Акафисты - 06 декабря 2025
Кондак 1
Избранный чудотворче и изрядный угодниче Христов, многоцелебный источниче и молитвенниче о душах наших, святителю отче Митрофане, яко имеяй дерзновение ко Господу, от всяких нас бед свободи зовущих:
Радуйся, Митрофане, великий и преславный чудотворче.
Икос 1
Ангел земный и человек небесный был еси, святителю отче Митрофане: вперив бо ум в Божественная, временная и земная пренебрегл еси, темже и вселися в тя Пресвятый Дух, Егоже благодатию светло украшен еси. Сего ради тебе, на Небеси и на земли прославленному, вопием сице:
Радуйся, яко чистотою и святынею Ангелом уподобился еси; радуйся, яко постом и бдением безстрастия достигл еси.
Радуйся, светильниче Божественнаго света; радуйся, молитв благовонное кадило.
Радуйся, верных непреложное утверждение; радуйся, неверных богомудренное обличение.
Радуйся, христиан непостыдное прибежище; радуйся, благочестия стено необоримая.
Радуйся, крепкое кормило Церкве Христовы; радуйся, непоколебимый столпе Православия.
Радуйся, апостольских преданий верный хранителю; радуйся, Таин Божиих истинный строителю.
Радуйся, Митрофане, великий и преславный чудотворче.
Кондак 2
Видяще от святых мощей твоих приснотекущий источник исцелений, благоговения и радости исполнени, благодарим Бога, дивно прославляющаго святыя Своя, вопиюще Ему: Аллилуиа.
Икос 2
Разумом, просвещенным свыше, вразумляя заблуждших, поборник был еси истинныя Христовы Церкве, егда в царствующем граде Москве суемудреннии лжеучителие на соборе святительском отверзоша нечестивая уста своя на ея хуление. Мы же от мысленных волков избавльшеся, верно взываем ти:
Радуйся, цевнице Духа Святаго, бряцающая славу Божию во спасение человеком; радуйся, громе, сокрушаяй еретическое злочестие.
Радуйся, молние, попаляющая плевелы неверия; радуйся, ясное зерцало апостольских преданий.
Радуйся, немолчный благовестниче велений Христовых; радуйся, верный наставниче богомудрия.
Радуйся, монашествующих славо; радуйся, архиереев божественное удобрение.
Радуйся, златозарное светило, просвещающее землю Русскую; радуйся, надежный ходатаю нам Царствия Небеснаго.
Радуйся, яко твоим к Богу молением от ада свобождаемся; радуйся, яко твоим предстательством райския жизни сподобляемся.
Радуйся, Митрофане, великий и преславный чудотворче.
Кондак 3
Силе Вышняго чудодействующей, никтоже притекаяй к тебе, преблаженне отче, отходит тощь: недугующим бо явился еси исцеление, слепым прозрение, хромым утверждение, и вси благовернии людие, скораго тя помощника стяжавше, радостно Богу воспевают: Аллилуиа.
Икос 3
Имеяй в сердце своем огнь любве Божественныя, спасения ради душ человеческих пастырски подвизался еси, богомудре, противу козней диавольских и победительным оружием креста разсекал еси сети лукаваго, яко паучину. Темже приими от нас песнь сию:
Радуйся, рабе Божий, благий и верный; радуйся, достойный делателю вертограда Христова.
Радуйся, учителю смирения и целомудрия; радуйся, образе кротости и послушания.
Радуйся, мужу желаний; радуйся, проповедниче чудес Божиих.
Радуйся, наставниче дел добрых; радуйся, твердое ограждение Христовы Церкве.
Радуйся, огневидный столпе, наставляяй на путь спасения; радуйся, светозарный светильниче, верныя просвещаяй.
Радуйся, неизчерпаемый сосуде благодати Христовы; радуйся, чистое приятелище Духа Святаго.
Радуйся, Митрофане, великий и преславный чудотворче.
Кондак 4
Бурю мирскаго жития и тяжелоносныя страстей волны прешед, обрел еси тихое пристанище и, в пустыню вселився, неленостно поработал еси Христу во мнозе долготерпении. Отнюдуже руководил еси в Царствие Божие и духовная чада своя, научив их едиными усты и единым сердцем пети Богу: Аллилуиа.
Икос 4
Слышаще дивныя о Бозе труды твоя, святителю отче Митрофане, прихождаху к тебе издалеча жаждущии глаголов живота вечнаго: понеже ты учил и творил еси, наставлял словом и житием своим. Сего ради любовию вопием ти:
Радуйся, апостолов преемниче; радуйся, святителей сопрестольниче.
Радуйся, преподобных собеседниче; радуйся, праведных украшение.
Радуйся, венче воздержания; радуйся, благосеннолиственное древо, потоками райскими воспитанное.
Радуйся, безпомощных спасительное призрение; радуйся, цвете нетления.
Радуйся, яко отчуждением временных благ стяжал еси блаженство нищеты духовныя; радуйся, яко самовольным обнищанием обрел еси сокровище благ вечных.
