Тропари, кондаки и величания - 05 октября 2025
Тропарь благоверных князей Бориса и Глеба
Днесь церковная разширяются недра,/ приемлющи богатство Божия благодати,/ веселятся русстии собори,/ видяще преславная чудеса,/ яже творите приходящим к вам верою,/ святии чудотворцы Борисе и Глебе,// молите Христа Бога, да спасет души наша.
Тропарь благоверных князей Бориса и Глеба
Правдивая страстотерпца/ и истинная Евангелия Христова послушателя,/ целомудренный Романе с незлобивым Давидом,/ не сопротив стаста врагу сущу брату,/ убивающему телеса ваша,/ душам же коснутися не могущу./ Да плачется убо злый властолюбец,/ вы же, радующеся с лики Ангельскими,/ предстояще Святей Троице,/ молитеся о державе сродников ваших богоугодней быти// и сыновом Российским спастися.
Тропарь благоверного князя Глеба
Мученик Твой, Господи,/ спасшеся веры ради,/ княже Глебе,/ труждающимся быстрый помощник/ и ненадежным надежа./ Ты бо болезни врачуеши притекающим к тебе с верою./ Темже и мы верою молимся/ от бед избави нас,/ чтущим любовию память твою.
Кондак благоверных князей Бориса и Глеба
Явися днесь в стране Русстей/ благодать исцеления/ всем, к вам, блаженнии,/ приходящим и вопиющим:// радуйтеся, заступницы теплии.
Ин тропарь благоверных князей страстотерпцев Бориса и Глеба
Пречестнии, и целомудреннии, и незлобивии страстотерпцы,/ Романе славный и Давиде чудный,/ иго бо Господне евангельски на рамо вземше,/ последовасте Христу/ и, крест Его, яко скипетр, в руку имуще,/ врага брата и злаго властолюбца соодолесте,/ и той ныне в геенне мучится,/ вы же радуетеся, с лики ангельскими предстояще Святей Троице,/ молитеся о державе сродник ваших, благоугодней быти,/ и сыновом русским спастися.
Ин тропарь благоверных князей страстотерпцев Бориса и Глеба
Мученицы Господни спасшиися,/ преславнии блаженнии князи Борисе и Глебе,/ труждающимся быстрии помощницы,/ недужным целители,/ вы бо болезни врачуете/ притекающих в церковь с верою./ Темже и мы молимся:/ от бед избавите нас,/ чтущих с любовию пренесение мощей ваших.
Ин тропарь благоверных князей страстотерпцев Бориса и Глеба
Днесь всякая душа верных веселится,/ в пренесение честных мощей ваших, Борисе и Глебе,/ слепыя просвещаете, немым уста отверзаете и печальных утешаете,/ прияли бо есте от Христа Бога благодать исцелений,/ молитеся о душах наших.
Ин кондак благоверных князей страстотерпцев Бориса и Глеба
Приидите, вси русстии собори,/ чудотворцев и мучеников Бориса и Глеба восхвалим,/ законно бо пострадавше,/ победисте сопротивнаго врага,/ тем святым заступлением князи русстии враги побеждают,/ тем память ею весело и любовию похвалим, вопиюще:/ за ны молите Святую Троицу,/ умирити мир и спасти души наша.
Ин кондак благоверных князей страстотерпцев Бориса и Глеба
От гроба знамения показасте во стране Русстей,/ явися днесь благодать исцеления/ всем, к вам, страстотерпцы, притекающим с верою,/ Борисе славный со Глебом чудным./ Крепцы верою, добропобеднии мученицы, за Христа подъемше различныя муки,/ и на многа лета сокровени быша ваши святии мощи,/ ныне же являетеся от земли,/ возсиявше лучами, яко богатство многоценно,/ и в церковь Божию честно носими, архиерей Божиих дланьми./ Темже вопием вам:/ радуйтеся, князи, русстии заступницы.
