Молитвы - 18 ноября 2025
О, всеблаженне святый священномучениче святителю отче наш Иоанне, правды Божия поборниче и святыя православныя веры Христовой защитниче, хулителей Святыя Церкве обличителю, врагов прогонителю, обидимым покровителю и всех верных христиан теплый предстателю. Ты всею душею от юности заповеди Христовы возлюбил еси. И во дни гонения лютаго на веру Православную, яко истинный пастырь явился еси, крестный путь прошед: поругание, заточение, оклеветание претерпевый и тако мученический венец восприял еси, обретши благодать Господу молитися за ны. Вемы, яко ты, предстоя Престолу Вседержителя, имаши велие дерзновение в молитвах пред Господем. И ныне смиренно припадаем и усердно молимся: о, скорый заступниче наш, святителю священномучениче отче Иоанне, услыши нас грешных и недостойных чад твоих: умоли Всемилостиваго Господа и Пречистую Его Матерь Пресвятую Богородицу веру православную соблюсти, Святую нашу Церковь укрепити в единстве мира и любви, отпадшия от Святыя Церкве паки возвратити, страну нашу Латвийскую в мире, христианских добродетелех и благоденствии сохранити. Помози нам и разум наш питати не суетною мудростию человеческою, но смиренным познанием воли Божия. О, святый угодниче Божий, не презри нас молящихся тебе: не токмо от бед и скорбей избавления просим, но силы и твердости, великодушия и любве, дабы претерпети оныя напасти восстающия на ны. Испроси нам неослабное терпение до конца жития нашего, мир с Господем и грехов наших прощение. Ей, святый священномучениче, моли Господа Бога и Спаса нашего Иисуса Христа Сына Божия избавитися нам от всякаго зла и сохранити храм сей, и град, и страну нашу, и люди благочестно чтущия тя от всякия напасти, от болезней, глада, потопа, огня, меча, нашествия иноплеменников и междоусобныя брани, от клеветы и всякаго злаго обстояния. Молитвами твоими святыми рассеянныя собери, заблудшия на путь правый настави, старость поддержи, юныя вразуми, младенцы воспитай и всех нас с любовию почитающих тя утверди, да пребудем в любве друг ко другу, единомысленно исповедуя Отца и Сына и Святаго Духа, Троицу Единосущную и Нераздельную, и тако да сподобимся Небеснаго Царствия, идеже славится Пречестное и Великолепое Имя Пресвятой и Живоначальной и Нераздельной Троицы. Аминь.
Мучениче святый, епископе Лаврентие! Молим тя мы, недостойные чады твои, на грешней и многострадальней земле Российской пребывающие, на коей и ты страдания и мучения претерпел еси ради Христа Бога нашего! Спаси души наша, утверди души наша во спасительных делах. Моли Господа Бога нашего удалити от нас искушения мира сего грешного, моли Его даровати нам силы и обстояния для исполнения заповедей Его и повелений! Молим тя, святый мучениче Лаврентие, помощи во спасении душ и телес наших, сродников наших и всех христиан Российских.
О, вели́кий и пречу́дный уго́дниче Христо́в, священному́чениче Серафи́ме! Приими́ ны́не на́шу смире́нную песнь благодаре́ния и умоли́ Вседержи́теля Бо́га в Неразде́льней Тро́ице прославля́емаго низпосла́ти нам мир и благоде́нствие, да сохрани́тся от разоре́ния держа́ва на́ша. Любо́вию и му́дростию твое́ю лю́ди росси́йстии к едине́нию собо́рному приведи́ и от ересе́й и раско́лов огради́. Си́лою хода́тайства твоего́ терпе́ние в ско́рбех и боле́знех нам низпосли́. О, всехва́льный святи́телю Христо́в! Испроси́ у Всеми́лостиваго Бо́га пода́ти нам пре́жде конца́ покая́ние, да сподо́бимся с тобо́ю зре́ти лица́ Его́ добро́ту неизрече́нную, воспева́юще Отца́ и Сы́на и Свята́го Ду́ха во ве́ки. Ами́нь.