Радуйся, яко во глубину смирения приникл еси; радуйся, яко на высоту безстрастия возшел еси.
Радуйся, Митрофане, великий и преславный чудотворче.
Кондак 5
Боготечней звезде, путеводившей древле волхвов к праведному Солнцу, подобен был еси, всехвальне отче, сам восходя благодатию Божиею от силы в силу, и приводя с собою ко Христу Богу всех ищущих спасения. Темже и мы, немерцающим сиянием славы твоея озаряеми, согласно вопием Ему: Аллилуиа.
Икос 5
Видевше в тебе воронежстии людие перваго архипастыря, яко Ангела, знамение небесныя благодати носяща, возрадовашася радостию неизглаголанною: ты же, добре внимая себе и всему стаду, в немже тя Дух Святый постави епископа, пасл еси усердно Церковь Господа и Бога, яко слово воздати хотя. Сего ради ублажаем тя, отче Митрофане, зовуще:
Радуйся, человече Божий, преподобием, аки поясом златым, препоясанный; радуйся, друже Христов, святительством, аки бисером драгим, преукрашенный.
Радуйся, воине Христов непобедимый; радуйся, страже дома Божия неусыпный.
Радуйся, восхождения в сердце своем к Небеси положивый; радуйся, словесныя овцы Христовы на живоносных пажитях воспитавый.
Радуйся, яко не попустил еси душетленному зверю расхитити стадо твое; радуйся, яко от Небеснаго Пастыреначальника праведное воздаяние приял еси.
Радуйся, возлюбивый благолепие дому Божия; радуйся, в самом себе храм Триипостасному Божеству уготовавый.
Радуйся, яко во умерщвленном телеси ризою нетления одеян еси; радуйся, яко из гроба зарею безсмертия нас осияваеши.
Радуйся, Митрофане, великий и преславный чудотворче.
Кондак 6
Словес евангельских, еже не скрывати себе сокровища на земли, верный блюститель показался еси, всеблаженне Митрофане, егда достояние свое мудре расточил еси, снабдевая убогих и пособствуя благоверному императору Петру в сооружении кораблей на побеждение неверных агарян, не ведущих пети: Аллилуиа.
Икос 6
Возсия царству православному благотворный свет великих добродетелей твоих, святителю отче Митрофане, о нихже благодаряще Отца Небеснаго, к тебе яко к присному о нас молитвеннику, взываем сице:
Радуйся, наставниче целомудрия; радуйся, смирения Христова истинный подражателю.
Радуйся, олтаря Господня благоговейный служителю; радуйся, святителей украшение.
Радуйся, иноческаго равноангельнаго жития ревнителю; радуйся, безмолвия древних богоносных отец подражателю.
Радуйся, милости струе неизсякаемая; радуйся, благоутробия хранилище неоскудное.
Радуйся, сирых благонадежное пристанище; радуйся, вдовиц скорое заступление.
Радуйся, множество душ уневестивый Христу; радуйся, купно с ними пребываяй в радости Господа твоего.
Радуйся, Митрофане, великий и преславный чудотворче.
Кондак 7
Хотящу некогда благоверному императору Петру беседовати с тобою, призван был еси во двор царский; егда же внезапу узрел окрест его изваяния языческая, абие возвратился еси вспять, не убоявся прещения царева, и готов был еси душу свою положити паче, неже растлити мысленныя очи сердца своего неподобным видением, научая верных единому живому Богу пети: Аллилуиа.
Икос 7
Новаго тя по благочестии ревнителя познав благоверный царь и, видя небоязненное твое на смерть изволение, повеле суетная изваяния низринути. Мы же святому дерзновению твоему чудящеся, вопием:
Радуйся, непреклонный исповедниче Православия; радуйся, ревностный защитниче благочестия.
Радуйся, священнотаинниче благодати; радуйся, велегласный проповедниче покаяния.
Радуйся, апостолов немолчная уста; радуйся, Церкве непоколебимый столпе.
Радуйся, пастырю добрый; радуйся, яко непричастен явился еси лицеприятию.
Радуйся, яко истину не обинуяся свидетельствовал еси; радуйся, яко твоим пособием сокрушаются козни вражия.
Радуйся, яко всем верным воспоминание твое пресладко; радуйся, яко всей Церкви Христовой имя твое пречестно.
Радуйся, Митрофане, великий и преславный чудотворче.
Кондак 8
Странное и преславное чудо благодати небесныя является ныне во очию всех верных: долготерпеливый и многомилостивый Господь не прогневался на ны до конца за беззакония наша, но, помянув щедроты Своя, дарова нам тебе, досточудне отче, заступника изрядна, тако вознесе рог спасения нашего, да выну поем Ему: Аллилуиа.
Икос 8
Весь еси в вышних, но и нижних не оставляеши, святителю отче Митрофане, присно со Христом царствуеши, и о нас грешных молитвы к Нему возсылаеши: не точию бо припадающих к цельбоносным мощем твоим, но и далече отстоящих, призывающих же всечестное имя твое, предстательством твоим соблюдаеши от всякаго зла. Темже во умилении зовем ти:
Радуйся, прибежище наше во всех скорбех; радуйся, скорый помощниче всех в бедах сущих.
