Акафисты - 01 октября 2025
Кондак 1
Избранная от чрева матерня, угоднице Христова княжно Евфросиние, прославляюще прославльшаго тя Христа Господа, хвалебная приносим ти песни, мати преподобная: ты же, яко имущая дерзновение ко Господу, от всяких нас бед свободи, да зовем ти:
Радуйся, Евфросиние, невеста Христова прекрасная.
Икос 1
Ангелов Царица и Мати Господа, провидящи равноангельное житие твое, услыша молитву святых твоих родителей и разреши тобою неплодство их, трикратно тем явившися во сне в знамение твоего избрания, блаженная. Мы же таковое о тебе Божие смотрение прославляюще, взываем ти:
Радуйся, святый плоде, молитвами неплодствовавших испрошенный; радуйся, честный даре, Приснодевою безчадствовавшим дарованный.
Радуйся, чудным фимиамом, яко будущее благоуханное селение Духа, до зачатия предзнаменованная; радуйся, в предъосвященном молитвою и Божиим благословением чреве зачатая.
Радуйся, по зачатии, яко чистая голубица, от Пречистыя Девы даемою голубицею предъобразованная; радуйся, до рождения Царицею неба и земли в служебный лик себе предъизбранная.
Радуйся, еяже рождение Богородицею со святыми Антонием и Феодосием яве предвозвещено быти; радуйся, ейже имя, яко имевшей быти верною Богу рабою, Феодулия пронареченно бысть.
Радуйся, рождением своим бывшее свыше обетование оправдавшая; радуйся, по рождении абие великое свое предназначение проявившая.
Радуйся, еще в пеленах сущи, пост иноческий державшая; радуйся, от сосцу доилицы, егда тоя мяса ядяше, николиже млека вкусити хотевшая.
Радуйся, Евфросиние, невеста Христова прекрасная.
Кондак 2
Видяще родители твоя, яко услышана бысть молитва их о тебе, блаженная, и чудящеся о явлениих Богоматере, во сне яко яве бывших, слагаху тая в сердце своем: велие же некое о тебе Божие смотрение в тех провидяще, радостно вопияху Богу: Аллилуиа.
Икос 2
Разумети хотя, по рождении твоем, Божие о тебе изволение, боголюбивая мати твоя, молящися, усну и виде себе во сне окриленну, в высоту парящу и тя, отроковицу, Богу в руце вдающу: чесо ради, посвящяющи тя по святом крещении, вручи тя покрову и заступлению Царицы Небесныя. Мы же таковое предъустроение о тебе славяще, хвалебно взываем ти:
Радуйся, по изволению Божию в дар Богу от рождения определенная; радуйся, изначала, яко в небесная парити имущая, предъуказанная.
Радуйся, от купели живаго со Христом общения взыскательницею быти предъявленная; радуйся, во святом крещении во Христа облекшися, хритоподражательницею быти назнаменанная.
Радуйся, в троекратном во имя Пресвятыя Троицы погружении во свете лица Ея пребывати начавшая; радуйся, в белы, во образ чистоты, ризы одеянием в чин непорочных вступившая.
Радуйся, с возложением креста на выю благое иго Христово носити восприявшая; радуйся, с препоясанием чресл бодренною подвижницею Христовою быти себе показавшая.
Радуйся, с горящею при купели свещею в светлый лик благодатно освященных вчиненная; радуйся, в троекратном окрест купели хождении, яко обрученная Христу невеста, ликовавшая.
Радуйся, в залог вечнаго с Небесным Женихом единения святым миром запечетленная; радуйся, в осуждение всякия скверны греховныя на всех чувствах знамение дара Духа Святаго приявшая.
Радуйся, Евфросиние, невеста Христова прекрасная.
Кондак 3
Силою свыше управляема, преуспевала еси возрастом и благодатию у Бога и человек: о чесом родители твои и ужики радующеся, Богу, из уст младенец хвалу себе совершающему, взываху: Аллилуиа.
Икос 3
Имуще в памяти бывшая о тебе знамения и чудящеся необычному в отрочестве разуму твоему, родители твоя разсудиша наипаче поучением божественных книг возгревати живущий в тебе дар благодатныя жизни, еже и соверши сам боголюбивый родитель твой святый благоверный князь Михаил. Хвалу воздающе таковому о тебе родителей твоих мудрому попечению, взываем ти:
Радуйся, премудрости Божией пространное приятелище; радуйся, младенцем открываемых таин верное хранилище.
Радуйся, отроковице, млеком слова животнаго воспитанная; радуйся, дево, чистыми токи небесных истин напоенная.
