Акафисты - 17 октября 2025

Кондак 1

Избранный святителю, теплый о нас к Богу молитвенниче, угодниче Христов, преподобне отче Германе, яко имеяй дерзновение ко Господу, от всяких нас бед твоим предстательством избавляй, да зовем ти: Радуйся, святителю Германе, великий чудотворче.

Икос 1

Ангелом уподобляя непорочным житием Святыя твоя, Господи, отверзи ми ум и язык восхвалити богоугодную жизнь преподобныя деяния святителя твоего Германа, да зовем ему, вземшему от юности благий ярем твой на рамо свое: Радуйся, благочестиваго корене благочестивая отрасль; радуйся, от чрева матерня избранный служителю в преподобии и правде. Радуйся, от отроческих лет кротким и благим нравом себе украсивый; радуйся, от младого возраста в посте и молитве паче возраста преуспевый. Радуйся, с учением книжным паче страху Божию себе обучавый; радуйся, в юных летах крепким подвижником воздержания себе явивый. Радуйся, манием божественным издалеча к великому твоему избранию ведомый; радуйся, тем же вседетельным манием исперва, яко зеница ока блюдомый. Радуйся, святителю Германе, великий чудотворче.

Кондак 2

Видя тщету мирскаго жития многомятежность человеческих попечений, блаженне, жизнь твою исперва посвятил еси Богу, во еже непрестанно и устами и сердцем воспевати ему: Аллилуиа.

Икос 2

Разумом посвящаемым свыше, и желанием влекомый к горней жизни, ты вкупе с богомудрым родителем твоим, паче всего тщася о угождении Богу, отвергшие красная мира, тесный иноческий путь избрал еси. Восхваляя твое благое изволение, взываем тебе: Радуйся, вне мирскаго мятежа от младости работати Богу предложивый; радуйся, юность твою, яко жертву непорочну, отвержением от мира Богу принесый. Радуйся, в жизни по Бозе под духовным игуменством будущаго святителя Гурия преспевавый; радуйся, емуже вкупе в великом пастырском служении в споспешника и преемника благодатию уготовлявыйся. Радуйся, в тойжде (Волоколамской) обители и сам в меру духовнаго вожденачальства достигнувый; Радуйся, первым тщавыйся быти в послушании, аще и последним во иноцех себе именовавый. Радуйся, яко елико смирял еси себе, толико паче благодатию к возвышению был еси уготовляем; Радуйся, и смиренным возвращением от начальства на прежнее послушание новыя духовныя силы для последующаго служения твоего стяжавый. Радуйся, святителю Германе, великий чудотворче.

Кондак 3

Силою вышняго, уготовлявшею тя во спасение твое и многих, ты избранниче Божий, ведом был еси от силы в силу богоугодной жизни и дел. Темже и воззван был еси благодатию на служение церкви в новопросвещеннем царстве казанском, во еже научити и неведущих Спасителя мира звати ему: Аллилуиа.

Икос 3

Имея благое помышление Царь новоприобретенное силою крестною царство Казанское паче всего устроити во единстве благочестия, да единым духом веры приобщится оно к великой державе царства Российскаго, аки часть к своему телу, при первосвятителе Гурии избра тя собором церкви в служебника ему. О сем ублажая тя, присноблаженне, глаголем: радуйся, соборным гласом на дело апостольское достойно избранный; радуйся, усердный делателю Христов в новопросвещенной стране магометанскаго заблуждения. Радуйся, яко благоплодный сад, святую обитель во граде Свияжске насадивый; радуйся, храм во славу успения Богоматери, аки неувядаемый трудов твоих памятник в ней соорудивый. Радуйся, тую первее присноцветущею лепотою подвигов твоих украсивый; радуйся, в богоспасаемом братстве новонасажденной обители твоей паче всего плоды послушания и страха Божия возвращавый. Радуйся, собирая словесных овец в словесный двор, всех и для спасительнаго жительства, и для наставления приходивших к тебе, любезно принимавый; радуйся, славою добродетелей твоих многих из мрака магометанскаго нечестия во свет истиннаго благочестия обращавый. Радуйся, святителю Германе, великий чудотворче.

Кондак 4

Бурю мирскаго жития, многообразными превратностями злоключений выну воздвизаемую, благоотишно, яко мудрый кормчий, прешед святитель Гурий, в пристанище безмолвнаго покоя достиже; на поприще бо новопросвещенной паствы, среди непрерывных трудов подвизаяся, первосвятитель Казанский успе мирным сном безсмертия. Ты же, блаженне, яко первый сослужитель и ревностный сотрудник скончавшагося, явился и достойный преемник ему, да на престоле святительства пастыреначальственно вещаеши Богу: Аллилуиа.

Икос 4

Слышав богоправимый собор великия Российския церкви о блаженней кончине перваго святителя великия паствы Казанския, единогласно суди, яко токмо ты избранный Божий достоин возвести на седалищи блаженнаго Гурия. Темже воззваный в царствующий град, аще и отрицался еси по обычному тебе смирению от сана святительскаго, обаче повинуяся соборному определению, восприял еси святительский жезл паствы Казанския. Темже и мы в веселии приветствуем тя: Радуйся, благий рабе Господа, верностию в меньшем соделавшийся достойным большаго служения; радуйся, светильниче, на свещнице во спасение многим поставленный. Радуйся, наставниче, и словом, а паче примером жизни твоей наставлявший верных и неверных на путь Христов; радуйся, пастырю добрый, неусыпным попечением полагавший душу твою о спасении душ пасомых. Радуйся, мудрый приставниче дома Господня, всем по коегождо потребе нужная устроявший; радуйся, верный раздаятелю благ Господа твоего, помощь бедствующим, утешение скорбящим, неоскудно подававший. Радуйся, в благоговейном служении твоем, и сердце и преподобныя руце твои о пастве ко Господу воздевавший; радуйся, благоприятными молитвами твоими мир, милость и благодать Божию на новопросвещенныя люди низводивший. Радуйся, святителю Германе, великий чудотворче.

Кондак 5

Боготечной звезде уподобился еси, всехвальне святителю, восходя бо благодатию Божиею от силы в силу по священным степенем иерархии, воззван был еси от паствы Казанския на высоту престола митрополии Московския, да со всею церковию воспеваеши Богу: Аллилуиа.

Икос 5

Видевши Благоверный Царь богоугодное твое житие, святителю, соизволи на вышший свещник Всероссийския митрополии поставити тя, ты же, блаженне, по смиренномудрию твоему, являя себе недостойна быти таковаго сана, достойнейшего поставити умолял Державнаго. Обаче повинуяся званию, уготовлялся исполнити волю цареву: но положил еси в сердце первее изрещи царю слово правды, яже правда аки зло вменися, и запя тя на пути вручаемаго тебе первопрестолия. Сего ради сугубо ублажаем тя: Радуйся, и на высоте святительства смиренная о себе мудрствовавый; радуйся, на первопрестолии Российския церкве паче бремя, неже честь себе видевый. Радуйся, яко во еже большим послужити во спасение, готов был еси и вышшее служение прияти; радуйся, прежде восшествия на высоту престола, во смирении слово царю провещавый. Радуйся, правды ради гонение и изгнание от предлежащия чести приявый; радуйся, слово право пред царем, паче приятия временной славы предсудивый. Радуйся, верою и правдою служити благу церкви и царства, необиновенно на первосвятительском престоле помышлявый; радуйся, изгнанием правды ради, блаженство небесное себе уготовивый. Радуйся, святителю Германе, великий чудотворче.

Кондак 6

Проповедник истины был еси, святителю Германе, егда злобнии опричницы восташа на святителя Филиппа, ты един на суде неправеднем глаголал еси пред царем о неправде, возводимой на мужа неповиннаго, вещая в непоколебимой правде Богу: Аллилуиа.

Икос 6

Возсия , святителю, в новом свете правота духа твоего, егда неповинный святитель Филипп неправедно был судим и осужден, ты един из святителей воздвиг глас в защиту страдальца, благодерзновенно вещая пред царем, яко блаженный он от юности ни суда ложна, ни лицеприятия не веде. Ублажая праволюбие твое, вещаем тебе: Радуйся, при ангельской кротости твоей, крепкий ревнителю благочестия, егда зрел тое небрегомых от нечестия; радуйся, поборниче угнетаемый правоты. Радуйся, бестрепетный защитниче неповинности; радуйся, ревностию твоей по истине, древним святым ревнителям уподобивыйся. Радуйся, благодерзновением Грознаго удививый, но смиренномудрием того на кротость пременивый; радуйся, пример любви к правоте и последующим родам оставивый. Радуйся, при западе жизни твоей, пламенныя лучи светлаго духа твоего в споборении истине показавый; радуйся, праволюбивым защищением правоты, течение праведной жизни твоей увенчавый. Радуйся, святителю Германе, великий чудотворче.

Кондак 7

Хотя непорочную жизнь твою, яко добрый подвиг скончати, потщался еси и царю в смиренномудрия слово благо рещи, и пред царем в защиту мужа праведнаго правое слово провещати. Темже совершив течение твое, яко ревнитель благочестия и поборник истины, стяжал еси дерзновение во исходе твоем взывати Богу: Аллилуиа.

Икос 7

Новаго тя ревнителя по благочестия и поборника правоты позна грозный царь и весь совет его, егда вещал еси царю в пастырской кротости словеса правоты и страха Божия, и на суде святителя, глаголал еси пред царем во ограждение неповиннаго. Темже вне паствы твоея, в царствующем граде пребывая в терпении, тамо и блаженную жизнь твою, от посещения Божия града, смертоносным посещением скончал еси. Ублажая смиренное в духе, но высокое в делах течение жизни твоей, и смиренную кончину твою, таковая тебе приносим: Радуйся, ревнителю смиренномудрия, от юности путь смирения избравый; радуйся, и на священныя степени звания и избрание с смиренным уклонением принимавый. Радуйся, жизнь твою при Боговодимом шествии, якоже в смирении и скончавый; радуйся, при кончине твоей очистительную жертвою прегрешений от посещения Божия умерших бывый. Радуйся, якоже не искавый славы человеческой в жизни, тако смиренное погребение восприявый и в смерти; радуйся, яко воистину странник, выну искавший небеснаго града, в царствующем граде из дольней к горней жизни прешедый. Радуйся, яко, идеже во смирении сном смертным еси опочил, таможде Господь преславно тя чудодействием явил; радуйся, яко не даде Господь видете тебе, преподобному своему, истления. Радуйся, святителю Германе, великий чудотворче.

Кондак 8

Странное и преславное сотвори о тебе, преподобне, прославляющий преподобныя своя Господь. Слышавше бо присная твоя чада, новосажденной тобою обители иноцы, и благочестивии Богоспасаемыя паствы твоея людие, града Свияжска жители от святых мощей твоих в царствующем граде Москве изливающиеся исцеления, потщашася возвратити тя во град свой, в место первых подвигов твоих на поприще просвещения верою новоприобретенныя страны, во еже благоприятнее при нетленных мощех твоих пети Богу: Аллилуиа.