Радуйся, целителю болезней душевных вкупе и телесных; радуйся, на невидимые враги наша сильный поборниче.
Радуйся, посетителю в немощи лежащих; радуйся, утешителю в бедах сущих.
Радуйся, яко тобою престает рыдание; радуйся, яко тобою подается радость.
Радуйся, яко Христу доблественно последовал еси; радуйся, яко Сладчайшему Иисусу до конца послужил еси.
Радуйся, яко наслаждаешися лицезрения Божия; радуйся, яко сподобился еси зрети невечерний день Царствия Его.
Радуйся, Митрофане, великий и преславный чудотворче.
Кондак 9
Всякия скорби и труды доблественно претерпел еси, шествуя по пути спасения до маститыя старости, облечен во всеоружие Божие, во плоти аки безплотен, умерщвляя страсти и сокрушая наветы миродержителя тьмы века сего. Темже Небесным сопричислен силам, купно с ними воспеваеши Богу: Аллилуиа.
Икос 9
Витии многовещаннии недоумеют изобразити обилия любве твоея, еюже, отходя к Творцу, преисполнен был еси к чадом твоим о Господе: восхотев бо и по отшествии своем присно поучати их, яко живый, завещал еси им вся потребная ко спасению. Сего ради из глубины сердец вопием ти:
Радуйся, благочестно течение скончавый; радуйся, веру соблюдый всецелу.
Радуйся, оружием благоволения Божия венчанный на земли; радуйся, венцем нетления украшенный на Небеси.
Радуйся, долу величием чудес блистающий; радуйся, горе лучами Трисолнечнаго Света осияваемый.
Радуйся, яко в пресветлых райских обителех вселяешися; радуйся, яко лицем к лицу Божественнаго света причащаешися.
Радуйся, яко с небесных высот на мольбы наша призираеши; радуйся, яко в сониих и видениих во благо нам являешися.
Радуйся, яко молитвами твоими от вечныя смерти свобождаемся; радуйся, яко предстательством твоим безконечныя жизни сподобляемся.
Радуйся, Митрофане, великий и преславный чудотворче.
Кондак 10
Иже всем человеком хотяй спастися и в разум истины приити, Господь и Бог наш Иисус Христос явил нам нетленное тело твое на земли, яко живоносную купель, врачующую всяку болезнь и всяку язю в людех. Темже благодарственно вопием Ему: Аллилуиа.
Икос 10
Стена еси спасения прибегающим к тебе, святителю Митрофане, и в бываемых от тебе знамениих, исповедающих величие Божие. Сего ради, ущедрени твоим чудодейственным о нас ко Христу Богу ходатайством, вопием ти:
Радуйся, царей благочестивых поборниче; радуйся, архиереев православных укрепление.
Радуйся, царства православнаго защитниче; радуйся, Церкви святей утверждение.
Радуйся, прежде смерти умертвивый плоть свою; радуйся, предвкусивый жизнь вечную, прежде внития в селения райская.
Радуйся, умерый миру прежде кончины твоея; радуйся, воскресый духом во Христе, прежде успения твоего.
Радуйся, яко от обители земныя во Обитель Небесную преселился еси; радуйся, яко от Обители Небесныя во обители земныя благотворя нисходиши.
Радуйся, яко и по отшествии твоем с нами пребываеши; радуйся, яко и по умертвии твоем умерщвленныя грехми души молитвами твоими оживляеши.
Радуйся, Митрофане, великий и преславный чудотворче.
Кондак 11
Пение, приносимое ныне, аще бы и превыше человеческаго было, не довлело бы к славословию Бога, даровавшаго тебе благодать исцелений. Сего ради недоумеюще благохвалити его по достоянию, смиренномудренно вопием: Аллилуиа.
Икос 11
Светоподательна светильника, просвещающаго души наша верою, видим тебе, преблаженне отче, пред Престолом Божиим стояща, и твоим блистанием озаряеми, зовем ти таковая:
Радуйся, пастырю предивный; радуйся, учителю премудрый.
Радуйся, столпе веры непоколебимый; радуйся, насадителю благих.
Радуйся, чистоты селение; радуйся, печальных утешение.
Радуйся, сирых питателю; радуйся, обидимых предстателю.
Радуйся, премудрости Божия приятелище; радуйся, источниче неизчерпаемыя благодати исцелений.
Радуйся, провозвестниче Божественных велений; радуйся, сокровище милосердия Божия неистощимое.
Радуйся, Митрофане, великий и преславный чудотворче.
Кондак 12
Благодать, свыше ти данную познавше, благоговейно лобызаем святолепное изображение всечестнаго лица твоего, еже благоволил еси дивно явити нам. Темже благодарственно вопием Христу Богу нашему: Аллилуиа.
