Акафисты - 28 октября 2025
Кондак 1
Избраннии угодницы Господни и пастырие предобрии Церкве Христовы, града Суждаля заступницы и теплии о душах наших молитвенницы Феодоре и Иоанне, отцы богоноснии, пение похвальное вам от усердия приносяще, молим вы и просим: яко имущии дерзновение ко Пресвятей Троице, предстательством вашим от всяких бед нас свободите, и наследники Царствия Небеснаго нас соделайте, да благодарственно вам вопием:
Радуйтеся, святителие Феодоре и Иоанне, предивнии чудотворцы.
Икос 1
Ангелов подражатели и человеков наставницы святителие божественнии, вы, яко ангели благии хранители, Отечество ваше земное свыше отечески назираете, богоприятными молитвами вашими, вся благая и душеполезная нам у Господа ходатайствуете, нетлением мощей ваших и чудесы преславными уверяюще нас, яко и по смерти живы суще, вся можете о укрепляющем вас Христе. Темже и зовем к вам с любовию теплою:
Радуйтеся, православия насадители.
Радуйтеся, благочестия подвижницы.
Радуйтеся, апостолов достойнии преемницы.
Радуйтеся, Евангелиа Христова неутомимии благовестницы.
Радуйтеся, первопастырие святыя Суждальския Церкве.
Радуйтеся, столпи непоколебимии непорочныя веры.
Радуйтеся, вдов и сирот питателие и заступницы.
Радуйтеся, безпомощных скории помощницы.
Радуйтеся, болящих врачеве благодатнии.
Радуйтеся, о любящих и чтущих вас предстателие.
Радуйтеся, светильницы богосветлии, душы наша озаряющии.
Радуйтеся, отцы премилостивии, дары спасительныя обильно нам низпосылающии.
Радуйтеся, святителие Феодоре и Иоанне, предивнии чудотворцы.
Кондак 2
Видя Господь всю пагубу душ человеческих, идолослужением языческим омраченных, по неизреченному человеколюбию Своему, восхоте призвати я к свету истинныя веры, и тебе, отче Феодоре, избрав в сие великое служение, да благовестиши людем Суждальским Евангелие Христово, и будеши пастырь добрый новопросвещенным и словесным овцам, словом и примером наставляя их богоугодно пети всех Творцу: Аллилуиа.
Икос 2
Разум благодатный воистину являете отцы богоноснии, делы и словесы вашими, все бо житие ваше земное бысть исполнено всяких добродетелей. Темже и Христос, видя ваша добрая дела, чудесы преславными обогати вас при жизни и по смерти, и сподоби вечнаго предстояния у Престола Своего Божественнаго, идеже созерцающе величество славы Его, и наслаждающеся блаженства райскаго, помяните ны чтущыя вас звании сими:
Радуйтеся, нищету духовную возлюбившии.
Радуйтеся, непорочное сердце стяжавшии.
Радуйтеся, милости и сострадания преисполненнии.
Радуйтеся, сотворившии и научившии, и велии нареченнии во Царствии Небеснем.
Радуйтеся, Духа Святаго сосуди избраннии.
Радуйтеся, друзи Христови возлюбленнии.
Радуйтеся, терпения и кротости образы преизящнии.
Радуйтеся, святителям похвало и иноком наставницы.
Радуйтеся, христоименитым людем ко спасению руководителие.
Радуйтеся, скории о душах наших предстателие.
Радуйтеся, безмезднии телес наших целебницы.
Радуйтеся, святителие Феодоре и Иоанне, предивнии чудотворцы.
Кондак 3
Сила Божия осени тя, святителю отче наш Иоанне, егда напрасное изгнание от престола твоего святительскаго незлобиво претерпел еси, подражая Агнцу Божию, вземшему грехи мира и от иудей пострадавшему даже до смерти на Кресте, Егоже Крест и страдания поминая, нивочтоже вменил еси поругания и изгнание, зовый скорбьми испытывающему тя Подвигоположнику Иисусу: Аллилуиа.
Икос 3
Имея вас святителие Христови, светильники чудесы присно сияющыя, Церковь Суждальская светло о вас красуется, яко невеста преукрашенная ваших подвигов красотою, и благодаряще Церкве Зиждителя, вам, Его избранным угодником, сия песненныя дары приносит, глаголюще:
Радуйтеся, иерарси богомудрии, тьму языческую разгнавшии.
Радуйтеся, архипастырие ревностнии, ко Христу приведшии многия душы человеческия.
Радуйтеся, яко мзда ваша многа на небесех есть.
Радуйтеся, яко восприясте почести вышняго звания.
Радуйтеся, наследницы славы невечерния.
Радуйтеся, сопричастницы радости нетленныя всех святых.
Радуйтеся, пищи райския обильно наслаждающиися в селениих праведных.