Икос 8

Вседушно, от всея любви, и всенародно, всякаго чина и звания, монаси и мирстии, града Свияжска жителие вожделеша имети мощи твоя, святителю, в сзданней тобою обители, в месте славы благодати, действовавшей тобою в духовном созидании иночества, и назидании всех приходящих к тебе для душевной пользы. Темже испросивше соизволение благочестивейшаго царя, с неизглаголанною радостию пренесоша святыя мощи твоя, в созидании тобою обитель. И мы, в радости их, весело приветствуем тя: Радуйся, яко по смиренней кончине, прославленным тобою Господом прославлен еси; радуйся, яко для принятия святых мощей твоих, в благоговейно соетавший тя град сподвигшеся и сам архипастырь, святитель Гермоген. Радуйся, яко тойже великий святитель, со всем освященным собором, подобающее твоей святыне надгробное пение соверши; радуйся, яко, при внесении мощей твоих в созданный тобою храм Богородицы, дивное благоухание преисполни храм и обитель. Радуйся, яко к общей благоговейней радости, святыя мощи твоя целы и нетленны обретошася; радуйся, яко многоразличными исцелениями знаменовася слава святых мощей твоих. Радуйся, яко теми же чудодействиями засвидетельствовася, яко обрел еси благодать у Господа; радуйся, яко и Симбирстии граждане вожделеша имети часть мощей твоих, во освящение благодатную помощь. Радуйся, святителю Германе, великий чудотворче.

Кондак 9

Всякия болезни, живущею в тебе благодатию святаго Духа, ты святителю врачуеши с верою притекающих к цельбоносным мощем твоим. Сего ради приемлюще тобою благодать исцелений, благодарне приявшему на себе недуги наша Спасителю поем: Аллилуиа.

Икос 9

Витийство человеческое не может изрещи благодати нетления мощей твоих, ни поведати силы чудодействия оных. Мы же таинство верою приемлюще, благочестно вещаем: Радуйся, чистотою духа от всякаго брения отрешивыйся; радуйся, постом и воздержанием, яко благовонною смирною, тело твое тления непричастно сотворивый. Радуйся, непрестанною молитвою, яко небесным светолитием, тоежде благодатной силы исполнивый; радуйся, всельшимся в тя животворящим Духом по смерти чудодействующий. Радуйся, сиявшим в тебе светом Христовым, телесныя и душевныя очи просвещающий; радуйся, богодарованною тебе силою, нечистыя духи от одержимых ими отгоняющий. Радуйся, в прибегающих к тебе страсти душевныя и телесныя врачующий; радуйся, яко бодренно соделовавший спасение твое, и всех усердно притекающих к тебе спасению споспешествующий. Радуйся, святителю Германе, великий чудотворче.

Кондак 10

Спасти хотя душу твою, отнележе начал еси работати Господеви, всякия скорби, лишения и уничижения добльственно терпя, по блаженной кончине твоей, соделался еси прибежищем всем скорбями житейскими обуреваемым, во еже со всеми взывати благодарно Избавителю всех: Аллилуиа.

Икос 10

Стена и ограждение святыя мощи твоя, присноблаженне, прибегая бо с верою под цельбоносную сень оных, никтоже молитвами твоими, из храма твоего без благодатнаго утешения отходит. В немже бо сам искушен был еси, в сем и искушаемым испрашиваеши помощи. Предстояще убо с любовию живоприемному гробу твоему, взываем: Радуйся, присный о нас к Богу ходатаю. Радуйся, бедствующих предстателю; радуйся, печальных утешителю. Радуйся, нуждающихся помощниче; радуйся, гонимых прибежище. Радуйся, обуреваемых злоключениями тихое пристанище; радуйся, во мраке недоумения сущих богосветлое вразумление. Радуйся, обидимых заступниче; Радуйся, изнемогающих духом богомудрое подкрепление. Радуйся, святителю Германе, великий чудотворче.

Кондак 11

Пение похвальное приносяще тебе святителю, вемы, яко ни святаго жития твоего, ни преподобных деяний, ни чудес, благодатию Божиею от мощей твоих обильно нам подаваемых, по достоянию не токмо восхвалити, но ниже, якоже подобает, известити возмогохом. Обаче ведуще тя превыше всех похвал суща, во светлостях святых, вселящеся простираем молебный глас о тебе, прославляющему святыя своя: Аллилуиа.

Икос 11

Светозарный светильник имуще святыя мощи твоя, путь правый нам освещающий, и греховный мрак разгоняющий, блажим тя во обителех горних вселящеся, и от неистощимаго источника благодати Божией благая и полезная по коегождо потребе нам испрашивающа; Радуйся, за земныя подвиги твои, пренебесными благами от подвигоположника обдарованный; радуйся, за нищету духовную царство небесное восприемый. Радуйся, за воздыхания и слезы непроходящим веселием утешающийся; радуйся, за кротость твою землю вечнаго обладания наследивый. Радуйся, за алчбу и жажду от неистощимаго потока сладости насыщающийся радуйся, за милосердие твое, милость от Бога получивый. Радуйся, за чистоту твою, лицезрением Божиим наслаждающийся; радуйся, за гонение правды ради, на месте злачне премирнаго покоя вселяющийся. Радуйся, святителю Германе, великий чудотворче.

Кондак 12

Благодать всельшуюся в тя святаго Духа, явив в жизни, в смерти и по смерти твоей, святителю, облагодати нашу мысль, недоумеем бо, како совершим скудную песнь нашу в похвалу тебе, разве запечатлеем тую совокуплением во едино, яко разделенных лучей, воспетых нами доблестей твоих, да хваляще тя выну, устами и сердцем поем Богу: Аллилуиа.

Икос 12

Поюще твое Христоподражательное житие, богомудрыя деяния, блаженную кончину, преславныя по кончине чудодействия, и явленнейшия доблести твои, яко светлыя лучи соединяя вкупе, от собственных твоих доброт приносим тебе хваление таковое: Радуйся, от юности твоей крепким постником, и неослабным подвижником себе явивый; радуйся, по священным степенем возводимый благодатию, паче же восхождением в сердце, по внутренней святости смиренномудренно возвышавыйся. Радуйся, добльственный блаженнаго Гурия в духовном созидании паствы Казанския сотрудниче; радуйся, тогожде достойный в пастыреначальстве преемниче. Радуйся, имевый звание светити и на высоте Всероссийской митрополии; радуйся, исповедниче истины пред царем, и защитниче страдальческой правоты святителя. Радуйся, на месте смиреннаго покоища чудодейственною благодатию проявленный; радуйся, преславно из царствующаго града нетленными мощами твоими во обитель твою пренесенный. Радуйся, основанной тобою обители священное ограждение и украшение; радуйся, яко в скорбех утешение, в болезнех исцеление, мощи твои нам даровашася. Радуйся, благоприятный о нас дольних и перстных, вкупе смиренных грешных, в горних к Богу предстателю, и немолчно молитвенниче. Радуйся, святителю Германе, великий чудотворче.

Кондак 13

О великий угодниче Божий, святителю Германе, приими сие усердное к тебе моление наше, и благоприятным твоим пред престолом святыя Троицы предстательством, моли о нас недостойних рабех твоих, еже избавитися нам от належащих бед, внезапныя смерти и вечнаго осуждения, да сподобимся вкупе с тобою, в лике святых, выну единому в Троице Богу, Спасителю нашему, воспевати: Аллилуиа.

(Этот кондак читается трижды, затем икос 1 и кондак 1)

Молитва Герману архиепископу, Казанскому и Свияжскому

О великий угодниче Христов, Германе, теплый о нас ко Господу молитвенниче, всем притекающим к тебе в скорбех предстателю, испроси нам помощь в немощах, утешение в скорбех, здравие в недугах душевных и телесных; умоли Господа даровати нам оставление во всех, елика согрешихом от юности нашей в житии сем, делом, словом, помышлением, и всеми нашими чувствы: и при кончине нашей испроси нам время покаяния, да предварив искренним исповеданием грехов и очищением совести исход душ наших, безбедно прейдем воздушныя мытарства, и избавимся осуждения и муки, милостию безначальнаго Отца, благодатию собезначальнаго Сына, и освящением присносущнаго Духа. Аминь.

Кондак 1

Возбранный святителю и чудотворче Гурие, приими от нас недостойных подобающую ти похвалу, яко первосвятителю, учителю и покровителю града Казани. И, яко имеяй дерзновение ко Господу, от всяких нас бед и скорбей избавляй, да с радостию зовем ти: Радуйся, Гурие, Казанский и Свияжский чудотворче.

Икос 1

Ангелов Творец и всея твари Содетель предъизбра, освяти и постави тя, святителю, просветителя, учителя и покровителя граду Казани. Нас же научи вопити тебе сице: Радуйся, предопределенный в предвечном совете Божием к просвещению неверных; Радуйся, предочищенный для сего служения сосуде благодати Божия. Радуйся, злато, искушенное в горниле долговременных страданий; Радуйся, с юности миром отверженный и мира отвергийся. Радуйся, в темницу невинно, яко Иосиф, заключенный; Радуйся, в той темнице небесней премудрости научивыйся. Радуйся, в темнице тойже свет, даровавший тебе свободу, узревый; Радуйся, из нея чудным образом изведенный. Радуйся, по получении свободы всего себе Богу поработивый; Радуйся, чистоты и девства хранителю. Радуйся, поста и молитвы ревностный блюстителю; Радуйся, добльственный Христа последователю. Радуйся, Гурие, Казанский и Свияжский чудотворче.

Кондак 2

Видя себе невинно оклеветана, осужденна и мрачной темнице пищею безсловесных питаема, глаголал еси, святителю, сам себе: аще не бы Господь Бог попустил сему быти со мною, не бы постигла мя напасть сия; темже пою Ему: Аллилуиа.

Икос 2

Разум Божественный имея, святителю, ты в тайну судеб Божиих о тебе углубился еси и в невинном заточении твоем благость их провидел еси. Темже приими от нас сицевая: Радуйся, в бедах и теснотах твоих благость Божию видевый; Радуйся, во всех злых своих Бога благословивый. Радуйся, за притеснителей своих Ему моливыйся; Радуйся, прощение им у Него испросивый. Радуйся, теплою молитвою к Богу себе успокоивый; Радуйся, ею довольство и утешение в тесноте твоей себе обретый. Радуйся, свободы чудным образом сподобивыйся; Радуйся, дивный в сем апостолу Петру наследниче. Радуйся, терпеливый учениче Христа Спасителя; Радуйся, вземший Его благое иго на себе. Радуйся, понесший Его легкое бремя; Радуйся, монахов украшение. Радуйся, Гурие, Казанский и Свияжский чудотворче.

