Тропари, кондаки и величания - 31 октября 2025
Тропарь преподобного Иосифа
Яко постников удобрение/ и отцев красоту,/ милости подателя,/ разсуждения светильника,/ вси вернии, сошедшеся, восхвалим/ кротости учителя/ и ересей посрамителя,/ премудраго Иосифа,/ российскую звезду,/ молящася Господу// помиловатися душам нашим.
Кондак преподобного Иосифа
Жития треволнения, и мятеж мирский,/ и страстная взыграния в ничтоже вменив,/ пустынный гражданин показался еси,/ многих быв наставник, Иосифе преподобне,/ монахов собратель и молебник верен, чистоты рачитель,// моли Христа Бога спастися душам нашим.
Тропарь святой великомученице Злате Мегленской
Агница Твоя, Иисусе, Злато, зовет велиим гласом: Тебе, Женише мой, люблю, и Тебе ищущи страдальчествую и сраспинаюся и спогребаюся крещению Твоему и стражду Тебе ради, яко да царствую в Тебе, и умираю за Тя, да и живу с Тобою; но яко жертву непорочную приими мя, с любовию пожершуюся Тебе. Тоя молитвами, яко Милостив, спаси души наша.
Кондак святой великомученице Злате Мегленской
Храм Твой всечестный, яко цельбу душевную обретше, вси вернии велегласно вопием ти: дево мученице Злато великоименитая, Христа Бога моли непрестанно о всех нас.
Величание святой великомученицы Златы Мегленской
Величаем тя, страстотерпице Христова Злато, и чтим честное страдание твое, еже за Христа претерпела еси.