Тропарь преподобного Илариона Великого
Слез твоих теченьми пустыни безплодное возделал еси/ и, иже из глубины воздыханьми, во сто трудов уплодоносил еси,/ и был еси светильник вселенней,/ сияя чудесы, Иларионе, отче наш:/ моли Христа Бога спастися душам нашим.
Ин тропарь преподобного Илариона Великого
Яко иноков утверждение, наставник же граждан пустынных,/ и чудотворец благодатию Великому Антонию подобяся,/ помощник в страстех бедствующим неотступен, Иларионе отче наш,/ моли за чтущия святую память твою.
Кондак преподобного Илариона Великого
Яко светильника незаходимаго умнаго тя Солнца,/ сошедшеся днесь, восхваляем в песнех,/ возсиял бо еси сущим во тьме неведения,/ вся возводя к Божественней высоте, Иларионе./ Темже вопием:// радуйся, отче, всех постников основание.
Тропарь святителю Илариону, епископу Меглинскому
Чудо явився извещения, / делы возсиял еси добродетелей Божиих, / монашествующих лики упасл еси, / архиерейская седалища изчистил еси, / еретическаго же нападания не усумневся, / церкви Христовы воздвигл еси, / преподобие Иларионе, / умер, яко спя, / тело же твое цело и нетленно соблюдено бысть, / и подает цельбы болящим от различных недуг, / и демоны прогоняет, / сего ради молим тя: / моли спастися душам нашим.
Тропарь преподобного Илариона, схимника Печерского, в Дальних пещерах
Воистину достойне наречен был еси Иларион,/ тихостен бо и кроток нрав по имени твоему имел еси, блаженне,/ имже кроткому Господу Иисусу благоугодив,/ молися Ему о нас рабех твоих.
Кондак преподобного Илариона, схимника Печерского, в Дальних пещерах
Великий Ангельский образ иноческаго чина святую схиму яко прием,/ и второе отрицание суетнаго мира сего яко сотворь,/ тщался еси всеми образы, преподобне Иларионе,/ обещание делом исполнити/ и образу святому приличие пожити,/ тем тя чтим и ублажаем.
Тропарь преподобного Илариона Псковоезерского, Гдовского
В молитвах бодрствуя,/ пресветлый храм Духа Святаго был еси,/ темже и чудотворец предивный явился еси,/ преподобне отче наш Иларионе./ О нас моли Христа Бога/ светом Божественнаго познания просветити ны/ и спасти души наша.
Кондак преподобному Илариону Псковоезерскому чудотворцу
Чистотою душевною божественно вооружився, и непрестанныя молитвы, яко копие вручив крепко, пробол еси бесовская ополчения, Иларионе отче наш, моли непрестанно о всех нас.
Величание преподобному Илариону Псковоезерскому чудотворцу
Ублажаем тя, преподобне отче наш Иларионе, и чтим святую память твою, наставниче монахов и собеседниче ангелов.
Тропарь священномученику Дамиану, архиепископу Курскому и Обоянскому
От юности Христа возлюбил оси, святителю Дамиане, к тебе, яко скорому молитвеннику и помощнику, милостиво припадаем и усердно молим: защити землю Русскую и спаси души наша.
Кондак священномученику Дамиану, архиепископу Курскому и Обоянскому
Святительскую благодатию облекся еси, Церковь святую, яко Невесту Христову, страданьями доблесне укреплял еси. Моли о нас Христа Бога, святителю Дамиане. Величаем тя, святителю отче Дамиане, и чтим святые страдания твоя, яже за Христа претерпел еси.
