Тропари, кондаки и величания - 17 октября 2025
Тропарь преподобномученикам Казанским, в Свято-Успенском Зилантовом монастыре пострадавшим
Божией Премудрости, / Содетельной и Содержительной Силе последующе, / неизреченного лика небесного достигосте, / мученицы славнии: / идеже подвизалися есте / тамо ныне прославляетеся, / в вере и благочестии верных утверждающе, / ограждаете же и обитель Успенскую, / научающе искушениям противоборствовати. / Сего ради молим вы: // испросите душам нашим мир и велию милость.
Кондак преподобномученикам Казанским, в Свято-Успенском Зилантовом монастыре пострадавшим
Древле змиева гора / просвещаяся истины познанием, / днесь освещается крови вашея течением, / поруганные имамы обители воздвижение, / вашими, Ангелов собеседницы, ходатайствы // непрестанно возносимыя о всех с верою почитающих вас.
Тропарь святителя Германа, архиепископа Казанского
От юности иго Христово усердно восприим,/ бденными подвиги поста и молитвы прославился еси./ Отонудуже призывающу тя Богу на служение Церкви/ в новопросвещеннем царстве Казанстем,/ вкупе со святителем Гурием воззван был еси,/ идеже яко первоначальник/ созданной тобою в граде Свияжске обители/ и достойный первосвятителю преемник явился еси./ Духом предстоя Престолу Владычню,/ молися, святителю Германе, со святителем Гурием/ православной пастве во благочестии преспевати/ и тьме иноверия светом веры разгнатися.
Тропарь святителя Германа, архиепископа Казанского
От юности иго Христово усердно восприим,/ бденными подвиги поста и молитвы прославился еси./ Отонудуже призывающу тя Богу на служение Церкви/ в новопросвещеннем царстве Казанстем,/ вкупе со святителем Гурием воззван был еси,/ идеже яко первоначальник/ созданной тобою в граде Свияжске обители/ и достойный первосвятителю преемник явился еси./ Духом предстоя Престолу Владычню,/ молися, святителю Германе, со святителем Гурием/ православной пастве во благочестии преспевати/ и тьме иноверия светом веры разгнатися.
Кондак святителя Германа, архиепископа Казанского
Доблестями преподобия и правды/ врученное тебе словесное стадо озаряя/ и на злачных Слова Христова пажитях питая,/ на правый путь заповедей Господних/ силою духа твоего наставлял еси е./ Темже и ныне, осеняемое цельбоносными чудотворении твоими,/ в святую память твою, зовем тебе:/ не престай, святителю, предстательствовати/ пред Пастыреначальником о стаде твоем,/ яко паствы твоей утверждение/ и сущим по тебе святителем удобрение.
Ин тропарь святителя Германа, архиепископа Казанского
Яко великим пастырем единонравна и учителем вселенныя единомысленна,/ Церкве Божия служителя усердна, и строителя тайн Христовых благоговейна,/ стекшеся благовернни людие Свияжския обители Богомудраго основателя/ и Казанский новопросвещенныя паствы святителя Германа/ песньми и пении восхвалим, глаголюще:/ не престаи присещати молитвами твоими на всю паству твою, в вере и благочестии блюди невредимо.
Ин тропарь святителя Германа, архиепископа Казанского
Яко великим пастырем единонравна и учителем вселенныя единомысленна,/ Церкве Божия служителя усердна, и строителя тайн Христовых благоговейна,/ стекшеся благовернни людие Свияжския обители Богомудраго основателя/ и Казанский новопросвещенныя паствы святителя Германа/ песньми и пении восхвалим, глаголюще:/ не престаи присещати молитвами твоими на всю паству твою, в вере и благочестии блюди невредимо.
Ин кондак святителя Германа, архиепископа Казанского
Бодрствуя в молитвах,/ послушания добрый рачитель быв,/ в терпении стяжал еси душу твою,/ делы смиренномудрия и кротости изрядствуя,/ престол святотельства благоверием и благочестием украсил еси,/ отче священноначальниче Германе,/ моли Христа Бога о всем стаде твоем,/ яко паствы твоей утверждение/ и сущим по тебе святителем светлое украшение.