Икос 12
Поюще твое к Богу отшествие, святителю Митрофане, почитаем священную память твою, величаем ревность по Бозе, хвалим долготерпение, славим незлобие и ублажаем кончину твою: на смертнем бо одре возлежа, желанием возжелал облещися в великий ангельский образ, наречен был Макарием, блаженства тезоименитым, блажен быв воистину, яко Царствие Небесное наследовал еси. Темже молящеся усердно, о еже сподобитися и нам неосужденно предстати на Страшное судище Христово, взываем ти:
Радуйся, у Престола Божия теплый о нас предстателю; радуйся, мужу желаний, прославивший Бога в телеси и в души своей.
Радуйся, добропобедный воине Царя Небеснаго; радуйся, вождю премудрый ратующим противу сил адовых.
Радуйся, яко с горящим светильником сретил еси Христа; радуйся, яко от Него благодать исцелений приял еси.
Радуйся, яко благоволением Пресвятыя Богородицы возвеличен еси; радуйся, яко во светлостех святых пребываеши.
Радуйся, яко со пророки и апостолы ликовствуеши; радуйся, яко со святители и мученики прославлен еси.
Радуйся, яко с преподобными и праведными веселишися; радуйся, яко со всеми избранными Божиими присно торжествуеши.
Радуйся, Митрофане, великий и преславный чудотворче.
Кондак 13
О великий и пречудный отче Митрофане, приими благоутробно сие малое моление наше, и твоим благоприятным ходатайством избави нас от всех враг видимых и невидимых, от всякия напасти и скорби, от напрасныя смерти и будущия муки, да сподобимся с тобою и со всеми святыми во веки воспевати Богу Спасителю нашему: Аллилуиа.
Этот кондак читается трижды, затем 1-й икос «Ангел земный...» и 1-й кондак «Избранный чудотворче...».
Молитва первая
О святителю отче Митрофане, се мы грешнии, нетлением честных мощей твоих и многими благодеяньми, чудесно содеянными и содеваемыми тобою, уверившеся, исповедуем, яко имаши велию благодать у Господа Бога нашего, и, всесмиренно ко твоему благосердию припадающе, тебе молимся сице: моли о нас Христа Бога нашего, да низпослет всем чтущим святую память твою и усердно к тебе прибегающим богатыя милости Своя; да утвердит во святей Своей Православней Церкви живый дух правыя веры и благочестия, дух ведения и любве, дух мира и радости о Дусе Святе, да вся чада ея, чиста суща от мирских искушений и плотских похотей и злаго действия злых духов, духом и истиною покланяются Ему, и усердно о соблюдении заповедей Его ко спасению душ своих да потщатся. Пастырем ея да даст Господь святую ревность попечения о спасении людей, во еже неверующия просветити, неведущия наставити, сомнящияся вразумити, отпадшия от Православныя Церкве к ней возвратити, верующия в вере соблюсти, грешныя на покаяние подвигнути, кающияся утешити и во исправлении жизни утвердити, и тако вся люди ко уготованному вечному Царству святых Его привести. Умоли Господа, угодниче Христов: верных рабов Его, в скорби и печали день и нощь вопиющих к Нему, многоболезенный вопль да услышит и да изведет от погибели живот наш. Всем же в державе людем да дарует благий Бог наш мир, тишину, безмятежие и изобилие плодов земных, паче же ко исполнению заповедей Его тщание неленостное; и да избавит царствующия грады, град сей и вся иныя грады и веси от глада, труса, потопа, огня, меча, нашествия иноплеменных, междоусобныя брани, смертоносныя язвы и от всякаго зла. Ей, святителю Божий, да устроиши молитвами твоими вся благая душам и телесем нашим; да и мы прославим в душах и телесех наших Господа и Бога нашего, Иисуса Христа, Емуже со Отцем и Святым Духом слава и держава во веки веков. Аминь.
Молитва вторая
О святителю отче Митрофане! Приими сие малое моление от нас, грешных раб Божиих (имена), к тебе прибегающих, и теплым твоим предстательством умоли Господа и Бога нашего, Иисуса Христа, яко да призрев на ны милостивно, подаст нам согрешений наших вольных и невольных прощение и избавит нас от бед, печалей, скорби и болезней душевных и телесных, обдержащих нас; да подаст вся на пользу настоящаго жития нашего потребная; да дарует нам скончати житие сие привременное в покаянии и да сподобит нас, грешных и недостойных, Небеснаго Царствия Своего, во еже со всеми святыми славити Его безконечное милосердие, со Безначальным Его Отцем и Святым и Животворящим Его Духом, во веки веков. Аминь.
Кондак 1
Избранному воеводе земли Российския, светлому украшению Церкве Православныя, святому благоверному великому князю Александру Невскому, похвальная восписующе, яко верою враги, видимыя же и невидимыя, победившему, и в вере своей, по речению апостолову, добродетель, в добродетели же разум, в разуме же воздержание, в воздержании же терпение, в терпении же благочестие, братолюбие и любовь явившему со умилением и радостию возопиим:
Радуйся, святый благоверный великий княже Александре.
