Акафисты - 07 декабря 2025
Текст утвержден Священным Синодом
Русской Православной Церкви
25 декабря 2012 года
(журнал № 131)
Конда́к 1
Подо́бен: Взбра́нной Воево́де:
Избра́нному от во́инства земна́го в небе́сное,
предстоя́щему Престо́лу Царя́ Сла́вы,
великому́ченику Мерку́рию благогове́йное пе́ние прино́сим:
моли́ся усе́рдно ко Го́споду за лю́ди, почита́ющия
и во умиле́нии воспева́ющия тя:
Ра́дуйся, Мерку́рие, изря́дный уго́дниче Христо́в и во́ине непобеди́мый.
И́кос 1
А́нгел Госпо́день, еще́ язы́чнику ти су́щу, Мерку́рие, предуказа́ твое́ служе́ние ко сла́ве и́мене Бо́жия, егда́ призва́ тя от Арме́нии в Рим и даде́ ти меч на побе́ду, и́мже ди́вная сотвори́л еси́. Сего́ ра́ди приле́жно вопие́м:
Ра́дуйся, сосу́де, Бо́гом избра́нный;
ра́дуйся, десни́цею Бо́жиею незри́мо води́мый.
Ра́дуйся, Сла́вою Бо́жиею прославля́емый;
ра́дуйся, вре́менным ве́чному послужи́вый.
Ра́дуйся, А́нгелы укрепля́емый;
ра́дуйся, в страда́нии вене́ц сла́вы получи́вый.
Ра́дуйся, всели́выйся в черто́ги ми́ра Го́рняго;
ра́дуйся, моли́твенно не оставля́яй ми́ра до́льняго.
Ра́дуйся, Мерку́рие, изря́дный уго́дниче Христо́в и во́ине непобеди́мый.
Конда́к 2
Ви́дя о́ком теле́сным ду́ха безпло́тнаго и уши́ма слы́ша глаго́лы: "Не забу́ди Го́спода Бо́га твоего́, егда́ победи́ши враго́в!", се́рдцем прия́л еси́, Мерку́рие, повеле́ние сие́ а́нгельское и во умиле́нии рекл еси́: Аллилу́ия.
И́кос 2
Разуме́ти тща́щеся толи́кую си́лу твою́, дивля́хуся во́ини, о́крест тебе́ стоя́щии, толи́цей си́ле твое́й, не ве́дуще ору́жия, от А́нгела тебе́ вруче́ннаго; мы же, Ду́хом Святы́м позна́вше си́лу Бо́жию, в тебе́ явле́нную, навыко́хом пе́ти:
Ра́дуйся, меч, вве́ренный Бо́гом, сохрани́вый;
ра́дуйся, зало́г благода́ти в себе́ возрасти́вый.
Ра́дуйся, мече́м а́нгельским полки́ ва́рварския порази́вый;
ра́дуйся, ве́рою пре́лесть и́дольскую низложи́вый.
Ра́дуйся, ра́дости ми́ра сего́ ни во что́же вмени́вый;
ра́дуйся, ве́чней ра́дости себе́ угото́вавый.
Ра́дуйся, си́лу Бо́жию в себе́ яви́вый;
ра́дуйся, повеле́ние а́нгелово испо́лнивый.
Ра́дуйся, Мерку́рие, изря́дный уго́дниче Христо́в и во́ине непобеди́мый.
Конда́к 3
Си́лы Бо́жия в тебе́ не ве́дая, сла́вне Мерку́рие, Де́кий нечести́вый поста́ви тя над во́йском свои́м нача́льствовати: ты же, ни во что вменя́я ми́лости и да́ры его́, в нищете́ духо́вней Исто́чнику ми́лостей вся́ческих и щедро́т взыва́л еси́: Аллилу́ия.
И́кос 3
Име́я А́нгела попече́ние о тебе́, свя́те Мерку́рие, воздвиза́юща тя не то́кмо от сна теле́снаго, но подвиза́юща на бо́дрствование духо́вное и по́прище страда́льческое, благода́рне подъя́л еси́ служе́ние сие́. Сего́ ра́ди вопие́м ти сицева́я:
Ра́дуйся, зре́нием А́нгелов небе́сных почте́нный;
ра́дуйся, попече́нием их не оста́вленный.
Ра́дуйся, ко спасе́нию и́ми побужда́емый;
ра́дуйся, Ду́ха Свята́го хра́ме освяще́нный.
Ра́дуйся, све́том нетле́нным сия́яй;
ра́дуйся, путь к жи́зни ве́чней освеща́яй.
Ра́дуйся, благове́стие Бо́жие прие́мляй;
ра́дуйся, благодаре́ние о нем воздая́й.
Ра́дуйся, Мерку́рие, изря́дный уго́дниче Христо́в и во́ине непобеди́мый.
Конда́к 4
Бу́ря жите́йских смяте́ний не устраши́ тя, до́блий во́ине Христо́в, егда́ воспомяну́л еси́ словеса́ роди́телева: блаже́нни во́ини Царя́ Небе́снаго, и устреми́лся еси́ се́рдцем твои́м в во́инство сие́, отреша́яся от по́честей земны́х, вопия́ Бо́гу: Аллилу́ия.