Радуйся, теплотою учения родительскаго огнь любве к Господу в сердце твоем возгревшая; радуйся, живыя стремления юности от земных к небесным возведшая.
Радуйся, невесто, отцем по плоти в уневещение Христу Господу руководствованная; радуйся, красото, паче всех красных мира красоты райския любити наученная.
Радуйся, розго лозы истинныя, вертоград Христов измлада украшавшая; радуйся, древо, от корене свята плоды благи рано приносити начавшее.
Радуйся, из детства чистотою небесным силам подобившаяся; радуйся, во всю жизнь осенением Приснодевы в непорочном девстве сохранившая.
Радуйся, Евфросиние, невеста Христова прекрасная.
Кондак 4
Бурю внутрь имеяху помышлений родители твоя, егда приспе время преподавати ти внешняя учения, да не како теми охладится сердце твое к небесным, ведуще же страх Божий и святое житие богомудраго болярина Феодора, того призваша научити тя всякой внешней мудрости, Богу просвещающему умы воспевающе: Аллилуиа.
Икос 4
Слышащи преподаваемая тебе о мире Божием учения, яко пчела, от внешних собирала еси сок, силою действовавшия в тебе благодати сладчайшаго паче меда Господа, в духовный сот превращала еси той, и вся искушающи, добрая точию держала еси. Таковую мудрость твою хваляще, взываем ти:
Радуйся, от видимых тварей к невидимым Божиим возносившаяся; радуйся, от красот мира к Краснейшему паче всех любовию возгаравшаяся.
Радуйся, созерцанием Небес, славу Божию поведающих, к снисканию славы пренебесныя воскрилявшаяся; радуйся, от излияния света солнечнаго на злыя и благая богоподобной любви научавшаяся.
Радуйся, во образе солнца, Всевидящее Око Божие умным оком своим зрети учившаяся; радуйся, в различии славы солнца, луны и звезд, различие Небеснаго по делом прославления познававшая.
Радуйся, от воздыханий суете неволею повинувшияся твари, блаженный о гресех плач восприявшая; радуйся, в тяготе вещей земных тяготу грехов проразумевавшая.
Радуйся, стремлением огня горе горняя мудрствовати научавшаяся; радуйся, прехождением образа мира сего в любви к благом непреходящым утверждавшаяся.
Радуйся, в строении вещей земных тайны устроения спасения прозревавшая; радуйся, яко злато огнем искушаемое, очистительный искушений огнь радостно терпети предначинавшая.
Радуйся, Евфросиние, невеста Христова прекрасная.
Кондак 5
Боготечной звезде, волхвов к Солнцу Правды приведшей иногда, подобящися, в дому и княжении родителей твоих на путь спасения приводила еси всех, на святое житие твое взиравших и словес данныя тебе премудрости слушавших, иже тобою просвещаеми, Богу, тя умудряющему, радостно взываху: Аллилуиа.
Икос 5
Видяще тя умом и красотою паче всех дщерей высокородных славну, сынове княжестии молением стужиша родителем твоим, пояти тя ищуще, но не получиша желаемаго, Богу лучшее нечто о тебе устрояющу. Мы же, о тебе путем Божиим чудящеся, взываем ти:
Радуйся, красотою души паче неже лепотою тела всех другинь превосходившая; радуйся, святостию жития паче неже благородством рода прославившаяся.
Радуйся, славных и прекрасных искателей твоих нивочтоже вменившая; радуйся, Краснейшаго паче всех человек всем сердцем взыскавшая.
Радуйся, к единому жениху Христу тайным сердца желанием влекомая; радуйся, Тому, Егоже возлюби душа твоя, невидимым Божиим промышлением блюдомая.
Радуйся, единаго Господа невозвратным помыслом себе избравшая; радуйся, умом и сердцем в нем исчезавшая.
Радуйся, именем Иисуса паче мира благоуханна услаждавшаяся; радуйся, теплотою любве Христовы паче солнца светозарна согревавшаяся.
Радуйся, во еже духовне Христу обручитися достойно себе уготовлявшая; радуйся, боголюбезным добронравием внутрь и вне богато себе украсити ревновавшая.
Радуйся, Евфросиние, невеста Христова прекрасная.
Кондак 6
Провозвестницы бывше божественнаго о тебе промышления родители твоя, тайным Божиим велением влекоми, соизволиша на моление Мины, князя Суждальскаго, паче других искателей твоих и родом и делы славна, и на Бога все упование возложше, на брак тя с ним благословиша, воспевающе вся премудре Строющему: Аллилуиа.