О священномучениче святителю отче Анатолие! К тебе, молитвеннику теплому и пред Богом предстателю усердно притекаем. В лютую годину гонений и испытаний земли нашея, внегда безбожныя врази предаша смерти верныя рабы Божия и храмы святыя сокрушиша, явил тя Господь Церкве своея аки столп непоколебим и людем Божиим пастыря добра, душу свою за овцы полагающа и волки душепагубныя далече отгоняюща. Ныне убо призри на нас, со умиленною душею и сокрушенным сердцем тебе призывающих. Крепость бо наша в нас оскуде и вражия ловления и сети окружиша нас. Молися за нас, да не погибнем до конца со беззаконьми нашими, но да обратит нас Господь на стезю покаяния и спасения, да простит нам вся согрешения наша и ниспошлет мир на грады и веси наша, избавит нас от нашествия иноплеменников, междоусобныя брани и всяких раздоров и нестроений. Утверди, священномучениче, веру и благочестие во всех чадах Православныя Церкве, испроси нам от Господа мужества дар, да явимся наследницы Царствия Небеснаго, сохраняя верность до конца жизни нашея Господу Богу и Спасу нашему Иисусу Христу. Ему же подобает всякая слава, честь и поклонение, со Отцем и Святым Духом, ныне и присно, и во веки веков. Аминь.
О священномучениче и исповедниче Христов Владимире! Услыши слезныя молитвы чад твоих и воздыхания, сердцем сокрушенным и смиренным приносимая. Се бо беззаконии омрачихомся и того ради бедами, яко тучами, обложихомся. Но ты, святе Владимире, понеси, яко сильный, немощи наша, не отлучайся от нас духом, да не разлучимся в конец от любве Божия. Призри милостивно на предстоящия и молящияся пред святою иконою твоею и вся прошения их во благое исполни. Веруем бо, яко твоих страданий ради за отечество и люди российския велие дерзновение ко Господу имаши. Егоже умоли, да укрепит ны в Православии и единомыслии, и непоколебимом даже до смерти исповедании веры Христовы, страну нашу да спасет от междоусобныя брани, пастырем нашим да подаст духовное трезвение и ревность о спасении пасомых, правителем же суд и правду, обидимым заступление, недугующим душ и телес исцеление. Мы же, грешнии, твоим предстательством укрепляеми, восхвалим Господа Иисуса Христа, Емуже слава подобает, честь и поклонение, со Безначальным Его Отцем и Пресвятым Духом, ныне и присно и во веки веков. Аминь.
О, предивный святителю, богомудрый и всесвятый отче наш священномучениче Вениамине!
К тебе ныне прибегаем верою и любовию чтущии тя, похвалы сия приносяще от всего сердца и помышления. Молим тя прилежно, страстотерпче святый, не забуди ны к тебе усердно притекающих: утверди нас в вере святей православней, научи нас всегда творити заповеди
Божия, исцели болезни душевныя и телесныя, буди нам покровителем и прибежищем в скорбех и напастех, заступи ны от враг видимых и невидимых, да и мы богоугодне прешедше поприще сея жизни, твоим предстательством и богоприятными молитвами будем наследницы
Царствия Божия и сподобимся с тобою предстояти Престолу Царя Славы,поклоняяся Ему и воспевая во веки веков.Аминь.
О святии славнии и добропобеднии новомученицы и исповедницы земли Белоградския: архипастырие и пастырие, монашествующии и мирстии, во всяцем роде и звании добре подвиг свой совершившии и веру Христову даже до кончины соблюдшии!