И́кос 4
Слы́ша вразумле́ние а́нгельское, воспомяну́л еси́ наставле́ние роди́телево, и, умили́вся се́рдцем, рыда́л еси́: "Увы́ мне, гре́шному, ка́ко и́зсше душа́ моя́, не ве́дящи ко́рене богопозна́ния! Ка́ко предста́ну Ти, Бо́же, в час после́дний и сме́ртный, ко́е сло́во изреку́ во оправда́ние гре́шныя души́ моея́?" Мы же, таковы́м покая́нием вразумля́еми, глаго́лем ти:
Ра́дуйся, слеза́ми ду́шу омы́вый;
ра́дуйся, чи́ста себе́ Бо́гу яви́вый.
Ра́дуйся, покая́нию нас науча́яй;
ра́дуйся, ру́це к Бо́гу за ны воздева́яй.
Ра́дуйся, моли́твами твои́ми нас спаса́яй;
ра́дуйся, житие́м твои́м нас вразумля́яй.
Ра́дуйся, о́браз чистоты́ в себе́ яви́вый;
ра́дуйся, Це́рковь Христо́ву украси́вый.
Ра́дуйся, Мерку́рие, изря́дный уго́дниче Христо́в и во́ине непобеди́мый.
Конда́к 5
Звездо́ю богоразу́мия наставля́емь, не прине́сл еси́ же́ртвы богоме́рзкия, жела́я после́довати пути́ Христо́ву и сподо́битися пи́ти ча́шу Его́. Сего́ ра́ди пре́дан, оклеве́тан и зауше́н был еси́, я́коже и Госпо́дь твой, во смире́нии прие́мля сия́ и вопия́: Аллилу́ия.
И́кос 5
Ви́дя тя, долготерпели́ве Мерку́рие, совле́кшася, по словеси́ апо́стольскому, ве́тхаго челове́ка с дея́ньми его́ и обле́кшася чрез очисти́тельная страда́ния в но́ваго, по о́бразу Бо́жию и подо́бию сотворе́ннаго, во умиле́нии пое́м ти:
Ра́дуйся, же́ртву себе́ живу́ю Бо́гу яви́вый;
ра́дуйся, зауше́нием стра́сти грехо́вныя умертви́вый.
Ра́дуйся, кро́вию креще́ние прия́вый;
ра́дуйся, в нем Ду́ха Бо́жия стяжа́вый.
Ра́дуйся, ве́рою житие́ преобрази́вый;
ра́дуйся, ея́ ра́ди страда́ти изво́ливый.
Ра́дуйся, служе́нию любве́ поревнова́вый;
ра́дуйся, наде́ждою ду́шу испо́лнивый.
Ра́дуйся, Мерку́рие, изря́дный уго́дниче Христо́в и во́ине непобеди́мый.
Конда́к 6
Пропове́дника си́лы Бо́жия, я́же в тебе́, не ве́дая, Де́кий безбо́жный ужасе́ся. Мы же, благода́ти Бо́жия тя испо́лнена, я́ко ча́до Бо́жие, испове́дующе, вопие́м Творцу́ на́шему: Аллилу́ия.
И́кос 6
Возсия́ свет в души́ твое́й, страда́льче, егда́, отве́ржену ми́ром, в темни́цу ведо́му и опеча́лену, А́нгел яви́ся ти и глаго́ла: "Мужа́йся! Разреша́яй печа́ли вся́кия Госпо́дь зрит тя!" Мы же, толи́кому о тебе́ попече́нию дивя́щеся, зове́м:
Ра́дуйся, я́ко апо́стол Петр, А́нгелом укрепля́емый;
ра́дуйся, печа́ли вся́кия избавля́емый.
Ра́дуйся, христиани́на себе́ испове́давый;
ра́дуйся, ра́зумом Боже́ственным просвеще́нный.
Ра́дуйся, уз теле́сных разреши́тися возжеле́вый;
ра́дуйся, в ру́це Бо́жии себе́ преда́вый.
Ра́дуйся, Го́спода ве́рный служи́телю;
ра́дуйся, Го́рняго Иерусали́ма жи́телю.
Ра́дуйся, Мерку́рие, изря́дный уго́дниче Христо́в и во́ине непобеди́мый.
Конда́к 7
Хотя́ вразуми́ти нечести́ваго царя́, яви́лся еси́ тому́, великому́чениче, рек: "Исцеле́ние от Го́спода прия́х, да побежду́ тя и отца́ твоего́ диа́вола", – и та́ко глаго́ля, вопия́л еси́ в Тро́ице сла́вимому и покланя́емому Еди́ному Бо́гу: Аллилу́ия.
И́кос 7
Но́вая муче́ния изобре́те тебе́ науча́емый от диа́вола Де́кий нечести́вый: повеле́ истяза́ти тя мече́м и огне́м; ты же, ве́дая, я́ко гони́тель сей не и́мать вла́сти над душе́ю твое́ю, смире́нно претерпе́л еси́ вся, о ни́хже тебе́ пое́м:
Ра́дуйся, до́блестне истяза́ния терпе́вый;
ра́дуйся, а́нгельскую песнь в страда́ниих воспе́вый.
Ра́дуйся, муче́нием вре́менным ве́чнаго изба́вленный;
ра́дуйся, небе́снаго венца́ удосто́енный.
Ра́дуйся, кро́вию му́ченическою пла́мень угаси́вый;
ра́дуйся, темни́цу я́ко черто́г Бо́жий вмени́вый.
Ра́дуйся, Го́спода пред собо́ю зряй;
ра́дуйся, ны́не одесну́ю его́ предстоя́й.
Ра́дуйся, Мерку́рие, изря́дный уго́дниче Христо́в и во́ине непобеди́мый.
