Тропари, кондаки и величания - 18 ноября 2025

И нравом причастник, и престолом наместник апостолом быв, деяние обрел еси Богодухновенне, в видения восход: сего ради слово истины исправляя, и веры ради пострадал еси даже до крове, священномучениче Иоанне, моли Христа Бога, спастися душам нашим.

Во святителех благочестно пожив, и служения путь прошед, идольския угасил еси жертвы, и поборник быв твоему стаду Богомудре. Темже тя почитающе, тайно вопием ти: от бед избави ны присно твоими мольбами, отче наш Иоанне.

Величаем тя, святый священномучениче Иоанне, и чтим святую память твою; ты бо молиши за нас Христа Бога нашего.

По вся дни умервщляем был еси Бога ради,/ святителю и исповедниче Христов Агафангеле,/ во время безбожных гонений лютых/ попечение о Церкви Русской от Патриарха Тихона прияв,/ коварные козни слуг диавола разорил еси/ и корабль церковный мудре управил еси/ силою возлюбившего тя Господа,/ Его же моли даровати нам мир и велию милость.

От младенческих лет Богом избранный, / на служение Святей Церкви призван был еси, / овцы словесныя стада Христова добре упасл еси, / за веру Православную гонение претерпел еси. / Исповедниче святителю Агафангеле, / моли о нас Бога, до конца в вере истинней пребывати, // пастырю наш добрый.

Земли Ярославския небесный покровителю, / Церкве Русския красото и славо, / святителю Агафангеле богомудре, / Православныя веры учителю, / святых ея догматов хранителю, / о пастве российстей усердный попечителю. / Предстани в помощь нам, празднующим святую память твою, / моли милостивано Бога // Церковь Христову в мире соблюсти и спасти души наша.

Столпе непоколебимый веры Православныя, / святителю Агафангеле богомудре, / узы темничныя, тесноты и скорби претерпевый, / от искушений тяжких паству охранил еси, / мир церковный соблюл еси. // И ныне защити Церковь Русскую от нападений вражиих.

Божиим смотрением к святительскому служению/ святым патриархом Тихоном призванный,/ стаду Христову явился еси страж неусыпный/ и защитник небоязненный,/ священномучениче Петре,/ жестокая заточения и дальная изгнания,/ страдание и смерть от богоборцев претерпел еси,/ венец мученический прияв,/ на Небеси ныне радуешися./ Моли милостиваго Бога,/ да сохранит Церковь нашу от нестроений,/ единомыслие и мир людем Своим дарует// и спасет души наша.

Первопрестольницы Российстии,/ истиннии хранителие апостольских преданий,/ столпи непоколебимии, православия наставницы,/ Петре, Алексие, Ионо, Филиппе и Ермогене,/ Владыку всех молите/ мир вселенней даровати// и душам нашим велию милость.

Дух мирен и кроток стяжав,/ твердое упование на милосердие Божие имея,/ блюститель верный Церкве Российския/ и исповедник Христов явился еси,/ священномучениче Петре,/ присный о нас пред Богом предстателю// и молитвенниче о душах наших.

Во святителех благочестно пожисте/ и люди к богоразумию настависте,/ и добре Богу угодисте,/ сего ради от Него нетлением/ и чудесы прославистеся,// яко ученицы Божия благодати.

Святительства благодатью украшенный, ни на един же день оставите паству свою восхотел еси, юже вручи тебе Пастыреначальник Христос, Емуже до уз темничных и смерти, взем крест, последовал еси, венцем мученическим на небесах венчался еси, священномучениче Лаврентие отче наш, моли Христа Бога спастися душам нашим.

В годину трудную и скорбную крест свой не оставляя нес, егоже вручи тебе Пастыреначальник Христос, Емуже до темницы и смерти последовал еси, венцем мученическим на небесах венчался еси, Священномучениче Лаврентие отче наш, молися Пресвятой Троице паству Нижегородскую в правоверии соблюсти и обитель твою Печерскую сохранити даже до скончания века.

Величаем, величаем Тя, священномучениче отче Лаврентие, и чтим святую память Твою, Ты бо молиши за нас Христа Бога нашего.

Мученик Христовых полком причтостеся,/ добре храбрствовавшим,/ светло подвизавшеся, Галактионе славне,/ с честною сопружницею и сострадавшею тебе Епистимиею,// Единому Богу непрестанно молитеся о всех нас.

Земли Михайловский украшение,/ Церкве Святыя светильниче/ за веру Христову пострадал еси,/ священную одежду омочив в крови/ священномученике Гаврииле,/ молися прилежно ко Господу/ купно с тобою пострадавшими,/ да страну нашу Российскую в мире сохранит/ и спасет души наша.

Якоже солнце светозарное,/ возсия днесь память твоя святителю и исповедниче, Кирилле, / лучами благодати озаряя верных сердца, / к прославлению дивнаго во святых своих Бога, / даровавшего тебе крепость во исповедании и терпение в скорбех, / не премолчи о нас, угодниче Христов, / и избави нас от всякаго зла, / Церковь Русскую сохрани от раздоров и нестроений, / мир мирови испроси // и душам нашим велию милость.

Столп и жертва Церкве Христовы отче быв, / сию непоколебиму от искушений лукавого премудро соблюл еси,/и козни вражия твердым умом разорил еси, / и единою Церковь апостольскую проповедал еси, / Кирилле блаженне, святителей Российских похвало, // моли спастися душам нашим.