Икос 6
Возсия свет утешения в души твоей, егда в слезных молитвах поведавши скорби сердца твоего Владычице Богородице, о внезапном устроении жизни твоей не по сердцу твоему, услышала еси радостный Тоя глас, волю родителей исполнити тебе повелевавшей, и не разоритися обетом и желанием твоим обещавший. Таковое Матери Божией к тебе благоволение славяще, ублажаем тя, вопиюще:
Радуйся, невесто, дивными путьми во объятия Христова наставленная; радуйся, дево, матерним Приснодевы попечением руководствованная.
Радуйся, теплым воли родителей повиновением связуемая; радуйся, и неизменным желанием девства снедаемая.
Радуйся, таковое в сердце распятие ради Господа претерпевшая; радуйся, преданностию воли Божией, яко на Крест себе в жертву Богу принесшая.
Радуйся, любовь ко Господу с покорностию родителем сочетавшая; радуйся, уповательным послушанием и честь браку воздавшая, и честнейшее брака девство сохраншая.
Радуйся, на брак ити напутствованная, и в безбрачии пребыти несомненно чаявшая; радуйся, на пути во мрак сокровенных о тебе путей Божиих с трепетом воззревавшая.
Радуйся, в приражении недоумений о будущем на камени упования крепко утвердившаяся; радуйся, в данном тебе Богородицею обетовании, яко на лоне матернем, упокоевавшаяся.
Радуйся, Евфросиние, невеста Христова прекрасная.
Кондак 7
Хотящу тако Божию вседержительству, князь Мина, еще не доспевшей тебе града Суждаля, предаде дух свой в руце Божии. Ты же от всяких уз земных свободу улучивши, радостно воспела еси славу Богу: Аллилуиа.
Икос 7
Новую показала еси добродетель, блаженная, егда твердое восприяла еси намерение не возвращатися в дом родителей, вселитися же во граде Суждале, во обители положения ризы Божиея Матере, идеже сокровища своя бедным иждивши, ангельский образ прияла еси. Таковое твое мудрое о себе и спасительно бывшее нам изволение славяще, взываем ти:
Радуйся, во уповании своем не постыжденная; радуйся, получением желания своего обрадованная.
Радуйся, от треволнений мира в небурном пристанищи укрывшаяся; радуйся, вожделенному тебе лику дев радостно сопричетшаяся.
Радуйся, вся утехи земныя во уметы вменившая; радуйся, сокровища вена твоего руками нищих в небесныя сокровищницы предпославшая.
Радуйся, любве ради ко Христу в нищету Его облекшаяся; радуйся, всю славу мира иноческим смирением поправшая.
Радуйся, в пострижении иноческом желанием строгаго постничества горевшая; радуйся, с принятием иноческаго образа духовное всеоружие восприявшая.
Радуйся, по оставлении мира о едином на потребу точию помышлявшая; радуйся, по вселении в обитель черноризиц, духом в общении ангел и святых жити наченшая.
Радуйся, Евфросиние, невеста Христова прекрасная.
Кондак 8
Странно житие восприяла еси во обители, преподобная, смиривши себе паче всех: княжна бо сущи, черноризицам проста рода ради Христа служила еси, поношением Христовым честь рода своего возвеличивши, Богу, дивныя подвиги твоя прославльшу, Емуже вопием: Аллилуиа.
Икос 8
Вся в вышних была еси духом, преподобная, и божественною укрепляема благодатию, во всех добродетелех преуспевала еси, образ совершеннаго иноческаго жития всем, сподвизавшимся ти, подавающи. Темже ублажаем тя, всехвальная:
Радуйся, подвигом добрым подвизавшаяся; радуйся, течение свое добре совершившая.
Радуйся, страхом Божиим всякое нечистое желание побеждавшая; радуйся, памятию о смерти всякое суетное попечение отгонявшая.
Радуйся, пощении и бдении плоть свою смирявшая; радуйся, умным деланием душу свою выну горе восторгавшая.
Радуйся, всегдашним уединением от соблазнов мира чувства своя соблюдавшая; радуйся, бодренным трезвением от злых помыслов сердце свое охранявшая.
Радуйся, в молитвах неусыпная и в чтении божественных книг ненасытимая; радуйся, на всякое послушание скорая, на исполнение же воли своея косная.
Радуйся, терпения, кротости и любве зерцало; радуйся, сердечнаго сокрушения, всегдашняго плача и покаяния правило.
Радуйся, Евфросиние, невеста Христова прекрасная.
