Тропарь мученику Луппу
Мученик Твой, Господи, Луппе во страдании своем венец прият нетленный от Тебе, Бога нашего; имеяй бо крепость Твою, мучителей низложи, сокруши и демонов немощныя дерзости. Того молитвами спаси души наша.
Кондак мученику Луппу
Звезда светлая явился еси непрелестная мирови, Солнца Христа возвещающи, зарями твоими, страстотерпче Луппе, и прелесть погасил еси всю, нам же подаеши свет, моляся непрестанно о всех нас.
Тропарь преподобному Феофилу Печерскому, архиепископу Новгородскому, в Дальних пещерах почивающему
Правило веры и образ кротости, и воздержания известный учитель Христову стаду воистинну был еси, уча е выну смирению, не мудрствовати еже высокая, сего ради стяжал, яже желаше, отче святителю Феофиле, моли Христа Бога спастися душам нашим.
Кондак преподобному Феофилу Печерскому, архиепископу Новгородскому, в Дальних пещерах почивающему
Яко воистину, по имени твоему житие, ты, Боголюбезне святителю Феофиле и преподобне, соблюл еси, явися тебе Христос Спас, обещая ти живот вечный и Царствие Свое, в немже днесь ликуя, не забуди нас, рабов твоих.
Тропарь трясения
Призираяй на землю и творяй ю трястися,/ избави ны страшнаго труса прещения, Христе Боже наш,/ и низпосли нам богатыя милости Твоя// молитвами Богородицы, и спаси ны
Кондак трясения
Избави труса тяжкаго всех нас, Господи,/ и язвы нестерпимыя грех ради наших,/ пощади, Господи, православныя люди Твоя,/ яже стяжал еси Твоею Кровию, Владыко,/ и град не предаждь в погибель трусом страшным,/ иного бо, разве Тебе, Бога не вемы,/ и воззови поющим:// Аз есмь с вами, и никтоже на вы.
Тропарь великомученика Димитрия Солунского
Велика обрете в бедах тя поборника вселенная, страстотерпче,/ языки побеждающа./ Якоже убо Лиеву низложил еси гордыню,/ и на подвиг дерзновенна сотворив Нестора,/ тако, святе Димитрие,/ Христу Богу молися// даровати нам велию милость.
Кондак великомученика Димитрия Солунского
Кровей твоих струями, Димитрие,/ Церковь Бог обагри,/ давый тебе крепость непобедимую/ и соблюдая град твой невредим,// того бо еси утверждение.
Величание великомученику Димитрию Солунскому
Величаем тя, страстотерпче святый Димитрие, и чтим честная страдания твоя, яже за Христа претерпел еси.