Кондак 3

Сила Вышняго осени тя, святителю, егда с пострижением власов всего себе всецело Ему посвятил еси. Темже в чистоте, посте и молитве непрестанно воспевал еси Богу: Аллилуиа.

Икос 3

Имея истинное ведение о кознях мира, плоти и диавола, ты, святителю, крепко противу тех вооружился еси бдением, постом и молитвою. Темже вопием ти: Радуйся, неусыпный Христов воине; Радуйся, присно блюдый душу твою от скверн плоти и мира, и козней диавола. Радуйся, опасность от них благовременне предвидевый; Радуйся, постом плоть твою изнуривый. Радуйся, всецело духу твоему плоть поработивый; Радуйся, со страстьми и похотьми плоть распявый. Радуйся, молитвою дух твой окриливый; Радуйся, на крилех молитвы всегда в горняя паривый. Радуйся, и на землю благодать Божию молитвами твоими привлекавый; Радуйся, усердный о всех молитвенниче. Радуйся, земный ангеле и небесный человече; Радуйся, монахов мудрый и кроткий наставниче. Радуйся, Гурие, Казанский и Свияжский чудотворче.

Кондак 4

Бурю внутрь имел еси помышлений сумнительныx, егда во игумена поставлен был еси Иосифовой обители, во смирении помышляя о трудности сего служения и слабости сил твоих. Темже и служение игумена с себе сложил еси, и в покое духа Богу пел еси: Аллилуиа.

Икос 4

Слыша державный царь Иоанн о твоих святых подвигах в посте и молитве, повеле тя паки поставити во игумена Селижаровой обители. Ты же, приемый волю цареву за волю Божию, паки взял еси врученный тебе жезл правления и труды ко трудом прилагал еси. Темже приими от нас сицевая: Радуйся, светильниче, не таимый под спудом; Радуйся, свете, во тьме сияяй. Радуйся, волю Божию в воле царевой усмотревый; Радуйся, всецело себе оной предавый. Радуйся, исполнителю воли Божией усердный; Радуйся, чина церковнаго строгий блюстителю. Радуйся, благочиния монастырского верный хранителю; Радуйся, поборниче православныя веры. Радуйся, усердный хранителю отеческих преданий; Радуйся, сосуде благодати Божия. Радуйся, живый свитче закона Божия; Радуйся, апостоле Казанския области. Радуйся, Гурие, Казанский и Свияжский чудотворче.

Кондак 5

Боготечному солнцу уподоби тя, святителю, Господь Бог, в дивном твоем избрании на святительский престол, егда тебе жребием указа быти первосвятителем Казанския Церкве. Мы же поем Богу, удивившему на тебе благодать и милость Свою: Аллилуиа.

Икос 5

Видевше державный царь Иоанн и вси православнии людие чудное Божие избрание тя по жребию в первосвятителя Казанския Церкве, радовахуся. Мы же со благоговением воспеваем ти сице: Радуйся, любимиче Божий, указанный жребием; Радуйся, служителю Господень, предопределенный для возделания новыя нивы. Радуйся, пастырю словеснаго стада Христова, блуждавшаго по вертепам неверия и нечестия; Радуйся, потаенный светильниче, дивно поставленный на высоту Церкве Божия. Радуйся, проповедниче Евангелия Христова в стране нечестия магометанскаго; Радуйся, принесый свет Христов в страну тьмы и заблуждений. Радуйся, крепкая надеждо Церкве Православныя; Радуйся, исполнителю благих желаний царя державнаго. Радуйся, обрадовавый его твоим ревностным служением; Радуйся, радосте и утешение всех градов, иже сподобишася тя видети и от тебе благословитися. Радуйся, сосуде благодати, просвещающей верных; Радуйся, первосвятителю Казанския области. Радуйся, Гурие, Казанский и Свияжский чудотворче.

Кондак 6

Проповедником богоносным избран был еси для Казанския области, святителю; темже святолепно шествовал еси из царствующаго граде Москвы в новопросвещенный град Казань, освящая шествием и благословением твоим грады и веси на пути и непрестанно воспевая Богу: Аллилуиа.

Икос 6

Возсиявый в богоспасаемом граде Казани свет истины Христос Бог наш, и прогнавый тьму магометанскаго и языческаго нечестия, избра тя, святителю, в перваго зде служителя и исполнителя святой воли Его. Темже освяти тя и прослави, нас же научи вопити тебе сице: Радуйся, света истины распространителю; Радуйся, диавольския тьмы прогнателю. Радуйся, первый сеятелю на новой ниве Божией; Радуйся, мудрый возрастителю на ней сторичных класов. Радуйся, неутомимый ея напоителю; Радуйся, друже царя земнаго, исполняющаго волю Царя Небеснаго. Радуйся, верный служителю Царя Небеснаго; Радуйся, апостоле Казанския Церкве. Радуйся, привлекаяй к вере неверующих чистою Христовою любовию; Радуйся, друже Христов, приводяй люди к благоговению пред Богом. Радуйся, притесняемых вдов и сирот защитниче; Радуйся, всех притекающих к тебе заступниче. Радуйся, Гурие, Казанский и Свияжский чудотворче.

Кондак 7

Хотяй устроити тайну спасения Казанских татар и язычников, Христос Бог наш избра тя, святителю, в апостола и просветителя страны сея. Ты же, уразумев тайну спасения, вопиял еси Богу: Аллилуиа.

Икос 7

Новое чудо показа Господь и Спас наш, Иисус Христос, избравый тя в первосвятителя Казанския Церкве, егда тя единаго из четырех жребием указа всей Своей Православной Церкви. Мы же, дивящеся, вопием ти сице: Радуйся, от вечности предопределенный просветителю Казанския области; Радуйся, сокровенный до времене сосуде благодати Божия. Радуйся, избранием твоим всю Церковь удививый и обрадовавый; Радуйся, темже избранием в преданности Богу укрепивыйся. Радуйся, дивное твое избрание служением твоим оправдавый; Радуйся, с благословения Божия грядый в Казань во имя Господне. Радуйся, в пути твоем непрестанно воспеваяй и благословляяй; Радуйся, весь путь твой молитвами освятивый. Радуйся, безбедно на паству твою пришедый; Радуйся, благодатный обновителю и освятителю града Казани. Радуйся, благолепнаго храма Пресвятыя Богородицы создателю; Радуйся, обрадовавый православных Казанских жителей твоим пришествием. Радуйся, Гурие, Казанский и Свияжский чудотворче.

Кондак 8

Странное избрание твое, святителю, помышляя и боголепное шествие твое на новую паству твою зная, с благоговением возводим умы и сердца свои к Богу, тако устроившему дивное твое прославление, поя Ему: Аллилуиа.

Икос 8

Весь ум твой, святителю, вперил еси к Богу и всего себя предал еси святой воле Его, егда вступил еси на престол Казанския паствы твоея, юже и не престая поучал еси словом и делом. Темже приими от нас похвалы сия: Радуйся, добрый пастырю, всегда готовый положити душу свою за овцы пажити твоея; Рaдyйcя, мудрый хранителю стада твоего от волков, хотящих губити е. Радуйся, неутомимый делателю в вертограде Христовом; Радуйся, наставниче пастырей и учителей твоея паствы. Радуйся, разумный вождю в житии по заповедем Божиим и преданием апостольским; Радуйся, отче, просветителю и попечителю всех новокрещенных. Радуйся, кроткий и добросердечный убедителю в истине и Божественности христианския веры неверующих; Радуйся, богомудрый вразумителю людей мыслящих. Рaдyйcя, мудрый руководителю твоих сотрудников; Радуйся, благопопечительный отче всех сиротствующих. Радуйся, притесняемых заступниче; Радуйся, ходатаю за неверных, познавших истину. Радуйся, Гурие, Казанский и Свияжский чудотворче.

Кондак 9

Всякое естество ангельское удивися многотрудным твоим пастырским подвигам, показуемым во бдении, посте, молитве, и в неусыпном попечении о стаде твоем. Ты бо, святителю, денно и нощно беседуя с Богом молитвою, словом и делом непрестанно воспевал Ему: Аллилуиа.

Икос 9

Витии многовещанныя, яко рыбы безгласныя видим о тебе, святителю, недоумевают бо глаголати, еже како и отшельником деннонощною молитвою пример подаваеши, и паству твою примерно управляеши. Мы же, дивящеся, благоговейно вопием ти: Радуйся, пастырю, подаваяй пример монашествующим; Радуйся, собеседниче с Богом, научаяй всех последованию твоему примеру. Радуйся, тлетворнаго сна прогонителю; Радуйся, посту и бдению учителю. Радуйся, ленивых возбудителю; Радуйся, примерный Божий подвижниче. Радуйся, мудро привлекавый неверных к принятию православныя веры; Радуйся, неутомимый проповедниче слова Божия. Радуйся, слово сие здраво, немятежно и учительно преподававый; Радуйся, благоразумный вразумителю магометан в истине христианския веры. Радуйся, дивный указателю всем неверующим на величие и славу Иисуса Христа; Радуйся, мудро привлекаяй к Нему всех и вся. Радуйся, Гурие, Казанский и Свияжский чудотворче.

Кондак 10

Спасти хотя магометан и язычников, в новой пастве твоей находящихся, ты, яко добрый пастырь, всю мудрость твою к сему употребил еси и непрестанно Бога в помощь призывал еси, воспевая Ему: Аллилуиа.

Икос 10

Стена еси верующим и к тебе прибегающим, ибо небесе и земли Творец устрои тя, святителю, веры укрепителя, неверия же обличителя, нас же научи взывати тебе сице: Радуйся, столпе православно верующих; Радуйся, отверзающий им дверь спасения. Радуйся, наставниче мудрости о Христе Спасителе; Радуйся, преподателю Божественныя благодати. Радуйся, обновителю растленнаго человечества в неверующих; Радуйся, наставителю мало смыслящих и не смыслящих. Радуйся, бесовския козни проразумеваяй; Радуйся, силу Христову проповедуяй. Радуйся, девство и чистоту храняй и проповедуяй; Радуйся, друже Жениха, радующийся о сочетании с Ним чистых и незлобивых душ. Радуйся, архитриклине брака, соединившаго безчисленное множество душ с небесным Женихом; Радуйся, ревнуяй Божиею ревностию о верности Христу душ христианских. Радуйся, Гурие, Казанский и Свияжский чудотворче.

Кондак 11

Пение всякое побеждается, спростретися тщащееся ко множеству многих твоих добродетелей, святителю. Никия бо песни могут быти равночисленны им. Темже, благоговея пред тобою, поем Богу: Аллилуиа.

