Тропарь великомученицы Евфимии
Агница Твоя, Иисусе, Евфимия/ зовет велиим гласом:/ Тебе, Женише мой, люблю,/ и, Тебе ищущи, страдальчествую/ и сраспинаюся и спогребаюся Крещению Твоему,/ и стражду Тебе ради,/ яко да царствую в Тебе,/ и умираю за Тя, да и живу с Тобою,/ но яко жертву непорочную приими мя,/ с любовию пожершуюся Тебе.// Тоя молитвами, яко Милостив, спаси души наша.
Тропарь великомученицы Евфимии
Агница Твоя, Иисусе, Евфимия/ зовет велиим гласом:/ Тебе, Женише мой, люблю,/ и Тебе ищущи страдальчествую,/ и сраспинаюся, и спогребаюся Крещению Твоему,/ и стражду Тебе ради,/ яко да царствую в Тебе,/ и умираю за Тя, да и живу с Тобою;/ но яко жертву непорочную приими мя,/ с любовию пожершуюся Тебе.// Тоя молитвами, яко Милостив, спаси души наша.
Ин тропарь великомученицы Евфимии всехвальной
Жениха твоего Христа возлюбивши/ и свещу твою светлу уготовльши,/ добродетельми возсиявши, всехвальная Евфимие,/ тем возшла еси с Ним на брак,/ венец страдания от Него приемши./ Но от бед избави нас,/ чтущих верою память твою.
Кондак великомученицы Евфимии
Подвиги во страдальчестве, подвиги в вере/ положила еси тепле за Христа, Жениха твоего./ Но и ныне якоже ереси и врагов шатание/ под ноги воинству нашему покорити моли Богородицею,/ яже от шестисот тридесяти богоносных отец/ предел приемшая// и хранящая, всехвальная.
Ин кондак великомученицы Евфимии всехвальной
Во страдании своем добре подвизася/ и по смерти нас освящавши чудес течением, всехвальная./ Тем твое успение поем,/ верою прибегающе в Божественную твою церковь,/ да избавимся недуг душевных и чудес благодать почерпем.
Кондак великомученицы Евфимии
Во страдальчестве твоем добре подвизалася еси/ и по смерти ны освящаеши чудес точеньми, всехвальная./ Темже твое успение святое поем,/ верою притекающе/ в божественный храм твой,/ да избавимся недугов душевных// и чудес благодать почерпем.
Величание великомученицы Евфимии
Величаем тя, страстотерпице Христова Евфимие, и чтим честное страдание твое, еже за Христа претерпела еси.
Тропарь святого праведного Алексия Московского Мечёва
Яко чудо Божие явился еси,/
в граде Московстем, отче Алексие,/
не в пустыни бо, но посреде молвы процвел еси,/
в годину люту богоотступления,/
обаче древним упдобился еси,/
провидец сый, молитвенник и старец,/
и страждущим утешитель и врач,/
сего ради о Российстей пастве,/
ходатай ныне буди непреложен,/
молитвенниче о душах наших.
Тропарь святого праведного Алексия Московского Мечёва, на перенесение мощей
Наста день новаго торжества,/
град Москва радуется,/
и вся Российская страна ликовствует/
новыми пеньми духовными,/
днесь бо священное торжество/
в пренесение честных и многоцелебных мощей/
праведника и чудотворца Алексия,/
яко бо светило пресветлое,/
воссия нам благодатными лучами,/
потребляя тьму недуг и страстей/
от поющих прилежно,/
спасай нас молитвами твоими/
праведне Алексие отче наш.
Тропарь святого праведного Алексия Московского Мечёва
Помози в бедах и утеши в скорбех, пастырю добрый, отче Алексие, подвигом бо старчества миру просиял еси, веру и любовь Христову во мраце беззаконий исповедал еси, болезнуя сердцем о всех притекающих к тебе. И ныне моли Бога за ны, любовию чтущия тя.
Кондак святого праведного Алексия Московского Мечёва
Велии труды любве и милосердия подъял еси, праведный старче Алексие, от святаго пастыря Кронштадтскаго благословение на помощь страждущим прияв, беды и скорби людския яко вериги на рамо свое возложи. Мы же ведуще тя молитвенника дерзновенна ко Господу, со умилением зовем ти: моли Христа Бога спастися душам нашим.
