей почитати; радуйся, призывавый ради блага ближних своих себе утесняти.
Радуйся, благим супружеством своим и нам образ честнаго брака явивый; радуйся, в супружнице твоей добраго помощника на пути Христовом обретый.
Радуйся, праведный старче Алексие, утешителю благостный.
Кондак 3
Сила Вышняго обрете в тебе сосуд честен и по посвящении во иерея продолжаше вести тя чрез горнило испытаний. Служил бо еси не в веси дальней, якоже хотяше, но во граде Москве, в церкви малаго прихода, идеже осемь лет богомольцев не имев, николиже возроптал еси. Ныне же предстоиши со дерзновением Престолу Божию, поя песнь: Аллилуиа.
Икос 3
Имея тщание к совершению служб церковных, на кийждо день служение Божественныя Литургии учинил еси и к покрову Богоматере и заступничеству святителя Николая прибегая, весь путь жития твоего молитвою озарил еси. Сего ради воспеваем тя сице:
Радуйся, служителю алтаря ревностный; радуйся, яко бодрствовал еси в молитвенном подвизе непрестанно.
Радуйся, в Бозе все упование твое полагавый; радуйся, в долгих испытаниих непоколебим пребывый.
Радуйся, яко крест на перси прияв, сраспинал еси Христу плоть свою со страстьми и похотьми; радуйся, яко получив епитрахиль на выю свою, Дары Духа Святаго неоскудно источал еси.
Радуйся, яко поясом препоясав чресла своя, заутро на нивы делания Господня изшел еси; радуйся, яко взявся за рало Христово, не направлял еси вспять стопы твоя.
Радуйся, праведный старче Алексие, утешителю благостный.
Кондак 4
Бурю моря житейскаго, сластолюбием, злобою и гордынею волнуемаго, всем житием твоим научал еси преплывати в кораблеце покаяния, да и мы, являя живую веру и трепетную любовь ко Господу, сподобимся воспевати Ему и на небесех песнь хвалебную: Аллилуиа.
Икос 4
Слыша о богоугоднем житии твоем, начата прибегати к тебе ищущии спасения, обретая в тебе чадолюбиваго отца и утешителя, ты же неленостно поучал еси я покаянию и служению ближним самоотреченному. Темже и нас, якоже и чад твоих, научи истинному деланию на пажитех душ наших, да славим тя благодаряще:
Радуйся, в век оскудения благочестия несокрушимым сосудом веры явивыйся; радуйся, неленостным проповеданием в обмирщенная сердца семена благих деяний сеявый.
Радуйся, глашатаю любве Божия всем скорбящим и отчаявшимся; радуйся, ожесточенных злобою любовию своею к покаянию обращал еси.
Радуйся, научивый в живущих с нами образ Божий почитати; радуйся, призывавый почивших неустанно поминати.
Радуйся, не отревая немощных, им по силе их делание полагавый; радуйся, в постоянстве малаго делания залог духовнаго возрастания указавый.
Радуйся, праведный старче Алексие, утешителю благостный.
Кондак 5
Звезда еси, на небесех святости возсиявшая, светиши светло, в сонме праведных и исповедников российских землю нашу просвещая, темже, зряще тя, праведный отче Алексие, прославляем прославльшаго тя Господа, зовуще Ему: Аллилуиа.
Икос 5
Видя обильным любовию сердцем своим окрест тебе в нищете живущия, подавал еси им, елико имяше, уповая, яко не оставит Господь и дом твой. Даждь и нам стяжати сердце милосердное и научи ны невозбранно внимати воле Божией, да восхваляюще глаголем ти сицевая:
Радуйся, Христа бо возлюбив, не прилеплялся еси к сокровищам земным; радуйся, яко великий купец небесное богатство стяжал еси.
Радуйся, милосердием души наша обогащати научаяй; радуйся, некрадомое богатство душам верных испрошаяй.
Радуйся, светом трисолнечным сердца человеческая просвещаяй; радуйся, выну о пользе душевной пекийся.
Радуйся, рачителю целомудрия; радуйся, хранителю чистоты.
Радуйся, праведный старче Алексие, утешителю благостный.
Кондак 6
Проповедал еси пастве своея покаяние и вкушение безсмертныя Трапезы Агнчи, да не взалчут более страстей, но восприимут мир и любовь Христову и поучаются любити ближних своих с самоотвержением и утеснением себе, да благо им будет, и да взывают радостно: Аллилуиа.
Икос 6
Возсиял еси в первопрестольнем граде Москве глашатаем жизни неветшающия, древним отцем, в пустынех подвизавшимся, равный; людем, в суете пребывающим и различными злоучении прельщаемым, открывал еси любовь, милосердие и правду Божию. Таковому о тебе произволению Божию дивящеся, вопием ти:
Радуйся, неустанный проповедниче любве к Богу и ближним; радуйся, яко вслед за апостолом наставлял еси друг друга тяготы носити.
Радуйся, во граде яко в пустыни живый; радуйся, пустыню града богатством слез твоих оросивый.
Радуйся, яко пожил еси в мире премирно; радуйся, яко и на земли выну предстоял еси Христу.
Радуйся, ожесточенная сердца теплотою твоея любве возделавый; радуйся, яко и ныне помогаеши страждущим душевный покой обретати.
Радуйся, праведный старче Алексие, утешителю благостный.
Кондак 7
Хотя Человеколюбец Господь поставити тя в трудную годину утешителем скорбящих и страждущих, посла тебе скорбь великую в тяжкой болезни и смерти супружницы твоея, да ничто уже земное не связует сердце твое, но да приложиши к ревности ревность и приимеши благодать на благодать, научая пети всех: Аллилуиа.
Икос 7
Новый путь духоноснаго старчествования на стогнах града Москвы яви тебе Господь в словесех праведнаго Иоанна, пресвитера Кронштадтскаго, указуя, да восприимеши всю скорбь человеческую, яко свою, молитвою и теплотою любве сию врачуя. Темже и наша скорби отыми от нас, да радующеся, взываем ти:
Радуйся, благодать кронштадтскаго светильника обильно восприемый; радуйся, яко врач искусный душ человеческих явивыйся.
Радуйся, вставший на страже скорбных сердец человеческих; радуйся, от обращавшихся к тебе именование добраго пастыря стяжавый.
Радуйся, заблудших овец к Пастыреначальнику приводивый; радуйся, от волков хищных тех неврежденно сохранивый.
Радуйся, яко широтою любве твоея всех объял еси; радуйся, яко надежду на Бога полагати научал еси.
Радуйся, праведный старче Алексие, утешителю благостный.
Кондак 8
Странноприимная деяния совершати тщашеся, учинил еси при храме приют чадом, не имущим родителей, назидая их словом и житием своим, да возрастая в благом попечении и любве, благодарственно воспевают Богу: Аллилуиа.
Икос 8
Весь еси, праведный отче Алексие, николиже суетою связанный, посреде людей пребывая, выну Богу предстоял и работал еси. И нас, в суету погруженных, научи твоему в мире премирному житию, да усердно тебе воспоим:
Радуйся, детскую младость души твоея сохранивый; радуйся, тою младая сердца к Богу приводивый.
Радуйся, явивыйся сиротствущим чадолюбивая мати; радуйся, порождаяй души чад своих духовных для вечнаго живота.
Радуйся, преизряднейший пастырю; радуйся, яко от скверн мира сего ограждатися чад своих научал еси.
Радуйся, чтущим тя верный пред Богом ходатаю; радуйся, призывающим тя непреложное упование.
Радуйся, праведный старче Алексие, утешителю благостный.
Кондак 9
Всем, притекающим к тебе в скорби, наставник изрядный явился еси, отче Алексие, подвизая людей к покаянию и самоукорению, терпению же в скорбех неистощимому, да за сие благодаряще Богу поют: Аллилуиа.
Икос 9
Витийствующий язык умолча, зря, како ты, старче Алексие, служение свое в простоте совершая и мудрость века сего посрамляя, всяку гордыню человеческую яко прах от лица ветра возметал еси. Сего ради похваляем тя сице:
Радуйся, яко не хитросплетением словес, но силою правды Божия души призывал еси; радуйся, яко вознесенную гордыню века сего смирением сокрушал еси.
Радуйся, словесы своими не крепость человеческую, но силу Божию являвый; радуйся, яко нестареющую мудрость евангельскую живу и действенну показавый.
Радуйся, исполненный ревности по Бозе Вседержителе; радуйся, ревнителю уставов церковных.
Радуйся, искусный властителю совести человеческия; радуйся, всем бе вся, да спасеши души, Богом тебе врученныя.
Радуйся, праведный старче Алексие, утешителю благостный.