Икос 1
Со Ангелы и всеми святыми предстоиши ныне Христу, блаженно Александре, моляся о любовию чтущих тя: темже, поминающе, яко, измлада Христа возлюбив, к небесным духом прилепился еси, бесплотных подражав житию, ублажаем тя, вопиюще:
Радуйся, корене благочестиваго отрасле пречестная;
Радуйся, благоверия предков наследниче.
Радуйся, добродетелей отца боголюбиваго подражателю;
Радуйся, кротости и благочестия матерняго преемниче.
Радуйся, вождю к Небесем стада своего христолюбиваго;
Радуйся, в житии всех рабов Божиих друже и ревнителей благочестия собеседниче.
Радуйся, преподобных лика богосветлаго сопричастниче;
Радуйся, веры Христовы непобедимый исповедниче.
Радуйся, волею мучениче, сликовствуяй ныне сонму мучеников добропобедному;
Радуйся, христианскаго упования и любве всем нам девственный проповедниче.
Радуйся, уставов и чина церковнаго благолепнаго ревнителю;
Радуйся, верных чад Церкве и угодников Божиих сонаследниче.
Радуйся, святый благоверный великий княже Александре.
Кондак 2
Видевше лепоту лица и телеснаго возраста твоего, новоградстии людие радовахуся и славляху Бога, взирающе на тя: мы же, поминающе светлейшия паче солнца добродетели твоя, блаженне Александре, прославившему тя Господеви поим: Аллилуиа.
Икос 2
Разумел еси, богомудре Александре, яко преходит образ мира сего, едино же есть на потребу человеком, еже благоугодити Господеви: сего ради измлада от любве к миру и яже в мире уклонился еси, вожделев же зде сущими стяжати небесная, яко верный раб Господу во всем житии неленостно послужил еси. Темже вопием ти:
Радуйся, подвижниче веры, угождение Богу паче всего предызбравый;
Радуйся, подобне Аврааму во всем житии непорочно пред Богом поживый.
Радуйся, Исааково послушание показавыи;
Радуйся, путем Иаковля смиренномудрия ходивый.
Радуйся, Иосифову чистоту и целомудрие стяжавый;
Радуйся, Моисееву любовь к людем своим в себе явивый.
Радуйся, якоже Самуил чиста себе от всякаго любостяжания соблюдавый;
Радуйся, кротостию Давидовою враги своя победивый.
Радуйся, Петровой пламенней вере поревновавый;
Радуйся, с Павлом игу Христову себе поработивый.
Радуйся, богомудрие Иоанново подвигом поучения в слове Божием снискавый;
Радуйся, многих святых добродетели в себе совокупивый.
Радуйся, святый благоверный великий княже Александре.
Кондак 3
Силою веры стяжал еси, блаженне Александре, высшее любомудрие, егоже ради, презирая плоть, прилежал еси о души безсмертней: темже ублажающе тя, яко стяжавша ныне безсмертие, вопием прославившему тя Христу: Аллилуиа.
Икос 3
Имеяй всегда пред очима своима Господа, трезвенно пожил еси, блаженне Александре, и вся яже творил еси, творя во славу Божию, угодил еси Богу, Емуже предстоиши ныне с лики от века угодивших: темже радующеся о тебе, зовем ти:
Радуйся, истиннаго трезвения подвижниче;
Радуйся, спасительнаго созерцания любителю.
Радуйся, наставниче наш в подвиге от мира удаления;
Радуйся, стяжателю совершеннаго дара бодрственнаго себе внимания.
Радуйся, всякаго безсловеснаго вожделения твердый противоборниче;
Радуйся, благочестия добрый подвижниче, преуспевый в разуме и деянии.
Радуйся, яко силою молитвы препобедил еси диавольская искушения;
Радуйся, яко себе от греха оградил еси последних воспоминанием.
Радуйся, яко возлюбил еси душею еже о небесных помышление;
Радуйся, яко преуспел еси в неленостных яже к Богу молитвенных предстояниих.
Радуйся, яко все житие свое освящал еси непрестанным Имене Вожия призыванием;
Радуйся, яко угождал еси Господеви всяким благоугождением.
Радуйся, святый благоверный великий княже Александре.
Кондак 4
Бури искушений воздвигоша врази и противу тебе, блаженне Александре. Ты же препобедил еси сия силою благодати Христовы: темже ныне, к тихому пристанищу притек, с лики искушенных в мире, победивших же мир, вопиеши Христу: Аллилуиа.
Икос 4
Слышав Павла, глаголюща: "Всяк подвизаяйся от всех воздержится", вся в уметы вменил еси, блаженне Александре, да Христа приобрящеши: подвигами же отвержения себе и ко благим делом принуждения стяжал еси свободу славы чад Божиих: темже ублажающе тя, вопием ти таковая:
Радуйся, образ отвержения себе нам показавый;
Радуйся, ношению креста в последовании Христу нас научивый.
Радуйся, плоть со страстьми и похотьми ея поправый;
Радуйся, житием твоим суету мира обличивый.
