Загрузка...

Календарь Молитвослов Библия

Тропари, кондаки и величания - 02 ноября 2025

Тропарь великомученика Артемия
Истинною бо Христовою верою/ утверждься, страстотерпче,/ мучителя злочестива царя/ победил еси со идольским того возношением./ Тем от Царя Великаго, вечно царствующаго,/ пресветлым венцем победным одарен бысть,/ вся исцеляяй болящия и призывающий тя, Артемие великий,/ моли Христа Бога/ спасти души наша.
Кондак великомученика Артемия
Благочестиваго и венценоснаго мученика,/ на враги победы вземшаго одоление,/ сошедшеся, достойно песньми восхвалим Артемия,/ превеликаго в мученицех,/ чудес же дателя пребогатаго,// молится бо Господу о всех нас.
Тропарь праведного отрока Артемия Веркольского
Вышняго повелением,/ тученосным облаком, небо помрачившим/ и молниям блистающим,/ грому же возшумевшу с прещением,/ испустил еси душу твою в руце Господеви,/ премудре Артемие,/ и ныне предстоиши Престолу Владыки всех,/ иже верою и любовию приходящим к тебе,/ подай исцеление всем неотложно/ и моляся Христу Богу,/ спастися душам нашим.
Кондак праведного отрока Артемия Веркольского
Возсия днесь пресветлая память премудраго Артемия;/ Богоданная благодать, яко реки, изливает от целебных мощей его дивная исцеления,/ имиже от многоразличных недуг избавляемся,/ с верою приемлюще я и взывающе:/ радуйся, Артемие Богомудре.
Тропарь священномученику Дамиану, архиепископу Курскому и Обоянскому

От юности Христа возлюбил оси, святителю Дамиане, к тебе, яко скорому молитвеннику и помощнику, милостиво припадаем и усердно молим: защити землю Русскую и спаси души наша.

Кондак священномученику Дамиану, архиепископу Курскому и Обоянскому

Святительскую благодатию облекся еси, Церковь святую, яко Невесту Христову, страданьями доблесне укреплял еси. Моли о нас Христа Бога, святителю Дамиане. Величаем тя, святителю отче Дамиане, и чтим святые страдания твоя, яже за Христа претерпел еси.

Тропарь cвященномученику Николаю Богословскому

Земли Карельстей новое украшение Добрый пастырю словесных овец, Подвигом страдания за Веру просиявый, Велие дерзновение пред Богом стяжал еси. Отче священномучениче Николае, Моли Христа Бога спастися душам нашим.

Кондак cвященномученику Николаю Богословскому

В годину лютую к пастырству призванный, В церкви святыя Екатерины подвизался еси, Множество душ к покаянию и спасению приведый, Клевету богоборческую отринул еси. За Христа пострадав даже до крове, Священномучениче Николае, Ныне усердно молися о всех нас.

Тропарь священномученику Василию Надеждину

Кротким нравом Христовым измлада украшенный, заповеди Божия возлюбив всею душею и всем сердцем, явился еси пастве твоей пастырь добрый, якоже и Бог Спас наш, душу твою полагаяй за овцы твоя. Моли Человеколюбца Бога, отче священномучениче Василие, спастися душам нашим.

Кондак священномученику Василию Надеждину

О славе Божией и вере православной ревнуя, отче священномучениче Василие, священническое служение на земли достойно совершил еси, с радостию и благодарением Престолу Божию предстоя и паству твою наставляя. Незлобив сый и кроток, пред мучители явился еси адамант твердый, и славя Христа, из узилища мрачнаго в вожделенныя горния обители отшел еси. Темже ныне, в лице святых мучеников Триединаго Бога воспевая, огради нас, любовию тебе чтущих, молитвами твоими.