Величание святого праведного Алексия Московского Мечёва
Величаем тя, святый праведный отче Алексие, и чтим святую память твою, ты бо молиши за нас Христа Бога нашего.
Перенесение мощей святителей Киевских и всея России чудотворцев Киприана, Фотия и Ионы. Тропарь
Яко Светлаго Солнца светозарныя звезды,/ Троическим Светом озаряете сердца верных,/ пренесением честных мощей ваших,/ Троицы сосуди явистеся чистии вашим житием,/ и научисте люди твердо вере Христове,/ и скверну отгнасте вашими святыми заповедьми,/ и упасосте добре Христово стадо, порученное вам,/ Богомудре Киприане, со славным Фотием и со Ионою твердым,/ молитеся Христу Богу, да спасет души наша.
Тропарь святителя Киприана, митрополита Московского
Иже от Бога свыше Божественною благодатию совершен/ и благими нравы украшен,/ Духом Святым просвещен,/ совершив святыню в страсе Божий,/ сподоблен бысть благодати Божественнаго Духа,/ пасый Церковь Божию Русския митрополии,/ постом вся поборая, волнение претерпе,/ гонение преминув, святаго Петра митрополита всегда себе в помощь призывая,/ и сего помощника имея,/ и того стопам последуя./ Служитель благоприятный,/ заповеди Божия соблюдая,/ Духом Божиим наставляемь,/ просвещая верныя люди учением словес твоих,/ пощением украси житие свое,/ ярем Господень измлада восприим,/ и паче всех Христа возлюби./ Того ради и архиерейским седалищем почтен,/ и, яко светозарное солнце, от Сербския земли происшед,/ и по вся концы русский земли добродетелию просияв,/ светило явися мирови,/ и преставися ко Господу от сея жизни в вечный покой,/ великий архиерею Божий, Киприане митрополите,/ учителю и наставниче Русския земли,/ всегда предстоя Престолу Пресвятыя Троицы,/ моли Господа прилежно об архиереех и о всех христианех,/ да спасет тебе ради души наша.
Перенесение мощей святителей Киевских и всея России чудотворцев Киприана, Фотия и Ионы. Кондак
Яко трие велицыи светила, явистеся,/ озаряюще всю подсолнечную/ богоданною вам благодатию чудес,/ и просветисте молитвами своими верных сердца,/ вашу память чтущих честнаго пренесения./ И Владыку Христа, всех Творца, молите/ стране нашей на враги победу подати,/ яко имуще дерзновение,/ и нам просите велия милости, вопиющим к вам:/ радуйтеся, поборницы по Христове Церкви/ и многочестная светила, святителие славнии.
Перенесение мощей святителей Киевских и всея России чудотворцев Киприана, Фотия и Ионы. Ин кондак
Яко крин, в пустыни давидски процветше, отцы святии,/ ныне явистеся и к Вышнему течению радостно устремистеся,/ идеже с лики святых Пресвятей Троице предстояще,/ молите сохранитися стаду вашему от враг видимых и невидимых./ Мы же, святое ваше обретение празднующе, вопием:/ радуйтеся, теплии наши заступницы.
Кондак святителя Киприана, митрополита Московского
Необорим столп Православия,/ вере Христове утверждение,/ церквам украситель, премудрый учитель,/ сербское воспитание, русское процветение,/ Господнею любовию распалаемь,/ Духу Пресвятому дом явися/ и душу, яко жертву непорочну, Господеви принесе,/ досточудне и всечестне Киприане, святителю Христов,/ сего ради вселися в широту райскую,/ предстоя Христу в лице святых,/ Емуже молися и спасай град и люди от поганых нахождения,/ яко да зовем ти:/ радуйся, отче Киприане,/ учителю премудрый.
Ин кондак святителя Киприана, митрополита Московского
Святителю Христов, пастырю добрый,/ учителю небесныя мудрости,/ светильниче света духовнаго,/ Киприане досточудне,/ не престай молитися за паству свою,/ за любящих и чтущих тя,// града нашего крепкий заступниче.
