Загрузка...

Календарь Молитвослов Библия

Тропари, кондаки и величания - 16 ноября 2025

Тропарь мучеников
Мученицы Твои, Господи,/ во страданиих своих венцы прияша нетленныя от Тебе, Бога нашего,/ имуще бо крепость Твою,/ мучителей низложиша,/ сокрушиша и демонов немощныя дерзости:/ тех молитвами// спаси души наша.
Кондак мучеников
Божественная, мудре, непорочно тайноводил еси,/ жертва приятна был еси, богоблаженне,/ Христову бо пил еси чашу славно, святе Акепсимо,/ со страдальцы твоими,// моляся непрестанно о всех нас.
Тропарь великомученику Георгию Победоносцу

Яко пленных свободитель/ и нищих защититель,/ немощствующих врач,/ православных поборниче,/ победоносче, великомучениче Георгие,/ моли Христа Бога// спастися душам нашим.

Тропарь великомученику Георгию, ради освящения храма его

Днесь блажат тя мира концы,/ Божественных чудес исполншеся,/ и земля радуется, напившися крове твоей./ Христоименитии же людие града Киева/ освящением Божественнаго храма твоего радостию возвеселишася,/ страстотерпче Георгие,/ сосуде избранный Святаго Духа, угодниче Христов./ Егоже моли/ с верою и мольбою приходящим во святый твой храм/ дати очищение грехов,// умирити мир и спасти души наша.

Кондак великомученику Георгию Победоносцу

Возделан от Бога,/ показался еси благочестия делатель честнейший,/ добродетелей рукояти собрав себе:/ сеяв бо в слезах, веселием жнеши,/ страдальчествовав же кровию, Христа приял еси,/ молитвами, святе, твоими всем подаеши// прегрешений прощение.

Ин тропарь великомученику Георгию Победоносцу

Подвигом добрым подвизался еси,/ страстотерпче Христов,/ верою и мучителей обличил еси нечестие,/ жертва же благоприятна Богу принеслся еси./ Темже и венец приял еси победы/ и молитвами, святе, твоими всем подавши// прегрешений прощение.

Кондак великомученику Георгию Победоносцу

К возбранному и скорому заступлению Твоему прибегше, вернии,/ молим избавитися, страстотерпче Христов,/ от соблазн вражиих воспевающим тя,/ и всяких бед, и озлоблений, да зовем:// радуйся, мучениче Георгие.

Кондак великомученику Георгию, ради освящения храма его

Божественнаго и венценоснаго великомученика Христова Георгия,/ на враги победу вземшаго одоления,/ сошедшеся верою во освященный храм, восхвалим,/ егоже благоволи Бог создати во имя его,// Един во святых почиваяй.

Тропарь священномученику Косме Петриченко

Космо преславне, священномучениче Христов, / в годину гонения креста пастырскаго не уклонивыйся / ниже священнаго служения своего отвергшийся, / в узилище и на судищи безбожничестем / твердым во исповедании Христове пребыл еси, / ныне же на Небесех венцем мученичества украшенный, / моли Христа Пастыреначальника // помиловатися душам нашим.

Кондак священномученику Косме Петриченко

Воспоим ныне святаго пресвитера Косму, / иже в земли Саратовстей явленнаго новаго Небеснаго светильника, / верных души неленостно упасшаго / егда волцы хищнии тщахуся расхитити я. / Темже и Христос его в обители райския всели / яко преславна священномученика, // и ходатая о душах наших.