Канон глас 3 умилительный ко Господу нашему Иисусу Христу
Кано́н умили́тельный ко Го́споду на́шему Иису́су Христу́. Творе́ние Ки́р Ио́сифа, глас 3
Тропа́рь, глас 3
Хвалу́ приношу́ Ти, Го́споди, прегреше́ния моя́ вся возвеща́ю Ти, Бо́же, обрати́в поми́луй мя.
Сла́ва Отцу́ и Сы́ну и Свято́му Ду́ху;
Спаси́ мя, Бо́же мой, я́коже иногда́ мытаря́ спасл еси́, и блудни́цы слез не презре́вый, и мое́ воздыха́ние приими́, Спа́се мой, и спаси́ мя.
И ны́не и при́сно и во ве́ки веко́в. Ами́нь.
Ра́бски ны́не притека́ю к покро́ву Твоему́, Пренепоро́чная: изба́ви мя, Богороди́тельнице, слия́ния страсте́й, я́ко безстрас́тия Вино́внаго Ро́ждшая.
Песнь 1
Ирмо́с: Фарао́ни колесни́цы глубино́ю покры́в, Го́споди, мо́ре разве́ргл еси́: и спасл еси́ пе́сньми пою́щыя Тя, лю́ди изра́ильтеския.
Поми́луй мя, Бо́же, поми́луй мя.
Прегреше́ний тмы изба́ви мя безгре́шне, я́же без ума соде́ях, подая́ ми сле́зы умиле́ния, я́коже иногда́ блудни́це (дважды).
Поми́луй мя, Бо́же, поми́луй мя.
Бы́вша мя верте́п разбо́йником безме́стными дея́нии, доброде́тельми яви́, Человеколю́бче, храм Тво́й, И́же во́лею рожде́йся в верте́пе.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богоро́дичен: Всесвята́я и пречи́стая, гре́шным помо́щнице, па́дающым исправле́ние, покая́ние ми даждь умиле́ния многосогреши́вшему.
Песнь 3
Ирмо́с: Утверди́ мене́, Го́споди, еди́не многоми́лостиве, и простри́ ми ру́ку я́ко Петро́ви, и спаси́ мя.
Поми́луй мя, Бо́же, поми́луй мя.
Я́коже Петра́ погружа́ема спасл еси́, Человеколю́бче: та́ко и мене́ из глубины́ прегреше́ний мои́х возведи́ (дважды).
Поми́луй мя, Бо́же, поми́луй мя.
Умертви́ мя льсти́вый страстьми́ убив: Ты же мя, Жизнода́телю, покая́ния о́бразы оживи́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богоро́дичен: Мари́е господоимени́тая, мно́гими облада́ема мя страстьми́ душетле́нными, свободи́ моли́твами Твои́ми.
Седа́льны, глас 3
Живу́щи на земли́, душе́ моя́, пока́йся, пе́рсть бо во гро́бе не пое́т, ни от прегреше́ний избавля́ет. Возопи́й Христу́ Бо́гу: Сердцеве́дче, согреши́х ти, пре́жде да́же не осу́диши мя, пощади́ мя, Бо́же, и поми́луй мя.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богоро́дичен: Красоте́ де́вства Твоего́, и пресве́тлой чистоте́ Твое́й, Гаврии́л удиви́вся, вопия́ше Ти, Богоро́дице: ку́ю Ти похвалу́ принесу́ досто́йную? что́же возъимену́ю Тя? недоумева́ю и ужаса́юся. Те́мже, я́коже повеле́н есмь, вопию́ Ти: ра́дуйся, Благода́тная.
Го́споди, поми́луй (трижды).
Песнь 4
Ирмо́с: Еда́ в река́х прогне́ваешися, Го́споди; еда́ в река́х я́рость Твоя́, или́ в мо́ри устремле́ние Твое́?
Поми́луй мя, Бо́же, поми́луй мя.
Разреши́ соу́зы страсте́й мои́х, Го́споди, покая́нием мя связа́в, и прича́стника яви́ благи́х Твои́х (дважды).