Тропарь преподобному Кукше Одесскому
От юности мир суемудренный и лукавый оставил еси, Божественною свыше просветився благодатию, преподобне, многим терпением во временней жизни подвиг совершил еси, темже источаеши чудес благодать всем с верою приходящим к раце мощей твоих, Кукшо, преблаженне отче наш.
Кондак преподобному Кукше Одесскому
Подвижника благочестия искусна, новаго исповедника веры отеческия преподобнаго Кукшу верно вси ублажим, яко пастыря истиннаго, старца благостнаго, иноков наставника, утешителя малодушных, целителя недужных, и по кончине показующаго светлость жития своего. И днесь в память его притекше, радостно возопием: яко имея дерзновение к Богу, многообразных нас избави обстояний, да зовем ти: радуйся, утверждение людем православным.
Тропарь святому мученику Виктору
Мученик Твой, Господи, Виктор во страдании своем венец прият нетленный от Тебе Бога нашего; имеяй бо крепость Твою, мучителей низложи, сокруши и демонов немощныя дерзости. Того молитвами спаси души наша.
Кондак святому мученику Виктору
Иже славе, Господи и всех Содетелю, Ты в мире явил еси украшенных добродетельми страстотерпцы и мученики, да имут непобедимую победу.
Тропарь мученице Людмиле, княгине Чешской
Оставльша тьму идолослужения / и с горячей любовию прияв свет Православныя веры Христовы, / явися ты, святая Людмило, яко звезда утренняя, / и светом святости твоея / истинный день Богопочитания в Честей земли начав.
Кондак мученице Людмиле, княгине Чешской
Храм твой всечестный, / яко цельбу душевную обретше, вси вернии / велегласно вопием ти: / дево мученице Людмило, великоименитая, / Христа Бога моли непрестанно о всех нас.
Перенесение мощей святителей Киевских и всея России чудотворцев Киприана, Фотия и Ионы. Тропарь
Яко Светлаго Солнца светозарныя звезды,/ Троическим Светом озаряете сердца верных,/ пренесением честных мощей ваших,/ Троицы сосуди явистеся чистии вашим житием,/ и научисте люди твердо вере Христове,/ и скверну отгнасте вашими святыми заповедьми,/ и упасосте добре Христово стадо, порученное вам,/ Богомудре Киприане, со славным Фотием и со Ионою твердым,/ молитеся Христу Богу, да спасет души наша.
Тропарь святителя Фотия, митрополита Киевского
Словес евангельских послушателю/ и Божественных учений рачителю,/ премудрый наказателю,/ всегда страху Господню поучаяйся,/ в молитвах к Богу простираяйся,/ заградителю уст кривоглаголющим слово правыя веры,/ апостолом сопричастниче,/ вере Христовой утвердителю,/ пророчески вещателю, святителю Фотие,/ моли Христа Бога/ умирити мир и спасти души наша.
Перенесение мощей святителей Киевских и всея России чудотворцев Киприана, Фотия и Ионы. Кондак
Яко трие велицыи светила, явистеся,/ озаряюще всю подсолнечную/ богоданною вам благодатию чудес,/ и просветисте молитвами своими верных сердца,/ вашу память чтущих честнаго пренесения./ И Владыку Христа, всех Творца, молите/ стране нашей на враги победу подати,/ яко имуще дерзновение,/ и нам просите велия милости, вопиющим к вам:/ радуйтеся, поборницы по Христове Церкви/ и многочестная светила, святителие славнии.
Перенесение мощей святителей Киевских и всея России чудотворцев Киприана, Фотия и Ионы. Ин кондак
Яко крин, в пустыни давидски процветше, отцы святии,/ ныне явистеся и к Вышнему течению радостно устремистеся,/ идеже с лики святых Пресвятей Троице предстояще,/ молите сохранитися стаду вашему от враг видимых и невидимых./ Мы же, святое ваше обретение празднующе, вопием:/ радуйтеся, теплии наши заступницы.
Кондак святителя Фотия, митрополита Киевского
Троице сосуд явися честный твоим житием,/ святителю Фотие, всегда зрящий Святую Троицу,/ Ейже предстоиши, молися непрестанно о всех нас.