Величание святителя Германа, архиепископа Казанского
Величаем тя, святителю отче Германе, и чтим святую память твою, ты бо молиши за нас Христа Бога нашего.
Ин кондак святителя Варсонофия, епископа Тверского
Якоже звезда всесветлая, добродетельми сияющи, был еси,/ обогатив себе молитвою, и постом,/ и тело свое веригами удручая,/ в полоне же от иноплеменник много пострадал еси./ Непоколебим верою многая лета,/ Ангелом купно соединим,/ бесовская ополчения огорчавшие./ Последуя безмездником Косме и Дамиану,/ врачебною хитростию многий исцелил еси./ Темже ныне честное и боготрудное тело твое,/ от земленых недр обретенное,/ чудесы Господь прослави,/ исцелявши бо многонедужныя не токмо у гроба,/ но и от честных вериг/ подавши неоскудно целебныя дары приходящим с верою.
Величание святителя Варсонофия, епископа Тверского
Величаем тя, святителю отче Варсонофие, и чтим святую память твою, ты бо молиши за нас Христа Бога нашего.
Тропарь священномученика Иерофея
Благости научився и трезвяся во всех,/ благою совестию священнолепно оболкся,/ почерпл еси от сосуда избраннаго неизреченная/ и, веру соблюд, равное течение совершил еси,/ священномучениче Иерофее,/ моли Христа Бога// спастися душам нашим.
Кондак священномученика Иерофея
Священноначальника Афинскаго восхваляем тя,/ яко таиноучившеся тобою странным и неизреченным:/ явился бо еси Богоприятный песнословец./ Но моли, всеблаженне Иерофее,/ от всяких нам грехопадений избавитися, да зовем:/ радуйся, отче Богомудре.
Кондак священномученика Иерофея
Якоже столп непоколебим, Иерофее,/ прещения врагов не устрашися,/ но прелести разрушил еси твердыню,/ яко камень честен валяяся, отче./ Тем Владыка тя, храбрствовавша, венчает/ живоначальною и Божественною десницею,// Егоже о всех нас умоли.
Величание священномученика Иерофея
Величаем тя, священномучениче Иерофее, и чтим святую память твою, ты бо молиши за нас Христа Бога нашего
Тропарь на перенесение мощей святителя Гурия, архиепископа Казанского
Яко крин благовонный,/ мироточивыя твоя мощи/ от вертограда Церкве Спасовы/ в вертоград Церкве Богородичны честне принесошася,/ святителю Гурие,/ яко же бо дар честен,/ тя даровав Христос Пречистей Матери Своей,/ и исполнися храм Ея святый благоухания твоего,/ и возрадовася архиерейский престол,/ приемый тя, первоседателя своего./ Возвеселися же собор верных со святителем и священноначальники/ о преславном цельбоносных твоих мощей пренесении,/ еже мы радостно празднующе, молим тя,/ угодниче Божий:/ моли Христа Бога/ подати душам нашим мир и велию милость.
Тропарь святителей Гурия и Варсонофия
Первии учителие прежде темному,/ ныне же светлому и новопросвещенному граду Казани,/ первии возвестителие пути спасительнаго,/ истиннии хранителие апостольских преданий,/ столпи непоколебимии, благочестия учителие/ и Православия наставницы, Гурие и Варсонофие,/ Владыку всех молите// мир вселенней даровати и душам нашим велию милость.
Тропарь святителя Гурия, архиепископа Казанского
Правило веры и образ целомудрия,/ учителя добрых дел/ и наставника спасения даде тя Господь/ новопросвещенному граду Казани,/ в немже приобрел еси новыя от язык люди/ и привел еси я Христови./ Сего ради в память твою радостно сошедшеся,/ честне празднуем святое твое успение,/ ты же, отче наш, святителю Христов Гурие,/ моли Христа Бога/ спастися душам нашим.