Кондак благоверных князей Бориса и Глеба
Возсия днесь преславная память ваша,/ благороднии страстотерпцы Христовы, Романе и Давиде,/ созывающи нас к похвалению Христа Бога нашего./ Тем, притекающе к раце мощей ваших,/ исцеления дар приемлем молитвами вашими, святии:// вы бо божественнии врачеве есте.
Ин тропарь благоверных князей страстотерпцев Бориса и Глеба
Яко плодовита винограда, отрасли добродетелей суще,/ Небесный дождь Христов прилете,/ источающе отечеству своему струю Православия,/ Борисе пречудне с доблим Глебом,/ вкупе молитеся Господеви сохранити град и люди,/ и на враги пособствовати,/ и душам нашим даровати велию милость.
Ин тропарь благоверных князей страстотерпцев Бориса и Глеба
Мученическою кровию порфиру окропивше светло,/ украшени предстоите, страдальцы славнии, Царю Безсмертному,/ и, венцы славы от Него приимше,/ молитеся стране нашей подати на враги одоление/ и душам нашим велию милость.
Ин кондак благоверных князей страстотерпцев Бориса и Глеба
Аще и убиени бысте и во гробех положени,/ но на Вышнее Царство преидосте,/ оваго бо копии насунута,/ другаго же, яко агнца незлобива, ножем зарезаша,/ тем и кровь ваша бысть исцеление миру,/ верою призывающим вас, святии, на помощь.
Кондак благоверного князя Глеба
Днесь земля ублажается, напившися крови твоея,/ и храм освящается, приимши тело твое,/ великомучениче княже Глебе./ Желанием болезни твоея за грези предлагаема/ и удесы благоухания освящающи,/ подающи всему миру велию милость.
Тропарь преподобных священномученика Кукши и Пимена постника, Печерских, в Ближних пещерах
Мученическою кровию, священне Кукше,/ в проповеди Евангелия со учеником ти, блаженным Никоном, честне украсивыйся,/ и Пимене, в постничестве светозарно просиявый,/ в един день и час внидосте в свет незаходимый,/ идеже молитеся Господеви,/ да подаст нам велию милость.
Кондак преподобных священномученика Кукши, ученика его Никона и Пимена постника, Печерских, в Ближних пещерах
Светила разумная, сошедшеся, хвалами воспоем, людие,/ просияли бо суть в мире сем:/ Пимен многими подвиги,/ Кукша же со учеником Никоном проповедию Слова,/ и сии трие, единоумно предстояще Святей Троице,/ яко солнце сияют и просвещают/ любовию память их восхваляющих.
Тропарь. Александру (Пересвету) и Андрею (Ослябе), Радонежским
Воини Христолюбивии, страдальцы послушания прехвальнии,
Александре дивный Пересвете и Андрее Ослябей именуемый,
Сергия игумена благодатные наследницы,
Куликовской брани ратницы духовнии.
Вы бо змия агарянскаго победисте, /
но и нас своим заступлением не остависте. /
Телами в храме Рождества Богородицы почиваете, /
душею в превышнем селении пребываете. /
Молите за весь род русский православный,
преподобнии сродницы наши.
Кондак Александру (Пересвету) и Андрею (Ослябе), Радонежским
На поле Куликовом агарян победисте и венцами славы увенчастеся преподобномученицы Александре и Андрее, молите Христа Бога и нам врага рода человеческого побеждати, Православие хранити и душам нашим велию милость.
Тропарь блаженного Игоря, великого князя Черниговского и Киевского
Наста днесь всечестная память страстотерпца благовернаго князя Игоря,/ созывающая люди в пречестный храм Спасов,/ идеже радостно сошедшеся благочестивых множество/ молитвенно празднуют святую память твою,/ и с верою взывают ти:/ молися, святе, стране Российстей, граду Чернигову и всем православным христианом/ в мире и благоденствии спастися.
Кондак блаженного Игоря, великого князя Черниговского и Киевского
Изменил еси земнаго княжения славу/ во иночества образ смиренный/ и страдальчески земное житие скончав,/ ныне на Небесех радуешися,/ усердие моляся/ о чтущих тя, Игоре, страдальцев похвало.
