Молитвы ко Святому Причащению по Царскому чину

МОЛИТВЫ КО СВЯТОМУ ПРИЧАЩЕНІЮ[1]

Начальная молитва

Во И́мя Отца́ (кладем руку на лобъ), и Сы́на (на животъ), и Свята́го (на правое плечо) Ду́ха (на левое плечо). Ами́нь.

Хвалебная пѣснь Господу Богу

Сла́ва Тебѣ́, Бо́же нашъ, Сла́ва Тебѣ́.

Молитва мытаря

Бо́же, ми́лостивъ бу́ди мнѣ грѣ́шному.

Молитва Iисусова

Го́споди, Iису́се Хрiсте́, Сы́не и Сло́ве Бо́жiй, ра́ди И́мени Твоего́ Святаго и моли́твъ Пречи́стыя Твоея́ Ма́тре, царя́ изкупи́тѣля Нiко́лая и всѣ́хъ Святы́хъ, поми́луй насъ и мiръ Твой.

Молитва Святому Духу

Царю́ Небе́сный, Утѣ́шителю, Ду́ше и́стины, И́же вездѣ́ сы́й и вся исполня́й, Сокро́вище благи́хъ и жи́зни Пода́телю, прiиди́ и всели́ся въ ны, и очи́сти ны отъ вся́кiя скве́рны, и спаси́, Бла́же, ду́ши на́ша.

[От Пасхи до Вознесения вместо этой молитвы читается тропарь:

Христо́с воскре́се из ме́ртвых, сме́ртию смерть попра́в, и су́щим во гробе́х живо́т даровав (трижды).

От Вознесения до Троицы после молитвы предначинательной сразу читаем «Святый Боже…»]

Ангельская пѣснь Пресвятой Троицѣ

Святы́й Бо́же, Святы́й Крѣ́пкiй, Святы́й Безсме́ртный, поми́луй на́съ (трижды).

Малое славословiе Пресвятой Троицѣ

Сла́ва Отцу́, и Сы́ну, и Свято́му Ду́ху, и ны́нѣ, и при́сно, и во вѣ́ки вѣко́въ. Ами́нь.

Молитва Пресвятой Троицѣ

Пресвята́я Тро́ице, поми́луй насъ; Го́споди, очи́сти грѣхи́ на́ша; Влады́ко, прости́ беззако́нiя на́ша; Святы́й, прости́ и исцѣли́ не́мощи на́ша, И́мене Твоего́ ра́ди.

Го́споди, поми́луй (трижды).

Сла́ва Отцу́, и Сы́ну, и Свято́му Ду́ху, и ны́нѣ, и при́сно, и во вѣ́ки вѣко́въ. Ами́нь.

Молитва Господня

О́тче нашъ, И́же еси́ на Небесѣ́хъ! Да святи́тся И́мя Твое́; да пріи́детъ Ца́рствіе Твое́; да бу́детъ Во́ля Твоя́, я́ко на Небеси́, и на земли́; хлѣбъ нашъ насу́щный даждь намъ днесь; и оста́ви намъ до́лги на́ша, я́ко и мы оставля́емъ должнико́мъ на́шымъ; и не введи́ насъ во искуше́ніе, но изба́ви насъ отъ лука́ваго; я́ко Твое́ есть Ца́рство, и Си́ла, и Сла́ва во вѣ́ки. Ами́нь.

Тропари покаянные[2]

Поми́луй насъ, Го́споди, поми́луй насъ; вся́каго бо отвѣ́та недоумѣ́юще, сію́ Ти моли́тву, я́ко Влады́цѣ, грѣ́шніи прино́симъ: поми́луй насъ.

Сла́ва́ Отцу́, и Сы́ну, и Свято́му Ду́ху.

Го́споди, поми́луй насъ, на Тя бо упова́хомъ; не прогнѣ́вайся на ны зѣло́ (очень), ниже́ помяни́ беззако́ній на́шихъ, но при́зри и ны́нѣ, я́ко Благоутро́бенъ, и изба́ви ны отъ врагъ на́шихъ; Ты бо еси́ Богъ нашъ, и мы лю́діе Твои́, вси дѣла́ Руку́ Твое́ю, и И́мя Твое́ призыва́емъ.