Ин тропарь святителя Гурия, архиепископа Казанского
Добродетельного и благороднаго ради твоего жития,/ извел тя есть Прещедрый Бог/ на первопрестольство богоспасаемаго царства Казани/ и просветил есть учением твоим бесерменьстии языцы./ И многия, святителю Гурие, во избранное Христово стадо привел еси,/ и нищелюбием богоугодно пожил еси,/ и по преставлении твоем много лет сокровенное твое тело/ от недр земных на удивление явися,/ и благоуханнаго мира гроб наполнися приходящим с верою,/ взимающим миро от раки честньгх мощей твоих,/ всем источаеши исцеления,/ святителю Христов Гурие,/ моли Христа Бога/ спастися душам нашим.
Ин кондак святителя Гурия, архиепископа Казанского
Истине основание, и веры утверждение,/ и в поучениих преизряднаго свемы тя, благочестию споспешника,/ апостолом сопрестольника, страстотерпцем сопричастника,/ постником купноревнителя похваляем тя, Гурие святителю,/ и велия таинника Божия благодати.
Кондак святителя Гурия, архиепископа Казанского
Чувственный страсти победив,/ чистотою, яко солнце, возсиял еси,/ чисто житие до конца сохранив,/ и от неверия в веру многих ко Христу привел еси,/ того ради от Бога нетлением почтен,/ чудесы твоими вся удивил еси./ Молим убо тя, святителю Гурие,/ молитвами твоими от бед избави нас, да зовем ти:/ радуйся, отче предивный, граду Казани похвале и утверждение.
Кондак святителя Гурия
Чувственныя страсти победив,/ чистотою, яко солнце, возсиял еси,/ чисто житие до конца сохранив,/ и от неверия в веру многих ко Христу привел еси,/ и Того ради от Бога нетлением почтен был еси/ и чудесы удивляем./ Молим тя, святителю Гурие,/ молитвами твоими от бед избави нас, да зовем ти:// радуйся, отче предивный, граду Казани похвала и утверждение.
Кондак святителя Гурия
Чувственныя страсти победив,/ чистотою, яко солнце, возсиял еси,/ чисто житие до конца сохранив,/ и от неверия в веру многих ко Христу привел еси,/ и Того ради от Бога нетлением почтен был еси/ и чудесы удивляем./ Молим тя, святителю Гурие,/ молитвами твоими от бед избави нас, да зовем ти:// радуйся, отче предивный, граду Казани похвала и утверждение.
Ин кондак святителя Гурия, архиепископа Казанского
Истине основание, и веры утверждение,/ и в поучениих преизряднаго свемы тя, благочестию споспешника,/ апостолом сопрестольника, страстотерпцем сопричастника,/ постником купноревнителя похваляем тя, Гурие святителю,/ и велия таинника Божия благодати.
Ин тропарь святителя Гурия, архиепископа Казанского
От младости удалялся земнаго мудрования/ и последовав скорбным путем Законоположителю своему Христу Богу./ Темже и Он тя воздарова на земли нетлением,/ на Небесех же со угодившими Ему архиереи ликовствуеши,/ Гурие святителю,/ моли Христа Бога/ подати отечеству нашему на враги победу,/ и мир мирови,/ и душам нашим велию милость.
Тропарь святителя Варсонофия, епископа Тверского
Возвестителю пути спасительного,/ истинный хранителю апостольских преданий,/ столпе непоколебимый, благочестия учителю/ и Православия наставниче, святителю Варсонофие,/ Владыку всех моли/ мир вселенней даровати/ и душам нашим велию милость.
Тропарь святителей Гурия и Варсонофия
Первии учителие прежде темному,/ ныне же светлому и новопросвещенному граду Казани,/ первии возвестителие пути спасительнаго,/ истиннии хранителие апостольских преданий,/ столпи непоколебимии, благочестия учителие/ и Православия наставницы, Гурие и Варсонофие,/ Владыку всех молите// мир вселенней даровати и душам нашим велию милость.
Кондак святителя Варсонофия
Воздержанием тело духу поработив,/ душу же равноангельну сотворил еси,/ сего ради святительства саном почется,/ чисте Чистейшему предстоиши./ Моли Христа Бога, святителю,/ спасти люди твоя, святе,/ да вси вопием ти:/ радуйся, отче преподобне Варсонофие,// граду нашему Казани похвала и утверждение.
