Тропарь преподобным старцам Оптинским
Православныя веры светильницы, монашества непоколебимии столпи, земли Российския утешителие, преподобнии Старцы Оптинстии, любовь Христову стяжавши и души своя за чада полагавши, молитеся ко Господу, да утвердит земное отечество ваше в Православии и благочестии и спасет души наши.
Кондак преподобным старцам Оптинским
Воистину дивен Бог во святых своих, Пустынь Оптину якоже вертоград старчества явивый, идеже богопросвещении отцы, тайная сердца человеческого ведуще, народа Божия печальницы доблии явишася: сии бо на путь покаяния грехом отягощеннныя наставиша, в вере колеблющияся светом Христова учения просветиша и Божией премудрости научиша, страждующим и немощным спострадаша и исцеления дароваша. ныне же, во славе Божией пребывающее, молятся непрестанно о душах наших
Тропарь великомученика Евстафия и иже с ним
Мученицы Tвои, Господи,/ во страданиих своих венцы прияша нетленныя от Тебе, Бога нашего:/ имуще бо крепость Tвою,/ мучителей низложиша,/ сокрушиша и демонов немощныя дерзости./ Tех молитвами// спаси души нaша.
Кондак великомученика Евстафия
Страсти Христовы яве подражав/ и Сего испив усердно чашу,/ общник, Евстафие, и славы снаследник был еси,/ от Самаго всех Бога// приемля с высоты божественное оставление.
Тропарь великомученика Евстафия и иже с ним
Мученицы Tвои, Господи,/ во страданиих своих венцы прияша нетленныя от Тебе, Бога нашего:/ имуще бо крепость Tвою,/ мучителей низложиша,/ сокрушиша и демонов немощныя дерзости./ Tех молитвами// спаси души нaша.
Тропарь благоверного князя Михаила Черниговского и болярина его Феодора
Троичнаго Божества осиянием просветився,/ страстотерпче великий княже Михаиле,/ с премудрым болярином ти Феодором,/ самозванна к подвигом устремистася,/ сквозе огнь не идоста,/ кусту же и идолом не поклонистася, но оплеваста/ и нечестиваго царя обличиста,/ Христа же Единаго от Троицы Бога Суща исповедаста./ И того ради кровей своих струями обагристася, славная./ Темже и венца от Него победная прилета,/ и нас свыше назираета,/ молим ва, святая, молите Того,/ яко да вашими молитвами избавит нас от всяких обстоящих ны зол/ и подаст нам вся благая,/ Иже Един Сый прославляемый во святых Своих.
Тропарь мучеников и исповедников Михаила и Феодора
Жизнь вашу мученически совершивше,/ исповедания венцы украсившеся, к Небесным востекосте,/ Михаиле премудре с доблим Феодором,/ молите Христа Бога/ сохранити oтечество ваше,/ град же и люди,// по велицей Его милости.
Кондак благоверного князя Михаила Черниговского и болярина его Феодора
Солнца мысленнаго праведнаго — Христа/ озарився сиянием, пребогате Михаиле,/ видимому солнцу не поклонился еси/ и твари паче Творца не послужил еси/ и нечестие обуздал еси,/ ярости царя не убоявся/ и крове своей обагрением/ Христови предстал еси, радуяся./ И ныне в пренесении мощей твоих/ нас свыше назирай и Христа Бога моли,/ молимся яко спастися нам/ и Православию непоколебиму пребыти,/ Отечеству нашему соблюстися во всем/ молитвами твоими, святе,/ по велицей Его милости.
Кондак мучеников и исповедников Михаила и Феодора
Царство земное в ничтоже вменив,/ славу, яко преходящую, оставил еси,/ самозван пришед к подвигом,/ Троицу проповедал еси пред нечестивым мучителем,/ страстотерпче Михаиле с доблим Феодором,/ Царю сил предстояще,/ молите без вреда сохранити Отечество ваше, град же и люди,// да вас непрестанно почитаем.
Ин тропарь мучеников и исповедников Михаила и Феодора
Блаженнии апостоли равночестнии,/ прияли есте венец от Христа,/ занеже того достоини Михаиле Богомудре и Феодоре дивне,/ мир мирови испросите,/ и душам нашим велию милость.