Поми́луй мя, Бо́же, поми́луй мя.
Возсия́й ми светоза́рныя покая́ния о́бразы, со́лнце сый Христе́, зол мои́х отгоня́я нощь глубо́кую.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богоро́дичен: Да́ждь ми, Чи́стая, и́стинное покая́ние, ути́ши страсте́й мои́х молву́, согреша́ющым предста́тельнице.
Песнь 5
Ирмо́с: Све́том Твои́м невече́рним, Христе́, озари́, Бо́же, смире́нную мою́ ду́шу, и наста́ви на страх тво́й: зане́ свет повеле́ния Твоя́.
Поми́луй мя, Бо́же, поми́луй мя.
Не поста́ви мене́ на́га от дел до́брых, на суди́щи Твое́м Человеколю́бче: но во оде́жду Боже́ственных дея́ний облецы́ покая́нием (дважды).
Поми́луй мя, Бо́же, поми́луй мя.
Уязви́хся ору́жием страсте́й, и в ров отча́яния впадо́х: не пре́зри, Bлады́ко, но исцели́ мя обраще́ния бы́лием.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богоро́дичен: Я́же еди́на сло́вом на земли́, пло́тию сло́во ро́ждши, и Де́ва пребы́вши, безслове́сных мя изба́ви дея́ния, я́ко да словесы́ честны́ми воспева́ю Тя́.
Песнь 6
Ирмо́с: И́же в концы́ веко́в доше́дшыя, Человеколю́бче, и треволне́ньми напа́стей поги́бнути бе́дствующыя, вопию́щыя не пре́зри: спаси́, Спа́се, я́коже спасл еси́ от зве́ря проро́ка.
Поми́луй мя, Бо́же, поми́луй мя.
Превозне́сся мы́слию, я́коже дре́вний фарисе́й прегреше́нием низпадо́хся лю́те, и зря мя льсти́вый, весели́тся, Христе́: и́мже смири́вый сего́ Кресто́м, смири́вшася ны́не уще́дри мя (дважды).
Поми́луй мя, Бо́же, поми́луй мя.
Грехолюби́в в житии́ быв, я́коже ин никто́же, Влады́ко, ижди́х твое́ долготерпе́ние окая́нный, и еще́ есмь нечу́вствен, но обрати́ мя Твои́м благоутро́бием.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богоро́дичен: Ковче́г заве́та, святу́ю вои́стинну трапе́зу, очисти́лище на́ше, це́рковь Бо́жию одушевле́нную, всезлаты́й све́щник, и́стинную Ма́терь Зижди́теля воспева́ем.
Седа́лен, глас 3
Небе́сная и земна́я сло́вом приве́л еси́, я́ко Всеси́лен: а́нгельския же ли́ки, с тре́петом предстоя́ще, непреста́нную хвалу́ Тебе́ прино́сят, Влады́ко, вся озаря́юще све́том Твои́м концы́. С ни́миже и мы Тебе́ вопие́м: спаси́ на́с благоутро́бием Твои́м.
Го́споди, поми́луй (трижды).
Песнь 7
Ирмо́с: Трие́ о́троцы в пещи́ Тро́ицу прообрази́вше, преще́ние о́гненное попра́ша, и пою́ще вопия́ху: благослове́н еси́, Го́споди, Бо́же отец на́ших.
Поми́луй мя, Бо́же, поми́луй мя.
Вре́мя мое́ скончава́ется о душе́, при две́рех исхо́д, покая́ния у́бо плоды́ покажи́, пре́жде да́же две́ри не затворя́тся, возопи́й Христе́: Го́споди, спаси́ мя (дважды).
Поми́луй мя, Бо́же, поми́луй мя.
Обнови́м сердца́ ра́лом и́стиннаго позна́ния, покая́ния пшени́цу се́юще, я́ко да по́жнем клас пра́вды, о Христе́ возде́лателе душ на́ших.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богоро́дичен: Исто́чниче, и́же во́ду оставле́ния источа́ющи, тече́ния мои́х прегреше́ний изсуши́, подаю́щи ми ту́чу слез, да Тя при́сно я́ко Богоро́дицу пою́.