Конда́к 8
Стра́нное чу́до зрим тя, му́чениче Мерку́рие, неопа́льна и неврежде́нна стоя́ща, исцеле́нна су́ща, и Христа́ Бо́га и́стинна испове́дающа, и благода́рне взыва́юща Ему́: Аллилу́ия.
И́кос 8
Весь быв подо́бен отроко́м в пе́щи халде́йстей, му́чениче Христо́в, в пла́мени горя́щем неопа́лен пребыва́я и ро́су благода́ти от Го́спода восприи́м, научи́л еси́ нас со умиле́нием воспева́ти си́це:
Ра́дуйся, све́том Ева́нгельским озаре́нный;
ра́дуйся, Враче́м душ и теле́с исцеле́нный.
Ра́дуйся, в му́ченических по́двизех И́стину возвеща́яй;
ра́дуйся, воскресе́ния, по словеси́ Христо́ву, ча́яй.
Ра́дуйся, сла́вен в со́нме святы́х явле́нный;
ра́дуйся, мно́гими ра́нами испещре́нный.
Ра́дуйся, Христо́во благоуха́ние источа́яй;
ра́дуйся, его́же и нас сподобля́яй.
Ра́дуйся, Мерку́рие, изря́дный уго́дниче Христо́в и во́ине непобеди́мый.
Конда́к 9
Вся́кое естество́ ужасе́ся, ви́дя тя, страда́льче, на смерть ведо́ма, смире́нна и незло́бива, проще́ния мучи́телем от Бо́га прося́ща, небе́сных селе́ний дости́гнути жела́юща, во е́же пе́ти: Аллилу́ия.
И́кос 9
Вети́и суему́дреннии ничесо́же изрещи́ возмо́гут о явле́нии тебе́ Творца́ вся́ческих, И́же Сам рече́: "Мерку́рие, прииди́ ко Мне, и Аз упоко́ю тя, приими́ вене́ц по́двига твоего́". Мы же в похвалу́ тебе́ прино́сим:
Ра́дуйся, водо́ю живо́ю напое́нный;
ра́дуйся, доброде́тельми, я́ко би́сером, украше́нный.
Ра́дуйся, главу́ на усече́ние подклони́вый;
ра́дуйся, вене́ц сла́вы прие́мый.
Ра́дуйся, и́дольскую пре́лесть низложи́вый;
ра́дуйся, предста́тельством твои́м нас уте́шивый.
Ра́дуйся, Со́лнца Пра́вды луче́ не угаса́ющая;
ра́дуйся, свеще́ в неразу́мии су́щих просвеща́ющая.
Ра́дуйся, Мерку́рие, изря́дный уго́дниче Христо́в и во́ине непобеди́мый.
Конда́к 10
Спасе́ние дарова́ ти Госпо́дь, во́ине Христо́в непобеди́ме, и возра́довася Це́рковь торжеству́ющая, ви́дящи Го́спода я́ко Отца́ чадолюби́ва, во объя́тия Своя́ прие́мшаго чи́стую ду́шу твою́, и гла́сом ве́лиим возгласи́: Аллилу́ия.
И́кос 10
Сте́ну непоколеби́му воздви́же тя ве́рным Госпо́дь, не то́кмо ду́шу твою́ просла́ви, но и те́ло страда́льческое сла́вою украси́ и облагоуха́, досточу́дне му́чениче. Мы же, Сла́ву Бо́жию ви́дяще на тебе́, зове́м:
Ра́дуйся, кади́ло благоуха́нное;
ра́дуйся, ми́ро драгоце́нное.
Ра́дуйся, бога́тство нетле́нное да́руяй;
ра́дуйся, от нищеты́ избавля́яй.
Ра́дуйся, исцеле́ния оби́льно источа́яй;
ра́дуйся, душе́вных обстоя́ний свобожда́яй.
Ра́дуйся, спаси́тельного терпе́ния о́браз яви́вый;
ра́дуйся, тве́рдому стоя́нию в ве́ре Христо́ве научи́вый.
Ра́дуйся, Мерку́рие, изря́дный уго́дниче Христо́в и во́ине непобеди́мый.
Конда́к 11
Пе́ние моли́твенное принесе́ святи́тель Васи́лий пред ико́ною Пречи́стыя Богоро́дицы, иде́же и ты, я́ко страж вели́чия Ея́, изображе́н был еси́: и а́бие о́браз твой сокры́ся и посе́м с копие́м, кро́вию обагре́нным, па́ки яви́ся. В сем святи́тель Христо́в уразуме́в сверше́ние во́ли Бо́жия о избавле́нии Це́ркве от Иулиа́на отсту́пника, рече́: Аллилу́ия.
И́кос 11
Свет Христо́в возсия́ в Це́ркви святе́й, егда́ чуде́сне повеле́ ти Госпо́дь порази́ти прего́рдаго отсту́пника копие́м твои́м, и та́ко положи́ коне́ц гоне́нием на Це́рковь Свою́ от о́наго. Мы же, сла́вяще смотре́ние Прему́дрости Бо́жия, тебе́ пое́м:
Ра́дуйся, благоче́стием, я́ко мо́лния, блиста́яй;
ра́дуйся, гро́ме, злоче́стие поража́яй.
Ра́дуйся, поклоне́ние тва́ри упраздни́вый;
ра́дуйся, кресто́м побе́ду возвести́вый.