Кондак 9
Ангелоподобным житием просиявши, жезл настоятельства прияла еси, блаженная, и, добре правящи обитель сию, молитвою и примером жизни своея, словом научения и устроением чина иноческаго, души, тебе вверенныя, к Богу приводила еси, научающи вся пети Ему: Аллилуиа.
Икос 9
Витийствующий язык не может изглаголати мудрости твоея начальственныя, егда дев от вдовиц отделила еси, да не како от взора и речей помыслы о сластех житейских приемше, осквернятся теми в сердце своем и в добром течении своем запяты будут. Чесо ради дань хвалы тебе приносяще, взываем:
Радуйся, душ боголюбивых мудрая руководительнице; радуйся, невест Христовых неусыпная блюстительнице.
Радуйся, в управлении своем простоту с мудростию соединившая; радуйся, в начальствовании своем снисхождение с взыскательностию сочетавшая.
Радуйся, строгость власти материнскою любовию умерявшая; радуйся, материнскую любовь строгостию власти отрезвлявшая.
Радуйся, мудрыми наставлении добрых в добре утверждавшая; радуйся, и единым взором неисправных к исправности подвизавшая.
Радуйся, крепкою молитвою невидимыя стрелы вражеския от обители отражавшая; радуйся, мудрыми порядками внешния соблазны мира от сестр отвращавшая.
Радуйся, теплыми попечении земную обитель в рай претворившая; радуйся, устроением истиннаго иночества вход в Царство Небесное всем угладившая.
Радуйся, Евфросиние, невеста Христова прекрасная.
Кондак 10
Спасти хотя тобою души многих, милосердый Господь многими дары обогати тя, преподобная, чудотворения и пророчества, прозорливости же и слова помазаннаго, имиже прославляющи ущедрившаго тя Господа, подвигла еси пети Ему всех: Аллилуиа.
Икос 10
Стена была еси обители твоей, егда от неистовства Батыева молитвами твоими сохранила еси ю невредиму. Таковое дивное твое заступление поминающе, взываем ти:
Радуйся, трудолюбным Богу служением дерзновение к Нему стяжавшая; радуйся, совершенным страстей очищением Божие благоволение к себе привлекшая.
Радуйся, благодатей богоизбранный сосуде; радуйся, духа благодвижный органе.
Радуйся, алчущия ведения души манною божественных истин питавшая; радуйся, благочестивых чувства благоуханием обетований услаждавшая.
Радуйся, недуги душевныя словом действенным врачевавшая; радуйся, болезни телесныя именем Иисусовым исцелявшая.
Радуйся, будущая, яко настоящая, провидевшая; радуйся, дальняя, яко близ сущая зревшая.
Радуйся, помышления сердечная Духом Божиим прозревавшая; радуйся, потаенныя страсти Божиим озарением обличавшая.
Радуйся, Евфросиние, невеста Христова прекрасная.
Кондак 11
Пение всякое превосходят небесная утешения, богоблаженная, имиже труды и подвиги твоя увенча Христос Господь в небесных обителех, идеже водворяющися, со ангелы и всеми святыми непрестанно воспеваеши Ему: Аллилуиа.
Икос 11
Светоподателен светильник всякаго утешения была еси по преставлении твоем, преподобная мати: яви бо тя Христос Господь молитвенницу и ходатаицу всем, с верою к тебе прибегавшим. Мы же, твоим заступлением ограждаеми, зовем ти:
Радуйся, по преставлении своем Господом неба и земли милостивно приятая; радуйся, по отшествии от земных в небесных обителех водворенная.
Радуйся, венцем славы за смирение венчанная; радуйся, на престоле царствия за победы над страстьми посажденная.
Радуйся, от манны сокровенныя за сокрушение и слезы услаждаемая; радуйся, от древа животнаго за многия лишения питаемая.
Радуйся, с Царицею Небесною у Престола Царя царей предстоящая; радуйся, с ангелы и всеми святыми заступлением своим нас приосеняющая.
Радуйся, мати, и с неба любящих тя теплотою любве согревати не преставшая; радуйся, и среди небесных утешений земных чад своих не забывшая.
Радуйся, ходатаице усердная, прибегающих к тебе не посрамляющая; радуйся, молитвеннице крепкая, смиренных к тебе молитв не презирающая.
Радуйся, Евфросиние, невеста Христова прекрасная.
Кондак 12
Благодать на благодать бысть нам открытие нетленных мощей твоих, преподобная, в нихже источник всякаго утешения стяжавше, величаем возвеличившаго тя Христа Господа, благодарно поюще Ему: Аллилуиа.