Радуйтеся, обретшии вечное всесветлое место упокоения.
Радуйтеся, благодатию Божиею ведущии вся наша скорби и нужды.
Радуйтеся, не оставляющии нас своею любовию и отеческим состраданием.
Радуйтеся, присно просящии нам у Господа дары благости Его.
Радуйтеся, никогдаже забывающии нас в молитвах ваших благоприятных у Престола Христова.
Радуйтеся, святителие Феодоре и Иоанне, предивнии чудотворцы.
Кондак 4
Буря злобы языческия возшуме на тя, святителю Феодоре, егда пастырски подвизался еси о просвещении верою Христовой людей Суждальских: обаче ты, яко воин добрый Царя Небеснаго, кротостию злобу побеждал еси, старцы и юныя умоляя с долготерпением многим и любовию отеческою, оставити суетное служение идолом, и познати истиннаго Бога, в Троице славимаго и покланяемаго, Емуже присно пел еси: Аллилуиа.
Икос 4
Слышим вы, отцы богоноснии, и по смерти, яко трубами многогласными, чудесы вашими блговествующыя нам всемощную Силу Христову, Еюже смерть попрася и живот вечный даровася человеком, Еюже и ваша телеса нетленна пребывают, подвизающе на чада ваша чествовати вас похвалами сими:
Радуйтеся, нетления благоухающии цветы.
Радуйтеся, безсмертия богосветлии и немерцающии лучи.
Радуйтеся, смирением высокая стяжавшии.
Радуйтеся, нищетою временною богатство вечное улучившии.
Радуйтеся, яко память ваша с похвалами до днесь во Святей Церкви.
Радуйтеся, яко имена ваша честна и благословенна в пастве вашей.
Радуйтеся, Российския страны благодатное удобрение.
Радуйтеся, града Суждаля сокровища пребогатая.
Радуйтеся, соборнаго храма Богоматере первейшая украшения.
Радуйтеся, подателие неоскуднии исцелений.
Радуйтеся, источницы неистощимии чудес.
Радуйтеся, молитвами вашими спасающии нас от всяких бед.
Радуйтеся, святителие Феодоре и Иоанне, предивнии чудотворцы.
Кондак 5
Боготечней звезде подобен был еси, святителю Иоанне, сиянием кротости твоея, мрак злобы и клеветы разогнавый. Егда бо клеветницы лукавии на тя возсташа, и на изгнание поносное тя осудиша, ты молитву усердную о них ко Господу принесл еси, и став пред всеми людьми Суждальскими руце твои преподобныя горе воздвигл еси: и абие клеветницы твои слепотою объяти быша, и вину свою пред всеми исповедаша, людие же вси, заблуждение свое познавше, прощения у тебе просиша и на престол святительский с честью тя возвратиша. Ты же и врагов твоих ослепших помиловал еси, и исцеление им подал еси, зовущым в покаянии глубоцем: Аллилуиа.
Икос 5
Видим вы, святителие Христови, очами веры у Престола Божия предстоящыя и за нас грешных молящыяся, и вашим заступлением обретающе в скорбех утешение, в недузех исцеление, в бедах скорое вспоможение, величаем возвеличившаго вас Царя Славы Христа, вам же, теплым предстателем нашым, от любве сердечныя вопием:
Радуйтеся, ангелов сожителие.
Радуйтеся, святых всех приснии друзи.
Радуйтеся, Божия благодати таинницы.
Радуйтеся, во благоухании святыни почивающии.
Радуйтеся, вся благая прошения наша исполняющии.
Радуйтеся, скории утешители скорбных сердец.
Радуйтеся, скоропослушливии предстатели сущих в бедах.
Радуйтеся, старых в изнеможении укрепление.
Радуйтеся, юных к благочестию утверждение.
Радуйтеся, младенцев милостивии наказателие.
Радуйтеся, грешных к покаянию наставницы.
Радуйтеся, святителие Феодоре и Иоанне, предивнии чудотворцы.
Кондак 6
Проповедника богопросвещенна и апостолом Христовым единонравна, вемы тя святителю Феодоре: благодать бо Господня излияся во устех твоих, преподобне, и дар Божий спасительный, по имени твоему, воистину был еси людем Суждальским, словом и примером равноангельскаго жития твоего приводя их к познанию Христову, и поучая сердцем и усты воспевати Спасителю мира: Аллилуиа.
Икос 6
Возсиясте отцы всеблаженнии, в стране Суждальстей, светом добродетельнаго жития вашего, яко светила богосветлая, и просветисте нощь глубокую идолослужения, лучами познания Христова: но и ныне, аще вратами смерти и во гробы снидосте, не престаете озаряти наша темныя душы благодатными лучами, да вас немолчно ублажаем благохвалении сицевыми:
Радуйтеся, милость и сострадание ко всем являющии.