Ин тропарь святителя Варсонофия, епископа Тверского
Тихостию нрава направляемый,/ святителю Варсонофие,/ в тихое пристанище достигл еси,/ смиренномудрия ради удобно избежав сопротивных сетей,/ святою душею твоею на Небеса возлетел еси,/ идеже Христу предстоя,/ моли спастися нам, почитающим память твою.
Ин тропарь святителя Варсонофия, епископа Тверского
По Божием законе ревнителю,/ лютый разрушителю неприязненный лести,/ яко миром, потом своим во трудех и бдениих подвизася/ посреде Казанскаго царствия,/ обитель строя боголепнаго Преображения/ и великому своему учителю Гурию последуя,/ с нимже великий союз имея духовный,/ якоже в животе, такоже и по преставлении:/ обретением честных мощей ваших во едино время/ и многими чудесы вас Бог прослави;/ и, радостию восходя в Небесныя обители,/ твердый камене веры,/ от иноплеменник многи скорби претерпел еси,/ добрый вводниче в вечную жизнь,/ в ню же, молим тя, введи ны,/ преподобне отче наш Варсонофие,/ и моли Христа Бога спастися душам нашим.
Тропарь благоверного князя Владимира Ярославича
Измлада явился еси, Богомудре княже Владимире,/ Божественный сосуд избран Богови,/ благочестием воспитан, веру непорочну соблюл/ и, храм пречуден Премудрости Божия/ в Великом Новеграде сем устроив,/ тело Твое в Нем предложил еси,/ и ныне, на Небесех предстоя Престолу Святыя Троицы,/ молися низпослати и нам велию и богатую милость.
Кондак благоверного князя Владимира Ярославича
Многомудренно пожив в княжении твоем в Великом Новеграде,/ благоверный княже Владимире,/ плод благий в жизни сей был еси, присноцветущ добродетельми./ Того ради получил еси жизнь вечную на Небесех,/ тело же твое нетлением прославлено бысть на земли,/ и ныне праздник твой светло совершающе,/ с любовию вопием тебе:/ радуйся, великому Новуграду и всей Российстей земли утверждение.
Тропарь преподобному Павлу Препростому
В тебе, отче, известно спасеся еже по образу: приим бо Крест, последовал еси Христу, и дея учил еси презирати убо плоть, преходит бо, прилежати же о души, вещи безсмертней. Темже и со Ангелы срадуется, преподобне Павле, дух твой.
Тропарь священномученика Ермогена
Российския земли первопрестольниче/ и неусыпный о ней к Богу молитвенниче,/ за веру Христову и паству твою душу свою положив,/ страну нашу от нечестия избавил еси./ Темже вопием ти:/ спасай нас молитвами твоими,// священномучениче Ермогене, отче наш.
Тропарь священномученика Ермогена
Приспе день светлаго торжества,/ град Москва радуется,/ и с ним Русь Православная ликовствует/ песньми и пеньми духовными:/ днесь бо священное торжество/ в явлении честных и многоцелебных мощей/ святителя и чудотворца Ермогена,/ якоже солнце незаходимое, возсия светозарными лучами,/ разгоняя тьму искушений же и бед/ от вопиющих верно:// спасай нас, яко предстатель наш, великий Ермогене.
Тропарь святителям Московским
Первопрестольницы Российстии,/ истиннии хранителие апостольских преданий,/ столпи непоколебимии, православия наставницы,/ Петре, Алексие, Ионо, Филиппе и Ермогене,/ Владыку всех молите/ мир вселенней даровати// и душам нашим велию милость.
Кондак священномученика Ермогена
Темницею и гладом изнуряем,/ даже до смерти верен пребыл еси, блаженне Ермогене,/ малодушие от сердец людей твоих отгоняя/ и на общий подвиг вся призывая./ Темже и нечестивых мятеж низложил еси и страну нашу утвердил еси,/ да вси зовем ти:// радуйся, заступниче Российския земли.