Радуйся, всякое пристрастие земное от себе отгнавый;
Радуйся, разум свой в послушание веры пленивый.
Радуйся, волею своею благое иго заповедей Христовых подъявый;
Радуйся, сердце свое от всякия страсти душевредныя чисто сохранивый.
Радуйся, себе Богу всесовершенне предавый;
Радуйся, чрез все житие свое Богу послуживый.
Радуйся, совершением заповедей любовь к себе Божию стяжавый;
Радуйся, наследие Царствия благоугождением Богу улучивый.
Радуйся, святый благоверный великий княже Александре.
Кондак 5
Боготечною звездою прешел еси в мире, блаженне Александре, блистающ славою и добродетелию: темже ныне сияеши на Небесех славою вечною с лики праведник, с нимиже выну воспеваеши Христу: Аллилуиа.
Икос 5
Видевше тя, блаженне Александре, николиже во бранех побеждаема, всегда же побеждающа, невернии единаго имене твоего устрашахуся, мы же, поминающе исполненное веры мужество твое, ублажаем тя, глаголюще:
Радуйся, доблественный в защиту веры и Церкве воителю;
Радуйся, своея земли мужественный защитителю.
Радуйся, наветов вражиих мудрый разорителю;
Радуйся, мира безпомощных сильный оградителю.
Радуйся, воинства свейскаго на брегах Невских славный победителю;
Радуйся, безопасности всея северныя страны земли Российския охранителю.
Радуйся, злых козней иноверия, подвигших чуждую рать на землю нашу, разрушителю;
Радуйся, законов правды богоукрепляемый утвердителю.
Радуйся, Пскова, отечества святыя Ольги, свободителю;
Радуйся, ненавидевших мира умирителю.
Радуйся, буйства неустроенныя в тыя дни Литвы укротителю;
Радуйся, во всех сих бранех христолюбиваго воинства своего мудрый предводителю.
Радуйся, святый благоверный великий княже Александре.
Кондак 6
Проповедника кротости и терпения явил еси себе, блаженне Александре, посреди преславных побед твоих: темже и стяжал еси сугубый венец от Царя Христа, Емуже предстоиши ныне, вопия: Аллилуиа.
Икос 6
Провозсиял еси, блаженне Александре, паче мужества, терпением твоим, егоже стяжал еси, взирая на Начальника веры и Совершителя Иисуса, Иже вместо предлежащия ему радосте претерпе Крест: темже восхваляюще тя, усердно вопием:
Радуйся, до конца в подвизех служения Богу претерпевый;
Радуйся, терпению Христову верно подражавый.
Радуйся, силу заповеди Христовы, яже о любви ко врагом, премудро уразумевый;
Радуйся, и согрешшим противу тебе избавленным тобою людем любовь истинную показавый.
Радуйся, во искушении от народа своего хитрость лукавого прозревый;
Радуйся, мирным отбытием своим из земли своея злобу врага поправый.
Радуйся, и во всем житии своем ухищрения сатаны проразумевый;
Радуйся, злое благим, по апостолу, выну препобеждавый.
Радуйся, паки, в годину скорби, в помощь оскорбившему тя Новуграду предуспевый;
Радуйся, сего ради пламенную любовь от народа своего себе снискавый.
Радуйся, Божия посещения, болезни и лишения, со упованием терпевый;
Радуйся, сего ради светлый венец от Господа стяжавый.
Радуйся, святый благоверный великий княже Александре.
Кондак 7
Хотяй провозсияти тебе всеми добродетельми, блаженне Александре, Владыка Христос призвал есть тебе к служению людем своим во дни посещения: ты же притяжал еси к терпению смирение, егоже ради ныне превознесен еси, предстоя Богу с песнию: Аллилуиа.
Икос 7
Дивно бе видети, како непобедимый воитель смиренно преклоняет главу свою пред неверными, ихже посла Господь на люди своя ради грех их: дивно же есть и воспомянути непобедимое смирение твое, блаженне Александре, имже и Господеви благоугодил еси, и люди своя спасл еси. Темже благодарно вопием ти:
Радуйся, смирения Господня подражателю;
Радуйся, подобающаго богопоставленным властем почитания учителю.
Радуйся, всякаго превозношения противоборче;
Радуйся, истиннаго послушания подвижниче.
Радуйся, всем нам образе вернаго Богу служения;
Радуйся, начальствующим наставниче в богоприятном людем предстоянии.
Радуйся, подвластных руководителю в богозаповеданном предержащим властем повиновении;
Радуйся, яко многажды ради блага людей своих путьшествовал еси к безбожным, ни во чтоже вменяя яже от них испытания.
Радуйся, яко не устрашился еси, призвав Бога, прийти к Батыеви, исполняя его веление;
Радуйся, яко многащи воспринимал еси на себе страшный ответ о неразумных народа своего востаниих.
Радуйся, яко оградил еси люди твоя от зловреднаго с неверными общения;
Радуйся, яко мудре оградил еси в земли своей отеческия доблести и предания.