Радуйтеся, тяжкия грешники от рова погибельнаго исхищающии.
Радуйтеся, пастырие добрии, присно готовии спасати от бед словесную вашу паству.
Радуйтеся, волку душегубительному не попускающии расхитити Богом врученное вам стадо.
Радуйтеся, звезды непрелестнии, путь ко спасению нам верно указующии в житейстем плавании.
Радуйтеся, облацы росоноснии, зной страстей наших прогоняющии.
Радуйтеся, фимиам молитв за нас Богу приносящии.
Радуйтеся, сладкою вонею благоухания Христова, сердца наша услаждающии.
Радуйтеся, венцами рукою Вседержителя украшеннии.
Радуйтеся, на Небеси Престолу Владычню покланяющиися.
Радуйтеся, собеседницы пресветлых горних сил.
Радуйтеся, заступницы усерднии земнородных.
Радуйтеся, святителие Феодоре и Иоанне, предивнии чудотворцы.
Кондак 7
Хотя Господь явити житие твое ангелоподобное, отче Иоанне, благоволи послати сослужебника тебе во время совершения Божественныя Литургии, ангела святаго, егоже видети сподобився благоверный князь Суждальский Борис, позна тя избранника Божия и великаго иерарха Христова, достойнаго еще во плоти сослужения ангельскаго, и о сем благодарственно возгласи ангелов и человеков Создателю: Аллилуиа.
Икос 7
Новопросвещеннии люди Суждальстии вас обретоша святителие Божии, пестуны искусныя и попечители ревностныя, на спасения стезю их наставляющыя, и всяку тьму нечестия сиянием учений ваших разгоняющыя. Темже яко проповедников благословенных, мы чада суще оных, ихже вы ученьми своими ко Христу приведосте, ваши труды и подвиги усердно поминаем, и зовем:
Радуйтеся, Троицы Живоначальныя священнотаинницы честнии.
Радуйтеся, таинств божественных совершители непорочнии.
Радуйтеся, немудрых наказателие благоискуснии.
Радуйтеся, языческаго нечестия крепцыи искоренители.
Радуйтеся, сеятели благочестия христианскаго предобрии.
Радуйтеся, нивы Господней делателие трудолюбивии.
Радуйтеся, вернии раби Небеснаго Домовладыки.
Радуйтеся, Учителя Христа ученицы добропослушливии.
Радуйтеся, смирения Его нелицемернии подражатели.
Радуйтеся, кротости Его вернии последователи.
Радуйтеся, любовию Его преисполненнии.
Радуйтеся, милосердие Его себе стяжавшии.
Радуйтеся, святителие Феодоре и Иоанне, предивнии чудотворцы.
Кондак 8
Странник и пришлец в земли Суждальстей был еси, святителю отче Феодоре, вышняго града Иерусалима Небеснаго взыскуя злострадании многими, и сия мужески претерпевая любве ради Христовы, ово от потемненных злобою идолослужителей, ово же от исконнаго врага спасения человеческаго, егоже всю силу терпением крепким и молитвами непрестанными до конца победил еси, и ныне со ангелы и мученики песнь победную поеши Подвигоположнику Христу: Аллилуиа.
Икос 8
Всем к вам молитвенно прибегающым, чудотворцы святии, любовь и благосердие ваше обильно являете, и многажды самая прошения наша исполнением предваряете: ибо дадеся вам велия благодать от Господа, болезни исцеляти, духи нечистыя изгоняти, разслабленныя возставляти, яко воистинну преемником апостольским и верным последователем Евангелиа Христова, Егоже обетования неложная туне подаете всем требующым дары целебныя, и за сие слышите пение таковое:
Радуйтеся, маслины благоплодныя, елей милости Божия нам источающии.
Радуйтеся, кедри благосеннолиственнии, в зной страстей нас покрывающии.
Радуйтеся, крини благовоннии небеснаго прозябения.
Радуйтеся, чудная древеса рая Иисусова.
Радуйтеся, плод сторичный принесшии на пажити Святыя Церкви.
Радуйтеся, вертоград Церкве Святыя труды вашими благовозделавшии.
Радуйтеся, новосаждения спасительная в нем возрастившии.
Радуйтеся, благословия органи изряднии.
Радуйтеся, евангельския проповеди трубы доброгласныя.
Радуйтеся, истиннии хранителие апостольских преданий.
Радуйтеся, Суждальския церкве украшение неотъемлемое.
Радуйтеся, святителие Феодоре и Иоанне, предивнии чудотворцы.
Кондак 9
Всею душею возлюбив избранника Божия Евфимиа, ты отче Иоанне, был еси ему помощник усерден в устроении обители его святыя, и друг присный во вся дни живота твоего. Темже ныне, в обителех горних вкупе обретше вечное блаженное упокоение, неразлучно в Бозе пребываете, и поете святых святейшему Слову: Аллилуиа.