Кондак 10
Спасения от временных тягот поучал еси в преселении во слывшия хлебородными земли не искати, егда глад, мор и междуусобныя брани постигоша страну нашу. Заповедал еси жительства своего не оставляти и восприяти трудности яко наказание Божие, за умножение беззакония попущенное, Богу взывая: Аллилуиа.
Икос 10
Стена непоколебимая упования на Господа явился еси, отче Алексие, яко скала крепкая сокрушая треволнение житейское, малодушие и уныние в душах людей, к тебе прибегающих и с любовию зовущих ти:
Радуйся, адаманте веры несокрушимый; радуйся, узревший с богомольцы храма пред годиною бедствий, како лияше слезы Богоматерь на чудотворней иконе Ея Феодоровской.
Радуйся, разделивый с народом российским скорби, Богом низпосланные; радуйся, глад и хлад приявый яко наказание Божие.
Радуйся, злато, в горниле скорбей очищенное; радуйся, надеждею на милосердие Божие страждущия души врачевавый.
Радуйся, помощниче скорый; радуйся, призывающим тя в скорбных обстояниих щит и ограждение.
Радуйся, праведный старче Алексие, утешителю благостный.
Кондак 11
Пение всеумиленное приносим ти, отче досточудне, прославляюще блаженную кончину и погребение твое, молитвами первосвятителя и исповедника Тихона, Патриарха Всероссийскаго, напутствованное. Веруем, яко предстоиши в свете невечернем Престолу Пресвятыя Троицы, выну поя: Аллилуиа.
Икос 11
Светозарным светильником явился еси, даров Божиих исполнен и умножаяй таланты, яже даде тебе всех Бог, в житии бо твоем являл еси дары прозрения и исцеления, подвизая нас глаголати тебе похвалы сия:
Радуйся, яко от детских лет был еси Господу верен; радуйся, многих дарований от Него сподобивыйся.
Радуйся, лучу благодати, в мире явленный; радуйся, ризами света Христова одеянный.
Радуйся, помогий обрести сына отчаявшейся матери из града Тобольска, юже к тебе преподобный Серафим направи; радуйся, яко и ныне в трудных обстояниих о нас к Богу ходатайствуеши.
Радуйся, прозорливостию и чудотвореньми люди в вере стояти утвердивый; радуйся, отеческим попечением и молитвою не имевшия веры души к Богу обративый.
Радуйся, праведный старче Алексие, утешителю благостный.
Кондак 12
Благодати исполнен, яко сосуд Духа Святаго избранный, породил еси духом многая чада твоя, да зряще житие их, окрест живущии уразумеют, яко любовь в Бозе к ближнему залог мира и благоденствия есть, и тако благодарственно воззовут Богу: Аллилуиа.
Икос 12
Поюще житие твое и прославление, веруем, яко многомощно есть пред Престолом Владычним твое за ны ходатайство, мощи же твои сокровище многоценное имуще, к ним припадаем, яко к сосуду благодати неистощимому, и согласно ублажаем тя:
Радуйся, гражданине Иерусалима небеснаго; радуйся, благий наставниче, возрастивый в чадех своих преславных отцев.
Радуйся, яко был еси на земли храм живый, Господу посвященный; радуйся, яко предстоиши днесь Престолу Вседержителя.
Радуйся, старцев оптинских собеседниче; радуйся, кронштадтскаго светильника сомолитвенниче.
Радуйся, яко община твоя образ бысть купножительства христианскаго; радуйся, яко чада твоя свидетельством кровей своих Христа исповедаша.
Радуйся, праведный старче Алексие, утешителю благостный.
Кондак 13
О предивный пастырю и теплый о нас к Богу молитвенниче, праведный отче Алексие! Не отрини нас немощных, совершающих похвальное пение сие, и научи волю Божию невозбранно творити, да сподобимся и в будущем веце благодарственно воспевати Творцу и Богу нашему: Аллилуиа.
Этот кондак читается трижды, затем 1-й икос «Ангелов Творец…» и 1-й кондак «Избранный угодниче…».
Молитвы святому праведному Алексию, пресвитеру Московскому
Молитва 1
К тебе, о праведный отче Алексие, мы, грешнии и недостоинии, притекаем и со умилением взываем ти: призри ныне милостивно с высоты святыя своея на Отечество наше и нас, тя прославляющих. Приявший в житии своем тяготы людей и сердцем милующим понесый скорби их, приими в молитвенное твое предстательство и нас, грехи многими обремененных и суетою мира сего утружденных.
В тебе, о дивный старче, прославися Господь, явив тя таинником милости Божией. Тя призываем неотступно: буди врач душам и телесем нашим, унывающим — утешитель, малодушным дерзновение низпосли, помраченных злобою всепрощению научи, воздержанию способствуй. Воспламени, благий делателю винограда Христова, хладные сердца наша ревностию служения твоего, научи молитве непрестанной и деятельной любве с утеснением себе ради блага ближних наших. Укрепи молитвами твоими чада Церкви нашея, да поживем в любве и мире, а вне ограды церковныя пребывающии да уразумеют Христову Истину и вкупе с нами прославят Животворящую и Нераздельную Троицу и твое милостивное предстательство во веки веков. Аминь.
Молитва 2
О всечестный и преблаженный отче наш Алексие, дивный старче Московский и всея Церкви Россииския похвало и радование! Велию любовь ко Господу имея, заветы евангельския непреложно исполняя, душу твою за паству полагал еси, милующим сердцем болезнуя о всех, просящих твоея помощи. Приими малое сие моление наше, и яко в земном житии твоем отирал еси всяку слезу, облегчал еси всяку скорбь, так и ныне милосердый молитвенниче и ходатаю наш, возьми тяготы, болезни и скорби наша, исполни страждущая сердца радостию, умоли человеколюбца Бога о прощении безчисленных прегрешений наших, да очистив душу покаянием, к деланию доброму приступим. Ей, старче благий, буди и нам пастырем добрым, наставляя на стезю спасения, да молитвами твоими безпорочно пройдем путь жития нашего и обрящем Отечество Небесное, идеже ты со ангелы и всеми святыми предстоиши Престолу Святыя Троицы, славяще Безначального Отца со Единородным Его Сыном и Пресвятым, и Благим, и Животворящим Его Духом во веки веков. Аминь.
Тропарь святому праведному Алексию, глас 1-й:
Помози в бедах, утеши в скорбех, / пастырю добрый, отче Алексие, / подвигом старчества миру просиявший, / во мраце беззаконий отечеству нашему лучу Света Христова. / Болезнуя сердцем о всех притекающих к тебе, // ныне и о нас усердно Бога моли, любовию чтущих тя.
Кондак, глас 5-й:
Велии труды любве и милосердия в мире подъял еси, / праведный старче Алексие, / от святаго пастыря Кронштадтскаго / благословение на помощь людем страждущим прияв, / беды и скорби людския / яко вериги незримыя на рамо свое возложи. / Мы же ведуще тя яко молитвенника дерзновенна ко Господу, / со умилением зовем ти: / моли Христа Бога // о чтущих святую память твою.
Тропарь священномученику Сергию Мечёву, глас 4-й:
От корене праведнаго прозябл еси, / Православия наставниче и ревнителю, / пред Богом во узах и до смерти предстоя, / гласом немолчным паству наставлял еси, / священномучениче Сергие, / моли Христа Бога // спастися душам нашим.
Молитва священномученику Сергию Мечёву
О всечестный и преславный священномучениче Сергие, святости отеческия наследниче, веру православную во страданиях и до смерти исповедавше, богословия истиннаго действенный поборник и учитель явился еси. Темже велие дерзновение ко Господу имея, испроси и нам подати Благодать и крепость во испытаниях, разумети премудрость велию писаний святоотеческих и божественныя службы премирность. Аминь.
Молитва общая св. прав. Алексию и свщмч. Сергию Мечёвым
О всечестнии и преславнии пастыри наша, праведный Алексие, старче Московский, и священномучениче Сергие! К вам, о чадолюбивыя предстатели и заступницы наша, со умилением припадаем и, величая труды, болезни и страдания ваша, молим: призрите на ны, унывающия, немощныя, и всесильными молитвами вашими вся злая от нас отвратите. Сподобите и нас подражати вере, терпению и любве вашея- испросите, о всеблаженнии, у Всещедраго Бога оживотворити благодатию души наша, да со упованием непреложным на милость Его течем на предлежащий подвиг спасения души, и да сподобимся унаследовати Царствие Небесное и тамо вкупе в радости безконечней воспевати в Троице славимаго Бога во веки веков. Аминь.