Ин тропарь благоверного великого князя Игоря Черниговского
Просветився Божественным крещением, / Духа Святаго светлостьми озаряем, / Евангелие Христово в сердце твое восприял еси / делом слово Сына Божия исполняя, благоверный княже Игоре, / моли Всеблагаго Спасителя нашего даровати нам мир, и милость, / и спасение душ наших, чтущих честную память твою.
Ин кондак благоверного великого князя Игоря Черниговского
Княжескую диадему обагрил еси кровию твоею, / Богомудре страстотерпче Игоре, / за скиптр крест в руку приим, явился еси победоносец / и жертву непорочну Владыце принесл еси себе. / Яко бо агнец незлобив от раб убиен был еси, / и ныне радуяся предстоиши Святей Троице, / молися спастися душам нашим.
Величание благоверному великому князю Игорю Черниговскому и Киевскому
Величаем тя, страстотерпче святый благоверный великий княже Игоре, и чтим святую память твою, ты бо молиши за нас Христа Бога нашего.
Тропарь благоверного князя Михаила Черниговского и болярина его Феодора
Троичнаго Божества осиянием просветився,/ страстотерпче великий княже Михаиле,/ с премудрым болярином ти Феодором,/ самозванна к подвигом устремистася,/ сквозе огнь не идоста,/ кусту же и идолом не поклонистася, но оплеваста/ и нечестиваго царя обличиста,/ Христа же Единаго от Троицы Бога Суща исповедаста./ И того ради кровей своих струями обагристася, славная./ Темже и венца от Него победная прилета,/ и нас свыше назираета,/ молим ва, святая, молите Того,/ яко да вашими молитвами избавит нас от всяких обстоящих ны зол/ и подаст нам вся благая,/ Иже Един Сый прославляемый во святых Своих.
Тропарь мучеников и исповедников Михаила и Феодора
Жизнь вашу мученически совершивше,/ исповедания венцы украсившеся, к Небесным востекосте,/ Михаиле премудре с доблим Феодором,/ молите Христа Бога/ сохранити oтечество ваше,/ град же и люди,// по велицей Его милости.
Кондак благоверного князя Михаила Черниговского и болярина его Феодора
Солнца мысленнаго праведнаго — Христа/ озарився сиянием, пребогате Михаиле,/ видимому солнцу не поклонился еси/ и твари паче Творца не послужил еси/ и нечестие обуздал еси,/ ярости царя не убоявся/ и крове своей обагрением/ Христови предстал еси, радуяся./ И ныне в пренесении мощей твоих/ нас свыше назирай и Христа Бога моли,/ молимся яко спастися нам/ и Православию непоколебиму пребыти,/ Отечеству нашему соблюстися во всем/ молитвами твоими, святе,/ по велицей Его милости.
Кондак мучеников и исповедников Михаила и Феодора
Царство земное в ничтоже вменив,/ славу, яко преходящую, оставил еси,/ самозван пришед к подвигом,/ Троицу проповедал еси пред нечестивым мучителем,/ страстотерпче Михаиле с доблим Феодором,/ Царю сил предстояще,/ молите без вреда сохранити Отечество ваше, град же и люди,// да вас непрестанно почитаем.
Ин тропарь мучеников и исповедников Михаила и Феодора
Блаженнии апостоли равночестнии,/ прияли есте венец от Христа,/ занеже того достоини Михаиле Богомудре и Феодоре дивне,/ мир мирови испросите,/ и душам нашим велию милость.
Ин кондак благоверного князя Михаила Черниговского и болярина его Феодора
Верою укреплыыеся, святии, мучения претерпесте/ и кровьми своими погаснете пламень сопротивных безбожия,/ Христа же исповедаете, с Отцем и Духом,/ Михаиле и Феодоре, Его молите за всех нас.
Ин кондак благоверного князя Михаила Черниговского и болярина его Феодора
Вышних ища, нижняя оставил еси,/ колесницу на Небеса кровь свою сотворил еси,/ тем собеседниче первомучеником бысть, Михаиле и Феодоре,/ с ними же Христа Бога моля непрестанно за вся ны.