Икос 11

Светоприемнаго светильника сущим во тьме неразумия видим в тебе, святителю, невещественный бо вжигающи огнь, разгоняеши тьму неверия и на всех обильно проливаеши свет Христов, просвещаяй всякаго человека, грядущаго в мир. Темже по долгу взываем ти сице: Радуйся, светильниче, возжженный огнем с престола Божия; Радуйся, причастниче славы Господней. Радуйся, прославляяй Прославльшаго тя; Радуйся, проносяй славу Его по безславной области нечестия. Радуйся, озаряяй умы и сердца людей, сидящих во тьме и сени смертной; Радуйся, источниче, обильно изливаяй воду благодати Божией. Радуйся, напаяяй ею умы и сердца жаждущих спасения; Радуйся, указателю небеснаго рая неведущим его. Радуйся, верный руководителю всех последующих тебе; Радуйся, отверзаяй двери Царствия Божия шествующим по тебе. Радуйся, представляяй их престолу Божию; Радуйся, сопричисляяй их к сонму святых Божиих. Радуйся, Гурие, Казанский и Свияжский чудотворче.

Кондак 12

Благодать, данную ти от Бога, обильно изливаеши на всех, притекающих с верою к раце святых мощей твоих, святителю. Темже мы, дивящеся множеству чудес, тобою совершаемых, поем Богу, прославляющему тя: Аллилуиа.

Икос 12

Поюще хвалебную песнь тебе, святителю, прославленный Богом на небеси и на земли, воспеваем ти сице: Радуйся, во свете предстояй престолу Вышняго; Радуйся, всегда воспеваяй славу Божию. Радуйся, непрестанно зряй Бога лицем к лицу; Радуйся, приникаяй в тайну Пресвятыя Троицы. Радуйся, усердный Ея поклонниче; Радуйся, последователю Агнцу Божию, вземшему грехи мира. Радуйся, предводителю всех спасенных и спасаемых тобою; Радуйся, и нас грешных в мире сем не оставляяй. Радуйся, не тесно в любви твоей всех вмещаяй; Радуйся, любвеобильный о всех нас молитвенниче. Радуйся, паствы твоея покровителю; Радуйся, граду Казани похвало и украшение. Радуйся, Гурие, Казанский и Свияжский чудотворче.

Кондак 13

О всеблаженный и святый святителю отче Гурие, присный наш наставниче, ходатаю и покровителю, моли о нас Христа Бога, да избавит паству твою и вся грады и веси христианския от враг видимых и невидимых, от нашествия иноплеменник, от недуга и глада, от всякия скорби и смертоносныя раны, и грядущия муки, вопиющих Ему: Аллилуиа.

(Этот кондак читается трижды, затем икос 1 и кондак 1)

Молитва святителю Гурию, Казанскому и Свияжскому чудотворцу

Святителю отче Гурие, предстоя священной раке многоцелебных мощей твоих, молим тя усердно быти всегда и везде нашим ходатаем, заступником и покровителем. Исходатайствуй пастве твоей мир, тишину, благоденствие, здравие и спасение. Буди постоянным нашим заступником от всех врагов, видимых и невидимых: покрывай нас от нахождения всех бед, напастей и скорбей, паче же от искушений врага темнаго. Предстоящим же зде и молящимся испроси у Господа Бога вся, яже ко спасению своему они просят у Него в своих нуждах и скорбях, да все мы с тобою прославляем всесвятое имя Отца и Сына и Святаго Духа, ныне и присно, и во веки веков. Аминь.

Кондак 1

Возбранному святителю и чудотворцу Варсонофию составим похвалу, яко усердному молитвеннику нашему и скорому помощнику. Ты же, святителю, яко имеяй дерзновение ко Господу, умоли Его избавляти нас от всяких бед и скорбей, да с радостию зовем ти: Радуйся, Варсонофие, Казанский чудотворче!

Икос 1

Ангелов Творец и всея твари Содетель яви тя Церкви Своей святей новаго святителя и чудотворца, имущаго к Нему дерзновение молить об избавлении нас от всяких бед и скорбей. Сего ради восхваляем тя сице:

Радуйся, благословенное чадо благочестиваго отца, сподобившагося благодати священства;

Радуйся, благодатный воспитанниче благоговейнаго учителя.

Радуйся, орошенный благода-тию, лиявшеюся от его наставлений;

Радуйся, отроче, приявший в сердце твое начало премудрости.

Радуйся, яко тою вся буяя юности от сердца твоего отгнал еси;

Радуйся, скоро и спешно навыкнувый наказанию закона Божия.

Радуйся, разумом и добродетельным житием Пресвятое Имя Божие прославивый;

Радуйся, радосте и утешение твоим родителем.

Радуйся, крине, возращенный на земли для райских селений;

Радуйся, молитвенниче наш усердный.

Радуйся, крепкий наш заступниче;

Радуйся, мудрый и кроткий наш наставниче.

Радуйся, Варсонофие, Казанский чудотворче!

Кондак 2

Видя суету мира и привременных благ его, ты, святителю Варсонофие, единаго Бога крепко от юности твоея возлюбил еси и слезами молитвенными радость небесную на земли сеял еси. Темже мы, радуяся, вопием с тобою Богу: Аллилуиа.

Икос 2

Разумно уразумев попущение премудраго Промысла, хотящаго предуготовати из тебе новаго проповедника веры Христовы для неверующих агарян, ты, святителю Христов, благодушно в юности твоей крест плена понесл еси и в стране пленения ведению языка агарянскаго научился еси. Сего ради приими от нас похвалы сия:

Радуйся, предуготованный сосуде мира Христова, излияннаго на неверовавших;

Радуйся, пастырю, воспитанный посреде волков.

Радуйся, светильниче Церкве, предуготованный под спудом;

Радуйся, столпе Церкве Православныя, укрепленный крестом.

Радуйся, смирением, кротостию и послушанием пленивших тя удививый;

Радуйся, теми любовь их к тебе приобретый.

Радуйся, слезный сеятелю радости небесныя;

Радуйся, всего себе воле Божией предавый.

Радуйся, райский крине, посреде терний на земли произрастший;

Радуйся, бисере многоценный, златом от плена искупленный.

Радуйся, отца и матерь ради Христа оставивый;

Радуйся, девства и чистоты хранителю.

Радуйся, Варсонофие, Казанский чудотворче!

Кондак 3

Силу Христа Спасителя, влекущую к Нему, уразумев, святителю, ты душею и телом сему влечению последовал еси, и яко Ангел, на крилех поста и молитвы к Нему воспарил еси, непрестанно воспевая Богу: Аллилуиа.

Икос 3

Имея во уме и сердце твоем единаго Бога, ты, святителю, вся красная мира сего презрел еси и уединение с нестяжанием крепко возлюбил еси, служа Богу постом и молитвою. Темже вопием ти:

Радуйся, Господа Бога верный служителю;

Радуйся, весь ум твой богомыслием освятивый.

Радуйся, усердный и верный воли Христовой исполнителю;

Радуйся, премудрый монахов наставниче.

Радуйся, добрый о них попечителю;

Радуйся, девства и чистоты хранителю.

Радуйся, любимиче братии твоея;

Радуйся, образе и подвижниче добродетелей.

Радуйся, зерцало евангельскаго совершенства;

Радуйся, живый свитче закона Божия.

Радуйся, верный подражателю Христов;

Радуйся, Варсонофие, Казанский чудотворче!

Кондак 4

Буря внутренних скорбных помышлений обыде тя, святителю, егда внезапу в чуждую землю пленен был еси, идеже и горькия слезы проливал еси. Егдаже всецело воле Божией предался еси, тогда непрестанно дивному в судьбах Своих Богу вопиял еси: Аллилуиа.

Икос 4

Слышав о святом житии твоем, Царь Иоанн радовася, яко Российския имяше таковыя потаенныя угодники Божия, и не таяй светильника под спудом, устрои тебе быти игумена Песношския обители. Мы же, радуясь, вопием ти:

Радуйся, светильниче, из под спуда на свещник поставленный;

Радуйся, молитвенниче неусыпный.

Радуйся, врачу ран сердечных прозорливый;

Радуйся, целителю греховных недугов.

Радуйся, великодушный строптивости препобедителю;

Радуйся, сострадательный и терпеливый братии твоея любителю.

Радуйся, невидимых врагов мудрый прогонителю;

Радуйся, благоговейный Божий служителю.

Радуйся, благочиния монастырского мудрый устроителю;

Радуйся, обрадованный посещением твоей обители от Царя державнаго.

Радуйся, обрадовавый его твоим благоговением и смирением;

Радуйся, ангеле во образе чсловечестем.

Радуйся, Варсонофие, Казанский чудотворче!

Кондак 5

Боготечней звезде подобен был еси, святителю, в восхождении твоем на твердь церковную, и последуй, яко солнцу, святителю Гурию, по воле Царя державнаго шествовал еси в богоспасаемый град Казань, поя Богу: Аллилуиа.

Икос 5

Видеша тя, святителю, православнии жители града Казани устрояющаго в ней первую обитель во имя благолепнаго Спасова Преображения, и в благоговейной радости о Господе, творящем дивная дела Своя, вопияху тебе сице:

Радуйся, нечестия ревностный искоренителю;

Радуйся, благочестия усердный ревнителю.

Радуйся, магомедовы тмы дивный прогонителю;

Радуйся, света Христова ревностный распространителю.

Радуйся, первыя обители в Казани устроителю;

Радуйся, дивный избранниче Божий.

Радуйся, благодать и милость Господню в братии твоей водворивый;

Радуйся, число иноков умноживый.

Радуйся, благочиния церковнаго блюстителю;

Радуйся, пения Божественнаго искусный учителю.

Радуйся, безчиния и нечестия мудрый обличителю;

Радуйся, Варсонофие, Казанский чудотворче!

Кондак 6

Проповедник богоносный явился еси, святителю, во граде Казани, обличая нечестивых поклонников лжепророка самем их языком, и не могущих ничтоже рещи противу тебе обращая к единому в Троице славимому Богу, поя Ему: Аллилуиа.

Икос 6

Возсия в Казани просвещение истины и отгна от нея тму нечестия Христос, истинный Бог наш, Емуже в сем усердно послужил еси, святителю. Темже взываем ти сице:

Радуйся, насадителю нивы Христовы в стране нечестия;

Радуйся, напоителю оной живыми водами Христова учения.

Радуйся, ничтоже себе восписуяй, но вся к единому Богу относяй;

Радуйся, вождю воинства Христова, посекающаго вся противныя силы нечестия.

Радуйся, ангеле, посланный от Бога ко истреблению плевел на ниве Его;

Радуйся, друже Божий, желающий всем спасения. Радуйся, благодатный врачу душ и телес;

Радуйся, кроткий указателю лживости магометанския веры держащимся ея.