И ны́нѣ, и при́сно, и во вѣ́ки вѣко́въ. Ами́нь.

Милосе́рдія две́ри отве́рзи намъ, благослове́нная Богоро́дице, надѣ́ющіися на Тя да не поги́бнемъ, но да изба́вимся Тобо́ю отъ бѣдъ; Ты бо еси́ спасе́ніе ро́да Хрістіа́нскаго.

Го́споди поми́луй (40 разъ).

Причастные стіхи

Хотя́ я́сти, человѣ́че, Тѣл́о Влады́чне,

Стра́хомъ приступи́, да не опали́шися; огнь бо есть.

Божестве́нную же пія́ Кровь ко обще́нію,

Пе́рвѣе примири́ся тя опеча́лившымъ,

Та́же (только тогда) дерза́я Та́инственное Бра́шно яждь.

Пре́жде прича́стiя стра́шныя же́ртвы,

Животворя́щаго Тѣ́ла Влады́чня,

Симъ помоли́ся о́бразомъ со тре́петомъ.

Молитва Василiа Великого, 1

Влады́ко Го́споди Іису́се Хрiсте́ Бо́же нашъ, Исто́чникъ жи́зни и безсме́ртiя, всея́ тва́ри ви́димыя и неви́димыя Содѣ́телю, Безнача́льнаго Отца́ Соприсносу́щный Сы́не, и Собезнача́льный, премно́гiя ра́ди бла́гости въ послѣ́днiя дни въ плоть оболкíйся, и распны́йся, и погребы́йся за ны неблагода́рныя и злонра́вныя, и Твое́ю Кро́вiю обнови́вый растлѣ́вшее грѣхо́мъ естество́ на́ше; Самъ Безсме́ртный Царю́, прiими́ и мое́ грѣ́шнаго покая́нiе, и приклони́ у́хо Твое́ мнѣ, и услы́ши глаго́лы моя́. Согрѣши́хъ бо, Го́споди, согрѣши́хъ на Не́бо и предъ тобо́ю, и нѣсмь досто́инъ воззрѣ́ти на высоту́ сла́вы Твоея́; прогнѣ́вахъ бо Твою́ бла́гость, Твоя́ за́повѣди преступи́въ и не послу́шавъ Твои́хъ повелѣ́нiй. Но Ты Го́споди, незло́бивъ сый долготерпѣли́въ же и многоми́лостивъ, не преда́лъ еси́ мя поги́бнути со беззако́ньми мои́ми, моего́ вся́чески ожида́я обраще́нiя. Ты бо реклъ еси́ Человѣколю́бче проро́комъ Твои́мъ: я́ко хотѣ́нiемъ не хощу́ сме́рти грѣ́шника, но е́же обрати́тися и жи́ву бы́ти ему́. Не хо́щеши бо Влады́ко, созда́нiя Твоею́ руку́ погуби́ти, ниже́ благоволи́ши о поги́бели человѣ́честѣй, но хо́щеши всѣмъ спасти́ся, и въ ра́зумъ и́стины прiити́. Тѣ́мже и азъ, а́ще и недосто́инъ есмь Небесе́ и земли́, и сея́ привре́менныя жи́зни, всего́ себе́ повину́въ грѣху́, и сласте́мъ порабо́тивъ, и Твой оскверни́въ о́бразъ; но творе́нiе и созда́нiе Твое́ бывъ, не отъчаява́ю своего́ спасе́нiя окая́нный, на Твое́ же безмѣ́рное благоутро́бiе дерза́я прихожду́. Прiими́ у́бо и мене́ Человѣколю́бче Го́споди я́коже блудни́цу, я́ко разбо́йника, я́ко мытаря́, и я́ко блу́днаго, и возми́ мое́ тя́жкое бре́мя грѣхо́въ, грѣхъ взе́мляй мíра, и не́мощи человѣ́ческiя исцѣля́яй; тружда́ющiяся и обремене́нныя къ Себѣ́ призыва́яй и упокоева́яй, не прише́дый призва́ти пра́ведныя, но грѣ́шныя на покая́нiе, и очи́сти мя отъ вся́кiя скве́рны пло́ти и ду́ха, и научи́ мя соверша́ти святы́ню во стра́сѣ Твое́мъ; я́ко да чи́стымъ свѣ́дѣнiемъ совѣ́сти моея́, Святы́нь Твои́хъ часть прiе́мля, соединю́ся свято́му Тѣ́лу Твоему́ и Кро́ви, и имѣ́ю Тебе́ во мнѣ живу́ща и пребыва́юща со Отце́мъ и Святы́мъ Твои́мъ Ду́хомъ. Ей Го́споди Іису́се Хрiсте́ Бо́же мой, и да не въ судъ ми бу́детъ прича́стiе пречи́стыхъ, и животворя́щихъ Та́инъ Твои́хъ, ниже́ да не́мощенъ бу́ду ду́шею же и тѣ́ломъ, отъ е́же недосто́йнѣ тѣмъ прича́щатися; но даждь ми да́же до коне́чнаго моего́ издыха́нiя, неосужде́нно воспрiима́ти часть святы́нь Твои́хъ, въ Ду́ха Свята́го обще́нiе, въ напу́тiе живота́ вѣ́чнаго, и во благопрiя́тенъ отъвѣ́тъ на Стра́шнѣмъ Суди́щи Твое́мъ; я́ко да и азъ со всѣ́ми избра́нными Твои́ми о́бщникъ бу́ду нетлѣ́нныхъ Твои́хъ благъ, я́же угото́валъ еси́ лю́бящимъ Тя Го́споди, въ ни́хже препросла́вленъ еси́ во вѣ́ки. Ами́нь.