Ин кондак благоверного князя Михаила Черниговского и болярина его Феодора
Яко светило в Руси возсиявше, мучения лучами славными отразисте, страстотерпцы славнии, Михаиле и Феодоре, тем вопиясте:/ ничтоже нас отлучит от любве Христовы.
Тропарь пророка Ионы
Пророка Твоего Ионы память, Господи, празднующе, / тем Тя молим: / спаси души наша.
Кондак пророка Ионы
Пророк дивен показася, / Божие повеление прием во образ тридневнаго Воскресения. / В ките тридневен быв, неврежден от зверя изыде / и явися светел проповедник Ниневии, великому граду. / Сего ради тя радостно, Ионо, почитаем, яко человеколюбия Божия провозвестника.
Тропарь священномученика Фоки
И нравом причастник,/ и престолом наместник апостолом быв,/ деяние обрел еси, богодохновенне,/ в видения восход,/ сего ради, слово истины исправляя,/ и веры ради пострадал еси даже до крове,/ священномучениче Фоко,/ моли Христа Бога// спастися душам нашим.
Тропарь священномученика Фоки
И нравом причастник,/ и престолом наместник aпостолом быв,/ деяние обрел еси, богодухновенне,/ в видения восход,/ сего ради слово истины исправляя,/ и веры ради пострадал еси даже до крове,/ священномучениче Фоко,/ моли Христа Бога,// спастися душам нашим.
Кондак священномученика Фоки
Яко святитель принося, отче, жертвы,/ на конец себе принесл еси жертву живу,/ свидетельствовав законно о Христе Бозе,/ от Ангел укрепляемый,/ и смерть изволяя,/ сый с вопиющими тебе:// прииди, Фоко, с нами, и никтоже на ны.
Кондак священномученика Фоки
Яко архиерей принося, отче, жертвы,/ на конец себе принесл еси жертву живую,/ свидетельствовав законно о Христе Бозе,/ от Ангел укрепляем/ и смерть изволяя,/ сый с вопиющими тебе:// прииди, Фоко, с нами, и никтоже на ны.
Тропарь преподобного Макария Жабынского, Белевского чудотворца
От мирскаго жития изшед / в тихое пристанище жизни иноческия, преподобне Макарие, вшел еси, / в нейже добре подвизався, душу твою добродетельми превысокими обогатил еси, / и явился еси добр пастырь и учитель иноческому собору, / емуже и обитель возградил еси, / таже в безмолвие вшед и Боговидения сподобився, ко Господу преставился еси, / Иже даром чудес тя обогати. / Егоже ныне моли, / да спасет верою и любовию почитающих святую память твою.
Кондак преподобного Макария Жабынского, Белевского чудотворца
Житие чистое, терпение, кротость и любовь нелицемерну,/ воздержание совершенное,/ умиление Божественное,/ веру же и надежду истинну и милосердие стяжав,/ равноангельно, Макарие, на земли пожил еси/ и на Небеси Богови с лики Безплотных предстоиши./ С ними же, святе, молися/ мир Российстей Церкви даровати/ и душам нашим велию милость.
Кондак мучеников Виктора, Стефаниды и Викентия
Иже славе, Господи и всех Содетелю,/ Ты в мире явил еси украшенных добродетельми страстотерпцы и мученики,/ да омут непобедимую победу.
Тропарь святителю Николаю Чудотворцу
Приспе день светлаго торжества,/ град Барский радуется,/ и с ним вселенная вся ликовствует/ песньми и пеньми духовными:/ днесь бо священное торжество/ в пренесение честных и многоцелебных мощей/ святителя и чудотворца Николая,/ якоже солнце незаходимое, возсия светозарными лучами,/ разгоняя тьму искушений же и бед/ от вопиющих верно:// спасай нас, яко предстатель наш, великий Николае.