Преподобному Сергию от юности последуя, / отче богомудре Крониде, / веру во Святую Троицу стяжал еси / и даже в старости мастите до крове сохранил еси. / Темже и мы, чада твоя, любовию вопием ти: / слава Давшему ти силу терпения, / слава Увенчавшему тя яко мученика, / слава Спа­сающему тобою души наша.

Яко верный ученик преподобнаго Сергия, / послушанием, смирением и молитвою / душу твою очистил еси, Крониде приснопамятне, / и Божиим промышлением во игумена обители Троицкия / достойно поставлен был еси. / Во дни же гонения лютаго / за Христа и вверенную ти братию / яко мученик пострадал еси. / Сего ради ныне, предстоя Святей Троице, / моли еже Лавре Сергиевой утвержденней быти / и спастися ду­шам нашим.

Воинство Царя Небеснаго/ паче земнаго возлюбив,/ служитель пламенный Святыя Троицы явился еси,/ наставления Кронштадтскаго пастыря в сердце своем слагая,/ данная ти от Бога многообразная дарования/ к пользе народа Божия приумножил еси,/ учитель благочестия/ и поборник единства церковнаго быв,/ пострадати даже до крове сподобился еси,/ священномучениче Серафиме,/ моли Христа Бога// спастися душам нашим.

Саровскому чудотворцу тезоименит быв,/ теплую любовь к нему имел еси,/ писаньми твоими подвиги и чудеса того миру возвестив,/ верныя к его прославлению подвигл еси/ и благодарственнаго посещения/ самаго преподобнаго сподобился еси./ С нимже ныне, священномучениче Серафиме,/ в Небесных чертозех водворяяся,/ моли Христа Бога// серафимския радости нам причастником быти.

Во святителях благочестно пожил еси, и мучения путь скончав, богоборцев ярость посрамил еси, поборник Христову стаду был еси, богомудре. Темже тя почитаем ныне, вопиюще: священномучениче Анатолие, моли Христа Бога спастися душам нашим.

Апостолов сопрестольниче и святителей украшение, православным щит и утверждение был еси, просвещая безбожия нощь глубокую. Сего ради явился еси священнострадалец за Христа. От бед избави нас твоими молитвами, священномучениче Анатолие.

Святое житие твое/ украсив венцем мучения,/ возшел еси, радуяся,Ї к небесным обителем./ И ныне, предстоя Святей Троице,/ священномучениче Василие,/ моли за град Твой,/ и вся люди, совершающия память Твою.

Елеем милости Христовой всяку душу уврачевав,/ и растерзав яко паучину козни велиаровы,/ копием Слова Божия диавола умертвил еси, святе,/ и прославился еси в Царствии Небеснем,/ отче священнейший.

И нравом причастник, / и престолом наместник Апостолом быв, / деяние обрел еси, Богодухновенне, / в видения восход, / сего ради слово истины исправляя, / веры ради пострадал еси даже до крове, / священномучениче Сильвестре, / моли Христа Бога / спастися душам нашим.

Днесь восхваляем тя, Церкве Православныя светильниче и земли Уфимския украшение, пастырю предивный и истинныя веры проповедниче, ревнителю о благе церковном пречудный, пострадав бо ради веры мужески, высоту нам смиренномудрия показа, зриши Господа в небесех светлейше. Тем же в вышних венцем славы украшен, вся люди в Православии утвердил еси, иноверныя просвещая и чудную Богоматерь славя, святителю отче Симоне, моли Христа Бога о спасении душ наших.

Днесь, вернии, духовно торжествующе в празднице святителя Симона, всем нам показавшаго путь в небесныя обители, по стопам Владыки Христа узким путем шедшаго, всем притекающим к тебе в бедах и скорбех скорый помощниче, тем же Господеви молися, даровати душам нашим мир и велию милость.

Земли нашея Белоградския / новомученицы и исповедницы: / святителие Никодиме, Онуфрие и Антоние, / с вами же – иерее, диакони и миряне благочестивии, / в житии своем светом Христовым просиявшии, / за Негоже добре страдавшии и венчавшиися, / и ныне нас, во трудех и службах сущих, / предстательством своим вразумляющии и укрепляющии / ко возрождению и возвышению Православия! / Христа Бога молите / мир и благоденствие Отечеству нашему даровати / и душам нашим — велию милость.

Избранных святителей и мучеников Божиих / достойнии сонаследницы, / яко приявшии благодать победительную, / нам, ныне во странствии сущим / премудрость и силу от Господа испросите, / да благодарственно к вам взываем: / радуйтеся, земли Белоградския похвало и утверждение!

Костромскаго края украшение, / новомучениче святителю Никодиме, / веру Православную твердо исповедуя, / от безбожных неправедно осужден быв, / в заточении многая страдания претерпев, / венец мученический восприял еси. / Ныне же предстоя Престолу Божию / со Пречистою Богородицею и всеми святыми / усердно Христу молися / даровати нам веры отеческия утверждение, // мир и велию милость.

Мужественный Российский исповедниче, / истинный подвижниче благочестия / священномучениче Никодиме, / избранниче Божия Матере днесь светло прославляется. / Мы же дерзновенно тебе возопиим: // моли Христа Бога спасти души наша.

Первоверховному соименнаго пастыря/ утешителя скорбящих, целителя немощных, / Хвалу и утешение наше днесь любовию восхвалим вернии/. Сей бо есть целитель доблий// и молитвенник о душах наших.