Икос 12
Поюще Дивнаго во святых Своих Господа, тя, яко избранную невесту Свою, славою и честию венчавша, и твое милостивое и скорое во всех нуждах наших заступление и всепоможение прославляюще, благодарно зовем ти:
Радуйся, всеусердная наша предстательнице; радуйся, неотступная наша хранительнице.
Радуйся, обители сея твердое ограждение; радуйся, града нашего верное защищение.
Радуйся, скорбящим отрадо и утешение; радуйся, обидимых прибежище и заступление.
Радуйся, болящих неоскудное врачевание; радуйся, бедствующих благонадежное избавление.
Радуйся, благочестивым царем нашим скорая помощнице; радуйся, христолюбивому воинству необоримая споборнице.
Радуйся, сене, от праведнаго гнева Божия нас укрывающая; радуйся, росо, огнь всяких скорбей и страстей прохлаждающая.
Радуйся, Евфросиние, невеста Христова прекрасная.
Кондак 13
О преславная мати, приими малое сие тебе наше приношение, и твоим теплым у Престола Божия ходатайством избави нас от враг видимых и невидимых, от всяких бед и скорбей, от всякаго губительства и вечныя смерти, да с тобою и всеми святыми в Царствии Небесном сподобимся пети Богу Спасителю нашему: Аллилуиа.
Этот кондак читается трижды, затем 1-й икос «Ангелов Царица …» и 1-й кондак «Избранная от чрева матерня …».
Молитва
О преславная мати, скорая наша помощнице и заступнице и неусыпная о нас молитвеннице! Предстояще иконе твоей и на сию со умилением, яко живей ти сущей, взирающе, молимся тебе усердно: приими прошения наша и принеси я ко Престолу Милосердаго Отца Небеснаго, яко дерзновение многое к Нему имущая. Испроси притекающим к тебе и всем православным христианом вечное спасение и временное благоденствие, на вся же благая дела и начинания наша щедрое благословение и от всяких бед и скорбей скорое избавление. Ей, чадолюбивая мати наша! Тебе, предстоящей Престолу Божию, ведомы суть нужды наша духовныя и житейския: призри на ня матерним оком и твоими молитвами вся злая от нас отврати, паче же злых и богопротивных обычаев умножение. Утверди же во всех веры согласное ведение, взаимную любовь и единомыслие, да во всем житии нашем, словесы же и писании и делы, славится всесвятое имя Отца и Сына и Святаго Духа, Единаго Бога, в Троице покланяемаго, Емуже честь и слава во веки веков. Аминь.
Кондак 1
Возбранниче светлый на тму века сего, во вся оружия Божия облеченный и веру Христову, аки щит, противу суетных мудрований державый, восхваляем тя любовию, святителю и исповедниче Афанасие, ты же яко молитвенник о нас ко Господу дерзновенный, утверждения в истине Православия испроси нам, зовущим: Радуйся, Афанасие, новый исповедниче и Православия учителю.
Икос 1
Ангельскаго чая образа, Афанасие блаженне, измлада игранием детским не внимал еси разумом, молитвам же теплым во храме Господни и рукоделию в доме матернем, аки бы в келлии, всегда прилежа, дерзновенно предвозвещал еси отроком, сверстным тебе, яко имаши быти Церкве Христовы служитель священный. Ведуще убо мы, яко Промыслом Божиим сбыся речение твое, со удивлением зовем ти:
Радуйся, древнею и святою землею Владимирскою в добронравии воспитанный; радуйся, в Лавре преподобнаго Сергия лику инокующих вчиненный.
Радуйся, постом и молитвою житие богоугодное стяжавый; радуйся, от Господа к подвигу свидетельства во дни лукавыя избранный.
Радуйся, благолепия церковнаго блюстителю; радуйся, премудрым Православия наставником подобниче.
Радуйся, Афанасие, новый исповедниче и Православия учителю.
Кондак 2
Видев, яко лютое на Церковь Российскую гонение наста, не точию гнев Божий, праведно движимый на ны, помышлял еси оное, Афанасие богоразумне, но паче премудрую жатву душам, яже созреша в живот вечный, и сего ради Господу жатвы Христу воспевал еси: Аллилуиа.
Икос 2
Разумея Собор всех святых земли Русския, Отечеству нашему от бед избавление быти, словеса тем праздничная нача слагати, богодухновенне, песньми дивными Церковь украшая. Мы же, грешнии, ныне тя зряще в лице присно тобою чтомых угодников Божиих, восписуем ти похвальная сия:
Радуйся, молений умиленных слагателю; радуйся, пения Господеви разумнаго рачителю.
