Преподобне и Богоблаженне отче Лонгине, врат монастырских опасный хранителю, опаснейший же и неусыпный своих чувствий от всякаго мирскаго суетствия затворителю, моли нарекшаго Себе дверь Господа славы, да отверзет нам дверь милости Своея.
Вратом земным приседя и оным с послушания внешнима очима наблюдая, Небесная врата присно умными своима очима наблюдал еси, преподобне Лонгине, в ниже уже вшед и тамошния красоты сподобився, молися Господеви, да и мы получим вход Царствия Небеснаго.
Ублажаем тя, преподобне отче Лонгине, и чтим святую память твою, наставниче монахов и собеседниче ангелов.
Яко звезды многосветлыя, от юности возсиявше, освятили есте сердца верных пренесением честных мощей ваших, добродетельми чудес ваших, во плоти, яко бо ангели на земли, показастеся, пощением насаждени бысте, яко древо при водах воздержания, напоени струями слез ваших, и скверну омысте, сего ради явистеся приятелище Божия Духа, Иоанне и Лонгине, молите Христа Бога спастися душам нашим.
Свыше Божественною благодатию просветився, Богомудре, многим терпением во временней жизни течение совершил еси, темже и по успении источаеши чудес благодать, иже с верою приходящим к тебе, Лонгине всеблаженне. Слава Давшему ти крепость, слава Прославльшему тя в чудесех, слава Действующему тобою всем исцеления.
Явистеся светильницы всесветлии, во плоти ангели, яко Живота древо райское, пощением, и бдением, и верою возращаеми, процвели есте. Молитвами своими Небесную благодать приемше, врачеве же крепции явльшеся, исцеляете недужныя и души с верою притекающих к раце мощей ваших, чудотворцы славнии Иоанне и Лонгине, сего ради вси верою и любовию вопием: радуйтеся, поморстей стране похвало и утверждение.
Ублажаем тя, преподобне отче Лонгине, и чтим святую память твою, наставниче монахов и собеседниче ангелов.