Молитва Іоанна Златоуста, 2

Го́споди Бо́же мой, вѣмъ, я́ко нѣсмь досто́инъ, ниже́ дово́ленъ, да подъ кровъ вни́деши хра́ма души́ моея́; зане́же весь пустъ и па́лся есть, и не и́маши во мнѣ мѣ́ста досто́йна, е́же главу́ подклони́ти; но я́коже съ высоты́ насъ ра́ди смири́лъ еси́ Себе́, смири́ся и ны́нѣ смире́нiю моему́; и я́коже воспрiя́лъ еси́ въ верте́пѣ и въ я́слехъ безслове́сныхъ возлещи́; си́це воспрiими́ и въ я́слехъ безслове́сныя моея́ души́, и во оскверне́нное мое́ тѣ́ло вни́ти. и я́коже не неудосто́илъ еси́ вни́ти, и свечеря́ти со грѣ́шники въ дому́ Сíмона прокаже́ннаго; та́ко изво́ли вни́ти и въ домъ смире́нныя моея́ души́, прокаже́нныя и грѣ́шныя; и я́коже не отъри́нулъ еси́ подо́бную мнѣ блудни́цу, и грѣ́шную, прише́дшую и прикосну́вшуюся Тебѣ́; си́це умилосе́рдися и о мнѣ грѣ́шнѣмъ, приходя́щемъ и прикаса́ющемъ Ти ся. И я́коже не возгнуша́лся еси́ скве́рныхъ ея́ устъ и нечи́стыхъ, цѣлу́ющихъ Тя, ниже́ мои́хъ возгнуша́йся скве́рншихъ о́ныя устъ, и нечи́стшихъ; ниже́ ме́рзкихъ мои́хъ и нечи́стыхъ усте́нъ, и скве́рнаго и нечистѣ́йшаго моего́ язы́ка. Но да бу́детъ ми угль пресвята́го Твоего́ Тѣ́ла, и Честны́я Твоея́ Кро́ве, во освяще́нiе, и просвѣще́нiе, и здра́вiе смире́ннѣй мое́й души́ и тѣ́лу, во облегче́нiе тя́жестей мно́гихъ мои́хъ согрѣше́нiй, въ соблю́денiе отъ вся́каго дiа́вольскаго дѣ́йства, во отъгна́нiе и возбране́нiе зла́го моего́ и лука́ваго обы́чая: во умерщвле́нiе страсте́й, въ снабдѣ́нiе за́повѣдей Твои́хъ, въ приложе́нiе Боже́ственныя Твоея́ благода́ти, и Твоего́ Ца́рствiя присвое́нiе; не бо я́ко презира́яй прихожду́ къ Тебѣ́ Хрiсте́ Бо́же, но я́ко дерза́я на неизрече́нную Твою́ бла́гость; и да не на мно́зѣ удаля́яйся Обще́нiя Твоего́, отъ мы́сленнаго во́лка звѣроуловле́нъ бу́ду. Тѣ́мже молю́ся Тебѣ́, я́ко еди́нъ сый святъ Влады́ко, освяти́ мою́ ду́шу и тѣ́ло, умъ и се́рдце, чревеса́ и утро́бы, и всего́ мя обнови́; и вкорени́ страхъ Твой во удесѣ́хъ мои́хъ, и освяще́нiе Твое́ неотъе́млемо отъ мене́ сотвори́. И бу́ди ми помо́щникъ и засту́пникъ, окормля́я въ мі́рѣ живо́тъ мой, сподобля́я мя и одесну́ю Тебе́ предстоя́нiя со святы́ми Твои́ми, моли́твами и моле́ньями Пречи́стыя Твоея́ Ма́тере, свята́го царя́ изкупи́тѣля Ніко́лая, невеще́ственныхъ Твои́хъ Служи́телей, и пречи́стыхъ силъ, и всѣхъ святы́хъ отъ вѣ́ка Тебе́ благоугоди́вшихъ. Ами́нь.