Радуйся, чудотворцев Российских чисте возлюбивый; радуйся, предстателей страны нашея в помощь всегда призывавый.
Радуйся, яко страстотерпцы новыя увенчал еси на земли похвалами; радуйся, яко в сонме тех на Небеси Бога славиши.
Радуйся, Афанасие, новый исповедниче и Православия учителю.
Кондак 3
Силу мняще безбожницы на правоверие прияти, честныя мощи святых земли Владимирския посреде Успенскаго храма соборнаго непокровенны поставиша, во еже посмеитися им, ты же, доблий ратниче Христов, народу во храм притекшу, воззвал еси велегласно: Благословен Бог наш! И тако злоумысляемое святыням поругание в молебное прославление претворил еси, с верными вкупе вопия Богу: Аллилуиа.
Икос 3
Имеющу ти почтенну быти честнейшим епископства саном, всуе потщишася гонители Церкве Христовы прежде архиерейства твоего грозными словесы и прещении тя устрашити, яко благодать Святаго Духа достойно помаза тя во святители земли Владимирския, идеже исповедник и Православия учитель явился еси, Афанасие боголюбезне. Поминающе убо ревностное служение твое, глаголем ти сице:
Радуйся, веры правыя крепкий поборниче; радуйся, раскола новейшаго небоязненный обличителю.
Радуйся, мудрований века сего, возносящихся на разум Божий, посрамление; радуйся, от волков, в одежде овчей во стадо Христово входящих, ограждение.
Радуйся, смущением колеблемых в истине утверждавый; радуйся, отступников ко обращению приводивый.
Радуйся, Афанасие, новый исповедниче и Православия учителю.
Кондак 4
Бури и смятению раскола противу стоя, аще и в заточение бысть неправедно ввержен, святителю Божий, обаче не оставил еси кормила церковнаго, вся верныя писаньми твоими увещавая и моля, да не соединяются с отступниками ни да боятся лукаваго того времене, но яко малое стадо, емуже благоизволи Отец Небесный дати Царство, взывают выну: Аллилуиа.
Икос 4
Слышавше, дивляхуся вси вернии благодушию твоему, исповедниче, темницу бо, в нюже затворен бысть, прибежище благое от поветрия обновленческаго нарицал еси, имея же тамо соузников немало, вкупе с тобою за веру Христову страждущих, веселился еси о Господе со единомысленники твоими, вся святыя земли Русския молитвенно воспевая. Мы же, яко достойный образ нам злострадания являеши, приносим ти таковая:
Радуйся, темницу молитвенным сиянием озаривый; радуйся, и во вратех смертных Жизнодавцу хвалу возсылавый.
Радуйся, страждущих истины ради милосердый утешителю; радуйся, и безбожников заточенных человеколюбный питателю.
Радуйся, скорбьми от любве Божия не разлученный; радуйся, в терпении твоем от Господа укрепленный.
Радуйся, Афанасие, новый исповедниче и Православия учителю.
Кондак 5
Богохранимаго избранника помышляем тя, друже Христов Афанасие, зане на брезе Онежскаго езера в темнице нарочито учиненной, да бы заточенныя тамо смерти удобно предати, мнози спленницы твоя нуждне от мучителей кончину прияша, тебе же, трие месяцы день и нощь убиением безсудным угрожаема бывша, избави Господь Многомилостивый, Емуже благодарно воззвал еси: Аллилуиа.
Икос 5
Видя всегда очима сердца твоего, духоносне Афанасие, коликими ранами и труды стяжаша отцы святии истинное по Бозе житие, досады и укоризны многая претерпевал еси, гонителей твоих, яко заповеда Христос, благословляя. Обременен же быв горькими работами, во узилищи, аки вторый Иоанн Дамаскин, вся места нечистая рукама твоима безропотне омывал еси. Неизреченнаго ради смирения твоего приносим ти похвальная сия:
Радуйся, кротости пречудныя образе; радуйся, блаженнейшаго послушания сыне.
Радуйся, от нечестивых уничижение в честь себе вменивый; радуйся, обидящим тебе вседушно погрешения простивый.
Радуйся, враждебников твоих возлюбителю нелицемерный; радуйся, ненавидящим тебе благодетелю усердный.
Радуйся, Афанасие, новый исповедниче и Православия учителю.
Кондак 6
Проповедник немолчен Евангелия Христова и в темницах явился еси, Афанасие досточудне, разбойников бо даже и душегубцев суровых к покаянию приводил и научал еси песнь хвалы и благодарения воспевати Богу: Аллилуиа.