Ин кондак благоверного князя Михаила Черниговского и болярина его Феодора
Верою укреплыыеся, святии, мучения претерпесте/ и кровьми своими погаснете пламень сопротивных безбожия,/ Христа же исповедаете, с Отцем и Духом,/ Михаиле и Феодоре, Его молите за всех нас.
Ин кондак благоверного князя Михаила Черниговского и болярина его Феодора
Вышних ища, нижняя оставил еси,/ колесницу на Небеса кровь свою сотворил еси,/ тем собеседниче первомучеником бысть, Михаиле и Феодоре,/ с ними же Христа Бога моля непрестанно за вся ны.
Ин кондак благоверного князя Михаила Черниговского и болярина его Феодора
Яко светило в Руси возсиявше, мучения лучами славными отразисте, страстотерпцы славнии, Михаиле и Феодоре, тем вопиясте:/ ничтоже нас отлучит от любве Христовы.
Тропарь преподобного и благоверного князя Олега Брянского
От юности возлюбив Христа всем сердцем, преподобне / славу земную, яко преходящу, оставил еси / и царство земное в ничтоже вменивше, / лику инок радостно причелся еси / и труды многими град Брянск, аки солнце пресветло, озарил еси: / тем, быв Троицы украшение, моли, княже Олеже, Христа Бога, спастися душам нашим.
Кондак преподобного и благоверного князя Олега Брянского
Уподобился еси плодоносней леторасли от корене честнаго, Олеже благородне,/ истину возлюбив и нетленный Христов живот./ Темже молитвою, бдением и пощением светильник великий быв твоим учеником,/ просвети, блаженне, Отечество твое и спаси души наша.
Величание преподобного и благоверного князя Олега Брянского
Ублажаем тя, благоверне княже Олеже, и чтим святую память твою, ты бо молиши за нас Христа Бога нашего
Тропарь преподобному Поликарпу Брянскому
Ветрилом креста душевный корабль окормив, житейская красная оставил еси, и от мирскаго мятежа изшед, плотския похоти воздержанием многим отче умертвил еси, пощением и слезами, молитвами и песньми непрестанно прилепляяся к Богу; темже и жилище достойно Духа Пресвятаго показался еси. Моли, Поликарпе преподобне, Христа Бога, оставление прегрешений даровати нам и велию милость.
Кондак преподобному Поликарпу Брянскому
Якоже отец духовно, князь чувственно, людем российским явился еси, преподобне Поликарпе; мудрование бо и славу мирскую презрев, Божественным житием последовал еси, монахом же был твердое укрепление и светильник светел; темже похваляюще честную память твою, зовем ти: моли Христа Бога спасти и просветити души наша.
Тропарь святителя Иоанна митрополита Тобольского
Наставниче благочестия,/ сиротствующих питателю,/ скорбящих утешителю, недугующих врачу безмездный,/ душею страждущих скорый помощниче,/ теплый молитвенниче о всех ко Господу,/ святителю отче Иоанне,// моли Христа Бога спастися душам нашим.
Кондак святителя Иоанна митрополита Тобольского
Явился еси во тьме неведения пребывающим просветитель,/ вдов и сирот утешитель,/ дивный врач немощствующих,/ младенцев и отроков наставник,/ родителем же пресветлое радование,/ святителю отче Иоанне,/ моли Христа Бога/ подати стране нашей в вере утверждение,/ воинству нашему на враги победу и одоление,// людем же своим велию милость.
Тропарь Глинским святым
Преподо́бнии и богоно́снии отцы́ на́ши Гли́нстии,/ уче́ньми дре́вних отце́в ста́рчество в оби́тели утверди́вшии,/ моли́твою, кро́тостию, посто́м и смире́нием/ с послуша́нием любо́вь Христо́ву стяжа́вшии:/ во дни гоне́ния в разсе́янии за ве́ру правосла́вную,/ яко зве́зды на небесе́х всю Вселе́нную просвети́вшии/ и ко Христу́ приве́дшии./ Моли́теся ко Го́споду// поми́ловати и спасти́ ду́ши на́ша.
Перевод: Преподобные и Богоносные отцы наши Глинские, по учениям древних отцов старчество в обители утвердившие, молитвой, кротостью, постом и смирением с послушанием любовь Христову стяжавшие, во дни гонений в рассеянии за веру православную, как звезды на небесах, всю вселенную просветившие и ко Христу приведшие. Молитесь ко Господу помиловать и спасти души наши.
