Тропари, кондаки и величания - 08 декабря 2025
Иже от Бога чудодействы/ преславно удивляя вселенныя концы мира,/ священный страдальче,/ паче естества морю составы водам содеваеши разделение/ в честней памяти твоей/ всегда притекающим усердно в Богозданную ти церковь/ чудесным твоим мощем,/ и по всенародном хождении,/ море во едино течение чудодетельне твориши,/ Клименте предивный,/ моли Христа Бога спастися душам нашим.
Боже отец наших,/ творяй присно с нами по Твоей кротости,/ не отстави милость Твою от нас,/ но молитвами их// в мире управи живот наш.
Божественнаго винограда священноодеянна/ всем лоза явися,/ каплющи сладость премудрости,/ молитвами твоими, всечестне,/ да тебе исткану, яко багряницу,/ песнь мысленную принесем,/ Клименте святе,/ спаси рабы твоя.
Церкве недвижимии и Божественнии пиргове,/ благочестия Божественнии столпи/ воистинну крепцыи,/ Клименте с Петром всехвальнии,// вашими молитвами соблюдите вся.
От вышняго суда Христова предстательствова стаду,/ на пажитех благожизненных упасл еси всемудрыми твоими догматы,/ отгнав Ария, яко волка некроткаго,/ вшедшаго в них безбожными учении./ Темже и душу твою положил еси за них,/ пастырь нареклся еси, яко рече Господь,/ иерарше Петре блаженне,/ моли Христа Бога грехов оставление даровати/ чтущим любовию святую память твою.
Боже отец наших,/ творяй присно с нами по Твоей кротости,/ не отстави милость Твою от нас,/ но молитвами их// в мире управи живот наш.
Православными повелении Церковь просветил еси,/ за нюже и пострадав, Богоблаженне отче,/ Ария отступника отгнав,/ темже твою пречестную память совершающе,/ православно вопием:/ радуйся, Петре, каменю вере.
Церкве недвижимии и Божественнии пиргове,/ благочестия Божественнии столпи/ воистинну крепцыи,/ Клименте с Петром всехвальнии,// вашими молитвами соблюдите вся.
Приспе день светлаго торжества, / весь Ямская радуется, / и вси чада вернии Церкве Христовы духовно торжествуют, / восхваляюще заступника и молитвенника нашего пред Богом / священномученика Ярослава, / пастыря добраго, душу свою за веру Христову положившаго. / Темже молим тя, / от всяких бед и зол избави нас // чтущих святую память твою.
Пастырю добрый и страстотерпче Ярославе Ямский, /моли милостиваго Бога, /да сердца народа русскаго к Себе обратит /и лютых прегрешений оставление // подаст душам нашим.