Икос 6
Возсиявшу тебе в темнице светом истины, приказа мучитель некий отвести тя во узилище иное, и стражницы, яже ведоша тебе, немилосерди быша зело и томляху тя, старче святый, скоро гоняще, во еже малыми деньми прейти толикую долготу пути. Таже гладом в заточении том непрестанно морим бысть, яко едва тебе живу остатися. Обаче, крепостию телесною изнемогая, не изнемогал еси терпением, вся Христа ради препобеждая. Мы же, таковому дивящеся подвигу твоему, поем ти сице:
Радуйся, без крове мучениче добропобедный; радуйся, воине Христов непреодоленный.
Радуйся, огнем страданий паче злата искушенный; радуйся, в мужестве непоступнем паче адаманта утвержденный.
Радуйся, кротце в жертву правды Бога ради себе предавый; радуйся, слезами всеянное радостию пожавый.
Радуйся, Афанасие, новый исповедниче и Православия учителю.
Кондак 7
Хотяще безбожницы, исповедания ради и сана твоего святительскаго, не отпустити даже по заточении тя свободна, глаголаша лукавне, яко ни от кого имаши обрести послужения в старости твоей, и затвориша тя в темничнем доме призрения, где паче неже в узилищи, безчисленными скорбьми и поношении стужаху ти. Но попечением христиан благочестивых от горшаго места онаго изведен был еси, воспевая помощи подателю Богу: Аллилуиа.
Икос 7
Новому наставшу гонению на Церковь Христову, повелеша богопротивницы заключити святыя храмы, а иныя до основания разорити. Ты же, на Господа надеяся несумненно, мужество ближним твоим внушал еси, да не будут страшливи и малодушии, рече бо Господь, яко врата адова не одолеют Церкви Его. Темже вопием ти сице:
Радуйся, неизреченнаго милосердия Христова добрый вестниче; радуйся, благонадежнаго упования Божия тихий Ангеле.
Радуйся, глубиною покаяния высоту смиренномудрия стяжавый; радуйся, от сыновняго Церкви послушания к совершению святых отец ея востекший.
Радуйся, за Отечество наше молитвенниче непрестанный; радуйся, ходатаю о людех его ко Творцу неусыпный.
Радуйся, Афанасие, новый исповедниче и Православия учителю.
Кондак 8
Странное и неудобь разумеемое чудо яви о тебе Господь, святителю Афанасие, литургисавшу бо ти во святей обители преподобнаго Сергия, нецыи от молящихся зреша тя аки бы волною, из алтаря святаго и паки во оный по воздуху износима и вносима быти. Самовидцы же чудеси тому со удивлением возопиша в сердцах своих Богу: Аллилуиа.
Икос 8
Всем неблагоразсудным, яже точию в домех своих молишася, общения же церковнаго ся отлучаху, богоразумными словесы и посланьми твоими, наказовал еси, миротворче усердный, присоединится, аки удом, прочему телеси церковному, да раскола бы новаго не сотворили, и тех к согласному единомыслию добре управил еси. Того ради и мы, мира днесь Церкве Православней и скораго раздором утоления взыскующе, зовем ти:
Радуйся, соблазны и несогласия среде верных потребивый; радуйся, хитона церковнаго раздранию возбранити предуспевый.
Радуйся, расточенныя овцы Христовы во едино стадо собираяй; радуйся, заблуждающих от пути истиннаго к покаянию обращаяй.
Радуйся, яко послушанию Матери Церкви чада ея наставляеши; радуйся, яко веру православную хранити научаеши.
Радуйся, Афанасие, новый исповедниче и Православия учителю.
Кондак 9
Всю верным бывшую радость кто изрещи возможет, святителю славне, егда во Владимире граде явился еси, празднества ради осми сот летом собора Успенскаго; како клирицы и вся люди сладце зряху на тя и любезно о Господе тя целоваху; таже видением твоим духовнаго веселия исполньшеся, вмале не на руках своих внесоша тебе во храм, поюще Богови: Аллилуиа.
Икос 9
Ветию тя преизящна показа Господь, Афанасие благоглаголиве, песньми новыми украсившаго памяти и праздники святых земли Русския, гимны бо церковныя и канонов словеса слагая, в таковых трудех душеполезных и Церкви Христовой зело потребных, препроводил еси лета довольна, оттуду же и песнописца прозвание стяжал еси. Мы же, от умиленных глаголов твоих и до днесь, аки пищею духовною питающеся и аки сладким потоком ся напаяюще, восхваляем тя:
Радуйся, талант песнотворчества, от Бога ти данный, изрядно умноживый; радуйся, молитвословия многоразлична, послушания ради церковнаго, со тщанием добре исправивый.