Ра́дуйся, во́ине благознамени́тый;
ра́дуйся, венцено́сче наро́читый.
Ра́дуйся, моли́твам на́шим внима́яй;
ра́дуйся, вся́каго зла избавля́яй.
Ра́дуйся, Мерку́рие, изря́дный уго́дниче Христо́в и во́ине непобеди́мый.
Конда́к 12
Благода́тию Бо́жиею спасы́й ду́шу твою́, страстоте́рпче святы́й, не преста́й и о нас, грехми́ до́лу пове́рженных, возноси́ти моле́ния те́плая к Престо́лу Царя́ ца́рствующих и Го́спода госпо́дствующих, да возмо́жем во сла́ве взыва́ти Ему́:Аллилу́ия.
И́кос 12
Пою́щим твое́ заступле́ние и притека́ющим к тебе́, му́чениче Мерку́рие, предста́тель ве́рный бу́ди и не отве́ржи нас, ны́не моля́щихся тебе́ и из глубины́ души́ взыва́ющих:
Ра́дуйся, Творцу́ вселе́нныя предстоя́й;
ра́дуйся, за лю́ди Бо́га прося́й.
Ра́дуйся, сто́лпе церко́вный, ве́ру утвержда́яй;
ра́дуйся, сове́ты нечести́вых разруша́яй.
Ра́дуйся, све́те, благоче́стие возраща́яй;
ра́дуйся, мглу грехо́вную истребля́яй.
Ра́дуйся, к покая́нию нас призыва́яй;
ра́дуйся, наде́жду на спасе́ние полага́яй.
Ра́дуйся, Мерку́рие, изря́дный уго́дниче Христо́в и во́ине непобеди́мый.
Конда́к 13
О страстоте́рпче до́блий, му́чениче сла́вный, свя́те Мерку́рие! Ны́нешнее на́ше прие́м приноше́ние, не преста́й Го́спода моли́ти, да изба́вит нас твои́м хода́тайством гее́нны о́гненныя и сподо́бит воспева́ти с ли́ки а́нгельскими побе́дную песнь: Аллилу́ия.
Сей конда́к глаго́лется три́жды. И па́ки чте́тся 1-й и́кос и 1-й конда́к.
Моли́тва
О великому́чениче святы́й и до́блий во́ине Христо́в Мерку́рие, страда́нием, кро́вию и сме́ртию свое́ю ве́рность Христу́ и Це́ркви Его́ свиде́тельствовавый и сего́ ра́ди вене́ц жи́зни от Него́ прие́мый! Ны́не в хвале́бных пе́снех тебе́ прославля́юще, смире́нно к тебе́ припа́даем и усе́рдно мо́лим: предста́тель бу́ди пред Бо́гом о душа́х на́ших неусы́пный, умоли́ Влады́ку Го́спода, да сохрани́т Святу́ю Це́рковь Свою́ и всех чад ея́ в сою́зе любве́ и единомы́слии, да утверди́тся мир и безмяте́жие в лю́дех, во оте́честве на́шем живу́щих, да позна́ют вси, я́ко Христо́с есть Путь, И́стина и Жи́знь, и да прии́дут к Нему́ вси тружда́ющиися и обремене́ннии, и упоко́ит их. О вели́кий уго́дниче Бо́жий! Кре́пкое стоя́ние в ве́ре на́шей да́руй нам, благода́тную по́мощь нам низпосли́, да ми́рное, ти́хое и богоуго́дное житие́ поживе́м в ве́це сем и досто́йно с тобо́ю в день о́ный восхва́лим Пресвяту́ю Тро́ицу, Отца́ и Сы́на и Свята́го Ду́ха, во ве́ки веко́в.Ами́нь.
Кондак 1
Избра́нную и венча́нную де́ву му́ченицу, неве́сту Христо́ву Екатери́ну, похва́льными пе́сньми воспои́м, я́ко пресла́вную мучи́теля победи́тельницу и прему́друю филосо́фов наста́вницу: ты же, великому́ченице Екатери́но, иму́щи дерзнове́ние ко Го́споду, приклони́ся ми́лостивне к благопотре́бным проше́ниям зову́щих ти:
Ра́дуйся, Екатери́но, неве́сто Христо́ва прему́драя.
Икос 1
А́нгелом ра́вную чистоту́ иму́щи, свята́я де́во Екатери́но, с А́нгелы Боже́ственнаго озаре́ния сподо́билася еси́, с ни́ми же воспева́ющи Трисвяту́ю песнь, услы́ши нас, пою́щих тебе́ на земли́ сия́:
Ра́дуйся, честно́е святы́ни жили́ще; ра́дуйся, чуде́сное зна́мение сбы́вшагося на тебе́ Бо́жия Про́мысла.
Ра́дуйся, благоволе́ния О́тча сосу́де; ра́дуйся, страда́ний Христо́вых исполне́ние.
Ра́дуйся, чи́стое Ду́ха Свята́го обита́лище; ра́дуйся, све́том благочести́выя ве́ры просвети́вшаяся.
Ра́дуйся, святою купе́лию отрожде́нная; ра́дуйся, измы́вшая ри́зы своя́ в Кро́ви А́гнчей на земли́.
Ра́дуйся, лику́ющая с свяще́нными де́вами на Небеси́.
Ра́дуйся, Екатери́но, неве́сто Христо́ва прему́драя.