Кондак 1
Избранный чудотворче и преславный угодниче Христов, предивный исповедниче н неусыпный о нас молитвенниче, преподобне отче Кукшо, прославляюще прославльшаго тя Господа, хвалебное пение восписуем ти, недостойнии. Ты же, яко имеяй велие дерзновение ко Господу, от всяких нас искушений и бед свободи, зовущих ти: Радуйся, преподобне отче наш Кукшо, чудотворче и исповедниче Христов.
Икос 1
Ангела во плоти, распеншася миру лукавому зрим тя, блаженне отче. Святым бо преподобномученикам подражал еси, иже верою содеяша правду, угасиша силу огненную, заградиша уста львов, обратиша в бегство полки чуждих. Темже со благоговением вопием ти таковая: Радуйся, избранный быти светильником Отечества нашего. Радуйся, своими подвиги и чудесы утвердивый в нем веру православную. Радуйся, сию исповедавый даже до крове и уз. Радуйся, благий подражателю жития великих угодников святой Руси. Радуйся, в смутное время богоборческаго шатания аки адамант непоколебимый явивыйся. Радуйся, неизреченных дарований сподобивыйся. Радуйся, благодатный иноков путевождю и наставниче. Радуйся, всех притекающих к тебе богомудрый духовниче и прозорливый учителю добротолюбия. Радуйся, преподобне отче наш Кукшо, чудотворче и исповедниче Христов.
Кондак 2
Видящи мати твоя небесное избранничество, измлада на тебе почившее, радовашеся сердцем и прославляше дивнаго во святых Своих Бога. Благословив же тя образом Казанския Пресвятыя Богородицы на прохождение теснаго и многотруднаго монашескаго жития, принесе тя плод благоуханен Господу. С сим же образом николиже расставался еси, пронеся благословение матерне чрез все поприще земное, со умилением вопия Богу: Аллилуиа.
Икос 2
Разум стяжав богопросвещенный от всемилостиваго Спаса, вся красная мира от юности твоея презрел еси, взем крест и последуя Христу. Притек же на поклонение во святый град Иерусалим и лобызая место, идеже страдаше Господь, благий обет добровольнаго крестоношения, иже во иночестем чине, принесл еси. Тем таковое произволение твое хваляще, вопием ти: Радуйся, благословение святаго града приемый. Радуйся, к Небесному Иерусалиму душею прилепивыйся. Радуйся, небесных предзнаменований в паломничестве сем сподобивыйся. Радуйся, иже банею пакибытия бысть тебе купель Силоамская, в нейже чудесно первым омовение приял еси. Радуйся, яко тая знамением твоего духовнаго благоплодия и многочадия явилася еси. Рaдyйcя, на Гробе Господнем елей от лампады на тя внезапу излиялся еси. Радуйся, яко от елея сего мнозии людие, к тебе прикасающеся, помазание прияху. Радуйся, яко чудо сие знамением бысть неиссякаемыя Божественныя благодати, чрез тебя верным подаваемыя. Радуйся, преподобне отче наш Кукшо, чудотворче и исповедниче Христов.
Кондак 3
Сила Вышняго осени тя, преблаженне, егда во удел Богоматери, святую гору Афонскую вселился еси, да истинный послушник Пресвятыя Богородицы, всечестныя Игумении всех иноческих обителей будеши, поучаяся в равноангельном подвизе и восходя горе по лествице аскетическаго доброделания, непрестанно взывая Подвигоположнику Христу: Аллилуиа.
Икос 3
Имеяше воистину попечение о спасении души, отвергся разумения своего и во всецелое послушание старцам святогорским вдался еси, да ум Христов приобрящеши. Сего ради посла тебе Бог авву преискусна и наставника нелестна, пустынножителя Мелхиседека, под его же старческим водительством от силы в силу возрастал еси, сподобльшеся пострижения монашескаго. Сего ради толикому усердию твоему дивящеся, умильно восклицаем: Радуйся, похвало святыя Афонския горы. Радуйся, любимиче вседержавныя Игумении иноческих обителей. Радуйся, преподобных отцев Афонских послушниче и последователю. Радуйся, подвигов их усердный рачителю. Радуйся, подъемый невидимую брань к духовом злобы поднебесныя. Радуйся, приемый дар умныя молитвы Иисусовы. Радуйся, первоначальнику Российскаго монашества преподобному Антонию Киево-Печерскому уподобивыйся. Радуйся, благословение богоспасаемыя горы в матерь градов Русских принесый. Радуйся, преподобне отче наш Кукшо, чудотворче и исповедниче Христов.
Кондак 4
Бурю воздвигше лютых искушений, враг рода человеча смуту всеяти на Святей Горе потщался еси, да изженет тя из пределов Афонских. Ты же, преподобне, со смирением сие гонение претерпел еси, и пришед в богоизбранный град Киев в пещерной лавре святых Антония и Феодосия вселился еси, да купно с преподобными отцами, зде мощами своими нетленно почивающими, поеши песнь Пресвятей Троице: Аллилуиа.
Икос 4
Слышаша, отче достохвальне, братия лавры Киево-Печерския о богоугодном житии твоем и видяще твердое во благочестии стояние, дивляхуся толикому к совершенству стремлению твоему, во всем следовати тебе хотяще. Егда же пагубныя обновленческия плевелы диавол на ниве церковней всеял еси, непоколебимый столп чистоты Православия показался еси, отче, еже и братию в сем утвердив, присно слышиши сия: Радуйся, светило веры Православныя. Радуйся, рачителю отеческих преданий. Радуйся, столпе огненный, среди мглы безбожия путь спасения показующий. Радуйся, в пагубное время еретических поползновений твоими молитвами братию утвердивый. Радуйся, всем людем пример истиннаго богопочитания показавый. Радуйся, зельне разженную пещь богоборчества росою исповедания твоего угасивый. Радуйся, преподобному Кукше, исповеднику и мученику Киево-Печерскому уподобивыйся. Радуйся, вся подвиги угодников Киево-Печерских унаследовавый. Радуйся, преподобне отче наш Кукшо, чудотворче и исповедниче Христов.
Кондак 5
Боготечная звезда сущим во мраце греховнем явился еси, святе, осиявая град и люди велии чудес светлостьми. Тако и пророческого обетования от святителя Серафима Полтавскаго сподобился еси, егда старец сей богопросвещенный, благословение архипастырское подая ти, прорек: “В сих пещерах место тебе уготовано!”, дая разумети, яко Господь прославит тя обретением нетленных мощей. Зряще же ныне исполнение дивнаго сего проречения, со благоговением лобызаем святыя мощи твоя, поюще: Аллилуиа.
Икос 5
Видев тя подвижника веры и благочестия поборника, задумаша нечестивии погубити тя, вдавша на муки и в темницу заключиша. Ты же, яко мученик тверд, ни во что же вменил еси вражия уметы, взирая на Божественнаго Страстотерпца и следуя Его долготерпению. Сего ради ублажаем тя сице: Радуйся, шествовавый за Господом даже до Голгофских мук. Радуйся, исповедничеством просиявый. Радуйся, многоразличныя страдания от богоборцев приемый. Радуйся, тии яко к татем и разбойником, аки овцу к лютым волкам, ввергоша тя. Радуйся, сих яко зверей дивиих смирением твоим укротил еси. Радуйся, мраз нестерпимый и жестокое изнурение в сибирстей тайге мужественно претерпел еси. Радуйся, утешение ти Господь яко Илии чрез врана небеснаго подавый и гладом мучима напитавый. Радуйся, от лютыя болезни, от неяже имеяше умрети, тя чудесно избавивый. Радуйся, преподобне отче наш Кукшо, чудотворче и исповедниче Христов.
Кондак 6
Проповедник богоносный Божия благодати явился еси, пастырю благий, егда от епископа Киевскаго Антония Божественныя Дары приял еси, тайно во узилище посланныя, и не токмо сам благоговейно сих приобщивыйся, но и таинство исповеди устроив, содержимых во узах иночествующих братий и сестер причастники Животворящих Таин сотвори. Бысть же сия Святая Трапеза яко Вечеря Тайная учеников Христа Бога, яко Пасха светлая среди юдоли скорбныя, яко Пятидесятница, излиявшая нань струи огневиднаго Духа. Получившии же таковую милость, возсылаху теплое благодарение Богу и угоднику Его, поюще: Аллилуиа.