Икос 9
Витии многовещаннии и доброгласнии не возмогут воистинну изрещи все обилие чудес ваших, угодницы Божии, имиже при жизни и по смерти прославистеся от Господа, и прослависте имя Его Святое в стране Суждальстей, еяже просветители и хранители соделастеся благоволением всех Творца, подвизающаго нас вопити к вам хвалебно:
Радуйтеся, рукою крепкою люди Суждальския ко спасению путеводившии.
Радуйтеся, к спасительному познанию Христову тех приведшии.
Радуйтеся, яко Петр и Павел мрежею проповеди евангельския душы человеческия уловившии.
Радуйтеся, апостольски страну Суждальскую светом богопознания просветившии.
Радуйтеся, чудесы преславными проповеданнаго вами учения истину засвидетельствовавшии.
Радуйтеся, всякое нечестие языческое истребившии.
Радуйтеся, православия святые догматы незыбленно утвердившии.
Радуйтеся, яко вашим предстательством и до ныне град ваш в православии нерушимо пребывает.
Радуйтеся, орли небеснии, крилами молитв ваших от бед нас покрывающии.
Радуйтеся, теплотою любве вашея нас согревающии.
Радуйтеся, пищею нетленною слова Божия нас напитавшии.
Радуйтеся, святителие Феодоре и Иоанне, предивнии чудотворцы.
Кондак 10
Спасительнаго учения Христова великопроповедник и чудотворец показался еси, святителю Феодоре, и свято пожил еси на земли в подвизех и трудех непрестанных, возращая посеянная тобою в стране Суждальстей семена благочестия Христианскаго, во еже принести им плод сторичный твоим благопопечением. И тако совершив подвиг свыше тебе назначенный, в старости маститей прешел еси к обителем небесным, со ангелы пети Триипостасному Богу: Аллилуиа.
Икос 10
Царя Небеснаго Христа служителие изряднии и воини добропобеднии, святителие божественнии Феодоре и Иоанне, темную силу душегубителя диавола крепко поправшии, и венцы победными свыше увенчаннии, подвизаете чудесы вашими верных соборы прославляти песньми духовными, подвиги святаго жития вашего, имже чудящеся, от любве сердечныя восклицаем вам радостно:
Радуйтеся, земнии ангели и небеснии человецы.
Радуйтеся, на небеси и на земли от Господа прославленнии.
Радуйтеся, блага нетленная унаследовавшии.
Радуйтеся, дары благодатныя щедро раздающии.
Радуйтеся, душевных и телесных недугов добрии целебницы.
Радуйтеся, милостивии страны Суждальския покровителие.
Радуйтеся, скорое вспоможение в бедах сущым являющии.
Радуйтеся, присно готовии на умоление прогневаннаго грехми нашими Творца.
Радуйтеся, со дерзновением многим предстательствующии за нас пред Престолом Вседержителя.
Радуйтеся, умилостивители известнии Небеснаго Отца.
Радуйтеся, непрестанно ходатайствующии пред благостию Его о мире всего мира.
Радуйтеся, праведно движимый на нас гнев Его молитвами вашими утоляющии.
Радуйтеся, святителие Феодоре и Иоанне, предивнии чудотворцы.
Кондак 11
Пение Пресвятей Троице в безмолвии ненарушимем возносити возжелев, святителю отче Иоанне, оставил еси престол твой святительский, и заключился еси в обители иночестей, да един Единому возлюбленному ти Иисусу послужиши в безмолвии и молитвах непрестанных, богомыслием восходя к совершенству духовному, и приуготовляяся к исходу радостному от земных к небесным, егоже улучив, со безплотными лики воспеваеши ныне вечнорадостную песнь Богу: Аллилуиа.
Икос 11
Светоподательным светильником подобны честныя раки, содержащыя в себе святыя и цельбоносныя мощи ваша иерарси Христови Феодоре и Иоанне: ибо свет невечерний возсияваете от них чудесы вашими, имже душы наша просвещаются познанием силы Христовой, еюже ваша тлению не причастная телеса, дивная и преславная знамения содевают, и вся приглашают песнословити к вам сице:
Радуйтеся, смертию временною пришедшии к жизни вечней.
Радуйтеся, облеченнии в светлую одежду чудотворнаго нетления.
Радуйтеся, от гробов ваших исцеления неоскудно источающии.
Радуйтеся, и самим призыванием честных имен ваших недуги врачующии.
Радуйтеся, слепых просветители.
Радуйтеся, разслабленных укрепители.
Радуйтеся, хромым правохождение подающии.
Радуйтеся, немым дар слова низпосылающии.
Радуйтеся, глухим слух отверзающии.
Радуйтеся, бесноватых от насилия демонскаго освобождающии.
Радуйтеся, многообразных немощей исцелители.
