Тропарь святителям Московским
Первопрестольницы Российстии,/ истиннии хранителие апостольских преданий,/ столпи непоколебимии, православия наставницы,/ Петре, Алексие, Ионо, Филиппе и Ермогене,/ Владыку всех молите/ мир вселенней даровати// и душам нашим велию милость.
Тропарь святителя Филарета
Духа Святаго благодать стяжав,/ богомудре святителю Филарете,/ истину и правду разумом просвещенным/ людем проповедал еси,/ мир и милость сердцем умиленным/ страждущим явил еси,/ яко учитель веры и страж неусыпный/ паству российскую жезлом правости сохранил еси./ Сего ради дерзновение ко Христу Богу имея,/ моли даровати Церкви утверждение// и душам нашим спасение.
Кондак святителям Московским
Во святителех благочестно пожисте/ и люди к богоразумию настависте,/ и добре Богу угодисте,/ сего ради от Него нетлением/ и чудесы прославистеся,// яко ученицы Божия благодати.
Кондак святителя Филарета
Яко истинный подражатель преподобнаго Сергия,/ добродетель измлада возлюбил еси, богоблаженне Филарете,/ яко пастырь праведный и исповедник непорочный,/ по святем преставлении/ от безбожных поругание и поношения приял еси,/ Бог же знаменьми и чудесы тя прослави// и заступника Церкве нашея яви.
Величание
Величаем вас,/ святителие Христовы,/ Петре, Алексие, Ионо, Филиппе и Ермогене,/ и чтим святую память вашу,/ вы бо молите за нас// Христа Бога нашего.
Кондак мученику Варлааму
Явился еси преудивлен крепостию, всесожжения ливан благовонен себе принесл еси, жертву Христу, и венец почести приим, Варлааме, присно моли за ны, страдальче.
Ин тропарь преподобному Варлааму Индийскому
Слез твоих источники пустыни безплодное возделал еси,/ и иже из глубины воздыханьми во сто трудов уплодоносил еси,/ и был еси светильник вселенныя, сияя чудесы, Варлааме отче наш,/ моли Христа Бога спастися душам нашим.
Тропарь преподобного Иоасафа, царевича Индийского
От духовнаго наставника научився,/ царю Иоасафе, Бога познати,/ Крещением же просветився,/ люди к вере обратил еси,/ и отцу твоему от купели приемник быв,/ царство оставив, пустыню достигл еси/ и в ней трудолюбие подвизался еси./ Моли Христа Бога со учителем твоим Варлаамом/ спастися душам нашим.
Кондак преподобного Иоасафа, царевича Индийского
Ведый твое из младенства благое изволение, Иоасафе, един сердцеведец Бог,/ и от царствия земнаго в монашеское пребывание приведый тя,/ великому Варлааму последовати сподоби./ С нимже и ныне горний Иерусалим всесветлый отечество имея,/ желаемыя доброты красно наслаждался Святыя Троицы,/ молим тя, царская красото,/ поминай нас, верою чтущия тя.
Кондак преподобного Иоасафа, царевича Индийского
Ведый твое от младенства благое изволение, Иоасафе,/ един сердцеведец Бог,/ ибо от царствия земнаго во иноческое пребывание приведый тя,/ и великому Варлааму воследовати сподоби тя,/ и со Ангелы с ним в Неизреченном Свете водворися;/ с нимже Святей Троице предстоя,/ молим тя, царское красото,/ поминай нас, верою празднующих память твою.
Ин тропарь преподобного Иоасафа, царевича Индийского
Из чрева матерня/ прекрасное вселение бысть Святаго Духа,/ преславне Иоасафе,/ и от блаженнаго Варлаама безценный бисер, Христа,/ в сердце своем приял еси,/ и Божественным Крещением Индию просветил еси,/ отеческое же нечестие исправль,/ приведе его от тьмы ко свету Богоразумия/ и, оставив тленное на земли царство,/ пустыню достиг и своего учителя,/ темже на Небесех от Живоначальныя Троицы/ венцем царским венчася,/ моли о нас, чтущих честную твою память.
Тропарь преподобного Варлаама, 1-го игумена Печерского, в Ближних пещерах
Мира красная и славу его оставль,/ притекл еси в пещеру,/ идеже от силы преуспевая в силу,/ был еси вождь Христова стада, всеславне Варлааме,/ еже яко упас добре, упаси и нас, молим тя,/ сохраняя от всех зол, да тя ублажаем.
Кондак преподобного Варлаама, игумена Печерского, в Ближних пещерах
Отеческаго прещения не устрашился еси,/ ласканиям того не повинулся еси,/ ниже лестию низложился еси женскою, всечестне Варлааме,/ но непобедимь от тех пребыл еси,/ надеяся на Господа своего, Емуже молися о душах наших.
Тропарь преподобномученика Адриана Пошехонского
Христову мученику Адриану тезоименит был еси, преподобне,/ многия труды подъял еси в жизни временней,/ обитель иноческую созидая в пустыни,/ идеже пострадал еси даже до крове от злых разбойник/ и мученическую смерть от них приял еси,/ Адриане славне,/ чудес благодатию обогатився,/ предстоиши всех Царю, Христу Богу,/ Егоже моли спастися душам нашим.
Ин тропарь преподобномученика Адриана Пошехонского
Аще и смертию нуждною умерл еси,/ аще и смертная сень внезапу найде на тя,/ обаче, яко деву мудрую, душу твою обрете Христос/ и в чертог Свой Небесный введе,/ и со святыми всели,/ чудесы возвеличив имя твое,/ Адриане мучениче преподобне,/ Емуже молитву о нас сотвори,/ память твою почитающих.
Кондак преподобномученика Адриана Пошехонского
Житейския молвы избежав, преподобне,/ в пустыню вселился еси,/ и, тамо обитель иноков возградив,/ последи от разбойник мученически пострадал еси,/ и ныне сияеши нетлением и чудесы,/ Адриане многострадальна,/ молитвенниче о душах наших.
Кондак преподобномученика Адриана Пошехонского
Христа ради доблественне претерпел еси/ и венец нетления от Него восприял еси страдания своего,/ приходящим же с верою к тебе подавши цельбы,/ о преподобномучениче Адриане, приснопамятне,/ молитвенниче о душах наших.
Тропарь священномученику Михаилу Дмитреву
Слова Божия проповедниче, Православия защитниче, немощей душевных и телесных врачу, пастырю добрый, верность Христу сохранивый, священномучениче отче наш Михаиле, моли Христа Бога, да спасет ны, яко Человеколюбец.
Кондак священномученику Михаилу Дмитреву
Подвигом пастырским подвизаяся, возлюбил еси Христа даже до смерти, тем же удостоен был еси от Него венца, священномучениче Михаиле, приими моление наше и сотвори молитву о всех нас, творящих любовию память твою.
Тропарь преподобномученику Иоасафу (Крымзину)
Многотрудное иноческое житие измлада избравый и благое иго Христово возлюбивый, прещения слуг велиаровых мужески презрел еси, верность Владыце всех показуя. Темже ныне в невечернем свете присно наслаждаешися, к сонму святых Божиих сопричтенный. Моли о нас Бога, преподобне Иоасафе, отче наш.
Кондак преподобномученику Иоасафу (Крымзину)
Яко крин благоуханный, в вертограде святыя великомученицы Екатерины процвел еси, отче славный Иоасафе. Добродетельми многими украсился еси и изшел еси на подвиг, славя Христа Бога. Лютыя страсти претерпев и велие дерзновение пред Господом стяжав, присно молися о душах наших.
