Тропари, кондаки и величания - 23 ноября 2025
Яко пленных свободитель/ и нищих защититель,/ немощствующих врач,/ православных поборниче,/ победоносче, великомучениче Георгие,/ моли Христа Бога// спастися душам нашим.
Днесь блажат тя мира концы,/ Божественных чудес исполншеся,/ и земля радуется, напившися крове твоей./ Христоименитии же людие града Киева/ освящением Божественнаго храма твоего радостию возвеселишася,/ страстотерпче Георгие,/ сосуде избранный Святаго Духа, угодниче Христов./ Егоже моли/ с верою и мольбою приходящим во святый твой храм/ дати очищение грехов,// умирити мир и спасти души наша.
Возделан от Бога,/ показался еси благочестия делатель честнейший,/ добродетелей рукояти собрав себе:/ сеяв бо в слезах, веселием жнеши,/ страдальчествовав же кровию, Христа приял еси,/ молитвами, святе, твоими всем подаеши// прегрешений прощение.
Подвигом добрым подвизался еси,/ страстотерпче Христов,/ верою и мучителей обличил еси нечестие,/ жертва же благоприятна Богу принеслся еси./ Темже и венец приял еси победы/ и молитвами, святе, твоими всем подавши// прегрешений прощение.
К возбранному и скорому заступлению Твоему прибегше, вернии,/ молим избавитися, страстотерпче Христов,/ от соблазн вражиих воспевающим тя,/ и всяких бед, и озлоблений, да зовем:// радуйся, мучениче Георгие.
Божественнаго и венценоснаго великомученика Христова Георгия,/ на враги победу вземшаго одоления,/ сошедшеся верою во освященный храм, восхвалим,/ егоже благоволи Бог создати во имя его,// Един во святых почиваяй.
Удом усекновение терпел еси/ и огненную лютую муку, мучениче,/ подвигся, всеславне,/ венцем яве увязеся нетленным, преблаженне,/ Престолу же предстоиши Святыя Троицы,/ Юже помоли, да спасет ны,/ мучениче Оресте,/ верою поющим тя.
Светильник всесветлый во граде Херсоне явился еси, пастырю добрый, священномучениче Прокопие. Любовь и милосердие в сердцах верных насаждая, твердо стояти во исповедании веры Православныя призывал еси. Темже со пресвитером Иоанном за Христа пострадал еси, и ныне купно с ним на небеси престолу Божию предстоя, моли Милостиваго Бога отечество наше в Православии и благочестии утвердити, мир Церкви даровати и душам нашим велию милость.
Во святителях благочестно пожив, и мучения путь прошед, безбожия силу побеждая, поборник быв Херсонстей пастве, богомудре. Темже тя почитающе, тако вопием ти: от бед избави нас присно твоими мольбами, отче священномучениче Прокопие.