Кондак святителям Московским
Во святителех благочестно пожисте/ и люди к богоразумию настависте,/ и добре Богу угодисте,/ сего ради от Него нетлением/ и чудесы прославистеся,// яко ученицы Божия благодати.
Величание
Величаем вас,/ святителие Христовы,/ Петре, Алексие, Ионо, Филиппе и Ермогене,/ и чтим святую память вашу,/ вы бо молите за нас// Христа Бога нашего.
Тропарь священномученику Кириллу (Смирнову), епископу Казанскому
Якоже солнце светозарное,/ возсия днесь память твоя святителю и исповедниче, Кирилле, / лучами благодати озаряя верных сердца, / к прославлению дивнаго во святых своих Бога, / даровавшего тебе крепость во исповедании и терпение в скорбех, / не премолчи о нас, угодниче Христов, / и избави нас от всякаго зла, / Церковь Русскую сохрани от раздоров и нестроений, / мир мирови испроси // и душам нашим велию милость.
Кондак священномученику Кириллу (Смирнову), епископу Казанскому
Столп и жертва Церкве Христовы отче быв, / сию непоколебиму от искушений лукавого премудро соблюл еси,/и козни вражия твердым умом разорил еси, / и единою Церковь апостольскую проповедал еси, / Кирилле блаженне, святителей Российских похвало, // моли спастися душам нашим.
Тропарь мученика Иоанна Казанского
Страстотерпче святый Иоанне, блаженна земля, напившаяся крове твоея, Христа бо со дерзновением проповедав, многия муки от неверных агарян приял еси, страданьми своими противных дерзости низложив, Троицы поборник явился еси, Юже и моли даровати нам велию милость.
Кондак мученика Иоанна Казанского
Звезда светла среди неверных явился еси, многострадальне Иоанне, зарями твоими Солнце Христа возвещающи, прелесть агарянскую посрамил еси и нам подаеши свет, моля непрестанно Христа Бога о всех нас.
Тропарь мученикам Стефану и Петру Казанским
Мучеников двоица единонравная,/ Стефане и Петре славнии,/ неверие соплеменников обличивше,/ Христу последовали есте,/ во Святую Троицу веровати всех научающе,/ Еяже ради великия страдания приемше,/ молитеся о нас ко Господу,/ да, избавившеся тьмы греховныя,/ Света явимся общницы невечерняго.
Кондак мученикам Стефану и Петру Казанским
Святии страстотерпцы Стефане и Петре,/ Троицы поборницы преизряднейшии,/ мук треволнения и страшную смерть на вечную жизнь пременившии/ во граде Казани страдальчествовавшии,/ ныне же в Небесных чертозех Всецарю предстоящии,/ от всяких нас грехопадений избавити Христа Бога молите,/ Той бо есть верных утверждение.
Тропарь мученика Авраамия Болгарского
Днесь, благовернии людие, сошедшеся,/ восхвалим добляго сего мученика и страдальца Авраамия,/ сей бо, укрепляемь силою Божиею,/ душу свою положи за Христа,/ много пострадав от зловерных болгар./ Сего ради от Господа венец прият/ и ныне предстоит Ему/ и молится о граде сем/ и о всех нас, чтущих память его.
Ин кондак мученика Авраамия Болгарского
Укрепився, славне, любовию Господнею/ и Того честный Крест на рамо взем, иго Господне,/ посрамил еси диаволя коварствия/ и пострадал еси даже до смерти,/ и сего ради, досточудне, явися страдалец велик, Авраамие,/ и оружником храбротаинник/ и участник Божия благодати.
Кондак мученика Авраамия Болгарского
Яко многоценное сокровище,/ принесено бысть от Болгарский страны во град Владимир/ пречестное тело твое, мучениче Авраамие,/ имже подавши всем чтущим преславную память твою обилие исцелений,/ предстоя на Небеси Христу Богу/ и моля Его о спасении душ наших.
Тропарь преподобным Ионе и Нектарию, Казанским чудотворцам
Кондак преподобным Ионе и Нектарию, Казанским чудотворцам