Молитва Іоанна Дамаскина, 3

Влады́ко Го́споди Iису́се Хрiсте́ Бо́же нашъ, е́дине имѣ́яй власть человѣ́комъ оставля́ти грѣхи́; я́ко благъ и Человѣколю́бецъ пре́зри моя́ вся въ вѣ́дѣнiи и не въ вѣ́дѣнiи прегрѣ́шенiя. И сподо́би мя неосужде́нно причасти́тися Боже́ственныхъ, и пресла́вныхъ, и пречи́стыхъ, и животворя́щихъ Твои́хъ Таи́нъ; не въ тя́жесть, ни въ му́ку, ни въ приложе́нiе грѣхо́въ, но во очище́нiе, и освяще́нiе, и обруче́нiе бу́дущаго живота́ и Ца́рствiя, въ стѣ́ну и по́мощь, и въ возраже́нiе сопроти́вныхъ, во истребле́нiе мно́гихъ мои́хъ согрѣше́нiй. Ты бо еси́ Богъ ми́лости, и щедро́тъ, и человѣколю́бiя, и Тебѣ́ сла́ву возсыла́емъ со Отце́мъ и Святы́мъ Ду́хомъ, ны́нѣ и при́сно, и во вѣ́ки вѣко́въ. Ами́нь.

Молитва Василія Великаго, 4

Вѣмъ Го́споди, я́ко недосто́йнѣ причаща́юся Пречи́стаго Твоего́ Тѣ́ла, и честны́я Твоея́ Кро́ве: и пови́ненъ есмь, и судъ себѣ́ ямъ и пiю́, не разсужда́я Тѣ́ла и Кро́ве Тебе́ Хрiста́ и Бо́га моего́, но на щедро́ты Твоя́ дерза́я прихожду́ къ Тебѣ́ ре́кшему: яды́й Мою́ Плоть, и пiя́й Мою́ Кровь, во Мнѣ пребыва́етъ, и Азъ въ немъ. Умилосе́рдися у́бо Го́споди, и не обличи́ мя грѣ́шнаго, но сотвори́ со мно́ю по ми́лости Твое́й; и да бу́дутъ ми свята́я сiя́ во исцѣле́нiе, и очище́нiе, и просвѣще́нiе, и сохране́нiе, и спасе́нiе, и во освяще́нiе души́ и тѣ́ла, во отгна́нiе вся́каго мечта́нiя, и лука́ваго дѣя́нiя, и дѣ́йства дiа́вольскаго, мы́сленнѣ во удесѣ́хъ мои́хъ дѣ́йствуемаго, въ дерзнове́нiе и лю́бовь, я́же къ Тебѣ́; во исправле́нiе житíя и утвержде́нiе, въ возраще́нiе добродѣ́тели и соверше́нства; во исполне́нiе за́повѣдей, въ Ду́ха Свята́го обще́нiе, въ напу́тiе живота́ вѣ́чнаго, во отвѣ́тъ благопрiя́тенъ на Стра́шнѣмъ Суди́щи Твое́мъ, не въ судъ или́ во осужденiе. Ами́нь.