Радуйся, мудрый удостоверителю в Божественности веры христианския;

Радуйся, неверных учителю веры в Пресвятую Троицу.

Радуйся, светило, сияющее на тверди Казанския области;

Радуйся, теплото, согревающая всех, притекающих к тебе, любовию.

Радуйся, Варсонофие, Казанский чудотворче!

Кондак 7

Хотяй устроити спасение Казанских татар, научи тя, святителю, врачебной хитрости, да будеши им врач душ и телес; ты же, имея любовь богоподобную, принимал еси вся недужныя, притекающия к тебе, указуя коемуждо на благопотребное врачевство, паче же на Все-целителя Господа Иисуса Христа, поя Ему: Аллилуиа.

Икос 7

Новое и дивное средство к обращению неверных показа Господь в твоем, святителю, врачевании телесных болезней, привлекая к тебе множество недужных всякаго рода, ихже купно с присными их ко Христу приводил еси. Темже, безмездный врачу, приими от нас таковая:

Радуйся, безмездным врачем мудрый подражателю;

Радуйся, яко познал еси благодатную силу их безмезднаго врачевания.

Радуйся, врачевавый недужныя привлечения ради к вере неверующих;

Радуйся, употреблявый врачевание телесное к славе Имене Божия и ко спасению ближних.

Радуйся, ревностный сотрудниче святителя Гурия;

Радуйся, искренний и верный его друже.

Радуйся, успокоителю его на одре смертном;

Радуйся, и по смерти с ним не разлучивыйся.

Радуйся, молитвенниче наш усердный;

Радуйся, хранителю обители твоея неусыпный.

Радуйся, граду Казани похвало и утверждение;

Радуйся, светило, сияющее на тверди Православныя Церкве.

Радуйся, Варсонофие, Казанский чудотворче!

Кондак 8

Странное бе предсказание о тебе, святителю, прозорливаго святителя Акакия, иже еще во время твоего иеродиаконства предрече, яко будеши в богоспасаемом граде Тфери управляти людьми Божиими. Мы же, благоговея пред Богом, дивно устроившем твое Ему служение, поем Ему: Аллилуиа.

Икос 8

Весь был еси Божий, святителю, егда поставлен был еси во епископа богоспасаемому граду Тфери, служа Богу телом и душею: тело изнуряя постом и непрестанным трудом, душу же питая молитвою и словом Божиим. Темже приими от нас сицевая:

Радуйся, светильниче Тферския Церкве;

Радуйся, добрый ея пастырю.

Радуйся, словесных овец мудрый питателю;

Радуйся, верный Христов подражателю.

Радуйся, Апостолов наследнице;

Радуйся, неутомимый делателю нивы Божия.

Радуйся, благовременный ея напоителю;

Радуйся, отеческих преданий хранителю.

Радуйся, веры Христовы православный учителю;

Радуйся, строгий поста блюстителю. Радуйся, образ верующим в тебе самом написавый;

Радуйся, неусыпный молитвенниче о стаде твоем.

Радуйся, Варсонофие, Казанский чудотворче!

Кондак 9

Вси Ангели небеснии восхвалиша Бога, даровавшаго тебе, святителю, чудный дар врачевания телесных и душевных болезней, имже всех привлекал еси, поя Богу: Аллилуиа.

Икос 9

Витии многовещаннии риторскими своими языки не возмогут изрещи пастырских твоих подвигов, святителю: како бо мощно вся поведати о строгости поста твоего или о неусыпном препровождении нощей в молитве; мы же благоговейно взываем ти сице:

Радуйся, пастырю, в строгом посте себе содержавый;

Радуйся, подвижниче благочестия, нощи в молитве без сна препроводивый.

Радуйся, собеседниче Божий;

Радуйся, сеятелю небесныя радости твоими молитвенными слезами.

Радуйся, плоть твою всецело духови поработивый;

Радуйся, со страстьми и похотьми ю распявый.

Радуйся, Тферскую паству твою от заразы молитвами сохранивый;

Радуйся, сердобольный о верных попечителю.

Радуйся, во всех скорбях их утешителю;

Радуйся, пастырю милосердный ко всем бедствующим.

Радуйся, участниче во всех скорбех и нуждах ближних твоих;

Радуйся, сострадателю всем страждущим.

Радуйся, Варсонофие, Казанский чудотворче!

Кондак 10

Спасти хотя душу твою, святителю, ты, возжелев покоя духовнаго, Тферскую паству твою старости оставил еси и переселился еси паки в устроенную тобою Казанскую обитель боголепнаго Спасова Преображения, поя в ней до конца земнаго жития твоего Богу: Аллилуиа.

Икос 10

Стена и крепкое ограждение был еси, святителю, Казанския твоея обители, отвращая от нея все беды и напасти святыми твоими молитвами, и примером своим утверждая в братии благочестие и святость. Темже по долгу вопием ти:

Радуйся, столпе благочестия;

Радуйся, трудолюбивый молитвенниче.

Радуйся, поста и молитвы учителю;

Радуйся, милостыни щедрый раздаятелю.

Радуйся, благочиния церковного ревнителю;

Радуйся, наставниче монахов предобрый.

Радуйся, неопустительный посетителю ежедневныя службы Божия;

Радуйся, земный ангеле и небесный человече.

Радуйся, от земли на небо возлетевый;

Радуйся, и по смерти твоей нас не оставляяй.

Радуйся, присный наш благодетелю;

Радуйся, всегдашний наш во Христе наставниче и попечителю.

Радуйся, Варсонофие, Казанский чудотворче!

Кондак 11

Пение всеумиленное приносим ти, святителю, и молим тя умолити Христа Бога, да дарует всем нам благодать и силу ко спасению, да выну с тобою поем Ему: Аллилуиа.

Икос 11

Светоприемный светильник истиннаго света сущим на земли являешися, святителю Варсонофие, просвещаеши бо сердца верных и разуму Божественному вся наставлявши, поучая и нас радостно взывати тебе:

Радуйся, святителю, предстояй Престолу Божию;

Радуйся, Пресвятыя Троицы присноблаженный служителю.

Радуйся, предстояй и последуяй Агнцу Божию;

Радуйся, Матере Божия собеседниче.

Радуйся, Херувимов и Серафимов сообщниче;

Радуйся, Архангелов и Ангелов сослужителю.

Радуйся, Предтечи Господня спредстоятелю;

Радуйся, Апостолов подражателю.

Радуйся, Мучеников соревнователю;

Радуйся, Святителей равностоятелю.

Радуйся, Препо-добных украшение;

Радуйся, всех святых сожителю.

Радуйся, Варсонофие, Казанский чудотворче!

Кондак 12

Благодать, данную ти от Бога, ведуще, притекаем к раце мощей твоих, святителю Варсонофие, усердно умоляюще тя о неоставлении нас святыми твоими молитвами, да и мы по окончании нашего земнаго жительства с тобою воспоем Богу: Аллилуиа.

Икос 12

Поюще блаженную кончину твою, еюже, яко орел, в горняя воспарил еси, молим тя, святителю Варсонофие, быти нам во всем ко благу помощником и всегда слышати ны, усердно взывающих ти:

Радуйся, Святителей похвало;

Радуйся, скорый помощниче с верою к тебе притекающим.

Радуйся, неусыпный хранителю иноков твоея обители;

Радуйся, защитниче граду Казани.

Радуйся, усердный молитвенниче о всех, к тебе притекающих;

Радуйся, врачу недугующих.

Радуйся, пастырю, соблюдаяй словесное стадо твое;

Радуйся, помощниче и защитниче обидимых.

Радуйся, дарователю радости плачущим;

Радуйся, обуреваемых наставниче.

Радуйся, скорбных утешение;

Радуйся, спасаемых ободрителю и подкрепителю.

Радуйся, Варсонофие, Казанский чудотворче!

Кондак 13

О всеблаженный и святый святителю отче Варсонофие, святыми твоими молитвами умоли Господа Бога, еже избавити всех нас, притекающих к тебе, от всякия скорби, от всяких бед и напастей, и от всякаго зла, душевнаго и телеснаго, да выну с тобою поем Ему: Аллилуиа.

(Этот кондак читается трижды, затем икос 1 и кондак 1)

Кондак 1

Изрядный воеводо ратоборцев за веру Христову, теплый утешителю всех напаствуемых и обремененных скорбьми многими, непоколебимый столпе православныя веры, еяже ради положил еси душу твою за други своя, и нас свободил еси от козней и сетей вражиих. И ныне от Господа прославлен еси явлением чудес твоих, имиже собрал еси нас умиленною душею пети тебе: Радуйся, святителю Ермогене, добрый пастырю и великий заступниче Российския земли.

Икос 1

Ангела хранителя Российския земли яви тя милосердый Христос в древния дни мятежа и нестроения, да спасет ю от блуждания греховнаго. И ныне яви тя молитвенника тепла и чудотворца, яко знамение жизни нашея; да и ныне грядут по тебе вси блуждающии, яко овцы неимущия пастыря, и обретше тобою спасение, да поют тебе сице: Радуйся, Церкве нашея премудрое возглавление; Радуйся, о чадех Церкве теплое промышление. Радуйся, страны нашея церковное утверждение; Радуйся, сынов царства православное озарение. Радуйся, пастырем и пасомым доброе поучение; Радуйся, царем нашим совете и утешение. Радуйся, святителю Ермогене, добрый пастырю и великий заступниче Российския земли.

Кондак 2

Видя Русь, яко вдовицу, зельне плачущу о разорении дома своего, умилосердився, на рамена своя подъял еси скорби ея и даже до смерти понесл еси я. Сего ради вечно радуешися на небесех, поя Богу: Аллилуиа.

Икос 2

Разумом любве, наказующия и милующия, управлял еси, святителю, Казанскою паствою твоею, яко кораблем, в пучине зол потопляемым, и привел еси его к тихой пристани святыя православныя Церкве, темже благодарственно поем ти: Радуйся, ума Христова вместилище; Радуйся, разума Церкве хранилище. Радуйся, главо, светом истины всех озаряющая; Радуйся, премудросте, немудрыя просвещающая. Радуйся, благовестниче православныя правды; Радуйся, обличителю человеческаго суемудрия и неправды. Радуйся, святителю Ермогене, добрый пастырю и великий заступниче Российския земли.

Кондак 3

Силою веры и разума духовнаго укрепляя во граде Казани новокрещенную паству твою, всеоружием Божия благодати победил еси козни врагов православныя веры Христовы и поучал еси чад твоих непрестанно взывати Богу: Аллилуиа.

