Тропари, кондаки и величания - 25 ноября 2025
Тропарь блаженного Иоанна Власатого
Явился еси во граде яко в пустыни,/ в смиренномудрии, чистоте и в трудех, и подвизех, и в терпении мнозе, преблаженне отче Иоанне./ Взем бо Крест Христов последова Ему/ и бе в молитвах и псалмопении день и нощь,/ иноязычнаго речения о спасении всего мира христианскаго рода/ и преселился еси к Невечернему Свету./ Ныне же ко гробу Твоему вернии приходящий,/ моляся Господеви, Богородице и Предтечи, приемлют исцеления молитвами твоими./ Но присно за ны молися, блаженне отче Иоанне, спастися душам нашим.
Ин тропарь блаженного Иоанна Власатого
Явился еси во граде, яко в пустыни,/ смиреномудрием и чистотою,/ и взем крест Христов последова Ему/ в трудех и подвизех, и в терпении мнозе, преблаженне отче Иоанне./ И ныне моли о нас совершающих память твою,/ и усердно притекающих к раце мощей твоих,/ избавитися от бед, и душам нашим подати велию милость.
Кондак блаженного Иоанна Власатого
Христовою любовию уязвися, отче Иоанне блаженне,/ вышния красоты желая,/ земная же вся презре и ни во чтоже вмени./ И на земли ангельское житие препроводи,/ в вечный покой достиже,/ идеже глас празднущих,/ с нимиже молися за ны./ И душам нашим прощение,/ и телесем исцеление даруй.
Ин кондак блаженного Иоанна Власатого
Христовою любовию уязвися отче Иоанне блаженне,/ вышния красоты желая,/ земная же вся презре и ни вочтоже вмени,/ и на земли ангельское житие имея,/ преселился еси в вечный покой,/ идеже предстоя Христу Богу/ моли спастися нам и всему христианскому роду яко да зовем ти:/ радуйся преблаженне отче Иоанне.
Тропарь святителя Иоанна Милостивого
В терпении твоем стяжал еси мзду твою, отче преподобне,/ в молитвах непрестанно терпевый,/ нищия возлюбивый и сия удовливый,/ но молися Христу Богу, Иоанне милостиве, блаженне,// спастися душам нашим.
Кондак святителя Иоанна Милостивого
Богатство твое расточил еси убогим/ и Небесное богатство ныне восприял еси,/ Иоанне всемудре,/ сего ради вси тя почитаем,/ совершающе память твою,// милостыни о тезоимените!
Тропарь преподобному Нилу постнику
Слез твоих теченьми пустыни безплодное возделал еси, и иже из глубины воздыханьми во сто трудов уплодоносил еси, и был еси светильник вселенней, сияя чудесы, Ниле отче наш, моли Христа Бога спастися душам нашим.
Кондак преподобному Нилу постнику
Хврастная страстей, яже от телесе востания, сечительно, Ниле блаженне, во бденной твоей ссекл еси молитве, но, яко имея дерзновение ко Господу, от всяких мя бед свободи, да зову ти: радуйся, отче всемирный.
Ин кондак преподобному Нилу постнику
Божественною любовию возгоревся, всеблаженне,/ оставил еси иже в житии молвы/ и постных селитву в горе стяжа,/ от неямсе, вшед в мрак незаходный,/ приемлеши, яко древле Богоносец, Богоначертанная писмена,/ имиже к Божественней добродетели наставляеми, весело вопием ти:/ радуйся, отче Ниле, постником добротворение.
Тропарь в честь обретения мощей преподобного Нила Мироточивого
Монашествовав богоугодно в Горе Афонстей,/ в молитвах и постех Бога взыскал еси/ и стал еси приятелище чистое Духа,/ облиставая верным добродетелей лучи,/ имиже осияваеши, Ниле, вопиющих тебе:/ слава прославльшему тя Богу,/ слава Венчавшему тя,/ слава Действующему тобою всем исцеления.
Кондак в честь обретения мощей преподобного Нила Мироточивого
Еже от земли явление/ священных мощей твоих, Ниле,/ совозсия сиянию Креста,/ того бо вожделел еси тепле от младенства,/ кости твоя, сораспявшияся Христови,/ воскресшему яко превечному Богу,/ Того пришла благодать.