Икос 6
Возсия тебе свет милости Своея Христос Избавитель, егда в день церковныя памяти великомученика Георгия Победоносца из мрачныя темницы изведен бысть, страдальче, никакоже побежден от врага, хотяща низложити тя. Обаче нов подвиг предстояще ти, отче праведный, яко сослан бысть далече на поселение, и претерпеваше тамо нужду велию, не имый где главы подклонити. Сего ради вопием ти: Радуйся, библейским праведникам подражавый. Радуйся, яко тех, иже проидоша в милотех и козиих кожах, житию поревновавый. Радуйся, в лишениих, озлоблениих и скорбех течение твое безропотно совершал еси. Радуйся, подобно тем, ихже не бе достоин весь мир, скитание по пустыням, вертепам и пропастем земным подъял еси. Радуйся, якоже и онем, иже послушествовани бывше верою, тебе обетование даровася. Радуйся, дар неизреченных чудотворений в награду ти от Господа низпослася. Радуйся, яко Бог утешаше тя, и добрых людей, якоже Илии вдовицу, тебе ниспосылаше. Радуйся, якоже чрез Илию, велие благословение чрез тя на домы, тебе приявшая, нисхождаше. Радуйся, преподобне отче наш Кукшо, чудотворче и исповедниче Христов.
Кондак 7
Хотя Всевидец Господь явити тя светильника державы нашея, и не под спудом, а на свещнице высоком поставити, паки в лавру Киево-Печерскую возврати, да явлен будеши мирови. Людие же православнии аки бисер многоценный обретшии тя, радовахуся неизреченно и возсылаху благодарственное пение Богу: Аллилуиа.
Икос 7
Новая чудеса показа нам тобою, преподобне, всех чудес Творец и Владыка, отовсюду бо притекающия к тебе от недугов душевных и телесных врачевал еси, бесныя от злых духов свобождал еси, грядущая яко настоящая прорицал еси, греховныя язвы обличал еси, всем подавая потребная ко спасению. Людие же, от толиких бед избавленнии тобою, с веселием взываху ти: Радуйся, яко предивна чудотворца Церковь святая в тебе обрела еси. Радуйся, яко славо чудес твоих всю землю нашу осияваше. Радуйся, врачу душ и телес благодатный. Радуйся, покаяния учителю духоносный. Радуйся, схимниче прозорливый и святый. Радуйся, старче благостный и кроткий. Радуйся, духов злобы прогонителю дерзновенный. Радуйся, яко бесы, не терпяще светлости зрака твоего, далече от тебе отбегаху. Радуйся, преподобне отче наш Кукшо, чудотворче и исповедниче Христов.
Кондак 8
Странник многоскорбный явился еси, отче блаженне, исполнив на себе слова апостола, яко вси, хотящии жити благочестно, гоними будут. Власть бо имущия богоборцы изгнаша тя из лавры пещерныя, и в Почаев изведоша. Обаче Божиим произволением исход твой из Киевския обители в Почаевскую совершися, да и тамо просияеши житием твоим, поя Богу: Аллилуиа.
Икос 8
Вси иноцы святыя горы Почаевския в радостный трепет приидоша, видящи, какова пречестна отца обретают, добродетельми монашескими презельне украшена и увязена венцы мученическими. Сего ради почитаху тя сими словесы: Радуйся, яко Сама Пречистая Богомати, чудотворною иконою зде пребывающая и след стопы Своея на горе сей оставившая, во обитель прият тя. Радуйся, яко гора сия для тебя вторый Афон бяше. Радуйся, святому игумену лавры Иову Почаевскому во всем уподобивыйся. Радуйся, невидимаго сослужения с преподобным Иовом многажды сподобивыйся. Радуйся, якоже и он, богопротивным течениям униатским и раскольническим твердо противостоял еси. Радуйся, ослепленных погибельными ересьми в лоно Единыя Истинныя Святыя Соборныя и Апостольския церкве направлял еси. Радуйся, на Божественной Евхаристии ангелоподобно в сиянии светлом Богу предстоял еси. Радуйся, и чадам твоим духовным благодать молитвеннаго общения с Богом даровал еси. Радуйся, по слезным молитвам чад твоих духовных от тяжкаго недуга и преждевременныя кончины избавлен был еси. Радуйся, преподобне отче наш Кукшо, чудотворче и исповедниче Христов.
Кондак 9
Всякое естество человеческое удивися превеликому на тебе Божию благоволению, молитвенниче блаженне, неприступнаго бо Господа Славы, Егоже и ангели зрети не могут, непрестанно зрел еси внутренними духовными очесы, вперяя ум к горняя и выну поя Создателю своему: Аллилуиа.
Икос 9
Витийствовати не искусен был еси, старче смиренный, обаче якоже Марию Египетскую Бог Духом Своим просвещаше тя, Евангелие бo и псалмы Давидовы изустно вся ведый, службу церковную никогда же претыкаяся на память совершил еси, и не имеяше богословскаго познания, Писание якоже богодухновенный богослов изрядно толковал еси, открывая священныя глубины таин Божиих. Сему дивящеся, вопием ти: радуйся, мудростию свыше озаренный. Радуйся, Духом Святым осененный. Радуйся, яко в немощи твоей сила Божия всемощно совершися. Радуйся, яко от богатства словес твоих нищии духом обогащаются. Радуйся, яко от отеческих наставлений твоих алчущии и жаждущии правды насыщаются. Радуйся, дея учивый презирати убо плоть, преходит бо. Радуйся, примером своим многих подвигнувый прилежати души, вещи безсмертней. Радуйся, темже со ангелы срадуется, преподобне, дух твой. Радуйся, преподобне отче наш Кукшо, чудотворче и исповедниче Христов.
Кондак 10
Спасение и от вечныя погибели избавление всем, с верою и надеждею приходящим к тебе был еси, отче священне, изымая от рова греховных страстей и пагубных вожделений, и возводя к Небесному Царствию, идеже ты ныне с лики святых предстоиши престолу Господа Сил, моляся о нас, чадех твоих, и Богу воспевая: Аллилуиа.
Икос 10
Весь был еси в вышних, авво досточудне, совлекийся ветхаго человека с деяньми его и облeкийся во Христа, Его же всем сердцем возлюбил еси. Темже даровася тебе благодать велия от Господа, да вси молитвенно взывают ти: Радуйся, делателю неусыпный, мног плод сотворивый. Радуйся, древних отцев монашества Антония, Пахомия и Макария учениче и наследниче. Радуйся, якоже преподобный Сергий Радонежский, всеусердный служитель Пресвятыя Троицы бывый. Радуйся, подобне Серафиму Саровскому, пасхальним приветствием “Христос воскресе!” каждаго приходящаго к тебе лобызавый. Радуйся, преподобному Амвросию Оптинскому уподобляяся, всех детьми своими нарицавый. Радуйся, преподобному Силуану Афонскому в созерцании и богомыслии следовавый. Радуйся, яко стяжал еси дух мирен, и окрест тебе тысячи спасение обретоша. Радуйся, тобою бо Господь показа, яко не оскуде преподобныя в Руси Православней. Радуйся, преподобне отче наш Кукшо, чудотворче и исповедниче Христов.
Кондак 11
Пение всеумиленное приношаху ти жителие богоспасаемаго града Одессы, преподобне Кукшо, имже Господь яко злато неветшающее, в горниле бед искушенное и очищенное седмерицею, дарова тя, да будеши месту сему всемогущный заступник и покровитель, сохраняя его от стихийных бед и многоразличных обстояний. Темже и обитель Успения Пресвятыя Богородицы, в ней же ныне мощи твоя святыя почивают, именем твоим красуяся, Богу приносит песнь хвалебно-благодарственную: Аллилуиа.
Икос 11
Светозарная лампада, елей цельбоносныя благодати источающая, явишася честныя мощи твоя, преподобне, от них бо токи чудес изливаются, недуги отгоняя, от одра смертнаго возставляя, души возвеселяя, козни диавольския побеждая. Темже отцы и братия Свято-Успенския обители, каждодневно молебен пред ракою мощей твоих совершающе, с любовию возглашают ти: Радуйся, храмино преукрашенная Духа всесвятаго. Радуйся, кадильница благовонная, фимиам благих дел воскуряющая. Радуйся, честный ковчеже сокровищ неоскудеваемых. Радуйся, сосуде драгоценный даров неисчерпаемых. Радуйся, нетлением мощей зело от Бога прославленный. Радуйся, излиянием чудес от Господа возвеличенный. Радуйся, яко ни един тощ или неуслышан от мощей твоих исходит. Радуйся, яко многоцелебныя твоя мощи града сего бысть всемощное защищение и обители нашея благолепное украшение. Радуйся, преподобне отче наш Кукшо, чудотворче и исповедниче Христов.
Кондак 12
Благодать подаждь нам, авво богомудре, и помощь Божию испроси, да возможем, поучаяся твоим исправлениям, творити волю Спасителя благую, благоугодную и совершенную, и поживше в преподобии и правде, сподобимся с тобою в веце грядущем пети Создателю песнь нескончаемую: Аллилуиа.