Радуйся, цевнице духовная, сердца наша увеселяющая; радуйся, источниче изобильный, воду живоносную нам источающий.
Радуйся, яко песнописцы новыя к усердию благочестивому подвизаеши; радуйся, яко, от словес твоих оправданный, и нам у Бога оправдания молиши.
Радуйся, Афанасие, новый исповедниче и Православия учителю.
Кондак 10
Спасенному пути по вся дни чада церковная наставлял еси, духоносне Афанасие, мнози бо вернии с любовию к тебе течаху, да бы поучитися от честнаго жития твоего, поелику сердцем смирен и тих обычаем, негневлив и кроток, и всех добродетелей исполнен сый, делы твоими паче словес научал еси пети Богу: Аллилуиа.
Икос 10
Стену твердую от навет и козней вражиих веру православную первие проповедал еси, старче святый, таже покаяние слезное и молитву непрестанную вкупе с богоугодными делы, и себе на служение всем приходящим к тебе предавая, многих ко спасению добре управил еси. Сего ради и мы, недостойнии, руководствия добраго требующе, вопием ти тако:
Радуйся, недоумевающим благий советниче; радуйся, заблуждающих кроткое вразумление.
Радуйся, душ смятенных сладостный умирителю; радуйся, неудобоизцельных страстей отгонителю.
Радуйся, лукавыя помыслы в сердцах человеческих провидевый; радуйся, благоуветливыми словесы ко отложению греховнаго прилога увещававый.
Радуйся, Афанасие, новый исповедниче и Православия учителю.
Кондак 11
Пению молебному прилежаща усердно, утеши тя Господь пред кончиною видением чудным, яко святых земли Русския, ихже присно почитал бе любовию, зрети сподобился еси купно со Христом, Емуже абие воззвал еси: Аллилуиа.
Икос 11
Светом Божественнаго явления осиянный, последний бо день и час блаженнаго исхода твоего провозвещен бысть от Господа ти, мирно предал еси, тайновидче, душу твою в руце Христа Бога, Егоже от юности возлюбил и за Негоже толикая пострадал еси. Но яко в животе своем, подвижниче велий, свет бысть миру такожде и по преставлении чудесы многими озарити нас не престаеши, зовущих:
Радуйся, воина юнаго от лютыя смерти чудесно избавивый; радуйся, вдовицу благочестивую из руку зловольника дивно исхитивый.
Радуйся, яко персть и былие от гроба твоего недужным исцеления подаваша; радуйся, яко мнози при гробе твоем молившеся, душепагубным страстем врачество обретоша.
Радуйся, честнаго брака христианскаго известный покровителю; радуйся, девствующих и целомудренных заступниче благонадежный.
Радуйся, Афанасие, новый исповедниче и Православия учителю.
Кондак 12
Благодать, юже тесным твоим житием и подвиги многими у Бога стяжал еси, ведая, освященный Собор Православныя нашея Церкве сопричте тебе сонму всех русских святых, в том же светло ликуеши ныне, всесоставным гласом воспевая победную песнь: Аллилуиа.
Икос 12
Поем тя со умилением, святителю достохвальне, яко во обители горней вселивыйся, на земли нам оставил еси честныя твоя мощи, яже благоговейно днесь почитаем и скораго исцеления скорбем душевным и телесным чающе, взываем ти тако:
Радуйся, блаженства изгнанных правды ради праведно удостоенный; радуйся, в светлостех немерцающих Пресвятыя Троицы присно живущим соводворенный.
Радуйся, ангельским чином сликовствующий в вышних; радуйся, от человек похвалы досточестно приемлющий в нижних.
Радуйся, верою тя почитающим скорое утешение; радуйся, любовию тя воспевающим благое веселие.
Радуйся, Афанасие, новый исповедниче и Православия учителю.
Кондак 13
О святителю благоглаголиве Афанасие, имене Божия досточудный исповедниче, земли Владимирстей радование и Церкви Святей украшение, убогое сие услыши моление наше и благомощное ходатайство твое вознеси о нас Господеви, да вся полезная ко спасению душевному нам дарует, во еже непреткновенно внити нам в Царство Небесное и воспета тамо Живоночальной Троице: Аллилуиа.
Сей кондак глаголи трижды. И паки чтется первый икос: Ангельскаго чая образа… и кондак первый: Возбранниче светлый…