Кондак 2
Ви́дящи Екатери́на себе́ виде́ния сподо́бльшуюся, тече́ к свято́му ста́рцу, ико́ну ей Богома́тере пре́жде того́ вручи́вшему, и пове́да ему́, ка́ко отвраща́ше лице́ Свое́ ей яви́выйся с Пречи́стою Свое́ю Ма́терию Христо́с, ка́ко безу́мну, и ни́щу, и худоро́дну ю наре́к, до́ндеже не оста́вит и́дольскаго нече́стия. Преподо́бный же, слы́шав сия́, наста́ви ю в та́инствах ве́ры и крести́ ю. Она́ же во обновле́нии ду́ха благода́рно поя́ше Бо́гу: Аллилу́иа.
Икос 2
Ра́зум благи́й, благоро́дство и́стинное, бога́тство неги́блющее стяжа́вши в духо́вном отрожде́нии, свята́я Екатери́на досто́йна яви́ся Небе́снаго Жениха́ Христа́, И́же, па́ки яви́вся ей, возлюби́ ю и дарова́нным пе́рстнем в неве́сту Себе́ обручи́. Она́ же, позна́вши тако́е к ней благоволе́ние Бо́жие, та́ко уязви́ся любо́вию Его́, я́ко не му́дрствоваше бо́лее о земны́х веща́х, но о Возлю́бленном свое́м непреста́нно мы́сляше. Таково́й благода́ти сподо́бльшаяся, слы́ши от нас:
Ра́дуйся, злово́ние мирско́е возненави́девшая; ра́дуйся, в воню́ ми́ра Христо́ва теку́щая.
Ра́дуйся, до́брая люби́тельнице Жениха́ Безсме́ртнаго; ра́дуйся, сокро́вище благоволе́ния Вы́шняго.
Ра́дуйся, денни́це пресве́тлая; ра́дуйся, луно́ соверше́нная.
Ра́дуйся, ма́слино, в до́му Бо́жии насажде́нная; ра́дуйся, ке́дре, в Лива́не высокора́сленный.
Ра́дуйся, Екатери́но, неве́сто Христо́ва прему́драя.
Кондак 3
Си́ла Вы́шняго даде́ тогда́ святе́й Екатери́не дерзнове́ние, е́же нече́ствующаго царя́ Максими́на о принесе́нии и́долом жертв обличи́ти небоя́зненно, и той пребы́сть безгла́сен на мног час, не моги́й проти́витися ея́ глаго́лом. Она́ же, благодаря́щи Бо́га, воспева́ше: Аллилу́иа.
Икос 3
Иму́щи свята́я Екатери́на свы́ше да́нную ей прему́дрость, егда́ нечести́вый царь, поста́вив пред собо́ю, вопроша́ше ю о ро́де ея́ и са́не, она́ испове́да себе́ быти дщерь ца́рскую, филосо́фския и ри́торския нау́ки до́бре изучи́вшую, па́че же Христо́ву неве́сту себе́ наименова́, в я́вное отверже́ние и́дольскаго служе́ния. Сего́ ра́ди воспева́ем ей си́це:
Ра́дуйся у́бо, Екатери́но пресла́вная; ра́дуйся, ца́рское свяще́ние.
Ра́дуйся, пчело́, ды́ма и́дольскаго отлете́вшая, ра́дуйся, голуби́це, зла́ты крила́ иму́щая.
Ра́дуйся, кади́ло Христо́ва благоуха́ния.
Ра́дуйся, Екатери́но, неве́сто Христо́ва прему́драя.
Кондак 4
Бу́рею я́рости вознеи́стовився царь на святу́ю де́ву, рече́ к ней: «Не глаго́ли зле о бо́зех на́ших». Свята́я же Екатери́на отвеща́: «А́ще восхо́щеши отрясти́ мрак пре́лести от душе́вных ти оче́й, уразуме́еши бого́в твои́х ху́дость и позна́еши и́стиннаго Бо́га, Его́же и́мя, то́кмо глаго́лемое, или́ крест, изобразу́емый на возду́се, прогоня́ет бо́ги твоя́ и погубля́ет. И а́ще повели́ши, явлю́ тебе́ и́стину, пою́щи Бо́гу моему́: Аллилу́иа».
Икос 4
Слы́шав нечести́вый царь свобо́дный и му́дрый отве́т твой о ве́ре Христо́вой, убоя́вся, да не бу́дет побежде́н от тебе́, собра́ от преде́лов держа́вы своея́ мудрецо́в, число́м пятьдеся́т, на пре́ние. Ты же, Арха́нгелом Михаи́лом утвержде́нная и о побе́де уве́ренная, возра́довалася еси́ вступи́ти в пре́ние с ни́ми. Приими́ у́бо, де́во, от нас похвалу́ сию́:
Ра́дуйся, изъяви́тельнице ума́ Христо́ва; ра́дуйся, херуви́мское стяжа́вшая Богопозна́ние.
Ра́дуйся, серафи́мскою воспале́нная к Бо́гу любо́вию; ра́дуйся, му́дрых мудре́йшая.
Ра́дуйся, духо́вный меч на неве́рие изостри́вшая; ра́дуйся, нече́стия прогони́тельнице.
Ра́дуйся, ве́рных наста́внице.
Ра́дуйся, Екатери́но, неве́сто Христо́ва прему́драя.
