Собор славных и всехвальных 12-ти апостолов. Тропарь
Апостолов первопрестольницы/ и вселенныя учителие,/ Владыку всех молите/ мир вселенней даровати/ и душам нашим велию милость.
Тропарь апостола Иакова Алфеева
Апостоле святый Иакове,/ моли Милостиваго Бога,/ да прегрешений оставление// подаст душам нашим.
Кондак апостолов
Камень Христос каменя веры прославляет светло,/ учеников преизрядна,/ и с Павлом весь дванадесяточисленный собор днесь,/ ихже память совершающе верно,// сих Прославльшаго прославляем.
Ин кондак славных и всехвальных 12-ти апостолов
Петра, вернии, каменя веры, похвалим/ и Павла Богомудраго,/ созывают бо всех праздновати верою,/ соборне вкупе вся дванадесяте, яко проповедники вере,/ просяща грехов оставления.
Кондак апостола Иакова Алфеева
Твердо мудрости догматы в души благочестивых вложившаго,/ похвалами да ублажим яко боговещателя вси Иакова:/ Престолу бо славы Владычню предстоя,/ и со всеми Ангелы радуется,// моля непрестанно о всех нас.
Тропарь преподобного Андроника
Пустынный житель и в телеси Ангел / и чудотворец показался еси, Богоносне отче наш Андрониче, / постом, бдением, молитвою Небесная дарования приим, / исцеляеши недужныя и души верою притекающих к тебе. / Слава Давшему тебе крепость, / слава Венчавшему тя, / слава Действующему тобою всем исцеления.
Кондак преподобного Андроника
Благородия нравом тя честно похвалим, Андрониче,/ иже Господь в лик преподобным отцем сочета,/ яко воистинну благородия Божественныя славы венец улучи.
Тропарь святому священномученику Константину Сухову
Веры крепосте, надежды утверждение, / любве причастниче, за Христа пострадавый / и землю Российскую кровию обагривый, / священномучениче Константине, / моли Христа Бога спастися душам нашим.
Кондак святому священномученику Константину Сухову
Земли Самарския украшение, / стадо Христово в вере наставлял еси, / от земнаго престола к Престолу небесному возшед, / и тамо за овец словесных молиши / Того, Иже мир создавый.
Тропарь священноисповедника схиархимандрита Севастиана Карагандинского
Троицы Святыя служителю,/ земне ангеле и небесне человече,/ духовнаго Оптинскаго старчества преемниче,/ Христов священнотаинниче и исповедниче,/ Духа Святаго обитель всечестная,/ преподобне отче Севастиане, досточтиме,/ испроси мирови мир/ и душам нашим велию милость.