Икос 12
Поюще твое богобоязненное и чистое житие, похваляем многоболезныя исповедническия труды твоя, почитаем схимническия подвиги, превозносим в молитве пламенное горение и к Богу дерзновение, чтим многопопечительное верных окормление и пастырское вразумление, славим плоти умерщвление и безропотное скорбей понесение, яже любве ради Божия благодушне подъял еси, отче святый и превеликий. Явился бо еси нам, в последняя лета живущим, светильник горяй и согреваяй, да мало порадуемся при свете его. Не остави же сирыми чад твоих, сподоби отеческаго попечения твоего, да ведомии тобою к духовному совершенству, выну тебе воспеваем и зовем: Радуйся, к лику святых и преподобных сопричтенный. Радуйся, в горний Иерусалим досточестне приятый. Радуйся, в книзе жизни златыми буквами начертанный. Радуйся, со всеми, Богу угодившими, на брак Агнчий возшедый. Радуйся, ризу твою брачную паче снега убеливый. Радуйся, яко побеждающий венец правды унаследовавый. Радуйся, престолу Владыки предстояй, тепле о нас ходатайствуеши. Радуйся, о всех, имя твое святое призывающих, дерзновенно предстательствуеши. Радуйся, преподобне отче наш Кукшо, чудотворче и исповедниче Христов.
Кондак 13
О преподобне и богоносне отче наш Кукшо, превеликий угодниче и предивный чудотворче! Призри на нас, во обстоянии греховнем сущих и во тьме неведения претыкающихся, и богоприятным твоим ходатайством страх Божий всели в сердца наша, плотское мудрование умертви, от искушений сохрани, православие утверди, да во благочестии и правоверии иждивем малое число дний наших, и избавльшеся от вечных мук адских, сподобимся в бесконечном веце совокупно с тобою славословити Бога, в Троице покланяемаго, воспевая Ему: Аллилуиа, аллилуиа, аллилуиа.
(Этот кондак читается трижды, затем икос 1 и кондак 1)
Молитва преподобному Кукше Одесскому
О преподобне и богоносне отче наш Кукшо, обители Успения Божией Матери похвало, богоспасаемаго града Одессы неувядаемый цвете, кроткий пастырю Христов и великий за нас молитвенниче. Усердно к тебе прибегаем и с сокрушенным сердцем просим: не отыми покров твой от обители нашей, в нейже подвигом добрым подвизался еси. Буди помощник благий всем благочестно живущим и добре труждающимся в ней. О добрый наш пастырю и богомудрый наставниче, преподобне отче Кукшо, призри милостивно на предстоящия люди, умиленно молящиеся и просящие от тебе помощи и заступления. Помяни всех, веру и любовь к тебе имущих, имя твое молитвенно призывающих и на поклонение мощем твоим святым приходящих, и вся во благих прошения их милостивно исполни, осеняя их святоотеческим твоим благословением. Избави, святый отче, от всякаго навета вражия Церковь нашу святую, град сей, обитель и землю нашу, и не остави заступлением твоим нас немощных, грехами и скорбями многими обремененных. Озари, преблаженне, ум наш светом лица Божия, укрепи благодатию Господней жизнь нашу, да в законе Христове утвердившеся, неленостно по пути заповедей святых потечем. Осени твоим благословением нас, и всех в скорбех сущих, болезньми душевными и телесными одержимых, исцеление, утешение и избавление даруя. Над всеми же сими испроси нам свыше дух кротости и смиренномудрия, дух терпения и покаяния, отступившим от православныя веры и погибельными ересьми и расколами ослепленным вразумление, во тьме неверия блуждающим светом истиннаго богопознания просвещение, раздоров и нестроений утоление. Умоли Господа Бога и Пресвятую Богородицу даровати нам тихое н безгрешное житие. Поминай нас недостойных у престола Вседержителя, и испроси мирную христианскую кончину, и сподоби нас помощию твоею спасение вечное улучити и Царствие Небесное унаследовати, да славословим велия щедроты и неизреченныя милости Отца и Сына и Святаго Духа, в Троице поклоняемаго Бога, и твое отеческое заступление во веки веков. Аминь.
Кондак 1
Избраннаго воина Христа Бога нашего, святаго мученика Виктора песньми почтим, яко ходатая нашего и молитвенника; ты же, страстотерпче, яко имеяй дерзновение ко Господу, от всяких нас бед свободи, да зовем ти: Радуйся, Викторе, мучениче преславный.
Икос 1
Ангел земный и человек небесный явился еси, святый мучениче, егда озарившеся светом истиннаго богопознания, радостно потекл еси на страдальческий подвиг. Темже, поминающе страдания твоя, за Христа претерпенныя, вопием ти сице:
Радуйся, Творца всяческих всем сердцем возлюбивый.
Радуйся, за имя Его тяжкая страдания приемый.
Радуйся, идольское нечестие обличивый.
Радуйся, любве ради твоея ко Христу живота своего не пощадивый.
Радуйся, славу мира сего ни во чтоже вменивый.
Радуйся, сладости райския вкусивый.
Радуйся, Викторе, мучениче преславный.
Кондак 2
Видя гонения нечестивых на христианы, не убоялся еси прещения и мучительства их, но яко доблий воин Христов, пред нечестивым воеводою Севастианом предстал еси, и веру свою во единаго истиннаго Бога исповедал еси, поя велегласно: Аллилуиа.
Икос 2
Разум богодухновен имея, святый мучениче Викторе, изумил еси мучителя мужеством души твоея и словесы, имиже дерзновенно проповедал еси Христа - Истиннаго Бога. Темже, похваляюще исповедание твое, вопием ти таковая:
Радуйся, единаго истиннаго Бога проповедниче.
Радуйся, Пресвятыя Троицы верный поклонниче.
Радуйся, идольскаго служения искоренителю.
Радуйся, христианскаго благочестия насадителю.
Радуйся, Царствия Небеснаго наследниче.
Радуйся, славы вечныя сопричастниче.
Радуйся, Викторе, мучениче преславный.
Кондак 3
Силою Вышняго укреплен, дерзновенно пред мучителем стал еси, мужественный исповедниче Христов, темже угрозы и ласкательства онаго презрев, на подвиг мученический потекл еси, поя Богу: Аллилуиа.
Икос 3
Имея крепкую надежду на Небеснаго Владыку и Господа, и помняще слово апостольское, яко подобает повиноватися Богу паче, нежели человеком, ты, святый мучениче, не повинуяся велению мучителя, но исповедав себе воином Царя Небеснаго быти, отринул еси языческое нечестие и в руце мучителей предался еси. Мы же, поминающе мужество твое, вопием ти сице:
Радуйся, доблий воине Царя Небеснаго.
Радуйся, верный рабе своего Домовладыки.
Радуйся, угрозы нечестивых презревый.
Радуйся, прелесть идольскую обличивый.
Радуйся, подвиг мученический добре совершивый.
Радуйся, веру свою во Христа кровию засвидетельствовавый.
Радуйся, Викторе, мучениче преславный.
Кондак 4
Бурею ярости одержим, безумный мучитель повеле тяжко мучити тя и в пещь огненную воврещи. Ты же, все упование свое на Бога возложивый, во огнь, якоже иногда три отроцы, безбоязненно вшел еси, поя победную песнь: Аллилуиа.
Икос 4
Слышав нечестивый воевода, яко по триех днех пребывания во огненней пещи, ты, славный мучениче, невредим обрелся еси, и еще большия ярости исполняяся, призва чародея и повеле ему умертвити тя. Ты же, смертоносную пищу приим, паки неврежден пребыл еси, подвизая вопити тебе таковая:
Радуйся, поборниче веры непоколебимый.
Радуйся, страстотерпче, адаманта твердейший.
Радуйся, огня неубоявыйся.
Радуйся, росою молитв твоих пламень огненный угасивый.
Радуйся, смертоносныя снеди вкусив, невредим пребывый.
Радуйся, пищи райския ныне наслаждаяйся.
Радуйся, Викторе, мучениче преславный.
Кондак 5
Боготечней звезде подобен был еси, мучениче Христов, указующей путь спасения: чародея бо, умертвити тя хотящаго, веровати во Христа подвигл еси, научая воспевати купно с тобою: Аллилуиа.
Икос 5
Видевше душевныма очима своима Бога, яве чудодействующа тобою, святый Викторе, волхв нечестивый умилися сердцем и уверова во Христа, тобою проповедуемаго. Мы же, воспевая величия Божия, на тебе явленная, глаголем:
Радуйся, спасительным словом тьму неверия разгнавый.
Радуйся, мученическим веры исповеданием неверныя ко Христу обративый.
Радуйся, вся козни диавола разрушивый.
Радуйся, силу демонскую верою Христовою низложивый.
Радуйся, верных ко прославлению Бога воздвизающий.