Радуйтеся, всем нам в час смерти усерднии защитницы.
Радуйтеся, святителие Феодоре и Иоанне, предивнии чудотворцы.
Кондак 12
Благодатных даров щедрии податели и милостивии отцы наши Феодоре и Иоанне, святителие всеблаженнии, Богу угодившии, и мзду небесную от Него восприявшии, и до ныне паству вашу отечески молитвенно назирающии и хранящии, молим вас, соделайте ны грешныя и недостойныя чада ваша, достойны последователи святаго жития вашего, и научите нас творити волю Божию, да покаянием очищени пред Господем, сподобимся вкупе с вами воспевати Ему на земли живых: Аллилуиа.
Икос 12
Поюще многая и преславная чудотворения ваша, угодницы Божии, поминаем велию любовь вашу к пастве вашей земной, юже при жизни и по смерти показасте, и покланяемся с любовию нетленным и многоцелебным мощем вашым, пред ними же яко живым вам сущым с нами, от усердия к вам вопием:
Радуйтеся, благодетели наши, блага временная и вечная нам свыше подающии.
Радуйтеся, покровители наши, покровом молитв ваших, от всякаго зла нас соблюдающии.
Радуйтеся, руководители наши к горнему Иерусалиму нас путеводящии.
Радуйтеся, предстатели наши, от враг видимых и невидимых нас избавляющии.
Радуйтеся, сокровища нетленная, богатством милости вашея нас обогащающии.
Радуйтеся, одушевленнии храмы Святаго Духа, дарами Его светло блистающии.
Радуйтеся, Пресвятыя Троицы вернии служители и угодницы.
Радуйтеся, Пресвятыя Богородицы избраннии раби и угодницы.
Радуйтеся, архангелов и ангелов достойнии собеседницы.
Радуйтеся, пророков и апостолов истиннии подражатели.
Радуйтеся, великих учителей и святителей честнии последователи.
Радуйтеся, преподобных и праведных блаженнии сонаследницы.
Радуйтеся, святителие Феодоре и Иоанне, предивнии чудотворцы.
Кондак 13
О чудотворцы предивнии и врачеве благодатнии, святителие Христови Феодоре и Иоанне! Зрите наша скорби и беды, наша болезни и озлобления, и благоутробно вонмите малому сему молению нашему и песнословию смиренному, еже милостивно приемше умолите всех Творца и Господа, избавити нас скорбей и болезней временных и вечных, и сподобити нас недостойных со ангелы и всеми святыми во Царствии Небеснем, пети Богу: Аллилуиа.
Этот кондак читается трижды, затем икос 1-й и кондак 1-й
Молитва святителем Феодору и Иоанну, епископом Суждальским, чудотворцем
О велицыи угодницы Христови и чудотворцы, святителие Феодоре и Иоанне! Се мы недостойнии и грешнии скорбьми многими угнетаемии, к вам усердно прибегаем, и с упованием крепким молимся: отцы богомилостивии и благопослушливии, милостивно услышите ныне глас наш молебный, и потщитеся на помощь нашу, и яко при жизни вашей всем скорбящым и озлобленным помощницы и утешителие бысте, тако и ныне любовь вашу к нам явите, благодатным действом благоприятных молитв ваших, претворяюще скорбь нашу в радость, печаль же на утешение: вся бо можете о укрепляющем вас Христе, Егоже вернии служители бысте; от Негоже приявше вся обетования благая, низпошлите и нам великую и богатую милость Господню, да воспоем и прославим дивнаго во святых Своих Бога, Отца и Сына и Святаго Духа, ныне и присно и во веки веков. Аминь.
Кондак 1
Возбранниче светлый на тму века сего, во вся оружия Божия облеченный и веру Христову, аки щит, противу суетных мудрований державый, восхваляем тя любовию, святителю и исповедниче Афанасие, ты же яко молитвенник о нас ко Господу дерзновенный, утверждения в истине Православия испроси нам, зовущим: Радуйся, Афанасие, новый исповедниче и Православия учителю.
Икос 1
Ангельскаго чая образа, Афанасие блаженне, измлада игранием детским не внимал еси разумом, молитвам же теплым во храме Господни и рукоделию в доме матернем, аки бы в келлии, всегда прилежа, дерзновенно предвозвещал еси отроком, сверстным тебе, яко имаши быти Церкве Христовы служитель священный. Ведуще убо мы, яко Промыслом Божиим сбыся речение твое, со удивлением зовем ти:
Радуйся, древнею и святою землею Владимирскою в добронравии воспитанный; радуйся, в Лавре преподобнаго Сергия лику инокующих вчиненный.
Радуйся, постом и молитвою житие богоугодное стяжавый; радуйся, от Господа к подвигу свидетельства во дни лукавыя избранный.