Вы в годину гонений лютых и братоубийственныя брани, постигшую страну нашу от безбожников и отступников, на неправедных судилищах, во всяческих обстояниих и пленениих, темничных заточениих и пропастех земных, явили есте образы непоколебимыя веры, терпения, кротости и упования на волю Божию. От страданий же и крове вашея, яко от семене добраго, вера и Церковь Христова возрастают. Вемы бо, яко ныне в одеждех белых у Престола Небеснаго предстоите и нам во служении и трудах благодатно содействуете.
Память вашу соборне почитающе, прилежно молим: испросите убо у Всемогущаго Владыки земному Отечеству нашему мир, благоденствие и процветание, веры православныя утверждение, ересей и расколов низложение, архипастырем, пастырем и служителем Церкви — благодатней помощи к достойному служению, еще же и дар прозрения и рассуждения духовнаго; власть предержащим — мудрое правление, христолюбивому воинству — сил духовных и телесных укрепление, всему же народу Божию — вся яже ко спасению прошения, да молитвами Пресвятыя Богородицы, силою Честнаго и Животворящаго Креста, предстательством честных Небесных Сил Бесплотных, святых славных и всехвальных апостолов, добропобедных мучеников, преподобных и богоносных отец и всех святых достойни будем в день Праведнаго Суда деснаго стояния пред Престолом Триединаго Божества – Отца и Сына и Святаго Духа. Аминь.
Святый новомучениче святителю Никодиме, дивный пастырю и доблестный воине Христов! Ты всею душею от юности заповеди Божии возлюбил еси. Неленостно словесам Христовой истины внимая, и иным многим добрый наставник был еси. Темже Господь яви тя преемника апостолом Своим. И во дни гонения лютаго на веру Православную яко истинный пастырь явился еси; крестный путь со паствою своею прошед, ссылки, заточения и страдания смиренно претерпевый и тако венец мученический восприявый, обрете благодать молитися за ны. И ныне, о ходатаю наш пред Престолом Царя славы, испроси у Него веру отеческую утвердити, Церковь святую от ересей и расколов оградити, верных укрепити, заблудших обратити, многострадальное Отечество наше умирити и от врагов ненаветно сохранити, да молитвами твоими укрепляеми, избавимся от козней лукаваго, избегнем от всякия беды и напасти и тако на земли благочестно поживше, жизни вечныя на Небеси сподобимся, идеже вкупе со Пречистою Госпожею Девою Богородицею, сонмом преподобных и богоносных отец Костромскаго края покровителей и всеми святыми прославим в Троице славимаго Бога Отца и Сына и Святаго Духа во веки веков. Аминь.
О, пресвитере и служителю Божий, отче святый Петре, избранниче и пастырю Христов! Ты измлада Бога искренно возлюбил еси, душу Храмом Святаго Духа соделал еси изрядно, всего себе, яко жертву непорочну, Спасу Христу предал еси до последнего твоего исхода. Ей, праведниче Петре, от древних святынь Печерския Лавры, яко от полноводныя реки познанию истин наученный, ты тяжкий и тернистый путь от Бога восприял еси во спасение свое и свидетельство пред миром лукавым, от негоже поношения жестокая понесл еси, имя Божие непрестанно исповедуя. Пастырь дивный в земле Владимирстей на радость и утешение явился еси, дары Божия людем страждущим показуя. Отовсюду в убогую твою весь за помощию шедшим болящий и недужнии, врачевство велие от тебе имея. Темже и мы, недостойнии и грешнии чада твоя, дивящеся твоему пред Богом дерзновению, егоже восприял еси за чистоту души своея, взываем к тебе сице: испроси благостояние Церкви Российстей, в мори житейском обуреваемей, Отечеству нашему мир и обновление духовное, нам же утверждение и преспеяние в вере, Христианскую кончину и Божие милосердие на Страшнем Суде Христовом, идеже праведницы возсияют яко солнце, с нимиже да прославим вечно в Троице певаемаго Бога, Отца и Сына и Святаго Духа. Аминь.