Радуйся, в бедах и скорбех сущих прибегати к Нему наставляющий.
Радуйся, Викторе, мучениче преславный.
Кондак 6
Проповедником истинныя веры во Христа явился еси пред мучители твоими, страстотерпче славне, никия бо раны тебе содеянныя не возмогоша повредити тебе: кипящий бо елей, аки источник воды прохладныя тебе показася, и оцет, аки сладкий сот тебе бысть. Мы же, терпению твоему удивляяся, вопием Богу, дивному во святых Своих: Аллилуиа.
Икос 6
Возсия свет слепотствующим очесем мучителей твоих, егда ты, святый мучениче, имя Господа Иисуса призвал еси. Сего ради тебе, славному угоднику Божию и чудотворцу, взываем:
Радуйся, скорый наш пред Богом заступниче и ходатаю.
Радуйся, о душах наших теплый предстателю.
Радуйся, недужных молитвою своею исцеляяй.
Радуйся, раны душевныя и телесныя врачуяй.
Радуйся, веру нашу укрепляяй.
Радуйся, надежду нашу утверждаяй.
Радуйся, Викторе, мучениче преславный.
Кондак 7
Хотяще прославити Бога, укрепляющаго избранныя Своя, жена некая, именем Стефанида, пришедши на место мучения твоего и велию терпению твоему удивляяся, виде венцы нетленныя с небесе сходящия. Сие убо благоговейно зряще и Бога в сердце своем славяще, возопи: Аллилуиа.
Икос 7
Новую показа безчеловечия ярость злобный мучитель, егда юную Стефаниду, похваляющую страдания твоя, мучениче Христов Викторе, повеле, приклонив ветви древес, привязавши, разсещи. Мы же, подвиг святыя мученицы славяще, ублажаем купно с нею страдания твоя, страстотерпче, вопиюще:
Радуйся, жертвою благоприятною, якоже Авелево приношение, Богу бывый.
Радуйся, праведности и благих дел, якоже Ной, исполненный.
Радуйся, в вере Аврааму подражаяй.
Радуйся, Иову в терпении последствуяй.
Радуйся, якоже Давид, все упование свое на Господа возложивый.
Радуйся, лик мученический восполнивый.
Радуйся, Викторе, мучениче преславный.
Кондак 8
Странно бе видети и слышати языком, неведущим Божией силы, како в слабом человечестем телеси возможно таковыя претерпевати за Христа муки. Мы же, славяще Бога, даровавшаго святым мучеником таковую крепость, с любовию взываем: Аллилуиа.
Икос 8
Весь радости божественныя исполнился еси, святый мучениче, егда повеление мучителя на мечное твое усечение услышал еси. Мы же, страдания твоя воспоминающе, и велие терпение твое похваляюще, глаголем:
Радуйся, веру, надежду и любовь до конца сохранивый.
Радуйся, венец мученический от руки Вседержителя приемый.
Радуйся, в невечернем дни Царствия Христова водворивыйся.
Радуйся, во обителех райских на Небеси вселивыйся.
Радуйся, усердно у престола Божия о нас молящийся.
Радуйся, о призывающих тя непрестанно пекущийся.
Радуйся, Викторе, мучениче преславный.
Кондак 9
Всякия беды и напасти избави нас молитвами твоими, страстотерпче святый Викторе, велие бо имаши дерзновение пред Господем, за Негоже и душу свою положил еси, взывая непрестанно: Аллилуиа.
Икос 9
Витии многовещаннии не возмогут изрещи тебе достойныя хвалы мучениче славный, многих ради подвигов и страданий, ихже за Христа подъял еси волею. Сего ради мы, недоумевая восхвалити тя по достоянию, воспеваем сице:
Радуйся, веры христианския исповедниче неустрашимый.
Радуйся, воине Христов непобедимый.
Радуйся, благонадежный помощниче всем за истину терпящим.
Радуйся, скорый утешителю в беде сущих.
Радуйся, Церкви Христовы защитниче.
Радуйся, всех православных заступниче.
Радуйся, Викторе, мучениче преславный.
Кондак 10
Спасения и вечныя радости достигше по мнозех страданиях Христа ради, ты, святый мучениче, научаеши и нас вся, ради Бога, благодушно претерпевати и на Него единаго все упование свое возлагати, воспевая песнь: Аллилуиа.
Икос 10
Стена и прибежище к тебе притекающим ты еси, угодниче Божий, молишися бо непрестанно Христу Богу нашему за всех почитающих страдания твоя. Приими убо, мучениче многострадальне, и от нас грешных сия убогия похвалы:
Радуйся, яко возлюбил еси живот вечный паче временнаго.
Радуйся, яко Царствие Небесное предпочел еси славе человечестей.
Радуйся, яко страдании твоими снискал еси нескончаемую радость.
Радуйся, яко вкусивши смерть мученическую, прешел еси к блаженному безсмертию.
Радуйся, горняго Сиона наследниче.
Радуйся, Христовы Церкви велие удобрение.
Радуйся, Викторе, мучениче преславный.
Кондак 11
Пение Пресвятей Троице воздал еси, святый мучениче Викторе, не словом точию, но живым всего себе в жертву принесением: Творца бо своего паче всего возлюбил еси и Ему единому добре послужил еси, поя со умилением: Аллилуиа.
Икос 11
Светоприемный светильник истиннаго света сущим на земли являешися, богоизбранне Викторе, просвещаеши бо сердца верных и к разуму Божественному наставляеши вопиющих ти с любовию таковая:
Радуйся, Подвигоположника Христа последователю.
Радуйся, жития непорочнаго рачителю.
Радуйся, кротости и смирения образе.
Радуйся, послушания и терпения учителю.
Радуйся, светило благочестия немерцающее.
Радуйся, звездо, ко спасению путь верный показующая.
Радуйся, Викторе, мучениче преславный.
Кондак 12
Благодать Божественнную испроси нам, мучениче Христов, много бо может молитва праведнаго ко благосердию Владыки, не возгнушайся нашея греховныя нечистоты, но буди нам во всем помощник и к покаянию благий наставник, научая милующему нас Богу воспевати: Аллилуиа.
Икос 12
Поюще многострадальныя подвиги твоя, славный страстотерпче, хвалим долготерпение твое, ублажаем мученическую кончину, почитаем священную память твою и в похвалу сицевая тебе зовем:
Радуйся, во страдании своем доблесть чудную явивый.
Радуйся, язвы Господа Иисуса Христа на теле твоем носивый.
Радуйся, наследие Царствия Христова стяжавый.
Радуйся, в дому Отца Небеснаго обитель себе сотворивый.
Радуйся, яко тобою Бог прославляется.
Радуйся, яко тобою демоны посрамляются.
Радуйся, Викторе, мучениче преславный.
Кондак 13
О всеблаженный святый мучениче Викторе, приими сие наше хвалебное пение, от умиленнаго сердца тебе приносимое, и избави нас от всякаго зла твоим теплым к Богу ходатайством, да с тобою и всеми святыми воспеваем победную песнь: Аллилуиа.
(Этот кондак читается трижды, затем икос 1 и кондак 1)
Молитва
О святый угодниче Божий, славный мучениче Викторе! Подвигом добрым подвизався на земли, восприял еси на небесех венец правды, егоже уготовал есть Господь всем любящим Его. Темже взирающе на святый твой образ, радуемся о преславнем скончании жительства твоего и чтим святую память твою. Ты же, предстоя престолу Божию, приими моления наша и ко Всемилостивому Богу принеси, о еже простити нам всякое прегрешение и помощи нам стати противу кознем диавольским, да избавльшеся от скорбей, болезней, бед, напастей, и всякаго зла, благочестно и праведно поживем в нынешнем веце и сподобимся предстательством твоим, аще и недостойни есмы, видети благая на земли живых, славяще единаго во святых Своих славимаго Бога, Отца и Сына и Святаго Духа, ныне и во веки веков. Аминь.
Кондак 1
Избранная Богом от иновернаго языческаго рода чешскаго, призванная в язык свят, служительнице новая благодати, святая всехвальная мученице Христова Людмило, во страдании твоем мученический венец нетленный приявшая от руки Вседержителя и со Ангелы ныне предстоящая Его Престолу, песньми восхваляем тя любовию, угоднице Христова, и молим ти ся: молитвами твоими от вечных мук, бед и скорбей свобождай ны, зовущия:
Радуйся, блаженная княгине Людмило, святая мученице и молитвеннице о душах наших.