Икос 3

Имея благодать священства, добре носиму в благоухающем сосуде души твоея, сподобился еси, отче Ермогене, взяти от земли святую икону Пречистыя Богоматере, во граде Казани чудесно явленную, и прославити ю по достоянию. Темже и подвизаеши нас взывати тебе сице: Радуйся, чудотворныя иконы Казанския первое прославление; Радуйся, чудес от сея иконы неложное извещение. Радуйся, славы Богоматере умиленный песнотворче; Радуйся, пред Нею о пастве твоей теплый молитвенниче. Радуйся, Матерь Божию, яко Заступницу православного царства Российскаго, почитаяй; Радуйся, о утверждении сего царства пред Пречистою слезы проливаяй. Радуйся, святителю Ермогене, добрый пастырю и великий заступниче Российския земли.

Кондак 4

Бурею помышлений сумнительных и стремлений мятежных волнуема и в пучину инославнаго суемудрия погружаема, Русь утопаше. Узрев же тя, святителю Божий, яко “столпа непоколебима и адаманта тверда”, возрадовася надеждею и, тобою укрепляема, поет Богу: Аллилуиа.

Икос 4

Слышав беззаконное умышление самозваннаго царя поругатися над верою православною, дерзновенно вещал еси ему, яко не подобает царю православному оженитися еретичкою, и тако обличил еси его неверие и нечестие. Сего ради и воздвиже на тя гонение и из престольнаго града тя, святителю, изверже. Мы же, почитающе сие твое правдолюбие, поем ти, сильному о Господе: Радуйся, крепкий поборниче противу самозваннаго повелителя; Радуйся, дерзновенный заступниче за православную веру. Радуйся, суемудраго инославия праведное обличение; Радуйся, спасительнаго православия немолчное назидание. Радуйся, правды ради изгнанный; Радуйся, от Господа вечною славою на небесех венчанный. Радуйся, святителю Ермогене, добрый пастырю и великий заступниче Российския земли.

Кондак 5

Боготечную зведу показа тя на небесех в сонме священномучеников Господь Вседержитель, зане и на земли был еси звезда светлая, осиявающая царя и царство светом православия и путеводствующая ко угождению единому Богу, во еже воспевати Ему непрестанно: Аллилуиа.

Икос 5

Видеша тя православнии людие, яко светило церковное, безоблачно сияющее в просвещение омраченных страстьми, призваша тя в царствующий град Москву, егда нечестивый самозваный повелитель низвержен бысть, да на свещнице первосвятительскаго служения освещавши путь жизни новому царю и всему Российскому царству. Сего ради и мы, до сего дне озаряемии светом твоим, неустанно взываем ти: Радуйся, почитаяй царя, яко Божие дарование; Радуйся, мняй быти ему благочестиву и поборателю по вере православней. Радуйся, новопоставленна царя Василия твердости учивый; Радуйся, в радости и в горе другом ему бывый. Радуйся, православнаго царя нашего пребывающее благословение; Радуйся, во всех делех небесное ему поможение Радуйся, святителю Ермогене, добрый пастырю и великий заступниче Российския земли.

Кондак 6

Проповедник быв спасительнаго покаяния, егда разгореся новый мятеж на Руси, призвал еси во град Москву древняго и немощнаго старца первосвятителя Иова и купно с ним молился еси в храме Успения Богоматере о чадех твоих, “да отвратит Господь от них праведный гнев Свой, да подаст им мир и любовь, да устроит в царстве древнее единение, да благословит царя победами над враги”, и тако да прославится в людех российских Имя Господне песнию: Аллилуиа.

Икос 6

Возсиявый во граде Москве светильник пресветлый был еси, святителю Ермогене, всем блуждающим во тьме греховней, в твоих “богомольных” посланиих путь спасения им показуя и дух уныния и малодушия от сердец их отгоняя. Сего ради и мы грешнии, в дни скорби и блуждания греховнаго, припадаем к тебе, святителю Божий, и слезно взываем: охраняй и ныне отечество наше от шатания умов и сердец, буди в жизни нам вождь добрый и благонадежный, да “не погибнет, по словеси твоему, Русь православная и Богом любимая” и да не престанет величати тя сице: Радуйся, от потопления бурями житейскими российския люди спасаяй; Радуйся, унывающих и мятущихся укрепляяй и от заблуждений отвращаяй. Радуйся, преступающих крестное целование со властию обличаяй; Радуйся, за дом Пречистыя Богородицы и за Московское царство даже до смерти стояти научаяй. Радуйся, зерцало совести нелицеприятныя; Радуйся, добрый кормчий корабля Христова. Радуйся, святителю Ермогене, добрый пастырю и великий заступниче Российския земли.

Кондак 7

Хотя быти пастырь добрый, емуже суть овцы своя, видев волка грядуща, не оставлял еси овцы и не бегал еси, но пред ними ходил еси во всеоружии силы и истины, поя Богу: Аллилуиа.

Икос 7

Новаго человека, по образу Создавшаго его, а не новаго царства инославнаго измышления, возжелел еси, святителю Ермогене. Сего ради ополчился еси на иноземное суемудрие и ратовал еси за царство древлеправославное, еже тщится во всех людех и во всем житии их вообразити Христа Бога. Поем и славим сие православное ратоборство твое и благодарственно вопием ти: Радуйся, волков хищных нещадное изгнание; Радуйся, коварства их мудрое распознание. Радуйся, всех стояти непоколебимо за православную веру Христову учивый; Радуйся, иновернаго царя возсести на престол Российский недопустивый. Радуйся, стада Христова церковное ограждение; Радуйся, царства православнаго верное спасение. Радуйся, святителю Ермогене, добрый пастырю и великий заступниче Российския земли.

Кондак 8

Странно есть маловерным и малодушным зрети, како святитель Ермоген, сей воистину “крепкий воин Христов”, дерзновенно обличает измену вере Христовой и, егда устремися нань нечестивый изменник, имый нож в руце, токмо знамением крестным ограждает себе от нападения вражия, и тако побеждает его злобу и безумие, нас же воздвизает к пению: Аллилуиа.

Икос 8

Весь бе исполнен ревностию Илии пророка, святителю Ермогене, егда узрел еси запустение царства и поругание святых храмов Божиих, огнем сея ревности воспламенил еси и сердца верных чад твоих, мужественно стати за веру православную и изгнати из престольнаго града нечестивых ляхов, во спасение Российския земли, поющия ти ныне любовию: Радуйся, святою ревностию о спасении царства Российскаго пламеневый; Радуйся, возжещи сию ревность и в чадех твоих восхотевый. Радуйся, вся угрозы и прещения врагов твоих; презревый; Радуйся, изыти им из града Москвы повелевый. Радуйся, российское воинство на освобождение царствующаго града от нечестивых врагов благословивый; Радуйся, святыни его от поругания тем оградити желавый. Радуйся, святителю Ермогене, добрый пастырю и великий заступниче Российския земли.

Кондак 9

Всякия труды подъял еси, святителю Божий, всякия лишения, обиды и болезни претерпел еси, спасения ради чад твоих; но и в терпении и в труде мнозем неустанно взывал еси Богу: Аллилуиа.

Икос 9

Витии мира сего безмолвствуют, в страсе и трепете видяще разорение царства Российскаго, громозвучный же глас святителя Ермогена, уже в заточении сущаго, не престает проповедати покаяние во отпущение грехов, ихже ради излился на Русь праведный гнев Божий, и молит пасомых “в чистоте души своя хранити и положити я за Пречистыя дом и за чудотворцев, и за веру”. И мы веруем, яко слезами покаяния, по глаголу святителя, согрешившая Русь омыся, очистися и обновися, и ныне поет во славу своего по Бозе наставника: Радуйся, грешныя к покаянию призываяй; Радуйся, властию от Бога грехи царства разрешаяй. Радуйся, за грехи чад твоих и в заточении Бога моливый; Радуйся, слезными теченьми землю темницы твоея оросивый. Радуйся, рыданьми покаяния лице царства обновивый; Радуйся, гнев Божий на милость к нам грешным преклонивый. Радуйся, святителю Ермогене, добрый пастырю и великий заступниче Российския земли.

Кондак 10

Спасти хотя Русь от безначалия греховнаго, не к нечестивому западу, но к богобоязненному дому боляр Романовых обратил еси очи твои, святителю Ермогене, да будет он властию от Бога, во утверждение Христова закона, и да поют царие и людие единеми усты и единем сердцем Спасителю Богу: Аллилуиа.

Икос 10

Стопа неодолимая Церкве был еси, отче наш Ермогене, еюже царство наше оградися, в православии утвердися и от врагов спасеся, и ныне со благодарением взывает ти: Радуйся, злыя козни нечестиваго запада отвергнувый; Радуйся, православие в земли нашей утвердивый. Радуйся, святых преданий отеческих хранителю; Радуйся, уставов Церкве Православныя ревнителю. Радуйся, в доме боляр Романовых благочестивую отрасль древняго царственнаго рода узревый; Радуйся, в нем Божиею милостию Царя всея Руси указавый. Радуйся, святителю Ермогене, добрый пастырю и великий заступниче Российския земли.

Кондак 11

Пение исходное и рыдание надгробное творит православная Русь у гроба священномученика Ермогена, положившаго душу свою за други своя. Не плачите, православнии, не плачите, но паче дерзайте верою, праведник бо и по смерти жив будет во веки, поя Богу: Аллилуиа.

Икос 11

Светильник Христов, на верху горы стояй и всей Руси светяй был еси в житии твоем, святителю Ермогене. И се полагаешися под спудом могильным плотию, да возсияеши духом, яко солнце в царствии Отца Небеснаго, нас же да просветиши сице воспевати болезни и труды твоя: Радуйся, с престола патриаршаго беззаконно низверженный; Радуйся, в темное подземелие, яко во гроб, вверженный. Радуйся, травною пищею от врагов питанный; Радуйся, глада мученьми даже до смерти изнуренный. Радуйся, священномучениче, за православие царства пострадавый; Радуйся, страстотерпче, в руце Господу дух свой предавый. Радуйся, святителю Ермогене, добрый пастырю и великий заступниче Российския земли.

Кондак 12

Благодати Божией сокровище явися всечестная рака мощей твоих, святителю отче Ермогене, и источник приснотекущия силы, еюже беси изгоняются, недужнии исцеляются, хромии ходят, глухии слышат, слепии презирают, озлобленнии умиряются, скорбящии утешаются и вси ликуют о Господе и прославляют Бога, дивнаго во святых Своих, поюще Ему: Аллилуиа.

Икос 12

Поюще твое прославление, святителю Ермогене, сия песни приносим ти, чудотворче святый, яко благоухание христианския радости: зрим бо Божию силу, во святых мощех твоих пребывающую. И ныне озаряеши нас светоизлиянием твоея благодати, обвеселяя сердца наша пети ти со умилением: Радуйся, ты бо Сладчайшаго присно созерцаеши; Радуйся, ты бо лицем к лицу Христа воспеваеши. Радуйся, ты бо Божественною силою преображаешися от славы в славу; Радуйся, ты бо, яко солнце новое, украшаеши Господню державу. Радуйся, твоим бо сиянием и мы незримо просветляемся; Радуйся, твоею бо силою и мы чудесно оживотворяемся. Радуйся, святителю Ермогене, добрый пастырю и великий заступниче Российския земли.