Кондак 5
Боготе́чной звезде́ была́ еси́ подо́бна, Екатери́но, препре́вши пятьдеся́т вити́й и наста́вивши их на путь христиа́нский, веду́щий к пра́ведному Со́лнцу, от Де́вы возсия́вшему Христу́ Бо́гу, свои́ми му́дрыми глаго́лы, и́же и осужде́ни бы́вше за Христа́ на сожже́ние и напу́тствовани моли́твою твое́ю, с ра́достию идо́ша в огнь, пою́ще: Аллилу́иа.
Икос 5
Ви́дев царю́ющий повеле́ния своя́ в тебе́ пренебреженны и увеща́ния презре́нны, обрати́ся к лука́вству, е́же ласка́нием прельсти́ти тя, обеща́я полца́рства тебе́ да́ти. Ты же ве́ру сокро́вищам земны́м предпоче́тши и Жениха́ Христа́ возлюби́вши па́че земна́го ца́рства и оде́жду му́ченичества па́че багряни́цы, отве́ргла еси́ его́ суесло́вие. Сего́ ра́ди воспису́ем ти сия́ похва́льная:
Ра́дуйся, де́во, лесть обличи́вшая; ра́дуйся, запина́теля зми́я попра́вшая.
Ра́дуйся, дщерь царе́ва; ра́дуйся, де́во, ря́сны златы́ми оде́янная.
Ра́дуйся, вся́кое вещество́ превозше́дшая; ра́дуйся, на гору́ богови́дения восте́кшая.
Ра́дуйся, све́том богопозна́ния просвеще́нная; ра́дуйся, труба́ ду́ха, воспе́вшая глас и́стиннаго богосло́вия.
Ра́дуйся, до́брое ве́ры испове́дание; ра́дуйся, све́та ева́нгельскаго сия́ние.
Ра́дуйся, зако́нов ве́чных храни́тельнице; ра́дуйся, на́ша помо́щнице.
Ра́дуйся, Екатери́но, неве́сто Христо́ва прему́драя.
Кондак 6
Пропове́дником богоно́сным, апо́столом поревнова́вши, дерзнове́нно пред лице́м мучи́теля пропове́дала еси́ Христа́, и́стиннаго Бо́га, Ему́же в ра́нах и в темни́це пе́ла еси́: Аллилу́иа.
Икос 6
Возсия́вый в се́рдце твое́м свет и́стиннаго богоразу́мия отгна́л есть мрак скорбе́й, и́же не оста́ви тя алка́ти, голуби́цею пи́щу ти посыла́я, ниже́ стужа́ти о боле́зни, посети́л бо Сам тя в темни́це, ободря́я и мно́ги венцы́ обещава́я. Ты же, терпеливоду́шная, сим па́че укрепи́лася еси́ и цари́цу А́вгусту и воево́ду Порфи́риа, с во́ины прите́кших к тебе́, обрати́ла еси́ к све́ту ве́ры Христо́вой и научи́ла пе́ти тебе́ сия́:
Ра́дуйся, мирополо́жнице Боже́ственныя любве́; ра́дуйся, адама́нте кре́пкий.
Ра́дуйся, вино́ чуде́с неизрече́нных; ра́дуйся, врага́ терпе́нием уби́вшая.
Ра́дуйся, я́звы Го́спода на те́ле свое́м носи́вшая; ра́дуйся, цари́це А́вгусте с прише́дшими к му́ченическому по́двигу путенаста́внице.
Ра́дуйся, я́ко во тьме свет была́ еси́; ра́дуйся, я́ко Сам Госпо́дь, Свет ми́ра, тебе́, в темни́це бы́вшей, Себе́ яви́л есть.
Ра́дуйся, уз грехо́вных ско́рая реши́тельнице; ра́дуйся, боле́знующих ско́рая целе́бнице.
Ра́дуйся, помо́щнице на́шего спасе́ния.
Ра́дуйся, Екатери́но, неве́сто Христо́ва прему́драя.
Кондак 7
Хотя́щу безбо́жному царю́ привести́ тя к ме́рзкому идолослуже́нию, па́ки се́ти подстила́ет тебе́, прему́драя, е́же улови́ти тя ле́стно похвало́ю красоты́ твоея́; ты же красоту́ вещь привре́менну и скоропрехо́дну именова́ла еси́, Христа́ же испове́дала еси́ Бо́га жи́ва и и́стинна и пе́ла Ему́: Аллилу́иа.
Икос 7
Но́вую показа́ царь я́рость и безчелове́чие, повеле́в епа́рху коле́сами растерза́ти де́вственное, чи́стое и свято́е те́ло твое́, но чуде́сно руко́ю А́нгела а́бие разреше́на была́ еси́ безвре́дна и колеса́ на ча́сти сокруше́ны, и́миже мно́ги от неве́рных убие́ны, я́ко удиви́ся сам царь и предстоя́щий наро́д, и́же и взыва́ше: «Вели́к Бог христиа́нский». Мы же, чудя́щеся сему́, взыва́ем тебе́:
Ра́дуйся, му́ченице, А́нгелом честна́я и гове́йная; ра́дуйся, сла́во полко́в страда́льческих.
Ра́дуйся, све́тлая на враги́ побе́да; ра́дуйся, страх неве́рных.
Ра́дуйся, сосу́де мно́жайшия си́лы Бо́жия; ра́дуйся, ра́дование ве́рных.
Ра́дуйся, Екатери́но, неве́сто Христо́ва прему́драя.
Кондак 8
Стра́нное сла́вы измене́ние и за Христа́ страда́ние цари́цы и воево́ды с во́ины ви́девше, устрани́мся любве́ ми́ра и пло́ти и впери́м себе́ к разуме́нию Бо́га, Сей бо есть красота́, и сла́ва, и вене́ц нам, пою́щим: Аллилу́иа.