Икос 1
Ангелов сожительница и человеков заступница воистину явилася еси, мученице Людмило достохвальная, благоволением всех Творца, Христа Бога, Егоже возлюбила еси и за Негоже пострадала еси даже до смерти во исповедании непоколебимем; темже приими от нас сия хваления:
Радуйся, скорби многия за имя Господне приявшая; радуйся, венцем исповедническим от Бога украшенная. Радуйся, мучеников совсельнице; радуйся, веры христианския небоязненная проповеднице. Радуйся, яко тленное богатство свое раздавала еси нищим; радуйся, за неже нетленное обретшая на Небеси. Радуйся, душу свою Христа ради погубившая, во еже спасти ю; радуйся, аки светило, во тьме нечестия преславно возсиявшая.
Радуйся, блаженная княгине Людмило, святая мученице и молитвеннице о душах наших.
Кондак 2
Видя Христос Господь душу твою, ко приятию семене Слова Божия чистотою и милостынею предуготовленную, светом познания Своего просвети ю, блаженная Людмило, и спасаемых части сотвори тя общницу в Небеснем Царствии, идеже со Ангелы поеши Пресвятей Троице песнь: Аллилуия.
Икос 2
Разум богопросвещенный даровася тебе, святая мученице Людмило, имже ясно проразумела еси тщету душепагубную зловерия невестки твоея, хотящия тя погубити. Ты же, ведящи сие, удалилася еси во град Тетин, укрытися спасения ради души твоея, Христа же взыскати потщалася еси вседушне. Темже взываем ти:
Радуйся, блаженная последовательнице Христова; радуйся, любительнице заповедей Его преискренняя. Радуйся, всемогущую силу благодати Христовы познавшая; радуйся, лютаго демонскаго рабства избегшая. Радуйся, богатство земное ни во чтоже вменившая; радуйся, от юности идолослужение презревшая. Радуйся, руками убогих сокровища твоя горе предпославшая; радуйся, идолослужительныя люди к Истинному Богу призвавшая.
Радуйся, блаженная княгине Людмило, святая мученице и молитвеннице о душах наших.
Кондак 3
Сила благодати Божия осени тя, блаженная Людмило, егда приясте Святое Крещение с супругом твоим Боривоем (Борживоем), князем чешским, во Имя Отца и Сына и Святаго Духа. Таяже сила Божия осени тя ко благочестию и научи тя славити Единаго Бога и воспевати Ему: Аллилуия.
Икос 3
Имущи неоскудное милосердие ко всякому человеку, но более к присным, святая блаженная княгине Людмило, в страсе Божием воспитывающи чада твоя, явилася еси добрая прамати внука твоего, святаго князя Вячеслава, воспитавши его во благочестии; помози и нам, мученице Христова, прейти сие земное поприще во благом делании, да величаем тя звании сими:
Радуйся, блаженная мати Людмило, мученице Христова; радуйся, понесшая вдовство твое благочестно и преславно. Радуйся, по смерти князя, супруга твоего, воли Божией предавшаяся; радуйся, яко и нам помощница являешися в скорбех наших. Радуйся, в нуждах наших обращатися к Богу нас научающая; радуйся, внука твоего, святаго князя Вячеслава, в истинах веры воспитавшая. Радуйся, яко и той прият мученическую кончину, якоже и ты, прамати его; радуйся, яко вам за сие уготовано сокровище вечных благ.
Радуйся, блаженная княгине Людмило, святая мученице и молитвеннице о душах наших.
Кондак 4
Бурею одержима помышлений злобных, нечестивая невестка твоя смятеся зело, видевши тя верную рабу Христову, в вере и благочестии просвещающую страну Чешскую, низлагающую идольския храмы и созидающую христианския, во еже славословити Трисвятое Имя Божие и пети хвалебную песнь Тому: Аллилуия.
Икос 4
Слышавши от святаго равноапостольнаго Мефодия, архиепископа Моравскаго, слово о чистоте, посте, молитве и о всех добродетелех, христианом подобающих, прияла еси в сердце свое, и за сия добродетели возлюби тя Господь и даде ти крепость и силу. Темже и нас научи, блаженная Людмило, заповеди Господни исполняти и тебе величати:
Радуйся, усердная слушательнице словес Божественных; радуйся, ревностная исполнительнице закона Христова. Радуйся, ниву сердца твоего очистившая от терния душевредных страстей; радуйся, оросившая ю слезами покаяния. Радуйся, во вдовстве чистоту непорочно сохранившая; радуйся, воздержанием, молитвою и мученическим подвигом Богу угодившая. Радуйся, страданием сочетавшаяся Христу; радуйся, избавляющая от бед и скорбей веру и любовь к тебе имущих.
Радуйся, блаженная княгине Людмило, святая мученице и молитвеннице о душах наших.
Кондак 5
Боготечная звезда явилася еси, святая княгине мученице Людмило, егда боготканною одеждею святаго Крещения облекшися и нетленною пищею Пречистаго Тела и Крове Христовы духовно укрепльшися, прилепилася еси всем сердцем твоим ко Единому Иисусу; темже вся страна Чешская, просвещенная тобою, едиными усты поет Богу: Аллилуия.
Икос 5
Видевши, святая блаженная княгине Людмило, вся люди земли Чешския во тьме идолослужения погруженныя, усердно потщалася еси просветити тех светом Христовы веры, подвизающися в созидании храмов Божиих и в укреплении веры православныя в стране чешстей; мы же воспеваем и величаем тя тако:
Радуйся, мудрыми глаголы поучавшая люди оставити тьму языческаго нечестия; радуйся, от Бога токмо, а не от человек, утешение в скорбех искати нас научающая. Радуйся, внука твоего Вячеслава научившая покланятися Единому и Истинному Богу; радуйся, яко тем сестра являешися равноапостольней Ользе, княгине Российстей. Радуйся, ум твой выну горе имевшая; радуйся, сердце твое жилище Святаго Духа соделавшая. Радуйся, Христу Богу Человеколюбцу всю себя предавшая; радуйся, первая от земли Чешския к лику святых причтенная.
Радуйся, блаженная княгине Людмило, святая мученице и молитвеннице о душах наших.
Кондак 6
Проповедником духоносным, апостолом, подражавши, блаженная Людмило, славная княгине, твоими слезными молитвами оросила и облагоухала еси вся грады и веси близлежащия града Праги, приводящи, елико ти мощно, люди к вере Христовой и научающи их воспевати Единому, в Троице славимому Богу: Аллилуия.
Икос 6
В граде Праге и была еси мати милосердная возлюбленным чадом Церкве Православныя, досточудная угоднице Христова, блаженная Людмило, сердце бо твое на прошения и нужды приходящих к тебе милостиво открывала еси. Приими и нас, добрая мати, с любовию к тебе прибегающих и вопиющих сице:
Радуйся, яко сиротам была еси мати и вдовицам питательница; радуйся, яко нищим была еси милостивая подательница и обидимых благая защитница. Радуйся, со князем, супругом твоим, во благочестии пожившая; радуйся, чада твоя в страсе Божием воспитавшая. Радуйся, яко благая отрасль твоя, святый князь Вячеслав, восприят мученическую кончину; радуйся, яко и той с праматерию своею вселися в царствие Небесное. Радуйся, за всех христиан пред Престолом Божиим верная молитвеннице; радуйся, ищущим пути ко спасению наставнице благодатная.
Радуйся, блаженная княгине Людмило, святая мученице и молитвеннице о душах наших.
Кондак 7
Коль многими бисеры и камением драгоценным украшен есть венец, паче солнца сияяй, егоже дарова ти Господь, святая блаженная княгине Людмило, ибо подвигом добрым во исповедании веры подвизалася еси и образ святаго жития нам явила еси; сего ради прибегаем под кров твой, ищуще спасения, и благодарно о тебе вопием Богу: Аллилуия.
Икос 7
Новое изобрете безчеловечие злочестивая невестка твоя Драгомира, бегущей тебе во град Тетин, укрытися хотящей от оныя, святая благоверная Людмило. Та бо, наученная сатанинскою силою, погубити душу твою возжелавши позорною смертию, посла вслед ти двух злочестивых боляр, предати тя на лютая страдания, аки агницу Христову, зависти ради. Тии же собраша множество нечестиваго народа, взломаша двери дворца княжескаго и позорней смерти удавлением предаша непорочное тело твое. Мы же, воспоминающе страшную смерть твою, вопием ти сицевая:
Радуйся, блаженная Людмило, от злых боляр вервием удавленная по выи твоей; радуйся, таковым образом угодившая Богу, пострадавшая мученически. Радуйся, Господу душу предавшая в субботу, во едином часе нощи; радуйся, имевшая от рождения твоего шестьдесят и едино лето, Господем к мучению уготованная. Радуйся, яко тобою дивен Бог во святых Своих является; радуйся, яко мощи твоя прослави Господь нетлением благодатно. Радуйся, градов чешских и словацких похвало и утверждение; радуйся, всем носящим имя твое скорая помощнице и молитвеннице.