Кондак 13

О преславный угодниче Божий, святителю отче наш Ермогене. Приими наше твоей славе сорадование, яко воздыхание души, жаждет бо неотъемлемый радости, и умоли венчавшаго тя славою Господа низпослати и нам от бед, скорбей и болезней, обдержащих ны, скорое избавление, даровати же благодать утешения и радования, да с веселием выну поем Богу: Аллилуиа.

Этот кондак читается трижды, затем 1-й икос и 1-й кондак

Молитва священномученику Ермогену

О великий угодниче Христов, святителю отче наш Ермогене! К тебе, молитвеннику теплому и предстателю пред Богом непостыдному, усердно притекаем, в нуждах и скорбех наших утешения и помощи просяще. В древнюю годину искушений, внегда обышедше обыдоша страну нашу нечестивии врази. Господь яви тя Церкви Своей столпа непоколебима и людем российским пастыря добра, душу свою за овцы положивша и лютыя волки далече отгнавша. Ныне убо призри и на ны, недостойная чада твоя, умиленною душею и сокрушенным сердцем тебе призывающая. Крепость бо наша в нас оскуде, и вражия ловления и сети обыдоша нас. Помози нам, заступниче наш! Утверди нас в вере святей: научи нас всегда творити заповеди Божия и вся предания церковная, от отец нам заповеданная. Пастырем нашим буди архипастырь, воином вождь духовный, болящим врач, печальным утешитель, гонимым заступник, юным наставник, всем же благосердый отец и за вся теплый молитвенник; яко да молитвами твоими ограждяеми, непрестанно воспоем и прославим всесвятое Имя Живоначальныя Троицы, Отца и Сына и Святаго Духа, во веки веков. Аминь.

Кондак 1

Избранный страстотерпче Христов и чудотворче предивный, во страдании твоем венец приемый от руки Вседержителя и со ангелы предстояй Его престолу, песньми восхваляем тя любовию и молимтися, молитвами твоими от всяких бед и скорбей свобождай нас, тебе зовущих: Радуйся, мучениче и чудотворче Авраамие.

Икос 1

Ангелов сожитель и человеков заступник воистину явился еси, мучениче достохвальне, благоволением всех Творца Христа Бога, Его же возлюбил еси и за Него же пострадал еси даже до крове во исповедании непоколебимом. Темже приими от нас сия хваления: Радуйся, звездо пресветлая благочестия; радуйся, светило, во тме нечестия преславно возсиявшее. Радуйся, зловерия магометова обличителю; Радуйся, веры христианския небоязненный проповедниче. Радуйся, Евангельскаго учения добрый послушателю; Радуйся, закона Господня теплейший хранителю. Радуйся, куплю временную пременивый на стяжание вечное небесное; Радуйся, веры Христовы бисер многоценен стяжавый. Радуйся, Христовым учением душу твою просветивый; Радуйся, удостоившийся благодатнаго осенения свыше. Радуйся, явивыйся добродетелей жилище, преукрашенное чистотою; Радуйся, Духа Святаго обитель прекрасная. Радуйся, мучениче и чудотворче Авраамие.

Кондак 2

Видя Христос Господь душу твою, ко приятию семени слова Божия чистотою и милостынею предуготованную, светом познания Своего просвети тя, блаженне, яко Корнилия сотника древле, тако и твоя добродетели преждебывшия помянув любоблагоутробно, спасаемых части сотвори тя общника в Небеснем Царствии, идеже со ангелы поеши Пресвятей Троице песнь: Аллилуиа.

Икос 2

Разум богопросвещенный даровася тебе, Авраамие, имже ясно проразумел еси тщету душепагубную зловерия магометова, и онаго уклонитися, Христа же взыскати потщался еси вседушно; темже взываем ти: Радуйся, блаженный последователю Христов; Радуйся, любителю заповедей Его преискренний. Радуйся, крине благоуханный рая превышняго; Радуйся, цвете прекрасный вертограда Иисусова. Радуйся, богатство земное ни во чтоже вменивый; Радуйся, стяжания тленная презревый. Радуйся, нищия удовливый; Радуйся, руками убогих сокровища твоя горе предпославый. Радуйся, яко не уклонился еси в сеть лихоимания; Радуйся, яко неуловим пребыл еси мрежею сребролюбия. Радуйся, мудрый купец Царствия Небеснаго; Радуйся, верный рабе, данный тебе мнас усугубивый. Радуйся, мучениче и чудотворче Авраамие.

Кондак 3

Сила Вышняго укрепи тя на подвиг страдальческий, мучениче святый Авраамие; не терпя бо видети пагубу душ человеческих, ревностию разжеглся еси по Бозе живе, и став посреде торжища, небоязненно обличил еси магометову прелесть, поучая собратий твоих благочестно веровати во Христа, за Него же и страдати не уклонился еси, зовый: Аллилуиа.

Икос 3

Имея зловерием потемненныя души, не восхотеша болгаре приникнути в разум словес твоих божественных, но руце убийственныя на тя возложивше, биением лютым содробляху твоя составы. Мы же, ублажая страдания твоя, глаголем: Радуйся, Христа вседушно возлюбивый; Радуйся, любовь к Нему язвами, за Него подъятыми, явивый. Радуйся, апостолом поревновавый; Радуйся, орган Святаго Духа бывый. Радуйся, благовестия Евангельскаго уста благоглаголивая; Радуйся, словеса жизни вечныя провещаяй. Радуйся, биение лютое за пресладкаго ти Иисуса сладце претерпевый; Радуйся, поругание и досаждение за Него благодушно восприявый. Радуйся, яко во исповедании Христово непоколебим пребыл еси; Радуйся, яко ласканми и прельщенми непреклонен явился еси. Радуйся, страстотерпче, в мужестве неодоленный; Радуйся, добропобедниче, в терпении непреложный. Радуйся, мучениче и чудотворче Авраамие.

Кондак 4

Бурею злобы дышуще, нечестивии болгаре терзаху тя, яко агнца незлобива зверие дивии, покушаяся муками отвратити тя от Христа ко своему нечестию; но ничтоже успеша потемненнии, силою бо свыше укрепляемь, посрамил еси оных ухищрение, посреде мучений немолчно исповедуя Христа, единаго Творца и Бога, и вопия Ему: Аллилуиа.

Икос 4

Слышав увещательныя твоя глаголы, мучителие твои, аспидом глухим уподобльшеся, сугубыми ранами уязвляху тело твое многотерпеливое, Авраамие святе, яко не быти на нем места цела и неуязвлена. Дивяся убо величеству терпения твоего, зовем ти: Радуйся, учителю благочестия; Радуйся, посрамителю нечестия. Радуйся, ранами, яко утварьми многоценными украшенный; Радуйся, кровию твоею, яко багряницею, украшенный. Радуйся, всесожжение тучное себе Христу принесший; Радуйся, за прелюбезнаго ти Иисуса душу положивый. Радуйся, страданием сочетавыйся Христу, ради нашего спасения распятому; Радуйся, ликовствуяй в чертозе небеснаго Домовладыки. Радуйся, у престола Божия предстояй с горними силами; Радуйся, откровенным лицем созерцаяй славу трисияннаго Божества. Радуйся, от райских высот приникаяй благосердием твоим к нам земнородным; Радуйся, спасаяй от бед веру и любовь к тебе имущих. Радуйся, мучениче и чудотворче Авраамие.

Кондак 5

Богомудрым проповедником апостолом, за имя Христово раны радостно приемшим, подражал еси во страдании твоем, Авраамие, вопия сопротив мучащих тя: Христа чту, Его единаго люблю и умрети за Него преискренне желаю, да и с Ним живу во веки, зовый: Аллилуиа.

Икос 5

Видевше тя, злочестивии мучителие болгаре, непреклонна и непобедима исповедника Христова, первее руце и нозе твои отсекоша, таже и главу твою честную мечем отъяша, и тако доблестно течение твое скончав, прешел еси к обителем небесным, от нас же земных слышиши похвалы сия: Радуйся, исповедниче Христов непобедимый; Радуйся, адаманте терпения крепчайший. Радуйся, новый мучениче, древним великим мучеником равночестне; Радуйся, преславный венценосче, горе увенчанный. Радуйся, чудотворения благодатию от Господа обогащенный; Радуйся, целеб подателю всеблагий. Радуйся, во благоухании святыни почиваяй; Радуйся, ароматы райскими облагоухаяй души верных. Радуйся, источниче даров многоразличных; Радуйся, реко приснотекущая чудес. Радуйся, милосердия к страждущим сокровище неистощимое; Радуйся, болящих врачевство неоскудное. Радуйся, мучениче и чудотворче Авраамие.

Кондак 6

Проповестся в стране Российстей доблесть подвига твоего страдальческаго, мучениче всехвальный; темже слышав твою кончину славную и чудотворений твоих благодать, благоверный великий князь Георгий восхоте стяжати тя заступника стольному граду своему Владимиру, в онь же мощи твоя от болгар принести потщася, зовый венчающему мученики Христу Богу: Аллилуиа.

Икос 6

Возсиял еси преславно чудотворения лучами, по пренесении мощей твоих честных, Авраамие святе, во град Владимир, иже оными светло красуется, яко сокровищем многоценным; мы же, чтущии тя, раку твою многоцелебную любезне обстояще, зовем ти: Радуйся, града нашего похвало и утверждение; Радуйся, обители Богоматерния, в нейже почиваеши, присное заступление. Радуйся, подвизающимся в ней благодатное вспоможение; Радуйся, оных покрове и защищение. Радуйся, недугующих скоро предстательный целебниче; Радуйся, унывающих благонадежное возбуждение. Радуйся, скорбящих всежелательное утешение; Радуйся, нищих изобильное богатство. Радуйся, болящих младенцев исцеление; Радуйся, изнемогающих укрепление. Радуйся, ревнующих о благочестии помощниче; Радуйся, пребывающих в посте и молитве споспешниче. Радуйся, мучениче и чудотворче Авраамие.

Кондак 7

Хотя человеколюбец Господь явити щедрот Своих обилие стране Российстей, дарова нам тебе страстотерпца новаго и молитвенника богоприятнаго, чудес благодать источающа и недужных безмездно врачующа; темже благодарим тобою благодеющаго нам Господа и светло празднуем честных мощей твоих пронесение, к ним с любовию припадающе и Христу зовуще: Аллилуиа.