Радуйся, благолепия церковнаго блюстителю; радуйся, премудрым Православия наставником подобниче.
Радуйся, Афанасие, новый исповедниче и Православия учителю.
Кондак 2
Видев, яко лютое на Церковь Российскую гонение наста, не точию гнев Божий, праведно движимый на ны, помышлял еси оное, Афанасие богоразумне, но паче премудрую жатву душам, яже созреша в живот вечный, и сего ради Господу жатвы Христу воспевал еси: Аллилуиа.
Икос 2
Разумея Собор всех святых земли Русския, Отечеству нашему от бед избавление быти, словеса тем праздничная нача слагати, богодухновенне, песньми дивными Церковь украшая. Мы же, грешнии, ныне тя зряще в лице присно тобою чтомых угодников Божиих, восписуем ти похвальная сия:
Радуйся, молений умиленных слагателю; радуйся, пения Господеви разумнаго рачителю.
Радуйся, чудотворцев Российских чисте возлюбивый; радуйся, предстателей страны нашея в помощь всегда призывавый.
Радуйся, яко страстотерпцы новыя увенчал еси на земли похвалами; радуйся, яко в сонме тех на Небеси Бога славиши.
Радуйся, Афанасие, новый исповедниче и Православия учителю.
Кондак 3
Силу мняще безбожницы на правоверие прияти, честныя мощи святых земли Владимирския посреде Успенскаго храма соборнаго непокровенны поставиша, во еже посмеитися им, ты же, доблий ратниче Христов, народу во храм притекшу, воззвал еси велегласно: Благословен Бог наш! И тако злоумысляемое святыням поругание в молебное прославление претворил еси, с верными вкупе вопия Богу: Аллилуиа.
Икос 3
Имеющу ти почтенну быти честнейшим епископства саном, всуе потщишася гонители Церкве Христовы прежде архиерейства твоего грозными словесы и прещении тя устрашити, яко благодать Святаго Духа достойно помаза тя во святители земли Владимирския, идеже исповедник и Православия учитель явился еси, Афанасие боголюбезне. Поминающе убо ревностное служение твое, глаголем ти сице:
Радуйся, веры правыя крепкий поборниче; радуйся, раскола новейшаго небоязненный обличителю.
Радуйся, мудрований века сего, возносящихся на разум Божий, посрамление; радуйся, от волков, в одежде овчей во стадо Христово входящих, ограждение.
Радуйся, смущением колеблемых в истине утверждавый; радуйся, отступников ко обращению приводивый.
Радуйся, Афанасие, новый исповедниче и Православия учителю.
Кондак 4
Бури и смятению раскола противу стоя, аще и в заточение бысть неправедно ввержен, святителю Божий, обаче не оставил еси кормила церковнаго, вся верныя писаньми твоими увещавая и моля, да не соединяются с отступниками ни да боятся лукаваго того времене, но яко малое стадо, емуже благоизволи Отец Небесный дати Царство, взывают выну: Аллилуиа.
Икос 4
Слышавше, дивляхуся вси вернии благодушию твоему, исповедниче, темницу бо, в нюже затворен бысть, прибежище благое от поветрия обновленческаго нарицал еси, имея же тамо соузников немало, вкупе с тобою за веру Христову страждущих, веселился еси о Господе со единомысленники твоими, вся святыя земли Русския молитвенно воспевая. Мы же, яко достойный образ нам злострадания являеши, приносим ти таковая:
Радуйся, темницу молитвенным сиянием озаривый; радуйся, и во вратех смертных Жизнодавцу хвалу возсылавый.
Радуйся, страждущих истины ради милосердый утешителю; радуйся, и безбожников заточенных человеколюбный питателю.
Радуйся, скорбьми от любве Божия не разлученный; радуйся, в терпении твоем от Господа укрепленный.
Радуйся, Афанасие, новый исповедниче и Православия учителю.
Кондак 5
Богохранимаго избранника помышляем тя, друже Христов Афанасие, зане на брезе Онежскаго езера в темнице нарочито учиненной, да бы заточенныя тамо смерти удобно предати, мнози спленницы твоя нуждне от мучителей кончину прияша, тебе же, трие месяцы день и нощь убиением безсудным угрожаема бывша, избави Господь Многомилостивый, Емуже благодарно воззвал еси: Аллилуиа.
Икос 5
Видя всегда очима сердца твоего, духоносне Афанасие, коликими ранами и труды стяжаша отцы святии истинное по Бозе житие, досады и укоризны многая претерпевал еси, гонителей твоих, яко заповеда Христос, благословляя. Обременен же быв горькими работами, во узилищи, аки вторый Иоанн Дамаскин, вся места нечистая рукама твоима безропотне омывал еси. Неизреченнаго ради смирения твоего приносим ти похвальная сия:
Радуйся, кротости пречудныя образе; радуйся, блаженнейшаго послушания сыне.