Молитва Іоанна Златоуста, 5

Бо́же, осла́би, оста́ви, прости́ ми согрѣше́нiя моя́, ели́ка Ти согрѣши́хъ, а́ще сло́вомъ, а́ще дѣ́ломъ, а́ще помышле́нiемъ, во́лею, или нево́лею, ра́зумомъ, или́ неразу́мiемъ, вся ми прости́, я́ко благъ и Человѣколю́бецъ; и моли́твами Пречи́стыя Твоея́ Ма́тере, свята́го царя́ изкупи́тѣля Ніко́лая, у́мныхъ Твои́хъ служи́телей и святы́хъ силъ, и всѣхъ святы́хъ отъ вѣ́ка Тебѣ́ благоугоди́вшихъ, неосужде́нно благоволи́ прiя́ти ми свято́е и пречи́стое Твое́ Тѣ́ло, и Честну́ю Кровь, во исцѣле́нiе души́ же и тѣ́ла, и во очище́нiе лука́выхъ мои́хъ помышле́нiй. Я́ко Твое́ есть Ца́рство, и Си́ла и Сла́ва, со Отце́мъ и Святы́мъ Ду́хомъ, ны́нѣ, и при́сно, и во вѣ́ки вѣко́въ. Ами́нь.

Молитва Іоанна Златоуста, 6

Нѣсмь дово́ленъ, Влады́ко Го́споди, да вни́деши подъ кровъ души́ моея́; но поне́же хо́щеши Ты я́ко Человѣколю́бецъ жи́ти во мнѣ, дерза́я приступа́ю: повелѣва́еши, да отъве́рзу двери, я́же Ты Еди́нъ созда́лъ еси́, и вни́деши со Человѣколю́бiемъ я́коже еси́; вни́деши и просвѣща́еши помраче́нный мой по́мыслъ. Вѣ́рую, я́ко сiе сотвори́ши; не бо блудни́цу со слеза́ми прише́дшую къ Тебѣ́ отъгна́лъ еси́; ниже́ мытаря́ отве́рглъ еси́ пока́явшася; ниже́ разбо́йника позна́вша Ца́рство Твое́ отгна́лъ еси́; ниже́ гони́теля пока́явшася оста́вилъ еси́ е́же бѣ; но отъ покая́нiя Тебѣ́ прише́дшія, вся въ ли́цѣ Твои́хъ друго́въ вчини́лъ еси́, Еди́нъ сый Благослове́нный всегда́, ны́нѣ и въ безконе́чныя вѣ́ки. Ами́нь.

Молитва Іоанна Златоуста, 7

Го́споди Iису́се Хрiсте́ Бо́же мой, осла́би, оста́ви, очи́сти, и прости́ ми грѣ́шному, и непотре́бному, и недосто́йному рабу́ Твоему́ прегрѣше́нiя, и согрѣше́нiя, и грѣхопаде́нiя моя́, ели́ка Ти отъ ю́ности моея́ да́же до настоя́щаго дне и ча́са согрѣши́хъ, а́ще въ ра́зумѣ и въ неразу́мiи, а́ще въ словесѣ́хъ или дѣ́лѣхъ, или́ помышле́нiихъ и мы́слехъ, и начина́нiихъ, и всѣхъ мои́хъ чу́вствахъ. И моли́твами безсѣ́менно ро́ждшiя Тя, Пречи́стыя и Приснодѣ́вы Марíи Ма́тере Твоея́, еди́ныя непосты́дныя наде́жды, и предста́тельства и спасе́нiя моего́, свята́го царя́ изкупи́тѣля Ніко́лая, Небе́сныхъ Силъ Безпло́тныхъ и всѣхъ Твои́хъ святы́хъ, сподо́би мя неосужде́нно причасти́тися пречи́стыхъ, безсме́ртныхъ, животворя́щихъ, и Стра́шныхъ Твои́хъ Та́инствъ, во оставле́нiе грѣхо́въ и въ жизнь вѣ́чную; во освяще́нiе, и просвѣще́нiе, крѣ́пость, исцѣле́нiе, и здра́вiе души́ же и тѣ́ла, и въ потребле́нiе и всесоверше́нное погубле́нiе лука́выхъ мои́хъ по́мысловъ, и помышле́нiй, и предпрiя́тiй, и нощны́хъ мечта́нiй, те́мныхъ и лука́выхъ ду́ховъ; я́ко Твое́ есть Ца́рство, и Си́ла, и Сла́ва, и честь и поклоне́нiе, со О́тцемъ и Святы́мъ Твои́мъ Ду́хомъ, ны́нѣ, и при́сно, и во вѣ́ки вѣко́въ. Ами́нь.