Икос 7

Новаго тя мученика и добляго страдальца, Христова исповедника и чудотворца славнаго, любовию ублажаем, и радующеся о твоем к нам пришествии, глаголем: Радуйся, деннице лучезарная, от болгар во Владимир град притекшая; радуйся, луч немерцающий солнца правды Христа. Радуйся, угодниче Господень, предивный в чудесех; Радуйся, праведниче, прославленный на небеси и на земли. Радуйся, нетлением мощей твоих в истине воскресения мертвых уверяяй; Радуйся, образ безсмертия в смертнем телеси показуяй. Радуйся, яко тебе дана бысть благодать за ны молитися и возбуждати нас ко благим делам; Радуйся, яко и по преставлении твоем благодеяние требующим подаваеши. Радуйся, от смертоносных язв и болезней притекающих к тебе сохраняяй; Радуйся, бедствующим и обидимым помогаяй. Радуйся, боголюбивых душ непостыдное упование; Радуйся, любящих тя присное утешение. Радуйся, мучениче и чудотворче Авраамие.

Кондак 8

Странно есть видети мертвенное тело, жизнь присносущную являющее, во гробе лежащее и недуги врачующее; но, мучениче Христов Авраамие, мощами твоими святыми в храме сем почиваяй, веруем несомненно, яко и духом твоим не отлучаешися от нас недостойных, честную раку твою с любовию обстоящих и Христу благодарне зовущих: Аллилуиа.

Икос 8

Весь в вышних еси, святче Божий, во светлости святых торжествуеши и наслаждаешися неизреченных благ небесных; вемы же, яко и нас земных и перстных не забываеши, но от горних высот милостивно к нам приникаеши, подвизая нас чествовати тя сими похвалами: Радуйся, благочестия утверждение; Радуйся, православия похвало. Радуйся, земли Российския благодатное осенение; Радуйся, града Владимира светлое радование. Радуйся, многострадальная розго винограда Христова; Радуйся, гражданине горняго града, Иерусалима небеснаго. Радуйся, в преславном мученическом лике пребываяй; Радуйся, рая жителю всеблаженный. Радуйся, Царствия Христова наследниче; Радуйся, вечныя блаженныя жизни сопричастниче. Радуйся, прибежище наше и защищение; Радуйся, скорое и безмездное недугов врачевание. Радуйся, мучениче и чудотворче Авраамие.

Кондак 9

Вси ангели небеснии восприяша тя радостно во обители райския, страдальче богомудре Авраамие, идеже святая твоя душа, огнем страдания искушенная, почесть победную восприя от Христа Бога нашего, праведнаго мздовоздаятеля подвизающихся за имя его святое на земли; прославляя бо их на небеси, горними вои у престола Своего предстояния сподобляет, идеже поется Ему немолчная песнь: Аллилуиа.

Икос 9

Витийством злочестивым и прельщением лукавым неуловлен пребыл еси, страстотерпче, изволивый паче умрети, неже Христа и веры в Него святыя отрещися, темже, яко добляго исповедника Христова, ублажаем тя и зовем: Радуйся, пречудное мужество явивый; Радуйся, яко просвещен был еси зарею Пресвятаго Духа. Радуйся, яко страх малодушный от себе отрясл еси; Радуйся, яко щитом веры оградился еси. Радуйся, неумолкающий благовестниче силы Божия, в немощи человечестей совершающияся; Радуйся, истинный поклонниче, духом и истиною кланяяйся Творцу. Радуйся, мужу желаний духовных, взыскавый Христа в стране нечестия магометова; Радуйся, отринувый богопротивную оную прелесть. Радуйся, куплю деявый временную, вкупе же и вечную, небесную; Радуйся, странники и нищия питавый от трудов твоих праведных. Радуйся, елеем милости умащенная главо; Радуйся, горо добродетелей, орошенная крове страдальческия излиянием. Радуйся, мучениче и чудотворче Авраамие.

Кондак 10

Спастися нам преискренне желая, молишися за нас горе у престола Божия, страдальче Христов Авраамие, и твоими молитвами пособствуеши нам в странствии многотрудном земнаго жития, еже в покаянии и благочестии скончати, да сподобимся с тобою воспевати Христу и Богу нашему: Аллилуиа.

Икос 10

Стену защищения стяжавше твоя святыя молитвы, Авраамие чудне, радуемся грешнии и чтем любовию память твоего усекновения и мощей твоих святых пренесения, зовуще: Радуйся, великоименитый наш заступниче; Радуйся, небожителю богопросвещенный. Радуйся, чудотворче дивный и милостивый; Радуйся, благий послушателю сущих в скорбех. Радуйся, предваряяй прошения призывающих тя в бедах; Радуйся, грешных ко исправлению приведение. Радуйся, миро врачебное недугом многоразличным; Радуйся, не токмо телесных, но и душевных болезней изрядный целителю. Радуйся, духов нечистых от человеков прогонителю; Радуйся, даров благодатных независтный подателю. Радуйся, благоуханием мощей твоих услаждаяй души наша; Радуйся, чудесы твоими утверждаяй нас во истине святыя православныя веры. Радуйся, мучениче и чудотворче Авраамие.

Кондак 11

Пение молебное и похвалу сию смиренную не презри, мучениче; се бо верою и любовию к тебе подвизаеми, раку мощей твоих соборне обстояще, ублажаем тя, заступника нашего, и молимся: молися за ны выну ко Господу, вемы бо к Нему твое невозбранное дерзновение и твоих молитв благодатное действо. Имуще таковаго предстателя, благодарно зовем дивному во святых Своих Богу нашему: Аллилуиа.

Икос 11

Светоносным Троическим сиянием горе осиянный, Авраамие святе, озари наша сердца, тьмою греховною покровенная; да елеем благих дел возжегши угасшия светильники наша, сподобимся брачнаго Христова чертога, идеже ты вселяешися со святыми и слышиши сия от нас благохваления: Радуйся, Богом данный покровителю наш; Радуйся, ангелоподобный человече. Радуйся, нищелюбче благословенный; Радуйся, странноприимниче, древнему оному праотцу Аврааму уподобляяйся. Радуйся, яко рука твоя изобильно помогаше нуждающимся; Радуйся, яко мудре расточал еси богатство тленное. Радуйся, оное пременивый на нетленныя небесныя блага; Радуйся, наслаждаяйся блаженства милостивых. Радуйся, предстояй Агнцу Божию в лике мученическом; Радуйся, ликовствуяй в селении праведных. Радуйся, во страдании твоем доблесть чудную явивый; Радуйся, язвы Господа Иисуса Христа на теле твоем носивый. Радуйся, мучениче и чудотворче Авраамие.

Кондак 12

Благодать и милость испроси нам у Христа и Бога нашего, святый и славный страстотерпче Авраамие; веруем бо несомненно, яко еже просиши, дарует ти всеблагий Владыка; темже и о нас грешных умоляти не престай Его благоутробие и испроси нам дар коемуждо благопотребен, да зовем всех благих виновнику и дароподателю Богу: Аллилуиа.

Икос 12

Поем твою страдальческую кончину, славим твоих честных мощей от болгар во Владимир пренесение, от нихже токи чудес источаеши непрестанно, подвизая звати тебе: Радуйся, архангелов и ангелов сослужителю; Радуйся, патриархов и пророков спредстоятелю. Радуйся, апостолов единоревнителю; Радуйся, мучеников красото. Радуйся, святителей и преподобных собеседниче; Радуйся, праведных и всех святых сожителю. Радуйся, яко свыше чудес деянии украсился еси; Радуйся, в честных и многоцелебных мощах своих выну с нами пребываяй. Радуйся, оными преславно чудодействуяй; Радуйся, отрадо наша и в скорбех утешение. Радуйся, недугующих исцеление; Радуйся, согрешающих исправление. Радуйся, мучениче и чудотворче Авраамие.

Кондак 13

О преславный страстотерпче Христов Авраамие, милостиво приемши сие малое моление наше, умоли Царя царствующих и Господа господствующих, Христа Бога нашего, избавити нас от всякия скорби и нужды в жизни сей и мучений вечных по скончании нашем, да сподобимся в Царствии Небеснем вкупе с тобою пети Ему: Аллилуиа.

(Этот кондак читается трижды, затем икос 1 и кондак 1)

Молитва святому мученику Авраамию Болгарскому

Святый мучениче Авраамие, доблий воине Христа Царя Небеснаго, в скорбех и напастех преславный наш помощниче и защитниче! Ничто же возможе отлучити тя от любве ко Господу Иисусу, ни лестныя обещания благ временных, ни прещения, ни муки от злых врагов святейшия Христовы веры; ты, яко лев, изшел еси на брань против волков мысленных, духов злобы, подвигших на тя, ради добраго твоего исповедания, единоплеменный тебе народ болгарский, и, яко огненная стрела, тех поразил еси силою благодати Святаго Духа, и крепкия, яко смерть, любве твоея к Богу. Аще и пролиял еси кровь твою за Христа Бога нашего, погубив временную жизнь, обаче безсмертною душею, яко орел, воспарил еси в горния обители Отца нашего, наследовав там вечную жизнь, славу и блаженство неизреченное, и оставив нам нетленныя останки твоя, яко крин многоценный и благоуханный. Веруем, страстотерпче святый, яко предстоя со ангелы и всеми святыми престолу славы Триипостаснаго Бога, усердныя и богоприятныя возносиши молитвы не токмо о нас, о святей обители сей и граде нашем, но и о всей святей Христовой Церкви и о православной Русской державе. Веруем, преславный чудотворче, яко ты, силою всемогущаго Господа Иисуса Христа, чрез святыя мощи твоя, источаеши обильныя дары благодатныя помощи во спасение всем с верою к тебе притекающим, наипаче же испрашивает и кончину с покаянием тебе чтущим, и благосердно помогаеши немощным младенцам, да вси от мала до велика единодушно прославляем неисповедимое величие благости Божией. Тем же верою и любовию ко святым мощам твоим припадающе и благоговейно оныя лобызающе, умоляем тя, добрый на небеси наш молитвенниче и заступниче, помогай нам грешным и смиренным твоими молитвами во всех скорбех, нуждах и обстояниих наших, сохраняй нас, святую обитель сию и град сей от всякаго зла и всякия напасти, наипаче же споспешествуй вечному спасению нашему и всех просящих от тебе помощи и заступления. Ей, смиренно молим тя, угодниче Божий, моли Христа Бога нашего, да даст Он мир и тишину всем православным христианом и да отвратит от нас всякий гнев, на ны движимый, да избавит нас от сетей вражиих, томления во узах греха и мучений адских, и да сподобит нас недостойных одесную Себе стати на суде Своем праведном и внити в вечный покой святых Его, идеже празднующих глас непрестанный и неизреченная сладость зрящих доброту лица Его; и тако возможем с тобою и всеми святыми безконечно прославляти Отца и Сына и Святаго Духа, Троицу Единосущную и Нераздельную. Аминь.