Радуйся, святый благоверный великий княже Александре.
Кондак 8
Странническое житие прешел еси на земли, блаженне Александре, не ведый покоя в трудех своих и не имый зде пребывающаго града, но грядущаго взыскуяй: сего ради ныне, блаженне, вселился еси в вечных обителех, выну поя Богу: Аллилуиа.
Икос 8
Всею душею послужив Господу и всем житием своим благоугодив ему, прославился еси благочестием, егоже ради и исповедник явился еси веры Христовы, блаженне Александре: поминающе убо подвиг исповедничества твоего, вопием ти:
Радуйся, злобы неверных не устрашивыйся;
Радуйся, твари паче Создавшаго не послуживый.
Радуйся, солнцу и огню в стане безбожных не поклонивыйся;
Радуйся, веру свою во искушении сохранивый.
Радуйся, велению безбожному не покоривыйся;
Радуйся, твердый проповедник веры пред неверными себе явивый.
Радуйся, с сугубою славою, по исповедании своем, в землю свою возвративыйся;
Радуйся, во всем житии верным вере отцев пребывый.
Радуйся, от лести иноверия премудре уклонивыйся;
Радуйся, лукавство проповедников лжеверия яве обличивый.
Радуйся, твердый защитник правоверия явивыйся;
Радуйся, лжесловесие врагов Православия словом здравым препобедивый.
Радуйся, святый благоверный великий княже Александре.
Кондак 9
Всего себе повинув Богови, яко раб благий и верный послужил еси Ему, блаженне Александре, паче сверстник твоих для земли твоея потрудився: темже и внити сподобился еси в радость Господа своего, Емуже предстоиши ныне, со Ангелы поя: Аллилуиа.
Икос 9
Витийствующий язык не возмогл бы восхвалити дела твоя, блаженне Александре, яже совершил еси, полагая по братии душу свою: смиренно убо поминающе сицевая исправления твоя, умиленную песнь приносим ти, глаголюще:
Радуйся, братолюбия христианскаго приискренний ревнителю;
Радуйся, Моисеевы и Павловы любве ко братии подражателю.
Радуйся, заповедей Христовых яже о любви верный исполнителю;
Радуйся, и всех нас в любви к присным дивный наставниче.
Радуйся, примером своим паче слова явивыйся стязающихся о наследии братии своих примиритель;
Радуйся, о благе народа усердно в житии своем пекийся.
Радуйся, общаго мира во днех своих устроителю;
Радуйся, изгнаннаго страхом нашествий татарских народа своего собирателю.
Радуйся, безпомощных присный защитителю;
Радуйся, нищих и алчущих питателю.
Радуйся, сирых сильный покровителю;
Радуйся, и ныне всех скорбящих и нуждающихся мощный пред Господом предстателю.
Радуйся, святый благоверный великий княже Александре.
Кондак 10
Спасти хотя душу свою, ведый же, яко не имущему любве к Богу никиими же подвигами и добродетельми улучити спасение возможно есть, стяжал еси венец добродетелей, еже есть любовь к Богу, Емуже предстоя ныне, радостно вопиеши: Аллилуиа.
Икос 10
Царя Небеснаго возлюбив от всего сердца твоего, и от всея души твоея, и всею мыслию твоею, принесл еси Ему, блаженне Александре, последи многоразличных приношений веры и усердия, себе самаго в жертву живу, святу, благоугодну: темже ублажающе тя, вопием ти:
Радуйся, в житии своем всеми богоугодными делы Господеви послуживый;
Радуйся, обетами иночества святое житие свое увенчавый.
Радуйся, многи храмы Божий, безбожными раззоренныя, обновивый;
Радуйся, к просиянию подвигов постничества обители святыя созидавый.
Радуйся, подвизающихся измлада в благочестии ради Бога возлюбивый;
Радуйся, ангельский образ и себе чистою душею предызбравый.
Радуйся, в конец жития своего всего себе Богу посвятивый;
Радуйся, приятием схимы, с новым именем Алексия, всесовершенне себе Богу предавый.
Радуйся, обетом девства чистоту сердца своего явивый;
Радуйся, обетом нестяжания высоту духа своего показавый.
Радуйся, обетом послушания всецелое служение свое Единому Богу во веки утвердивый;
Радуйся, к венцу мудраго и благаго князя мзду инока притяжавый.
Радуйся, святый благоверный великий княже Александре.
Кондак 11
Пение погребальное слезами растворяшеся у гроба твоего, блаженне Алексадре; людие твои плакахуся о тебе, солнце земли Русския, в полудни зашедшем, и рыдания прерываху умиленную песнь их к Богу: Аллилуиа.
Икос 11
Свет славы небесныя осия тя вскоре, блаженне Александре, утешая плачущия люди твоя: темже видяще при гробе твоем знамения и чудеса, сынове российстии достойне призываху тя, яко в молитвах предстателя; мы же, понимающе скорое заступление твое, вопием ти:
Радуйся, угодниче Божий, в самом погребении прославление от Бога получивый;
Радуйся, скорый предстателю наш, егоже призываху отцы наши в нуждех и озлоблениих.