Радуйся, от нечестивых уничижение в честь себе вменивый; радуйся, обидящим тебе вседушно погрешения простивый.
Радуйся, враждебников твоих возлюбителю нелицемерный; радуйся, ненавидящим тебе благодетелю усердный.
Радуйся, Афанасие, новый исповедниче и Православия учителю.
Кондак 6
Проповедник немолчен Евангелия Христова и в темницах явился еси, Афанасие досточудне, разбойников бо даже и душегубцев суровых к покаянию приводил и научал еси песнь хвалы и благодарения воспевати Богу: Аллилуиа.
Икос 6
Возсиявшу тебе в темнице светом истины, приказа мучитель некий отвести тя во узилище иное, и стражницы, яже ведоша тебе, немилосерди быша зело и томляху тя, старче святый, скоро гоняще, во еже малыми деньми прейти толикую долготу пути. Таже гладом в заточении том непрестанно морим бысть, яко едва тебе живу остатися. Обаче, крепостию телесною изнемогая, не изнемогал еси терпением, вся Христа ради препобеждая. Мы же, таковому дивящеся подвигу твоему, поем ти сице:
Радуйся, без крове мучениче добропобедный; радуйся, воине Христов непреодоленный.
Радуйся, огнем страданий паче злата искушенный; радуйся, в мужестве непоступнем паче адаманта утвержденный.
Радуйся, кротце в жертву правды Бога ради себе предавый; радуйся, слезами всеянное радостию пожавый.
Радуйся, Афанасие, новый исповедниче и Православия учителю.
Кондак 7
Хотяще безбожницы, исповедания ради и сана твоего святительскаго, не отпустити даже по заточении тя свободна, глаголаша лукавне, яко ни от кого имаши обрести послужения в старости твоей, и затвориша тя в темничнем доме призрения, где паче неже в узилищи, безчисленными скорбьми и поношении стужаху ти. Но попечением христиан благочестивых от горшаго места онаго изведен был еси, воспевая помощи подателю Богу: Аллилуиа.
Икос 7
Новому наставшу гонению на Церковь Христову, повелеша богопротивницы заключити святыя храмы, а иныя до основания разорити. Ты же, на Господа надеяся несумненно, мужество ближним твоим внушал еси, да не будут страшливи и малодушии, рече бо Господь, яко врата адова не одолеют Церкви Его. Темже вопием ти сице:
Радуйся, неизреченнаго милосердия Христова добрый вестниче; радуйся, благонадежнаго упования Божия тихий Ангеле.
Радуйся, глубиною покаяния высоту смиренномудрия стяжавый; радуйся, от сыновняго Церкви послушания к совершению святых отец ея востекший.
Радуйся, за Отечество наше молитвенниче непрестанный; радуйся, ходатаю о людех его ко Творцу неусыпный.
Радуйся, Афанасие, новый исповедниче и Православия учителю.
Кондак 8
Странное и неудобь разумеемое чудо яви о тебе Господь, святителю Афанасие, литургисавшу бо ти во святей обители преподобнаго Сергия, нецыи от молящихся зреша тя аки бы волною, из алтаря святаго и паки во оный по воздуху износима и вносима быти. Самовидцы же чудеси тому со удивлением возопиша в сердцах своих Богу: Аллилуиа.
Икос 8
Всем неблагоразсудным, яже точию в домех своих молишася, общения же церковнаго ся отлучаху, богоразумными словесы и посланьми твоими, наказовал еси, миротворче усердный, присоединится, аки удом, прочему телеси церковному, да раскола бы новаго не сотворили, и тех к согласному единомыслию добре управил еси. Того ради и мы, мира днесь Церкве Православней и скораго раздором утоления взыскующе, зовем ти:
Радуйся, соблазны и несогласия среде верных потребивый; радуйся, хитона церковнаго раздранию возбранити предуспевый.
Радуйся, расточенныя овцы Христовы во едино стадо собираяй; радуйся, заблуждающих от пути истиннаго к покаянию обращаяй.
Радуйся, яко послушанию Матери Церкви чада ея наставляеши; радуйся, яко веру православную хранити научаеши.
Радуйся, Афанасие, новый исповедниче и Православия учителю.
Кондак 9
Всю верным бывшую радость кто изрещи возможет, святителю славне, егда во Владимире граде явился еси, празднества ради осми сот летом собора Успенскаго; како клирицы и вся люди сладце зряху на тя и любезно о Господе тя целоваху; таже видением твоим духовнаго веселия исполньшеся, вмале не на руках своих внесоша тебе во храм, поюще Богови: Аллилуиа.