Ин тропарь святителю Николаю Чудотворцу
Отечество свое, Миры Ликийския, не оставль духом,/ во премирный град Барский преславно телом пренесеся, архиерею Николае./ И оттуду множество человеческое своим пришествием возвеселил еси/ и болящия исцелил еси./ Темже тя молим, святителю Николае,/ моли Христа Бога,/ да спасет души наша.
Тропарь святителю Николаю Чудотворцу
Правило веры и образ кротости,/ воздержания учителя/ яви тя стаду твоему/ Яже вещей Истина./ Сего ради стяжал еси смирением высокая,/ нищетою богатая,/ отче священноначальниче Николае,/ моли Христа Бога,// спастися душам нашим.
Кондак святителю Николаю Чудотворцу
Взыде, яко звезда, от востока до запада/ твоя мощи, святителю Николае,/ море же освятися шествием твоим,/ и град Барский приемлет тобою благодать:/ нас бо деля явился еси чудотворец изящный,// предивный и милостивый.
Кондак святителю Николаю Чудотворцу
В Мирех, святе, священнодействитель показался еси,/ Христово бо, преподобне, Евангелие исполнив,/ положил еси душу твою о людех твоих/ и спасл еси неповинныя от смерти./ Сего ради освятился еси,// яко великий таинник Божия благодати.
Тропарь блаженной Матроны Московской
Земли Тульския прозябение, / града Москвы ангелоподобная воительнице / блаженная старице Матроно. / От рождения в слепоте телесней до конца своих дней пребывшая. / Но от Бога щедро духовное зрение приявшая, / прозорливице и молитвеннице. / Наипаче дар исцеления болезней стяжавшая. / Помогай всем с верою к тебе притекающим и просящим в болезнех душевных и телесных, / радосте наша.
Тропарь блаженной Матроны
Богом умудренную блаженную старицу Матрону,/ земли Тульския процветение/ и града Москвы преславное украшение,/ восхвалим днесь, вернии./ Сия бо, света дневнаго не познавши,/ светом Христовым просветися/ и даром прозрения и исцеления обогатися./ Пресельница же и странница на земли бывши,/ ныне в чертозех Небесных Престолу Божию предстоит// и молится о душах наших.
Кондак блаженной Матроны
К служению Христову/ от чрева матерня предызбранная,/ праведная Матроно,/ стезею скорбей и печалей шествующи,/ твердую веру и благочестие явивши,/ Богу угодила еси./ Темже, почитающе память твою, молим тя:/ помози и нам в любви Божии пребывати,// старице блаженная.
Тропарь благоверных князей Бориса и Глеба
Днесь церковная разширяются недра,/ приемлющи богатство Божия благодати,/ веселятся русстии собори,/ видяще преславная чудеса,/ яже творите приходящим к вам верою,/ святии чудотворцы Борисе и Глебе,// молите Христа Бога, да спасет души наша.
Тропарь благоверных князей Бориса и Глеба
Правдивая страстотерпца/ и истинная Евангелия Христова послушателя,/ целомудренный Романе с незлобивым Давидом,/ не сопротив стаста врагу сущу брату,/ убивающему телеса ваша,/ душам же коснутися не могущу./ Да плачется убо злый властолюбец,/ вы же, радующеся с лики Ангельскими,/ предстояще Святей Троице,/ молитеся о державе сродников ваших богоугодней быти// и сыновом Российским спастися.
Кондак благоверных князей Бориса и Глеба
Явися днесь в стране Русстей/ благодать исцеления/ всем, к вам, блаженнии,/ приходящим и вопиющим:// радуйтеся, заступницы теплии.
Ин тропарь благоверных князей страстотерпцев Бориса и Глеба
Пречестнии, и целомудреннии, и незлобивии страстотерпцы,/ Романе славный и Давиде чудный,/ иго бо Господне евангельски на рамо вземше,/ последовасте Христу/ и, крест Его, яко скипетр, в руку имуще,/ врага брата и злаго властолюбца соодолесте,/ и той ныне в геенне мучится,/ вы же радуетеся, с лики ангельскими предстояще Святей Троице,/ молитеся о державе сродник ваших, благоугодней быти,/ и сыновом русским спастися.