Молитва Iоанна Дамаскина, 8

Предъ дверьми́ хра́ма Твоего́ предстою́, и лю́тыхъ помышле́нiй не отступа́ю; но Ты Хрiсте́ Бо́же, мытаря́ оправди́вый, и ханане́ю поми́ловавый, и разбо́йнику рая́ две́ри отве́рзый, отверзи ми утро́бы человѣколю́бiя Твоего́, и прiими́ мя приходя́ща и прикаса́ющася Тебѣ́, я́ко блудни́цу, и кровоточи́вую; о́ва у́бо края́ ри́зы Твоея́ косну́вшися, удо́бь исцѣле́нiе прiя́тъ; о́ва же пречи́стѣи Твои́ но́зѣ удержа́вши, разрѣше́нiе грѣхо́въ понесе́. Азъ же окая́нный всѣ Твое́ Тѣ́ло дерза́я воспрiя́ти, да не опале́нъ бу́ду; но прiими́ мя я́коже о́ныя, и просвѣти́ моя́ душе́вная чу́вства, попаля́я моя́ грѣхо́вныя вины́; моли́твами безсѣме́нно ро́ждшiя Тя, свята́го царя́ изкупи́тѣля Ніко́лая, Неб́есныхъ Силъ Безпло́тныхъ и всѣхъ Твои́хъ святы́хъ, я́ко благослове́нъ еси́ во вѣ́ки вѣко́въ. Ами́нь.

Окончаніе молитвеннаго правила

Досто́йно е́сть, я́ко вои́стинну блажи́ти Тя Богоро́дицу, Присноблаже́нную и Пренепоро́чную и Ма́терь Бо́га на́шего. Честнѣ́йшую Херувíмъ и Славнѣ́йшую безъ сравне́нiя Серафíмъ, безъ истлѣ́нiя Бо́га Сло́ва ро́ждшую, сущу́ю Богоро́дицу Тя велича́емъ.

Сла́ва Отцу́, и Сы́ну, и Свято́му Ду́ху, и ны́нѣ, и при́сно, и во вѣ́ки вѣко́въ. Ами́нь.

Го́споди, поми́луй (трижды).

Го́споди, Iису́се Хрiсте́, Сы́не и Сло́ве Бо́жiй, ра́ди И́мени Твоего́ Свята́го, и моли́твъ Пречи́стыя Твоея́ Ма́тре, царя́ изкупи́тѣля Нiко́лая и вcѣ́хъ святы́хъ, поми́луй на́съ и мíръ Тво́й. Ами́нь.

МОЛИТВЫ ПЕРЕДЪ СВЯТОЙ ЧАШЕЙ

Когда Священник выносит Чашу для Причастия и глаголет: «Со страхом Божіимъ и вѣрою приступити», то Православному Хрістианину в обязательном порядке необходимо сделать три земных поклона. Святые угодники Божии предупреждали: «Страшное кощунство, перед Причащением Святых Христовых Тайн не делать три земных поклона!»

Затем, вместе со священником читай молитву святителя Иоанна Златоуста передъ принятіемъ Тѣла и Крови Хрістовой:

Вѣ́рую, Го́споди, и исповѣ́дую, я́ко Ты еси́ вои́стинну Хрiсто́съ Сынъ Бо́га Жива́го, прише́дый въ мiръ грѣ́шныя спасти́, отъ ни́хже пе́рвый (или первая) есмь азъ. Еще́ вѣ́рую, я́ко сiе́ есть са́мое Пречи́стое Тѣ́ло Твое́, и сiя́ есть са́мая Честна́я Кровь Твоя́. Молю́ся у́бо Тебѣ́: поми́луй мя, и прости́ ми прегрѣ́шенiя моя́, во́льная и нево́льная, я́же сло́вомъ, я́же дѣ́ломъ, я́же вѣ́дѣнiемъ и невѣ́дѣнiемъ; и сподо́би мя неосужде́нно причасти́тися Пречи́стыхъ Твои́хъ Та́инствъ, во оставле́нiе грѣ́ховъ и въ Жизнь Вѣ́чную. Ами́нь.