Икос 9
Ветию тя преизящна показа Господь, Афанасие благоглаголиве, песньми новыми украсившаго памяти и праздники святых земли Русския, гимны бо церковныя и канонов словеса слагая, в таковых трудех душеполезных и Церкви Христовой зело потребных, препроводил еси лета довольна, оттуду же и песнописца прозвание стяжал еси. Мы же, от умиленных глаголов твоих и до днесь, аки пищею духовною питающеся и аки сладким потоком ся напаяюще, восхваляем тя:
Радуйся, талант песнотворчества, от Бога ти данный, изрядно умноживый; радуйся, молитвословия многоразлична, послушания ради церковнаго, со тщанием добре исправивый.
Радуйся, цевнице духовная, сердца наша увеселяющая; радуйся, источниче изобильный, воду живоносную нам источающий.
Радуйся, яко песнописцы новыя к усердию благочестивому подвизаеши; радуйся, яко, от словес твоих оправданный, и нам у Бога оправдания молиши.
Радуйся, Афанасие, новый исповедниче и Православия учителю.
Кондак 10
Спасенному пути по вся дни чада церковная наставлял еси, духоносне Афанасие, мнози бо вернии с любовию к тебе течаху, да бы поучитися от честнаго жития твоего, поелику сердцем смирен и тих обычаем, негневлив и кроток, и всех добродетелей исполнен сый, делы твоими паче словес научал еси пети Богу: Аллилуиа.
Икос 10
Стену твердую от навет и козней вражиих веру православную первие проповедал еси, старче святый, таже покаяние слезное и молитву непрестанную вкупе с богоугодными делы, и себе на служение всем приходящим к тебе предавая, многих ко спасению добре управил еси. Сего ради и мы, недостойнии, руководствия добраго требующе, вопием ти тако:
Радуйся, недоумевающим благий советниче; радуйся, заблуждающих кроткое вразумление.
Радуйся, душ смятенных сладостный умирителю; радуйся, неудобоизцельных страстей отгонителю.
Радуйся, лукавыя помыслы в сердцах человеческих провидевый; радуйся, благоуветливыми словесы ко отложению греховнаго прилога увещававый.
Радуйся, Афанасие, новый исповедниче и Православия учителю.
Кондак 11
Пению молебному прилежаща усердно, утеши тя Господь пред кончиною видением чудным, яко святых земли Русския, ихже присно почитал бе любовию, зрети сподобился еси купно со Христом, Емуже абие воззвал еси: Аллилуиа.
Икос 11
Светом Божественнаго явления осиянный, последний бо день и час блаженнаго исхода твоего провозвещен бысть от Господа ти, мирно предал еси, тайновидче, душу твою в руце Христа Бога, Егоже от юности возлюбил и за Негоже толикая пострадал еси. Но яко в животе своем, подвижниче велий, свет бысть миру такожде и по преставлении чудесы многими озарити нас не престаеши, зовущих:
Радуйся, воина юнаго от лютыя смерти чудесно избавивый; радуйся, вдовицу благочестивую из руку зловольника дивно исхитивый.
Радуйся, яко персть и былие от гроба твоего недужным исцеления подаваша; радуйся, яко мнози при гробе твоем молившеся, душепагубным страстем врачество обретоша.
Радуйся, честнаго брака христианскаго известный покровителю; радуйся, девствующих и целомудренных заступниче благонадежный.
Радуйся, Афанасие, новый исповедниче и Православия учителю.
Кондак 12
Благодать, юже тесным твоим житием и подвиги многими у Бога стяжал еси, ведая, освященный Собор Православныя нашея Церкве сопричте тебе сонму всех русских святых, в том же светло ликуеши ныне, всесоставным гласом воспевая победную песнь: Аллилуиа.
Икос 12
Поем тя со умилением, святителю достохвальне, яко во обители горней вселивыйся, на земли нам оставил еси честныя твоя мощи, яже благоговейно днесь почитаем и скораго исцеления скорбем душевным и телесным чающе, взываем ти тако:
Радуйся, блаженства изгнанных правды ради праведно удостоенный; радуйся, в светлостех немерцающих Пресвятыя Троицы присно живущим соводворенный.
Радуйся, ангельским чином сликовствующий в вышних; радуйся, от человек похвалы досточестно приемлющий в нижних.
Радуйся, верою тя почитающим скорое утешение; радуйся, любовию тя воспевающим благое веселие.
Радуйся, Афанасие, новый исповедниче и Православия учителю.
Кондак 13
О святителю благоглаголиве Афанасие, имене Божия досточудный исповедниче, земли Владимирстей радование и Церкви Святей украшение, убогое сие услыши моление наше и благомощное ходатайство твое вознеси о нас Господеви, да вся полезная ко спасению душевному нам дарует, во еже непреткновенно внити нам в Царство Небесное и воспета тамо Живоночальной Троице: Аллилуиа.
Сей кондак глаголи трижды. И паки чтется первый икос: Ангельскаго чая образа… и кондак первый: Возбранниче светлый…