Икос 8
Весь сла́дость, весь жела́ние тебе́, свята́я Екатери́но, бысть Иису́с: сла́дце бо Его́ ра́ди го́рькия му́ки терпе́ла еси́ и ски́петр, предлага́емый тебе́, попра́ла еси́, предзря́щи бу́дущее воздая́ние. От нас же приими́ похва́льная сия́:
Ра́дуйся, чи́стая, чи́сте Чи́стаго возлюби́вшая; ра́дуйся, го́рлице, Кра́снаго Жениха́ в пусты́не до́льнаго ми́ра вожделе́вшая.
Ра́дуйся, воню́ риз Его́ благоуха́вшая; ра́дуйся, я́ко се́рна на гора́х арома́тских иска́вшая Рожде́ннаго пре́жде холмо́в ве́чных.
Ра́дуйся, по́двиг страда́льческий ра́ди любве́ Христо́вы соверши́вшая; ра́дуйся, лик му́ченический Бо́гу приве́дшая.
Ра́дуйся, я́ко вити́и тобо́ю получи́ша Ца́рство Небе́сное; ра́дуйся, я́ко то́еже тобо́ю получи́ти ча́ем.
Ра́дуйся, покро́ве и забра́ло на́ше.
Ра́дуйся, Екатери́но, неве́сто Христо́ва прему́драя.
Кондак 9
Все естество́ а́нгельское возра́довася ра́достию, зря тя, Екатери́но, победи́вши мироде́ржца, ше́ствующую к преми́рным я́ко победоно́сную воево́ду, в после́довании полка́ страда́льческаго, и воспе́ побе́дная, взыва́я: Аллилу́иа.
Икос 9
Вити́и многовеща́ннии заусти́шася: не возмо́гше бо противовеща́ти богодухнове́нным словесе́м твои́м, молча́нием почита́ют дарова́ния твоя́; мы же, немощни́и, ка́ко мо́жем отве́рсти уста́ на хвалы́ твоя́? Одна́ко дерза́ем и мо́лим, сподо́би, блага́я, безбе́дно принести́ тебе́ песнь сию́:
Ра́дуйся, орга́не Ду́ха Свята́го; ра́дуйся, заре́ неизрече́ннаго осия́ния.
Ра́дуйся, догма́тов Боже́ственных пучи́но; ра́дуйся, хи́тросте, препре́вшая филосо́фов.
Ра́дуйся, ча́ше прему́дрости; ра́дуйся, плете́ния вити́й растерза́вшая.
Ра́дуйся, плени́цы грехо́вныя разреша́ющая.
Ра́дуйся, Екатери́но, неве́сто Христо́ва прему́драя.
Кондак 10
Спасти́ хотя́щи ду́шу твою́, о те́ле твое́м неради́ла еси́, Екатери́но, и на ме́чное усече́ние, мучи́телю да́вшу на то изрече́ние, ты ра́достно потекла́ еси́, пою́щи Свято́му Безсме́ртному: Аллилу́иа.
Икос 10
Стена́ тве́рда и непреодоли́ма яви́лася еси́ жена́м, тебе́ на ме́сто усече́ния провожда́ющим и с рыда́нием тя жестокосе́рду к себе́ и безразсу́дну быти имену́ющим: я́ко не пощади́ла еси́ сла́дкаго живота́ в цве́те ю́ности, я́ко презре́ла еси́ земно́е предлага́емое ца́рство и блаже́нство. Ты же воспрети́ла еси́ неполе́зный плач их и суесло́вие, теку́щи скоре́йше соедини́тися чрез смерть со свои́м Возлю́бленным, того́ ра́ди слы́шиши:
Ра́дуйся, ра́достно за Главу́ Це́ркве Христа́ под меч главу́ свою́ приклони́вшая; ра́дуйся, до конца́ претерпе́вшая.
Ра́дуйся, тече́ние до́бре сконча́вшая; ра́дуйся, я́ко ни ско́рбию, ни ра́нами, ни мече́м с пути́ Христо́ва испове́дания не соврати́лася еси́.
Ра́дуйся, я́ко пла́мень любве́ в исто́чнице кро́ве неугаси́мь соблю́дшая; ра́дуйся, му́чеников красото́.
Ра́дуйся, кре́пкое христиа́н прибе́жище.
Ра́дуйся, Екатери́но, неве́сто Христо́ва прему́драя.
Кондак 11
Пе́ние похва́льное дерзну́хом принести́ тебе́, но оскудева́ет сло́во на́ше и недоумева́ет ум, ка́ко глаго́лати; оба́че сло́во твое́ прему́дрое, мно́гих исхити́вшее от неве́жества и идолонече́стия, возставля́ет нас. Даждь нам сло́во твое́, во е́же пе́ти уди́вльшему на тебе́ вели́чия Своя́ Бо́гу: Аллилу́иа.
Икос 11
Светоприе́мную тя свещу́, ме́чным усече́нием погаше́нную, но на све́щнице Небе́снем пред Престо́лом Святы́я Тро́ицы поста́вленную, ви́девше Святи́и А́нгели, поклони́шася Живу́щему во ве́ки и, получи́вше от Влады́ки повеле́ние, де́вственное те́ло твое́ на горе́ Сина́йстей погребо́ша, да не ви́димо бу́дет, я́коже сама́ хоте́ла еси́, враго́м Госпо́дним. Мы же песнь сию́ возсыла́ем ти:
Ра́дуйся, солнцеобра́зная де́во, на Небеса́ ду́хом возше́дшая; ра́дуйся, Сио́на Го́рняго дости́гшая.