Ве́чери Твоея́ та́йныя днесь, Сы́не Бо́жiй, прича́стника мя прiими́; не бо враго́мъ Твои́мъ та́йну повѣ́мъ, ни лобза́нiя Ти дамъ я́ко iу́да, но я́ко разбо́йникъ исповѣ́даю Тя: помяни́ мя Го́споди во Ца́рствiи Твое́мъ. Ами́нь.

После чего, сложи на груди крестообразно руки (левая рука лежит на груди, права – поверх левой) и подходи ко Причастию. Пока стоишь ко Причастию читай про себя следующие молитвы:

Се приступа́ю къ Боже́ственному Причаще́нiю,

Содѣ́телю, да не опали́ши мя прiобще́нiемъ;

Огнь бо еси́ недосто́йныя попаля́яй.

Но у́бо очи́сти мя отъ вся́кiя скве́рны.

Боготворя́щую Кровь ужасни́ся человѣ́че зря;

Огнь бо есть недосто́йныя попаля́яй.

Боже́ственное Тѣ́ло и обожа́етъ мя, и пита́етъ;

обожа́етъ духъ, умъ же пита́етъ стра́нно.

Услади́лъ мя еси́ любо́вiю Хрiсте́, и измѣни́лъ мя еси́ Боже́ственнымъ Твои́мъ раче́нiемъ; но попа́ли огне́мъ невеще́ственнымъ грѣ́хи моя́, и насы́титися е́же въ Тебѣ́ наслажде́нiя сподо́би; да лику́я возвелича́ю Бла́же, два прише́ствiя Твоя́.

Во свѣ́тлостехъ Святы́хъ Твои́хъ, ка́ко вни́ду недосто́йный? А́ще бо дерзну́ совни́ти въ черто́гъ, оде́жда мя облича́етъ, я́ко нѣсть бра́чна, и свя́занъ изве́рженъ бу́ду отъ А́нгеловъ; оч́исти Го́споди, скве́рну души́ моея́, и спаси́ мя, я́ко Человѣколю́бецъ.

Влады́ко Человѣколю́бче Го́споди Iису́се Хрiсте́ Бо́же мой, да не въ судъ ми бу́дутъ Свята́я сiя́, за е́же недосто́йну ми бы́ти; но во очище́нiе и освяще́нiе души́ же и тѣ́ла, и во обруче́нiе бу́дущiя жи́зни и Ца́рствiя. Ами́нь.

Мнѣ же е́же прилѣпля́тися Бо́гу, бла́го есть, полага́ти во Го́сподѣ упова́нiе спасе́нiя моего́.

Ве́чери Твоея́ та́йныя днесь, Сы́не Бо́жiй, прича́стника (или прича́стницу) мя прiими́; не бо враго́мъ Твои́мъ та́йну повѣ́мъ, ни лобза́нiя Ти дамъ я́ко iу́да, но я́ко разбо́йникъ исповѣ́даю Тя: помяни́ мя Го́споди во Ца́рствiи Твое́мъ. Ами́нь.

Если не можешь запомнить сии молитвы, то можно читать про себя молитву мытаря:

Бо́же, ми́лостивъ бу́ди мнѣ грѣ́шному!

Если перед Причащением обуревает маловерие, нужно про себя читать молитву Святого Апостола Фомы (Ин. 20:28):

Госпо́дь мой и Богъ мой!

Если не ощущаешь в себе священного благоговения (страха Божия), то можно повторять про себя слова из молитвы свят. Василия Великого:

Го́споди, научи́ мя соверша́ти святы́ню во стра́се Твое́мъ!

[2] Если будет Двунадесятый праздник то, вместо данных тропарей глаголи: тропарь праздника «Слава… И ныне...» кондак праздника