Радуйся, блаженная княгине Людмило, святая мученице и молитвеннице о душах наших.
Кондак 8
Не может укрытися град, верху горы стояй, тако, святая мученице Людмило, по кончине твоей прослави Господь мощи твоя и место погребения твоего, еже под градскою стеною града Тетина. Мы же тя, угодницу Божию, просим: буди нам ходатаица ко Господу о прощении грехов наших, да и мы, вкупе с тобою, Великому и Чудному Богу воспоим: Аллилуия.
Икос 8
Вся была еси объята неизреченною радостию, блаженная мати Людмило, зрящи крещаемыя люди твоя, повелением Ангелов, и во умилении воздала еси хвалу Спасителю Богу, усердно моливши Его, да призрит на обратившияся люди Своя, да утвердит их в вере и благочестии и да прославит Имя Свое в стране чешстей. Мы же, воспоминающе убо прерадостное событие сие, приносим ти благодарственныя и похвальныя песни:
Радуйся, неоскудеваяй источниче милостей к народу сему; радуйся, духовная наша мати, испросившая у Бога просвещение праотцем нашим. Радуйся, явлением на тебе силы Божия христианы возрадовавшая; радуйся, именем Всесильнаго Господа вся идолы в стране Чешстей сокрушившая. Радуйся, мученице Христова предобрая; радуйся, молитвеннице пред Богом чудная. Радуйся, яко демонов коварствие упразднися по молитвам твоим; радуйся, победы венец от руки Христа Жизнодавца приемшая.
Радуйся, блаженная княгине Людмило, святая мученице и молитвеннице о душах наших.
Кондак 9
Во вся концы земли Чешския и за ея пределы прославися великоименитое имя твое, преблагостная мученице мати Людмило! Имела бо еси духа премудрости, яко мудрыми словесы безумных яве обуяла еси, и духа страха Божия, яко деяньми богоугодными душу очистила еси. Темже, представши Престолу Вышняго с сонмом Ангелов, купно воспеваеши Ему: Аллилуия.
Икос 9
Ветии многовещаннии не могут достойно изобразити величие благодеяний твоих, святая мученице Людмило, стране Чешстей и иным странам идолопоклонства, идеже водворила еси Божественную веру, избавляющи люди от мрака языческаго и вечныя погибели, открывающи им путь ко спасению. Сего ради со благодарением благочестно поем ти:
Радуйся, к свету Православия душу свою обратившая; радуйся, многия в духовнем разуме просветившая. Радуйся, яко сердце твое на прошения и нужды приходящих к тебе открывала еси; радуйся, яко странники и нищия питала еси. Радуйся, яко с верою покланяемся честней иконе твоей; радуйся, яко, чтуще память твою, восхваляем Господа. Радуйся, страданием твоим церковь Христову украсившая; радуйся, яко, взирающе на страдания твоя, вернии прославляют Имя Вышняго.
Радуйся, блаженная княгине Людмило, святая мученице и молитвеннице о душах наших.
Кондак 10
Спастися всем преискренне желающи, молишися за ны горе у Престола Господня, избраннице Христова, блаженная Людмило, и твоими молитвами пособствуеши нам в странствовании многотруднем земнаго жития, еже сподоби ны в покаянии и благочестии скончати, яко облече тя Господь Божественною силою, да обратиши вся неверныя и научиши всех со умилением сердец воспевати Творцу Богу: Аллилуия.
Икос 10
Стена явилася еси стране твоей несокрушимая, богомудрая Людмило, и необоримая защитница всем призывающим тя, зане тако благоволи о тебе Небеси и земли Творец Господь, прославляя угодницу Свою, яко при гробнице твоей совершашася знамения и чудеса, и изыде молва по всей стране, и понуди князя Вячеслава торжественно пренести нетленное тело твое из града Тетина во град Прагу, в сооруженную отцем его церковь святаго великомученика Георгия. Мы же из глубины сердца со воздыханием к Богу глаголем ти песни таковыя:
Радуйся, молитвенница наша пред Богом теплая; радуйся, изыде бо по всей стране вещание о чудесех твоих. Радуйся, яко некий слепец прозре, егда прикоснуся земли с могилы твоея; радуйся, яко внук твой со славою пренесе честное тело твое. Радуйся, прославленная Богом на Небеси и на земли; радуйся, яко успение твое торжествует Церковь Православная. Радуйся, явлением мощей твоих младенческую Церковь Чешскую возвеселившая; радуйся, мученице Христова, и в земли Российстей и Сербстей зело почитаемая.
Радуйся, блаженная княгине Людмило, святая мученице и молитвеннице о душах наших.
Кондак 11
Пение умиленное приносим ти, угоднице Божия, и смиренно молим тя: моли о нас Единаго Человеколюбца Бога, да не отвратит от нас Лица Своего и дарует нам по молитве твоей, святая мученице Людмило, прощение многих наших согрешений. Мы же, прославляюще Бога о тебе, вопием: Аллилуия.
Икос 11
Светоносным Троическим сиянием горе осиянная, святая мученице Людмило, озари сердца наша, тьмою греховною покровенная, да елеем благих дел возжегше угасшия светильники наша, сподобимся внити в брачный чертог Христов, идеже ты веселишися и слышиши сия от нас благохваления:
Радуйся, предстоящи ныне Агнцу Божию в лице мученичестем; радуйся, яко и по преставлении твоем с нами пребываеши. Радуйся, луно, просвещенная от незаходимаго Солнца Правды; радуйся, путеводительнице, правую стезю к вечному спасению нам показующая. Радуйся, яко Христос по мучении твоем в чертог Свой тя всели; радуйся, яко, тебе последующе, и мы царство Небесное обрящем. Радуйся, особливая покровительнице Чешскаго и Словацкаго народа православнаго; радуйся, о нас, сродных ти людех, присная пред Богом молитвеннице.
Радуйся, блаженная княгине Людмило, святая мученице и молитвеннице о душах наших.
Кондак 12
Благодать Пресвятаго Духа испроси нам, угоднице Христова, святая мученице Людмило, от Всещедраго Бога и Спаса нашего, вразумляющую и укрепляющую нас в деле спасения, да не бесплодно будет в нас всеянное тобою семя святыя веры, но да прозябнет и плод достоен сотворит, имже препитаем души наша до будущия жизни и со всеми святыми воспоем Богу песнь: Аллилуия.
Икос 12
Поюще твое преставление, ублажаем мученическую кончину и почитаем память твою, святая мученице мати Людмило, многомощная заступнице земли Чешския, Словацкия и Сербския, буди же и о российских людех благая молитвенница ко Господу, да вопием ти:
Радуйся, благодатию Святаго Духа одеянная; радуйся, представшая Живущему во свете неприступнем. Радуйся, вдовицам правило богоугоднаго жития; радуйся, теплая ходатаице, всем православным от Бога дарованная. Радуйся, соучастнице на Небеси жребия праведников веры Христовы; радуйся, со святыми Божиими Трисвятую песнь воспевати сподобльшаяся. Радуйся, от Господа всех благ нам, молящимся ти, подательнице; радуйся, яко всем православным христианом, тя молитвенно призывающим, на помощь скоро притекаеши.
Радуйся, блаженная княгине Людмило, святая мученице и молитвеннице о душах наших.
Кондак 13
О святая мученице и верная угоднице Христова Людмило! Малое сие песнословие от нас приемлющи, моли милостиваго Бога нашего, да вселится и возблагоухает в сердцах наших святыня Православныя веры, да умножится в житии нашем елей дел благих, да не угаснут светильницы наши в полунощный час сретения Небеснаго Жениха и да сподобимся купно с тобою выну воспевати Ему в вечнем царствии: Аллилуия.
(Этот кондак читается трижды, затем икос 1 и кондак 1)
МОЛИТВА
О святая угоднице Христова, мученице княгине Людмило, первоугоднице Чешския страны и стольнаго града Праги украшение, теплая о нас пред Богом молитвеннице! Се мы, многогрешнии, смиренно припадающе, молим тя: не попусти нам погибнути в тине грехов наших, но вознеси о нас моление ко Господу, да помилует нас и дарует нам покаяние. О преблагая мати Людмило! Не забуди посещати чад твоих, аще бо и преставилася еси от нас в Небесныя обители, вкупе со внуком твоим, святым мучеником Вячеславом. Темже, святая прамати его, испроси и нам, грешным, Божие благословение на чада наша и на всех нас, да и мы, многогрешнии, возблагодарим Господа за подаяние Его благодати и купно с тобою да прославим Отца и Сына и Святаго Духа и твое великое заступление о нас во веки веков. Аминь.