Ра́дуйся, ве́нче добро́ты в ру́це Госпо́дни; ра́дуйся, ча́ше, от оби́лия до́му Бо́жия че́рплющая ра́дость.
Ра́дуйся, к ски́нии нерукотворе́нней, ве́чней прибли́жившаяся; ра́дуйся, на горе́ зако́нней почива́ющая те́лом.
Ра́дуйся, я́ко та́мо ви́дена бы́ша ше́ствия Бо́га Сина́ина, Бо́га Иа́ковля; ра́дуйся, ме́ста богови́дения Моисе́ева одержа́ние.
Ра́дуйся, ре́вности Илиины́ указа́ние; ра́дуйся, купины́ несгора́емой явле́ние.
Ра́дуйся, де́во, Де́ве Цари́це, в ри́зы позлаще́нны оде́янной, преиспещре́нной всле́дствующая; ра́дуйся, я́ко тобо́ю Сый воспева́ется посреде́ дев тимпа́нниц.
Ра́дуйся, я́ко на тебе́ велеле́пота Его́; ра́дуйся, Престо́ла Ве́чнаго предстоя́тельнице.
Ра́дуйся, от хра́ма вселе́нныя моли́твенники к тебе́ назира́ющая; ра́дуйся, кади́ло моли́тв Вы́шнему о нас благоприя́тное.
Ра́дуйся, Екатери́но, неве́сто Христо́ва прему́драя.
Кондак 12
Благода́ть дана́ тебе́ от Бо́га руково́дствовати к позна́нию и́стины Его́, в та́йне сокрове́нней, и дая́ти всем я́же к по́льзе проше́ния. Те́мже мы, помраче́ннии, умиле́нно про́сим тя, му́драя де́во: просвети́ у́мныя на́ши о́чи и положи́ нам к Небеси́ стезю́ прохо́дну, да пое́м с тобо́ю ны́не и во вся ве́ки Еди́ному Прему́дрому: Аллилу́иа.
Икос 12
Пою́ще кре́пкия твоя́ му́ченическия по́двиги, хва́лим тя, я́ко одушевле́нный сосу́д спасе́ния челове́ков: твои́м бо ра́зумом Бог прему́дрость прему́дрых ве́ка сего́ погуби́; тобо́ю вити́й призва́ в язы́к свят, в лю́ди обновле́ния, я́ко тем страда́ти за Христа́. Просвети́ и нас, блага́я де́во, помраче́нных, да зове́м ти:
Ра́дуйся, зерца́ло Бо́жия му́дрости; ра́дуйся, си́лою Вы́шняго оде́янная.
Ра́дуйся, подви́жнице, еле́ем ра́дования умаще́нная; ра́дуйся, воево́до, полк Бо́жий к ве́чному вели́честву предпосла́вшая.
Ра́дуйся, во све́тлости святы́я вше́дшая; ра́дуйся, во све́те непристу́пнем Живу́щему в ли́це пла́менных слуг предста́вшая.
Ра́дуйся, гром трисвята́го пе́ния гла́сом свои́м умножа́ющая; ра́дуйся, неизрече́нную сла́дость добро́ты вкуша́ющая.
Ра́дуйся, я́ко хвала́ и ра́дование над главо́ю твое́ю; ра́дуйся, я́ко ве́чная сла́ва тебе́ объе́млет.
Ра́дуйся, от Триипоста́снаго Божества́ венце́м Небе́снаго Ца́рствия увенча́нная; ра́дуйся, благода́ти и безконе́чной сла́вы нам хода́таице.
Ра́дуйся, Екатери́но, неве́сто Христо́ва прему́драя.
Кондак 13
О свята́я великому́ченице Екатери́но! Приими́ сие́ похва́льное пе́ние и изба́ви нас от враг ви́димых и неви́димых и от ве́чнаго муче́ния твои́м благоприя́тным хода́тайством сохрани́, да с тобо́ю при́сно пое́м Бо́гу: Аллилу́иа.
Этот кондак читается трижды, зате́м 1-й икос «А́нгелом ра́вную...» и 1-й кондак «Избра́нную и венча́нную де́ву...».
Моли́тва
О свята́я Екатери́но, де́во и му́ченице, и́стинная Христо́ва неве́сто! Мо́лим тя чрез особли́вую благода́ть, е́юже предвари́ тя Жени́х твой, Сладча́йший Иису́с: я́коже посрами́вши пре́лести мучи́теля, му́дростию твое́ю пятьдеся́т вити́й победи́ла еси́ и, напои́вши их Небе́сным уче́нием, к све́ту и́стинныя ве́ры наста́вила еси́, та́ко испроси́ и нам о́ную Бо́жию му́дрость, да и мы, расто́ргнувше вся ко́зни а́дскаго мучи́теля и презре́в ми́ра и пло́ти собла́зны, досто́йны яви́мся Боже́ственныя сла́вы и к разшире́нию святы́я на́шея правосла́вныя ве́ры сосу́ды досто́йны соде́лаемся, и с тобо́ю в Небе́сной ски́нии Го́спода и Влады́ку на́шего Иису́са Христа́ хва́лим и прославляем во вся ве́ки. Ами́нь.