Песнь 8
Ирмо́с: В пла́мень ко отроко́м евре́йским снизше́дшаго Бо́жиею си́лою, и я́вльшагося Го́спода, свяще́нницы благослови́те, и превозноси́те во вся ве́ки.
Поми́луй мя, Бо́же, поми́луй мя.
От посме́шства храм оте́ческим изрече́нием раб бысть: что сотвори́ши душе́ моя́, поработи́вшися страсте́м и безчи́нно смею́щися, и не стыдя́щися Небе́снаго Отца́ (дважды).
Благослови́м Отца́ и Сы́на и Свята́го Ду́ха Го́спода.
Враждова́в Ка́ин безу́мно братоуби́йца бысть: сему́ подо́бна яви́лася еси́, и не ина́го уби́вши, но себе́ са́мую душе́ моя́, сластолю́бием и пре́лестьми жития́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богоро́дичен: Изли́шеством блу́днаго жития́, ко а́ду ны́не прибли́жихся: премно́гое благоутро́бие, Отрокови́це, иму́щи, я́ко Бо́га благоутро́бнаго ро́ждши неизрече́нно, уще́дривши, спаси́ мя.
Песнь 9
Ирмо́с: На Сина́йстей горе́ ви́де Тя в купине́ Моисе́й, неопа́льно огнь Божества́ заче́ншую во чре́ве: Дании́л же Тя ви́де го́ру несеко́мую, жезл прозя́бший, Иса́иа взыва́ше, от ко́рене Дави́дова.
Поми́луй мя, Бо́же, поми́луй мя.
Иа́ков пе́рвенство прия́т, ра́ди воздержа́ния иногда́, Иса́в же старе́йшинство отдаде́, не удержа́в чре́во. Коль зло невоздержа́ние, и коль вели́ко воздержа́ние! бе́гай неподо́бия, возлюби́, о душе́, до́брых прибавле́ние (дважды).
Поми́луй мя, Бо́же, поми́луй мя.
Я́ко мно́гая претерпе́в непоро́чный, венча́ся И́ов: искуше́ний бо сте́кшеся пото́цы, не поколеба́ша ему́ серде́чнаго столпа́. Тому́ ревну́й всегда́, непрело́жна пребыва́ющи, о душе́, лука́ваго козньми́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богоро́дичен: Све́тлая влады́чняя пала́та, дом мя покажи́ све́та, непроходи́мая две́ре, отве́рзи ми покая́ния пути́, земле́ свята́я, к земли́ мя кро́тких наста́ви, Влады́чице, вся́каго мя влады́чества страсте́й яви́ свобо́дна.
Моли́тва
Го́споди, Бо́же мой, я́ко Благ и Человеколю́бец, мно́гия ми́лости сотвори́л еси́ со мно́ю, я́же не ча́ях ви́дети, и что возда́м Твоей бла́гости, Го́споди мой, Го́споди? Благодарю́ Твое многопе́тое и́мя, благодарю́ Твое неисповеди́мое на мне благоутро́бие, благодарю́ безприкла́дное Твое долготерпе́ние. И отны́не заступи́, и помози́ мне, и покры́й мя, Влады́ко, от всех, е́же не ктому́ согреша́ти пред Тобо́ю: Ты бо ве́си естества́ моего́ удобопоползнове́нное, Ты ве́си безу́мие мое́, Ты ве́си мно́ю соде́янная, я́же в ве́дении и не в ве́дении, я́же во́льная и нево́льная, я́же в нощи́ и во дни, и во уме́, и мы́сли, я́ко Благ у́бо и Человеколю́бец Бог, очи́сти я́ росо́ю ми́лости Твоея́, Преблаги́й Го́споди, и спаси́ нас и́мене ра́ди Твоего́ свята́го, и́миже ве́си судьба́ми. Ты бо еси́ Свет и И́стина, и Живо́т, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.