Радуйся, в борьбе с татары князю Димитрию Донскому вспоможение явивый;
Радуйся, царю Иоанну и казанцы одоление исходатаивый.
Радуйся, исцеления многоразличныя всем подаваяй;
Радуйся, слепым зрение молитвою твоею возвращаяй.
Радуйся, хромым, припадающим ко гробу твоему, хождение даруяй;
Радуйся, разслабленных неможение врачуяй.
Радуйся, одержимым от бесов свобождение подаваяй;
Радуйся, безнадежных надеждою спасения оживляяй.
Радуйся, в погубльших разум разумение возставляяй;
Радуйся, от гроба твоего многообразныя чудотворения присно источаяй.
Радуйся, святый благоверный великий княже Александре.
Кондак 12
Благодать познавше, живущую в нетленных мощех твоих, людие владимирстии с любовию прихождаху ко святей раце твоей и, радостно лобызающе ю, славляху о тебе Бога, прославляющаго святыя Своя, со умилением вопиюще Ему: Аллилуиа.
Икос 12
Поюще добродетели и чудеса твоя, радостию сретаху и провождаху отцы наши святое тело твое, егда, преселяхуся святыя мощи твоя на новое место покоища в славном святаго Петра граде: и мы ныне, радующеся о небесней славе твоей и обитании нетленных мощей твоих в богоизбранном граде сем со онеми вопием ти:
Радуйся, российский Иосифе, на новое место упокоения преселивыйся;
Радуйся, всех концев земли Российския покровителю.
Радуйся, Петрова града благонадежное утверждение;
Радуйся, тогоже во бранех Небесный защитителю.
Радуйся, северныя столицы неоцененное украшение;
Радуйся, тезоименитыя тебе обители славо и утверждение.
Радуйся, народу русскому здравие же и спасение молитвами твоими подаваяй;
Радуйся, всех упование на тя возложивших, богомудрый учителю.
Радуйся, иноком, яко инок, полезное, примером жизни своея, наставление преподаваяй;
Радуйся, мирским людем, яко в мире потрудивыйся, к добродетелем общежития руководителю.
Радуйся, нетлением своим всем нам надежду воскресения подаваяй;
Радуйся, всех нас в напастех и скорбех поборниче, хранителю и свободителю.
Радуйся, святый благоверный великий княже Александре.
Кондак 13
О святый благоверный великий княже Александре! От благоговейных сердец приносимую ти, аще и недостойную, хвалебную песнь сию, приими от нас, яко усердную жертву сердец, любящих тя и ублажающих святую память твою. Охраняй всех нас молитвами твоими: огради ходатайствы твоими град твой и вся люди земли Российския, да тихое и безмолвное житие поживше в нынешнем веце блаженство вечное наследим и купно с тобою и всеми святыми выну сподобимся воспевати Богу: Аллилуиа.
Этот кондак читается трижды, затем 1-й икос "Со Ангелы и всеми..." и 1-й кондак "Избранному воеводе...".
Молитва первая
Скорый помощниче всех усердно к тебе прибегающих и теплый наш пред Господем предстателю, святый благоверный великий княже Александре! Призри милостивно на ны, недостойныя, многими беззаконии непотребны себе сотворшия, к раце мощей твоих ныне притекающия и из глубины сердца к тебе взывающия- ты в житии своем ревнитель и защитник православныя веры был еси, и нас в ней теплыми твоими к Богу молитвами непоколебимы утверди. Ты великое возложенное на тя служение тщательно проходил еси, и нас твоею помощию пребывати коегождо, в неже призван есть, настави. Ты, победив полки супостатов, от пределов Российских оных отгнал еси, и на нас ополчающихся всех видимых и невидимых врагов низложи. Ты, оставив тленный венец царства земнаго, избрал еси безмолвное житие и ныне, праведно венцем нетленным увенчанный, на Небесех царствуеши, исходатайствуй и нам, смиренно молим тя, житие тихое и безмятежное, и к Вечному Царствию шествие неуклонное твоим предстательством устрой нам. Предстоя же со всеми святыми Престолу Божию, молися о всех православных христианех, да сохранит их Господь Бог Своею благодатию в мире, здравии, долгоденствии и всяком благополучии в должайшая лета, да присно славим и благословим Бога, в Троице Святей славимаго, Отца и Сына и Святаго Духа, ныне и присно и во веки веков. Аминь.
Молитва вторая
О святый благоверный княже Александре! Призри милостивно на ны, недостойныя рабы Божии (имена), исходатайствуй нам житие тихое и безмятежное, и к вечному Царствию шествие неуклонное твоим предстательством устрой нам, да сохранит нас Господь Бог Своею благодатию в мире, здравии, долгоденствии и всяком благополучии в должайшая лета, да присно славим и благословим Бога в Троице Святей славимаго, Отца и Сына и Святаго Духа, ныне и присно, и во веки веков. Аминь.