Ин тропарь благоверных князей страстотерпцев Бориса и Глеба
Мученицы Господни спасшиися,/ преславнии блаженнии князи Борисе и Глебе,/ труждающимся быстрии помощницы,/ недужным целители,/ вы бо болезни врачуете/ притекающих в церковь с верою./ Темже и мы молимся:/ от бед избавите нас,/ чтущих с любовию пренесение мощей ваших.
Ин тропарь благоверных князей страстотерпцев Бориса и Глеба
Днесь всякая душа верных веселится,/ в пренесение честных мощей ваших, Борисе и Глебе,/ слепыя просвещаете, немым уста отверзаете и печальных утешаете,/ прияли бо есте от Христа Бога благодать исцелений,/ молитеся о душах наших.
Ин кондак благоверных князей страстотерпцев Бориса и Глеба
Приидите, вси русстии собори,/ чудотворцев и мучеников Бориса и Глеба восхвалим,/ законно бо пострадавше,/ победисте сопротивнаго врага,/ тем святым заступлением князи русстии враги побеждают,/ тем память ею весело и любовию похвалим, вопиюще:/ за ны молите Святую Троицу,/ умирити мир и спасти души наша.
Ин кондак благоверных князей страстотерпцев Бориса и Глеба
От гроба знамения показасте во стране Русстей,/ явися днесь благодать исцеления/ всем, к вам, страстотерпцы, притекающим с верою,/ Борисе славный со Глебом чудным./ Крепцы верою, добропобеднии мученицы, за Христа подъемше различныя муки,/ и на многа лета сокровени быша ваши святии мощи,/ ныне же являетеся от земли,/ возсиявше лучами, яко богатство многоценно,/ и в церковь Божию честно носими, архиерей Божиих дланьми./ Темже вопием вам:/ радуйтеся, князи, русстии заступницы.
Кондак благоверных князей Бориса и Глеба
Возсия днесь преславная память ваша,/ благороднии страстотерпцы Христовы, Романе и Давиде,/ созывающи нас к похвалению Христа Бога нашего./ Тем, притекающе к раце мощей ваших,/ исцеления дар приемлем молитвами вашими, святии:// вы бо божественнии врачеве есте.
Ин тропарь благоверных князей страстотерпцев Бориса и Глеба
Яко плодовита винограда, отрасли добродетелей суще,/ Небесный дождь Христов прилете,/ источающе отечеству своему струю Православия,/ Борисе пречудне с доблим Глебом,/ вкупе молитеся Господеви сохранити град и люди,/ и на враги пособствовати,/ и душам нашим даровати велию милость.
Ин тропарь благоверных князей страстотерпцев Бориса и Глеба
Мученическою кровию порфиру окропивше светло,/ украшени предстоите, страдальцы славнии, Царю Безсмертному,/ и, венцы славы от Него приимше,/ молитеся стране нашей подати на враги одоление/ и душам нашим велию милость.
Ин кондак благоверных князей страстотерпцев Бориса и Глеба
Аще и убиени бысте и во гробех положени,/ но на Вышнее Царство преидосте,/ оваго бо копии насунута,/ другаго же, яко агнца незлобива, ножем зарезаша,/ тем и кровь ваша бысть исцеление миру,/ верою призывающим вас, святии, на помощь.
Величание благоверным князьям Борису и Глебу
Величаем вас, страстотерпцы святии, и чтим честная страдания ваша, яже за Христа претерпели есте.
Тропарь благоверного князя Димитрия
Велика обрете в бедах тя поборника земля Русская,/ языки побеждающа./ Якоже на Дону Мамаеву низложил еси гордыню,/ на подвиг сей прияв благословение преподобнаго Сергия,/ тако, княже Димитрие,/ Христу Богу молися,// даровати нам велию милость.
Кондак благоверного князя Димитрия
Подвиги твоими, святе Димитрие,/ страну нашу Бог сохрани,/ давый тебе силу непобедимую./ И ныне, предстателю крепкий,/ соблюдай молитвами святыми/ град твой Москву невредим// от всех навет вражиих.